ვაქცინაცია

ავიცრათ თუ გადავიტანოთ? სიმართლე COVID-19-ის ვაქცინის შესახებ

158
(განახლებულია 20:17 25.12.2020)
ჯერჯერობით უცნობია, როგორ მოქმედებს ვაქცინა კოვიდისგან უკვე განკურნებულებზე — ასეთი კვლევები ჯერ არ ჩატარებულა.

ტატიანა პიჩუგინა

გამალეის ცენტრის მიერ შექმნილი ვაქცინა „სპუტნიკ V“ უკვე 200 ათასზე მეტმა ადამიანმა მიიღო — პირველ რიგში ექიმებმა, მასწავლებლებმა და სოციალურმა მუშაკებმა. თუმცა ბევრს აღელვებს საკითხი, ღირს თუ არა, რომ ესოდენ მოკლე დროში შექმნილი პრეპარატით ისარგებლონ, ხომ არ მოახდენს ეს გავლენას ჯანმრთელობაზე და ხომ არ ჯობს, უბრალოდ გადაიტანონ დაავადება.

ყველაზე ხშირად დასმული კითხვები და მათზე პასუხები ასე გამოიყურება:

რისგან შედგება ვაქცინა „სპუტნიკ V“?

ადამიანის ორი ადენოვირუსის ad 26-ისა და ad 5-სგან — შეცვლილი გენომით. ჩვეულებრივი ადენოვირუსები ზედა სასუნთქი გზების მწვავე რესპირატორულ დაავადებებსა და ანთებებს იწვევს. იმისათვის, რომ ვაქცინა დაემზადებინათ, მიკრობს რეპლიკაციის გენი გაუთიშეს. სხვა სიტყვებით რომ ვთქვათ, მისი კასტრაცია მოახდინეს. მას აქვს უჯრედში შეღწევის უნარი, მაგრამ გამრავლება აღარ შეუძლია. ახლა ეს იდეალური უსაფრთხო ვექტორია, რომელსაც ზუსტად მისამართზე შეუძლია „ამანათის“ მიტანა.

ამანათის როლში კი გამოდის გენი, რომელიც SARS-CoV-2-ის მომჭიდებელი გენის სინთეზის შესახებ ინფორმაციას ატარებს. მას უბრალოდ სვამენ „კასტრირებული“ ადენოვირუსის გენომში. ვექტორი აღწევს უჯრედში და სხვადასხვა ცილების სინთეზს იწყებს, მათ შორის, მომჭიდებლისაც. ორგანიზმი რეაგირებს მასზე და სპეციფიკური იმუნიტეტის გამომუშავებას იწყებს. უჯრედის იმუნიტეტი შლის ვექტორს და დევნის მას ორგანიზმიდან.

არის თუ არა რაიმე საშიშროება ვაქცინაციაში?

არა. სუსტ ინფექციურ ანთებებს თავისთავად ადენოვირუსებიც კი იწვევს. გარდა ამისა, მათ აქვთ რამდენიმე უპირატესობა. მაგალითად, დიდი დნმ–გენომი — ამიტომ მათი გაუვნებელყოფა მარტივია, ორიოდე გენის გათიშვით. ამავე მიზეზით ხდება ისიც, რომ ისინი ვერ რთავენ საკუთარ გენომს მასპინძელი უჯრედის დნმ–გენომში და, შესაბამისად, ვერც მუტაციას იწვევენ.

არის თუ არა ვაქცინაში კორონავირუსი?

ადენოვირუსულ ვექტორებში, რომლებისგანაც შედგება ვაქცინა, SARS-CoV-2 არ შედის. მასში მხოლოდ მისი ერთი გენია — კორონავირუსის გარსზე არსებული საცეცისა. მისი დახმარებით ვირუსი უჯრედულ მემბრანას ეჭიდება და მის შიგნით აღწევს. ადამიანის უჯრედში მოხვედრის შემდეგ მარტო ამ ცილასაც კი აქვს ორგანიზმის იმუნური რეაქციის გამოწვევი უნარი, მაგრამ დაავადების უნარი არ გააჩნია.

როგორ კეთდება აცრა და მტკივნეულია თუ არა ეს?

აცრა მკლავზე კეთდება. აცრის ადგილი შეიძლება ცოტა ხანს გტკიოდეთ. იშვიათად შეინიშნება სიწითლე და ქავილი, მაგრამ სწრაფადვე ქრება თავისით — სპეციალური მკურნალობის გარეშე.

