მთავრობის ადმინისტრაციის შენობა

კოალიციური მთავრობა საქართველოში მითი თუ რეალობა?

1240
(განახლებულია 10:37 13.09.2020)
როგორია საქართველოში კოალიციური მთავრობის ჩამოყალიბების ალბათობა? ვინ ვისთან შეძლებს, გამონახოს საერთო ენა და რამდენად რეალურია არჩევნების შემდეგ მთავრობის ვერ ჩამოყალიბებისა და პოლიტიკური კრიზისის შექმნის საფრთხე?

სამსონ ხონელი

წინამდებარე სტატიით ბოლო დღეების ნაფიქრალს გაგიზიარებთ...

არ ვიცი, რატომ, მაგრამ ფაქტია, უცნაური კითხვა ამეკვიატა და თანაც ისე რომ, ერთხანს მოსვენება დავკარგე...

ასეთი რა ხდება? − ჩამეძიება მკითხველი. რეპლიკას უყურადღებოდ არც ამჯერად დავტოვებ... აქვე წინასწარ ვიტყვი, განსაკუთრებული არაფერია, ინტერესმა მძლია, ჩვენს დროებაში რომელია ყველაზე ხშირი სიტყვათა წყობა?..

პირველ რიგში გამახსენდა − დარჩით სახლში! შესაძლოა, ბრძანოთ, ეს მოწოდება გაზაფხულზე იყო და აქტუალური უკვე აღარ არის. აბა არა გითხრათ, არ ვიკამათებ, ერთს კი მივანიშნებ, მთავრობის წევრებისა და მედიკოსთა ტონი მკაცრი და კატეგორიული იყო, როცა COVID-19-ის ახალი შემთხვევების რაოდენობა ყოველდღიურად ათეულს იშვიათად სცდებოდა. ახლა კი, ეპიდემიოლოგიური სიტუაცია გაუარესდა, თუმცა არავინ გვირჩევს, შინ დავრჩეთ...

აკვიატებულ კითხვაზე პასუხის ძიებაში უამრავმა ვერსიამ გამიელვა, მათ შორის − ხშირად დაიბანეთ ხელები, მოერიდეთ საზოგადოებრივი თავშეყრის ადგილებს, დაიცავით დისტანცია, გამოიყენეთ პირბადე...

ეს რაც შეეხება რეკომენდაციებს. გარდა ამისა, სულ უფრო ხშირად გვესმის და ვკითხულობთ − პანდემია, მსოფლიო გამოწვევა, გლობალური კრიზისი, ეკონომიკური შოკი და ა.შ. ასეთია „სიტყვათა წყობის“ არასრული ჩამონათვალი კლასტერიდან, რომელსაც თამამად შეგვიძლია ვუწოდოთ COVID-19...

დარწმუნებული ვარ, არ გაგიკვირდებათ, არის სხვა მრავალი კლასტერიც. რა თქმა უნდა, მათ შორის პოლიტიკური... განსხვავებული შინაარსით და ფორმით, თუმცა არცთუ იშვიათად, მსგავსი შედეგით...

მერწმუნეთ, ლეტალურ დასასრულს არ ვგულისხმობ, აქ ინტოქსიკაციის ხარისხი მქონდა მხედველობაში. ეს რა შედარებაა? − ბრძანებს მკითხველი. მოკლე რეპლიკით შემოვიფარგლები − ფიგურალური. ახლა, ბევრი რომ აღარ გავაგრძელო, რამდენიმე ვერსიას ამ კლასტერიდან შემოგთავაზებთ...

