ავტოგასამართი სადგური

რა უწყობს ხელს ნავთობპროდუქტების იმპორტის ზრდას საქართველოში

78
(განახლებულია 14:45 09.12.2020)
საქართველოს საცალო ქსელში საწვავის ფასს განსაზღვრავს ორი მთავარი ფაქტორი – ნავთობპროდუქტების საერთაშორისო ფასი Platt's-ის მიხედვით და ლარის გაცვლითი კურსი.

თბილისი, 9 დეკემბერი – Sputnik. საქართველოში ავტომობილის საწვავზე მოთხოვნა გაიზარდა – 2020 წლის იანვრიდან ნოემბრის ჩათვლით ნავთობპროდუქტების იმპორტი 1,2%-ით გაიზარდა გასული წლის იმავე პერიოდთან შედარებით და 1.004,8 ათასი ტონა შეადგინა, აღნიშნულია საქართველოს ნავთობპროდუქტების იმპორტიორთა კავშირის განცხადებაში.

ამის პარალელურად ნავთობპროდუქტები გაძვირდა – ბოლო თვეებში ბენზინისა და დიზელის საწვავის ფასმა საშუალოდ 10 თეთრით მოიმატა.

საქართველოში სამრეწველო პროდუქციაზე ფასები იზრდება>>

ნავთობპროდუქტების იმპორტისა და მისი ფასების ზრდის მიზეზებზე, ასევე იმაზე, თუ საიდან შემოდის ქვეყანაში საწვავი, „Sputnik-საქართველოს“ ნავთობპროდუქტების იმპორტიორთა კავშირის თავმჯდომარე ვანო მთვრალაშვილი ესაუბრა.

რატომ გაიზარდა მოთხოვნა საწვავზე?

საწვავის იმპორტის მატება ძირითადად განპირობებულია საქართველოში დიზელის საწვავის იმპორტის ზრდით, განაცხადა ნავთობპროდუქტების იმპორტიორთა კავშირის თავმჯდომარემ.

მისი სიტყვებით, საქართველოში დიზელის საწვავის იმპორტი, მიუხედავად კორონავირუსის პანდემიისა და მისი თანმდევი შეზღუდვებისა, რასაც ქვეყანაში საწვავის მოხმარების შემცირება მოჰყვა, 2020 წლის იანვრიდან ნოემბრამდე 4,2%-ით გაიზარდა გასული წლის იმავე პერიოდთან შედარებით.

„დიზელის საწვავის იმპორტის ზრდა უკავშირდება სასოფლო-სამეურნეო დანიშნულების მიწათმესაკუთრეთა სტიმულირების სახელმწიფო პროგრამას, ფართო ინფრასტრუქტურულ სამუშაოებს და საქართველოს ტერიტორიაზე ტრანზიტით მოძრავი სატრანსპორტო-სატვირთო საშუალებების რაოდენობის ზრდას. ეს მაჩვენებელი 10 თვის განმავლობაში 16,4%-ით გაიზარდა“, – აღნიშნა მთვრალაშვილმა.

მისი სიტყვებით, იმპორტის ზრდას ხელს უწყობს ასევე ის ფაქტი, რომ ამ ეტაპზე შესაბამისი სტრუქტურების მიერ ქვეყანაში შეზღუდულია დაურეგისტრირებელი და კონტრაბანდული დიზელის საწვავის რეალიზაცია.

რაც შეეხება ბენზინის იმპორტის 1,6%-ით შემცირებას, მთვრალაშვილის სიტყვებით, ეს ფაქტობრივად უკავშირდება შეზღუდვებს, დაწესებულს COVID-19-ის პანდემიის გამო, მათ შორის, დისტანციური სწავლისა და მუშაობის გამო ტრანსპორტის მოძრაობის შემცირებას.

საიდან და როგორ შემოდის საწვავი

საქართველოში საწვავი შემოდის რუსეთიდან, აზერბაიჯანიდან, რუმინეთიდან, ბულგარეთიდან, თურქმენეთიდან, საბერძნეთიდან, ყაზახეთიდან, თურქეთიდან და მოლდავეთიდან რკინიგზითა და ზღვიდან.

რა იქნება საქართველოს ეკონომიკის ზრდის მიზეზი 2021 წელს>>

ნავთობპროდუქტების ყველაზე მსხვილი მომწოდებელი კვლავ რუსეთია. ნავთობპროდუქტების იმპორტიორთა კავშირის მონაცემებით, იანვრიდან ნოემბრამდე რუსეთიდან შემოვიდა 308,4 ათასი ტონა ნავთობპროდუქტი, რაც მთელი იმპორტის 30,7%-ია.

რა იწვევს გაძვირებას?

როგორც ნავთობპროდუქტების იმპორტიორთა კავშირის თავმჯდომარემ აღნიშნა, ბოლო თვეებში ნავთობპროდუქტები (ბენზინი და დიზელის საწვავი) საშუალოდ 10 თეთრით გაძვირდა.

მთვრალაშვილმა აღნიშნა, რომ საწვავის საცალო ფასს ორი მთავარი ფაქტორი განსაზღვრავს – ნავთობპროდუქტების საერთაშორისო ფასი Platt's-ის მიხედვით და ლარის გაცვლითი კურსი დოლარის მიმართ, ვინაიდან ნავთობპროდუქტების შესაძენად ქვეყანა დოლარს იხდის, საქართველოში კი პროდუქტი ეროვნულ ვალუტაში იყიდება.