„სპუტნიკ V“ ორ ეტაპად შეჰყავთ. თავდაპირველად ადამიანი იღებს პირველ დოზას, ხოლო 21 დღის შემდეგ — მეორეს. ეს სპეციალურად კეთდება, რათა იმ შემთხვევაში, თუ პირველი დოზა სუსტად იმოქმედებს ადამიანის ორგანიზმში არსებული ადენოვირუსის მიმართ იმუნიტეტის გამო, მეორემ გარანტირებულად უზრუნველყოს დაცვა. ორეტაპიანი ვაქცინაცია მსოფლიოში კარგადაა ცნობილი და ძალიან ეფექტურად მიიჩნევა.

რა გვერდით ეფექტებს იწვევს ვაქცინა?

ჟურნალ Lancet-ში გამოქვეყნებულ სტატიაში გამალეის ცენტრის მეცნიერებმა ჯერ კიდევ ვაქცინის გამოცდების პირველ და მეორე ეტაპზე ყველაზე ხშირი გვერდითი ეფექტები ჩამოთვალეს: ტკივილი ჩხვლეტის ადგილზე, სხეულის ტემპერატურის მატება, თავის ტკივილი, დაღლილობის შეგრძნება, კუნთებისა და სახსრების ტკივილი.

ასევე შეიძლება გაჩნდეს ცხვირში გაჭედილობა და ყელის ტკივილი. ყველაფერი ეს ინდივიდუალური რეაქციებია, რომლებიც ერთიდან სამ დღეში თავისით ლაგდება.

შეიძლება თუ არა აიცრას, ვინც COVID-19 უკვე გადაიტანა?

ჯერჯერობით უცნობია, როგორ მოქმედებს ვაქცინა კოვიდისგან უკვე განკურნებულებზე — ასეთი კვლევები ჯერ არ ჩატარებულა.

თერაპიისა და პროფილაქტიკური მედიცინის ცენტრის დირექტორის ოქსანა დრაპკინას თქმით, კოვიდისგან განკურნებულები აცრას არ ექვემდებარებიან.

საჭიროა თუ არა პირბადის ტარება აცრის შემდეგ?

აუცილებელია. იმუნიტეტის სრულად მეორე დოზის გაკეთებიდან სამი კვირის შემდეგ ყალიბდება (ანუ პირველი დოზიდან 42-ე დღეს). ამ ხნის განმავლობაში ადამიანი ბოლომდე დაცული არ არის, ამიტომ პროფილაქტიკის ყველა ზომის დაცვა აუცილებელია.  

მედიასაშუალებებით გავრცელდა ინფორმაცია რამდენიმე შემთხვევის შესახებ, როდესაც ადამიანები COVID-19-ით აცრის შემდეგ დაავადდნენ. მაგრამ გამალეის ვაქცინა არ შეიცავს COVID-19-ის აღმძვრელს. ამიტომ მას არ შეუძლია დაავადების გამოწვევა. თუ ადამიანი აცრის შემდეგ დაავადდა, ე.ი. ის უკვე იყო ავად ვაქცინაციის მომენტში, მაგრამ სიმპტომების არარსებობის გამო ამის შესახებ არ იცოდა.

გამალეის ცენტრის დირექტორის ალექსანდრ გინცბურგის თქმით, ვაქცინა „სპუტნიკ V“-ს ეფექტურობა 96%-ია, დაავადების ალბათობა — 4%. მეცნიერის თქმით, მათ, ვინც ფიზიოლოგიური თავისებურებების გამო ამ ოთხ პროცენტში მოხვდება, დაავადება ბევრად რბილ ფორმებში განუვითარდება: სურდოს, ხველების ან ტემპერატურის მცირედი მატებით. დაავადების აღმძვრელი ფილტვებამდე ვერ ჩააღწევს.  

აცრას ხომ არ ჯობს, უბრალოდ გადავიტანოთ COVID-19?

ვაქცინაციაზე გადაწყვეტილებას თითოეული ადამიანი თავად, ან მკურალ ექიმთან ერთად იღებს — გამომდინარე უკვე არსებული დაავადებებიდან და მიმდინარე მდგომარეობიდან. თუ უკუჩვენებები არ არსებობს, მაშინ ჯანმრთელობისთვის რისკები უნდა აიწონ–დაიწონოს: აცრის შემთხვევაში ეს რისკები ნაკლებია, ვიდრე COVID-19-ით დაავადების შემთხვევაში. ამასთან, არსებობს მონაცემები, რომ უფრო ძლიერი იმუნიტეტი სწორედ ვაქცინის შემდეგ ყალიბდება.

