აშშ-ის სახელმწიფო მდივანი მაიკ პომპეო

რატომ ჩამოდის აშშ-ის სახელმწიფო მდივანი საქართველოში? მოლოდინი, იმედები და პროგნოზები

145
(განახლებულია 22:22 11.11.2020)
ომი ყარაბაღში, არჩევნები აშშ-ში და პოლიტიკური კრიზისი საქართველოში - ამ მნიშვნელოვანი მოვლენების ფონზე და კორონავირუსის პანდემიის მიუხედავად, აშშ-ის სახელმწიფო მდივანი მაიკ პომპეო საქართველოს ესტუმრება

ამერიკელი დიპლომატი საქართველოს დიდი ტურნეს ფარგლებში ეწვევა - მის უახლოეს დღის წესრიგში არის ვიზიტები ისეთ ქვეყნებში, როგორებიცაა საფრანგეთი, თურქეთი, ისრაელი, კატარი, არაბთა გაერთიანებული საამიროები, ასევე, საუდის არაბეთი. როგორც პომპეომ სახელმწიფო დეპარტამენტში გამართულ ბრიფინგზე განაცხადა, საუბრის თემა ყველა ქვეყანაში განსხვავებული იქნება.

პომპეოს საპროტესტო აქციებით შეხვდებიან? ოპოზიციის გეგმები და საგარეო უწყების პასუხი >>

პომპეოს ვიზიტი საქართველოში 17-18 ნოემბრისთვისაა დაგეგმილი. ცნობილია, რომ სახელმწიფო მდივანი შეხვედრებს გამართავს პრემიერ-მინისტრ გიორგი გახარიასთან და პრეზიდენტ სალომე ზურაბიშვილთან.

როგორი რეაქცია მოჰყვა საქართველოში დაგეგმილ შეხვედრას? ხელისუფლების მოლოდინი, ოპოზიციის იმედები და ექსპერტთა პროგნოზები - Sputnik-საქართველოს მასალაში.

ამბიციური გეგმები

პირველი განცხადება დაგეგმილ ვიზიტზე პრემიერ-მინისტრმა გიორგი გახარიამ Twitter-ის საკუთარ მიკრობლოგში გააკეთა. მან მოლაპარაკების მთავარი თემები ჩამოთვალა - ესაა სიტუაცია რეგიონში და საქართველო-აშშ-ის თანამშრომლობა სამხედრო სფეროში. მოგვიანებით გახარიამ განცხადება გააკეთა უწყებათაშორისი საკოორდინაციო საბჭოს სხდომაზე.

„ეს არ არის მხოლოდ ჩვენი სტრატეგიული პარტნიორი ქვეყნის სახელმწიფო მდივნის ვიზიტი, ეს არის საქართველოს მეგობრის ვიზიტი ჩვენს ქვეყანაში და ჩვენ ყველაფერს გავაკეთებთ, რათა ამ ვიზიტმა კიდევ უფრო გააღრმავოს დღეს ისედაც მაღალ ნიშნულზე მყოფი სტრატეგიული პარტნიორობა აშშ-სა და საქართველოს შორის, განსაკუთრებით, დღეს რეგიონისთვის იმ კრიტიკულად მნიშვნელოვანი მიმართულებებით, როგორიც არის, რა თქმა უნდა, სამხრეთ კავკასიაში მიმდინარე პროცესები, რაც ჩვენი ქვეყნის ყოველდღიურ ცხოვრებაზეც, უსაფრთხოებაზეც და მომავალზეც სერიოზულ ზეგავლენას იქონიებს“, – განაცხადა პრემიერ-მინისტრმა.

ამასთან ერთად, გახარიამ მინისტრთა კაბინეტის წევრებს მოუწოდა, ყურადღება მთლიანად ამ ვიზიტის მომზადებაზე გაამახვილონ.

პომპეოს ვიზიტს ბრიფინგი მიუძღვნა საქართველოს საგარეო საქმეთა მინისტრმა დავით ზალკანიანმაც, რომელმაც ამბიციურ გეგმებზე ისაუბრა.

 „თავდაცვა და უსაფრთხოება, ეკონომიკა, დემოკრატიული ინსტიტუტების გაძლიერება, ხალხთა შორის ურთიერთობის გაღრმავება - ეს არის ყველა ის ძირითადი საკითხი, რომლის მიმართულებით ჩვენ გვაქვს მნიშვნელოვანი, ხელშესახები შედეგები. ყველაფერი ეს აისახა ამერიკა-საქართველოს შორის სტრატეგიული პარტნიორობის 10 წლის იუბილესთან დაკავშირებულ ერთობლივ განცხადებაში, მაგრამ ჩვენ გვაქვს კიდევ უფრო მეტად ამბიციური გეგმები, რომ ეს სტრატეგიული პარტნიორობა, რომელიც უმაღლეს ნიშნულზეა, თვისობრივად ახალ დონეზე გადავიდეს. დარწმუნებული ვარ, ეს ვიზიტი ამ მხრივ იქნება მნიშვნელოვანი და კიდევ უფრო გააღრმავებს საქართველო-ამერიკას შორის ორმხრივ ურთიერთობას“, – განაცხადა ზალკალიანმა.

როგორც მან ხაზგასმით აღნიშნა, პომპეოს ვიზიტი კიდევ ერთხელ ადასტურებს, რომ საქართველო აშშ-ის მთავარი მოკავშირე და მნიშვნელოვანი საყრდენია რეგიონში.

„დარწმუნებული ვარ, რომ ეს ვიზიტი მნიშვნელოვნად შეუწყობს ხელს რეგიონში სტაბილურობას და საქართველოს სტაბილურ განვითარებას ყველა მიმართულებით, როგორც პოლიტიკური, ისე უსაფრთხოების, ასევე ეკონომიკური თვალსაზრისით“, - აღნიშნა ზალკანიანმა.

აშშ-ის სახელმწიფო მდივნოს დამდეგი ვიზიტი საქართველოში მმართველ პარტია „ქართულ ოცნებაშიც“ შეაფასეს. პარტიის წევრის, გიორგი ხელაშვილის თქმით, ვიზიტის მიზანი მოკავშირეებთან ურთიერთობის გაღრმავებაა.