„მიზეზი პირდაპირ უკავშირდება ნავთობპროდუქტების გაძვირებას და ეროვნული ვალუტის კურსის ვარდნას დოლარის მიმართ. ეს ორი კომპონენტი პირდაპირაა დაკავშირებული საქართველოს ბაზარზე ფასების ფორმირებასთან. იმის გამო, რომ ფასებიც გაიზარდა და ლარიც გაუფასურდა, საწვავის ფასმა საშუალოდ 10 თეთრით მოიმატა“, – აღნიშნა მთვრალაშვილმა.

როდისაა მოსალოდნელი საწვავის გაძვირება?

ნავთობპროდუქტების იმპორტიორთა კავშირის თავმჯდომარის თქმით, ბენზინისა და დიზელის საწვავის ფასის საშუალოდ 3-5 თეთრით მატება უახლოეს პერიოდშია მოსალოდნელი, რაც, პირველ რიგში, უკავშირდება საწვავის გაძვირებას საერთაშორისო ბაზარზე.

„უახლოეს დღეებში საქართველოში იმპორტი განხორციელდება ახალ, დღევანდელთან შედარებით გაცილებით მაღალ ფასად. ბუნებრივია, ეს გაძვირებას გამოიწვევს. ვფიქრობთ, უახლოეს პერიოდში ფასი საშუალოდ 3-5 თეთრით მოიმატებს“, – აღნიშნა მთვრალაშვილმა.

დღეს საქართველოში 5 მსხვილი კომპანია ოპერირებს, რომელთაც მთელ ქვეყანაში ჯამში 600 ავტოგასამართი სადგური ეკუთვნის. გარდა ამისა, მუშაობს ათობით წვრილი და საშუალო ე.წ. არაბრენდირებული კომპანია, რომელთაც ჯამში ასევე 600 ავტოგასამართი სადგური ეკუთვნის.

დღეისათვის ბრენდირებული ავტოგასამართი სადგურების ქსელებში ერთი ლიტრი საწვავის საშუალო ფასია: პრემიუმი – 2,28-2,39 ლარი, რეგულარი – 2,10-2,19 ლარი, ევროდიზელი – 2,27-2,39 ლარი.

78
თემები:
საქართველოს ეკონომიკა (943)
კორონავირუსის ეპიდემია

COVID-19-ის ერთი წლის ქრონიკა და ინფიცირებული ეკონომიკის ანამნეზი...

751
(განახლებულია 15:57 01.03.2021)
რატომ და როგორ იზრდებოდა საქართველოში კოვიდ-ინფიცირებულთა რაოდენობა. ერთი წლის ქრონიკა ციფრებში. დაუშვა თუ არა მთავრობამ შეცდომა, როცა შეზღუდვების შემსუბუქების გადაწყვეტილება მიიღო და რა დაღი დაასვა COVID-19-მა ქვეყნის ეკონომიკას?

სამსონ ხონელი

ერთი წელი გავიდა, რაც მთავრობის კანცელარიაში გამართულ ბრიფინგზე ოკუპირებული ტერიტორიებიდან დევნილთა, შრომის, ჯანმრთელობის და სოციალური დაცვის მინისტრმა ეკატერინე ტიკარაძემ გვაუწყა, რომ საქართველოში COVID-19-ით ინფიცირების პირველი შემთხვევა ლაბორატორიულად დადასტურდა. ვფიქრობ, ურიგო არ იქნება, განვლილ პერიოდს კიდევ ერთხელ გადავავლოთ თვალი, ვნახოთ, როგორი იყო ვირუსის გავრცელების დინამიკა, რა კონკრეტული ნაბიჯები გადადგა სახელმწიფომ უხილავ მტერთან საბრძოლველად და, რაც მთავარია, როგორ აისახა COVID-19-ის პანდემია ქვეყნის ეკონომიკაზე.

ამთავითვე უნდა ითქვას, მთავრობამ ეპიდემიოლოგების რეკომენდაციები გაითვალისწინა და COVID-19-თან საბრძოლველად მზადება ჯერ კიდევ 2019 წლის დეკემბერში დაიწყო. მომდევნო წლის იანვრის თვის ბოლოს ვირუსის გავრცელების პრევენციის სამოქმედო გეგმა დაამტკიცა, 29 იანვარს ჩინეთთან, ხოლო 23 თებერვალს ირანთან საჰაერო მიმოსვლა შეაჩერა.

მას შემდეგ, რაც COVID-19-მა საქართველომდეც მოაღწია, მარტის დასაწყისში სკოლებსა და უმაღლეს სასწავლებლებში სასწავლო პროცესი შეწყდა, დაიხურა საბავშვო ბაღებიც. მარტის პირველ კვირაში იტალიასთან ავიამიმოსვლა აიკრძალა, ხოლო მაღალი გავრცელების ზონის ქვეყნებიდან ჩამოსულ მოგზაურებს ორკვირიანი კრანტინი და თვითიზოლაცია დაუწესდა.

მარტის თვის მეორე დეკადაში ნებისმიერი უცხო ქვეყნის მოქალაქისთვის საზღვარი ჩაიკეტა. ამავე პერიოდში დაიხურა სამთო კურორტები, აიკრძალა სამარშრუტო მიკროავტობუსების მოძრაობა, დაიხურა ყველა ტიპის ბაზრობები და სავაჭრო ცენტრები. 21 მარტს კი საგანგებო მდგომარეობა გამოცხადდა. აიკრძალა ათ ადამიანზე მეტის შეკრება და შესაძლო დარღვევევბზე საკმაოდ მაღალი ჯარიმა დაწესდა – ფიზიკური პირებისთვის 3000 ლარი, იურიდიული პირებისთვის – 15 000 ლარი.

