ევროკავშირის დროშა

მიმოხილვა: ევროპამ რუსეთის გამო მილიარდები დაკარგა

1026
(განახლებულია 20:44 15.02.2021)
ბრიუსელი მოსკოვის წინააღმდეგ ახალ სანქციებს ამზადებს მიუხედავად იმისა, რომ პოლიტიკური დაპირისპირების წლებში ევროკავშირმა უფრო მეტი დაკარგა ურთიერთშეზღუდვებით, ვიდრე რუსეთმა.

ნატალია დემბინსკაია

ეკონომიკური ზარალი ათობით მილიარდ ევროს ითვლის.

როგორც ევროკავშირის საგარეო საქმეთა სამსახურის წარმომადგენელმა პიტერს სტანომ განაცხადა ბრიფინგზე, სანქციები, როგორც ასეთი, ევროკავშირის მიზანი არ არის, ეს მხოლოდ ეფექტური ინსტრუმენტია რუსეთის წინააღმდეგ. ევროდიპლომატიის ხელმძღვანელმა ჟოზეპ ბორელმა კი დაამატა, რომ ალექსეი ნავალნის დაპატიმრებას ადამიანის უფლებათა დარღვევის გამო სასჯელი მოჰყვება.

დასაშვები დანაკარგები

ევროკავშირმა რუსეთის წინააღმდეგ სანქციები 2014 წლის ზაფხულში დააწესა უკრაინაში კონფლიქტის გამო. მოგვიანებით კი შეზღუდვები გააფართოვა. ევროკავშირის ქვეყნების ლიდერებმა 2015 წლის მარტში ეს ზომები მინსკის შეთანხმებების შესრულებას გადააბეს. მოსკოვმა განაცხადა, რომ რუსეთი არც უკრაინის შიდა კონფლიქტის მონაწილე მხარეა და არც მინსკის შეთანხმებისა, ის მხოლოდ შუამავალია დარეგულირების პროცესში. და საპასუხო შეზღუდვები დააწესა.

ერთი წლის შემდეგ ნათელი გახდა, რომ ევროპა უფრო მეტს კარგავდა. 2014 წლის მარტიდან 2015 წლის მარტამდე მოსკოვმა 55 მლრდ დოლარი იზარალა, ევროკავშირმა კი — 110 მილიარდი. განსაკუთრებით დაზარალდა გერმანია, რომელიც ორმხრივი შეზღუდვების გამო თვეში 700 მლნ დოლარს კარგავდა.

ევროპის პარლამენტში მაშინ ირწმუნებოდნენ, რომ სექტორალური სანქციები მტკივნეული აღმოჩნდა და რუსეთში ეკონომიკური ვარდნა გააღრმავა, რაც ნავთობზე ფასების ჩამოშლას მოჰყვა.

მაგრამ 2018 წელს ევროკავშირის საკანონმდებლო ორგანოში აღიარეს, რომ სანქციები ერთობ შეზღუდულ ეფექტს იძლეოდა.

„მიუხედავად დასავლეთის მცდელობისა – იზოლაციაში მოექცია მოსკოვი, რუსეთი სულ უფრო შესამჩნევ როლს თამაშობს მსოფლიო არენაზე. კონტრსანქციები ქვეყნის სოფლის მეურნეობას წაადგა“, — აღნიშნეს დეპუტატებმა.

მეგობრული ცეცხლი

2019 წელს „სანქციების ხუთწლედის“ შედეგები ეკონომისტებმა მატიე კროზემ (ჰონკონგის ლინანის უნივერსიტეტი) და იულიან ჰინცმა (კილის მსოფლიო ეკონომიკის ინსტიტუტი) გააანალიზეს. მათი გათვლებით, რუსეთზე დასავლეთის სანქციებით გამოწვეული ზარალის ნახევარზე ოდნავ მეტი მოდის — 2,2 მლრდ დოლარი თვეში. დანარჩენ 45%-ს, ანუ საერთო ჯამში 1,8 მილიარდ დოლარს შეზღუდვების ინიციატორები ერთმანეთში იყოფენ. ეს მონაცემები გამოქვეყნებულია კვლევაში „მეგობრული ცეცხლი: ვაჭრობაზე რუსეთის საწინააღმდეგო სანქციებისა და ასევე საპასუხო სანქციების გავლენა“.

კროზესა და ჰინცის გამოთვლების სქემა გავლენიანმა სამეცნიერო ჟურნალმა Economic Policy აღწერა. ბაზად აღებული იყო იმის შეფასება, თუ როგორ შეიძლებოდა განვითარებულიყო საერთაშორისო ვაჭრობა ურთიერთშეზღუდვების გარეშე და სტაბილური საბაზრო კონიუნქტურის პირობებში.

პოტენციურ და რეალურ სავაჭრო ნაკადებს შორის ყველა კატეგორიაში სხვაობამ აჩვენა კიდეც დანაკარგები. გაირკვა, რომ ყოველთვიური ჯამური ზარალი 4 მილიარდი დოლარია, ყველაზე მეტს კი გერმანია კარგავს — 38%-ს, ანუ 667 მლნ დოლარს. ძალიან დაზარალდნენ ფრანგული კომპანიებიც. როგორც კროზესა და ჰინცის კვლევაშია ნათქვამი, სხვა ქვეყნებზე გადამისამართებულმა ექსპორტმა დანაკარგები ვერ აანაზღაურა.