„ბატონი პომპეოს ვიზიტის მიზანია მოკავშირეებთან ურთიერთობების გამყარება. თუ ვნახავთ მისი ტურნეს მიმდევრობას, ის ჩადის ყველაზე მეტად საიმედო მოკავშირე ქვეყნებში, მათ შორის, საქართველოში. ასევე, მნიშვნელოვანია ეს ვიზიტი კავკასიაში ბოლო დროს განვითარებული უსაფრთხოების გარკვეული მოვლენების პარალელურად“, - აღნიშნა ხელაშვილმა.

ოპოზიციას საკუთარი დღის წესრიგი აქვს

სახელმწიფო მდივნის ვიზიტი საქართველოში პოლიტიკური კრიზისის ფონზე წარიმართება - ოპოზიცია არ აღიარებს 31 ოქტომბრის საპარლამენტო არჩევნების შედეგებს და ახალ რიგგარეშე არჩევნებს ითხოვს. აშშ-ის დიპლომატიური მისია და ევროპელი დიპლომატები მხარეებს დიალოგისკენ მოუწოდებენ და შუამავლის როლის შესრულების მზადყოფნას გამოხატავენ.

გუშინ საქართველოს ყოფილმა პრეზიდენტმა მიხეილ სააკაშვილმა განაცხადა, რომ ხალხმა პომპეოს ვიზიტის დროს აქცია უნდა გამართოს.

„საქართველოში არჩევნები არის გაყალბებული, ამ გაყალბებულ არჩევნებს ქართველმა ხალხმა მასობრივი მობილიზაციით უნდა უპასუხოს. მათ შორის, თუ პომპეო ჩამოდის, იმ დღესაც უნდა იყოს ხალხის მასობრივი მობილიზაცია. მე ასე გავაკეთებდი, რათა მსოფლიომ დაინახოს, რომ ქართველი ერი დასაჩაგრი ერი არ არის... ქართველ ხალხს სიამაყე და ღირსების განცდა აქვს“, - განაცხადა სააკაშვილმა „მთავარი არხის“ ეთერში.

ამ იდეას მხარი დაუჭირა საქართველოს პარლამენტის ყოფილმა სპიკერმა, ოპოზიციური პარტია „ერთიანი საქართველოს“ ლიდერმა ნინო ბურჯანაძემ.

„მიმაჩნია, რომ მაიკ პომპეოს ჩამოსვლის დღეს უნდა ჩატარდეს აქცია, რომელშიც ძალიან ბევრი ადამიანი მიიღებს მონაწილეობას. რა თქმა უნდა, არა ხმაურიანი, არამედ მშვიდი აქცია, სადაც ქართველი ხალხი დაანახებს ამერიკელ სტუმარს თავის ნებას. აქცია უნდა მოეწყოს, რომ დავანახოთ ამერიკელ სტუმარს ქართველი ხალხის თავისუფალი არჩევნების მოპოვების განწყობა“, – აღნიშნა ბურჯანაძემ.

თავის მხრივ, ოპოზიციური პარტია „სტრატეგია აღმაშენებლის“ ლიდერმა გიორგი ვაშაძემ მსგავს ინიციატივას სისულელე უწოდა.

„არავინ აპირებს, რომ მაიკ პომპეოს აქციით დახვდეს, რა სისულელეა, შეიძლება, რაღაც სიმბოლური ღონისძიება გვქონდეს ჩვენი პოზიციის დაფიქსირების, რაც აბსოლუტურად ჯდება ყველა ფარგლებში. ჩვენი ამერიკელი პარტნიორების ნებისმიერი მხარდაჭერა ჩვენთვის ძალიან მნიშვნელოვანია“, – განაცხადა გიორგი ვაშაძემ.

„ერთიან ნაციონალურ მოძრაობაში“ იმედი გამოთქვეს, რომ ოპოზიციის წარმომადგენლებს პომპეოსთან შეხვედრის შესაძლებლობა მიეცემათ.

„ჯერჯერობით რაც წავიკითხე, შეხვედრები არის ხელისუფლებასთან, თუმცა, როდესაც ასეთი რანგის დიპლომატი ჩამოდის, ძალიან კარგად არის ინფორმირებული ქვეყანაში არსებულ ვითარებაზე, მათ შორის, ოპოზიციის პოზიციაზე, თუმცა, რა თქმა უნდა, უმჯობესი იქნება, თუ სახელმწიფო მდივანი უშუალოდ ოპოზიციისგან მოისმენს, რა ვითარებაა ქვეყანაში“, – განაცხადა „ენმ“-ის ერთ-ერთმა ლიდერმა ზაალ უდუმაშვილმა.

საქართველოში სახელმწიფო მდივნის დაგეგმილი ვიზიტი არ ნიშნავს ქვეყნის დღევანდელი ხელისუფლების მხარდაჭერას, დარწმუნებული არიან საპარლამენტო ოპოზიციურ პარტია „ევროპულ საქართველოში“.

„ბუნებრივია, ჩამოსვლის ერთ-ერთი მიზეზი არის ის პოლიტიკური კრიზისი, რომელიც ქვეყანაშია შექმნილი. ჩვენ სრულ კომუნიკაციაში ვართ სახელმწიფო დეპარტამენტთან, საელჩოსთან,  ამერიკელ პარტნიორებთან და ყველა ინფორმაციას ვაწვდით. აქედან გამომდინარე, სახელმწიფო მდივნის ვიზიტი, მათ შორის, მოიცავს იმ თემებსაც, რაც დღეს არის პრობლემატური და კრიზისული საქართველოში, ანუ გაყალბებული არჩევნები. ამიტომ, საუბარი იმაზე, რომ ეს არის ხელისუფლების მხარდაჭერა და გაყალბებული არჩევნების აღიარება, თუ ეგ კონვერტაცია აქვს ,,ქართული ოცნების” ლიდერების განცხადებებს, უბრალოდ ტყუილია. ეს არის ვიზიტი ქვეყანაში, რომელიც საინტერესოა ამერიკისთვის, რომელიც ამერიკის პარტნიორი ქვეყანაა“, – განაცხადა საქართველოს საგარეო საქმეთა მინისტრის ყოფილმა მოადგილემ და „ევროპული საქართველოს“ ერთ-ერთმა ლიდერმა სერგი კაპანაძემ.

