პარლამენტი მთავრობას უსმენს

ძველი–ახალი მთავრობა და „ოცნების“ ეკონომიკის თავგადასავალი

1068
(განახლებულია 17:08 25.12.2020)
ხალხის რჩეულებმა გადაწყვეტილება მიიღეს – მთავრობის შემადგენლობა უცვლელია. რატომ? შეძლებს თუ არა გიორგი გახარიას კაბინეტი გაუმკლავდეს ეკონომიკურ კრიზისს, რა გზა გაიარა ქვეყნის ეკონომიკამ „ოცნების“ წლებში?

სამსონ ხონელი

ისე აგიხდეთ ყველა ოცნება, როგორც ეს პროგნოზი გამართლდა! ასეთი რა ხდება? - შესაძლოა, ჩამეძიოს მკითხველი. რა გაეწყობა, განვმარტავ. ორიგინალური არ ვიყავით, როცა ვივარაუდეთ, რომ მეათე მოწვევის პარლამენტში მთავრობის დამტკიცებას წინ ვერაფერი დაუდგებოდა. ასეც მოხდა. ხალხის რჩეულებმა გიორგი გახარიას მთავრობას ნდობა გამოუცხადეს. მივანიშნებ, რომ 2012 წლიდან მოყოლებული, გიორგი გახარია „ქართული ოცნების“ უკვე რიგით მეხუთე პრემიერ-მინისტრია და ისევე, როგორც თავის დროზე გიორგი კვირიკაშვილს, ახლა მასაც ორი მოწვევის პარლამენტმა დაუჭირა მხარი. შეხვდება თუ არა მორიგ საპარლამენტო არჩევნებს გიორგი გახარია მთავრობის თავმჯდომარის რანგში, ამას დრო გვიჩვენებს.

მინისტრთა კაბინეტის შემადგენლობას არ ჩამოვთვლი, დარწმუნებული ვარ, რომ მკითხველს კარგად მოეხსენება. ერთადერთი ცვლილებაა – თეა წულუკიანმა დეპუტატის მანდატი მოიპოვა და განათლების, მეცნიერებისა და კულტურის საპარლამენტო კომიტეტი ჩაიბარა. იუსტიციის მინისტრის სავარძელი კი გოჩა ლორთქიფანიძემ დაიკავა. ერთი სიტყვით, „ქართული ოცნება“ ქვეყნის მართვას ძველი–ახალი მთავრობით განაგრძობს. რატომ? თავად პრემიერ-მინისტრმა განაცხადა, რომ მთავრობის ამ შემადგენლობამ კრიზისულ მენეჯმენტს თავი კარგად გაართვა, დაწყებულია რეფორმები და ეს პროცესი ბოლომდე უნდა მივიდეს. 

სამართლიანობა მოითხოვს და უნდა ითქვას, რომ საპარლამენტო არჩევნების შემდგომ პერიოდში პოლიტიკურ თუ ანალიტიკურ წრეებში მთავრობის შემადგენლობაში მოსალოდნელ საკადრო ცვლილებებზე პრაქტიკულად არავის უსაუბრია. პოლიტიკური ველის ოპოზიციურ ფლანგთან აფილირებული „კეთილისმსურველი“ ექსპერტები მმართველ გუნდს ურჩევდნენ, რომ სხვა თუ არა, ოკუპირებული ტერიტორიებიდან დევნილთა, შრომის, ჯანმრთელობისა და სოციალურ დაცვის მინისტრის თანამდებობაზე ეკატერინე ტიკარაძის ჩანაცვლებაზე მაინც ეზრუნათ.

დასამალი არ არის, ტონიც კატეგორიული იყო. რატომ? შეგვიძლია ვივარაუდოთ, „გულწრფელი“ რჩევა მძიმე ეპიდემიოლოგიური ვითარების უკეთესობისკენ შეცვლითა და ჯანდაცვის სისტემაში პანდემიით გამოწვეული ობიექტური პრობლემების მოგვარების სურვილით იყო ნაკარნახევი. შესაძლოა ასეც იყოს, მაგრამ წყაროზე იმასაც ამბობენ, რომ „გულშემატკივართა“ მოწადინების მიზეზი ეკატერინე ტიკარაძის რეკომენდაციით შექმნილი საქართველოს მთავრობის მიერ გასული წლის 5 ნოემბერს მიღებული N520 დადგენილებაა. ეს დოკუმენტი, სხვა მნიშვნელოვან საკითხებთან ერთად, „საყოველთაო ჯანდაცვის სახელმწიფო პროგრამის“ ფარგლებში გასაწევი სამედიცინო მომსახურების ანაზღაურების ტარიფებს არეგულირებს. კი, მაგრამ, ამას თემასთან რა კავშირი აქვს? − შესაძლოა, ჩამეძიოს მკითხველი. აბა, მე რა შემიძლია გითხრათ? პასუხად ისევ „წყაროზე მოსმენილს“ მოგახსენებთ. დადგენილების ძალაში შესვლიდან სამედიცინო ბიზნესს თანდათან შემოსავლები შეუმცირდა. მას შემდეგ, რაც საყოველთაო ჯანდაცვის სახელმწიფო პროგრამით სამედიცინო მომსახურებისათვის გაწერილი დაფინანსების მაქსიმალური ზღვარი შემცირდა, მავანთ ახალი სამკურნალო დაწესებულებების გახსნის სურვილი დაკარგეს. ამაშია საქმე!..