158
თემები:
COVID-19-ის პანდემია მსოფლიოში (1297)
ცარიელი ადგილები პარლამენტში

ეყოლება თუ არა საქართველოს სრულფასოვანი პარლამენტი: მორიგი რაუნდის მოლოდინში

134
(განახლებულია 20:15 17.01.2021)
ოპოზიცია და „ქართული ოცნება“ პოლიტიკური კრიზისის აღმოსაფხვრელად მოლაპარაკებათა მორიგი რაუნდისთვის ემზადებიან და პირობებს აყენებენ

მმართველ პარტია „ქართული ოცნება - დემოკრატიულ საქართველოს“ და ოპოზიციას შორის გაჭიანურებული პოლიტიკური კრიზისის გადასაჭრელად მოლაპარაკებათა მორიგი რაუნდი იგეგმება.

დღეისათვის, მიუხედავად იმისა, რომ ოპოზიციას არჩევნების შედეგების მიხედვით 150-დან 60 ადგილის დაკავება შეეძლო, პარლამენტის მუშაობაში მონაწილეობას იღებს მხოლოდ 4 ოპოზიციონერი დეპუტატი. თეორიულად მათ შეიძლება შეუერთდეს მაქსიმუმ 5 ადამიანი - სამი „ახალი პოლიტიკური ცენტრი - გირჩიდან“ და ორი - „მოქალაქეებიდან“.

თუმცა ეს ვერ გადაუჭრის პრობლემებს საკანონდებლო ორგანოს, რომელსაც ოპოზიციის პროტესტისა და ხმების უკმარისობის გამო სრულფასოვნად მუშაობა და ისეთი მნიშვნელოვანი გადაწყვეტილებების მიღება არ შეუძლია, როგორიცაა კონსტიტუციის, საკონსტიტუციო კანონების და „მიწის შესახებ“ კანონის შეცვლა.

ჯერჯერობით კრიზისიდან გამოსვლის ძირითად შესაძლებლობას წარმოადგენს მონაწილეობა მოლაპარაკებებში, რომლებიც ევროკავშირისა და აშშ-ის ელჩების პატრონაჟით მიმდინარეობს.

რა თემაზე იქნება საუბარი

ვადამდელი არჩევნები - ერთადერთი თემაა, რომელზეც სასაუბროდ არიან მზად ოპოზიციური პარტიები.

„მზად ვართ, რომ „ქართულ ოცნებასთან“ გავაგრძელოთ მოლაპარაკებები, იმ მოთხოვნებთან მიმართებაში, რომელიც ოპოზიციამ ერთიანად წარუდგინა ხელისუფლებას. მოსალაპარაკებელი და საკონსულტაციო არაფერი არ არის, ჩვენ გვაქვს ძალიან მკაფიოდ განსაზღვრული დღის წესრიგი, რომლის ნაწილიც არის ყველა ოპოზიციური პარტია“, - განაცხადა პარტია „ლელოს“ წარმომადგენელმა საბა ბუაძემ.

ამასთან, „ერთიანი ნაციონალური მოძრაობის“ ერთ-ერთმა ლიდერმა ლევან ბეჟაშვილმა აღნიშნა, რომ ოპოზიციას იმედი აქვს, რომ არჩევნებთან დაკავშირებით პლებისციტი დაინიშნება.

„საზოგადოებამ უნდა იცოდეს, რომ ეს მოლაპარაკების პროცესი არ არის პოლიტიკური ვაჭრობა ან ტოტალიზატორი. საპირწონედ დგას ამ ქვეყნის დემოკრატიული განვითარების ღირებულებები. გამოსავალი აქ არის მხოლოდ და მხოლოდ ერთი, რომ ხალხს ვკითხოთ და ხალხმა გადაწყვიტოს, ვინ არის დღეს ხელისუფლების ღირსი და ვინ არის დღეს ის ძალა, რომელიც ქვეყანას ამ ეკონომიკურ-სოციალური კრიზისიდან გამოიყვანს“, – განაცხადა ბეჟაშვილმა.

თუმცა ვადამდელი საპარლამენტო არჩევნების გარდა, ოპოზიციას მოლაპარაკებებში კიდევ ერთი თემა ექნება - ცვლილებები საარჩევნო სისტემაში.