ფორსმაჟორი რეგიონში და ყვითელი ბარათი ოპოზიციას

რატომ სწორედ ახლა გადაწყვიტა აშშ-ის სახელმწიფო მდივანმა მოულოდნელად საქართველოში ჩამოსვლა? პოლიტოლოგ არჩილ სიხარულიძის აზრით, დიპლომატს საამისოდ, სულ მცირე, ორი მიზეზი აქვს.

„ეს ვიზიტი, როგორც მესმის, არ იყო დაგეგმილი. ეს ფორსმაჟორი, პირველ რიგში, უკავშირდება იმას, რომ რუსეთმა გააძლიერა თავისი დომინირება სამხრეთ კავკასიაში - სწორედ ასე აღიქმება ეს დასავლეთში. და მკაფიო სიგნალი ჩვენი მთავრობისთვის, რომ ახლა სწორედ საქართველო რჩება ერთადერთ სახელმწიფოდ, რომელიც მკვეთრად პროდასავლურია. ეს ერთი. და მეორე - ჩვენს ქვეყანაში ყველას უნდა მიანიშნოს, რომ ახლა არეულობის დრო არ არის და ჩვენ გვჭირდება სტაბილურობა“, - განაცხადა სიხარულიძემ Sputnik-საქართველოსთვის მიცემულ ინტერვიუში.

პომპეო მკაფიოდ განუცხადებს პოლიტიკურ ოპოზიციას, რომ მათ არ გაქვთ მხარდაჭერა, მიიჩნევს პოლიტოლოგი.

„ვფიქრობ, როდესაც ცნობილი გახდა, რომ მშვიდობისმყოფელებს შეიყვანდნენ (რუსი მშვიდობისმყოფელები ყარაბაღში, - რედ.), ბატონმა პომპეომ სასწრაფოდ გადაწყვიტა საქართველოში ჩამოსვლა. პირველი გზავნილი იქნება, რომ საქართველო არის აშშ-ის ძალიან მნიშვნელოვანი პარტნიორი და ერთადერთი პროდასავლური სახელმწიფო რეგიონში და დაუშვებელია, რომ ამ ქვეყანაში არეულობა და გარჩევები იყოს. ამიტომ პომპეო სწორედ ამ გზავნილით ჩამოდის“, - აღნიშნა სიხარულიძემ.

პოლიტოლოგის აზრით, პომპეოს ვიზიტით ოპოზიციას მკაფიოდ მიუთითებენ, რომ მათ აქვთ ორი გამოსავალი: პირველი - შევიდნენ პარლამენტში, და მეორე - იდგნენ ქუჩაში ოთხი წელი.

„ახლა დასავლეთმა მათ აჩვენა ყვითელი ბარათი და უთხრა: ჩვენ განვაცხადეთ, რომ არჩევნები კანონიერი იყო. ამიტომ ოპოზიციას არ აქვს მხარდაჭერის შესაძლებლობა“, - აღნიშნა სიხარულიძემ.

საერთაშორისო საკითხებში ექსპერტ ვასო კაპანაძის აზრით, პომპეოს ვიზიტი ნოემბრის მეორე ნახევარში მნიშვნელოვანი ვიზიტი იქნება საქართველო-აშშ-ის ურთიერთობის შემდგომი განმტკიცებისთვის, ვინაიდან აშშ საქართველოს სტრატეგიული პარტნიორია.

„თუმცა, ვფიქრობ, რომ ეს ვიზიტი განპირობებულია იმ პროცესებით, რომლებიც ჩვენს რეგიონში, სამხრეთ კავკასიაში, მიმდინარეობს იმ კუთხით, რომ შეიცვალა სტატუს-კვო მთიან ყარაბაღში. ჩვენ ვიცით, რომ დაიწყო რუსეთის სამშვიდობო ძალების გადასროლა და ამით რუსეთი კიდევ უფრო მეტად განიმტკიცებს პოზიციებს სამხრეთ კავკასიაში. როგორც ჩანს, ეს პროცესი მაიკ პომპეოსა და საქართველოს ხელისუფლებას შორის საუბრის საგანი იქნება“, - განუცხადა კაპანაძემ Sputnik-საქართველოს.

თუმცა, ექსპერტის აზრით, პომპეოს ჩამოსვლა არავითარ როლს არ შეასრულებს არჩევნების მეორე ტურის ჩატარებაში, ვინაიდან ის არჩევნებამდე ოთხი დღით ადრე ჩამოდის.

„მაგრამ საუბარი ამას, რა თქმა უნდა, შეეხება - იმას, რომ მეორე ტური ექსცესების გარეშე ჩატარდეს. ბუნებრივია, საუბარი შეეხება ასევე ოპოზიციური პარტიების მონაწილეობა/არმონაწილეობას მეორე ტურში... ყოველ შემთხვევაში, ოპოზიციის წარმომადგენლებმა განაცხადეს, რომ სურთ ხმა მიაწვდინონ პომპეოს“, - განაცხადა კაპანაძემ.

ექსპერტის თქმით, საკმაოდ მწვავედ დგას საკითხი, რომ თუნდაც ერთმა ან მეტმა პარტიამ შეცვალოს პოზიცია და შევიდეს პარლამენტში, რათა არ დატოვოს „ქართული ოცნება“ მარტო.

„ეს საკითხი ღიად რჩება და ამ თემას აუცილებლად შეეხება საუბარი მაიკ პომპეოსთან შეხვედრაზე“, - აღნიშნა კაპანაძემ.

საქართველოსა და აშშ-ს შორის დიპლომატიური ურთიერთობა 1992 წლიდან დამყარდა და 2000-იანი წლების დასაწყისში გააქტიურდა. 2009 წელს ქვეყნებმა ხელი მოაწერეს სტრატეგიული პარტნიორობის ქარტიას, რომელიც ითვალისწინებს პარტნიორული კავშირების გაფართოებას და თანამშრომლობას თავდაცვისა და უსაფრთხოების, ეკონომიკისა და ენერგეტიკის, დემოკრატიული რეფორმების, დიპლომატიისა და კულტურის სფეროებში.

