კომპიუტერული პროგრამები

არსებობს საშიშროება, რომ ადამიანმა კომპიუტერივით ფიქრი დაიწყოს?

215
(განახლებულია 19:03 12.10.2015)
ბავშვმა მშობლის დახმარებით უნდა გააცნობიეროს, რომ კომპიუტერი არ არის ცხოვრების სტილი - იგი მხოლოდ გასართობი, შემეცნებითი და დროებითია.

  ირმა ლეჟავა

  პირველკლასელებისთვის კომპიუტერების საჩუქრად გადაცემა წინა ხელისუფლების პერიოდში დაიწყო და დღემდე გრძელდება. ალბათ განსაზღვრულია, რომ კომპიუტერი შემეცნების ასამაღლებლად ბავშვების დამხმარედ უნდა იქცეს, თუმცა უმეტესობა მას მულტფილმების საყურებლად და სათამაშოდ უფრო იყენებს. უცხოელ ფსიქოლოგთა კვლევებით, ბავშვები და მოზარდები, თურმე, მულტფილმების ინტენსიური ყურებითა და კომპიუტერული თამაშების ზეგავლენით ბოლო ხანს განსაკუთრებით აგრესიულები და დაუნდობლები გახდნენ.  

 მართლაც ასეთ საფრთხეს შეიცავს თუ არა კომპიუტერთან და ტელეეკრანთან მიჯაჭვულობა? თუ ასეა, კომპიუტერის ეპოქაში რითი შეიძლება ამ საფრთხის თავიდან აცილება?— ამ კითხვებზე პასუხს  ფსიქოლოგთა და ფსიქოთერაპევტთა ასოციაციის წევრი, ფსიქოლოგი, ნინო ახალაია გაგვცემს:

 - მეცნიერებისა და ტექნიკის განვითარებამ სასარგებლოსთან ერთად საკმაოდ ბევრი პრობლემა აღმოაცენა — საფრთხე ადამიანის, განსაკუთრებით, ბავშვებისა და მოზარდების ფსიქიკურ სიჯანსაღეს შეექმნა. თანამედროვე მულტფილმებისა და გავრცელებული კომპიუტერული თამაშების უმრავლესობა აგრესიულობისა და ძალადობის ელემენტებს შეიცავს. ვირტუალურ სამყაროში ჩაფლული მოზარდი მოქმედების გმირთან იდენტიფიცირდება და მისი სახით თავად ხდება სხვადასხვა მისიის შემსრულებელი, აქვს მიზანი, რომლის მიღწევას ხშირად მსხვერპლი სჭირდება. თამაშის პროცესში ბავშვები საკუთარ დაძაბულობასა და ნეგატიურ განცდებს აღასრულებენ, ამით წყენა ვირტუალურ მტრებზე გადააქვთ. ერთმნიშვნელოვანი პასუხის გაცემა რთულია: უშუალოდ კომპიუტერული თამაშები იწვევს აგრესიულობის მომატებას თუ აგრესიულობის მოთხოვნილების მქონე ბავშვები და მოზარდები ირჩევენ ძალადობრივი შინაარსის სიუჟეტებს? ერთი რამ კი აშკარაა: წარმოსახულ და ირეალურ სამყაროში მეტისმეტი ჩართულობა ქმნის პიროვნულ პრობლემებს — ყალიბდება დამოკიდებულება, რომელიც საფრთხეს უქმნის ემოციურ სფეროსა და სოციალურ კონტაქტებს, ზრდის ნევროტულობის, აგრესიულობის, მტრობის გამოვლენის ხარისხს, ზიანდება ფიზიკური ჯანმრთელობა და შესაძლოა,  ფსიქიკური დარღვევის პროვოცირებაც მოხდეს.

 — ქალბატონო ნინო, თუნდაც ერთი შეხედვით უვნებელი მულტფილმები როგორ ზემოქმედებს პატარების ცნობიერებასა და ფიზიკურ განვითარებაზე? 

