რუსული რუბლის ბეჭდვა

მიმოხილვა: მსოფლიო ბანკის ახალი პროგნოზი რუსეთის ეკონომიკის აღდგენაზე

56
(განახლებულია 20:39 05.04.2021)
რუსეთის ეკონომიკა კრიზისის შემდეგ იმაზე სწრაფად აღდგება, ვიდრე მოსალოდნელი იყო — ასეთია მსოფლიო ბანკის ექსპერტების დასკვნა. ახალი პროგნოზი იანვრისაზე გაცილებით უკეთესია.

ნატალია დემბინსკაია

შეზღუდვების გაუქმება და ვაქცინაცია

მსოფლიო ბანკში მიაჩნიათ, რომ ქვეყნის მთლიანი შიდა პროდუქტი (მშპ) 2021 და 2022 წლებში, შესაბამისად, 2,9 და 3,2 პროცენტით გაიზრდება. იანვარში კი საუბარი 2,6 და 3,0 პროცენტებზე იყო.

„აღდგენა, როგორც მოსალოდნელია, დაჩქარდება <...> ზრდაც მოიმატებს <...> პანდემიის შედეგების გავლენის თანდათანობით შესუსტების კვლადაკვალ“, — ხაზს უსვამენ ევროპისა და ცენტრალური აზიის ეკონომიკების შესახებ მოხსენების ავტორები.

2020 წლის მშპ-ის დანაკარგები სხვებზე ნაკლები გამოდგა — 3,1 პროცენტი. სწორედ ამის საფუძველზე შეიცვალა პროგნოზი.

აქტიურ ზრდას ხელს შეუწყობს შეზღუდვების შესუსტება. რუსეთს არ გამოუცხადებია „ლოკდაუნი“ კორონავირუსის მეორე ტალღის გამო, რამაც კრიზისიდან სწრაფად გამოსვლა გახადა შესაძლებელი. მსოფლიო ბანკის დასკვნის ამოსავალი ისაა, რომ ქვეყანა შეძლებს თავიდან აიცილოს COVID-19-ის მესამე ტალღა.

მსოფლიო ბანკის ექსპერტები მძლავრ „დრაივერად“ რუსულ ვაქცინასა და აცრების კამპანიას მიიჩნევენ. თუმცა იმავდროულად რისკებზეც მიუთითებენ: თუ მოსახლეობა აქტიურად არ აიცრება, ეპიდემია გაგრძელდება.

ვითარებაზე ნეგატიურად აისახება მორიგი დასავლური სანქციებიც. საბანკო სექტორიც ეჭვებს იწვევს. ეკონომისტების შეფასებით, იპოთეკური ბაზარი გადაიწვება, რაც აქტივების ხარისხს გააუარესებს და საფინანსო ორგანიზაციების შემოსავლებს შეამცირებს.

სიღარიბის დონე და ბიუჯეტი

მსოფლიო ბანკში ვარაუდობენ, რომ რუსეთში სიღარიბის დონე გასულ წელთან შედარებით შემცირდება, თუმცა 2022 წლამდე მაინც უფრო მაღალი იქნება, ვიდრე პანდემიამდელი მაჩვენებლები იყო. მოხსენების ავტორები აღნიშნავენ, რომ ხელისუფლების სოციალურმა ზომებმა არ დაუშვა ქვეყანაში კიდევ მეტი გაღარიბება.

დეკემბერში ამის თაობაზე საუბრობდა მსოფლიო ბანკის წარმომადგენელი რუსეთში რენო სელიგმანი, რომელიც რუსეთის მთავრობის ანტიკრიზისული ქმედებების ეფექტურობას უსვამდა ხაზს.

სახელმწიფომ გაზარდა ხარჯები ბიზნესისა და მოსახლეობის მხარდაჭერის კუთხით. ამას პლუს ცენტრალურ ბანკს აქვს სოლიდური ფინანსური რეზერვები. ანტიკრიზისული გადასხმები ექსპერტებმა მშპ-ის 4 პროცენტად შეაფასეს (ოთხ ტრილიონ რუბლზე მეტი), რამაც ქვეყნის გაღატაკება შეაჩერა.

შრომის სამინისტროში მანამდე სიღარიბის 13%-იან მაჩვენებელზე საუბრობდნენ. ეს თითქმის 20 მლნ კაცია.

მსოფლიო ბანკმა ბიუჯეტის პროგნოზიც გააკეთა. გასული წელი 4,1 ტრილიონი რუბლის დეფიციტით დასრულდა, რაც მშპ-ის 3,8%-ია. 2021 წელს ეს მაჩვენებელი 1,8%-მდე შემცირდება, ხოლო 2022 წელს ქვეყანა პროფიციტში წავა.