საკადრო არა, მაგრამ სტრუქტურული ცვლილებების მოლოდინი კი ნამდვილად იყო. კერძოდ, ვარაუდობდნენ, რომ მთავრობის სტრუქტურაში კვლავ შეიქმნებოდა კულტურის სამინისტრო. მმართველ გუნდში ამ საკითხზე დიდი ხანია მსჯელობენ. როგორც თავად განათლების, მეცნიერების, კულტურისა და სპორტის მინისტრი მიხეილ ჩხენკელი საპარლამენტო ტრიბუნიდან აცხადებს, კულტურის სამინისტრო ცალკე უნდა არსებობდეს. ფაქტია, ვარაუდი არ გამართლდა, საკითხი მომავლისთვის გადაიდო. რატომ? სავარაუდოდ, COVID-19-ის პანდემიით გამოწვეული ღრმა ეკონომიკური კრიზისის პირობებში, როცა 2021 წლის საბიუჯეტო ასიგნებათა უდიდი ნაწილი სოციალური დახმარებისა და ბიზნესის მხარდაჭერის მიზნობრივი პროექტების დაფინანსებას უნდა მოხმარდეს, მმართველი გუნდი ადმინისტრაციული ხარჯების ზრდას მოერიდა. არ არის რთული წარმოსადგენი, შექმნილ სიტუაციაში ახალი სამინისტროს შექმნას საზოგადოებაში რა რეაქცია მოჰყვებოდა.

იმედია, მკითხველი დამეთანხმება, ყოველი ჩვენგანისთვის მთავრობის ეფექტური მუშაობის მთავარი საზომი ეკონომიკაა. ამ კონტექსტში ურიგო არ იქნება, თუ მოკლედ მიმოვიხილავთ საქართველოს ეკონომიკის ზრდის დინამიკას „ქართული ოცნების“ მმართველობის პერიოდში.

„საქსტატის“ მონაცემებით, გასულ წელს მთლიანი შიდა პროდუქტი 5 პროცენტით გაიზარდა. ეს 2012 წლის მომდევნო პერიოდში ყველაზე მაღალი მაჩვენებელია, მაგრამ 2004-2012 წლების საშუალო მაჩვენებელს ჩამორჩება.

ანალიტიკოსები მიანიშნებენ, რომ ეროვნული ვალუტის კურსის ცვლილებამ მთლიანი შიდა პროდუქტის დაანგარიშების მეთოდებში რიცხვებით მანიპულირების საშუალებები გააჩინა. ანუ? − ჩამეძიება მკითხველი. მოგახსენებთ, როგორც ექსპერტულ წრეებში განმარტავენ, ხელისუფლება ცდილობს ნომინალური ზრდა, ინფლაციის გათვალისწინების გარეშე, ლარში წარმოაჩინოს და ამით არარსებულ წარმატებებზე ილაპარაკოს. თავის მხრივ ოპოზიცია დოლარებში გადაყვანით ცდილობს დაგვიმტკიცოს, რომ გასულ წელს შემოსავალი ერთ სულ მოსახლეზე 2012 წელთან შედარებით შემცირდა. ანალიტიკოსთა შეფასებით, ეს მიდგომაც არასწორია, რადგან 2009 წლის შემდეგ 2020 წლამდე საქართველოში ეკონომიკური ვარდნა არ დაფიქსირებულა. „საქსტატის“ ცნობით, ლარში დათვლით საქართველოს მთლიანი შიდა პროდუქტი ერთ წელიწადში 44,599 მილიარდი ლარიდან 49,253 მილიარდ ლარამდე გაიზარდა. მატება − 4,654 მილიარდი ლარია. დოლარებში კი, პირიქით, ამავე პერიოდში მთლიანი შიდა პროდუქტი 125 მილიონი დოლარით შემცირდა და სულ 17,471 მილიარდი დოლარი შეადგინა. ანალოგიურ სურათს მივიღებთ ერთ სულ მოსახლეზე გადაანგარიშებითაც. ეროვნულ ვალუტაში 11 970 ლარიდან 13 240 ლარამდე ზრდა, ხოლო უცხოურ ვალუტაში 4 722 დოლარიდან 4 696 დოლარამდე კლება ფიქსირდება.

უფრო გრძელვადიან პერიოდს თუ შევხედავთ, 2013-2019 წლებში ლარში დათვლილი მთლიანი შიდა პროდუქტი ერთ სულ მოსახლეზე 7 690 ლარიდან 13 240 ლარამდე, ანუ 72 პროცენტით გაიზარდა, დოლარში დათვლით კი 4 624 დოლარიდან 4 696 დოლარამდე, სულ 1,5 პროცენტით გაიზარდა. აღსანიშნავია, რომ 2014 წელს 4 739 დოლარი ფიქსირდებოდა, ანუ 2014-2019 წლებში თითქმის ორპროცენტიანი კლება დაფიქსირდა.

