თბილისში მოსწავლეების მკვლელობიდან ერთი წლის შემდეგ სახალხო დამცველი მთავარ პროკურატურას მოუწოდებს გაასაჯაროოს ინფორმაცია გამოძიებისა და სამსახურებრივი შემოწმების შესახებ და საზოგადოებას აუხსნას, როგორ უნდა აღმოიფხვრას ის ხარვეზები, რომლებიც საქმის მსვლელობისას გამოვლინდა.
16 წლის მოსწავლეების დავით სარალიძისა და ლევან დადუნაშვილის მკვლელობა საქართველოს უახლეს ისტორიაში ერთ-ერთი ყველაზე რეზონანსულ საქმედ იქცა. ორივე მოზარდი ხორავას ქუჩაზე 2017 წლის 1 დეკემბერს მომხდარი №51 და 1-ლი ექსპერიმენტული სკოლების უფროსკლასელების მასობრივი ჩხუბის შედეგად დაიღუპა.
დავით სარალიძის მამა, ზაზა სარალიძე უკვე მერამდენე თვეა პარლამენტის წინ საპროტესტო აქციას მართავს და დანაშაულის ჩამდენი ყველა პირის დასჯას მოითხოვს. საქმე ისაა, რომ თბილისის საქალაქო სასამართლოსათვის პროკურატურის ყველა არგუმენტი დამაჯერებელი არ აღმოჩნდა. სარალიძის მკვლელობისთვის დაკავებული პირი სასამართლომ მხოლოდ მკვლელობის მცდელობაში ცნო დამნაშავედ. ამჟამად სარალიძის მკვლელის ვინაობის დადგენა სააპელაციო სასამართლოს მოუწევს.
ომბუდსმენის რეკომენდაცია
საქართველოს სახალხო დამცველის აპარატის განცხადების თანახმად, ის თავიდანვე სწავლობდა საქმეს და ასკვნის, რომ გამოძიება არაეფექტური იყო და საქმეში სამსახურებრივი დანაშაულის ნიშნები იკვეთება.
ომბუდსმენმა აღნიშნა, რომ საქართველოს პროკურატურამ არ გაითვალისწინა მისი რეკომენდაციები სისხლის სამართლის გამოძიების დაწყებასთან დაკავშირებით და მხოლოდ უწყებაში სამსახურებრივი შემოწმებით შემოიფარგლა.
ტრაგედიის პოლიტიზირება არ შეიძლება – ივანიშვილი სარალიძის დაკავების შესახებ >>
„გამოძიების მიმართ მაღალი საზოგადოებრივი ინტერესიდან გამომდინარე, პროკურატურამ უნდა დააკმაყოფილოს საზოგადოებაში არსებული კითხვები და გაასაჯაროოს ინფორმაცია გამოძიებისა და მოკვლევის მიმდინარეობის შესახებ“, - ნათქვამია ომბუდსმენის Facebook-გვერდზე გავრცელებულ განცხადებაში.
ამასთან დაკავშირებით სახალხო დამცველის აპარატმა პროკურატურას ორი რეკომენდაცია მისცა.
„სახალხო დამცველი მოუწოდებს მთავარ პროკურატურას: ყოველი თვის ბოლოს წარმოუდგინოს საზოგადოებას როგორც მიმდინარე სამსახურებრივი შემოწმების შედეგები, ასევე, ინფორმაცია სახალხო დამცველის წინადადებასა და საპარლამენტო საგამოძიებო კომისიის დასკვნაში გამოკვეთილ ხარვეზებზე გატარებული ღონისძიებების შესახებ“, - ნათქვამია განცხადებაში.
მეორე რეკომენდაციის თანახმად, ომბუდსმენი ითხოვს, მიეცეს მიმდინარე სამსახურებრივი შემოწმების მასალების პერიოდულად სრულყოფილი გაცნობის შესაძლებლობა.