 — საშინაო თუ საგარეო საქმეებით დაკავებული მშობელი, პატარის ინტერესის მიუხედავად, ხშირად საკუთარი დროის გამოთავისუფლების მიზნით ბავშვისთვის მულტფილმების ჩართვას არჩევს.  ბევრი თანამედროვე მულტფილმის სიუჟეტი კი ცუდ ზეგავლენას ახდენს მზარდ, ჩამოყალიბების პროცესში მყოფ ფსიქიკაზე, ზოგადად — ბავშვის განვითარებაზე. მულტფილმების უკონტროლო ყურებამ შესაძლოა ხელი შეუწყოს აგრესიულობისკენ მიდრეკილებას, ყურადღების დეფიციტის განვითარებას, მეტყველების პრობლემების ჩამოყალიბებას, სხვადასხვა ნევროტული რეაქციების გამოვლენას, წონის მატებას, მხედველობის გაუარესებას და ა.შ.

 ზოგადად,  სამ  წლამდე ბავშვისთვის განსაკუთრებით არასასურველია მულტფილმების ხანგრძლივად ყურება, სამი წლის ზემოთ ბავშვებისთვის კი მულტიპლიკაციური ფილმები შინაარსის მიხედვით მკაცრად უნდა შეირჩეს, ასევე — გაკონტროლდეს ყურების პერიოდიც. თანამედროვე მულტიპლიკაციური სივრცე შეივსო სწაფად და იაფად გაკეთებული უხარისხო პროდუქციით. მულტფილმის გმირები მყვირალა ფერებით, სახისა და სხეულის დამახიჯებული პროპორციებით, გამაღიზიანებელი გახმოვანებით და აგრესიული მოქმედებებით ვერ მოახდენენ პატარის ფსიქიკაზე სასიკეთო გავლენას. მნიშვნელოვანია, რომ შვილისთვის შერჩეულ მულტფილმში მთავარი გმირი იყოს დადებითი პერსონაჟი, ჰქონდეს იუმორი, ჯანსაღი მიზნები, გამოირჩეოდეს კარგი თვისებებით — იყოს მეგობრული, კეთილი, ზრდილობიანი, ანუ ფლობდეს სასურველ და საუკეთესო თვისებებს. ეს გმირი შეიძლება ცელქიც იყოს, მოუსვენარიც, სასაცილოც, მაგრამ მთავარია, საკუთარ თავთან და გარე სამყაროსთან პოზიტიური დამოკიდებულება ჰქონდეს, რადგან ბავშვი შეუცნობლად სწორედ საყვარელ  გმირთან აიგივებს თავს. ასევე, უმნიშვნელოვანესია, მულტფილმის ფინალი იყოს ბედნიერი, სიკეთე იმარჯვებდეს, რომ ბავშვში ოპტმიმიზმის ჩამოყალიბებას შეეწყოს ხელი. მიუხედავად  ნებისმიერი სასიკეთო გავლენისა, ვერც ერთი მულტფილმი, თუნდაც შემეცნებითი და განმავითარებელი, ვერ ჩაანაცვლებს ბავშვის მოზრდილებთან და თანატოლებთან ურთიერთობით მიღებულ ეფექტს.

 — ადრეულ ასაკში კომპიუტერული თამაშებით გატაცება ბავშვს რას აძლევს ან  რას ვნებს? 

 — ზომიერად მოხმარებისას კომპიუტერული თამაში შეიძლება იყოს განმავითარებელი, შემეცნებითი, ასევე ლოგიკური აზროვნების გააქტიურების ხელშემწყობი. იგი აყალიბებს დასახული მიზნის მიღწევისკენ სწრაფვას, თუმცა ამ მიმართულებით განვითარება, რა თქმა უნდა, კომპიუტერული თამაშების გარეშეც არის შესაძლებელი. ამ თამაშების უარყოფითი მხარე მეტად ძლიერია — ხშირად ის გატაცება კი არა, უფრო — თამაშებზე დამოკიდებულებაა, რაც ანაცვლებს და უინტერესოს ხდის ოჯახს, თანატოლებთან ურთიერთობას, სწავლას. თანდათანობით ვიწროვდება სოციალური წრე და იზრდება გაღიზიანება, აგრესიულობა, წყენა. მატულობს დეპრესიული ფონი, იკარგება მოტივაცია. ბავშვის განცდაში ოჯახის წევრებიც კი  შესაძლოა, მტრად იქცნენ, რადგან ხელს უშლიან და უპირისპირდებიან მას. 

