თბილისი, 23 მარტი — Sputnik. სოციოლოგიური კვლევის თანახმად, რომელიც ანალიზისა და კონსულტაციების ჯგუფმა ACT ჩაატარა, თბილისელების აბსოლუტური უმრავლესობა — 96% მიირთმევს ხორცსა და ხორცპროდუქტებს.
გამოკითხვამ აჩვენა, რომ „ხორცისმჭამელების" 83% არასდროს დაფიქრებულა ვეგეტარიანელობაზე, დანარჩენებს უფიქრიათ, მაგრამ ხორცზე უარს ვერ ამბობენ.
ხორცის მოყვარულთა 39%-ის აზრით, ყველაზე გემრიელია ღორის ხორცი. შემდეგ მოდის საქონლის ხორცი — 36% და ქათმის ხორცი — 20%. ცხვრის ხორცს უპირატესობას გამოკითხულთა მხოლოდ 2% ანიჭებს.
კვლევა თბილისის მასშტაბით 12-14 თებერვალს შემთხვევითი შერჩევის მეთოდით ჩატარდა. სულ გამოკითხეს 403 თბილისელი.
ACT ანალიზისა და კონსულტაციების გლობალური კომპანიაა, რომელიც მოიცავს დსთ-ისა და აღმოსავლეთ ევროპის ქვეყნებს. კომპანიას ოფისები აქვს საქართველოში, აზერბაიჯანსა და ყაზახეთში.