ცოტა ხნის წინ გერმანიის ეკონომიკისა და ენერგეტიკის მინისტრმა აღნიშნა: ევროპულმა ბიზნესმა 2014 წლიდან მილიარდები დაკარგა ანტირურული სანქციების გამო, ხოლო შავ სიაში მოხვედრილი რუსეთის მოქალაქეებისა და კომპანიების გაყინული აქტივები და ფულადი სახსრები ზოგჯერ მხოლოდ რამდენიმე ასეულ ევროს აღწევს.

2018 წელს გერმანიამ გაყინული აქტივებისა და ფულადი სახსრების სანქციების ბაზაში დაახლოებით 485 ათასი ევრო შეიტანა, ირლანდიამ — 24 ათასი, იტალიამ — 94 ათასი, ნიდერლანდებმა — 806 ევრო. გამოირჩა კვიპროსი — 3 მილიონზე მეტი ევრო.

2019 წელს იგივე მაჩვენებელი გერმანიისთვის იყო 337 ათასი ევრო, ირლანდიისთვის — 77 ათასი, იტალიისთვის — 148 ათასი, ნიდერლანდებისთვის — 819 ევრო. 2020 წელს გერმანიაში 341 ათასი ევრო გაიყინა, ნიდერლანდებში კი — 761 ევრო.

სულ 2014 წლიდან გერმანიამ გაყინა დაახლოებით 1,8 მლნ ევრო. ხოლო სავაჭრო ბრუნვამ გერმანიასა და რუსეთს შორის 2014 წელს 67,7 მლრდ ევრო შეადგინა, 2015-ში — 51,5 მლრდ, ხოლო 2016 წელს — 48 მლრდ.

ბერლინში არაერთხელ აღნიშნეს, რომ გერმანია ყველაზე მეტად ზარალდება სანქციების ომისგან. გასული წლის ზაფხულში ბუნდესტაგის დეპუტატმა მარკუს ფრონმაიერმა მოიყვანა მონაცემები, რომლებიც კროზესა და ჰინცის შედეგებთან ახლოს იყო: თვეში 618 მლნ ევრო (წელიწადში ეს 7,4 მლრდ-ია, ანუ ევროკავშირის ყველა დანაკარგის 40%).

მთავარი დაზარალებულები

ბრიუსელსა და მოსკოვს შორის სანქციების ომი ასევე დეტალურად შეისწავლეს ვენის საერთაშორისო ეკონომიკური კვლევების ინსტიტუტშიც (Wiener Institut fur Internationale Wirtschaftsvergleiche — WIIW).

WIIW-ის ამასწინანდელი შეფასებებით, რუსეთში ექსპორტის შემცირება გერმანიას მთლიანი შიდა პროდუქტის 0.2% დაუჯდა 2014-2018 წლებში, ავსტრიას — 0,5%. ყველაზე მეტად დაზარალებულ ეკონომიკებს მიაკუთვნეს ჩეხეთი და უნგრეთიც (თითოეულმა მშპ-ის 0,6% იზარალა) და ასევე სლოვაკეთი (მშპ-ის 1,0%). თუმცა აბსოლუტურ მაჩვენებლებში ყველაზე დიდი ზარალი გერმანიამ ნახა — 14 მლრდ ევრო სანქციების მხოლოდ პირველი ორი წლის განმავლობაში.

რაც შეეხება ეკონომიკის სექტორებს, აქ „ანტილიდერებს“ შორისაა საფეიქრო მრეწველობა, ფარმაცევტიკა, ელექტრონული, მექანიკური და სატრანსპორტო აღჭურვილობა.

კვლევის ავტორები ასევე აღნიშნავენ, რომ კვების პროდუქტები არ თამაშობდა მთავარ როლს ევროპულ ექსპორტში.

„რუსეთში მხოლოდ სასურსათო ინფლაცია შეინიშნებოდა, მაგრამ იმავდროულმა იმპორტჩანაცვლებამ ხელი შეუწყო სოფლის მეურნეობის აღორძინებას, რაც ეკონომიკის ერთ-ერთი აშკარა წარმატება იყო“, — აღიარა WIIW-მ.

ევროკავშირიდან რუსეთში ექსპორტის წილი ორჯერ შემცირდა. მაგრამ ამასთან რუსეთის ნავთობსა და გაზზე დამოკიდებულება, განსაკუთრებით, ენერომატარებლებზე მოთხოვნის ზრდისა და „ჩრდილოეთის ნაკადი-2“-ის მშენებლობის მალე დასრულების გათვალისწინებით, გაძლიერდა.

რედაქცია შესაძლოა არ ეთანხმებოდეს ავტორის მოსაზრებებს

1026
თემები:
რუსეთი დღეს (764)
კომოანია Standard & Poor's -ს ლოგო

როგორ აისახა პანდემია საქართველოს ეკონომიკაზე: S&P პროგნოზს აუარესებს

24
(განახლებულია 14:31 28.02.2021)
სააგენტო ვარაუდობს, რომ 2020 წელს საქართველოს რეალური მშპ-ის 6%-ით შემცირების შემდეგ, 2021 წელს ის 4%-ით გაიზრდება. ის აღნიშნავს, რომ ეკონომიკის ზრდის საშუალოვადიან პერსპექტივებზე ზოგიერთმა პრობლემამ შესაძლოა გავლენა იქონიოს.