 ცნობილი ნათქვამია, მთავარი საფრთხე ის კი არ არის, რომ კომპიუტერი დაიწყებს აზროვნებას, არამედ სახიფათოა,  თვითონ ადამიანმა არ დაიწყოს კომპიუტერივით ფიქრი.

 ამიტომ ბავშვმა მშობლის დახმარებით უნდა გააცნობიეროს, რომ კომპიუტერი არ არის ცხოვრების სტილი — იგი მხოლოდ გასართობი, შემეცნებითი და დროებითია. სრული აკრძალვა ხშირად ძალიან ნეგატიურ შედეგებს იძლევა. მზა რჩევების უხვად გაცემა შეიძლება, თუმცა ნებისმიერ შემთხვევაში, თუკი მშობელს სურს დაიხსნას ტელევიზიასა თუ ინტერნეტსივრცეზე დამოკიდებული  შვილი, უნდა შეეცადოს, რომ მისთვის ის რეალური სამყარო, რომელშიც ცხოვრობს, ნამდვილი ურთიერთობები, დამოკიდებულებები, მიზნები თუ სურვილები გახადოს უფრო მიმზიდველი და საინტერესო, ვიდრე ვირტუალური სამყარო, ილუზორული რეალობა, რომელსაც თვითონ ბავშვი ქმნის.


215
ჯარიმა პარკირების წესების დარღვევისთვის

საჯარიმო ქვითრის ჩაბარების პროცედურა იცვლება

51
მოქმედი კანონმდებლობით, გზავნილის განმახორციელებელი ვალდებულია, პირის რეგისტრაციის მისამართზე მიიტანოს გზავნილი და ჩაუბარებლობის შემთხვევაში, შესაბამისი წერილობითი უკუგზავნილი შეადგინოს.

თბილისი, 28 მაისი – Sputnik. პირებს, რომლებიც საჯარიმო ქვითრის ჩაბარებისას მის მიღებაზე უარს ორჯერ განაცხადებენ, ქვითრის ჩაბარება მაინც ჩაეთვლებათ, იუწყება საზოგადოებრივი მაუწყებლის პირველი არხი.

შესაბამისი ცვლილებები „ადმინისტრაციულ სამართალდარღვევათა კოდექსში“ შედის, მათი ინიციატორები ზაზა გაბუნია, მერაბ ქვარაია, კობა ლურსმანაშვილი და გოგა გულორდავა არიან.

ინიციატორების განმარტებით, ცვლილებების მომზადების მიზეზი არსებული პრაქტიკაა, რომელიც ცხადყოფს, რომ ჯარიმების აღსრულების მოქმედი მექანიზმი ეფექტური არ არის. კერძოდ, პრობლემურია პირისთვის საჯარიმო ქვითრის ჩაბარების პროცედურა.

„სამართალდამრღვევი მიმართავს სხვადასხვა ხერხს, რათა ხანდაზმულობის ვადის გასვლამდე, რომელიც მოქმედი კანონმდებლობით ექვს თვეს შეადგენს, თავი აარიდოს საჯარიმო ქვითრის ჩაბარებას. არსებული მონაცემებით, კალენდარული წლის განმავლობაში დაფიქსირებულ სამართალდარღვევებთან დაკავშირებით გაცემული ჯარიმების რაოდენობის მხოლოდ დაახლოებით 50 პროცენტის აღსრულება ხდება. შესაბამისად, აღნიშნული ნათლად წარმოაჩენს აღწერილი აღსრულების მექანიზმის არაეფექტურობას“, – აღნიშნულია კანონპროექტის განმარტებით ბარათში.

კანონპროექტის თანახმად, საჯარიმო ქვითარი ჩაბარებულად ჩაითვლება იმ შემთხვევაშიც, თუ მის მიღებაზე უარს იტყვიან სამართალდამრღვევი პირის ოჯახის წევრები. ესენი კი არიან – მეუღლე, შვილი, ნაშვილები, შვილიშვილი, შვილიშვილის შვილი და მისი შვილი, მშობელი და მშვილებელი, და, ძმა, დისწული, ძმისწული და მათი შვილები, ბებია და პაპა, ბებიის დედ-მამა და პაპის დედ-მამა, ბიძა, დეიდა, ბიცოლა, მამიდა და მასთან მუდმივად მცხოვრები სხვა სრულწლოვანი პირი.