31 მარტს საყოველთაო კარანტინი გამოცხადდა. აიკრძალა საქალაქთაშორისო და ყველა სახის მუნიციპალური ტრანსპორტი. მგზავრობა ნებადართული დარჩა მხოლოდ კერძო ავტომობილებით, ასევე ტაქსით. საღამოს 21:00 საათიდან დილის 06:00 საათამდე კომენდანტის საათი გამოცხადდა, ხოლო დიდ ქალაქებში საკონტროლო-გამშვები პუნქტები მოეწყო. აღდგომის დღესასწაულთან დაკავშირებით სასაფლაოები ჩაიკეტა. ამავე პერიოდიდან დახურულ სივრცეში პირბადის ტარება სავალდებულო გახდა.

აპრილის თვის ბოლოს მკაცრი შეზღუდვების ეტაპობრივი მოხსნა დაიწყო, თუმცა საგანგებო მდგომარეობა მაისის თვის ბოლომდე გახანგრძლივდა. ამავე პერიოდში ხალხის რჩეულებმა „საზოგადოებრივი ჯანმრთელობის შესახებ“ კანონში ცვლილებები შეიტანეს. მთავრობას თითქმის იგივე უფლებები მიენიჭა, რაც საგანგებო მდგომარეობის დროს, იმ განხვავებით, რომ პრეზიდენტისა და პარლამენტის თანხმობა საჭირო უკვე აღარ იყო. კანონის მოქმედების ბოლო ვადა 15 ივლისით განისაზღვრა, თუმცა ის ჯერ მიმდინარე წლის 1 იანვრამდე, ბოლოს კი 1 ივლისამდე გახანგრძლივდა.

ზაფხულის თვეებში, სავარაუდოდ, ტურისტული სეზონის გადასარჩენად შეზღუდვების დიდი ნაწილი უკვე მოხსნილი იყო. 2020 წლის 31 აგვისტოს მდგომარეობით, ინფიცირების სულ 1487 და გარდაცვალების 19 შემთხვევა იყო დაფიქსირებული. ეს, მოსახლეობის რაოდენობის გათვალისწინებით, მსოფლიოში ერთ-ერთი საუკეთესო შედეგი იყო. ეპიდემიოლოგთა დიდი უმრავლესობა მიიჩნევს, რომ საშემოდგომოდ ინფიცირების რაოდენობის მატება სწორედ საზაფხულოდ კოვიდ-რეგულაციების შემსუბუქების შედეგია.

სექტემბრის ბოლოს COVID-19-ით ინფიცირებულთა საერთო რაოდენობამ 6192-ს მიაღწია. ზუსტად ერთი თვის შემდეგ ეს მაჩვენებელი 40 ათასს მიუახლოვდა. ინფიცირების შემთხვევათა რაოდენობამ პიკს ნოემბერ-დეკემბერში მიაღწია. თუ გიორგობისთვის ბოლოს ქვეყანას 136.000-მდე კოვიდ-ინფიცირებული ჰყავდა, გასული წლის ბოლოს მათი რაოდენობა 227.000-მდე გაიზარდა.

მთავრობა იძულებული გახდა, ოქტომბრიდან შეზღუდვები ისევ გაემკაცრებინა. პირბადე გარე სიცრცეშიც სავალდებულო გახდა. ნოემბრის პირველი დეკადის ბოლოს გადაადგილება 21:00 საათიდან 05:00 საათამდე აიკრძალა. კომენდატის საათის გამოცხადებიდან მალევე, 28 ნოემბრიდან ქვეყანა კიდევ ერთხელ ჩაიკეტა, ანუ „ლოკდაუნი“ მეორედ გამოცხადდა. აქვე მოგახსენებთ, რომ 2020 წლის 21 მარტიდან 31 დეკემბრის ჩათვლით კოვიდ-რეგულაციების დარღვევის გამო თითქმის 37 მილიონი ლარის ჯარიმა გამოიწერა.

დარწმუნებული ვარ, მკითხველს კარგად მოეხსენება, პრემიერ-მინისტრის თანამდებობაზე ახლად დამტკიცებულმა ირაკლი ღარიბაშვილმა სულ რამდენიმე დღის წინ საზოგადოებას კოვიდ-რეგულაციების ეტაპობრივად მოხსნის გეგმა გააცნო. გარკვევით ითქვა ისიც, რომ თუ მოსახლეობა პირბადის ტარებისა და დისტანციის დაცვის წესს გაითვალისწინებს, ქვეყანა თანდათან ცხოვრების ჩვეულ რიტმს დაუბრუნდება. როგორ აისახება შეზღუდვების მორიგი მოხსნა ეპიდემიოლოგიურ ვითარებაზე, ამას დრო გვიჩვენებს, მანამდე კი საზოგადოებაში არ წყდება დისკუსია − როდიდან და რა სახის რეგულაციები უნდა დაწესებულიყო, როგორია კოვიდ-შეზღუდვების ეფექტი ეპიდსიტუაციაზე და მისი ნეგატიური ზემოქმედების ხარისხი ეკონომიკაზე?

არახალია, ეკონომიკური მდგომარეობა მძიმეა. თანმიმდევრულად მივყვეთ და რამდენიმე პარამეტრი მიმოვიხილოთ.