თბილისი, 28 თებერვალი – Sputnik. რისკები უცხოური ინვესტიციებისთვის, კორონავირუსის გამო ექსპორტის შემცირება და ტურიზმის შემოსავლების კუთხით პროგნოზის გაუარესება - ეს ყველაფერი ნეგატიურად აისახება საქართველოს ეკონომიკაზე, ნათქვამია ანგარიშში, რომელიც გამოაქვეყნა საერთაშორისო სარეიტინგო სააგენტომ S&P Global Ratings.

სააგენტომ გადახედა თავის პროგნოზს საქართველოს მიმართ და ის „სტაბილურიდან“ „ნეგატიურამდე“ ჩამოაქვეითა. ამავე დროს უცხოურ და ადგილობრივ ვალუტაში გრძელვადიანი და მოკლევადიანი სუვერენული საკრედიტო რეიტინგები BB/B დონეზე დატოვა.

„ნეგატიური პროგნოზი ასახავს რისკებს, რომლებიც შეიძლება შეექმნას საქართველოს თავისი მნიშვნელოვანი საგარეო ვალდებულებების მომსახურების დროს საკმარისი სავალუტო შემოსავლების გენერირების კუთხით. სავარაუდოდ, ტურისტული სექტორის აღდგენა ვაქცინების გლობალურ დანერგვას ჩამორჩება, და ჩვენ ვერ ვივარაუდებთ 2019 წლის ტურისტული აქტიურობის დონის 2024 წლამდე დაბრუნებას. მეტად არასტაბილურ შიდა პოლიტიკურ ვითარებასთან ერთად ამან შეიძლება გააუარესოს უცხოური ინვესტიციების მოდინების საშუალოვადიანი პერსპექტივები, რაც, ჩვენი თვალსაზრისით, მნიშვნელოვანია ზრდისთვის და საგარეო დაფინანსებისთვის“, - ნათქვამია ანგარიშში.

ამავე დროს S&P აღნიშნავს, რომ სააგენტო მზადაა გადახედოს პროგნოზს და ის „სტაბილურით“ შეცვალოს, თუ სავალუტო შემოსავლები მოსალოდნელზე სწრაფად აღდგება.

ნეგატიური ზეგავლენა ეკონომიკაზე

სააგენტო ვარაუდობს, რომ 2020 წელს საქართველოს რეალური მშპ-ის 6%-ით შემცირების შემდეგ, 2021 წელს ის 4%-ით გაიზრდება. ის აღნიშნავს, რომ ეკონომიკის ზრდის საშუალოვადიან პერსპექტივებზე ზოგიერთმა პრობლემამ შესაძლოა გავლენა იქონიოს.

S&P რისკებად აფასებს ტურიზმის სუსტ აღდგენას, ვაქცინაციის ნელ ტემპს და უცხოური ინვესტიციების მოდინების შემცირებას.

„გარდა ამისა, ხშირი პოლიტიკური კრიზისების შედეგად არსებობს რეფორმების იმპულსის შესუსტების და უცხოური ინვესტორების მიერ საქართველოს სტაბილურობის აღქმის რისკი“, - ნათქვამია ანგარიშში.

სააგენტოში მიიჩნევენ, რომ ზრდის პერსპექტივებს საფრთხე შეიძლება შეუქმნას ასევე ფისკალური და მონეტარული პოლიტიკის ნაადრევმა გამკაცრებამ.

„ეკონომიკურ აქტივობას, მათ შორის შერყეულ სასტუმრო სექტორში, სარგებელს მოუტანს შემზღუდავი ზომების შერბილება. შეზღუდვები კვლავ დაწესდა 2020 წლის ბოლო კვარტალში COVID-19-ის შემთხვევების მკვეთრი ზრდის შემდეგ. 2021 წელს სახელმწიფო მხარდაჭერის ზოგიერთი ზომების გაგრძელებამ ასევე უნდა შეუწყოს ხელი ეკონომიკურ ზრდას“, - აღნიშნეს სააგენტოში.

ასევე, S&P საქართველოს მთავრობის ვაქცინაციის გეგმას ამბიციურს უწოდებს.

„მიგვაჩნია, რომ მსოფლიო მოთხოვნა-მიწოდების დინამიკის გათვალისწინებით, მთავრობის მიერ გაცხადებული გეგმა წლის ბოლომდე მოზრდილი მოსახლეობის 60%-ის ვაქცინაციის შესახებ საკმაოდ ამბიციურია. მოსალოდნელია, რომ საქართველო 2021 წლის პირველ ნახევარში COVAX-ისგან დაახლოებით 214 ათას დოზას მიიღებს. ეს ნიშნავს, რომ 2021 წლის შუა პერიოდში ვაქცინაციის დონე მოსახლეობის საერთო რიცხვის 2,8%-ს შეადგენს (ერთ ადამიანზე ორი დოზის გათვალისწინებით),“ - აღნიშნულია ანგარიშში.