მმართველი პარტია მზად არის დააჩქაროს საარჩევნო პროცესის დამოუკიდებლობის პროგრესი და უკვე 2022 წელს ადგილობრივი თვითმმართველობის ორგანოების არჩევნები ელექტრონული კენჭისყრით და უბნებზე თითის ანაბეჭდის შემოწმების გამოყენებით ჩაატაროს.

თუმცა ახალი რაუნდის თარიღი ჯერ უცნობია და თავად ოპოზიციაში უთანხმოება შეინიშნება.

ოპოზიციის წყალქვეშა ქვები

დღეისათვის ოპოზიცური პარტიების უმრავლესობას საარჩევნო სიები გაუუქმეს, ხოლო სადეპუტატო  მანდატებზე უარის თქმის შესახებ განაცხადები უკვე საპროცედურო საკითხთა და წესების კომიტეტს გადაეცა. ამ დეპუტატების ჩანაცვლება ვერ მოხერხდება.

მეტიც, პარლამენტში მოხვედრილმა „პატრიოტთა ალიანსმა“ უკვე დაკარგა ადგილები საკანონდებლო ორგანოში - მათი განაცხადი დაკმაყოფილებულია, მაგრამ ადგილები დაიკავეს ყველასათვის უცნობმა ადამიანებმა პარტიული სიიდან, რომლებმაც საკუთარი პარტია „ევროპელი სოციალისტები“ დააარსეს. ახლა ისინი „ქართულ ოცნებასთან“ ერთად მუშაობენ.

რაც შეეხება „გირჩსა“ და „მოქალაქეებს“, ისინი პარლამენტში სხვა პარტიების გარეშე მუშაობაზე უარს აცხადებენ. თუმცა მანდატებზე უარის მთქმელ სხვა ოპოზიციონერებს მათი არ სჯერათ.

„ძალიან სევდიანი ისტორიაა, დავიღალეთ უკვე. შევიდნენ, თუ შესვლა უნდათ. დახვდება იქ კობახიძე, მათი მეგობარი. იმათაც გაუხარდებათ, ჩვენც დავისვენებთ“, - განაცხადა „ლეიბორისტული პარტიის“ ერთ-ერთმა ლიდერმა გიორგი გუგავამ „მოქალაქეებისა“ და „გირჩის“ სურვილის კომენტირებისას, პარლამენტში დანარჩენი ოპოზიცია „დაპატიჟოს“.

ამასთან, მმართველ პარტიაში მოლაპარაკების პროცესის სრულ მხარდაჭერაზე განაცხადეს.

„რაც შეეხება მეხუთე რაუნდის შესაძლო შედეგებს, ეს მთლიანად დამოკიდებულია იმაზე, თუ როგორ აფასებს ოპოზიცია სტატუს კვოს. ხედავთ, რომ სტატუს კვო ნამდვილად არის შეცვლილი, პარლამენტში უკვე პირველი ოპოზიციური პარტია შემოსულია და საქმიანობს. ასევე, ოპოზიციის ჯანსაღ ნაწილში არაერთი გამოთქვამს წუხილს იმასთან დაკავშირებით, რომ ბოიკოტი არის არასწორი გადაწყვეტილება... ვფიქრობ, მეხუთე რაუნდამდე ამას არაერთი ოპოზიციური ლიდერი მეტად გააცნობიერებს. ჩვენ მზად ვართ, იმ სამართლიანი წინადადებების განსახილველად დავბრუნდეთ მოლაპარაკების მაგიდასთან, რაც ეხება პირველ რიგში, მათი პრეტენზიების გადამოწმებას“, - განაცხადა პარლამენტის თავმჯდომარე არჩილ თალაკვაძემ.

ამგვარად, არჩევნებიდან ორთვენახევრის შემდეგ და პარლამენტის პირველი სხდომიდან ერთ თვეში კვლავ ღიად რჩება საკითხი - რამდენი დეპუტატი იქნება პარლამენტში. ის უფრო აქტუალური გახდება თებერვალში, როდესაც პარლამენტი საგაზაფხულო სესიაზე შეიკრიბება და ოპოზიციონერი დეპუტატების მიერ მანდატების დატოვების შესახებ განაცხადების განხილვას ვეღარ გააჭიანურებს.

134
„ქართული ოცნების“ ყრილობა

„ქართული ოცნება“ ივანიშვილის გარეშე: ახალი პოლიტსაბჭო და ყრილობა აქციის ფონზე

82
(განახლებულია 20:36 16.01.2021)
ამჟამად პარტიას უხელმძღვანელებს კობახიძე, მაგრამ მისი მართვა მოუწევს ყველაზე საიმედო დასაყრდენის - ბოლო 10 წლის მთავარი პოლიტიკური ფიგურის, ბიძინა ივანიშვილის გარეშე.