 

145
თემები:
საქართველოს საგარეო პოლიტიკა (302)
ევროპის მსოფლიო ჩემპიონატი, რომი - სტადიონი ოლიმპიკო

მონატრებული ევროპის ჩემპიონატი საფეხბურთო დღესასწაული რომიდან იწყება

54
(განახლებულია 14:30 11.06.2021)
კონტინენტის საუკეთესოს ტიტულისთვის ევროპის 11 სხვადასხვა ქალაქში ექვს ჯგუფში გადანაწილებული 24 საფეხბურთო ნაკრები იბრძოლებს.

ჩემპიონატის პირველი შეხვედრა და სანახაობრივი ფეხბურთის მოლოდინი

ევროპის ჩემპიონატის პირველი შეხვედრა 11 ივნისს, თბილისის დროით 23:00 საათზე თურქეთისა და იტალიის ნაკრებებს შორის გაიმართება. სავარაუდოა, რომ გულშემატკივარი ტურნირის სტარტზევე სანახაობრივ და ლაღ ფეხბურთს იხილავს. თურქეთის ნაკრები ბოლო პერიოდში უხვგოლიანი მატჩებით გამოირჩევა და მათი შეტევის ხაზი ფრანგული „ლილის“ გოლეადორ ბურაკ ილმაზის მეთაურობით ნებისმიერი ნაკრებისთვის სახიფათოა. უდიდესი ისტორიის მქონე იტალიის ნაკრებს რაც შეეხება, „სკუადრა აძურას“ ზედმეტი შექება ნამდვილად არ სჭირდება, იტალიელებს ნებისმიერ კონდიციაში და ნებისმიერ სათამაშო ფორმაში შეუძლიათ თამაშის მოგება.

იტალია და თურქეთი ერთმანეთს რომში „სტადიო ოლიმპიკოზე“ დაუპირისპირდებიან. აღსანიშნავია, რომ UEFA-მ იტალიის მთავრობას ნება დართო მატჩს მაყურებელთა 25% პროცენტი დაესწროს. “სტადიო ოლიმპიკოზე” 72.700 ადამიანი ეტევა, შესაბამისად, გახსნით შეხვედრაზე დასწრების უფლება 18.100 გულშემტკივარს ექნება.

ამ ორი გუნდის გარდა A ჯგუფში უელსი და შვეიცარია მოხვდნენ, რომელთა შეხვედრა 12 ივნისის 17:00 საათზე დაიწყება.

ე.წ. სიკვდილის ჯგუფი და იღბლიანი ესპანელები

როდესაც ევროპის ჩემპიონატზე ჯგუფებში მეტოქეთა ვინაობა გახდა ცნობილი, ყველაზე მეტად გულშემატკივრის ყურადღება ბოლო, F ჯგუფმა მიიპყრო, სადაც ნამდვილი საფეხბურთო „მონსტრები“ შეიკრიბნენ. გერმანია, საფრანგეთი, პორტუგალია და უნგრეთი – სწორედ ეს გუნდები შეეცდებიან გაიყონ მერვედფინალური ეტაპის საგზურები. უნგრელებს ჯგუფში რა ბედიც ელით, ეს ცალკე საკითხია, თუმცა ცხადია, რომ ისინი ნამდვილად დიდ საფეხბურთო გამოცდილებას შეიძენენ. რაც შეეხება გერმანიას, საფრანგეთსა და პორტუგალიას, ამ სამი ნაკრებიდან გადაჭრით აშკარა ფავორიტის დასახელება წინასწარ შეუძლებელია და ისღა დაგვრჩენია ტელეეკრანებთან ლამაზ სანახაობას დაველოდოთ.

ერთი შეხედვით მარტივი ჯგუფი შეხვდათ ესპანელებს, რომლებსაც წარმატების მისაღწევად შვედეთის, სლოვაკეთისა და პოლონეთის ბარიერის დაძლევა მოუწევთ. „ფურია როხას“ ბოლო დროს კარგი პერიოდი ნამდვილად არ უდგას. გუნდი, რომლის ცენტრალურ ზონასაც ერთ დროს ჩავი-ინიესტას ლეგენდარული დუეტი ამაგრებდა, ნახევარდაცვაში ახლა „მოხუცებული“ სერხიო ბუსკეტსისა და კოკეს იმედზეა. ესპანელებს არც შეტევის ხაზში აქვთ საქმე იდეალურად, სადაც მომენტების რეალიზებას ძირითადად ფერან ტორესი, ალვარო მორატა და დანი ოლმო შეეცდებიან. დაცვით ხაზსა და მეკარის პოზიციას რაც შეეხება, ამაზე პასუხს ალბათ ხვიჩა კვარაცხელია უკეთ გაგცემდათ.

პოლონელები, თავის მხრივ, ცხადია, რობერტ ლევანდოვსკის იმედზე იქნებიან. მასთან ერთად შეიძლება კრიშტოფ პიონტეკმაც თქვას თავისი სიტყვა და რამდენჯერმე გაისროლოს. რაც შეეხება შვედეთის ნაკრებს, მათ ევროპის ჩემპიონატამდე რამდენიმე კვირით ადრე დაბრუნებული ზლატან იბრაჰიმოვიჩი ტრავმის გამო გამოაკლდათ, რომელიც, მიუხედავად თავისი ასაკისა, საოცარ ფიზიკურ კონდიციაში იმყოფებოდა და გოლების გასატანადაც მზად იყო.

ქართული საფეხბურთო ოცნების დამანგრეველი, ანუ ჩრდილოეთ მაკედონია კონტინენტის პირველობაზე

ყველას კარგად გვახსოვს საქართველოსა და ჩრდილოეთ მაკედონიის დაპირისპირება ერთა ლიგის ფინალში, სადაც გამარჯვებულს ევროპის ჩემპიონატის საგზური უნდა მიეღო. და რამდენად სამწუხაროც არ უნდა იყოს, ახლა არა საქართველოს ნაკრებზე, არამედ ბალკანელებზე გვიწევს საუბარი.