მთლიანი შიდა პროდუქტი − გასულ წელს ქვეყანაში ეკონომიკური ვარდნის მაჩვენებეელი 1994 წლიდან მოყოლებული ყველაზე უარესი – 6.1 პროცენტი იყო, რაც მთლიანი შიდა პროდუქტის შემცირების მსოფლიო მაჩვენებელს 2.1 პროცენტით აღემატება. არასახარბიელოა მიმდინარე წლის პროგნოზიც. მართალია, ბიუჯეტი 4.3 პროცენტიან ეკონომიკურ ზრდაზე დაიგეგმა, ხოლო ეროვნული ბანკის შეფასებით, მიმდინარე წელს მთლიანი შიდა პროდუქტი 4 პროცენტით უნდა გაიზარდოს, მაგრამ ფაქტია, რომ ახალი წლის პირველი თვე ეკონომიკის 11.5 პროცენტიანი შემცირებით დასრულდა. 

პირდაპირი უცხოური ინვესტიციები − სტატისტიკის ეროვნულ სამსახურს გასული წლის საბოლოო შედეგები ჯერ არ გამოუქვეყნებია და ჩვენც ისღა დაგვრჩენია, პირველი სამი კვარტლის მონაცემებით ვიხელმძღვანელოთ. ამ პერიოდში საქართველოში 719 მილიონი ამერიკული დოლარის პირდაპირი უცხოური ინვესტიცია განხორციელდა, რაც 2019 წლის ანალოგიურ პერიოდთან შედარებით 24 პროცენტით ნაკლებია და ბოლო ათი წლის ყველაზე ცუდი მაჩვენებელია.

საგარეო ვაჭრობა − გასულ წელს საგარეო სავაჭრო ბრუნვა შემცირდა, კერძოდ, ექსპორტი 11.1 პროცენტით, ხოლო იმპორტი − 16.6 პროცენტით შემცირდა. ანალიტიკოსთა შეფასებებით, იმპორტის შედარებით უფრო დიდი მოცულობით შემცირება მისი ადგილობრივი ნაწარმით ჩანაცვლებამ კი არა, ნავთობზე ფასების ვარდნამ და მსყიდველობითუნარიანობის კლებამ განაპირობა.

ფულადი გზავნილები − გასული წლის განმავლობაში საქართველოში საზღვარგარეთიდან რეკორდული ოდენობის − 1.886 მილიარდი დოლარის ფულადი გზავნილი განხორციელდა, რაც 2019 წლის მაჩვენებელთან შედარებით 8.8 პროცენტით მეტია, ხოლო მიმდინარე წლის იანვარში ეს მაჩვენებელი, გასული წლის ანალოგიურ პერიოდთან შედარებით, 19 პროცენტით გაიზარდა. ანალიტიკოსთა შეფასებით, COVID-19-ის პანდემიისა და ეკონომიკური კრიზისის ფონზე, როდესაც საგარეო ვაჭრობაც შემცირდა, ინვესტიციების მოცულობაც, ტურიზმიც და პრაქტიკულად ყველა სხვა ეკონომიკური აქტივობა, უცხოეთიდან საქართველოში ფულადი გზავნილების ზრდაში გარკვეული როლი მისმა ბოლომდე გაოფიციალურებამაც შეასრულა. სატრანსპორტო მიმოსვლის აკრძალვის გამო ემიგრანტებმა თანხის ახლობლისთვის ხელზე გატანების საშუალება დაკარგეს. ფულადი გზავნილები კონკრეტულ ადრესატამდე საბანკო სისტემის გავლით მიდიოდა და, შესაბამისად, მარტივად აღირიცხებოდა.

ტურიზმი − არავის გაუკვირდება, სფეროდან შემოსავალი ფაქტობრივად განულდა. სექტორი 2000-იანი წლების მაჩვენებლებს დაუბრუნდა.   

უმუშევრობა − გასული წლის მეოთხე კვარტალში უმუშევრობა 3.8 პროცენტით გაიზარდა და 20.4 პროცენტი შეადგინა, რაც 2018 წლის პირველი კვარტლის შემდეგ ყველაზე მაღალი მაჩვენებელია. დასაქმებულთა საერთო რაოდენობა 1,197 მილიონს დაუბრუნდა, რაც შვიდი წლის წინანდელი მაჩვენებელია.  

ეროვნული ვალუტა − თავისი არსებობის მეოთხედსაუკუნოვანი ისტორიის განმავლობაში ლარის კურსი დოლართან მიმართებაში პირველად გასცდა სამიან ნიშნულს. გასულ წელს ლარი საშუალოდ 16 პროცენტით გაუფასურდა.

და, ბოლოს, სიღარიბისა და უკიდურესი სიღარიბის ზუსტი სტასტისტიკა უცნობია, მაგრამ ცნობილია, რომ გასულ წელს სოციალური დახმარების მიმღებ პირთა რაოდენობა თითქმის 100 ათასით გაიზარდა და ნახევარ მილიონს გადააჭარბა.

ასეთია COVID-19-ის ერთი წლის არასრული სტატისტიკა. ვნახოთ, რა იქნება კიდევ ერთი წლის შემდეგ. შეძლებს თუ არა საქართველო დროულად დაიწყოს ვაქცინაციის პროცესი, გაუსწორდეს პანდემიას, დაამარცხოს უხილავი მტერი და დაუბრუნდეს ცხოვრების ჩვეულ რიტმს... მანამდე კი, სხვა რა დაგვრჩენია, გავიკეთოთ პირბადე, დავიცვათ დისტანცია და ხშირად დავიბანოთ ხელები.