სწორედ ვაქცინის დანერგვაზე იქნება დამოკიდებული ტურისტული სექტორის ბედი, მიაჩნიათ სააგენტოში.

„ტურისტული სექტორის პერსპექტივები ბუნდოვანი რჩება. იმ დროს, როდესაც  შიდა ტურისტული აქტივობა გარკვეულწილად გრძელდებოდა 2020 წელს, ქვეყანაში უცხოელი ტურისტების შემოდინება 2019 წელთან შედარებით 83%-ით შემცირდა. ჩვენი თვალსაზრისით, ამ სექტორის ბედი დაკავშირებული იქნება  ვაქცინის დანერგვის პროგრესთან არა მხოლოდ ქვეყანის შიგნით, არამედ მეზობელ ქვეყნებშიც, საიდანაც ჩამოდის საქართველოს ვიზიტორების უმეტესობა“, - აღნიშნულია ანგარიშში.

პოლიტიკის გავლენა ეკონომიკაზე

S&P ნეგატიურად აფასებს ასევე პოლიტიკური კრიზისის ზეგავლენას.

„პოლიტიკურმა დაძაბულობამ მმართველ პარტიასა და ოპოზიციას შორის შესაძლოა შეასუსტოს რეფორმების იმპულსი და ხელისუფლების ცენტრალიზაციის რისკების ფონზე ავნოს საერთაშორისო ინვესტორების აღქმას საქართველოს სტაბილურობასთან დაკავშირებით“, - ნათქვამია ანგარიშში.

სააგენტო აღნიშნავს, რომ თუმცაღა ოპოზიციის მოთხოვნა ვადამდელი არჩევნების ჩატარების შესახებ სავარაუდოდ არ დაკმაყოფილდება, არსებობს სივრცე სხვა პოლიტიკური დათმობებისთვის, რომლებიც ქვეყანას ჩიხიდან გამოიყვანდა.

„საქართველოს ყოფილი პრემიერ-მინისტრის, გიორგი გახარიას გადადგომა, რაც ქვეყნის ოპოზიციის ლიდერის დაკავების საქმეს უკავშირდებოდა, კიდევ უფრო ართულებს საქართველოში მოკლევადიანი პოლიტიკის განჭვრეტას. თუმცა, მთავრობის მიერ გაცხადებული მაკროეკონომიკური დღის წესრიგი უცვლელი რჩება“, - აღნიშნეს სააგენტოში.

ხელისუფლების რეაქცია

საქართველოს მთავრობაში საქართველოს საკრედიტო რეიტინგის შენარჩუნება დადებითად შეაფასეს.

„სარეიტინგო სააგენტო S&P Global-ის მიერ რეიტინგის შენარჩუნება ადასტურებს მთავრობის მიერ გატარებულ გონივრულ მაკროეკონომიკურ პოლიტიკას“, - განაცხადა ფინანსთა მინისტრის მოადგილემ ნიკოლოზ გაგუამ.

ამავე დროს მან განმარტა, რით არის გამოწვეული სააგენტოს ნეგატიური პროგნოზი.

„სააგენტოს მიერ განსაზღვრული „ნეგატიური“ პერსპექტივა, ძირითადად, გამოწვეულია გლობალურად, ტურიზმის აღდგენის შედარებით ნელი პერსპექტივიდან გამომდინარე. S&P Global-ის შეფასებით, ტურიზმის აღდგენა მთელ მსოფლიოში და მათ შორის, საქართველოში, შედარებით ნელი ტემპებით მოხდება, ვიდრე ამას დასაწყისში ელოდნენ. ტურიზმის სწრაფი აღდგენის შემთხვევაში, რისი მაღალი მოლოდინიც ჩვენ გვაქვს, კომპანია გამოხატავს პერსპექტივის აღდგენის მზადყოფნას,“ – აღნიშნა ნიკოლოზ გაგუამ.

S&P შეფასება და Fitch-ის მონაცემები

ერთი კვირის წინ სხვა საერთაშორისო სარეიტინგო სააგენტო Fitch-მა დატოვა საქართველოს ემიტენტის დეფოლტის გრძელვადიანი რეიტინგი უცხოურ ვალუტაში BB დონეზე. პროგნოზი - „ნეგატიურია“.

„ნეგატიური“ პროგნოზი, Fitch-ის ანალიტიკოსების აზრით, ასახავს კორონავირუსის პანდემიის მნიშვნელოვან გავლენას საქართველოს ეკონომიკაზე.

მათი მტკიცებით, პანდემია იწვევს მსხვილი ტურისტული სექტორის მქონე საქართველოს მცირე, ღია ეკონომიკის მკვეთრ შემცირებას, საბიუჯეტო ანგარიშების შესამჩნევ გაუარესებას, მათ შორის, სახელმწიფო ვალის ზრდას, და უფრო მოწყვლადს ხდის მას, რაც მომდინარეობს საქართველოს დიდი საგარეო ვალიდან და მიმდინარე ანგარიშის უფრო ფართო სტრუქტურული დეფიციტიდან BB კატეგორიის ქვეყნების მედიანურ მაჩვენებელთან შედარებით.