ჩრდილოეთ მაკედონია C ჯგუფში ნიდერლანდის, უკრაინისა და ავსტრიის ნაკრებებთან ერთად იასპარეზებს. აღნიშნულ ჯგუფში ნათელია, თუ ვინ შეითავსებს ფავორიტის როლს, თუმცა გამოკვეთილ აუტსაიდერზე საუბარი ძალიან რთულია. ნიდერლანდის ნაკრები, რომლის შესაძლებლობებიც ჩვენმა ნაკრებმა რამდენიმე დღის წინ საკუთარ თავზე გამოსცადა, ჯგუფის უპირობო ლიდერია. დანარჩენ გუნდებს კი ალბათ ჯგუფის დაძლევის თანაბარი შანსები ექნებათ. თავისი საქმის ბოლომდე მიყვანას შეეცდება „მილანის“ ლეგენდარული ფორვარდი ანდრეი შევჩენკო, რომელიც მშობლიურ უკრაინის ნაკრებს რამდენიმე წელია უდგას სათავეში და საკმაოდ კარგი შედეგებითაც გამოირჩევა. შევჩენკო ბოლო დროს საკუთარ კარიერაზე ალაპარაკდა და დიდია იმის ალბათობა, რომ ის ევროპის ჩემპიონატის შემდეგ რომელიმე საფეხბურთო კლუბშიც ვიხილოთ. თავის მხრივ, კარგი და დაბალანსებული ნაკრებია ავსტრიაც, რომელმაც შესაძლოა პრაგმატული და ტაქტიკურად გამართული ფეხბურთის ხარჯზე მერვედფინალის საგზურიც მოიპოვოს. რაც შეეხება ჩრდილოეთ მაკედონიას, ბალკანელები ძირითადად ალიოსკის, ელმასისა და „ბებერი“ გორან პანდევის „ბოლო ამოსუნთქვის“ იმედად იქნებიან.

ბელგიის ნაკრები პირველ გამოცდას რუსეთთან ჩააბარებს. B ჯგუფი ფავორიტების ჯახით იწყება

ევროპის ჩემპიონატის B ჯგუფი დანიისა და ფინეთის ნაკრებების მატჩით 12 ივნისს, თბილისის დროით 20:00 საათზე აიღებს სტარტს, თუმცა მაყურებელი უფრო საინტერესო შეხვედრას მოგვიანებით იხილავს. ამავე დღეს, 23:00 საათზე ერთმანეთს ბელგიისა და რუსეთის გუნდები შეხვდებიან, სადაც გამარჯვებული მომდევნო ეტაპისკენ დიდ ნაბიჯს გადადგამს. ბელგიელები ბოლო დროს რობერტო მარტინეზის ხელში გახსნილ და დამანგრეველ ფეხბურთს თამაშობენ, რაც ბოლო სანაკრებო შეხვედრებშიც დაამტკიცეს. მიუხედავად არცთუ კარგი სტატისტიკისა, რუსეთის ნაკრების ჩამოწერაც უსამართლობა იქნება, რადგან ამ გუნდმა ბევრჯერ დაამტკიცა, რომ ნებისმიერი მოწინააღმდეგისთვის ანგარიშგასაწევი ძალაა. თავის მხრივ არც დანიის ნაკრები იქნება უსაქმოდ, სადაც ბოლო დროს ბევრმა გამოცდილმა ფეხბურთელმა მოიყარა თავი. დანიელები კარგი მოთამაშეების დეფიციტს პრაქტიკულად არც ერთ პოზიციაზე არ უჩივიან. დაცვის ბურჯი სიმონ კიაერი იქნება, ნახევარდაცვას გამოცდილი კრისტიან ერიქსენი გაამაგრებს, ხოლო მეტოქეთა კარის აღებაზე პოულსენი, ბრაიტვაითი და დოლბერგი იზრუნებენ. ფინელებს რაც შეეხება, ისინი ჯგუფში აუტსაიდერებად ითვლებიან და ქულების მოსაგროვებლად სამივე მატჩში თავის გადადება მოუწევთ.

ინგლისი და ხორვატია, ანუ D ჯგუფის ორი ფავორიტი ნაკრები

წილისყრის შედეგად ევროპის ჩემპიონატის D ჯგუფში ინგლისის, ხორვატიის, ჩეხეთისა და შოტლანდიის ნაკრებები მოხვდნენ. პირველი შეხვედრა 13 ივნისს ინგლისისა და ხორვატიის გუნდებს შორის გაიმართება, სადაც ჯგუფის ფავორიტები პირველი ქულების მოგროვებას შეეცდებიან. 14 ივნისს უკვე თავიანთ მატჩს ჩაატარებენ ჩეხეთისა და შოტლანდიის ნაკრებები.

ინგლისელებს ევროპის ჩემპიონატებზე კარგი მოგონებები არ უნდა აკავშირებდეთ, რადგან აღნიშნულ ტურნირზე მათი ერთადერთი წარმატება 1968 წლით თარიღდება. მაშინ ბრიტანელებმა მესამე ადგილის დაკავება შეძლეს და მას შემდეგ მათი საუკეთესო მიღწევა ნახევარფინალურ ეტაპზე თამაშია. აღსანიშნავია, რომ ინგლისის ნაკრები ყოველი ჩემპიონატის წინ უძლიერესი შემადგენლობით გვევლინება, თუმცა ეს შედეგებზე ნაკლებად ისახება. არც ახლაა ამ მხრივ გამონაკლისი – გუნდში ბევრი კარგი ფეხბურთელია თავმოყრილი. განსაკუთრებით გამოსარჩევია გამოცდილი თავდამსხმელი ჰარი კეინი, რომელსაც ტურნირის ბომბარდირობასაც კი უწინასწარმეტყველებენ. საინტერესოა, შეძლებს თუ არა ინგლისი ნავსის გატეხვას და ევროპის ჩემპიონატის წარმატებით დასრულებას. ხორვატებს რაც შეეხება, მათ თავიანთი ძალა 2018 წლის მსოფლიო ჩემპიონატზე გამოავლინეს, როდესაც სენსაციურად მუნდიალის ფინალურ ეტაპზე გააღწიეს. აღსანიშნავია, რომ მაშინ ნახევარფინალურ ეტაპზე ხორვატიის ნაკრებმა სწორედ ინგლისს აჯობა ანგარიშით 2:1.

