Ника Гварамия

ნიკა გვარამია დღეს დაიკითხება

71
(განახლებულია 13:42 02.08.2019)
გამოძიება სამაუწყებლო კომპანიის 9%-იანი წილის ყოფილი მფლობელის ნინო ნიჟარაძის საჩივრის საფუძველზე დაიწყო.

თბილისი, 2 აგვისტო — Sputnik. საქართველოს პროკურატურამ ტელეკომპანია „რუსთავი 2"-ის ყოფილი დირექტორი ნიკა გვარამია გამოკითხვაზე დაიბარა.

როგორც საქართველოს პროკურატურის მიერ გუშინ გავრცელებულ განცხადებაშია ნათქვამი, ნიკა გვარამიას გამოკითხვა სამაუწყებლო კომპანია „რუსთავი 2"-ის კანონიერი ინტერესის საწინააღმდეგოდ უფლებამოსილების ბოროტად გამოყენების, მისი კუთვნილი დიდი ოდენობით თანხების სამსახურებრივი მდგომარეობის გამოყენებით მითვისების და ქონების მოჩვენებითი ან/და თვალთმაქცური გარიგებით გადამალვის საქმეზე მიმდინარე გამოძიების ფარგლებში მოხდება.

საქმეზე გამოძიების დაწყებას საფუძვლად დაედო სამაუწყებლო კომპანია "რუსთავის 2"-ის 9%-იანი წილის ყოფილი მფლობელის ნინო ნიჟარაძის ადვოკატის მიერ 16 ივლისს შეტანილი განცხადება ტელეკომპანიის ხელმძღვანელების მხრიდან შესაძლო დანაშაულის ჩადენის თაობაზე. ნიჟარაძის ადვოკატის განმარტებით, ნიკა გვარამიამ ტელეკომპანია 30-50 მილიონ ლარამდე შემოსავლით მიზანმიმართულად აზარალა, ეს თანხა კი, ტელევიზიის ნაცვლად, 2015-2017 წლებში სარეკლამო კომპანია „ინტერ მედიამ“ მიიღო.

ნიკა გვარამიამ პროკურატურაში ჩვენების მიცემაზე უარი განაცხადა და მაგისტრატი მოსამართლის თანხლებით სასამართლოში დაკითხვა მოითხოვა.

გვარამიას დაბარებას წინ უძღოდა მის მიერ ახალი ტელევიზიის შექმნის შესახებ განცხადების გაკეთება – სწორედ ამას მიიჩნევს არხის ყოფილი გენერალური დირექტორი ერთ-ერთ მიზეზად.

„ჩემი დაშინება რომ არ გამოვა, ეგ იციან. არ ვიცი, ახლა იზოლაციას თუ გეგმავენ მოგონილი საქმით, გადაიხადონ ამაშიც პოლიტიკური ფასი… სანამ მე ცოცხალი ვარ, ყველაფერი გამომივა... „რუსთავი 2"-ის დახურვის შემდეგ აუცილებლად უნდა არსებობდეს ადგილი, სადაც ზუსტად იგივენაირად იქნება მწვავედ და კრიტიკულად ნათქვამი სიტყვა ყველას გასაგონად და ასეთი ადგილი იარსებებს“, – განაცხადა გვარამიამ.

გარდა ამისა, გუშინ პროკურატურა გამოძიებისათვის საჭირო დოკუმენტაციისა და ელექტრონული ინფორმაციის ამოღების მიზნით „რუსთავი2"-ის კონტრაქტორ საწარმოებში – „ინტერ მედიასა" და "ინტერ მედია პლუსში" შევიდა.

სისხლის სამართლის საქმეს ასევე დაერთო „რუსთავის 2"-ის ამჟამინდელი დირექტორის პაატა სალიას განცხადება შესაძლო დანაშაულის თაობაზე, რამაც, სავარაუდოდ, დიდი ოდენობით ზიანი მიაყენა სამაუწყებლო კომპანიას.