რეცესია დასრულებულია

მარტის შუა რიცხვებში ეროვნული კვლევითი უნივერსიტეტის „ეკონომიკის უმაღლესი სკოლის“ ექსპერტებმა განაცხადეს, რომ რეცესია შეიძლება დასრულებულად ჩაითვალოს. „2020 წლის ბოლოს ზედიზედ ორი კვარტლის განმავლობაში ძირითადი მაკრომაჩვენებლების ზრდა ფორმალურად გვაძლევს იმის თქმის უფლებას, რომ რუსეთში რეცესია 2021 წლის დასაწყისში დასრულდა“, — ნათქვამია ექსპერტების კვლევაში.

როგორც ეკონომისტებმა განმარტეს, მშპ-ის ზრდა მესამე და მეოთხე კვარტლებში 4,2 და 1,7 პროცენტი იყო, ხოლო ძირითად კაპიტალში ინვესტიციები 1,2 და 0,4 პროცენტით გაიზარდა.

ექსპერტებმა აღნიშნეს საინვესტიციო აქტიურობის შედარებით სუსტი ვარდნაც. და ეს ერთ-ერთი დასტურია იმისა, რომ რუსეთს კრიზისი ნაკლებად მტკივნეულად გადააქვს, ვიდრე მთელ დანარჩენ მსოფლიოს. პოსტსაბჭოთა ისტორიაში ასეთი რამ პირველად ხდება.

ანალიტიკოსების თქმით, 2020 წელს რუსეთის მშპ იმაზე მეტად შემცირდა, ვიდრე კრიზისულ 2015 წელს (2%), თუმცა ეს 2009 წლის მაჩვენებელზე ნაკლები იყო (7,8%).

„ასეთი შედეგი განსაკუთრებულად აღსანიშნავია მეოცე საუკუნის შუა წლებიდან ყველაზე ძლიერი რეცესიის ფონზე მსოფლიო ეკონომიკაში (საერთაშორისო სავალუტო ფონდის წინასწარი შეფასებით, მინუს 3,5%), მით უმეტეს, რომ გლობალურ კრიზისს ნავთობზე ფასების ძლიერი ვარდნაც ერთვოდა“, — ნათქვამია „ეკონომიკის უმაღლესი სკოლის“ ექსპერტთა ბიულეტენში.   

თებერვლის დასაწყისში რუსეთის ხელისუფლების ნაბიჯებს პანდემიასთან ბრძოლაში მაღალი შეფასება მისცა საერთაშორისო სავალუტო ფონდმაც. მისი ექსპერტების ვარაუდით, 2021 წელს ქვეყნის მშპ 3 პროცენტით გაიზრდება, მომავალ წელს კი ეს მაჩვენებელი 3,9%-ს მიაღწევს — იმაზე მეტს, ვიდრე ევროზონაში ან აშშ-ში იქნება. საკვანძო „დრაივერებად“ ექსპერტები მასობრივ ვაქცინაციას, სახელმწიფოს დახმარებებს, სოლიდურ რეზერვებსა და ვალების დაბალ დონეს ასახელებენ.

რუსეთი პერსპექტიულ ბაზრად აღიარეს სააგენტო Bloomberg-ის ანალიტიკოსებმაც, რომლებმაც 17 ქვეყანა გამოიკვლიეს ეკონომიკური და ფინანსური სტაბილურობის 11 მაჩვენებლის მიხედვით. რუსეთმა რეიტინგში მეორე ადგილი დაიკავა.

ექსპერტებმა აღნიშნეს საიმედო საბიუჯეტო პროფილი და კარგი საინვესტიციო პოზიცია — 30%, და ასევე სოლიდური საერთაშორისო სავალუტო რეზერვები — 587,1 მლრდ. დეფოლტის ალბათობა მინიმალურია. Bloomberg-ის პროგნოზით, რუსეთს საკმაოდ კარგი ეკონომიკური ზრდა ექნება 2021 წელს — 3 პროცენტი.

რედაქცია შესაძლოა არ ეთანხმებოდეს ავტორის მოსაზრებებს

56
თემები:
რუსეთი დღეს (818)
საქართველოს დროშა პარლამენტის შენობის ფონზე

მოაგვარებს თუ არა პოლიტიკურ კრიზისს „ოცნების“ ხელმოწერა?

