მოსკოვის კრემლი

განთავსდებიან თუ არა ყარაბაღში რუსი სამშვიდობოები: კრემლი კომენტარს აკეთებს

72
(განახლებულია 20:17 15.10.2020)
მანამდე რუსეთის საგარეო საქმეთა მინისტრმა სერგეი ლავროვმა განაცხადა, რომ, მოსკოვის აზრით, მთიან ყარაბაღში რუსი დამკვირვებლები უნდა იყვნენ.

თბილისი, 15 ოქტომბერი — Sputnik. მთიან ყარაბაღში სამშვიდობოების განთავსება მხოლოდ სომხეთისა და აზერბაიჯანის თანხმობითაა შესაძლებელი, განაცხადა რუსეთის პრეზიდენტის პრეს-მდივანმა დმიტრი პესკოვმა.

მანამდე რუსეთის საგარეო საქმეთა მინისტრმა სერგეი ლავროვმა განაცხადა, რომ, მოსკოვის აზრით, მთიან ყარაბაღში რუსი დამკვირვებლები უნდა იყვნენ, მაგრამ ბოლო სიტყვა კონფლიქტის მონაწილეებზეა. მისი თქმით, ყარაბაღში პოლიტიკური დარეგულირება მოსკოვის შეთანხმების განხორციელების პარალელურად უნდა ხდებოდეს.

„პირველხარისხოვანი საკითხი აქ ისაა, არიან თუ არა მზად დაპირისპირებული მხარეები, კერძოდ, სომხეთი და აზერბაიჯანი. ნებისმიერი სამშვიდობოების, დამკვირვებლებისა, თუ ვინც უნდა იყოს, ნებისმიერი განთავსება, მხოლოდ ორივე ქვეყნის თანხმობის შემთხვევაშია შესაძლებელი“, — უთხრა პესკოვმა ჟურნალისტებს.

ამით პრეზიდენტის პრეს-მდივანმა პასუხი გასცა მასმედიის წარმომადგენლების შეკითხვას, არის თუ არა მზად რუსეთი, გაგზავნოს თავისი მშვიდობისმყოფლების კონტინგენტი მთიან ყარაბაღში.

პესკოვის თქმით, ჯერჯერობით ამაზე პასუხი არც ერთი მხარისგან არ გამოთქმულა.

სომხეთსა და აზერბაიჯანს შორის მთიანი ყარაბაღის გამო კონფლიქტი 27 სექტემბერს გამწვავდა. ერევანი და ბაქო ესკალაციაში ერთმანეთს ადანაშაულებენ. სომხეთის თავდაცვის სამინისტრომ განაცხადა, რომ ყარაბაღზე აზერბაიჯანმა „საჰაერო და სარაკეტო იერიში“ მიიტანა, ბაქოში კი ირწმუნებიან, რომ ცეცხლი სომეხმა სამხედროებმა გახსნეს.

მოგვიანებით რუსეთის, საფრანგეთისა და აშშ-ის ლიდერებმა ერთობლივი განცხადება გაავრცელეს მთიან ყარაბაღში შექმნილ სიტუაციასთან დაკავშირებით. ვლადიმირ პუტინმა, დონალდ ტრამპმა და ემანუელ მაკრონმა მოუწოდეს აზერბაიჯანსა და სომხეთს, დაუყოვნებლივ შეწყვიტონ საბრძოლო მოქმედებები მთიან ყარაბაღში და აღადგინონ მოლაპარაკებები. მოწოდებას შეუერთდა გერმანიის კანცლერი ანგელა მერკელიც. თურქეთმა კი განაცხადა, რომ აზერბაიჯანს ნებისმიერი სახის დახმარებას გაუწევს, რომელიც მას დასჭირდება მთიანი ყარაბაღის კონფლიქტში.

9 ოქტომბერს მოსკოვში რუსეთის, სომხეთისა და აზერბაიჯანის საგარეო საქმეთა მინისტრები — სერგეი ლავროვი, ზოგრაბ მნაცაკანიანი და ჯეიჰუნ ბაირამოვი შეხვდნენ მთიანი ყარაბაღის თემაზე მოსალაპარაკებლად. დაახლოებით ათსაათიანი მოლაპარაკებების შედეგად მხარეები ცეცხლის ჰუმანიტარულ რეჟიმში შეწყვეტაზე შეთანხმდნენ, რაც ძალაში 10 ოქტომბრის დღის 12 საათზე შევიდა. მიუხედავად ამისა, საომარი მოქმედებები არ წყდება, რაშიც კონფლიქტის მხარეები კვლავ ერთმანეთს ადანაშაულებენ. 