Fitch-ის პროგნოზით, 2020 წელს პანდემიით გამოწვეული 6,1%-იანი ვარდნის შემდეგ 2021 წელს საქართველოს ეკონომიკა 4.3%-ით, ხოლო 2022 წელს – 5.8%-ით გაიზრდება.

სააგენტოს ანალიტიკოსების აზრით, საქართველოს მშპ-ის ზრდის მთავარ განმსაზღვრელ ფაქტორს შიდა მოთხოვნილების მატება წარმოადგენს, ვინაიდან შეზღუდვების შემსუბუქება ხელს უწყობს კერძო მოხმარებას, ხოლო ინფრასტრუქტურაზე სახელმწიფოს მიერ გაწეული, ჩვეულებრივზე დიდი ხარჯი, კერძო სექტორის სუსტი გაჯანსაღების მიუხედავად, ინვესტიციებს წაახალისებს.

24
გურამ თუშიშვილის ორთაბრძოლა

მსოფლიოს ჩემპიონი საქართველოსთვის გაიტანს, ძიუდოს ლეგენდა კი თბილისში მოემგზავრება

49
საქართველოს საფეხბურთო ნაკრების ახალი მწვრთნელის პირველი კომენტარი და თორნიკე შენგელიას დაბრუნება „ცსკას“ რიგებში. ქართველი სპორტსმენების გასული კვირის შედეგები.

მსოფლიოს ჩემპიონი საქართველოს ეროვნულ გუნდში და ნაკრების ახალი მეთაურის პირველი კომენტარი

საქართველოს ეროვნული ნაკრებისთვის გასულ კვირას ძალიან სასიხარულო ინფორმაცია გავრცელდა. გარდა იმისა, რომ ეროვნულ ნაკრებს ვილი სანიოლის სახით „პატრონი“ გამოუჩნდა გუნდს ახალწვეულიც ჰყავს. საქართველოს ნაკრების შეტევითი ხაზი გიორგი წიტაიშვილით გაძლიერდა. ქართული წარმომავლობის მიუხედავად, წიტაიშვილი ამ დრომდე უკრაინის ასაკობრივ ნაკრებებში ასპარეზობდა და საკმაოდ წარმატებულადაც. მან 2019 წელს 20-წლამდელთა მსოფლიო ჩემპიონატი მოიგო და ამ გამარჯვებაში გატანილი გოლით ძალიან დიდი წვილი შეიტანა.

მისი დაბრუნება მართლაც გასაკვირი იყო ქართველი გულშემატკივრისთვის, რადგან გიორგის ჩვენს ქვეყანაში წლებია ეპატიჟებიან. პირველად ეს სასიხარულო ამბავი უკრაინელმა ჟურნალისტმა იგორ ციგანიკმა გაავრცელა. ჟურნალისტის ვარაუდით ახალგაზრდა ფეხბურთელის ეს გადაწყვეტილება მის საქართველოში სტუმრობას უკავშირდება. გავრცელებული ინფორმაციით, წიტაიშვილი სამშობლოში გარდაცვლილი ბაბუის სამძიმარზე ჩამოვიდა, რა დროსაც ოჯახის წევრებმა ბაბუის ერთ-ერთი ბოლო სურვილი ამცნეს. უკრაინელ ჟურნალისტს თუ ვენდობით ბაბუის ბოლო თხოვნა გიორგის საქართველოს ნაკრებში თამაში იყო. გეთანხმებით, საკმაოდ სევდიანი ისტორიაა, თუმცა მოგვიანებით გავრჩელდა ხმები, რომ მისი გადაწყვეტილება საქართველოს ფეხბურთის ფედერაციის მრავალწლიანი მცდელობებისა და შეთავაზებების შედეგია.

ამ ყველაფრის საპასუხოდ გიორგიმ მოკლე და შეიძლება ითქვას მკაცრი კომენტარი გააკეთა. წიტაიშვილმა ჟურნალისტებთან საუბრისას განაცხადა, რომ აღნიშნულ საკითხზე საუბარი არც სურს და არც ამის უფლება გააჩნია. მისი თქმით, უახლოეს მომავალში ყველაფერი გაირკვევა. საინტერესოა, რომ ფეხბურთის ფედერაციაში ამ საკითხზე ოფიციალური განცხადება ჯერ არ გაკეთებულა. ჩვენ ქართული სპორტის ქომაგებს ისღა დაგვრჩენია, რომ დაველოდოთ მოვლენათა განვითარებას, თუ როგორ დასრულდება ქართულ-უკრაინული „საპნის ოპერა“.

რაც შეეხება ქართველი ფეხბურთელის საკლუბო კარიერას, ის ამჟამად კიევის „დინამოს“ საკუთრებაშია და „ვორსკლას“ შემადგენლობაში იჯარის წესით ასპარეზობს.

წიტაიშვილს მიმდინარე სეზონში „დინამო კიევში“ მხოლოდ ოთხი მატჩი აქვს ჩატარებული, ხოლო „ვორსკლას“ რიგებში ორ შეხვედრაში ერთი გოლის გატანა უკვე მოახერხა.