52
(განახლებულია 23:41 16.04.2021)
საქართველოს მმართველმა პარტიამ პოლიტიკური კრიზისის მოსაგვარებლად პირველი ნაბიჯი გადადგა. არის თუ არა ეს საკმარისი?

თბილისი, 16 აპრილი – Sputnik. საქართველოს მმართველმა პარტია „ქართულმა ოცნებამ“ ცალმხრივად მოაწერა ხელი ევროკავშირის საბჭოს პრეზიდენტის წარმომადგენლის მიერ შემოთავაზებულ დოკუმენტს.

მარტის მიწურულს თბილისში მეორედ იმყოფებოდა ევროპული საბჭოს პრეზიდენტის შარლ მიშელის წარმომადგენელი კრისტიან დანიელსონი, რომელმაც მხარეებს შესთავაზა კომპრომისული დოკუმენტი. თუმცა მისი წინადადებები მხარეებმა უარყვეს. მათ ვერ მიაღწიეს კონსენსუსს ხუთიდან ორ საკითხზე. ესენია პოლიტპატიმრების გათავისუფლება და ქვეყანაში ვადამდელი არჩევნების ჩატარება.

კონსენსუსთან ახლოს

პოლიტიკურმა პარტიებმა შეთანხმებას შეიძლება უახლოეს დღეებში მიაღწიონ – ამ შესაძლებლობას არ გამორიცხავს პარლამენტის ვიცე-სპიკერი დავით სერგეენკო.

„ვითარება უკვე მომწიფდა და მოლოდინი მაქვს, რომ უახლოესი დღეების განმავლობაში კონკრეტული გადაწყვეტილებები იქნება მიღებული“, – განაცხადა დავით სერგეენკომ.

მისი სიტყვებით, ევროკავშირის ერთმნიშვნელოვანი პოზიცია ორ ძირითად გზავნილში გამოიხატება.

„პირველი – ოპოზიციის მიმართ, რომ ისინი შემოვიდნენ პარლამენტში და აქ გააგრძელონ ოპონირება, მეორე – ხელისუფლების მიმართ გზავნილი, რომ კომპრომისები მოძებნოს ამ პირობების შესაქმნელად. მოლოდინი მაქვს, რომ უახლოეს დღეებში ეს ყველაფერი პოზიტიურად გადაწყდება“, – აღნიშნა სერგეენკომ.

ოპოზიციის პარლამენტში ყოფნა სახელმწიფოს სჭირდება, განაცხადა საპარლამენტო უმრავლესობის დეპუტატმა გურამ მაჭარაშვილმა.

„ჩვენი მხრიდან კომპრომისები არსებობს და თუ მოლაპარაკებები გაგრძელდება, გონივრული კომპრომისებისთვის ისევ მზად ვართ. ეს არ იქნება ამომრჩევლის გადაწყვეტილებისა და სამართლიანობის პრინციპის საწინააღმდეგო“, – განაცხადა მაჭარაშვილმა.

„ქართული ოცნება“ მზად არის, პოლიტიკური შეუთანხმებლობა რაც შეიძლება სწრაფად გადაიჭრას და ეს პროცესი შეთანხმებით დასრულდეს“, – აღნიშნა საპარლამენტო უმრავლესობის წევრმა დიმიტრი ხუნდაძემ.

„პოლიტიკა კომპრომისების ხელოვნებაა და ჩვენ ამ ბერკეტს გამოვიყენებთ, რომ კომპრომისი იყოს შეთავაზებული პოლიტიკური ოპონენტისთვის, მაგრამ მათი მხრიდანაც უნდა იყოს მზაობა, რომ შეთანხმებით დასრულდეს“, – თქვა მან.

მისი თქმით, კომპრომისი სამართლებრივ საკითხებს ვერ გასცდება, რიგგარეშე არჩევნების ჩატარებას სამართლებრივი საფუძველი სჭირდება და საკმარისი არ არის ის, რომ ვიღაცას არჩევნების შედეგები არ მოეწონა.

ოპოზიციის განწყობა

იმას, რომ კომპრომისზე ორივე მხარე უნდა წავიდეს, ოპოზიციის წარმომადგენლებიც ეთანხმებიან. თუმცა, როგორც პარტია „ნაციონალური მოძრაობის“ ერთ-ერთმა ლიდერმა ზაალ უდუმაშვილმა აღნიშნა, ოპოზიციამ რეალურად უნდა დაინახოს, რომ ხელისუფლება დაინტერესებულია პოლიტიკური კრიზისის მოგვარებით.