რომელი მეთოდია სწორი – „ქართული ოცნების“ მმართველობის პირობებში, 2013-2019 წლებში ეკონომიკა გაიზარდა 72 პროცენტით თუ 1,5 პროცენტით? − დაინტერესდება ჩვენი მკითხველი. ანალიტიკოსთა განმარტებით, არც ერთი მეთოდი არ არის სწორი. ეკონომიკა 72 პროცენტით რომ გაზრდილიყო, მთლიანი შიდა პროდუქტის საშუალო წლიური 8-პროცენტიანი ზრდა უნდა ყოფილიყო. ეკონომიკის 1,5 პროცენტით გაზრდის შემთხვევაში მთლიანი შიდა პროდუქტის საშუალო წლიური 0,2-პროცენტიანი ზრდა უნდა გვქონოდა. რეალურად კი საშუალო წლიური ზრდა 3,9 პროცენტი იყო. ანალიტიკოსთა შეფასებით, ეს განვითარებადი ღარიბი ქვეყნისთვის ძალიან დაბალი მაჩვენებელია, თუმცა, მათივე თქმით, ნულოვანისგან განსხვავდება. ჯამურად 2013-2019 წლებში საქართველოს ეკონომიკა 32 პროცენტით გაიზარდა. ერთი სიტყვით, იმის მტკიცება, რომ 2013-2019 წლებში ეკონომიკა 72 პროცენტით გაიზარდა ზუსტად ორნახევარჯერ აღემატება რეალობას, მაგრამ ასევე მცდარია საუბარი, რომ საანგარიშო პერიოდში ეკონომიკის ზრდა საერთოდ არ ყოფილა.

სტატისტიკის ეროვნული სამსახურის მონაცემებზე დაყრდნობით შეგვიძლია დავასკვნათ, რომ 2012 წლის შემდეგ მთლიანი შიდა პროდუქტის ყველაზე მაღალი 5-პროცენტიანი ზრდა გასულ წელს აღინიშნა. ანალიტიკურ წრეებში აღნიშნავენ, რომ ასეთი ზრდის პირობებში ეკონომიკის გაორმაგებას, სულ ცოტა, 15 წელი დასჭირდება, რაც საქართველოსთვის ბევრია.

როგორია მიმდინარე წლის მაჩვენებელი? − მიმანიშნებს მკითხველი. ლეგიტიმური შენიშვნაა. რა გაეწყობა, 2020 წლის სამი კვარტლის მონაცემებს გაგაცნობთ. მიმდინარე წლის პირველი ცხრა თვის განმავლობაში საქართველოში მთლიანი შიდა პროდუქტი 5 პროცენტით შემცირდა. თუ გავითვალისწინებთ, რომ ოქტომბერ-ნოემბერში წერტილოვანი შეზღუდვები გაფართოვდა და გამკაცრდა, ადვილი პროგნოზირებადია, რომ ეკონომიკური ვარდნის მაჩვენებელი კიდევ უფრო მეტი იქნება. თავად ხელისუფლება წლის ბოლოსთვის საშუალო 5-პროცენტიან ვარდნას ვარაუდობს. ასეც რომ იყოს, ეს 1994 წლის შემდეგ ყველაზე ცუდი შედეგი იქნება. 2009 წელს მთლიანი შიდა პროდუქტის ვარდნა 3.7 პროცენტი იყო.

და, ბოლოს, მოვლენებს წინ გავუსწრებ და მოგახსენებთ, თუ მთავრობის ვარაუდი გამართლდა და მიმდინარე წელს მთლიანი შიდა პროდუქტი საბოლოოდ მხოლოდ 5 პროცენტით შემცირდა, 2013-2020 წლებში, ანუ „ქართული ოცნების“ მმართველობის რვა წლის თავზე საქართველოს ეკონომიკური ზრდის ტემპი 26 პროცენტის ნიშნულზე დაფიქსირდება.

წერტილის დასმას ვაპირებდი, როცა მეგობარი მესტუმრა, კომპიუტერს მიუჯდა და სტატიას თვალი გადაავლო. ეჰ, მეგობარო, ციფრებს რა მნიშვნელობა აქვს, არც ის არის არსებითი, ვინ და როგორ ითვლის, ეკონომიკის ზრდასა და ვარდნას ყველა საკუთარ ჯიბეზე გრძნობსო...

 

1068
ცარიელი ადგილები პარლამენტში

ეყოლება თუ არა საქართველოს სრულფასოვანი პარლამენტი: მორიგი რაუნდის მოლოდინში

146
(განახლებულია 20:15 17.01.2021)
ოპოზიცია და „ქართული ოცნება“ პოლიტიკური კრიზისის აღმოსაფხვრელად მოლაპარაკებათა მორიგი რაუნდისთვის ემზადებიან და პირობებს აყენებენ

მმართველ პარტია „ქართული ოცნება - დემოკრატიულ საქართველოს“ და ოპოზიციას შორის გაჭიანურებული პოლიტიკური კრიზისის გადასაჭრელად მოლაპარაკებათა მორიგი რაუნდი იგეგმება.