ცვლილებების დროა!.. საკამათო არ არის, რომ არაფერია უფრო მარადიული, ვიდრე ცვალებადობა, თუმცა ეს სენტენციაც კითხვის ნიშნის ქვეშ დგება, როცა ცვლილებებისკენ ნახელისუფლარი მოგიწოდებს, თანაც ახალს არაფერს გთავაზობს და აშკარად ეტყობა, მხოლოდ რევანშის სურვილით არის შეპყრობილი... თუ მკითხავთ, სულ ეს არის? გეტყვით, რომ არა. ამავე კლასტერს განეკუთვნება − დავასრულოთ რეჟიმი, არჩევნებით გავისტუმროთ ოლიგარქი, ოპოზიცია შეთანხმდა თუ ვერ შეთანხმდა? მე თუ არ მოვიგე ე.ი. არჩევნები გაყალბდა, მიშა მოდის თუ არ მოდის? და ა.შ. ლექსიკური „მარგალიტების“ ცვენაა, თუმცა, ჩემეული შეფასებით, ვისთვის ყველაზე მკაფიოდ და ვისთვის ყველაზე ბუნდოვნად ტერმინი −კოალიციური მთავრობა ჟღერს. ის ქართულ პოლიტიკაში აქტუალური მიმდინარე წლის საკონსტიტუციო ცვლილებების შემდეგ გახდა... მომავალი საპარლამენტო არჩევნების მთავარი ინტრიგა სწორედ კოალიციური მთავრობის შესაძლო ფორმირებას უკავშირდება და რა გასაკვირია, მომდევნო სტრიქონები მინდა, ამ საკითხზე მსჯელობას დავუთმო.

პირველ რიგში განვმარტოთ, რომ კოალიციური მთავრობა იქმნება, როდესაც საპარლამენტო არჩევნების შედეგად ვერც ერთი პოლიტიკური პარტია თუ საარჩევნო სუბიექტი ვერ იღებს მთავრობის ერთპიროვნულად დაკომპლექტებისათვის საკმარისი მანდატების რაოდენობას. შეუძლებელი ხდება ერთპარტიული მთავრობის ფორმირება. მოსალოდნელი პოლიტიკური კრიზისის თავიდან ასაცილებლად, ორი ან მეტი პარტია ქმნის საპარლამენტო უმრავლესობას და მთავრობას აყალიბებს. მინისტრები სხვადასხვა პარტიის წარმომადგენლები არიან.

როგორია საქართველოში კოალიციური მთავრობის ჩამოყალიბების ალბათობა?

ამ საკითხზე პოლიტიკოსებში აზრთა სხვადასხვაობაა. „ქართული ოცნება“ დარწმუნებულია, არჩევნებში დამაჯერებლად გაიმარჯვებს და მთავრობასაც ერთპიროვნულად დააკომპლექტებს. თავის მხრივ მმართველი პარტიის ოპონენტები აცხადებენ, რომ არჩევნების შედეგად, კოალიციური მთავრობის ფორმირება გარდაუვალი აუცილებლობა იქნება, რასაც ოპოზიციური პარტიების მანდატების ჯამური რაოდენობა უზრუნველყოფს... ანალოგიურია ექსოერტ-ანალიტიკოსთა და პოლიტოლოგთა პოზიციებიც... როგორ განვითარდება მოვლენები? ამას დრო გვიჩვენებს, ჩვენ კი შეგვიძლია, კარსმომდგარი საპარლამენტო არჩევნების შედეგები ვივარაუდოთ და ეს მსჯელობა ფინჯან ყავაზე მკითხაობას რომ არ დაემსგავსოს, სასურველია, ბოლო პერიოდში ჩატარებული საზოგადოებრივი აზრის კვლევის შედეგები მოვიშველიოთ.

ვიცი, საკითხავია, რომელი ერთი? ისიც ვიცი, ვერ შევჯერდებით. მიუხედავად იმისა, ვინ, როგორ ვენდობით საერთაშორისო რესპუბლიკური ინსტიტუტის მონაცემებს, გთავაზობთ, სწორედ IRI-ის მიერ აგვისტოში გამოქვეყნებული პოლიტიკური პარტიების რეიტინგით ვიხელმძღვანელოთ... მაშ ასე, კვლევის მიხედვით, „ქართულ ოცნებას“ მოსახლეობის 33 პროცენტის მხარდაჭერა აქვს. „ერთიანი ნაციონალური მოძრაობა“ 16 პროცენტით მეორე პოზიციაზეა, ხოლო „ევროპული საქართველო“ 5 პროცენტით მესამე ადგილზეა. ელექტორატის 3-3 პროცენტის მხარდაჭერით სარგებლობს „პატრიოტთა ალიანსი“ და „სტრატეგია აღმაშენებელი“. კიდევ უფრო ნაკლებია, 2-2 პროცენტის ფარგლებშია სხვა პარტიების ელექტორალური რესურსი. მათ შორის არის: „ლეიბორისტული პარტია“, „სამოქალაქო მოძრაობა“, „ლელო“ და „გირჩი“... „დემოკრატიულ საქართველოს“ მხარს უჭერს მოსახლეობის 1 პროცენტი.

