თბილისი, 19 თებერვალი — Sputnik. პოპულარული ქართველი მუსიკოსები მომღერალ მიშო სულუხიას დასახმარებლად ერთიანდებიან, რომლის დედასაც თავის ტვინის სიმსივნე დაუდგინდა.
საქველმოქმედო კონცერტში მონაწილეობას მიიღებენ: ნიაზ დიასამიძე, სტეფანე მღებრიშვილი, Young Georgian Lolitaz, LOUDspeakers, Niutone და თავად მიშო სულუხია.
საღამოს სპეციალური სტუმარი იქნება ნინო ქათამაძე.
„ერთადერთი ქვეყანა, რომელმაც გვითხრა ოპერაციაზე თანხმობა — ეს არის თურქეთი. გაჩნდა ახალი იმედები და შანსები, რომ მან სრულფასოვნად გააგრძელოს ცხოვრება“, — ამბობს მიშო სულუხია ვიდეომიმართვაში, რომელიც „ფეისბუქით“ გაავრცელა.
მომღერალი დახმარებას სთხოვს მეგობრებსა და იმ ახალგაზრდებს, ვისაც მისი ცხოვრების დადებითად შეცვლა შეუძლიათ.
მუსიკალური საღამო 22 თებერვალს გაიმართება თბილისის საკონცერტო დარბაზში — Event Hall.