დღეისათვის, მიუხედავად იმისა, რომ ოპოზიციას არჩევნების შედეგების მიხედვით 150-დან 60 ადგილის დაკავება შეეძლო, პარლამენტის მუშაობაში მონაწილეობას იღებს მხოლოდ 4 ოპოზიციონერი დეპუტატი. თეორიულად მათ შეიძლება შეუერთდეს მაქსიმუმ 5 ადამიანი - სამი „ახალი პოლიტიკური ცენტრი - გირჩიდან“ და ორი - „მოქალაქეებიდან“.

თუმცა ეს ვერ გადაუჭრის პრობლემებს საკანონდებლო ორგანოს, რომელსაც ოპოზიციის პროტესტისა და ხმების უკმარისობის გამო სრულფასოვნად მუშაობა და ისეთი მნიშვნელოვანი გადაწყვეტილებების მიღება არ შეუძლია, როგორიცაა კონსტიტუციის, საკონსტიტუციო კანონების და „მიწის შესახებ“ კანონის შეცვლა.

ჯერჯერობით კრიზისიდან გამოსვლის ძირითად შესაძლებლობას წარმოადგენს მონაწილეობა მოლაპარაკებებში, რომლებიც ევროკავშირისა და აშშ-ის ელჩების პატრონაჟით მიმდინარეობს.

რა თემაზე იქნება საუბარი

ვადამდელი არჩევნები - ერთადერთი თემაა, რომელზეც სასაუბროდ არიან მზად ოპოზიციური პარტიები.

„მზად ვართ, რომ „ქართულ ოცნებასთან“ გავაგრძელოთ მოლაპარაკებები, იმ მოთხოვნებთან მიმართებაში, რომელიც ოპოზიციამ ერთიანად წარუდგინა ხელისუფლებას. მოსალაპარაკებელი და საკონსულტაციო არაფერი არ არის, ჩვენ გვაქვს ძალიან მკაფიოდ განსაზღვრული დღის წესრიგი, რომლის ნაწილიც არის ყველა ოპოზიციური პარტია“, - განაცხადა პარტია „ლელოს“ წარმომადგენელმა საბა ბუაძემ.

ამასთან, „ერთიანი ნაციონალური მოძრაობის“ ერთ-ერთმა ლიდერმა ლევან ბეჟაშვილმა აღნიშნა, რომ ოპოზიციას იმედი აქვს, რომ არჩევნებთან დაკავშირებით პლებისციტი დაინიშნება.

„საზოგადოებამ უნდა იცოდეს, რომ ეს მოლაპარაკების პროცესი არ არის პოლიტიკური ვაჭრობა ან ტოტალიზატორი. საპირწონედ დგას ამ ქვეყნის დემოკრატიული განვითარების ღირებულებები. გამოსავალი აქ არის მხოლოდ და მხოლოდ ერთი, რომ ხალხს ვკითხოთ და ხალხმა გადაწყვიტოს, ვინ არის დღეს ხელისუფლების ღირსი და ვინ არის დღეს ის ძალა, რომელიც ქვეყანას ამ ეკონომიკურ-სოციალური კრიზისიდან გამოიყვანს“, – განაცხადა ბეჟაშვილმა.

თუმცა ვადამდელი საპარლამენტო არჩევნების გარდა, ოპოზიციას მოლაპარაკებებში კიდევ ერთი თემა ექნება - ცვლილებები საარჩევნო სისტემაში.

მმართველი პარტია მზად არის დააჩქაროს საარჩევნო პროცესის დამოუკიდებლობის პროგრესი და უკვე 2022 წელს ადგილობრივი თვითმმართველობის ორგანოების არჩევნები ელექტრონული კენჭისყრით და უბნებზე თითის ანაბეჭდის შემოწმების გამოყენებით ჩაატაროს.

თუმცა ახალი რაუნდის თარიღი ჯერ უცნობია და თავად ოპოზიციაში უთანხმოება შეინიშნება.

ოპოზიციის წყალქვეშა ქვები

დღეისათვის ოპოზიცური პარტიების უმრავლესობას საარჩევნო სიები გაუუქმეს, ხოლო სადეპუტატო  მანდატებზე უარის თქმის შესახებ განაცხადები უკვე საპროცედურო საკითხთა და წესების კომიტეტს გადაეცა. ამ დეპუტატების ჩანაცვლება ვერ მოხერხდება.

მეტიც, პარლამენტში მოხვედრილმა „პატრიოტთა ალიანსმა“ უკვე დაკარგა ადგილები საკანონდებლო ორგანოში - მათი განაცხადი დაკმაყოფილებულია, მაგრამ ადგილები დაიკავეს ყველასათვის უცნობმა ადამიანებმა პარტიული სიიდან, რომლებმაც საკუთარი პარტია „ევროპელი სოციალისტები“ დააარსეს. ახლა ისინი „ქართულ ოცნებასთან“ ერთად მუშაობენ.

რაც შეეხება „გირჩსა“ და „მოქალაქეებს“, ისინი პარლამენტში სხვა პარტიების გარეშე მუშაობაზე უარს აცხადებენ. თუმცა მანდატებზე უარის მთქმელ სხვა ოპოზიციონერებს მათი არ სჯერათ.