 

751
კომოანია Standard & Poor's -ს ლოგო

როგორ აისახა პანდემია საქართველოს ეკონომიკაზე: S&P პროგნოზს აუარესებს

68
(განახლებულია 14:31 28.02.2021)
სააგენტო ვარაუდობს, რომ 2020 წელს საქართველოს რეალური მშპ-ის 6%-ით შემცირების შემდეგ, 2021 წელს ის 4%-ით გაიზრდება. ის აღნიშნავს, რომ ეკონომიკის ზრდის საშუალოვადიან პერსპექტივებზე ზოგიერთმა პრობლემამ შესაძლოა გავლენა იქონიოს.

თბილისი, 28 თებერვალი – Sputnik. რისკები უცხოური ინვესტიციებისთვის, კორონავირუსის გამო ექსპორტის შემცირება და ტურიზმის შემოსავლების კუთხით პროგნოზის გაუარესება - ეს ყველაფერი ნეგატიურად აისახება საქართველოს ეკონომიკაზე, ნათქვამია ანგარიშში, რომელიც გამოაქვეყნა საერთაშორისო სარეიტინგო სააგენტომ S&P Global Ratings.

სააგენტომ გადახედა თავის პროგნოზს საქართველოს მიმართ და ის „სტაბილურიდან“ „ნეგატიურამდე“ ჩამოაქვეითა. ამავე დროს უცხოურ და ადგილობრივ ვალუტაში გრძელვადიანი და მოკლევადიანი სუვერენული საკრედიტო რეიტინგები BB/B დონეზე დატოვა.

„ნეგატიური პროგნოზი ასახავს რისკებს, რომლებიც შეიძლება შეექმნას საქართველოს თავისი მნიშვნელოვანი საგარეო ვალდებულებების მომსახურების დროს საკმარისი სავალუტო შემოსავლების გენერირების კუთხით. სავარაუდოდ, ტურისტული სექტორის აღდგენა ვაქცინების გლობალურ დანერგვას ჩამორჩება, და ჩვენ ვერ ვივარაუდებთ 2019 წლის ტურისტული აქტიურობის დონის 2024 წლამდე დაბრუნებას. მეტად არასტაბილურ შიდა პოლიტიკურ ვითარებასთან ერთად ამან შეიძლება გააუარესოს უცხოური ინვესტიციების მოდინების საშუალოვადიანი პერსპექტივები, რაც, ჩვენი თვალსაზრისით, მნიშვნელოვანია ზრდისთვის და საგარეო დაფინანსებისთვის“, - ნათქვამია ანგარიშში.

ამავე დროს S&P აღნიშნავს, რომ სააგენტო მზადაა გადახედოს პროგნოზს და ის „სტაბილურით“ შეცვალოს, თუ სავალუტო შემოსავლები მოსალოდნელზე სწრაფად აღდგება.

ნეგატიური ზეგავლენა ეკონომიკაზე

სააგენტო ვარაუდობს, რომ 2020 წელს საქართველოს რეალური მშპ-ის 6%-ით შემცირების შემდეგ, 2021 წელს ის 4%-ით გაიზრდება. ის აღნიშნავს, რომ ეკონომიკის ზრდის საშუალოვადიან პერსპექტივებზე ზოგიერთმა პრობლემამ შესაძლოა გავლენა იქონიოს.

S&P რისკებად აფასებს ტურიზმის სუსტ აღდგენას, ვაქცინაციის ნელ ტემპს და უცხოური ინვესტიციების მოდინების შემცირებას.

„გარდა ამისა, ხშირი პოლიტიკური კრიზისების შედეგად არსებობს რეფორმების იმპულსის შესუსტების და უცხოური ინვესტორების მიერ საქართველოს სტაბილურობის აღქმის რისკი“, - ნათქვამია ანგარიშში.

სააგენტოში მიიჩნევენ, რომ ზრდის პერსპექტივებს საფრთხე შეიძლება შეუქმნას ასევე ფისკალური და მონეტარული პოლიტიკის ნაადრევმა გამკაცრებამ.

„ეკონომიკურ აქტივობას, მათ შორის შერყეულ სასტუმრო სექტორში, სარგებელს მოუტანს შემზღუდავი ზომების შერბილება. შეზღუდვები კვლავ დაწესდა 2020 წლის ბოლო კვარტალში COVID-19-ის შემთხვევების მკვეთრი ზრდის შემდეგ. 2021 წელს სახელმწიფო მხარდაჭერის ზოგიერთი ზომების გაგრძელებამ ასევე უნდა შეუწყოს ხელი ეკონომიკურ ზრდას“, - აღნიშნეს სააგენტოში.

ასევე, S&P საქართველოს მთავრობის ვაქცინაციის გეგმას ამბიციურს უწოდებს.

„მიგვაჩნია, რომ მსოფლიო მოთხოვნა-მიწოდების დინამიკის გათვალისწინებით, მთავრობის მიერ გაცხადებული გეგმა წლის ბოლომდე მოზრდილი მოსახლეობის 60%-ის ვაქცინაციის შესახებ საკმაოდ ამბიციურია. მოსალოდნელია, რომ საქართველო 2021 წლის პირველ ნახევარში COVAX-ისგან დაახლოებით 214 ათას დოზას მიიღებს. ეს ნიშნავს, რომ 2021 წლის შუა პერიოდში ვაქცინაციის დონე მოსახლეობის საერთო რიცხვის 2,8%-ს შეადგენს (ერთ ადამიანზე ორი დოზის გათვალისწინებით),“ - აღნიშნულია ანგარიშში.