 

72
თემები:
რუსეთი დღეს (646)
ხედი რუსეთის საგარეო საქმეთა სამინისტროზე

უპასუხისმგებლო მიდგომა: რუსეთში დასავლეთის რეაქცია გააკრიტიკეს

13
(განახლებულია 20:03 28.10.2020)
რუსეთის საგარეო უწყებაში მიაჩნიათ, რომ „პრეზიდენტ პუტინის წინადადებებაზე თვალის დახუჭვა“ ევროპული უსაფრთხოების საკითხისადმი უპასუხისმგებლო მიდგომაზე მეტყველებს.

თბილისი, 28 ოქტომბერი — Sputnik. ევროპის ქვეყნები თავიანთივე უსაფრთხოების უზრუნველყოფის მიმართ „უპასუხისმგებლო მიდგომას“ აფიქსირებენ და თვალს ხუჭავენ რუსეთის მცდელობაზე, დაასტაბილუროს ვითარება ევროპაში, განაცხადა რუსეთის საგარეო საქმეთა მინისტრის მოადგილემ სერგეი რიაბკოვმა.

ორშაბათს პრეზიდენტმა ვლადიმირ პუტინმა წარმოადგინა ის ნაბიჯები, რომლებიც მცირე და საშუალო სიშორის რაკეტების შესახებ ხელშეკრულების შეწყვეტის პირობებში დაძაბულობის შესასუსტებლად მიაჩნია აუცილებლად. კერძოდ, მან განაცხადა, რომ მოსკოვი მზადაა, ნებაყოფლობით თქვას უარი რუსეთის ევროპულ ნაწილში რაკეტა 9М729-ის განთავსებაზე, ოღონდ იმ პირობით, რომ ნატო ასევე გადადგამს შემხვედრ ნაბიჯებს. გარდა ამისა, მან ასევე შესთავაზა ალიანსს, შემოწმდეს Aegis Ashore-ს კომპლექსები ევროპის ბაზებზე და ასევე 9М729-ები კალინინგრადის ობიექტებზე.

თუმცა ევროპაში რუსეთის ლიდერის ინიციატივას სკეპტიკურად შეხვდნენ. კერძოდ, ბერლინში აღნიშნეს, რომ ასეთი იდეეები „ნდობას არ იმსახურებს“. ლონდონმა კი კიდევ ერთხელ დაადანაშაულა რუსეთი საშუალო და მცირე სიშორის რაკეტების ლიკვიდაციის შესახებ შეთანხმების ჩავარდნაში.    

„პირველი ნეგატიური სიგნალები, საკმაოდ დაუფიქრებელი, სწორედ ევროპისგან მოვისმინეთ“, — განაცხადა რიაბკოვმა РИА Новости-სთან ინტერვიუში.

მინისტრის მოადგილის თქმით, ახლა ფსონები „მეტად მაღალია“ და ისინი, ვინც „პრეზიდენტ პუტინის წინადადებების იგნორირებასა და მათზე თვალის დახუჭვას ცდილობენ, მეტად უპასუხისმგებლოდ უდგებიან ევროპული უსაფრთხოების საკითხს“.  

„გახმოვანებული წინადადებების სერიოზულობა მათ გამოწვლილვით შესწავლას მოითხოვს. ამ წინადადებების სიღრმე ფუნდამენტურ გააზრებას საჭიროებს. იგი ასახავს რუსეთის ფედერაციის ხელმძღვანელობის განწყობას, მოძებნოს ევროპაში სამხედრო–პოლიტიკური ვითარების სტაბილიზაციის გზა, რათა არ დაუშვას იქ ახალი „სარაკეტო კრიზისები“, — აღნიშნა რიაბკოვმა.

2019 წლის 2 აგვისტოს მოქმედება შეწყვიტა საშუალო და მცირე სიშორის რაკეტების შესახებ ხელშეკრულებამ, რომლის მიზანიც გლობალური სტრატეგიული სტაბილურობის უზრუნველყოფა იყო. ვაშინგტონმა ხელშეკრულებიდან გასვლა იმით ახსნა, რომ მოსკოვი ვალდებულებებს არ ასრულებდა. თუმცა, რუსული მხარის განცხადებით, აშშ-ს ამის მტკიცებულებები არ წარმოუდგენია.