„ძალიან სევდიანი ისტორიაა, დავიღალეთ უკვე. შევიდნენ, თუ შესვლა უნდათ. დახვდება იქ კობახიძე, მათი მეგობარი. იმათაც გაუხარდებათ, ჩვენც დავისვენებთ“, - განაცხადა „ლეიბორისტული პარტიის“ ერთ-ერთმა ლიდერმა გიორგი გუგავამ „მოქალაქეებისა“ და „გირჩის“ სურვილის კომენტირებისას, პარლამენტში დანარჩენი ოპოზიცია „დაპატიჟოს“.

ამასთან, მმართველ პარტიაში მოლაპარაკების პროცესის სრულ მხარდაჭერაზე განაცხადეს.

„რაც შეეხება მეხუთე რაუნდის შესაძლო შედეგებს, ეს მთლიანად დამოკიდებულია იმაზე, თუ როგორ აფასებს ოპოზიცია სტატუს კვოს. ხედავთ, რომ სტატუს კვო ნამდვილად არის შეცვლილი, პარლამენტში უკვე პირველი ოპოზიციური პარტია შემოსულია და საქმიანობს. ასევე, ოპოზიციის ჯანსაღ ნაწილში არაერთი გამოთქვამს წუხილს იმასთან დაკავშირებით, რომ ბოიკოტი არის არასწორი გადაწყვეტილება... ვფიქრობ, მეხუთე რაუნდამდე ამას არაერთი ოპოზიციური ლიდერი მეტად გააცნობიერებს. ჩვენ მზად ვართ, იმ სამართლიანი წინადადებების განსახილველად დავბრუნდეთ მოლაპარაკების მაგიდასთან, რაც ეხება პირველ რიგში, მათი პრეტენზიების გადამოწმებას“, - განაცხადა პარლამენტის თავმჯდომარე არჩილ თალაკვაძემ.

ამგვარად, არჩევნებიდან ორთვენახევრის შემდეგ და პარლამენტის პირველი სხდომიდან ერთ თვეში კვლავ ღიად რჩება საკითხი - რამდენი დეპუტატი იქნება პარლამენტში. ის უფრო აქტუალური გახდება თებერვალში, როდესაც პარლამენტი საგაზაფხულო სესიაზე შეიკრიბება და ოპოზიციონერი დეპუტატების მიერ მანდატების დატოვების შესახებ განაცხადების განხილვას ვეღარ გააჭიანურებს.

146
„ქართული ოცნების“ ყრილობა

„ქართული ოცნება“ ივანიშვილის გარეშე: ახალი პოლიტსაბჭო და ყრილობა აქციის ფონზე

82
(განახლებულია 20:36 16.01.2021)
ამჟამად პარტიას უხელმძღვანელებს კობახიძე, მაგრამ მისი მართვა მოუწევს ყველაზე საიმედო დასაყრდენის - ბოლო 10 წლის მთავარი პოლიტიკური ფიგურის, ბიძინა ივანიშვილის გარეშე.

მმართველმა პარტიამ „ქართული ოცნება - დემოკრატიულმა საქართველომ“ შაბათს გამართა პირველი ყრილობა თავისი დამფუძნებლის - მილიარდერ ბიძინა ივანიშვილის გარეშე და ახალი თავმჯდომარე და პოლიტსაბჭო აირჩია.

პარტიის თავმჯდომარე გახდა ირაკლი კობახიძე, რომელის პარტიის დაარსებიდან მისი აღმასრულებელი მდივნის პოსტს იკავებდა და ასევე ყველა არჩევნებზე პარტიის საარჩევნო შტაბს ხელმძღვანელობდა.

კობახიძის პერსონა არაერთხელ გამხდარა ოპოზიციის კრიტიკის ობიექტი. 2016-2019 წლებში ის პარლამენტის თავმჯდომარის პოსტს იკავებდა და 2019 წლის ივნისში მართლმადიდებლობის საპარლამენტთაშორისო ასამბლეის ირგვლივ სკანდალის გამო სწორედ მისი გადადგომის მოთხოვნით ქვეყანაში დაიწყო პოლიტიკური კრიზისი, რომელიც უკვე წელიწადნახევარი გრძელდება.

თუმცა კობახიძემ შემდგომში დატოვა პარლამენტის თავმჯდომარის პოსტი, კრიზისი გაგრძელდა. ის თავად გახდა ოპოზიციის მოქმედებების მთავარი კრიტიკოსი და ხშირად გამოთქმების არ ერიდებოდა.

ამჟამად კობახიძე უხელმძღვანელებს პარტიას, მაგრამ მისი მართვა მოუწევს ყველაზე საიმედო მხარდაჭერის - ბოლო 10 წლის მთავარი პოლიტიკური ფიგურის, ბიძინა ივანიშვილის გარეშე.

ის არამხოლოდ პოლიტიკიდან წავიდა, მან პირობა დადო, რომ აღარ დაეხმარება პარტიას და მის ლიდერებს კონსულტაციებით და წინასაარჩევნო მხარდაჭერით საჯარო გამოსვლებში.

ახალმა თავმჯდომარემ უკვე აღიარა ჟურნალისტებთან, რომ პარტიის დამფუძნებლის გარეშე რთული იქნება.

