თბილისი, 21 ივლისი — Sputnik. ლეგენდარული მხატვარი-სიურრეალისტის სალვადორ დალის სხეული, მათ შორის, მისი ცნობილი ულვაში კარგად შენახული ყოფილა, იუწყება РИА Новости ფონდ „გალა — სალვადორ დალის" გენერალურ დირექტორზე ლუის პენიუელასზე დაყრდნობით.
დალის ნეშტის ექსჰუმაცია ჩატარდა პარასკევს, ათობით ჟურნალისტის თანდასწრებით, მამობის დადგენის მიზნით, მადრიდის სასამართლოს გადაწყვეტილების საფუძველზე. მხატვარი დაკრძალულია სალვადორ დალის თეატრ-მუზეუმში კატალონიის ქალაქ ფიგერასში.
„ცხედარი იყო ბალზამირებული, ანუ მუმიფიცირებული. ამიტომაც განთქმულმა ულვაშმაც შეინარჩუნა ფორმა. ეს ძალიან ემოციური მომენტი იყო", — განაცხადა პენიუელასმა პრესკონფერენციაზე.
ექსჰუმაცია სასამართლოს გადაწყვეტილების საფუძველზე ჩატარდა, რომელმაც დააკმაყოფილა „წინასწარმეტყველის" სარჩელი, რომელიც ამტკიცებს, რომ დიდი მხატვარი მისი ბიოლოგიური მამა იყო. თითქოსდა პორტ-ლიგატში (ჟირონის პროვინცია) მხატვართან დედამისს საიდუმლო კავშირი ჰქონდა, სადაც ის ერთ-ერთ ადგილობრივ ოჯახში მუშაობდა. პილარ აბელ მარტინესი კატალონიის ქალაქ ფიგერასში 1956 წლის 1 თებერვალს დაიბადა.
სასამართლო მივიდა დასკვნამდე, რომ ამის დასადგენად ერთადერთი გზა არსებობს — დნმ-ის შედარებითი ანალიზის ჩატარება.
ექსჰუმაციისთვის საჭირო გახდა მუზეუმის იატაკის ტონა-ნახევრიანი ფილის აწევა, რომლის ქვეშ განისვენებს დალი, ნეშტის ექსჰუმაცია და ნიმუშების აღება. დნმ-ის ანალიზს ტოქსიკოლოგიის მადრიდის ინსტიტუტი ჩაატარებს.
ექსჰუმაციის პროცედურას ადამიანების შეზღუდული რაოდენობა ესწრებოდა: რამდენიმე სასამართლო ექსპერტი, მუზეუმის დირექტორი, ფიგერასის მერი, ჟირონის კულტურის დეპარტამენტის წარმომადგენლები, ფონდის ადვოკატი და სამართალდამცველი ორგანოების წარმომადგენლები. პროცედურა დასრულდა პარასკევს, 00:40 საათზე.
ფონდ „გალა — სალვადორ დალის" წარმომადგენლებმა აღიარეს, რომ ექსჰუმაციის ფაქტმა მათზე ძალიან იმოქმედა. „ყველაფერი გავაკეთეთ, რომ ეს არ მომხდარიყო, მაგრამ სასამართლო გადაწყვეტილების აღსრულება მოგვიწია", — განაცხადა ხუან მანუელ სევილიანომ.
სალვადორ დალის თეატრი-მუზეუმი 1983 წელს მან თავად შექმნა. მხატვარმა დაიბარა, რომ ის ისე დაკრძალონ, რომ საფლავზე ადამიანებმა სიარული შეძლონ, ამიტომ მისი ნეშტი თეატრ-მუზეუმის ერთ-ერთი ოთახის იატაკში ჩაატანეს. დალი 1989 წლის 23 იანვარს 85 წლის ასაკში გარდაიცვალა.
ლეგენდარული მხატვარი-სიურრეალისტის მამობის დასადგენად ჩატარებული დნმ-ის ანალიზის შედეგები სექტემბრის პირველ ნახევარში გახდება ცნობილი.
მამობის დადასტურების შემთხვევაში პილარს დიდი სიურრეალისტის გვარზე და საავტორო უფლებებზე ექნება პრეტენზია. ქალი სავალალო ფინანსურ მდგომარეობაში იმყოფება, მას ადვოკატისთვის გადასახდელი ფულიც არ ჰქონდა.