ცოტა ხნის წინ მსგავსი ინფორმაცია ბელგიური „სერენის“ თავდამსხმელ გიორგი (ჟორჟ) მიქაუტაძეზეც გავრცელდა. მიქაუტაძეს ამ ეტაპზე ფრანგული პასპორტი აქვს, თუმცა შესაძლოა ისიც, წიტაიშვილის მსგავსად, საქართველოს ნაკრების მაისურით ვიხილოთ. ქართული წარმომავლობის ფეხბურთელი ბელგიის მეორე ლიგაში ასპარეზობს და მის ანგარიშზე მიმდინარე სეზონის 15 შეხვედრაში 16 გატანილი გოლია. მიქაუტაძე საკუთარი გუნდის ნამდვილი ლიდერი და საუკეთესო ბომბარდირია.

Новый главный тренер сборной Грузии по футболу Вилли Саньоль с президентом ФФГ Леваном Кобиашвили
ვილი სანიოლი და ლევან კობიაშვილი

ქართულ მედიასთან პირველად ისაუბრა საქართველოს ნაკრების ახალმა მწვრთნელმა ვილი სანიოლიმ, რომელმაც ჩვენი გუნდის მომავალსა და მის გეგმებზე ვრცლად ისაუბრა. ფრანგმა სპეციალისტმა გერმანიის ბუნდესლიგაში გატარებულ წლებზეც ილაპარაკა, რა დროსაც ვეტერან ქართველ ფეხბურთელებზე კობიაშვილსა და იაშვილზეც გააკეთა კომენტარი.

„ლევან კობიაშვილი კარგად მახსოვს. ის მარცხენა ფლანგზე თამაშობდა, მე – მარჯვენაზე და ჩვენი გზები ყოველთვის იკვეთებოდა. როგორც მოთამაშე, ის ერთდროულად ხისტიც იყო და სამართლიანიც. იგივე შემიძლია ვთქვა ალექსანდრე იაშვილზეც. კარგია, როდესაც 10, 12 ან 15 წლის შემდეგ კვლავ ვხვდებით ერთმანეთს“, – განაცხადა სანიოლმა.

აღსანიშნავია, რომ ფეხბურთის ფედერაციის ამჟამინდელი ხელმძღვანელები წლების წინ სანიოლის თანამედროვეები იყვნენ. იაშვილისა და კობიაშვილის საფეხბურთო კარიერის დიდი ნაწილიც სწორედ გერმანიის ბუნდესლიგას უკავშირდება.

Новый главный тренер сборной Грузии по футболу Вилли Саньоль с президентом ФФГ Леваном Кобиашвили
სანიოლი, კობიაშვილი

სანიოლის დიდი სამწვრთნელო გამოცდილება არ აქვს, თუმცა უკვე გავრცელდა ინფორმაცია, რომ ფრანგს ძალიან უყვარს დისციპლინა და ეს მისი ერთ-ერთი ძლიერი მხარეა.

„დისციპლინა ძალიან მნიშვნელოვანია, მის გარეშე ვერაფერს შეცვლი. ფეხბურთელებს ნაკრებში თამაში უნდა ეამაყებოდეთ და მათ პატივი უნდა სცენ საქართველოს ნაკრების მაისურას. თუ ყველას ერთი მიზანი გვექნება, ვფიქრობ, რომ შევძლებთ წარმატების მიღწევას“, - აღნიშნა საქართველოს ნაკრების ახალმა თავკაცმა.

სამწუხარო ინფორმაცია გავრცელდა ოთარ კიტეიშვილის შესახებ, რომელიც ავსტრიის ბუნდესლიგაში ასპარეზობს. ავსტრიის მე-18 ტურში „შტურმის“ რიგებში ქართველმა ნახევარმცველმა „ვოლფსბერგერთან“ გამართულ შეხვედრაში ფეხის კუნთის ტრავმა მიიღო და მარტის სანაკრებო შეხვედრები გაუცდება. „შტურმმა“ ლუკა ლოჩოშვილისა და გურამ გიორბელიძის „ვოლფსბერგერს“ უმასპინძლა და ბოლო წუთზე გაშვებული გოლით 1:2 წააგო. კიტეიშვილი და გიორბელიძე ძირითად შემადგენლობაში იყვნენ, ლოჩოშვილი კი სამატჩო განაცხადში ვერ მოხვდა.

Сборная Грузии по футболу перед матчем с командой Эстонии
© REUTERS / IRAKLI GEDENIDZE
საქართველოს ფეხბურთის ნაკრები

აღსანიშნავია, რომ საქართველოს ეროვნულ ნაკრებს მარტში მსოფლიოს შესარჩევი ეტაპის პირველი სამი თამაშის ჩატარება უწევს. ჩვენი გუნდი შვედეთს ესპანეთსა და საბერძნეთს დაუპირისპირდება. ჩვენი ნაკრები აღნიშნული სამი მატჩიდან მხოლოდ ესპანეთს უმასპინძლებს, რომელიც პანდემიის გამო დაწესებული შეზღუდვების გამო მაყურებლის გარეშე გაიმართება. ვნახოთ თუ როგორ ჩააბარებს პირველ ქართულ გამოცდას ვილი სანიოლი.