„გამოწვევა არის სერიოზული, როდესაც ასეთი რესურსის მქონე პარტიის თავმჯდომარე ტოვებს პოლიტიკას და ტოვებს პოლიტიკურ გუნდს. მაგრამ ჩვენ გუნდის ერთიანობით ვუპასუხებთ აბსოლუტურად ყველა გამოწვევას“, – განაცხადა ირაკლი კობახიძემ.

„ქართული ოცნების“ ახალი გუნდი

ივანიშვილის წასვლასთან ერთად  პარტიის პოლიტსაბჭოს შემადგენლობაც შეიცვალა. ახლა ის აღმასრულებელი და საკანონმდებლო ხელისუფლების სიმბიოზს წარმოადგენს. ამასთან, 12-ის ნაცვლად, მასში ახლა 20 ადამიანია.

აღმასრულებელი ხელისუფლებიდან პოლიტიკურ საბჭოში აღმოჩნდნენ პრემიერ-მინისტრი გიორგი გახარია, რეგიონული განვითარების მინისტრი მაია ცქიტიშვილი, თავდაცვის მინისტრი ირაკლი ღარიბაშვილი, შინაგან საქმეთა მინისტრი ვახტანგ გომელაური, ჯანდაცვის მინისტრი ეკატერინა ტიკარაძე და ფინანსთა მინისტრი ივანე მაჭავარიანი. პოლიტსაბჭოში ასევე არიან თბილისის მერი კახა კალაძე და აჭარის ხელმძღვანელი თორნიკე რიჟვაძე.

რაც შეეხება საკანონმდებლო ორგანოს წარმომადგენლებს, პოლიტსაბჭოში შევიდნენ პარლამენტის თავმჯდომარე არჩილ თალაკვაძე და დეპუტატები თეა წულუკიანი, გია ვოლსკი, მამუკა მდინარაძე, კახა კუჭავა, მაკა ბოჭორიშვილი, შალვა პაპუაშვილი, ნიკოლოზ და დიმიტრი სამხარაძეები და სოზარ სუბარი.

„სხვადასხვა კრიტერიუმი იყო გამოყენებული, პირველ რიგში, პარტიის ხელმძღვანელი თანამდებობის პირები ბუნებრივია, წარმოდგენილი არიან პარტიის პოლიტსაბჭოში. ასევე, მნიშვნელოვანი იყო ბალანსი, მთავრობასა და პარლამენტს შორის“, - განაცხადა კობახიძემ.

ყრილობის მოულოდნელი სიურპრიზი

ყრილობას მოულოდნელობის გარეშე არ ჩაუვლია. „ქართულ ოცნებაში“ გაჩნდა პარტიის თავმჯდომარის მოადგილის თანამდებობა და ის საზოგადოებრივი მაუწყებლის ყოფილმა ხელმძღვანელმა ვასილ მაღლაფერიძემ დაიკავა.

ოპოზიცია მას ივანიშვილთან დაახლოებულ პირად მიიჩნევს. როდესაც მილიარდერმა პოლიტიკაში მოსვლის შემდეგ საკუთარი ტელეკომპანია GDS-ი დააარსა, მისი საინფორმაციო ნაწილის ხელმძღვანელობა სწორედ მაღლაფერიძეს ანდეს.

„ძალიან საინტერესო გუნდია და შეძლებს ამ გამოწვევებს უპასუხოს ღირსეულად. „ქართულმა ოცნებამ“ უნდა შეძლოს და შეასრულოს ფლაგმანის როლი ქართულ პოლიტიკაში. თავმჯდომარის მოადგილის პირველი ფუნქციაა თავმჯდომარისთვის ხელის შეწყობა, პარტიის მუშაობის ორგანიზება, სტრუქტურების გაძლიერება, საზოგადოებასთან ურთიერთობა და ასე შემდეგ“,– განაცხადა ვასილ მაღლაფერიძემ.

ყრილობა აქციის ფონზე

ყრილობა ინციდენტების ფონზე გაიმართა. EXPO GEORGIA-ს საგამოფენო კომპლექსთან, სადაც ყრილობა იმართებოდა, პარტიის ყველა წარმომადგენელი ყრილობაზე სამოქალაქო აქტივისტების აქციის გავლით შევიდა.

აქტივისტები ამტკიცებდნენ, რომ საპარლამენტო არჩევნები, რომელთა შედეგად „ქართულმა ოცნებამ“ ძალაუფლების მესამედ შენარჩუნება შეძლო, გაყალბებულია.

მათ რამდენჯერმე სცადეს გზის გადაკეტვა და კომპლექსის ტერიტორიაზე შესვლა, თუმცა აქტივისტებს ხელი შეუშალა პოლიციამ, რომელიც ყველა შესასვლელს იცავდა.

აქციაზე პოლიციელებთან შეხლა-შემოხლის შედეგად, დაკავებულია ცხრა ადამიანი. მოგვიანებით ისინი ხელწერილის საფუძველზე გაათავისუფლეს.

