გაფიცული მეშახტეების აქცია ჭიათურაში

ჭიათურაში მეშახტეების პრობლემების მოგვარებაში შესაძლოა ირაკლი კობახიძე ჩაერთოს

90
(განახლებულია 15:03 26.05.2019)
პარლამენტის თავმჯდომარე იმედს იტოვებს, რომ მეშახტეები და Georgian Manganese ორ-სამ დღეში შეთანხმებას მიაღწევენ

თბილისი, 26 მაისი — Sputnik. პარლამენტის თავმჯდომარე ირაკლი კობახიძემ მწუხარება გამოთქვა იმასთან დაკავშირებით, რომ ჭიათურაში მანგანუმის მადნის მომპოვებელი საწარმოს მეშახტეებსა და კომპანია Georgian Manganese-ს შორის შეთანხმება მიღწეული არ არის და განაცხადა, რომ საჭიროების შემთხვევაში მზად არის ჩაერიოს.

მაღაროელების გაფიცვა 15 მაისს დაიწყო. თანდათანობით მას ყველა მაღაროელი შეუერთდა - დაახლოებით 3 ათასი ადამიანი. ნაწილმა ქალაქის ცენტრში, რაიონულ საკრებულოსთან, სკვერში, კარვები გაშალა და შიმშილობა გამოაცხადა. ზოგიერთმა გაფიცულმა პირიც კი ამოიკერა.

„ჩვენც გვქონდა შეხვედრა მაღაროელებთან, როდესაც ჭიათურაში პარტიის გენერალურ და პოლიტიკურ მდივანთან ერთად ვიყავი. მაღაროელებს თანადგომასა და მხარდაჭერას დავპირდით იმ მოლაპარაკებებში, რომელიც კომპანიასთან წარმოებს. სამწუხაროა, რომ შეთანხმების მიღწევა დღემდე ვერ მოხერხდა, თუმცა მოლაპარაკებები გრძელდება. საჭიროების შემთხვევაში, ჩვენ მაშინაც განვაცხადეთ და კიდევ ერთხელ ვადასტურებთ, რომ საქმეში დამატებით ნებისმიერ დროს ჩავერთვებით. თუ დავინახავთ, რომ მოლაპარაკებები ჩიხში შედის, მყისიერად ჩავერთვებით“, – განაცხადა ირაკლი კობახიძემ პირველი არხის ეთერში.

კობახიძე იმედს იტოვებს, რომ მოლაპარაკებები წარმატებით დასრულდება და ვარაუდობს, რომ ამისათვის ორი-სამი დღის ლოდინია საჭირო.

მეშახტეების მოთხოვნები ოთხი პუნქტიდან შედგება: „ჯორჯიან მანგანეზში" დასაქმებულთა ხელფასების მომატება 50%-ით; უკეთესი სადაზღვევო პაკეტი დასაქმებულებისა და მათი ოჯახის წევრებისათვის; გაფიცვისა და მომდევნო პერიოდში ყველა აქტივისტის დაცვა ზეწოლისაგან და მაღაროელთა გაფიცვის კანონიერი უფლების აღიარება; ქალაქში დიდი სატვირთო მანქანების გადაადგილების აკრძალვა.

ამოკერილი პირები - ჭიათურელი მაღაროელები გაფიცვას განაგრძობენ >>

ადრე ჯანდაცვის მინისტრმა დავით სერგეენკომ განაცხადა, რომ უწყება მზად არის მოაგვაროს მეშახტეების ყველა პრობლემა, ხელფასების გარდა.

Georgian Manganese-ის ყველა საწარმოში მუშაობა შეჩერებულია.  საუბარია ცხრა შახტზე, რამდენიმე ფაბრიკა-ქარხანასა და ავტოპარკზე.

Georgian Manganese-ის წარმომადგენელმა პარასკევს განაცხადა, რომ კომპანია მზად არის შეასრულოს მეშახტეების მოთხოვნები და ხელფასები ეტაპობრივად 50%-ით გაუზარდოს, მაგრამ მხოლოდ იმ შემთხვევაში, თუ ისინი მუშაობას განაახლებენ. მეშახტეებმა არ დაუჯერეს ამ დაპირებას და გაფიცვა განაგრძეს.

ადრე კი Georgian Manganese-მა განაცხადა, რომ ხელფასების 50%-იანი მომატების შესახებ მოთხოვნა არარეალურია და მეშახტეები თავისი გაფიცვით უკვე კანონის ფარგლებს ცდებიან.

