საქართველოს პრემიერ-მინისტრი მამუკა ბახტაძე

მამუკა ბახტაძემ იცის, როგორ დაასაქმოს პროფსასწავლებლების კურსდამთავრებულები

98
მიღებული განათლების ხარისხი და კერძო სექტორის ჩართულობა კურსდამთავრებულთა დასაქმების გარანტიაა

თბილისი, 21 მარტი - Sputnik. საქართველოს მთავრობისთვის ცნობილია ყველა ის მოთხოვნა, რომელიც დღეისათვის არსებობს ქვეყნის ეკონომიკაში პროფესიების კუთხით, რაც, პრემიერ-მინისტრ მამუკა ბახტაძის თქმით, პროფესიული კოლეჯების კურსდამთავრებულების დასაქმების შესაძლებლობას შექმნის.

პროფესიული სასწავლებლები განათლების სისტემის რეფორმის უმნიშვნელოვანესი კომპონენტია, ამიტომ ის ქვეყნის ყველა რეგიონში გაიხსნება, აღნიშნა მთავრობის მეთაურმა.

პროფსასწავლებლებში სტუდენტების რაოდენობა შემცირდა >>

„ჩვენ უკვე ვიცით, რა მოთხოვნა გვაქვს თითოეულ პროფესიაზე ეროვნულ ეკონომიკაში და რა მოთხოვნა გვექნება უახლოეს მომავალში. შესაბამისად, ეს უზრუნველყოფს იმას, რომ ნებისმიერი ახალგაზრდა, რომელიც დაამთავრებს მსგავს პროფესიულ სასწავლებელს, მეორე დღესვე უზრუნველყოფილი იქნება სამსახურით”, – განაცხადა ბახტაძემ Facebook-ლაივის დროს.

პროფესიული სასწავლებლების კურსდამთავრებულთა დაუყოვნებელი დასაქმების გარანტიას მიღებული განათლების ხარისხი და კერძო სექტორის ჩართულობა წარმოადგენს.

ბახტაძემ ასევე ყურადღება მიაქცია პროფესიული სასწავლებლების მიერ გაცემულ დიპლომებს და აღნიშნა, რომ ამ კუთხითაც არსებული გარანტიები მკვეთრი და მკაფიო იქნება.

„ჩვენი ამოცანაა, საქართველოს პროფესიული სასწავლებლების მიერ გაცემული დიპლომი თუ სერთიფიკატი აღიარებული იყოს ევროზონაში და თუ ჩვენი მოქალაქე საჭიროდ ჩათვლის, იმუშაოს ევროკავშირის რომელიმე ქვეყანაში, ის ამას უპრობლემოდ შეძლებს, ვინაიდან ექნება ევროზონაში აღიარებული დიპლომი“, - აღნიშნა ბახტაძემ.

მთავრობის მეთაურმა გამოთქვა მწუხარება იმის გამო, რომ საქართველოში პროფესიულ სასწავლებლებთან დაკავშირებით არასწორი სტერეოტიპი შეიქმნა, რომელიც ერთობლივი ძალებით აუცილებლად უნდა დაიმსხვრეს.

„ხშირად ვამბობთ, როგორ არის დასავლეთ ევროპული ქვეყნების ეკონომიკა ასეთი წარმატებული და მდგრადი გარე შოკების მიმართ. ეს ფორმულა გულისხმობს პროფესიული განათლების ძალიან მნიშვნელოვან ზრდას მათ ეკონომიკაში. ჩვენ, რეფორმაზე მუშაობისას დავეყრდენით გერმანიის, შვეიცარიისა და ავსტრიის პრაქტიკას. სწორედ ეს სამი სახელმწიფო ითვლება ამ კუთხით სამაგალითო ქვეყნებად და მათი ეკონომიკის წარმატებაც დიდწილად დაკავშირებულია სწორედ ძლიერ პროფესიულ სასწავლებლებთან“, – განაცხადა მამუკა ბახტაძემ.