მმართველმა პარტიამ „ქართული ოცნება - დემოკრატიულმა საქართველომ“ შაბათს გამართა პირველი ყრილობა თავისი დამფუძნებლის - მილიარდერ ბიძინა ივანიშვილის გარეშე და ახალი თავმჯდომარე და პოლიტსაბჭო აირჩია.

პარტიის თავმჯდომარე გახდა ირაკლი კობახიძე, რომელის პარტიის დაარსებიდან მისი აღმასრულებელი მდივნის პოსტს იკავებდა და ასევე ყველა არჩევნებზე პარტიის საარჩევნო შტაბს ხელმძღვანელობდა.

კობახიძის პერსონა არაერთხელ გამხდარა ოპოზიციის კრიტიკის ობიექტი. 2016-2019 წლებში ის პარლამენტის თავმჯდომარის პოსტს იკავებდა და 2019 წლის ივნისში მართლმადიდებლობის საპარლამენტთაშორისო ასამბლეის ირგვლივ სკანდალის გამო სწორედ მისი გადადგომის მოთხოვნით ქვეყანაში დაიწყო პოლიტიკური კრიზისი, რომელიც უკვე წელიწადნახევარი გრძელდება.

თუმცა კობახიძემ შემდგომში დატოვა პარლამენტის თავმჯდომარის პოსტი, კრიზისი გაგრძელდა. ის თავად გახდა ოპოზიციის მოქმედებების მთავარი კრიტიკოსი და ხშირად გამოთქმების არ ერიდებოდა.

ამჟამად კობახიძე უხელმძღვანელებს პარტიას, მაგრამ მისი მართვა მოუწევს ყველაზე საიმედო მხარდაჭერის - ბოლო 10 წლის მთავარი პოლიტიკური ფიგურის, ბიძინა ივანიშვილის გარეშე.

ის არამხოლოდ პოლიტიკიდან წავიდა, მან პირობა დადო, რომ აღარ დაეხმარება პარტიას და მის ლიდერებს კონსულტაციებით და წინასაარჩევნო მხარდაჭერით საჯარო გამოსვლებში.

ახალმა თავმჯდომარემ უკვე აღიარა ჟურნალისტებთან, რომ პარტიის დამფუძნებლის გარეშე რთული იქნება.

„გამოწვევა არის სერიოზული, როდესაც ასეთი რესურსის მქონე პარტიის თავმჯდომარე ტოვებს პოლიტიკას და ტოვებს პოლიტიკურ გუნდს. მაგრამ ჩვენ გუნდის ერთიანობით ვუპასუხებთ აბსოლუტურად ყველა გამოწვევას“, – განაცხადა ირაკლი კობახიძემ.

„ქართული ოცნების“ ახალი გუნდი

ივანიშვილის წასვლასთან ერთად  პარტიის პოლიტსაბჭოს შემადგენლობაც შეიცვალა. ახლა ის აღმასრულებელი და საკანონმდებლო ხელისუფლების სიმბიოზს წარმოადგენს. ამასთან, 12-ის ნაცვლად, მასში ახლა 20 ადამიანია.

აღმასრულებელი ხელისუფლებიდან პოლიტიკურ საბჭოში აღმოჩნდნენ პრემიერ-მინისტრი გიორგი გახარია, რეგიონული განვითარების მინისტრი მაია ცქიტიშვილი, თავდაცვის მინისტრი ირაკლი ღარიბაშვილი, შინაგან საქმეთა მინისტრი ვახტანგ გომელაური, ჯანდაცვის მინისტრი ეკატერინა ტიკარაძე და ფინანსთა მინისტრი ივანე მაჭავარიანი. პოლიტსაბჭოში ასევე არიან თბილისის მერი კახა კალაძე და აჭარის ხელმძღვანელი თორნიკე რიჟვაძე.

რაც შეეხება საკანონმდებლო ორგანოს წარმომადგენლებს, პოლიტსაბჭოში შევიდნენ პარლამენტის თავმჯდომარე არჩილ თალაკვაძე და დეპუტატები თეა წულუკიანი, გია ვოლსკი, მამუკა მდინარაძე, კახა კუჭავა, მაკა ბოჭორიშვილი, შალვა პაპუაშვილი, ნიკოლოზ და დიმიტრი სამხარაძეები და სოზარ სუბარი.

