თბილისი, 7 ივნისი — Sputnik. ყაზბეგში გუშინ მომხდარი ავიაკატასტროფის დროს ერთ-ერთი გარდაცვლილი ახალგაზრდა მამაკაცი, 27 წლის კოტე საცერაძეა, რომელიც რუსთავში ცხოვრობდა და ყაზბეგში გიდად მუშაობდა. ინფორმაციას Rustavi 2 ავრცელებს.
გარდაცვლილი კოტე საცერაძის მეზობლები ყვებიან, რომ ახალგაზრდა მამაკაცი უმეტეს დროს ყაზბეგში ატარებდა. ის უცხოელ ტურისტებს ემსახურებოდა. მეზობლები ამბობენ იმასაც, რომ სავარაუდოდ, მას ხშირად უწევდა იმ ვერტმფრენით მგზავრობა, რომელმაც კატასტროფა განიცადა.
გარდაცვლილის მეგობარი სოციალურ ქსელში კოტე საცრაძეზე წერს და ფოტოს აქვეყნებს, სადაც კოტე მის კლასელთან, მიშიკო დვალიშვილთან ერთადაა გადაღებული, რომელიც 18 წლის ასაკში ბირთვისის კლდიდან გადავარდა და დაიღუპა.
,,ორი სიცოცხლით სავსე ,,რეცელი"... ჩემი გულის ნაწილი წაიღო... ახლა კოტე... ესეც მთაში...სიტყვებს ვერ ვპოულობ, საშინლად დათრგუნული და განადგურებული ვარ.
არ ვიცი, როგორ უნდა ანუგეშო ასეთ დროს დედა", - წერს კოტეს მეგობარი.
ეკონომიკის სამინისტროს სამოქალაქო ავიაციის სააგენტოს ინფორმაციით, ყაზბეგში ჩამოვარდნილი ვერტმფრენი BELL-505 ტიპის, ამერიკულ-კანადური წარმოების იყო, გამოშვებულია 2018 წელს.