მოქმედი კანონმდებლობით, გზავნილის განმახორციელებელი ვალდებულია, პირის რეგისტრაციის მისამართზე მიიტანოს გზავნილი და ჩაუბარებლობის შემთხვევაში, შესაბამისი წერილობითი უკუგზავნილი შეადგინოს.

51
თემები:
ტრანსპორტი საქართველოში
ამირან გამყრელიძე

რომელი ქვეყნებიდან ვერ მიიღებს საქართველო ტურისტებს - ამირან გამყრელიძე

69
(განახლებულია 21:01 28.05.2020)
საქართველო 1 ივლისიდან საერთაშორისო ტურისტების მიღებას გეგმავს, ხოლო 15 ივნისიდან კი შიდა ტურიზმის გახსნაა დაანონსებული.

თბილისი, 28 მაისი — Sputnik. კორონავირუსით მაღალდაზიანებული ქვეყნებიდან საქართველო ტურისტებს ჯერჯერობით ვერ მიიღებს, განუცხადა საზოგადოებრივი მაუწყებლის პირველ არხს დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ.

საქართველო 1 ივლისიდან საერთაშორისო ტურისტების მიღებას გეგმავს, ხოლო 15 ივნისიდან კი შიდა ტურიზმის გახსნაა დაანონსებული.

„რა თქმა უნდა, ჯერ ვერ მივიღებთ ტურისტებს მაღალდაზიანებული ქვეყნებიდან. მიმდინარეობს მუშაობა იმ პროტოკოლზეც, როგორი უნდა იყოს ტურისტების მიღებისა და მათზე ეპიდზედამხედველობის დაკვირვების სისტემა, რათა მინიმუმამდე დავიყვანოთ ქვეყანაში ინფექციის შემოტანის რისკი. მოდით, ამ კითხვაზე პასუხს დავუბრუნდეთ ერთი კვირის, 10 დღის შემდეგ, როცა ამ საკითხზე უფრო მეტად ვიქნებით ჩამოყალიბებული“, - განაცხადა ამირან გამყრელიძემ.

მისივე თქმით, დაავადებათა კონტროლის ცენტრს აქვს თავისი რეკომენდაციები, მაგრამ საბოლოო გადაწყვეტილებას იღებს საკოორდინაციო საბჭო. 

„ჩამოვყალიბდებით წესებზე, რომელიც დამტკიცდება შესაბამისი მარეგულირებელი აქტით“, – აღნიშნა გამყრელიძემ.

პანდემიის გამო ახალი გამოწვევების ფონზე ხელისუფლების მიერ შემუშავებული კონცეფციის თანახმად, საქართველო იმიჯს შეიცვლის და პოზიციონირდება როგორც უსაფრთხო ქვეყანა.

ტურისტების მიღებამდე საქართველოს ხელისუფლება ტურიზმის მსოფლიო ორგანიზაციისა და ჯანმოს მიერ რეკომენდებული უსაფრთხოების სტანდარტების დანერგვას უზრუნველყოფს. ეს შეეხება როგორც აეროპორტებსა და საკონტროლო-გამშვებ პუნქტებს, ისე სასტუმროებს, გიდების მომსახურებას, კვების ობიექტების, ასევე ნებისმიერი სახეობის ტრანსპორტის მუშაობას.

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/28 მაისი >>

საქართველოში ჩამოსული ტურისტები ე.წ. „მწვანე ზონებში“ დაისვენებენ. ტურისტული სექტორი და სასტუმროები უსაფრთხოების წესების დაცვის მიზნით ტურიზმის მსოფლიო ორგანიზაციისა და ჯანდაცვის მსოფლიო ორგანიზაციის მიერ შემუშავებულ სპეციალურ რეკომენდაციებს მიიღებენ.

მთავრობის გეგმის მიხედვით, საქართველოში ჩამოსული ტურისტები დაისვენებენ ისეთ კურორტებზე, როგორიცაა წყალტუბო, ბორჯომი, აბასთუმანი, ბაკურიანი, გუდაური, ბათუმი და ა.შ.