თუ ამ მონაცემებს დავეყრდნობით, ადვილად დავასკვნით, რომ მთავრობის ერთპიროვნულად ფორმირებას ამ პარტიებიდან ვერცერთი შეძლებს. მმართველ პარტიას საამისოდ კიდევ 8 პროცენტი ჭირდება. „ქართული ოცნების“ ალიანსი მიხეილ სააკაშვილის მოქმედ და ყოფილ პოლიტპარტნიორებთან, ძალიან მაღალი ალბათობით, წარმოუდგენელია... მეტიც, ოპოზიციურ ფლანგზე პრაქტიკულად არ არის ძალა, რომელთანაც ბიძინა ივანიშვილის გუნდი მთავრობის ჩამოყალიბების საკითხზე ითანამშრომლებს. კიდევ ერთი დასკვნა − ვერც რამდენიმე ნაწილად დაშლილი ე.წ. „ნაცების“ რევანში შედგება. მიზეზი მსოფლმხედველობრივი განსხვავება როდია. არითმეტიკა ზუსტი მეცნიერებაა და საკმარისია, მათი ელექტორალური რესურსი დავაჯამოთ, დავრწმუნდებით, რომ საზოგადოების ნახევარზე მეტს ოპოზიციის ხელისუფლებაში, თუნდაც კოალიციურად მოსვლა კატეგორიულად მიუღებლად მიაჩნია. რატომ? სავარაუდოდ, ყველა შემთხვევაში, როგორც არ უნდა ცდილობდეს, „ევროპული საქართველო“ და „ნაციონალური მოძრაობა“ წარმოაჩინოს, რომ ეს ორი პოლიტიკური გუნდი ერთმანეთთან დაპირისპირებულები არიან, ეს არის „ნაციონალური მოძრაობის“ ლიდერობით ჩამოყალიბებული ოპოზიციური ფლანგი. შესაბამისად, ყველა შემთხვევაში, ოპოზიციის გამარჯვება გულისხმობს საქართველოში და ხელისუფლებაშიც მიხეილ სააკაშვილის დაბრუნებას... ასე რომ, ნახელისუფლართ „მეორე მოსვლამდე“ ბევრი უკლიათ...

კიდევ ერთი დასკვნა − კონკურენტუნარიანი მესამე პოლიტიკური ცენტრი ვერ ჩამოყალიბდა. საარჩევნო სუბიექტთაგან ვერავინ ფლობს ე.წ. „ოქროს პაკეტს“, რაც მთავრობის ფორმირების პროცესში შესაძლოა გადამწყვეტი აღმოჩნდეს. ორპოლუსიან პოლიტიკურ ველზე „ქართული ოცნება“ საარჩევნო მარათონის გამოკვეთილი ლიდერია... თუმცა, იმგვარი კონფიგურაციის პირობებში, რომელსაც IRI კვლევაში წარმოაჩენს არსებობს მთავრობის ვერ ჩამოყალიბებისა და პოლიტიკური კრიზისის წარმოქმნის ალბათობა. ეს საფრთხეს უქმნის სტაბილურობას და რისკებსაც შეიცავს. არ გამიკვირდება, მოსალოდნელი არასტაბილურობის თავიდან აცილება არჩევანის მთავარი განმსაზღვრელი ფაქტორი გახდეს... ასეთ შემთხვევაში კი, მიუხედავად იმისა, რომ IRI-ის კვლევის მიხედვით, მოსახლეობის 73 პროცენტი კოალიციურ მთავრობას ემხრობა, მაღალი ალბათობით „ქართული ოცნება“ არჩევნებსაც მოიგებს და აღმასრულებელ ხელისუფლებასაც ერთპიროვნულად დააკომპლექტებს... რატომ? ადამიანის ბუნებაა ასეთი. ცვლილებას, რომელსაც შესაძლოა არასტაბილურობა მოჰყვეს, ის უბრალოდ უარს ეუბნება...