არ უნდა გამოგვრჩეს საქართველოს ეროვნული ლიგის პირველი მატჩებიც. შიდა ჩემპიონატის პირველ დღეს თავიანთი მატჩები გასული წლის ჩემპიონმა თბილისის „დინამომ“ და ვიცე-ჩემპიონმა ბათუმის „დინამომ“ გამართეს.

დედაქალაქელებმა სეზონის სტარტზე ფანების გახარება ნამდვილად ვერ მოახერხეს. ისინი ეროვნულ ლიგაში ახლად აღზევებულ „სამგურალს“ ანგარიშით 1:1 დაუზავდნენ და დასაწყისშივე მნიშვნელოვანი ქულები დაკარგეს. ეროვნული ლიგის პირველი გოლის ავტორი სამგურალის 21 წლის ფორვარდი სერგო კუხიანიძეა, რომელმაც 2020 წელს სამგურალის მაისურით 7 მატჩში 9 გოლი გაიტანა. დინამო თბილისი თამაშს 71-ე წუთამდე აგებდა, სანამ გიორგი გაბედავამ ანგარიში არ გაათანაბრა.

რაც შეეხება ბათუმელებს, ზღვისპირელებმა გაჭირვებით, თუმცა თავიანთი პირველი შეხვედრა ქუთაისის „ტორპედოსთან“ მოიგეს. მატჩში ერთადერთი გატანილი გოლით „თელავიდან“ დაბრუნებული გრიგოლ ჩაბრაძე გამოირჩა, რომელმაც მატჩის ბედი 79-ე წუთზე ფანცულაიას გადაცემის შედეგად გადაწყვიტა. აღნიშნული გამარჯვებით „პირატები“ დროებით ცხრილში პირველ ადგილზე იმყოფებიან.

მამუკელაშვილი კვლავ შედეგიანია, თორნიკე შენგელია კი მოედანს დაუბრუნდა

ამერიკის სტუდენტურ ლიგაში სანდრო მამუკელაშვილის „სეტონ ჰოლი“ გასულ კვირას „ბატლერთან“ დამარცხდა. მიუხედავად შედეგისა ახალგაზრდა ქართველი კალათბურთელი საკუთარი გუნდის ერთ-ერთი საუკეთესო მოთამაშე გახლდათ.

მამუკელაშვილმა 35 წუთში 11 ქულა, 3 მოხსნა და 1 პასი მიითვალა. მამუკელაშვილის გუნდმა ზედიზედ მეორე თამაში წააგო, მანამდე კი „სეტონ ჰოლს“ 4-მატჩიანი მოგებათა სერია ჰქონდა. ისინი Big East-ის კონფერენციაში 10 მოგებით და 7 წაგებით მე-3 ადგილზე იმყოფებიან. სანდროს გუნდი მომდევნო შეხვედრას 3 მარტს საკუთარ მოედანზე „კონექტიკუტთან“ გამართავს.

აღსანიშნავია, რომ მოედანს დაუბრუნდა საქართველოს ნაკრების კაპიტანი და ერთ-ერთი ლიდერი თორნიკე შენგელია. შენგელიამ მიღებული ტრავმა უკვე მოიშუშა და „ოლიმპიაკოსთან“ შეხვედრაში მოსკოვის „ცსკას“ საწყის ხუთეულში მოგვევლინა. ნაკრების კაპიტანმა ბერძნებთან 8 ქულა და 3 მოხსნა მიითვალა, რაც დიდხნიანი პაუზის შემდეგ ცუდი შედეგი ნამდვილად არ გახლავთ. ქართველმა კალათბურთელმა მოედანზე 21 წუთი და 33 წამი დაჰყო. მოსკოვის „ცსკა“ მორიგ შეხვედრას „ეფესთან“ გამართავს და იმედი ვიქონიოთ, რომ მომავალ მატჩებში თორნიკე ფორმის სრულად აღდგენას შეძლებს.

გასულ კვირას ამერიკის სტუდენტურ ლიგაში თამაში გიორგი ბეჟანიშვილის „ილიონისმაც“ გამართა და აუტსაიდერ „ნებრასკას“ მარტივად ანგარიშით 86:70 სძლია. ქართველმა კალათბურთელმა მოედანზე 11 წუთი გაატარა და აქტივში 2 ქულა და 2 მოხსნა ჰქონდა, პასივში კი - 2 დაკარგვა და 2 პერსონალური გოლი. გიორგიმ 4 ორქულიანი ესროლა და 1 ჩააგდო.

ილინოისი ჩემპიონატში მე-2 ადგილს იკავებს, ლიდერი კი კვლავ „მიჩიგან ვულვერინსია“, რომელსაც 12 მოგება კი აქვს. მიუხედავად ამისა, მიჩიგანის გუნდი ბეჟანიშვილის გუნდს ჩატარებული თამაშების რაოდენობით ჩამორჩება.

საკუთარ გუნდს გამოემშვიდობა ქართველი კალათბურთელი ბექა ბურჯანაძე. გავრცელებული ინფორმაციით ბექამ „გრან კანარია“ კლუბი ურთიერთშეთანხმების საფუძველზე დატოვა. 27 წლის ბურჯანაძე ესპანურ კლუბში 2019 წლიდან თამაშობდა. მანამდე ის ასევე ესპანეთში „გიპუსკოას“, „ანდორას“, „კორუნიასა“ და „სევილიას“ ღირსებას იცავდა. მიმდინარე სეზონში ბექა თამაშში საშუალოდ 5.7 ქულას, 3.1 მოხსნას და 0.9 პასს აგროვებდა, ხოლო მისი ეფექტურობის კოეფიციენტი 6.1 იყო.