სწორედ ვაქცინის დანერგვაზე იქნება დამოკიდებული ტურისტული სექტორის ბედი, მიაჩნიათ სააგენტოში.

„ტურისტული სექტორის პერსპექტივები ბუნდოვანი რჩება. იმ დროს, როდესაც  შიდა ტურისტული აქტივობა გარკვეულწილად გრძელდებოდა 2020 წელს, ქვეყანაში უცხოელი ტურისტების შემოდინება 2019 წელთან შედარებით 83%-ით შემცირდა. ჩვენი თვალსაზრისით, ამ სექტორის ბედი დაკავშირებული იქნება  ვაქცინის დანერგვის პროგრესთან არა მხოლოდ ქვეყანის შიგნით, არამედ მეზობელ ქვეყნებშიც, საიდანაც ჩამოდის საქართველოს ვიზიტორების უმეტესობა“, - აღნიშნულია ანგარიშში.

პოლიტიკის გავლენა ეკონომიკაზე

S&P ნეგატიურად აფასებს ასევე პოლიტიკური კრიზისის ზეგავლენას.

„პოლიტიკურმა დაძაბულობამ მმართველ პარტიასა და ოპოზიციას შორის შესაძლოა შეასუსტოს რეფორმების იმპულსი და ხელისუფლების ცენტრალიზაციის რისკების ფონზე ავნოს საერთაშორისო ინვესტორების აღქმას საქართველოს სტაბილურობასთან დაკავშირებით“, - ნათქვამია ანგარიშში.

სააგენტო აღნიშნავს, რომ თუმცაღა ოპოზიციის მოთხოვნა ვადამდელი არჩევნების ჩატარების შესახებ სავარაუდოდ არ დაკმაყოფილდება, არსებობს სივრცე სხვა პოლიტიკური დათმობებისთვის, რომლებიც ქვეყანას ჩიხიდან გამოიყვანდა.

„საქართველოს ყოფილი პრემიერ-მინისტრის, გიორგი გახარიას გადადგომა, რაც ქვეყნის ოპოზიციის ლიდერის დაკავების საქმეს უკავშირდებოდა, კიდევ უფრო ართულებს საქართველოში მოკლევადიანი პოლიტიკის განჭვრეტას. თუმცა, მთავრობის მიერ გაცხადებული მაკროეკონომიკური დღის წესრიგი უცვლელი რჩება“, - აღნიშნეს სააგენტოში.

ხელისუფლების რეაქცია

საქართველოს მთავრობაში საქართველოს საკრედიტო რეიტინგის შენარჩუნება დადებითად შეაფასეს.

„სარეიტინგო სააგენტო S&P Global-ის მიერ რეიტინგის შენარჩუნება ადასტურებს მთავრობის მიერ გატარებულ გონივრულ მაკროეკონომიკურ პოლიტიკას“, - განაცხადა ფინანსთა მინისტრის მოადგილემ ნიკოლოზ გაგუამ.

ამავე დროს მან განმარტა, რით არის გამოწვეული სააგენტოს ნეგატიური პროგნოზი.

„სააგენტოს მიერ განსაზღვრული „ნეგატიური“ პერსპექტივა, ძირითადად, გამოწვეულია გლობალურად, ტურიზმის აღდგენის შედარებით ნელი პერსპექტივიდან გამომდინარე. S&P Global-ის შეფასებით, ტურიზმის აღდგენა მთელ მსოფლიოში და მათ შორის, საქართველოში, შედარებით ნელი ტემპებით მოხდება, ვიდრე ამას დასაწყისში ელოდნენ. ტურიზმის სწრაფი აღდგენის შემთხვევაში, რისი მაღალი მოლოდინიც ჩვენ გვაქვს, კომპანია გამოხატავს პერსპექტივის აღდგენის მზადყოფნას,“ – აღნიშნა ნიკოლოზ გაგუამ.

S&P შეფასება და Fitch-ის მონაცემები

ერთი კვირის წინ სხვა საერთაშორისო სარეიტინგო სააგენტო Fitch-მა დატოვა საქართველოს ემიტენტის დეფოლტის გრძელვადიანი რეიტინგი უცხოურ ვალუტაში BB დონეზე. პროგნოზი - „ნეგატიურია“.

„ნეგატიური“ პროგნოზი, Fitch-ის ანალიტიკოსების აზრით, ასახავს კორონავირუსის პანდემიის მნიშვნელოვან გავლენას საქართველოს ეკონომიკაზე.

მათი მტკიცებით, პანდემია იწვევს მსხვილი ტურისტული სექტორის მქონე საქართველოს მცირე, ღია ეკონომიკის მკვეთრ შემცირებას, საბიუჯეტო ანგარიშების შესამჩნევ გაუარესებას, მათ შორის, სახელმწიფო ვალის ზრდას, და უფრო მოწყვლადს ხდის მას, რაც მომდინარეობს საქართველოს დიდი საგარეო ვალიდან და მიმდინარე ანგარიშის უფრო ფართო სტრუქტურული დეფიციტიდან BB კატეგორიის ქვეყნების მედიანურ მაჩვენებელთან შედარებით.

Fitch-ის პროგნოზით, 2020 წელს პანდემიით გამოწვეული 6,1%-იანი ვარდნის შემდეგ 2021 წელს საქართველოს ეკონომიკა 4.3%-ით, ხოლო 2022 წელს – 5.8%-ით გაიზრდება.