„მოლაპარაკებები ყოველთვის ითვალისწინებს კომპრომისებს ორივე მხრიდან და ამისთვის მზად არის ოპოზიცია. ეს უნდა იყოს, რა თქმა უნდა, გონივრული კომპრომისები და ჩვენ უნდა დავინახოთ ხელისუფლების მხრიდან უპირველესად მზადყოფნა, რომ ის მზად არის, განვაახლოთ მოლაპარაკებები და მივიდეთ შეთანხმებამდე. ოპოზიცია ყოველთვის მზად იყო კომპრომისული ნაბიჯებისთვის“, – განაცხადა ზაალ უდუმაშვილმა.

„ქართული ოცნების“ განცხადებებს სკეპტიკურად უყურებს „ევროპული საქართველოს“ წევრი ლაშა დამენია.

„ქართული ოცნების“ განცხადებები, როგორც წესი, არასდროს მართლდება. ამიტომ ჩვენ უბრალოდ დავიცდით. ის ზეწოლა, რომელსაც საერთაშორისო საზოგადოებრიობა ახორციელებს და ის შიდა ზეწოლა, რომელსაც საქართველოს მოსახლეობა პროტესტის სახით ავლენს, საბოლოო ჯამში მიგვიყვანს იმ შედეგთან, რომელსაც ქვეყანაში დემოკრატიის განვითარება ჰქვია“, – განუცხადა ჟურნალისტებს დამენიამ.

ექსპერტის მოსაზრება

პოლიტოლოგ არჩილ სიხარულიძის აზრით, ფაქტი, რომ „ქართულმა ოცნებამ“ ხელი მოაწერა დანიელსონის დოკუმენტს, უკვე კომპრომისია.

„ვფიქრობ, ეს უკვე დიდი წინსვლაა, დიდი კომპრომისია... თუმცა პირადად მე, სიმართლე გითხრათ, ამ დოკუმენტს არანაირი პირობით ხელს არ მოვაწერდი. პირადად მე მიმაჩნია, რომ ის, რასაც დანიელსონი გვთავაზობს, კანონის უზენაესობა არ არის. რასაც დანიელსონი და ევროპელი კოლეგები გვთავაზობენ – ეს უცოდინრობა, გულუბრყვილობა და სისულელეა. ქვეყანაში, სადაც მთავარი პრობლემა სწორედ ისაა, რომ ადამიანები არ ემორჩილებიან კანონს, რომ ყველა კანონზე მაღლა დგას, გარდა ღარიბი ხალხისა“, – აღნიშნა სიხარულიძემ.

ექსპერტი არ გამორიცხავს, რომ კომპრომისის სახით „ქართული ოცნება“ შეიძლება დათანხმდეს მელიას გათავისუფლებას.

„მმართველი პარტია ბევრ რამეზე შეიძლება წავიდეს. მან გაათავისუფლა გიგი უგულავა, გამოუშვა ძალიან ბევრი ხალხი. საკითხავი ისაა, რა იქნება ამის ფასი სინამდვილეში. „ქართულმა ოცნებამ“ უკვე დაუშვა პრეცედენტი, რომ შესაძლებელია ადამიანების ჯერ ჩასმა, შემდეგ კი გამოშვება, თითქოს არაფერი მომხდარა. მან უკვე დაუშვა, რომ პოლიტიკური ელიტა კანონზე მაღლა დგას“, – ფიქრობს სიხარულიძე.

რაც შეეხება ოპოზიციის მოთხოვნას ქვეყანაში ვადამდელი არჩევნების ჩატარების თაობაზე, სიხარულიძის აზრით, ამაზე დათანხმება „ოცნების“ მხრიდან შეცდომა იქნებოდა.

„ვფიქრობ, ეს დიდი სისულელე და გულუბრყვილობა იქნებოდა. ეს აშშ-ის ელჩმაც აღნიშნა, რომ ეს ცუდი პრეცედენტი იქნებოდა“, – თქვა ექსპერტმა.

საპარლამენტო არჩევნებიდან თითქმის ექვსი თვის შემდეგ ოპოზიციის დიდი ნაწილი კვლავ უარს აცხადებს პარლამენტში შესვლაზე და პოლიტპატიმრების გათავისუფლებასა და ვადამდელი არჩევნების ჩატარებას ითხოვს.

52
თემები:
საქართველოს პოლიტიკური ცხოვრება
ვალუტის კურსი თბილისში

საგარეო ვალი იზრდება... ემუქრება თუ არა ქვეყანას დეფოლტი?

1195
(განახლებულია 17:00 16.04.2021)
ქვეყნის საგარეო ვალი რეკორდულ ნიშნულზეა, ეროვნული ვალუტა უფასურდება, ფასები იზრდება, ცხოვრება ძვირდება... ეროვნული ბანკის პრეზიდენტი პროგნოზებისგან თავს იკავებს.