69
თემები:
COVID-19 საქართველოში
ამწე სამშენებლო მოედანზე

ასობით მილიონი ლარი მშენებლობის დასახმარებლად: საქართველოს ხელისუფლების ახალი გეგმა

0
დეველოპერული სექტორის დასახმარებლად, რომელიც კორონავირუსის პანდემიის გამო სერიოზულად დაზარალდა, საქართველოს ხელისუფლება 434 მილიონ ლარს გამოყოფს

კორონავირუსის პანდემიის ფონზე სამშენებლო სფერო დიდ ზარალს განიცდის - გაძვირდა სამშენებლო მასალები, ხოლო მოქალაქეთა გადახდისუნარიანობა შემცირდა. მსხვილი სამშენებლო კომპანიები თანამშრომლების შტატის შეკვეცაზე ფიქრობენ.

სექტორის და მასში დასაქმებული მოქალაქეების დასახმარებლად ხელისუფლებამ ანტიკრიზისული გეგმა შეიმუშავა.

საბანკო რეგულაციები მარტივდება – რა იცვლება სესხის აღების მსურველებისთვის >>

ეროვნულ ბანკთან კონსულტაციების შედეგად ხელისუფლებამ დეველოპერულ სექტორში 4 ძირითადი გამოწვევა განსაზღვრა: გაყიდვების მოცულობების შემცირება, მშენებლობის დასრულების რისკების გაზრდა, რაც ყველა კრიზისისთვის არის დამახასიათებელი, მესამე არის ფასების მერყეობა და მეოთხე - სამშენებლო კომპანიებისთვის ფინანსების ხელმისაწვდომობა.

გეგმის მიხედვით, მთავრობა იპოთეკაზე საპროცენტო განაკვეთის სუბსიდირებაზე 70 მილიონ ლარს გამოყოფს; იპოთეკური კრედიტების პორტფელზე სახელმწიფო გარანტიებისთვის  - 14 მილიონ ლარს; 150 მილიონ ლარს - დევნილების ბინებით უზრუნველსაყოფად; 200 მილიონ ლარს - საცხოვრებელი მშენებლობების დასრულებისთვის სახელმწიფო გარანტიების პროგრამაზე.

იპოთეკური კრედიტების სუბსიდირება

გაყიდვების შემცირების პრობლემის გადასაჭრელად ხელისუფლებამ მოქალაქეებისთვის ბინების შეძენის პროცესის გამარტივება გადაწყვიტა. 2020 წლის ბოლომდე საცხოვრებელი პირობების გაუმჯობესების და ბინების შეძენის მსურველთათვის მთავრობა იპოთეკურ სესხებზე საპროცენტო განაკვეთს დაასუბსიდირებს. 4%-იანი სუბსიდია 5 წლის განმავლობაში 200 ათას ლარამდე მოცულობის ყველა სასესხო შეთანხმებაზე გავრცელდება.

„ეს ნიშნავს, რომ დაახლოებით საპროცენტო განაკვეთი იპოთეკურ სესხზე ლარში შემცირდება 7%-მდე და ეს არის ისტორიული მინიმუმი. არასოდეს ლარში აღებულ სესხებზე მსგავსად დაბალი საპროცენტო განაკვეთი არ ყოფილა“, - განაცხადა პრემიერ-მინისტრის მრჩეველმა ეკონომიკურ საკითხებში ბექა ლილუაშვილმა დეველოპერული სექტორის მხარდაჭერის ანტიკრიზისული გეგმის პრეზენტაციაზე.

გარდა ამისა, სესხების დასაფარად წინსწრებით შენატანების და საპროცენტო განაკვეთის ზრდის პრევენციისთვის, მთავრობა 2020 წლის ბოლომდე აღებული ყველა სესხის 20%-ის გარანტიას საკუთარ თავზე აიღებს. გარანტია გავრცელდება სესხებზე, სადაც პირველადი შენატანის მოცულობა იქნება არანაკლებ 10 პროცენტისა.

დეველოპერების დასახმარებლად შემუშავებული ანტიკრიზისული გეგმის ფარგლებში, დევნილებისთვის ბინების გადაცემის პროცესი დაჩქარდება. მთავრობა წლის ბოლომდე აუქციონზე 150 მილიონი ლარის ღირებულების დაახლოებით 1800 ბინის შეძენას გეგმავს.

ამგვარად, იძულებით გადაადგილებული დაახლოებით 1800 ოჯახი დაგეგმილზე სამი წლით ადრე საცხოვრებელ ბინებს მიიღებს.

