თბილისი, 17 ივლისი - Sputnik. მოგზაური დეკანოზი ფიოდორ კონიუხოვი ჩინელ დაივერებთან ერთად აპირებს 1904 წელს პორტ-არტურთან დაღუპული ჯავშნოსანი ხომალდის, „პეტროპავლოვსკის“ მეზღვაურების ნეშტების ამოტანას და სამშობლოში გადასვენებას.
ხომალდი, რომლის მონახულებასაც კონიუხოვი მიმდინარე წლის ოქტომბერში აპირებს, რუსეთ-იაპონიის ომის დროს ჩაიძირა, როდესაც 1904 წლის 13 აპრილს იაპონურ ნაღმზე აფეთქდა. დაიღუპა 620 მეზღვაური, 29 ოფიცერი, ადმირალი სტეპან მაკაროვი და მხატვარ-ბატალისტი ვასილი ვერეშჩაგინი.
აღსანიშნავია, რომ მოგზაურმა, მყვინთავების ჯგუფთან ერთად, ცოტა ხნის წინ საათნახევარი დაჰყო ლინკორ „ნოვოროსიისკის“ დაღუპვის ადგილზე, რომელიც სევასტოპოლის ყურეში 1955 წელს ჩაიძირა. კონიუხოვმა, საგანგებო სიტუაციების მართვის სამინისტროს მაშველებსა და ადმირალ ნახიმოვის სახელობის სასწავლებლის თანამშრომლებმა ზღვის ფსკერიდან არაერთი ნივთის ამოტანა შეძლეს.
ფიოდორ კონიუხოვის თქმით, მოგვიანებით ის კიდევ ერთხელ ჩაყვინთავს ყურეში, რათა ხომალდის მახლობლად ფსკერზე ჯვარი აღმართოს.