სამსონ ხონელი

საქართველოს სახელმწიფო საგარეო ვალი მთლიანი შიდა პროდუქტის უკვე 61,3 პროცენტს შეადგენს, რაც რეკორდული ნიშნულია. არახალია! − ბრძანებს მკითხველი და მართალიც იქნება, თუმცა, მხოლოდ ნაწილობრივ, რადგან ამ მიმართულებით სიახლეც არის. ფაქტია, საერთაშორისო სავალუტო ფონდის პროგნოზით მიმდინარე წლის ბოლოს საქართველოს ვალი კიდევ გაიზრდება და მთლიანი შიდა პროდუქტის მიმართ ის 63,8 პროცენტსაც გაუტოლდება. არადა, მკითხველს შევახსენებ, საქართველოს ბიუჯეტის მიხედვით ეს მაჩვენებელი 2022 წლის მიჯნაზე 60,1 პროცენტი უნდა იყოს.  

ვისი ვარაუდი გამართლდება, ამას დრო გვიჩვენებს. მანამდე კი საერთაშორისო სავალუტო ფონდი საქართველოს საგარეო ვალის მოცულობის მომდევნო ხუთი წლის განმავლობაში ცვლილების პროგნოზსაც გვთავაზობს. კერძოდ, მომავალ წელს ჩვენი ქვეყნის სახელმწიფო საგარეო ვალი მთლიანი შიდა პროდუქტის 61,04 პროცენტი იქნება. შემდეგ წლებში კი ეს მაჩვენებელი თანდათან დაიკლებს და 2026 წლისთვის 53,97 პროცენტს გაუტოლდება.

ანუ, თუ ამ ავტორიტეტული საერთაშორისო საფინანსო ინსტიტუტის პროგნოზს მივენდობით, შეგვიძლია ვივარაუდოთ, რომ 2021-2026 წლებში საქართველოს სახელმწიფო საგარეო ვალი მთლიან შიდა პროდუქტთან მიმართებაში 7,33 პროცენტით შემცირდება. ბევრია ეს თუ ცოტა? კითხვაზე პასუხი თქვენთვის მომინდია. თუმცა, პატივცემულ მკითხველს ისიც მოეხსენება, რომ ვალის აღებას ბევრად ნაკლები დრო სჭირდება, ვიდრე გასტუმრებას.

რატომ გაიზარდა საქართველოს სახელმწიფო საგარეო ვალი? საერთაშორისო სავალუტო ფონდის ახლო აღმოსავლეთისა და ცენტრალური აზიის დეპარტამენტის უფროსის ჯიჰად აზურის შეფასებით, ჩვენი ქვეყნის საგარეო საკრედიტო ვალდებულებების ზრდის მიზეზი COVID-19-ის პანდემიით გამოწვეული კრიზისია.

„საქართველოს მთავრობამ გასულ წელს მნიშვნელოვანი ნაბიჯები გადადგა ჯანდაცვისა და ეკონომიკური მიმართულებით. ეროვნულმა ბანკმა, თავის მხრივ, COVID19-ის პანდემიით გამოწვეული შოკის ეკონომიკაზე გავლენის შესამცირებლად გონივრულად გამოიყენა გაცვლითი კურსის მოქნილობა. რა თქმა უნდა, ამან საგარეო ვალის გაზრდა გამოიწვია, მიუხედავად ამისა, საქართველოს ვალის მოცულობა კვლავ სტაბილურია“, − განაცხადა ჯიჰად აზურმა.

მისივე თქმით, შექმნილ მძიმე ვითარებაში მნიშვნელოვანია, რომ საქართველომ შეინარჩუნოს მაკროეკონომიკური სტაბილურობა, შეამციროს ინფლაცია და მთლიანი შიდა პროდუქტის ზრდაზე იზრუნოს.

„საქართველოში ეკონომიკური აღდგენა ორ პრიორიტეტზე იქნება დაფუძნებული. ეს არის ეკონომიკის დაზარალებული მიმართულებების აღდგენა, ისეთი სექტორების დახმარება, როგორიცაა ტურიზმი. მეორე პრიორიტეტი უნდა იყოს კაპიტალის მომავლის სექტორებში ინვესტირება“, − განაცხადა ჯიჰად აზურმა. მისივე თქმით, საქართველოს ეკონომიკას ასევე დაეხმარება ისეთი მნიშვნელოვანი ფაქტორიც, როგორიც არის მეზობელ ქვეყნებთან და ევროკავშირთან თანამშრომლობის გაძლიერება.

