მიხეილ ბატიაშვილი

წარმატებულ ქართველ მეცნიერ-ემიგრანტებს საქართველოში პირველ სამეცნიერო ფორუმზე მოიწვევენ

95
(განახლებულია 17:22 13.02.2019)
საქართველოში განათლების სისტემის რეფორმა ხორციელდება, რომლის ერთ-ერთი პრიორიტეტი სამეცნიერო სფეროს განვითარებაა.

თბილისი, 13 თებერვალი — Sputnik. საქართველოს განათლების მინისტრმა მიხეილ ბატიაშვილმა საქართველოში პირველი სამეცნიერო ფორუმის გამართვა დააანონსა, რომელიც უშუალოდ სამეცნიერო სფეროს განვითარების საკითხებს განიხილავს, იუწყება საზოგადოებრივი მაუწყებლის პირველი არხი.

საქართველოში განათლების სისტემის მასშტაბური რეფორმის ახალი ეტაპი დაიწყო. ექსპერტებმა რეფორმების ათი პაკეტი მოამზადეს, რაც ყველა მიმართულებას მოიცავს. სკოლებში დაგეგმილ ცვლილებებს შორისაა მასწავლებელთა უნარებისა და ცოდნის შეფასების ახალი სისტემა, სკოლის ინფრასტრუქტურის განვითარება, ტექნოლოგიებისა და ინოვაციების დანერგვა. რეფორმები ოთხ წელიწადს გაგრძელდება და მიმართულია იმისკენ, რომ საქართველო გახდეს საგანმანათლებლო ცენტრი და ლიდერი რეგიონში.

„ვფიქრობთ, მოვიწვიოთ საზღვარგარეთ წარმატებული ქართველი მეცნიერები და ის ინსტიტუციები, რომლებიც მეტ-ნაკლებად შემოგვრჩა, რათა ვიმსჯელოთ, რა როგორ უნდა განვავითაროთ. ჩვენ სამი თვის განმავლობაში აქტიურად ვმუშაობდით იმისთვის, რომ ხედვა შევიმუშავოთ", – განაცხადა ბატიაშვილმა.

მისი თქმით, განათლების სფერო მეცნიერების გარეშე ვერ განვითარდება. მინისტრმა აღნიშნა, რომ არსებობენ მდიდარი ეკონომიკის ქვეყნები, სადაც განათლებაში მილიარდები იხარჯება, მაგრამ იმის გამო, რომ მეცნიერება ვერ ვითარდება, შედეგი ძალიან დაბალია.

ზუსტად როდის გაიმართება ფორუმი, ჯერჯერობით უცნობია.

განათლების რეფორმის ფარგლებში მეცნიერების სფეროს განვითარებისთვის იგეგმება ევროპული კვლევების საბჭოს სტანდარტების, ბლოკჩეინისა და 3D-ტექნოლოგიების დანერგვა. გაძლიერდება უცხოელი ექსპერტების როლი კვლევების შედეგების შეფასებისას.

სახელმწიფო სრულად დააფინანსებს სახელმწიფო და კერძო უმაღლესი სასწავლებლებისა და სამეცნიერო-კვლევითი ინსტიტუტების მხრიდან საერთაშორისო სამეცნიერო ბაზებზე – ELSEVIER წვდომას.

განათლების რეფორმის ფარგლებში ასევე დაგეგმილია ელექტრონული სამეცნიერო ჟურნალი Georgian Science-ის გამოცემა. ჟურნალის რედკოლეგიის წევრები იქნებიან როგორც ქართველი სპეციალისტები, ისე უცხოელი მეცნიერები.

ახალგაზრდა მეცნიერების წასახალისებლად იგეგმება 1000 ლარის ოდენობის ყოველთვიური სტიპენდიის დაწესება. გარდა ამისა, ხშირად გაიმართება ასაკის შესაბამისი სამეცნიერო კონკურსები, რომელშიც მონაწილეობას მიიღებენ ბაღის აღსაზრდელები და სკოლის მოსწავლეები.

საქართველო 2019 წელს შეუერთდა ევროკომისიის პროექტ EURAXESS-ის საერთოევროპულ ინიციატივას, რომელიც პროფესიონალ მეცნიერებს უჭერს მხარს.

საერთაშორისო სამეცნიერო თანამშრომლობის გაძლიერების მიზნით შეიქმნება პორტალი EURAXESS-Georgia, რომელიც ინტეგრირებული იქნება EURAXESS-ის პანევროპულ ელექტრონულ სისტემაში, რომელშიც ჩართულია მსოფლიოს 40 ქვეყანაზე მეტი.