ხელისუფლება ასევე მშენებლობის დასრულების რისკებს დაფარავს. გარანტიების გაცემის პროგრამის განსახორციელებლად ბიუჯეტიდან 200 მილიონი ლარი გამოიყოფა. იმ შემთხვევაში, თუ მშენებლები პროექტით გათვალისწინებული ბინების 30%-ს ვერ გაყიდიან, მათ მთავრობა დევნილების დასაკმაყოფილებლად შეიძენს.

„ეს არის ის გარანტია, რომელიც ერთი მხრივ, ჩვენ მოქალაქეებს საშუალებას აძლევს, რომ მათ შეუფერხებლად განახორციელონ მუშაობა და მეორე მხრივ, სექტორს იმის გარანტიას აძლევს, რომ ის ნებისმიერ შემთხვევაში მოახდენს საპროექტო პროცესში სამშენებლო ფართების 30%-ის რეალიზაციას სახელმწიფოზე და შესაბამისად მას უადვილდება ფინანსურ რესურსებზე წვდომა“, - განაცხადა ლილუაშვილმა.

დაუმთავრებელი მშენებლობების პრობლემის გადაჭრა თბილისში

თბილისის მერია განაგრძობს დახმარების გაწევას 2013 წლამდე დაუმთავრებელი მშენებლობების დასრულების კუთხით. ამჟამად მერია განიხილავს 30 განაცხადს, რომელთა დაკმაყოფილების შემდეგ ბინებს მიიღებს დაახლოებით 4 000 ადამიანი, რომელიც დაუმთავრებელი მშენებლობის შედეგად დაზარალდა.

Коронавирус и рынок недвижимости в Тбилиси >>

„გადავწყვიტეთ, რომ ამ დროებითი ღონისძიებების სარგებლობისთვის განაცხადის შეტანის ვადა გახანგრძლივდეს ერთი წლის განმავლობაში და მეორე ჩვენ, ვმუშაობთ იმისთვის, რომ ეს პროგრამა გაგრძელდეს არამხოლოდ თბილისის მუნიციპალიტეტის ფარგლებში, არამედ საქართველოს მთელ ტერიტორიაზე და ამისთვის პარლამენტის მხარდაჭერა იქნება აუცილებელი, იმიტომ, რომ ეს ინიციატივა მოითხოვს საკანონმდებლო ცვლილებებს“, - განაცხადა ბექა ლილუაშვილმა.

სიახლე დეველოპერებისათვის

დეველოპერული კომპანიების საქმიანობაში Escrow-ანგარიშების გამოყენება იგეგმება. 2020-2021 წლებიდან ამ საბანკო ანგარიშის გამოყენება სავალდებულო გახდება, გარკვეული პირობების გათვალისწინებით.

„ამ Escrow-ანგარიშის მიხედვით, მსესხებლის მიერ გადახდილი თანხები გროვდება ამ ანგარიშზე და მშენებელს მხოლოდ სამშენებლო პროცესის პარალელურად ან დასრულების შემდეგ შეუძლია ამ ანგარიშის გამოყენება. ეს არის სისტემური ნაბიჯი, რომელიც გამოყენებულია მრავალ ევროპულ განვითარებულ ქვეყანაში და არის იმისი წინაპირობა, რომ შევქმნით სტანდარტს, რომელიც გააჯანსაღებს სექტორს“, - აღნიშნა ლილუაშვილმა.

მისი თქმით, სიახლე შეეხება მხოლოდ გარკვეული კატეგორიის კომპანიებს გაყიდვების მოცულობიდან გამომდინარე, ხოლო რეფორმა ეტაპობრივად განხორციელდება.

საქართველოს მშპ-ში სამშენებლო სექტორის წილი დაახლოებით 9%-ს შეადგენს, ხოლო მასში დასაქმებული მოქალაქეების რაოდენობა - თითქმის 120 ათასს. ამდენივეა დასაქმებული სამშენებლო სექტორთან დაკავშირებულ სფეროებში. ხელისუფლების წარმომადგენლების განცხადებით, სექტორის გაჯანსაღება და კრიზისიდან გამოყვანა პოსტკრიზისულ პერიოდში ქვეყნის ეკონომიკის განვითარებისთვის უმნიშვნელოვანეს წინაპირობას წარმოადგენს.

0
თემები:
საქართველოს ეკონომიკა