ეკონომიკური ზრდის საკითხს შევეხეთ. შეგახსენებთ, რომ იმავე საერთაშორისო სავალუტო ფონდის პროგნოზით, მიმდინარე წელს საქართველოში ეს მაჩვენებელი 3,5 პროცენტამდე შემცირდება. მომავალი წლისთვის კი 5,8 პროცენტი იქნება. 

ამავდროულად საერთაშორისო სავალუტო ფონდში მიაჩნიათ, რომ ზოგადად ეკონომიკის გაჯანსაღებისთვის ძალიან მნიშვნელოვანია, მთავრობამ ჩამოაყალიბოს ხედვა სახელმწიფო საწარმოების რეფორმირებასთან დაკავშირებით. ეს ერთ-ერთი პირობაა ჩვენი ქვეყნისთვის ამ საფინანსო ინსტიტუტისგან მორიგი პროგრამის ფარგლებში დაფინანსების მისაღებად. ამის შესახებ გასული თვის ბოლოს განაცხადა ვერა მარტინმა, რომელმაც საქართველოში საერთაშორისო სავალუტო ფონდის მისიის ხელმძღვანელის პოსტზე საქმიანობა ახლახან დაასრულა. საინტერესოა, მაინც როგორია ამ საკითხზე თავად საერთაშორისო სავალუტო ფონდის ხედვა? ვერა მარტინის შეფასებით, რეფორმის მთავარი ამოსავალი სახელმწიფო საწარმოების კარგად მართვა უნდა იყოს. ეს არ არის მყისიერი რეფორმა და მისი გატარება დროს მოითხოვს.

„საერთაშორისო სავალუტო ფონდი არც ერთ მთავრობას არ ეუბნება – რა უნდა გააკეთოს, ანუ უნდა დაიწყონ სახელმწიფო საწარმოების პრივატიზაცია თუ უნდა დაიტოვონ სახელმწიფო საკუთრებაში. საზოგადოებრივი სიკეთის თვალსაზრისით თუ ვიმსჯელებთ, გარკვეული სახელმწიფო საწარმოები შეიძლება საჭირო იყოს იმ სიკეთის შესაქმნელად, რომელსაც კერძო სექტორი ხელს არ მოჰკიდებს. დღეს არსებული ტექნიკური დახმარების ფარგლებში ჩვენ უნდა ვიმსჯელოთ, თუ როგორ შეიძლება სახელმწიფო საწარმოების მმართველობის გაუმჯობესება“, − განაცხადა ვერა მარტინმა.

მისივე თქმით, მნიშვნელოვანია, რომ მართვა იყოს კომერციულ საწყისებზე, გამჭვირვალობა და ანგარიშვალდებულება იყოს უმაღლეს ხარისხში და, რაც მთავარია, კარგად იყოს გააზრებული, რა რისკების მატარებელი შეიძლება იყოს ცუდი მართვის პირობებში სახელმწიფო საწარმოები სახელმწიფო ბიუჯეტისთვის.  

ამასობაში მიმდინარე კვირა ქვეყანამ საკრედიტო ვალდებულების გასტუმრებით დაიწყო. ორშაბათს საქართველომ ბიუჯეტიდან 500 მილიონი დოლარის კრედიტი დაფარა. როგორც ფინანსთა სამინისტროში აცხადებენ, 2021 წლის სახელმწიფო ბიუჯეტში ვალის დაფარვა და ახალი ვალის აღება გათვალისწინებული იყო. შესაბამისი თანხა ბიუჯეტიდან გადაირიცხა და სესხიც დაიფარა. ახალი ვალის აღებას მთავრობა ისევ ევროობლიგაციების გამოშვებით გეგმავს. მომდევნო კვირაში ტრანზაქცია განხორციელდება, ჩამოირიცხება ის თანხა, რაც ქვეყანამ ევროობლიგაციების გამოშვებით უნდა მიიღოს. 

ვიდრე მთავრობა ერთ ვალს მეორე ვალის აღებით ისტუმრებს, ეროვნული ვალუტა დაბლა ფსკერისკენ ეშვება. სხვა საკითხია, რომ არავინ იცის, სად და რა ნიშნულზეა ეს ფსკერი. კობა გვენეტაძემ თუ იცის? − შესაძლოა ჩამეძიოს მკითხველი ირონიული ტონით. აბა რა გითხრათ, არ მაქვს პასუხი. თავად განსაჯეთ. ეროვნული ბანკის პრეზიდენტი აცხადებს, რომ საქართველოში მცურავი გაცვლითი კურსია და ლარის კურსთან დაკავშირებით რაიმე პროგნოზის გაკეთება შეუძლებელია.

