თბილისი, 16 ოქტომბერი — Sputnik. სამეგრელო-ზემო სვანეთის სამხარეო ადმინისტრაციის შენობის წინ ზუგდიდის მუნიციპალიტეტის სოფლების მოსახლეობა საპროტესტო აქციას მართავს, იტყობინება „Sputnik–საქართველოს" კორესპონდენტი ზუგდიდიდან.
აქციაზე, რომელიც „ერთიანი ნაციონალური მოძრაობის" ორგანიზებით იმართება და 1000-მდე ადამიანი იმყოფება, მოსახლეობა გუბერნატორ ლევან შონიასთან შეხვედრას და აზიური ფაროსანასგან მიყენებული ზარალის შემსწავლელი კომისიის შექმნას ითხოვს.
„დავრჩით მშივრები, ვითხოვთ ზარალის ანაზღაურებას, ფაროსანამ ჩვენი სოფლის მეურნეობის ყველა კულტურა გაანადგურა", — განაცხადა აქციის ერთ-ერთმა მონაწილემ.
აქციაზე „ერთიანი ნაციონალური მოძრაობის" წარმოამდგენლებიც იმყოფებიან. როგორც „ნაციონალური მოძრაობის" ერთ-ერთი ლიდერი ნიკა მელია აცხადებს, აქციის მონაწილეები იმ დრომდე არ დაიშლებიან, სანამ სამეგრელო-ზემო სვანეთის გუბერნატორი ლევან შონია დაზარალებულ მოსახლეობას არ შეხვდება.
ადმინისტრაციის შენობასთან სამართალდამცველები არიან მობილიზებული. მათსა და აქციის მონაწილეებს შორის 15 წუთის წინ შეხლა-შემოხლა მოხდა. სააგენტოს კორესპონდენტს „ნაცმოძრაობის" ერთ-ერთმა წევრმა გიორგი პატარაიამ განუცხადა, რომ სამართალდამცველებმა პარტიის ოთხი წევრი დააკავეს.
შსს-ს პრეს-სამსახური აქციის მონაწილეთა დაკავების ფაქტს არ ადასტურებს.
ჯემალ ღამბაშიძე