82
ყვავილები ზღვის სანაპიროზე

დღის ასტროპროგნოზი ზოდიაქოს ნიშნებისთვის: 18 იანვარი

0
(განახლებულია 13:33 17.01.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გიმზადებენ ვარსკვლავები და რას გირჩევენ ასტროლოგები

დღეს 2021 წლის 18 იანვარია, ორშაბათი. მზარდი მთვარე ვერძის ნიშანშია. ამ დღეს პლანეტა მზე მფარველობს.

დღეს განსაკუთრებით აქტუალური იქნება სიახლეებისადმი მისწრაფება. ჩვეული საქმიანობა და მოვალეობები მოსაწყენი გახდება და მათი სამომავლოდ გადადების სურვილი გაჩნდება. გამძაფრდება ემოციურობა, ცნობისმოყვარეობა და თუ ზოგიერთი ცნობისმოყვარეობის დაკმაყოფილებას შეეცდებით, დღე, შესაძლოა, საკმაოდ მრავალფეროვანი და კაშკაშა გამოვიდეს. ერთადერთი, რასაც უნდა მოერიდოთ, ეს კამათია, რომელიც სულ უსაფუძვლოდ შეიძლება დაიწყოს და შემდეგ მისი შეჩერება ძალიან გართულდება.

სიყვარული თეთრი ხარის ეგიდით – რა ელოდება ზოდიაქოს ნიშნებს 2021 წელს სასიყვარულო ასპარეზზე>>

ვერძი: დღეს დიდი ალბათობაა, რომ თქვენი ურთიერთობების გამოცდა მოეწყოს. ეს შეიძლება იყოს სამუშაო კონტაქტების ან ახლობელ ადამიანებთან ურთიერთობების შემოწმება. დღე კონფლიქტური სიტუაციების წარმოშობას შეუწყობს ხელს და თუ გამწვავებას მოერიდებით, მთელი დიპლომატიური უნარების გამოჩენა მოგიწევთ. ვარსკვლავები გაფრთხილებენ, რომ როგორც არ უნდა მოგინდეთ გარშემომყოფების გაკრიტიკება, თავი შეიკავეთ და ეს არ გააკეთოთ, წინააღმდეგ შემთხვევაში ძალზე სავალალო შედეგები შეიძლება დადგეს.

კურო: ყურადღება გმართებთ იმის მიმართ, რასაც ირვლივ მყოფნი ლაპარაკობენ: შესაძლოა, რაღაც საინტერესო გაიგოთ, მაგალითად, ინფორმაცია, კარგი იდეა. დღეს ასევე არ ღირს გარშემომყოფების რჩევების იგნორირება, შემოთავაზებულ დახმარებაზე უარის თქმა, რადგან თქვენი წარმატების გასაღები არა მხოლოდ პირადი ძალისხმევა, არამედ გვერდით მდგომი ადამიანების ხელშეწყობაც იქნება.

ტყუპი: დღეს თქვენი ცნობისწადილი ძალზე გაზრდილი იქნება, ასევე თქვენი ემოციებით დამუხტავთ გარშემომყოფებს. შესაძლოა, სწორედ დღეს ახალი ჰობი გაგიჩნდეთ, ან ვინმე საინტერესო ადამიანი გაიცნოთ რომანტიკული ურთიერთობებისთვის. თქვენი ცნობისმოყვარეობა იმდენად მაღალ დონეზეა, რომ ინტერესის დასაკმაყოფილებლად მთების გადადგმა შეგიძლიათ. ამასთან ვარსკვლავები გაფრთხილებენ, რომ თქვენი დღევანდელი გატაცება, დიდი ალბათობით, მყარი არ აღმოჩნდება და გაჩენილი ნაპერწკალი მალე მინავლდება.

კირჩხიბი: ვარსკვლავები დღეს კარგ შესაძლებლობებს მოგცემენ ისეთ საქმეებში, რომლებიც დაკავშირებულია გონებრივ მუშაობასთან და მოფიქრება–დაგეგმვასთან. არცთუ წარმატენული დღეა იმისთვის, რომ იდეებს ცხოვრებაში შეასხათ ხორცი, მაგრამ მათი გენერირებისთვის იდეალური დროა. დღეს მოფიქრებულ გეგმებს წარმატების დიდი შანსები აქვს. ასე რომ, ძილშიც კი მზად იყავით, რომ თუ გენიალური იდეა გეწვიათ, მაშინვე ჩაინიშნოთ და შემდეგ ცხოვრებაში განახორციელოთ.

ლომი: დღეს თქვენთვის ერთ ადგილზე ჯდომა უკუნაჩვენებია. ცხოვრება ახალ მოვლენებს, ემოციებს, შთაბეჭდილებებსა და სისხლში მეტ ადრენალინს მოითხოვს. დღეს ორ რამეში არ უნდა შეაკავოთ თავი: მოძრაობასა და ურთიერთობებში. ფიტნესი, შოპინგი, დილის გარბენა, ახალი ნაცნობობა – ეს ყველაფერი თქვენთვის, უბრალოდ, სასიცოცხლოდ აუცილებელია. შესაძლოა, სპორტის ექსტრემალური სახეობებით ნერვების „შეტოკება“ მოგინდეთ, ან უცნობთან ფლირტი. და რატომაც არა? მთავარია, სიტუაციაზე და საკუთარ თავზე კონტროლი არ დაკარგოთ.