სააგენტოს ანალიტიკოსების აზრით, საქართველოს მშპ-ის ზრდის მთავარ განმსაზღვრელ ფაქტორს შიდა მოთხოვნილების მატება წარმოადგენს, ვინაიდან შეზღუდვების შემსუბუქება ხელს უწყობს კერძო მოხმარებას, ხოლო ინფრასტრუქტურაზე სახელმწიფოს მიერ გაწეული, ჩვეულებრივზე დიდი ხარჯი, კერძო სექტორის სუსტი გაჯანსაღების მიუხედავად, ინვესტიციებს წაახალისებს.

68
გაზაფხული

დღის ასტროპროგნოზი ზოდიაქოს ნიშნებისთვის: 3 მარტი

0
(განახლებულია 11:56 02.03.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გვიმზადებენ ვარსკვლავები და რას გვირჩევენ ასტროლოგები

დღეს 2021 წლის 3 მარტია, ოთხშაბათი. კლებადი მთვარე მორიელის ნიშანშია. ამ დღეს პლანეტა მერკური მფარველობს.

სასიამოვნო, როდესაც იღვიძებ და მოზღვავებულ ენერგიასა და ძალას გრძნობ. სწორედ ასეთია დღევანდელი დღე. ენერგია თუ გაღვიძებისთანავე არა, დღის განმავლობაში აუცილებლად მომძლავრდება. საქმეების თვალსაზრისით შესაფერისი დროა იმისთვის, რომ დაიცვათ საკუთარი თვალსაზრისი და გამოაჩინოთ ხასიათი (ოღონდ ზედმეტი არ მოგივიდეთ). არცთუ წარმატებული დღეა მოლაპარაკებებისა და საქმეების განხილვისთვის.

ზოდიაქოს ხუთი რჩეული ნიშანი – ვის გაუმართლებს ამ გაზაფხულზე>>

ვერძი: დღეს თქვენ მიმართ ოპოზიციურად განწყობილ ადამიანებს შეეჯახებით. ვიღაცას შეუძლია, პირში მოგახალოთ საკმაოდ არასასიამოვნო სიტყვები. მაგრამ ეს არ შეგაშფოთებთ – საბრძოლველად ხართ განწყობილი და არ გაუშვებთ შანსს ხელიდან, რომ კონკურენტი მიწასთან გაასწოროთ... ან დაუმეგობრდეთ მას – არც ესაა გამორიცხული, რადგან დღეს პარადოქსული მოქმედებები თქვენგან გამორიცხული არაა. სინამდვილეში, შეგიძლიათ, ვითარება რამდენიმე ნაბიჯით წინ გათვალოთ და შორს მიმავალი გეგმები შეადგინოთ.

კურო: დღეს დისკუსიის განწყობაზე ხართ და თან ნებისმიერთან, ნებისმიერ თემაზე. მზად ხართ, ყველას დაუმტკიცოთ თქვენი თვალსაზრისი და სიმართლე. თუნდაც გარშემომყოფები გეთანხმებოდნენ, მაინც იპოვით საბაბს, რომ იკამათოთ. მოხერხებულად შეგიძლიათ ირგვლივ მყოფების პროვოცირება მხოლოდ იმისთვის, რომ სათქმელი გქონდეთ – ისინი მართლები არ არიან. ვერაფერს გავაწყობთ – ასეთ განწყობაზე ხართ დღეს.

ტყუპი: დღეს რასაც არ უნდა მოკიდოთ ხელი, ყველაფერს სერიოზულად გააკეთებთ, ისე, თითქოს ამაზე იყოს თქვენი ცხოვრება დამოკიდებული. ეს ცუდი არაა, როდესაც საქმე სამუშაოს ან ნამდვილად მნიშვნელოვან პროექტებს ეხება. თუმცა ყოფით საკითხებში ასე ჯიქურ მოქმედება არ ივარგებს. ყველა ფრონტზე ერთდროულად ამგვარი დამოკიდებულებით მოქმედება თქვენს ძალებს გამოფიტავს. ეს რომ ასე არ მოხდეს, აჯობებს, თუ პრიორიტეტებს დილითვე გაანაწილებთ და გადაწყვეტთ, რა საქმეში ღირს „რქებით მიწოლა“ და რაში – არა.

კირჩხიბი: მზად ხართ, გარშემომყოფებს თქვენი უპირატესობანი აჩვენოთ. ზოგჯერ ეს თავისდაუნებურად გამოგივათ, რადგან ბევრ საქმეს არაჩვეულებრივად გაართმევთ თავს. ხართ ენერგიული, მტკიცედ განწყობილი, გონებაგამჭრიახი და ამის წყალობით ყველაზე ჩახლართული საქმეების გადაწყვეტაც შეგიძლიათ. ამასთან, არ იქნებით ქედმაღალი და გარშემომყოფებს ზემოდან არ დაუწყებთ ყურებას. თუ ვინმეს თქვენი შეშურდება – ეს მისი პრობლემაა.

ლომი: დღეს უცნობ თანამოსაუბრეშიც კი სულიერად მონათესავე ადამიანის დანახვა შეგიძლიათ. ხართ გულწრფელი, პირდაპირი, გაქვთ ურთიერთობების სურვილი. ამასთან, ახლობლებისა და მეგობრების წრე ვიწრო მოგეჩვენებათ და ახალი კონტაქტების, ან ვინმეს უფრო ახლოს გაცნობის სურვილი გაგიჩნდებათ. გულითადი საუბარი შეიძლება ვინმე ბავშვთან, კოლეგასთან, ან, სულაც, შემთხვევით გამვლელთანაც კი გააბათ, და ეს საუბარი ბევრ რამეზე დაფიქრებას გაიძულებთ.

