თბილისი, 23 იანვარი — Sputnik. კომაროვის სახელობის თბილისის ფიზიკა-მათემატიკური №199 სკოლის დამამთავრებელი კლასის მოსწავლეებმა აშშ-ის წამყვანი უნივერსიტეტების მიწვევა მიიღეს, ნათქვამია სკოლის Facebook-გვერდზე გავრცელებულ განცხადებაში.
აშშ-ში სწავლას გააგრძელებენ გიორგი ჩუბინიძე (University of Pennsylvania), გიორგი კლდიაშვილი (Massachusetts Institute of Technology), ლექსო ბორაშვილი (Lafayette College), ლუკა მდივანი (Duke Kunshan University).
„წელს, პირველად კომაროვის ისტორიაში, ნაადრევი გადაწყვეტილებით (Early Decision) ოთხმა მოსწავლემ სრული დაფინანსება მოიპოვა და სექტემბრიდან ისინი სწავლას ამერიკის წამყვან უნივერსიტეტებში გააგრძელებენ. სკოლა ულოცავს მოსწავლეებს ამ წარმატებას და მომავალშიც მრავალს უსურვებს“, – ნათქვამია სკოლის განცხადებაში.
სკოლა, რომელიც მსოფლიოში პირველი მრავალადგილიანი კოსმოსური ხომალდის ეკიპაჟის წევრის ვლადიმირ კომაროვის სახელს ატარებს, უკვე 50 წლისაა. ამ სკოლაში სწავლება ზუსტ და საბუნებისმეტყველო მეცნიერებებზეა ორიენტირებული და მასში მოხვედრა გამოცდის ჩაბარების შედეგად მეშვიდე კლასიდან არის შესაძლებელი. პედაგოგთა უმრავლესობა თავად სკოლადამთავრებულია. კომაროველები ხშირად იმარჯვებენ საერთაშორისო ოლიმპიადებზე, კონკურსებზე და კონფერენციებზე.