 

95
თემები:
განათლება საქართველოში-2018 (278)
მაგიდა კაფეში

იმნაძე მოსახლეობას აფრთხილებს: რა ხდება ქობულეთში

55
(განახლებულია 17:18 15.08.2020)
საქართველოში ახალი კორონავირუსით დაავადებულთა რაოდენობა ბოლო დღე-ღამეში 15-ით გაიზარდა და 1321-ს მიაღწია

თბილისი, 15 აგვისტო - Sputnik. ყველა იმ მოქალაქემ, რომლებიც ქობულეთში, კაფე „ჰავანაში“ 9, 10 და 11 აგვისტოს იმყოფებოდნენ,  სიმპტომების გამოჩენისთანავე ცხელების ცენტრებს უნდა მიმართოს, განაცხადა დაავადებათა კონტროლის ეროვნული ცენტრის ხელმძღვანელის მოადგილემ პაატა იმნაძემ.

დღეს საქართველოში ახალი კორონავირუსით დაავადებულთა რაოდენობა ბოლო დღე-ღამეში 15-ით გაიზარდა და 1321-ს მიაღწია. დღეს გავრცელდა ინფორმაცია, რომ ერთ-ერთი ინფიცირებულია ქალი, რომელიც ქობულეთში, კაფე „ჰავანაში“ მუშაობს.

„ეს ქალბატონი თბილისიდან ქობულეთში სამუშაოდ არის ჩასული. ის ქობულეთში კაფე „ჰავანაში“ მუშაობდა. აქ მომუშავე პერსონალი, ყველა, ვინც კონტაქტში იყო ამ თანამშრომელთან, ყველა მოკვლეულია და იზოლაციაშია გადაყვანილი. მათ გამოიკვლევენ, მაგრამ მინდა, მაქსიმალურად გავაფრთხილო ისინი, ვინც 9, 10 და 11 აგვისტოს ამ კაფეში იმყოფებოდა, რომ ფრთხილად იყვნენ და თუ ოდნავ მაინც გამოუვლინდებათ სიმპტომები, აუცილებლად მიმართონ ცხელების ცენტრებს“, – განაცხადა  იმნაძემ.

რაც შეეხება დანარჩენ შემთხვევებს, იმნაძის თქმით, ცხრა ინფიცირებული იმყოფებოდა მესტიაში, ერთი - ყაზბეგში ინფიცირებულის ოჯახის წევრია, სამი - ადრე დადასტურებული შემთხვევის კონტაქტია, ხოლო ერთი - სომხეთიდან ჩამოსული მძღოლია.

ამ დროისათვის გამოჯანმრთელებულია 1088 ადამიანი, გარდაცვლილია – 17, კარანტინის რეჟიმში იმყოფება 7597, ხოლო სტაციონარებში ექიმების დაკვირვების ქვეშ 261 პაციენტია.

ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს 41 მოქალაქე, მათ შორის 38 – სამხედრო მოსამსახურე.

საქართველოში კორონავირუსის პირველი შემთხვევა 26 თებერვალს დაფიქსირდა.

55
თემები:
COVID-19 საქართველოში
ანთებული სანთლები

საქართველოს დედაქალაქში და რეგიონებში 90-იან წლებში დაღუპული სამხედროები დაკრძალეს

44
(განახლებულია 16:17 15.08.2020)
ნეშტებს, რომლებიც წლების შემდეგ აღმოაჩინეს, იდენტიფიცირების და ნათესაური კავშირების დადგენის მიზნით დნმ-ის ანალიზი ჩაუტარდა. 

თბილისი, 15 აგვისტო — Sputnik. გასული საუკუნის 90-იან წლებში აფხაზეთის  შეიარაღებული კონფლიქტის დროს დაღუპული 13 სამხედრო მოსამსახურე დაკრძალეს, იუწყება პირველი არხი.

ნეშტებს, რომლებიც წლების შემდეგ აღმოაჩინეს, იდენტიფიცირების და ნათესაური კავშირების დადგენის მიზნით დნმ-ის ანალიზი ჩაუტარდა. 

გუშინ სამების საკათედრო ტაძარში სამოქალაქო პანაშვიდი გაიმართა. დაღუპულთა ოჯახის წევრებს სამძიმარი პირადად გამოუცხადეს პრეზიდენტმა სალომე ზურაბიშვილმა, მინისტრთა კაბინეტის წევრებმა, დეპუტატებმა და რიგითმა მოქალაქეებმა.

საქართველოს ტერიტორიაზე კონფლიქტების შედეგად 1990-იან წლებში უგზო-უკვლოდ 2,2 ათასზე მეტი ადამიანი დაიკარგა.

თბილისის ძმათა სასაფლაოზე ორი სამხედრო დაკრძალეს, დანარჩენების ნეშტები ოჯახებმა გადაასვენეს, რათა თავიანთი ნათესავები ოჯახურ სასაფლაოებზე დაკრძალონ.

2010 წელს წითელი ჯვრის საერთაშორისო კომიტეტის ფინანსური და ტექნიკური მხარდაჭერით შეიქმნა საკოორდინაციო მექანიზმი, რომლის წყალობით ნაპოვნია აფხაზეთში საბრძოლო მოქმედებების დროს უგზო-უკვლოდ დაკარგული 563 ადამიანის ნეშტი, საიდანაც 200-ზე მეტი იდენტიფიცირებულია. დანარჩენი ნეშტების ამოცნობის პროცესი გრძელდება.

44