ქალწული: დღეს აჩქარება არ ივარგებს. ვარსკვლავები გაფრთხილებენ, რომ დაუფიქრებელი ნაბიჯებით, სპონტანურად რამის ყიდვის გადაწყვეტილებით ან საქმის სწრაფად გაკეთების სურვილით შეცდომები შეიძლება დაუშვათ. თუნდაც დარწმუნებული იყოთ საკუთარ გადაწყვეტილებები, მაინც ღირს, რომ კიდევ ერთხელ დაფიქრდეთ, ხოლო საუკეთესო იქნება, თუ ამ საქმეს საერთოდ გადადებთ შემდეგი დღეებისთვის. დღეს ვითარებამ თქვენ წინაშე, შესაძლოა, საბედისწერო საკითხები დააყენოს, ხოლო არასწორი პასუხის ფასი საკმაოდ დიდი იქნება.

სასწორი: დღეს რამე საკითხში თქვენი ძალის ჩვენება ნამდვილად არ გაწყენთ – ეს საჭირო შედეგს უზრუნველყოფს. ხართ საკუთარ თავში დარწმუნებული. მტკიცე და მშვიდი. ამის წყალობით ნებისმიერ მნიშვნელოვან საქმეში – სამსახურსაცა და სახლშიც შეგიძლიათ სიმტკიცე აჩვენოთ. პრინციპული პოზიციებითა და საკუთარი აზრის დაცვით ბევრ რამეს მიაღწევთ, ხოლო გარშემომყოფებს თქვენი მოსაზრებების გათვალისწინება და ნებსით თუ უნებლიეთ კომპრომისებზე წასვლა მოუწევთ.

მორიელი: დღეს უზარმაზარი ენერგია გაქვთ. შეგიძლიათ გააკეთოთ ისეთი რამ, რაც ადრე წარმოუდგენლად გეჩვენებოდათ. მიზნისკენ ნაბიჯის გადადგმა, რთული ამოცანის ამოხსნასთან მიახლოება ან ჩიხიდან გამოსავლის მოძებნა – ეს ყველაფერი თქვენთვის დღეს ძალიან ადვილია. შეიძლება მოგეჩვენოთ კიდეც, რომ გზაზე არანაირი ისეთი დაბრკოლება არ არის, რომელსაც ვერ გადალახავთ. და ეს ბევრ რამეში სიმართლეცაა.

მშვილდოსანი: დღეს მთელი ძალით მოგიწევთ დამალვა სხვა ადამიანების მცდელობებისგან, რომ თქვენს ცხოვრებაში უცერემონიოდ შემოიჭრან და თავი მოგაბეზრონ. განწყობა გაქვთ, რომ მშვიდად გააკეთოთ თქვენი საქმეები, მაგრამ გარშემომყოფები ხშირად არ გაცდიან: რაღაცას გთხოვენ, რაღაცას ითხოვენ თქვენგან, პრეტენზიებს გიყენებენ... დღის ბოლოს უზარმაზარი დაძაბულობა შეიძლება დაგიგროვდეთ და საკმარისი იქნება ერთი ნაპერწკალი, რომ მძლავრი აფეთქება მოხდეს.

თხის რქა: დღეს ძვირფას იდეებსა და აზრებს აფრქვევთ. გასაკვირი არაა, რომ მათი სწრაფად გაზიარება გინდათ სხვებისთვის. მაგრამ თუ ვერ მოახრეხებთ თქვენი აზრების „სამსჯავროზე“ გატანას, დიდად არ შეწუხდეთ. საკმარისი იქნება, თუ ერთ დაინტერესებულ და კარგ მსმენელს იპოვით და ასევე მყუდრო ადგილს, სადაც არავინ შეგიშლით ხელს. ეს დაგეხმარებათ, რომ თქვენი იდეა სრულყოთ და დაუმუშავებელი ალმასი ბრწყინვალე ბრილიანტად აქციოთ.

მერწყული: დღეს გარშემომყოფები გაგაღიზიანებენ. თუნდაც გზაზე არ გეღობებოდნენ და თქვენს მუშაობას არანაირად არ უშლიდნენ ხელს, შეიძლება მოგეჩვენოთ, რომ ირგვლივ მყოფები მხოლოდ თავიანთი არაორგანიზებული იერით გწყვეტენ მნიშვნელოვან საქმეებს. დიდ დროსა და ძალას დახარჯავთ იმაზე, რომ გარშემომყოფები „გონზე მოიყვანოთ“. ადამიანები კი იფიქრებენ, რომ არაფრის გამო ედავებით და მართალიც იქნებიან.

თევზები: დღეს გაქვთ შანსი, რომ რამე ახალსა და საინტერესოს წააწყდეთ, რაც მომავალში თქვენს ბედზე აისახება. ეს, შეიძლება, იყოს ადამიანი, ან ახალი ცოდნა, შთაბეჭდილება, გრძნობა... თქვენი განწყობაც იმგვარია, რომ ერთ ადგილზე გაჩერება არ გინდათ, მზად ხართ მოძრაობისა და სირბილისთვისაც კი, რომ თქვენს ბედს შეეგებოთ. თქვენი გულიცა და გონებაც გახსნილია იქნება, ხოლო ცნობისწადილი თამამი, რომელიც მოულოდნელი საქციელის ბიძგს მოგცემთ.

0