ჩემპიონატის ფორმატი და ფინალი ლეგენდარულ „უემბლის“ სტადიონზე

ევროპის ჩემპიონატზე თითოეული ჯგუფიდან მერვედფინალურ ეტაპზე ორი საუკეთესო ნაკრები გავა. ჯგუფში თანაბარი ქულების დაგროვების შემთხვევაში უპირატესობა ურთიერთშეხვედრებს მიენიჭება. ამასთან, მერვედფინალური მატჩების დამატებით ოთხ საგზურს საუკეთესო მესამე ადგილოსნები გაიყოფენ, ამ შემთხვევაში კი უპირატესობა გუნდების შედეგიანობას მიენიჭება. მესამე ადგილოსან ნაკრებებს შორის გატანილი და გაშვებული გოლების რაოდენობა დაითვლება, შედეგად პირველ ეტაპზე 16 საუკეთესო ნაკრები გამოვლინდება.

რაც შეეხება ევროპის ჩემპიონატის მთავარ მოვლენას, ანუ ფინალურ მატჩს, ის ლონდონში „უემბლის“ სტადიონზე გაიმართება, რომელიც 90,000 ადამიანს იტევს და ამ მაჩვენებლით რიგით მეორე სტადიონია ევროპაში. ფინალურ შეხვედრას მაყურებელი აქაც შეზღუდული რაოდენობით დაესწრება.

ევროპის ჩემპიონატი 2020 წლის ზაფხულში უნდა გამართულიყო, თუმცა მსოფლიოში არსებული კორონავირუსის პანდემიის გამო ერთი წლით გადაიდო. კონტინენტის პირველობა 2021 წლის 11 ივნისს დაიწყება და 11 ივლისამდე გაგრძელდება.

 

54
ვლადიმირ პუტინი

„პუტინის წითელი ხაზი“ - ექსპერტები რუსეთის პრეზიდენტის „უკრაინულ“ ინტერვიუს აფასებენ

76
(განახლებულია 22:37 10.06.2021)
უკრაინა რუსეთის პრეზიდენტ ვლადიმირ პუტინის ინტერვიუს მთავრი თემა გახდა, რომელიც მან ნატოს სამიტისა და ჯო ბაიდენთან შეხვედრის წინ მისცა ტელეარხს

Sputnik. ნიკიტა ჩიკუნოვი, მარია ნაუმენკო

ექსპერტების აზრით, რუსეთის ლიდერმა კიევის ხელისუფლებისა და ნატოსთვის წითელი ხაზი შემოხაზა, რომლის გადაკვეთაც სერიოზულ შედეგებს გამოიწვევს არა მარტო პოლიტიკურ სფეროში.

გარდაუვალი საფრთხე

უკრაინის შესვლა ჩრდილოატლანტიკურ ალიანსში იქნება რუსეთის უსაფრთხოებისთვის პირდაპირ საფრთხე, „წითელი ხაზის“ გადაკვეთა. ეს მოსაზრება იყო ერთ-ერთი მთავარი, რომელიც ვლადიმირ პუტინმა Россия 1-თან ინტერვიუში გაახმოვანა.

რუსეთის ლიდერის თქმით, პოლონეთისა და რუმინეთის ნატოში შესვლა ამ ქვეყნებში ამერიკული რაკეტსაწინაარმდეგო თავდაცვის სისტემების განთავსებით დასრულდა, რომლებიც მოიერიშე კონპლექსებადაც შეიძლება გამოდგეს. ასეთ შემთხვევაში რაკეტები მოსკოვამდე 15 წუთში მიფრინდება. 

„წარმოვიდგინოთ, რომ უკრაინა ნატოს წევრი გახდეს. ხარკოვიდან, ვთქვათ, დნეპტოპეტროვსკამდე - რუსეთის ცენტრალურ ნაწილამდე, მოსკოვამდე მიფრენის დრო 7-10 წუთამდე შემცირდება. არის თუ არა ეს ჩვენთვის „წითელი ხაზი“, - რიტორიკულად იკითხა მან.

არანაირი გარანტია იმისა, რომ უკრაინა ალიანსში არ შევა, დღეისათვის არ არსებობს, აღნიშნა პუტინმა. მისი თქმით, ნატოს გაფართოების პროცესი არ არის დამოკიდებული რუსეთსა და დასავლეთს შორის ურთიერთობების გაცივებასა თუ დათბობაზე, რაც ტალღისებურად მიმდინარეობს 1999 წლიდან.

„ეს ხდებოდა მაშინაც, როცა არ იყო ყირიმი, არ იყო არანაირი მოვლენა უკრაინაში სახელმწიფო გადატრიალების შემდეგ. რუსეთსა და კოლექტიურ დასავლეთს, აშშ-ს შორის, იყო თანაბარი, აბსოლუტურად მისაღები, რომ არ ვთქვათ პარტნიორული. და მაინც, ყველა ჩვენი ეგრეთ წოდებული შეშფოთებები იგნორირებული იყო“, - ხაზი გაუსვა პრეზიდენტმა.

მისი თქმით, ნატოსა და უკრაინას უნდა ახსოვდეთ მოსკოვის რეაქციის შესახებ, რომელიც საკუთარ უსაფრთხოებას შესაბამისად აგებს.

ვლადიმირ პუტინმა ასევე კომენტარი გააკეთა თეთრი სახლის განცხადებაზე, რომ კიევმა არასწორად გაიგო აშშ-ის პრეზიდენტ ჯო ბაიდენის სიტყვები უკრაინის ალიანსში შესვლის იდეაზე მის ლიდერთან საუბრის დროს.

„რაზე საუბრობდნენ, რაზე შეთანხმდნენ? ჩვენ არ ვიცით. ეს შემოძახილი ოკეანის გაღმიდან უკრაინის პრეზიდენტის მიმართ, ჩემი აზრით, არაფერს არ ნიშნავს. მაგრამ ჩვენ ეს მხედველობაშ უნდა გვქონდეს. და, რა თქმა უნდა, შესაბამისად ავაგოთ ურთიერთობები უსაფრთხოების სფეროში ჩვენს პარტნირებთან“, - დაამატა რუსეთის ლიდერმა.

სამხედრო ექსპერტ ალექსეი ლეონკოვის აზრით, პუტინის სიტყვებმა უნდა „გამოაფხიზლოს“ დასავლეთი, ვინაიდან მათში ჩანს, როგორ ელევა რუსეთს მოთმინება.