მისივე განმარტებით, ეროვნული ვალუტის გაცვლით კურსზე რაც გავლენას ახდენს, ეს არის ძალიან დიდი თანხა, რომელიც ქვეყანამ ტურიზმის შემოსავლებიდან დაკარგა. როგორც კობა გვენეტაძე გვპირდება, ეროვნული ბანკი ყველა ზომას მიიღებს, რომ ფასების ზრდა მაღალი არ იყოს. თუმცა ქვეყნის მთავარი ბანკირი იმასაც მიგვანიშნებს, რომ ფასების ზრდა მეზობელ ქვეყნებშიც შეინიშნება. სავარაუდოდ, რაკი სამეზობლოსაც არ ულხინს, ცხოვრების გაძვირებას ჩვენც გაგებით უნდა მოვეკიდოთ. ლარის კურსი ის გამონაკლისი როდია, რისი პერსპექტივის პროგნოზირებაც ეროვნული ბანკის პრეზიდენტს შეუძლებლად მიაჩნია. კობა გვენეტაძის თქმით, საბაზრო ეკონომიკის პირობებში კრედიტების საპროცენტო განაკვეთების პროგნოზირებაც შეუძლებელია.

„საპროცენტო განაკვეთი დამოკიდებულია იმაზე, თუ როგორი ზრდა იქნება ეკონომიკაში, იქნება თუ არა ფინანსური რისკები და ა.შ.“ − განაცხადა ეროვნული ბანკის პრეზიდენტმა პარლამენტის საფინანსო-საბიუჯეტო კომიტეტში, სადაც ოპოზიციონერი დეპუტატების ალეკო ელისაშვილისა და ლევან იოსელიანის ინიციატივით საპენსიო სესხებზე არსებული საპროცენტო განაკვეთის საკითხი განიხილებოდა. კობა გვენეტაძის თქმით, რაკი საკითხი საზოგადოების ყველაზე მოწყვლად სეგმენტს ეხება, ეროვნულმა ბანკმა მომხმარებელთა უფლებების დასაცავად კანონმდებლობით მინიჭებული უფლების ფარგლებში არაერთი ღონისძიება გაატარა.

„საპროცენტო განაკვეთები ეტაპობრივად შემცირდა. 2012-2013 წლებში კრედიტების ერთი ნაწილი 100-დან 200 პროცენტამდე ეფექტური საპროცენტო განაკვეთითაც კი გაიცემოდა. მომდევნო ორი წლის განმავლობაში ეს მაჩვენებელი 50-53 პროცენტის ფარგლებში იყო, გარკვეული ტიპის სესხებზე 80 პროცენტიც კი. 2016 წლიდან მოყოლებული, საკრედიტო პორტფელზე საშუალო ეფექტურმა საპროცენტო განაკვეთმა ეტაპობრივად დაიკლო. ორი წლის შემდეგ, 2018 წლის მაისიდან ეფექტური საპროცენტო განაკვეთი 42 პროცენტიდან 33 პროცენტამდე შემცირდა. საპენსიო სესხების პროცენტის დონე, რომელიც ახლა გვაქვს, უკვე დიდად აღარ განსხვავდება იმ სახელფასო სესხებისგან, რომელსაც საპენსიო ასაკის ქვემოთ ასაკის მოსახლეობა იღებს“, – განაცხადა კობა გვენეტაძემ.

საკომიტეტო მოსმენისას მან ისიც გვითხრა, რომ საპენსიო სესხების სპეციფიკური რეგულირება სცდება ეროვნული ბანკის ფუნქციებს. ერთი სიტყვით, თუ კაცმა თანამდებობა უნდა ინატრო, არ უნდა გასცდე ეროვნული ბანკის პრეზიდენტობაზე ოცნებას. ეს, ისე, ხუმრობით, სადაც იყო ბევრი სიმართლე და ცოტაც ხუმრობა. ან, შესაძლოა, პირიქით. დასკვნა თქვენთვის მომინდია. არ დაგიმალავთ, ქვეყანაში მიმდინარე პოლიტიკური და ეკონომიკური პროცესების შემყურეს არც წინამდებარე სტატიის სათაურში დასმულ კითხვაზე მაქვს ოპტიმისტური პასუხი და, უკეთესი მომავლის იმედით, დროებით გემშვიდობებით...