 

1240
ცარიელი ადგილები პარლამენტში

ეყოლება თუ არა საქართველოს სრულფასოვანი პარლამენტი: მორიგი რაუნდის მოლოდინში

26
ოპოზიცია და „ქართული ოცნება“ პოლიტიკური კრიზისის აღმოსაფხვრელად მოლაპარაკებათა მორიგი რაუნდისთვის ემზადებიან და პირობებს აყენებენ

მმართველ პარტია „ქართული ოცნება - დემოკრატიულ საქართველოს“ და ოპოზიციას შორის გაჭიანურებული პოლიტიკური კრიზისის გადასაჭრელად მოლაპარაკებათა მორიგი რაუნდი იგეგმება.

დღეისათვის, მიუხედავად იმისა, რომ ოპოზიციას არჩევნების შედეგების მიხედვით 150-დან 60 ადგილის დაკავება შეეძლო, პარლამენტის მუშაობაში მონაწილეობას იღებს მხოლოდ 4 ოპოზიციონერი დეპუტატი. თეორიულად მათ შეიძლება შეუერთდეს მაქსიმუმ 5 ადამიანი - სამი „ახალი პოლიტიკური ცენტრი - გირჩიდან“ და ორი - „მოქალაქეებიდან“.

თუმცა ეს ვერ გადაუჭრის პრობლემებს საკანონდებლო ორგანოს, რომელსაც ოპოზიციის პროტესტისა და ხმების უკმარისობის გამო სრულფასოვნად მუშაობა და ისეთი მნიშვნელოვანი გადაწყვეტილებების მიღება არ შეუძლია, როგორიცაა კონსტიტუციის, საკონსტიტუციო კანონების და „მიწის შესახებ“ კანონის შეცვლა.

ჯერჯერობით კრიზისიდან გამოსვლის ძირითად შესაძლებლობას წარმოადგენს მონაწილეობა მოლაპარაკებებში, რომლებიც ევროკავშირისა და აშშ-ის ელჩების პატრონაჟით მიმდინარეობს.

რა თემაზე იქნება საუბარი

ვადამდელი არჩევნები - ერთადერთი თემაა, რომელზეც სასაუბროდ არიან მზად ოპოზიციური პარტიები.

„მზად ვართ, რომ „ქართულ ოცნებასთან“ გავაგრძელოთ მოლაპარაკებები, იმ მოთხოვნებთან მიმართებაში, რომელიც ოპოზიციამ ერთიანად წარუდგინა ხელისუფლებას. მოსალაპარაკებელი და საკონსულტაციო არაფერი არ არის, ჩვენ გვაქვს ძალიან მკაფიოდ განსაზღვრული დღის წესრიგი, რომლის ნაწილიც არის ყველა ოპოზიციური პარტია“, - განაცხადა პარტია „ლელოს“ წარმომადგენელმა საბა ბუაძემ.

ამასთან, „ერთიანი ნაციონალური მოძრაობის“ ერთ-ერთმა ლიდერმა ლევან ბეჟაშვილმა აღნიშნა, რომ ოპოზიციას იმედი აქვს, რომ არჩევნებთან დაკავშირებით პლებისციტი დაინიშნება.

„საზოგადოებამ უნდა იცოდეს, რომ ეს მოლაპარაკების პროცესი არ არის პოლიტიკური ვაჭრობა ან ტოტალიზატორი. საპირწონედ დგას ამ ქვეყნის დემოკრატიული განვითარების ღირებულებები. გამოსავალი აქ არის მხოლოდ და მხოლოდ ერთი, რომ ხალხს ვკითხოთ და ხალხმა გადაწყვიტოს, ვინ არის დღეს ხელისუფლების ღირსი და ვინ არის დღეს ის ძალა, რომელიც ქვეყანას ამ ეკონომიკურ-სოციალური კრიზისიდან გამოიყვანს“, – განაცხადა ბეჟაშვილმა.

თუმცა ვადამდელი საპარლამენტო არჩევნების გარდა, ოპოზიციას მოლაპარაკებებში კიდევ ერთი თემა ექნება - ცვლილებები საარჩევნო სისტემაში.

მმართველი პარტია მზად არის დააჩქაროს საარჩევნო პროცესის დამოუკიდებლობის პროგრესი და უკვე 2022 წელს ადგილობრივი თვითმმართველობის ორგანოების არჩევნები ელექტრონული კენჭისყრით და უბნებზე თითის ანაბეჭდის შემოწმების გამოყენებით ჩაატაროს.

თუმცა ახალი რაუნდის თარიღი ჯერ უცნობია და თავად ოპოზიციაში უთანხმოება შეინიშნება.