„მოსკოვი უკვე აღარ დაკვირდება ჩუმად ნატოს წინ მოძრაობას. ეს დრო წავიდა. დათმობების პერიოდი დასრულდა, ვინაიდან უკან დასახევი გზა აღარ არის. წინააღმდეგ შემთხვევაში ყველაფერი ჩვენი სუვერენიტეტის დაკარგვით დამთავრდება. ახლა სიტუაცია უკვე წითელ ხაზამდე მივიდა. პუტინის სიტყვები რუსეტის უკანასკნელ გაფრთხილებად უნდა იყოს აღქმული“, - მიაჩნია ექსპერტს.

კიევის ნატოსკენ ბიძგება

ინტერვიუში პუტინმა აღიარა, რომ უკრაინის ჩრდილოატლანტიკურ ალიანსში შესვლის შესახებ საუბარი ფუჭ ხმებად არ მიაჩნია. ორგანიზაციის გაფართოების ალბათობა კიევის ხარჯზე ნამდვილად არსებობს, მიაჩნია დსთ-ს ქვეყნების ინსტიტუტის ხელმძღვანელის მოადგილე ვლადიმირ ჟარიხინს.

„მთავარი პრობლემა თავად ალიანსი კი არ არის, არამედ ის, რომ აშშ მარტო ცდილობს უკრაინის ნატოში ბიძგებას ისე, რომ მას უსაფრთხოების არანაირ გარანტიას არ აძლევს. ამ კუთხით კიევი ამერიკის საშიში პლაცდარმია, რაზეც საუბრობდა კიდეც ვლადიმირ პუტინი“, - განმატა მან.

უკრაინის ნატოში შესვლა გარდაუვლად შეიტანს დამატებით დაძაბულობას ალიანსისა და რუსეთის ურთიერთობებში. მაგრამ კონფრონტაციის გაძლიერება არ პასუხობს დასავლეთის ამჟამინდელ ინტერესებს, ამბობს ლეონკოვი.

„კიევი რუსეთთან ომის შესახებ საუბრობს. იმავდროულად ნატოში ვაშინგტონის შეთანხმება მოქმედებს, რომლის მეხუთე პუნქტიც საპასუხო მოქმედებებს ითვალისწინებს იმ სახელმწიფოს წინააღმდეგ, რომელიც ორგანიზაციის ერთ-ერთ წევრს ესხმის თავს. გამოდის, რომ უკრაინის ალიანსში შესვლის შემთხვევაში იძულებული იქნება შეუერთდეს ომს. მოვლენების ასეთი განვითარება არავის არ სურს“, - ირწმუნება სპეციალისტი.

ალიანსის უკრაინის ხარჯზე გაფართოებით გამოწვეული პოტენციური ზარალი მოგებებზდე მეტია, აღნიშნავს პოლიტანალიტიკოსი როსტისლავ იშჩენკო.

„უკრაინის ალიანსში მისაღებად უნდა დაემთხვეს სხვადასხვა და პრაქტიკულად შეუძლებელი მოვლენები. ამ იდეის მომხრეები, როგორც მინიმუმ, ერთდროულად უნდა მოვიდნენ ხელისუფლებებში აშშ-ში, საფრანგეთსა და გერმანიაში. მაშინ არსებობს შანსი, რომ შესვლა მოხდება“, - ამბობს იშჩენკო.

ამასთან პოლიტოლოგი მიუთითებს, რომ მიუხედავად გავრცელებული მოსაზრებისა, ვაშინგტონის შეთანხმებაში არ არის ნორმა, რომელიც ალიანსში იმ ქვეყნების შესვლას დაბლოკავდა, რომლებსაც მოუგვარებელი ტერიტორიული კონფლიქტები აქვთ. ამის მაგალითია ეგეოსის ზღვაში არსებული კუნძულები, რომელთა გამო რეგულარულად დავობენ ნატოში 1952 წელს გაწევრიანებული საბერძნეთი და თურქეთი. 

რუსული საზოგადოებების გეგმაზომიერი განადგურება

მეორე მნიშვნელოვანი თემა, რომელსაც რუსეთის პრეზიდენტი შეეხო, ეს რეზონანსული კანონპროექტია „უკრაინის მკვიდრი ხალხების“ შესახებ, რომელიც ვლადიმირ ზელენსკიმ მიმდინარე წლის მაისში შეიტანა რადაში.

დოკუმენტის თანახმად, მკვიდრ ხალხებს მიეკუთვნება ისეთი საზოგადოებები, რომლებსაც უკრაინის ფარგლებს გარეთ სახელმწიფოებრივი წარმონაქმნი არ გააჩნიათ. მაგალითად, ყირიმელი თათრები, ყარაიტები და კრიმჩაკები. რუსები, რომლებიც 2001 წლის აღწერის თანახმად, ქვეყნის მოსახლეობის 17,2%-ს შეადგენენ, ამ სიაში ვერ მოხვდებიან.

უკრაინელი კოლეგის ინიციატივის კომენტირებისას ვლადიმირ პუტინმა მას რუს ხალხზე მძლავრი დარტყმა უწოდა. მან აღნიშნა, რომ ქვეყნის მოქალაქეთა მსგავსად დაყოფა ნაცისტური გერმანიის პრაქტიკას ჰგავს. 

„არავინ არ მოისურვებს, იყოს მეორე ხარისხის ადამიანი, აღარაფერს ვამბობ დისკრიმინაციას ენისა და ნორმალური ცხოვრებისთვის საჭირო სხვა შემადგენლების მიხედვით, მაგრამ ეს იქამდე მიგვიყვანს, რომ ასობით ათასი ადამიანი, შესაძლოა მილიონებიც, იძულებული გახდებიან, წავიდნენ ან სხვაგვარად გადაეწერონ“, - ივარაუდა მან.

სხვათა შორის, უკრაინის სხვადასხვა სოციოლოგიურმა სტრუქტურებმა დამოუკიდებლობის წლებში მოსახლეობის იდენტიფიკაციის შეცვლა დააფიქსირეს „რუსიდან“ „უკრაინელზე“.

პოლიტიკური მიმომხილველის, ალექსანდრ ასაფოვის აზრით, ზელენსკის კანონპროექტი ბაზად იქცევა შემდგომი დოკუმენტების მისაღებად, რომლებიც რუსების უფლებებს შეზღუდავს უკრაინაში.