ნიკოლოზ ბასილაშვილი სამწუხაროდ კვლავ აგებს. ქართველი ჩოგბურთელის მორიგი მარცხი საფრანგეთში

საქართველოს პირველი ჩოგანის საქმეები ბოლო დროს კარგად არ მიდის. ბასილაშვილი გასულ კვირას საფრანგეთის ქალაქ მონპელიეში მიმდინარე საერთაშორისო ტურნირს ადგილობრივ ბარერესთან შეხვედრით გამოემშვიდობა. ფრანგმა ჩოგბურთელმა ჩვენებური ორ სეტში 6:4, 6:4 დაამარცხა და მომდევნო ეტაპზე გავიდა. აღსანიშანია, რომ ბარერე ATP-ის რეიტინგში 113-ე ადგილს იკავებს, ხოლო ბასილაშვილი ერთ დროს წარმატებული ასპარეზობის ხარჯზე კვლავ ინარჩუნებს პოზიციებს და მსოფლიოს მე-40 ჩოგანია.

დასანანია თუმცა, უკვე წელიწადზე მეტია ბასილაშვილი ცუდი ფორმაში იმყოფება და ეს კლასიფიკაციაზეც აისახა. 2019 წლის მაისში ნიკა მსოფლიოს მე-16 ჩოგანი და ნებისმიერი ლიდერისთვის ანგარიშგასაწევი ძალა გახლდათ.

ძიუდოს ლეგენდა საქართველოში ჩამოდის - ტედი რინერი თბილისის გრანდ-სლემზე დარეგისტრირდა

ძიუდოს საერთაშორისო ფედერაციამ რამდენიმე დღის წინ თბილისის გრად-სლემზე დარეგისტრირებულ სპორტსმენთა სია წარადგინა. მართალია სია არასრულყოფილია, მაგრამ საინტერესოა, რომ ჩამონათვალში ფრანგი ლეგენდარული ძიუდოისტი ტედი რინერი გამოჩნდა.

მომავალი ტურნირისთვის საქართველოს ჯერ განაცხადი არ გაუკეთებია. საინტერესოა სლემზე თუ ვიხილავთ მძიმე წონოსან ქართველ ფალავანს გურამ თუშიშვილს, რომელსაც ბოლო წლებში რინერის მემკვიდრედ მოიაზრებენ. ქართველ გულშემატკივარს კარგად ახსოვს ქართველისა და ფრანგის დაპირისპირება 2017 წელს გამართულ მსოფლიო ჩემპიონატზე, როდესაც თუშიშვილმა რინერის ტატამზე დაგდება შეძლო, თუმცა მსაჯებმა „ოქროს“ ქულა არ ჩაუთვალეს.

ძიუდოს საერთაშორისო ფედერაციამ 2021 წლის კალენდრის პირველი ნაწილი ჯერ კიდევ 6 იანვარს გამოაქვეყნა, საიდანაც ქართველმა ქომაგმა შეიტყო, რომ თბილისში დაგეგმილ ძიუდოს ტურნირს სტატუსი შეეცვალა და საქართველოს დედაქალაქი უკვე ძიუდოს გრანდ სლემს მასპინძლობს. შეჯიბრება 26 მარტიდან 28 მარტის ჩათვლით გაიმართება.

 

49

ქუთაისში ნამახვანჰესის მშენებლობის წინააღმდეგ საპროტესტო აქცია გაიმართა - ვიდეო

0
ქუთაისის ცენტრალურ მოედანზე ნამახვანი ჰესის მშენებლობის წინააღმდეგ ფართომასშტაბიანი საპროტესტო აქცია გაიმართა.  დაწვრილებით - ჩვენს ვიდეოში იხილავთ

მომიტინგეები თურქული კომპანია ENKA-ს რიონის ხეობიდან გასვლას, ხეობაში ჰესის მშენებლობის შეწყვეტასა და უცხოური კომპანიისათვის მიწის 99 წლით გადაცემის გაუქმებას მოითხოვდნენ.

უკვე 126 დღეა ადგილობრივები, საეკლესიო პირები და არასამთავრობოების წარმომადგენლები საპროტესტო აქციებს მართავენ მდინარე რიონზე ნამახვანჰესის მშენებლობის წინააღდეგ.

პროექტი „ნამახვანჰესის კასკადი“ რიონზე გააერთიანებს ორ ჰერსს - „ნამახვანი“ და „თვიში“, რომლებიც ერთად 433 მეგავატს გამოიმუშავებენ. პროეთის სავარაუდო ღირებულება 730 მილიონი დოლარია.

პროექტს Clean Energy Georgia Group შეასრულებს. ჰესის მშენებლობისათვის Clean Energy Georgia Group თურქულს ჰოლდინგთან ENKA Insaat ve Sanayi A.S. ითანამშრომლებს.

0