„სხვადასხვა კრიტერიუმი იყო გამოყენებული, პირველ რიგში, პარტიის ხელმძღვანელი თანამდებობის პირები ბუნებრივია, წარმოდგენილი არიან პარტიის პოლიტსაბჭოში. ასევე, მნიშვნელოვანი იყო ბალანსი, მთავრობასა და პარლამენტს შორის“, - განაცხადა კობახიძემ.

ყრილობის მოულოდნელი სიურპრიზი

ყრილობას მოულოდნელობის გარეშე არ ჩაუვლია. „ქართულ ოცნებაში“ გაჩნდა პარტიის თავმჯდომარის მოადგილის თანამდებობა და ის საზოგადოებრივი მაუწყებლის ყოფილმა ხელმძღვანელმა ვასილ მაღლაფერიძემ დაიკავა.

ოპოზიცია მას ივანიშვილთან დაახლოებულ პირად მიიჩნევს. როდესაც მილიარდერმა პოლიტიკაში მოსვლის შემდეგ საკუთარი ტელეკომპანია GDS-ი დააარსა, მისი საინფორმაციო ნაწილის ხელმძღვანელობა სწორედ მაღლაფერიძეს ანდეს.

„ძალიან საინტერესო გუნდია და შეძლებს ამ გამოწვევებს უპასუხოს ღირსეულად. „ქართულმა ოცნებამ“ უნდა შეძლოს და შეასრულოს ფლაგმანის როლი ქართულ პოლიტიკაში. თავმჯდომარის მოადგილის პირველი ფუნქციაა თავმჯდომარისთვის ხელის შეწყობა, პარტიის მუშაობის ორგანიზება, სტრუქტურების გაძლიერება, საზოგადოებასთან ურთიერთობა და ასე შემდეგ“,– განაცხადა ვასილ მაღლაფერიძემ.

ყრილობა აქციის ფონზე

ყრილობა ინციდენტების ფონზე გაიმართა. EXPO GEORGIA-ს საგამოფენო კომპლექსთან, სადაც ყრილობა იმართებოდა, პარტიის ყველა წარმომადგენელი ყრილობაზე სამოქალაქო აქტივისტების აქციის გავლით შევიდა.

აქტივისტები ამტკიცებდნენ, რომ საპარლამენტო არჩევნები, რომელთა შედეგად „ქართულმა ოცნებამ“ ძალაუფლების მესამედ შენარჩუნება შეძლო, გაყალბებულია.

მათ რამდენჯერმე სცადეს გზის გადაკეტვა და კომპლექსის ტერიტორიაზე შესვლა, თუმცა აქტივისტებს ხელი შეუშალა პოლიციამ, რომელიც ყველა შესასვლელს იცავდა.

აქციაზე პოლიციელებთან შეხლა-შემოხლის შედეგად, დაკავებულია ცხრა ადამიანი. მოგვიანებით ისინი ხელწერილის საფუძველზე გაათავისუფლეს.

82
ყვავილები ზღვის სანაპიროზე

დღის ასტროპროგნოზი ზოდიაქოს ნიშნებისთვის: 18 იანვარი

0
(განახლებულია 13:33 17.01.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გიმზადებენ ვარსკვლავები და რას გირჩევენ ასტროლოგები

დღეს 2021 წლის 18 იანვარია, ორშაბათი. მზარდი მთვარე ვერძის ნიშანშია. ამ დღეს პლანეტა მზე მფარველობს.

დღეს განსაკუთრებით აქტუალური იქნება სიახლეებისადმი მისწრაფება. ჩვეული საქმიანობა და მოვალეობები მოსაწყენი გახდება და მათი სამომავლოდ გადადების სურვილი გაჩნდება. გამძაფრდება ემოციურობა, ცნობისმოყვარეობა და თუ ზოგიერთი ცნობისმოყვარეობის დაკმაყოფილებას შეეცდებით, დღე, შესაძლოა, საკმაოდ მრავალფეროვანი და კაშკაშა გამოვიდეს. ერთადერთი, რასაც უნდა მოერიდოთ, ეს კამათია, რომელიც სულ უსაფუძვლოდ შეიძლება დაიწყოს და შემდეგ მისი შეჩერება ძალიან გართულდება.