რამდენიმე დღის წინ ცნობილი გახდა, რომ პაატა სალია ტელეკომპანიაში ფინანსური აუდიტის ჩატარებას გეგმავს. მისი განცხადებით, ტელეკომპანიის ფინანსური მხარე სავალალო მდგომარეობაში დახვდა.

ტელეკომპანია „რუსთავი 2" ახალ რეალობაში 18 ივლისიდან აღმოჩნდა, მას შემდეგ, რაც ევროპის ადამიანის უფლებათა სასამართლომ დაუშვებლად მიიჩნია ტელეკომპანია „რუსთავი 2"-ის იურისტებისა და მისი მფლობელების პრეტენზიები საქართველოს სასამართლოსადმი. ტელეკომპანიამ სტრასბურგს მას შემდეგ მიმართა, რაც საქართველოს უზენაესმა სასამართლომ 2017 წლის მარტში ძალაში დატოვა ორი ქვედა ინსტანციის სასამართლოს გადაწყვეტილება „რუსთავი 2"-ის ყოფილი მფლობელისთვის, ბიზნესმენ ქიბარ ხალვაშისა და მისი კომპანია „პანორამასთვის" გადაცემის შესახებ.

ამის შემდეგ „რუსთავი2"-ის წილები ბიზნესმენ ქიბარ ხალვაშსა (60%) და მის კომპანია „პანორამაზე" (40%) გადაფორმდა. 18 ივლისსვე ქიბარ ხალვაშმა „რუსთავი 2"-ის გენერალურ დირექტორად პაატა სალია დანიშნა, რომელმაც ამ პოზიციაზე ნიკა გვარამია შეცვალა.

71
თემები:
დავა „რუსთავი 2"-ის ირგვლივ (194)
ნამახვანჰესის მოწინააღმდეგეთა აქცია თბილისში

ნამახვანჰესის საკითხზე ევროკავშირის მედიაციით შეხვედრა დასრულდა: რა გადაწყდა

126
(განახლებულია 22:50 12.06.2021)
რამდენიმესაათიან შეხვედრაზე გადაწყდა, რომ რიონის ხეობაში დეესკალაცია მოხდება, მთავრობა ენერგოუსაფრთხოების 10-წლიან დოკუმენტს შეიმუშავებს, ევროკავშირის წარმომადგენლები კი „ნამახვანჰესის“ მშენებლობის რისკებს შეაფასებენ.

თბილისი, 12 ივნისი – Sputnik. „ნამახვანჰესის“ მშენებლობის მოწინააღმდეგეთა და მთავრობის წარმომადგენლებს შორის შეხვედრა, რომელიც ევროკავშირის ენერგეტიკული გაერთიანების დავების გადაწყვეტისა და მოლაპარაკების ცენტრის წარმომადგენლების შუამავლობით გაიმართა, სამ ძირითად საკითხზე შეთანხმებით დასრულდა.

შეხვედრა, რომელსაც მედიატორების გარდა, „ნამახვანჰესის“ მშენებლობის მოწინააღმდეგე აქტივისტები და გარემოს დაცვის და ეკონომიკის სამინისტროს წარმომადგენლები ესწრებოდნენ, ნატახტარში დღეს დილით ადრე დაიწყო და საღამოს დასრულდა.

შეთანხმება შემდეგ სამ საკითხზე მოხდა:

  1. ევროკავშირის წარმომადგენლები სამოქალაქო საზოგადოებასა და მთავრობასთან ერთად „ნამახვანჰესის“ პროექტის რისკებს შეაფასებენ. რისკების აღმოჩენის შემთხვევაში მათი აღმოფხვრის მიზნით მედიატორები დიალოგს უზრუნველყოფენ.
  2. რიონის ხეობაში უნდა მოხდეს დეესკალაცია, რკინის ბარიერების მოხსნა, საპოლიციო ძალების გაყვანა და იქ მყოფი ადამიანებისთვის კონსტიტუციით გათვალისწინებული უფლების უზრუნველყოფა გადაადგილების თავისუფლებასთან დაკავშირებით.
  3. მთავრობამ უნდა შეადგინოს დოკუმენტი, რომელიც განსაზღვრავს მომავალი 10 წლის განმავლობაში ენერგოუსაფრთხოების პოლიტიკას, მათ შორის განხილული იქნება ჰიდროელექტროსადგურების წილი და როლი მთლიან ენერგოუსაფრთხოებაში. შემდეგ მოხდება ამ დოკუმენტის განხილვა, სხვა ალტერნატიულ საშუალებებთან ერთად.
„სამოქალაქო საზოგადოებაც აქტიურად იქნება ჩართული ამ განხილვებში და რა თქმა უნდა, არ იქნება ეს დოკუმენტი დოკუმენტისთვის, არამედ აუცილებლად უნდა იყოს აღსრულებადი“, - განაცხადა ევროკავშირის ენერგეტიკული გაერთიანების დავების გადაწყვეტის ცენტრის ხელმძღვანელმა, დირკ ბუშლემ.

მისი თქმით, მომავალში ევროკავშირის მხრიდან მედიაციის გაგრძელების საკითხი მხარეების მიერ აღნიშნული პირობების შესრულებაზეა დამოკიდებული.

„ეს პირობები ვადებში ეფექტურად თუ აღსრულდება, რა თქმა უნდა მედიაცია აუცილებლად გაგრძელდება“, – განაცხადა დირკ ბუშლემ.

პროტესტების ორგანიზატორის, ვარლამ გოლეთიანის განცხადებით, შეხვედრაზე საპროტესტო აქციებზე დაკავებული აქტივისტების საკითხიც განიხილებოდა.

„მკაფიოდ დადგა დაკავებული ბიჭების საკითხი. მოწოდება გაკეთდება პროკურატურის მისამართით, რომ უნდა გათავისუფლდნენ ჩვენი თანამებრძოლები, მათ შორის სამინისტრომაც ჩაინიშნა ეს მიმართვა პროკურატურის მისამართით. ასევე, ჩვენთვის მნიშვნელოვანია ჩვენი თანამებრძოლების პოტენციური დაკავებები, რაც შეიძლება მოხდეს იმიტომ, რომ ჩვენ გვაქვს ამაზე ინფორმაცია“, - განაცხადა გოლეთიანმა.

მან აღნიშნა, რომ შეთანხმების თანახმად, საპოლიციო ძალები უნდა გაიყვანონ რიონის ხეობიდან, ხოლო დემონსტრანტები სოფელ ნამოხვანში დაბრუნებას შეძლებენ.

„შევთანხმდით, რომ თუკი ეს პირობები შესრულდება შემდეგ პარასკევამდე, ისევ შევიკრიბებით და დადგება შემდგომი პირობის განხილვის საკითხი, რაც გულისხმობს სამუშაო პროცესის შეჩერებას უშუალოდ ხეობაში“, – განაცხადა გოლეთიანმა.

„ნამახვანჰესის“ მშენებლობის წინააღმდეგ პროტესტი შვიდ თვეზე მეტია გრძელდება. მიუხედავად იმისა, რომ პროექტი ქვეყნის ენერგოდამოუკიდებლობისთვის მნიშვნელოვანია, მის წინააღმდეგ პროტესტი სულ უფრო მძაფრდება. პროტესტს ორი მიზეზი აქვს: ერთი - ესაა საფრთხე, რომელიც მომავალი კაშხლის შესაძლო გარღვევამ შეიძლება შეუქმნას მთელ იმერეთის რეგიონს, მეორე - საქართველოში თურქული კომპანია Enka-სთვის დიდი რაოდენობით მიწების 99 წლის ვადით გადაცემაა.

 

126
ამირან გამყრელიძე

რომელ დაწესებულებებს მიენიჭება ე.წ. მწვანე სტატუსი: ამირან გამყრელიძის განმარტება

61
უახლოეს მომავალში საკოორდინაციო საბჭო ვაქცინის ორი დოზით აცრილი მოქალაქეებისთვის გარკვეული შეღავათების საკითხს განიხილავს.