მიმდინარე წლის თებერვალში რუსეთმა გამოაცხადა, რომ აშშ-ის ანალოგიური ნაბიჯების საპასუხოდ შეთანხმებით ნაკისრი ვალდებულებების შესრულებას აჩერებდა.

13
თემები:
რუსეთი დღეს (646)
ვაქცინა ეპივაკკორონა

რუსეთში ახალი ანტიკორონავირუსული პრეპარატის წარმოება დაიწყო

22
(განახლებულია 20:48 27.10.2020)
პრეპარატის მასობრივი მიწოდება ნოემბრის ბოლოს ან დეკემბრის დასაწყისისთვის იგეგმება, სამოქალაქო ბრუნვაში კი, სავარაუდოდ, 1 იანვრიდან გავა.

თბილისი, 27 ოქტომბერი — Sputnik. რუსეთში კორონავირუსის ვაქცინა „ეპივაკკორონას“ წარმოება დაიწყო, იუწყება საინფორმაციო საგენტო РИА Новости „როსპოტრებნადზორზე“ დაყრდნობით.

COVID-19-ის წინააღმდეგ რუსეთში შექმნილი მეორე პრეპარატის რეგისტრაციის შესახებ ცნობილი ოქტომბრის შუა რიცხვებში გახდა.

ვაქცინა ეპივაკკორონა
photo: press-service of Russian Federal Service for Surveillance on Consumer Rights Protection and Human Wellbeing (Rospotrebnadzor)

გავრცელებული ინფორმაციით, პრეპარატ „ეპივაკკორონის“ პოსტრეგისტრაციული კვლევები უახლოეს ხანებში დაიწყება და მასში 40 ათასი მოხალისე მიიღებს მონაწილეობას, მათ შორის 60 წელს გადაცილებული ადამიანები, რომლებსაც ქრონიკული დაავადებები აწუხებთ. ვაქცინა კუნთებში ორჯერ გაკეთდება 14–21 დღიანი ინტერვალით და თითოეული ინექციის რაოდენობა 0,5 მილილიტრი იქნება.

მასობრივი მიწოდება ნოემბრის ბოლოს ან დეკემბრის დასაწყისისთვის იგეგმება. სამოქალაქო ბრუნვაში პრეპარატი, სავარაუდოდ, 1 იანვრიდან გავა.

კორონავირუსის საწინააღმდეგო პირველი რუსული ვაქცინა გახდა პრეპარატი სახელწოდებით „სპუტნიკ-V“, რომელიც გამალეს ეპიდემიოლოგიისა და მიკრობიოლოგიის ეროვნულ კვლევით ცენტრში შეიქმნა. ის აგვისტოს დასაწყისში დარეგისტრირდა.

ამასთან ამ დროისათვის ჩუმაკოვის იმუნობიოლოგიური პრეპარატების შექმნისა და კვლევების ცენტრში მიმდინარეობს მუშაობა ცოცხალი ვაქცინის შემუშავებაზე.

 

22
თემები:
რუსეთი დღეს (646)
ავტობუსები თბილისში

თბილისში ერთ-ერთ ავტობუსში მგზავრი გარდაიცვალა

0
ასაკოვანი ქალი ავტობუსში მგზავრობისას შეუძლოდ გახდა, ადგილზე გამოძახებულმა სასწრაფო სამედიცინო დახმარებამ მისი გადარჩენა ვერ მოახერხა

თბილისი, 28 ოქტომბერი - Sputnik. თბილისში, #28 ავტობუსში მგზავრობისას ქალი გარდაიცვალა, აცნობეს Sputnik -საქართველოს თბილისის სატრანსპორტო კომპანიაში.

შემთხვევა დღეს საღამოს დაახლოებით 20:30 საათზე გრანელის ქუჩაზე მოხდა.

„ასაკოვანი ქალი 28 ნომერ ავტობუსში მგზავრობისას შეუძლოდ გახდა, გამოიძახეს სასწრაფო სამედიცინო დახმარება, მაგრამ  სამწუხაროდ მისი გადარჩენა ვერ მოხერხდა“, - აღნიშნეს კომპანიაში.

მგზავრის გარდაცვალების მიზეზი ჯერჯერობით უცნობია.

0
თემები:
შემთხვევები საქართველოში