ოპოზიციის წყალქვეშა ქვები

დღეისათვის ოპოზიცური პარტიების უმრავლესობას საარჩევნო სიები გაუუქმეს, ხოლო სადეპუტატო  მანდატებზე უარის თქმის შესახებ განაცხადები უკვე საპროცედურო საკითხთა და წესების კომიტეტს გადაეცა. ამ დეპუტატების ჩანაცვლება ვერ მოხერხდება.

მეტიც, პარლამენტში მოხვედრილმა „პატრიოტთა ალიანსმა“ უკვე დაკარგა ადგილები საკანონდებლო ორგანოში - მათი განაცხადი დაკმაყოფილებულია, მაგრამ ადგილები დაიკავეს ყველასათვის უცნობმა ადამიანებმა პარტიული სიიდან, რომლებმაც საკუთარი პარტია „ევროპელი სოციალისტები“ დააარსეს. ახლა ისინი „ქართულ ოცნებასთან“ ერთად მუშაობენ.

რაც შეეხება „გირჩსა“ და „მოქალაქეებს“, ისინი პარლამენტში სხვა პარტიების გარეშე მუშაობაზე უარს აცხადებენ. თუმცა მანდატებზე უარის მთქმელ სხვა ოპოზიციონერებს მათი არ სჯერათ.

„ძალიან სევდიანი ისტორიაა, დავიღალეთ უკვე. შევიდნენ, თუ შესვლა უნდათ. დახვდება იქ კობახიძე, მათი მეგობარი. იმათაც გაუხარდებათ, ჩვენც დავისვენებთ“, - განაცხადა „ლეიბორისტული პარტიის“ ერთ-ერთმა ლიდერმა გიორგი გუგავამ „მოქალაქეებისა“ და „გირჩის“ სურვილის კომენტირებისას, პარლამენტში დანარჩენი ოპოზიცია „დაპატიჟოს“.

ამასთან, მმართველ პარტიაში მოლაპარაკების პროცესის სრულ მხარდაჭერაზე განაცხადეს.

„რაც შეეხება მეხუთე რაუნდის შესაძლო შედეგებს, ეს მთლიანად დამოკიდებულია იმაზე, თუ როგორ აფასებს ოპოზიცია სტატუს კვოს. ხედავთ, რომ სტატუს კვო ნამდვილად არის შეცვლილი, პარლამენტში უკვე პირველი ოპოზიციური პარტია შემოსულია და საქმიანობს. ასევე, ოპოზიციის ჯანსაღ ნაწილში არაერთი გამოთქვამს წუხილს იმასთან დაკავშირებით, რომ ბოიკოტი არის არასწორი გადაწყვეტილება... ვფიქრობ, მეხუთე რაუნდამდე ამას არაერთი ოპოზიციური ლიდერი მეტად გააცნობიერებს. ჩვენ მზად ვართ, იმ სამართლიანი წინადადებების განსახილველად დავბრუნდეთ მოლაპარაკების მაგიდასთან, რაც ეხება პირველ რიგში, მათი პრეტენზიების გადამოწმებას“, - განაცხადა პარლამენტის თავმჯდომარე არჩილ თალაკვაძემ.

ამგვარად, არჩევნებიდან ორთვენახევრის შემდეგ და პარლამენტის პირველი სხდომიდან ერთ თვეში კვლავ ღიად რჩება საკითხი - რამდენი დეპუტატი იქნება პარლამენტში. ის უფრო აქტუალური გახდება თებერვალში, როდესაც პარლამენტი საგაზაფხულო სესიაზე შეიკრიბება და ოპოზიციონერი დეპუტატების მიერ მანდატების დატოვების შესახებ განაცხადების განხილვას ვეღარ გააჭიანურებს.

26
„ქართული ოცნების“ ყრილობა

„ქართული ოცნება“ ივანიშვილის გარეშე: ახალი პოლიტსაბჭო და ყრილობა აქციის ფონზე

69
(განახლებულია 20:36 16.01.2021)
ამჟამად პარტიას უხელმძღვანელებს კობახიძე, მაგრამ მისი მართვა მოუწევს ყველაზე საიმედო დასაყრდენის - ბოლო 10 წლის მთავარი პოლიტიკური ფიგურის, ბიძინა ივანიშვილის გარეშე.