 

1195
ჩინური ვაქცინა Sinopharm

გამყრელიძე:  საქართველოში Sinopharm-ით ვაქცინაცია 4 მაისიდან დაიწყება

0
კორონავირუსის საწინააღმდეგო ჩინურ პრეპარატს ჯანმოს ავტორიზაცია ჯერ არ მიუღია, მაგრამ ბევრი ქვეყანა ამ პრეპარატს უკვე იყენებს ვაქცინაციისთვის.

თბილისი, 18 აპრილი - Sputnik. საქართველოში კორონავირუსის საწინააღმდეგო ჩინური პრეპარატი Sinopharm-ით ვაქცინაცია 4 მაისიდან დაიწყება, ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა.

კორონავირუსის საწინააღმდეგო ჩინურ პრეპარატს ჯანმოს ავტორიზაცია ჯერ არ მიუღია. სპეციალისტების განცხადებით,  ვაქცინამ ჯანმოს ავტორიზაცია აპრილის ბოლოსთვის უნდა მიიღოს. რამდენიმე დღის წინ ცნობილი გახდა, რომ ეპიდრისკების გათვალისწინებით, ექსპერტები ერთმნიშვნელოვნად უჭერენ მხარს მოსახლეობის იმუნიზაციის პროცესში Sinopharm-ის დროულად ჩართვას. Sinopharm-ით ვაქცინაციის მსურველთა რეგისტრაცია საქართველოში 27 აპრილიდან დაიწყება.

„გადაწყვეტილია, რომ მალე დაიწყება ჩინური ვაქცინით აცრები. ქვეყანაში არის დასაწყობებული Sinopharm-ის 100 ათასი დოზა“,- აღნიშნა გამყრელიძემ.

მისი განცხადებით, ვაქცინაციის პროცესში ზრდის დინამიკა შეინიშნება, თუმცა არა ისეთი, როგორსაც სპეციალისტები ელოდებიან. გამყრელიძემ მოსახლეობას აცრისკენ კიდევ ერთხელ მოუწოდა.

ჩინური ვაქცინა Sinopharm მსოფლიოს 35 ქვეყანაშია აღიარებული და აღნიშნული პრეპარატის 200 მლნ დოზამდე უკვე გამოყენებულია.

საქართველოში ჩინური ვაქცინა Sinopharm-ის 100 ათასი დოზა 3 აპრილს ჩამოვიდა. საქართველო ასევე ელოდება Sinovac-ის ვაქცინას, რომელსაც ჩინეთიდან უსასყიდლოდ მიიღებს.

ჩინური ვაქცინა ინაქტივირებული (მკვდარი) კორონავირუსის საფუძველზეა შექმნილი. კომპანია Sinopharm-მა ის უჰანის ვირუსოლოგიის ინსტიტუტთან და ბიოლოგიური პროდუქტების ინსტიტუტთან ერთად შეიმუშავა.

ვირუსის ინაქტივაცია ვაქცინის შექმნის ერთ-ერთი ყველაზე ძველი და საიმედო ხერხია, აღნიშნავენ ეპიდემიოლოგები. ამ ტექნოლოგიითაა შემუშავებული, მაგალითად, დიფტერიის, В–ჰეპატიტის, პოლიომიელიტის, ყივანახველასა და სხვა დაავადებების ვაქცინები.

ამჟამად საქართველოში ვაქცინაციისთვის Pfizer-ის და AstraZeneca-ს პრეპარატები გამოიყენება. ბოლო მონაცემებით, ქვეყანაში კორონავირუსის საწინააღმდეგო აცრა 29.184 ადამიანს ჩაუტარდა.

ვაქცინაციის საერთო ეროვნული გეგმის მიხედვით, ქვეყანაში ვაქცინაცია მედპერსონალით დაიწყო. დაბალი მიმართვიანობის გამო 25 მარტიდან კორონავირუსის საწინააღმდეგო ვაქცინაციის პროცესში 75 წელს ზემოთ და 65-დან 75-წლამდე ასაკობრივი ჯგუფებიც ჩაერთვნენ. ვაქცინაციის მიზნობრივ ჯგუფებს ასევე უკვე დაემატნენ 55 წელს ზემოთ მოქალაქეები, პოლიციელები, სამხედრო მოსამსახურეები, ასევე დიალიზზე მყოფი და ორგანოგადანერგილი პაციენტები. სავარაუდოდ, კორონავირუსის საწინააღმდეგო ვაქცინაციის პროცესში უახლოეს მომავალში მასწავლებლები და განათლების სფეროს სხვა წარმომადგენლებიც ჩაერთვებიან.

0