„ჯორჯიან მანგანეზი" ჭიათურაში მანგანუმის მადნის მომპოვებელი მაღაროს ოპერატორია. ის „ჯორჯიან ემერიქენ ელოის" (Georgian American Alloys) ჰოლდინგის შემადგენლობაში შედის. „ჯორჯიან მანგანეზის" გარდა, ჰოლდინგი აერთიანებს ვარციხის ჰიდროელექტროსადგურსა და კლინიკა „ფერომედს". კომპანიის სათავო ოფისი მაიამიში მდებარეობს.

„როგორც ჩიკაგოში 133 წლის წინ“ - პროფკავშირებმა კანცელარიასთან საპროტესტო აქცია გამართეს >>

მანგანუმის მადნისა და მანგანუმის ოქსიდებისა და დიოქსიდების ექსპორტს მნიშვნელოვანი ადგილი უჭირავს საქართველოს ექსპორტში. მანგანუმის მადნისა და კონცენტრატის ექსპორტმა 2019 წლის იანვარ-მარტში 1,8 მილიონი დოლარი შეადგინა, რაც სამჯერ აღემატება 2018 წლის იმავე პერიოდის ანალოგიურ მაჩვენებელს.

ჭიათურაში მანგანუმის მადანს 1879 წლიდან მოიპოვებენ.

90
თემები:
ჭიათურაში მეშახტეები გაიფიცნენ (9)
ჯარიმა პარკირების წესების დარღვევისთვის

საჯარიმო ქვითრის ჩაბარების პროცედურა იცვლება

68
მოქმედი კანონმდებლობით, გზავნილის განმახორციელებელი ვალდებულია, პირის რეგისტრაციის მისამართზე მიიტანოს გზავნილი და ჩაუბარებლობის შემთხვევაში, შესაბამისი წერილობითი უკუგზავნილი შეადგინოს.

თბილისი, 28 მაისი – Sputnik. პირებს, რომლებიც საჯარიმო ქვითრის ჩაბარებისას მის მიღებაზე უარს ორჯერ განაცხადებენ, ქვითრის ჩაბარება მაინც ჩაეთვლებათ, იუწყება საზოგადოებრივი მაუწყებლის პირველი არხი.

შესაბამისი ცვლილებები „ადმინისტრაციულ სამართალდარღვევათა კოდექსში“ შედის, მათი ინიციატორები ზაზა გაბუნია, მერაბ ქვარაია, კობა ლურსმანაშვილი და გოგა გულორდავა არიან.

ინიციატორების განმარტებით, ცვლილებების მომზადების მიზეზი არსებული პრაქტიკაა, რომელიც ცხადყოფს, რომ ჯარიმების აღსრულების მოქმედი მექანიზმი ეფექტური არ არის. კერძოდ, პრობლემურია პირისთვის საჯარიმო ქვითრის ჩაბარების პროცედურა.

„სამართალდამრღვევი მიმართავს სხვადასხვა ხერხს, რათა ხანდაზმულობის ვადის გასვლამდე, რომელიც მოქმედი კანონმდებლობით ექვს თვეს შეადგენს, თავი აარიდოს საჯარიმო ქვითრის ჩაბარებას. არსებული მონაცემებით, კალენდარული წლის განმავლობაში დაფიქსირებულ სამართალდარღვევებთან დაკავშირებით გაცემული ჯარიმების რაოდენობის მხოლოდ დაახლოებით 50 პროცენტის აღსრულება ხდება. შესაბამისად, აღნიშნული ნათლად წარმოაჩენს აღწერილი აღსრულების მექანიზმის არაეფექტურობას“, – აღნიშნულია კანონპროექტის განმარტებით ბარათში.

კანონპროექტის თანახმად, საჯარიმო ქვითარი ჩაბარებულად ჩაითვლება იმ შემთხვევაშიც, თუ მის მიღებაზე უარს იტყვიან სამართალდამრღვევი პირის ოჯახის წევრები. ესენი კი არიან – მეუღლე, შვილი, ნაშვილები, შვილიშვილი, შვილიშვილის შვილი და მისი შვილი, მშობელი და მშვილებელი, და, ძმა, დისწული, ძმისწული და მათი შვილები, ბებია და პაპა, ბებიის დედ-მამა და პაპის დედ-მამა, ბიძა, დეიდა, ბიცოლა, მამიდა და მასთან მუდმივად მცხოვრები სხვა სრულწლოვანი პირი.