ქალწული: დღეს გარშემომყოფებთან უთანხმოებებია მოსალოდნელი. საერთო ენის გამონახვა მეგობრებთან და ახლობლებთანაც კი შეიძლება გაგიჭირდეთ. ამის მიზეზი თქვენი კატეგორიულობა და კომპრომისზე წასვლის სურვილის არქონა გახდება. თუნდაც ასე არ იყოს, დღეს უსაზღვრო მოთმინებისა და დიპლომატიურობის გამოჩენა მოგიწევთ. ბოლოს და ბოლოს, თუ კამათი პრინციპუყლ საკითხებს არ შეეხება, რატომ არ უნდა დათმოთ? ეს ჯობია, ვიდრე მთელი დღე იმის გამორკვევაში გაატაროთ, ვინაა დამნაშავე და რა გააკეთოთ ამის შემდგომ.

სასწორი: დღეს ვითარებამ, შესაძლოა, არჩევნის წინაშე დაგაყენოთ და ტანჯვად გექცეთ საკითხი, თუ რა გააკეთოთ და როგორ მოიქცეთ. არჩევანი შეიძლება შეეხებოდეს სამუშაო პროექტებს, საყიდლებს ან პირად ცხოვრებას, შეიძლება სიყვარულის საკითხებს და თქვენს მომავალ ცხოვრებასაც. მთავარი ისაა, რომ როდესაც არჩევანს გააკეთებთ, სხვა ვარიანტები უნდა დაივიწყოთ, ამიტომ ვარსკვლავები მოგიწოდებენ, ყველაფერი კარგად აწონ–დაწონოთ. და საუკეთესო არჩევნისთვის წესი ასეთი იქნება: გული გიკარნახებთ, რა გააკეთოთ და გონება – რა არ გააკეთოთ.

მორიელი: დღეს თქვენი გული და გონება ერთმანეთს დაუპირისპირდება: სურვილი ერთ მხარეს გიბიძგებთ, ხოლო ლოგიკა და ფაქტები – მეორე მხარეს. თუ ასეთი რამ მოხდა, ექსპერტები გირჩევენ, არ აჩქარდეთ, რადგან, დიდი ალბათობით, რა გზაც არ უნდა აირჩიოთ, არასწორი იქნება. ნამდვილი გადაწყვეტილება გულითა და გონების ერთად უნდა მიიღოთ. თუ თავდაჯერებული არ ხართ, მაშინ აჯობებს, სხვა ვარიანტები მოძებნოთ.

მშვილდოსანი: დღეს კარგი შესაძლებლობები მოგეცემათ იქ, სადაც სიცოცხლე ჩქეფს და ახალი ნაცნობობის გაბმის საშუალება გაქვთ. ხართ უმაღლეს დონეზე კომუნიკაბელური, ადვილად აბამთ ურთიერთობებს. თუ ძველი პრობლემის გადაჭრისთვის ახლებურ დამოკიდებულებას გადაწყვეტთ, წარმოსახვა გამოიყენეთ. თქვენი ფანტაზია იდეალურად მიესადაგება არა მხოლოდ პრობლემის გადაჭრას, არამედ ეს უნარი შეგიძლიათ გამოიყენოთ მუშაობაშიცა და ოჯახურ ცხოვრებაშიც.

თხის რქა: დღეს რუტინული სამუშაოს შესრულების განწყობა არ გექნებათ, რადგან მოგზაურობის სურვილის „ქარი დაუბერავს“. ვარსკვლავები გირჩევენ, სასიამოვნო სასარგებლოს შეუხამოთ და შვებულება დაგეგმოთ, თუნდაც მანამდე დიდი დრო იყოს დარჩენილი. ეს სამომავლო მიზანს დაგისახავთ, მოგცემთ მძლავრ პოზიტივს და ყოველდღიურ ყოფასთან შეგუებაში დაგეხმარებათ.

მერწყული: თავს სახლიდან მოშორებით იგრძნობთ. ოფისში ან სახლში მუშაობის განწყობა არ გექნებათ. გაჩნდება სურვილი, რომ ცხოვრებაში რაც შეიძლება მეტი მრავალფეროვნება შეიტანოთ, გამდიდრდეთ ახალ–ახალი შთაბეჭდილებებით. გაისეირნეთ, შესაძლოა, რომანტიკულ ნაცნობობასაც გამოჰკრათ ხელი, შეხვდეთ საინტერესო ადამიანებს. ეს ყველაფერი თქვენს გრძნობებს გაამდიდრებს.

თევზები: დღეს განწყობა გექნებათ იმგვარი, რომ დროის სახლში გატარება არ მოგინდებათ. თუ ინერტულობას გადალახავთ და სახლიდან გახვალთ, არ ინანებთ – გაქვთ შანსი, რომ დრო საინტერესოდ გაატაროთ, გაიცნოთ საინტერესო ადამიანები. დროა, გაალამაზოთ ყოველდღიურობა და გახსოვდეთ, რომ კარგი დღე ისაა, რომელშიც ჩვეულ წესებს არ იცავენ და დღე არ იწყება მაღვიძარითა და არ მთავრდება ტელევიზორით.

0