დარწმუნებული ვარ, ეს აქტები უკვე დაგეგმილია მისაღებად. რას შეეხება ისინი? უპირველესად, სახელმწიფო ხელისუფლების ორგანოებში მუშაობას. რუსებს იქ არ დაუშვებენ. უფრო მეტიც - დაიწყებენ ფუნდამენტურ უფლებებში შეზღუდვას. ამ კუთხით კიევს მასწავლებლად ბალტიისპირეთი ჰყავს, სადაც „უცხოების“ პასპორტები დაარიგეს. იქ სამართლებრივ სივრცეში ფაქტობრივად დადგენილია „მეორე ხარისხის“ ადამიანების სტატუსი, უკრაინაც ამ მიმართულებით მოძრაობს“, - ამბობს ექსპერტი.

ამასთან უკრაინის ზელისუფლება სრულებით არ უწევს ანგარიშს კანონპროექტის შედეგებს, დარწმუნებულია ასაფოვი: „ვაშინგტონის ეს მითითება დიდი გულმოდგინებით შესრულდება. ეს საკითხი, მოსკოვის გარდა, არავის არ აღელვებს, უკრაინის ხელისუფლება მთავარ ამოცანას ასრულებს - რუსეთთან ყველა კავშირს არღვევს, იქნება ეს ნათესაური, საქმიანი თუ ისტორიული“. 

კანონპროექტის მიღება დააჩქარებს რუსული საზოგადოების განადგურებას უკრაინაში, ვარაუდობს რუსეტის პრეზიდენტთან არსებული ეროვნებათშორისი ურთიერთობების საბჭოს წევრი ბოგდან ბეზპალკო.

„ავტომატურად ეს დოკუმენტი იმ მოქალაქეებს, რომლებიც თავს რუსებად აიდენტიფიცირებენ, არამკვიდრ ხალხად რაცხს. ეს ნიშნავს ნაკლებ უფლებებსა და მათი დაცვის ნაკლებ შესაძლებლობებს. არსობრივად სახელმწიფო ზურგს აქცევს ასეთ ადამიანებს. ყოველივე ეს დააჩქარებს რუსი ეთნოსის განადგურებას უკრაინაში. თანაც არა ეთნოსის, არამედ საზოგადოებისა. რუსებსა და უკრაინელებს შორის არანაირი ეთნიკური სხვაობა არ არსებობს - ისევე როგორც ანთროპოლოგიური, კულტურული თუ მენტალური. განსხვავება მხოლოდ პოლიტიკურია, უბრალოდ იდენტიფიკაციაშია, რომელიც ადამიანებს ჯერ კიდევ საბჭოეთის დროს მოახვიეს თავს“, - აღნიშნა მან.

ბეზპალკოს აზრით, ასეთი დისკრიმინაციული კანონები რუსულენოვან მოქალაქეებს აძულებს, დატოვონ ქვეყანა.

76
თემები:
რუსეთი დღეს
გოგონა პირბადით

COVID-19 რეგიონებში: სად დაფიქსირდა ინფიცირების ყველაზე მეტი შემთხვევა

0
(განახლებულია 12:43 13.06.2021)
საქართველოში ახალი კორონავირუსით დაავადებულთა რაოდენობა ბოლო დღე-ღამეში 522-ით გაიზარდა და ინფიცირებულთა საერთო რიცხვმა 353.965-ს. მიაღწია.

თბილისი, 13 ივნისი – Sputnik. საქართველოში ბოლო 24 საათში გამოვლენილი კორონავირუსის 522 შემთხვევიდან ყველაზე მეტი – 276 შემთხვევა დედაქალაქში დაფიქსირდა. ინფორმაციას საქართველოს მთავრობის ადმინისტრაცია ავრცელებს.

ინფიცირებულთა შემთხვევების რაოდენობით მეორე ადგილზე აჭარაა, შემდეგ კი იმერეთის რეგიონია.

რეგიონების მიხედვით კორონავირუსით ინფიცირების სტატისტიკა ასეთია:

აჭარა - 45, იმერეთი - 44, სამეგრელო - ზემო სვანეთი - 36, ქვემო ქართლი - 34, კახეთი - 32,  შიდა ქართლი - 25, მცხეთა-მთიანეთი - 16, სამცხე-ჯავახეთი - 10, გურია - 4, რაჭა-ლეჩხუმი და ქვემო სვანეთი - 0.

ბოლო 24 საათში ვირუსისგან გამოჯანმრთელდა 1.074 პირი, ხოლო ჯამში გამოჯანმრთელებულთა რაოდენობა 339.392-მდე. -მდე გაიზარდა.

ბოლო დღე-ღამის განმავლობაში გარდაიცვალა 14  ადამიანი და გარდაცვლილთა საერთო რაოდენობამ 5.048 მიაღწია.

ამ დროის მონაცემებით, საქართველოში 9.499 აქტიური შემთხვევაა. კოვიდ-კლინიკებში მოთავსებულია 3.155 პაციენტი, მათ შორის, თბილისში -  1.771, აჭარაში - 284, იმერეთში - 403.

688 პაციენტის მდგომარეობა მძიმეა. ხელოვნური სუნთქვის აპარატზე შეერთებულია 190 პირი, მათგან თბილისში - 118, აჭარაში - 13, იმერეთში - 13. კოვიდ-სასტუმროში მოთავსებულია  610 ადამიანი. მათ შორის 345 - თბილისში, 232- აჭარაში.  5.734 პირი ვირუსის მკურნალობის კურსს გადის საცხოვრებელ ბინაზე.

დღევანდელი მდგომარეობით, საკარანტინო სივრცეში მოთავსებულია 41 ადამიანი (ყველა მათგანი თბილისში).

ამ ეტაპისთვის თვითიზოლაციაში იმყოფება 13.198 ადამიანი, მათ შორის თბილისში - 5.377, პირი, აჭარაში - 1.621, იმერეთში - 1.054.

საქართველოში ახალი კორონავირუსით დაავადებულთა რაოდენობა ბოლო დღე-ღამეში 522-ით გაიზარდა და ინფიცირებულთა საერთო რიცხვმა 353.965-ს. მიაღწია.

საქართველოში კორონავირუსის პირველი შემთხვევა 2020 წლის 26 თებერვალს დაფიქსირდა.

0