მოქმედი კანონმდებლობით, გზავნილის განმახორციელებელი ვალდებულია, პირის რეგისტრაციის მისამართზე მიიტანოს გზავნილი და ჩაუბარებლობის შემთხვევაში, შესაბამისი წერილობითი უკუგზავნილი შეადგინოს.

68
თემები:
ტრანსპორტი საქართველოში
ამირან გამყრელიძე

რომელი ქვეყნებიდან ვერ მიიღებს საქართველო ტურისტებს - ამირან გამყრელიძე

92
(განახლებულია 21:01 28.05.2020)
საქართველო 1 ივლისიდან საერთაშორისო ტურისტების მიღებას გეგმავს, ხოლო 15 ივნისიდან კი შიდა ტურიზმის გახსნაა დაანონსებული.

თბილისი, 28 მაისი — Sputnik. კორონავირუსით მაღალდაზიანებული ქვეყნებიდან საქართველო ტურისტებს ჯერჯერობით ვერ მიიღებს, განუცხადა საზოგადოებრივი მაუწყებლის პირველ არხს დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ.

საქართველო 1 ივლისიდან საერთაშორისო ტურისტების მიღებას გეგმავს, ხოლო 15 ივნისიდან კი შიდა ტურიზმის გახსნაა დაანონსებული.

„რა თქმა უნდა, ჯერ ვერ მივიღებთ ტურისტებს მაღალდაზიანებული ქვეყნებიდან. მიმდინარეობს მუშაობა იმ პროტოკოლზეც, როგორი უნდა იყოს ტურისტების მიღებისა და მათზე ეპიდზედამხედველობის დაკვირვების სისტემა, რათა მინიმუმამდე დავიყვანოთ ქვეყანაში ინფექციის შემოტანის რისკი. მოდით, ამ კითხვაზე პასუხს დავუბრუნდეთ ერთი კვირის, 10 დღის შემდეგ, როცა ამ საკითხზე უფრო მეტად ვიქნებით ჩამოყალიბებული“, - განაცხადა ამირან გამყრელიძემ.

მისივე თქმით, დაავადებათა კონტროლის ცენტრს აქვს თავისი რეკომენდაციები, მაგრამ საბოლოო გადაწყვეტილებას იღებს საკოორდინაციო საბჭო. 

„ჩამოვყალიბდებით წესებზე, რომელიც დამტკიცდება შესაბამისი მარეგულირებელი აქტით“, – აღნიშნა გამყრელიძემ.

პანდემიის გამო ახალი გამოწვევების ფონზე ხელისუფლების მიერ შემუშავებული კონცეფციის თანახმად, საქართველო იმიჯს შეიცვლის და პოზიციონირდება როგორც უსაფრთხო ქვეყანა.

ტურისტების მიღებამდე საქართველოს ხელისუფლება ტურიზმის მსოფლიო ორგანიზაციისა და ჯანმოს მიერ რეკომენდებული უსაფრთხოების სტანდარტების დანერგვას უზრუნველყოფს. ეს შეეხება როგორც აეროპორტებსა და საკონტროლო-გამშვებ პუნქტებს, ისე სასტუმროებს, გიდების მომსახურებას, კვების ობიექტების, ასევე ნებისმიერი სახეობის ტრანსპორტის მუშაობას.

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/28 მაისი >>

საქართველოში ჩამოსული ტურისტები ე.წ. „მწვანე ზონებში“ დაისვენებენ. ტურისტული სექტორი და სასტუმროები უსაფრთხოების წესების დაცვის მიზნით ტურიზმის მსოფლიო ორგანიზაციისა და ჯანდაცვის მსოფლიო ორგანიზაციის მიერ შემუშავებულ სპეციალურ რეკომენდაციებს მიიღებენ.

მთავრობის გეგმის მიხედვით, საქართველოში ჩამოსული ტურისტები დაისვენებენ ისეთ კურორტებზე, როგორიცაა წყალტუბო, ბორჯომი, აბასთუმანი, ბაკურიანი, გუდაური, ბათუმი და ა.შ.

92
თემები:
COVID-19 საქართველოში
სომხეთში კარანტინი გახანგრძლივდა

საქართველოს მზად არის დაეხმაროს სომხეთს კორონავირუსთან ბრძოლაში

0
საქართველოს და სომხეთს ჯანდაცვის სფეროში თანამშრომლობის კარგი გამოცდილება გააჩნიათ, განაცხადა საქართველოს მთავარმა ეპიდემიოლოგმა

თბილისი, 28 მაისი — Sputnik. თუ სომხეთის დაავადებათა კონტროლის ცენტრის წარმომადგენლები ქართველ კოლეგებს დახმარებისთვის მიმართავენ, ისინი მას მიიღებენ, განაცხადა საქართველოს დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ ონლაინ ბრიფინგზე.