თბილისი, 12 ივნისი - Sputnik. ქვეყანაში ვაქცინაციის პროცესის სტიმულირებისთვის დაწესებულებებს, სადაც ყველა თანამშრომელი კორონავირუსის საწინააღმდეგო ვაქცინის ორივე დოზით იქნება აცრილი, შესაძლოა ე.წ. მწვანე სტატუსი მიენიჭოს, განაცხადა დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ.

აღნიშნულთან დაკავშირებით ამირან გამყრელიძე აჭარისა და გურიის რეგიონში სამედიცინო ცენტრების წარმომადგენლებთან შეხვედრებს მართავს.

„დღესაც და გუშინაც აჭარაში საუბარი გვქონდა ე.წ. „მწვანე დაწესებულებებზე“. ეს ნიშნავს, რომ იმ სამედიცინო დაწესებულებაში, სკოლაში თუ რესტორანში, ყველა აცრილია“, - განაცხადა ამირან გამყრელიძემ.

გამყრელიძე ასევე აცხადებს, რომ კორონავირუსის საწინააღმდეგო ვაქცინის ორივე დოზით აცრილი მოქალაქეებისთვის საკოორდინაციო საბჭო უახლოეს მომავალში გარკვეული შეღავათების საკითხზე იმსჯელებს.

„საუბარია, მაგალითად, კომენდანტის საათთან, მოგზაურობასთან დაკავშირებით, სხვადასხვა წამახალისებელ ღონისძიებაზე. ეს აუცილებელია“, - აღნიშნა ამირან გამყრელიძემ.

საქართველოში ვაქცინაცია 15 მარტიდან AstraZeneca-ს, 30 მარტიდან კი Pfizer-ის ვაქცინებით დაიწყო. ვაქცინაციის პროცესში 4 მაისიდან ჩინური Sinopharm-ი ჩაერთო. პირველ ეტაპზე ვაქცინაცია მედპერსონალით დაიწყო, თუმცა შემდგომ პროგრამა გაფართოვდა და ამჟამად იმუნიზაციის პროცესში ჩართვა 18 წელს ზემოთ პირებისთვისაც არის შესაძლებელი.

ბოლო მონაცემებით, საქართველოში სულ 202.314 ადამიანია აცრილი, სრულად, ორი დოზით ვაქცინირებულია 63.832 ადამიანი. ბოლო 24 საათში აიცრა 5.283 ადამიანი.

დღეისათვის ორჯერადად აცრილია საქართველოს მოსახლეობის 1,6%.

61

„ადამიანის ხორცი“: ესპანელი ვეგანების შემზარავი პერფორმანსი მადრიდში - ვიდეო

0
(განახლებულია 23:06 12.06.2021)
ესპანელმა აქტივისტებმა, რომლებიც ცხობველების ხოცვასა და ხორცის ჭამას აპროტესტებდნენ, მადრიდის ქუჩაში შთამბეჭდავი პერფორმანსი მოაწყეს. ნახეთ ვიდეო, რა ღირს ადამიანის ხორცი

ესპანელმა ვეგანებმა პერფორმანსი მოაწყეს, რისთვისაც გაშიშვლდნენ, წითელი საღებავი გადაისხეს და პენოპლასტის დაფებსა და პოლიეთილენის პაკეტებში ისე შეიფუთნენ, როგორც ჩვეულებისამებრ ხორცპროდუქტებია დაფასოებული. 

ამის შემდეგ პირდაპირ მოედანზე დაწვნენ ხალხის თვალწინ.

სანახაობა მეტად ნატურალისტური და ერთგვარად შემზარავიც იყო იმის გათვალისწინებით, რომ შეფუთვაზე დატანილ მარკირებაზე ხორცის ტიპიც ეწერა, „ვარგისიანობის“ ვადაც და ფასიც: „ადამიანის ხორცი, 1 კგ ფასი 3,08 ევრო“.

    

0