სიყვარული თეთრი ხარის ეგიდით – რა ელოდება ზოდიაქოს ნიშნებს 2021 წელს სასიყვარულო ასპარეზზე>>

ვერძი: დღეს დიდი ალბათობაა, რომ თქვენი ურთიერთობების გამოცდა მოეწყოს. ეს შეიძლება იყოს სამუშაო კონტაქტების ან ახლობელ ადამიანებთან ურთიერთობების შემოწმება. დღე კონფლიქტური სიტუაციების წარმოშობას შეუწყობს ხელს და თუ გამწვავებას მოერიდებით, მთელი დიპლომატიური უნარების გამოჩენა მოგიწევთ. ვარსკვლავები გაფრთხილებენ, რომ როგორც არ უნდა მოგინდეთ გარშემომყოფების გაკრიტიკება, თავი შეიკავეთ და ეს არ გააკეთოთ, წინააღმდეგ შემთხვევაში ძალზე სავალალო შედეგები შეიძლება დადგეს.

კურო: ყურადღება გმართებთ იმის მიმართ, რასაც ირვლივ მყოფნი ლაპარაკობენ: შესაძლოა, რაღაც საინტერესო გაიგოთ, მაგალითად, ინფორმაცია, კარგი იდეა. დღეს ასევე არ ღირს გარშემომყოფების რჩევების იგნორირება, შემოთავაზებულ დახმარებაზე უარის თქმა, რადგან თქვენი წარმატების გასაღები არა მხოლოდ პირადი ძალისხმევა, არამედ გვერდით მდგომი ადამიანების ხელშეწყობაც იქნება.

ტყუპი: დღეს თქვენი ცნობისწადილი ძალზე გაზრდილი იქნება, ასევე თქვენი ემოციებით დამუხტავთ გარშემომყოფებს. შესაძლოა, სწორედ დღეს ახალი ჰობი გაგიჩნდეთ, ან ვინმე საინტერესო ადამიანი გაიცნოთ რომანტიკული ურთიერთობებისთვის. თქვენი ცნობისმოყვარეობა იმდენად მაღალ დონეზეა, რომ ინტერესის დასაკმაყოფილებლად მთების გადადგმა შეგიძლიათ. ამასთან ვარსკვლავები გაფრთხილებენ, რომ თქვენი დღევანდელი გატაცება, დიდი ალბათობით, მყარი არ აღმოჩნდება და გაჩენილი ნაპერწკალი მალე მინავლდება.

კირჩხიბი: ვარსკვლავები დღეს კარგ შესაძლებლობებს მოგცემენ ისეთ საქმეებში, რომლებიც დაკავშირებულია გონებრივ მუშაობასთან და მოფიქრება–დაგეგმვასთან. არცთუ წარმატენული დღეა იმისთვის, რომ იდეებს ცხოვრებაში შეასხათ ხორცი, მაგრამ მათი გენერირებისთვის იდეალური დროა. დღეს მოფიქრებულ გეგმებს წარმატების დიდი შანსები აქვს. ასე რომ, ძილშიც კი მზად იყავით, რომ თუ გენიალური იდეა გეწვიათ, მაშინვე ჩაინიშნოთ და შემდეგ ცხოვრებაში განახორციელოთ.

ლომი: დღეს თქვენთვის ერთ ადგილზე ჯდომა უკუნაჩვენებია. ცხოვრება ახალ მოვლენებს, ემოციებს, შთაბეჭდილებებსა და სისხლში მეტ ადრენალინს მოითხოვს. დღეს ორ რამეში არ უნდა შეაკავოთ თავი: მოძრაობასა და ურთიერთობებში. ფიტნესი, შოპინგი, დილის გარბენა, ახალი ნაცნობობა – ეს ყველაფერი თქვენთვის, უბრალოდ, სასიცოცხლოდ აუცილებელია. შესაძლოა, სპორტის ექსტრემალური სახეობებით ნერვების „შეტოკება“ მოგინდეთ, ან უცნობთან ფლირტი. და რატომაც არა? მთავარია, სიტუაციაზე და საკუთარ თავზე კონტროლი არ დაკარგოთ.

ქალწული: დღეს გარშემომყოფებთან უთანხმოებებია მოსალოდნელი. საერთო ენის გამონახვა მეგობრებთან და ახლობლებთანაც კი შეიძლება გაგიჭირდეთ. ამის მიზეზი თქვენი კატეგორიულობა და კომპრომისზე წასვლის სურვილის არქონა გახდება. თუნდაც ასე არ იყოს, დღეს უსაზღვრო მოთმინებისა და დიპლომატიურობის გამოჩენა მოგიწევთ. ბოლოს და ბოლოს, თუ კამათი პრინციპუყლ საკითხებს არ შეეხება, რატომ არ უნდა დათმოთ? ეს ჯობია, ვიდრე მთელი დღე იმის გამორკვევაში გაატაროთ, ვინაა დამნაშავე და რა გააკეთოთ ამის შემდგომ.