საქართველოში განათლების მასშტაბური რეფორმა მიმდინარეობს. ის მოიცავს ყველა მიმართულებას და პროფესიული სასწავლებლების განვითარება ერთ-ერთ მნიშვნელოვან ასპექტს წარმოადგენს. განათლების რეფორმის ფარგლებში, საქართველოში პროფესიული სასწავლებლის დიპლომი სრული ზოგადი განათლების ატესტატს გაუთანაბრდება.

საბაზო განათლების მქონე ახალგაზრდებს (9 კლასი) საშუალება მიეცემათ, პროფესიის შესწავლის პარალელურად სრული ზოგადი განათლება მიიღონ. სურვილის შემთხვევაში კი ამავე დიპლომით უმაღლეს სასწავლებელში ჩაბარებას შეძლებენ. რეფორმის განხორციელება ეტაპობრივად მაისიდან დაიწყება.

პროფესიული სასწავლებლის დიპლომით უმაღლეს სასწავლებლებში ჩაბარება იქნება შესაძლებელი >>

ამას გარდა, სრული ზოგადი განათლების მქონე პირებს (12 კლასი) შესაძლებლობა ექნებათ ისწავლონ უმაღლეს პროფესიულ საგანმანათლებლო პროგრამებზე, რომლებიც შემუშავებულია დამსაქმებლების მონაწილეობით.

დაინერგება გადამზადების მოკლევადიანი კურსები იმ პირთათვის, ვინც სკოლა დიდი ხნის წინ დაამთავრა, მაგრამ სურს პროფესიული განათლების მიღება. ამისათვის შრომის ბაზარზე არსებული ვაკანსიები იქნება გათვალისწინებული.

ასევე დაინერგება არაფორმალური განათლების აღიარების მექანიზმები, რაც გულისხმობს პროფესიული პროგრამების განხორციელებაში დამსაქმებლების ჩართულობას, გაცვლითი პროგრამებისა და საერთაშორისო სერტიფიცირებული პროგრამების დანერგვას.

რეფორმის ფარგლებში პროფესიულ სასწავლებლებში გაძლიერდება სამეწარმეო განათლება და ინოვაციური სწავლება. განვითარდება მაღალტექნოლოგიური ცენტრები (EXCELLENCE CENTERS), რომლებიც ხელს შეუწყობს თანამედროვე ტექნოლოგიების გამოყენებით მომავლის პროფესიების შესწავლას და ტექნიკური, ციფრული, სამეწარმეო და შემოქმედებითი უნარების განვითარებას.

პროფესიული განათლების დარგში ყველა ცვლილება კერძო სექტორის ჩართულობით განხორციელდება.

98
თემები:
საქართველოს პრემიერ–მინისტრი (82)
მაგიდა კაფეში

იმნაძე მოსახლეობას აფრთხილებს: რა ხდება ქობულეთში

51
(განახლებულია 17:18 15.08.2020)
საქართველოში ახალი კორონავირუსით დაავადებულთა რაოდენობა ბოლო დღე-ღამეში 15-ით გაიზარდა და 1321-ს მიაღწია

თბილისი, 15 აგვისტო - Sputnik. ყველა იმ მოქალაქემ, რომლებიც ქობულეთში, კაფე „ჰავანაში“ 9, 10 და 11 აგვისტოს იმყოფებოდნენ,  სიმპტომების გამოჩენისთანავე ცხელების ცენტრებს უნდა მიმართოს, განაცხადა დაავადებათა კონტროლის ეროვნული ცენტრის ხელმძღვანელის მოადგილემ პაატა იმნაძემ.

დღეს საქართველოში ახალი კორონავირუსით დაავადებულთა რაოდენობა ბოლო დღე-ღამეში 15-ით გაიზარდა და 1321-ს მიაღწია. დღეს გავრცელდა ინფორმაცია, რომ ერთ-ერთი ინფიცირებულია ქალი, რომელიც ქობულეთში, კაფე „ჰავანაში“ მუშაობს.