სომხეთის ჯანდაცვის მინისტრმა არსენ ტოროსიანმა ადრე განაცხადა, რომ ეპიდსაწინააღმდეგო სისტემა და ჯანდაცვა საქართველოში განსხვავდება სომხურისგან, თუმცა არა საუკეთესო მხრიდან. მან ასევე აღნიშნა, რომ სომხეთი საკუთარ სტატისტიკას გამჭვირვალედ ავრცელებს, ხოლო საქართველოში ინფიცირებულთა დათვლის მეთოდოლოგიაში ეჭვი შეიტანა.

„იცით, რომ ამ ერთი კვირის წინ იყო პატარა გაუგებრობა. ჩვენ მოძმე ერები ვართ, ერთმანეთს ყოველთვის მხარში ვუდგევართ და კარგი ურთიერთობა გვაქვს სომხეთის დაავადებათა კონტროლის ეროვნულ ცენტრთან... თუ სომხეთის დაავადებათა კონტროლის ცენტრი, როგორც დაავადებათა კონტროლის ცენტრს ჩვენ დაგვიყენებს საკითხს, რომ მათ სჭირდებათ რაიმე დახმარება, ის, რაც ჩვენი კომპეტენციის ფარგლებშია, იგივე ტესტირებასთან ან კიდევ სხვა საკითხებთან დაკავშირებით, ჩვენ მზად ვართ“, - განაცხადა გამყრელიძემ.

გამყრელიძემ უპასუხა ჟურნალისტის შეკითხვას, არის თუ არა მზად საქართველო კორონავირუსით დაავადებული პაციენტების მისაღებად.

„რაც შეეხება სამკურნალო პროცესს, მე დარწმუნებული ვარ, რომ საქართველოს მთავრობა და ჯანდაცვის სამინისტრო უარს კი არა პირიქით, ყველა ღონეს იხმარს თუ სომხეთს ეს დახმარება სჭირდება. პირველ რიგში, სომხეთის ჯანდაცვის სამინისტრომ უნდა დააყენოს ეს საკითხი და მაშინ დარწმუნებული ვარ, საქართველო სიამოვნებით მიიღებს. მოგეხსენებათ, ქართველები იყვნენ პირველები, რომლებიც სპიტაკის მიწისძვრის დროს ჩავიდნენ სპიტაკში სხვა ერებს შორის. ჩვენ მზად ვართ ყოველთვის“, – განაცხადა გამყრელიძემ.

ასევე, გამყრელიძის თქმით, საქართველოს და სომხეთს ჯანდაცვის სფეროში თანამშრომლობის კარგი გამოცდილება გააჩნიათ.

ბოლო დღე-ღამეში სომხეთში კორონავირუსით ინფიცირების 442 ახალი შემთხვევა გამოვლინდა. 28 მაისის მონაცემებით, ქვეყანაში იყო 8 216 დადასტურებული შემთხვევა, კორონავირუსით გამოწვეული გართულებების გამო გარდაიცვალა 113 ადამიანი, კორონავირუსის ინფექციის მქონე პაციენტების რაოდენობა, რომლებიც სხვა მიზეზებით დაიღუპნენ - 44.

ახალი მონაცემებით, გამოჯანმრთელდა 3 287 ადამიანი. მკურნალობას 4 772 პაციენტი გადის. ქვეყანაში სულ 54 931 ტესტი ჩატარდა.

რაც შეეხება საქართველოს, ამჟამად კორონავირუსი დადასტურებული აქვს 738 ადამიანს. გამოჯანმრთელებულთა რაოდენობამ 573-ს (77,95%) მიაღწია. კარანტინის რეჟიმში იმყოფება 3076, ხოლო სტაციონარებში დაკვირვების ქვეშ 250 პაციენტია. გარდაიცვალა 12 ადამიანი. მაისის ბოლოსთვის ჩატარდა 46 ათასი ტესტი, ყოველდღიურად ტესტი 1600 ადამიანს უტარდება.

დღეისათვის საქართველოში საგანგებო მდგომარეობის რეჟიმი მოხსნილია, თუმცა შეზღუდვების ნაწილი მაინც ძალაში რჩება.

0
თემები:
საქართველოს საგარეო პოლიტიკა