სასწორი: დღეს ვითარებამ, შესაძლოა, არჩევნის წინაშე დაგაყენოთ და ტანჯვად გექცეთ საკითხი, თუ რა გააკეთოთ და როგორ მოიქცეთ. არჩევანი შეიძლება შეეხებოდეს სამუშაო პროექტებს, საყიდლებს ან პირად ცხოვრებას, შეიძლება სიყვარულის საკითხებს და თქვენს მომავალ ცხოვრებასაც. მთავარი ისაა, რომ როდესაც არჩევანს გააკეთებთ, სხვა ვარიანტები უნდა დაივიწყოთ, ამიტომ ვარსკვლავები მოგიწოდებენ, ყველაფერი კარგად აწონ–დაწონოთ. და საუკეთესო არჩევნისთვის წესი ასეთი იქნება: გული გიკარნახებთ, რა გააკეთოთ და გონება – რა არ გააკეთოთ.

მორიელი: დღეს თქვენი გული და გონება ერთმანეთს დაუპირისპირდება: სურვილი ერთ მხარეს გიბიძგებთ, ხოლო ლოგიკა და ფაქტები – მეორე მხარეს. თუ ასეთი რამ მოხდა, ექსპერტები გირჩევენ, არ აჩქარდეთ, რადგან, დიდი ალბათობით, რა გზაც არ უნდა აირჩიოთ, არასწორი იქნება. ნამდვილი გადაწყვეტილება გულითა და გონების ერთად უნდა მიიღოთ. თუ თავდაჯერებული არ ხართ, მაშინ აჯობებს, სხვა ვარიანტები მოძებნოთ.

მშვილდოსანი: დღეს კარგი შესაძლებლობები მოგეცემათ იქ, სადაც სიცოცხლე ჩქეფს და ახალი ნაცნობობის გაბმის საშუალება გაქვთ. ხართ უმაღლეს დონეზე კომუნიკაბელური, ადვილად აბამთ ურთიერთობებს. თუ ძველი პრობლემის გადაჭრისთვის ახლებურ დამოკიდებულებას გადაწყვეტთ, წარმოსახვა გამოიყენეთ. თქვენი ფანტაზია იდეალურად მიესადაგება არა მხოლოდ პრობლემის გადაჭრას, არამედ ეს უნარი შეგიძლიათ გამოიყენოთ მუშაობაშიცა და ოჯახურ ცხოვრებაშიც.

თხის რქა: დღეს რუტინული სამუშაოს შესრულების განწყობა არ გექნებათ, რადგან მოგზაურობის სურვილის „ქარი დაუბერავს“. ვარსკვლავები გირჩევენ, სასიამოვნო სასარგებლოს შეუხამოთ და შვებულება დაგეგმოთ, თუნდაც მანამდე დიდი დრო იყოს დარჩენილი. ეს სამომავლო მიზანს დაგისახავთ, მოგცემთ მძლავრ პოზიტივს და ყოველდღიურ ყოფასთან შეგუებაში დაგეხმარებათ.

მერწყული: თავს სახლიდან მოშორებით იგრძნობთ. ოფისში ან სახლში მუშაობის განწყობა არ გექნებათ. გაჩნდება სურვილი, რომ ცხოვრებაში რაც შეიძლება მეტი მრავალფეროვნება შეიტანოთ, გამდიდრდეთ ახალ–ახალი შთაბეჭდილებებით. გაისეირნეთ, შესაძლოა, რომანტიკულ ნაცნობობასაც გამოჰკრათ ხელი, შეხვდეთ საინტერესო ადამიანებს. ეს ყველაფერი თქვენს გრძნობებს გაამდიდრებს.

თევზები: დღეს განწყობა გექნებათ იმგვარი, რომ დროის სახლში გატარება არ მოგინდებათ. თუ ინერტულობას გადალახავთ და სახლიდან გახვალთ, არ ინანებთ – გაქვთ შანსი, რომ დრო საინტერესოდ გაატაროთ, გაიცნოთ საინტერესო ადამიანები. დროა, გაალამაზოთ ყოველდღიურობა და გახსოვდეთ, რომ კარგი დღე ისაა, რომელშიც ჩვეულ წესებს არ იცავენ და დღე არ იწყება მაღვიძარითა და არ მთავრდება ტელევიზორით.

0