„ეს ქალბატონი თბილისიდან ქობულეთში სამუშაოდ არის ჩასული. ის ქობულეთში კაფე „ჰავანაში“ მუშაობდა. აქ მომუშავე პერსონალი, ყველა, ვინც კონტაქტში იყო ამ თანამშრომელთან, ყველა მოკვლეულია და იზოლაციაშია გადაყვანილი. მათ გამოიკვლევენ, მაგრამ მინდა, მაქსიმალურად გავაფრთხილო ისინი, ვინც 9, 10 და 11 აგვისტოს ამ კაფეში იმყოფებოდა, რომ ფრთხილად იყვნენ და თუ ოდნავ მაინც გამოუვლინდებათ სიმპტომები, აუცილებლად მიმართონ ცხელების ცენტრებს“, – განაცხადა  იმნაძემ.

რაც შეეხება დანარჩენ შემთხვევებს, იმნაძის თქმით, ცხრა ინფიცირებული იმყოფებოდა მესტიაში, ერთი - ყაზბეგში ინფიცირებულის ოჯახის წევრია, სამი - ადრე დადასტურებული შემთხვევის კონტაქტია, ხოლო ერთი - სომხეთიდან ჩამოსული მძღოლია.

ამ დროისათვის გამოჯანმრთელებულია 1088 ადამიანი, გარდაცვლილია – 17, კარანტინის რეჟიმში იმყოფება 7597, ხოლო სტაციონარებში ექიმების დაკვირვების ქვეშ 261 პაციენტია.

ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს 41 მოქალაქე, მათ შორის 38 – სამხედრო მოსამსახურე.

საქართველოში კორონავირუსის პირველი შემთხვევა 26 თებერვალს დაფიქსირდა.

51
თემები:
COVID-19 საქართველოში
ანთებული სანთლები

საქართველოს დედაქალაქში და რეგიონებში 90-იან წლებში დაღუპული სამხედროები დაკრძალეს

44
(განახლებულია 16:17 15.08.2020)
ნეშტებს, რომლებიც წლების შემდეგ აღმოაჩინეს, იდენტიფიცირების და ნათესაური კავშირების დადგენის მიზნით დნმ-ის ანალიზი ჩაუტარდა. 

თბილისი, 15 აგვისტო — Sputnik. გასული საუკუნის 90-იან წლებში აფხაზეთის  შეიარაღებული კონფლიქტის დროს დაღუპული 13 სამხედრო მოსამსახურე დაკრძალეს, იუწყება პირველი არხი.

ნეშტებს, რომლებიც წლების შემდეგ აღმოაჩინეს, იდენტიფიცირების და ნათესაური კავშირების დადგენის მიზნით დნმ-ის ანალიზი ჩაუტარდა. 

გუშინ სამების საკათედრო ტაძარში სამოქალაქო პანაშვიდი გაიმართა. დაღუპულთა ოჯახის წევრებს სამძიმარი პირადად გამოუცხადეს პრეზიდენტმა სალომე ზურაბიშვილმა, მინისტრთა კაბინეტის წევრებმა, დეპუტატებმა და რიგითმა მოქალაქეებმა.

საქართველოს ტერიტორიაზე კონფლიქტების შედეგად 1990-იან წლებში უგზო-უკვლოდ 2,2 ათასზე მეტი ადამიანი დაიკარგა.

თბილისის ძმათა სასაფლაოზე ორი სამხედრო დაკრძალეს, დანარჩენების ნეშტები ოჯახებმა გადაასვენეს, რათა თავიანთი ნათესავები ოჯახურ სასაფლაოებზე დაკრძალონ.

2010 წელს წითელი ჯვრის საერთაშორისო კომიტეტის ფინანსური და ტექნიკური მხარდაჭერით შეიქმნა საკოორდინაციო მექანიზმი, რომლის წყალობით ნაპოვნია აფხაზეთში საბრძოლო მოქმედებების დროს უგზო-უკვლოდ დაკარგული 563 ადამიანის ნეშტი, საიდანაც 200-ზე მეტი იდენტიფიცირებულია. დანარჩენი ნეშტების ამოცნობის პროცესი გრძელდება.

44