მმართველმა პარტიამ „ქართული ოცნება - დემოკრატიულმა საქართველომ“ შაბათს გამართა პირველი ყრილობა თავისი დამფუძნებლის - მილიარდერ ბიძინა ივანიშვილის გარეშე და ახალი თავმჯდომარე და პოლიტსაბჭო აირჩია.

პარტიის თავმჯდომარე გახდა ირაკლი კობახიძე, რომელის პარტიის დაარსებიდან მისი აღმასრულებელი მდივნის პოსტს იკავებდა და ასევე ყველა არჩევნებზე პარტიის საარჩევნო შტაბს ხელმძღვანელობდა.

კობახიძის პერსონა არაერთხელ გამხდარა ოპოზიციის კრიტიკის ობიექტი. 2016-2019 წლებში ის პარლამენტის თავმჯდომარის პოსტს იკავებდა და 2019 წლის ივნისში მართლმადიდებლობის საპარლამენტთაშორისო ასამბლეის ირგვლივ სკანდალის გამო სწორედ მისი გადადგომის მოთხოვნით ქვეყანაში დაიწყო პოლიტიკური კრიზისი, რომელიც უკვე წელიწადნახევარი გრძელდება.

თუმცა კობახიძემ შემდგომში დატოვა პარლამენტის თავმჯდომარის პოსტი, კრიზისი გაგრძელდა. ის თავად გახდა ოპოზიციის მოქმედებების მთავარი კრიტიკოსი და ხშირად გამოთქმების არ ერიდებოდა.

ამჟამად კობახიძე უხელმძღვანელებს პარტიას, მაგრამ მისი მართვა მოუწევს ყველაზე საიმედო მხარდაჭერის - ბოლო 10 წლის მთავარი პოლიტიკური ფიგურის, ბიძინა ივანიშვილის გარეშე.

ის არამხოლოდ პოლიტიკიდან წავიდა, მან პირობა დადო, რომ აღარ დაეხმარება პარტიას და მის ლიდერებს კონსულტაციებით და წინასაარჩევნო მხარდაჭერით საჯარო გამოსვლებში.

ახალმა თავმჯდომარემ უკვე აღიარა ჟურნალისტებთან, რომ პარტიის დამფუძნებლის გარეშე რთული იქნება.

„გამოწვევა არის სერიოზული, როდესაც ასეთი რესურსის მქონე პარტიის თავმჯდომარე ტოვებს პოლიტიკას და ტოვებს პოლიტიკურ გუნდს. მაგრამ ჩვენ გუნდის ერთიანობით ვუპასუხებთ აბსოლუტურად ყველა გამოწვევას“, – განაცხადა ირაკლი კობახიძემ.

„ქართული ოცნების“ ახალი გუნდი

ივანიშვილის წასვლასთან ერთად  პარტიის პოლიტსაბჭოს შემადგენლობაც შეიცვალა. ახლა ის აღმასრულებელი და საკანონმდებლო ხელისუფლების სიმბიოზს წარმოადგენს. ამასთან, 12-ის ნაცვლად, მასში ახლა 20 ადამიანია.

აღმასრულებელი ხელისუფლებიდან პოლიტიკურ საბჭოში აღმოჩნდნენ პრემიერ-მინისტრი გიორგი გახარია, რეგიონული განვითარების მინისტრი მაია ცქიტიშვილი, თავდაცვის მინისტრი ირაკლი ღარიბაშვილი, შინაგან საქმეთა მინისტრი ვახტანგ გომელაური, ჯანდაცვის მინისტრი ეკატერინა ტიკარაძე და ფინანსთა მინისტრი ივანე მაჭავარიანი. პოლიტსაბჭოში ასევე არიან თბილისის მერი კახა კალაძე და აჭარის ხელმძღვანელი თორნიკე რიჟვაძე.

რაც შეეხება საკანონმდებლო ორგანოს წარმომადგენლებს, პოლიტსაბჭოში შევიდნენ პარლამენტის თავმჯდომარე არჩილ თალაკვაძე და დეპუტატები თეა წულუკიანი, გია ვოლსკი, მამუკა მდინარაძე, კახა კუჭავა, მაკა ბოჭორიშვილი, შალვა პაპუაშვილი, ნიკოლოზ და დიმიტრი სამხარაძეები და სოზარ სუბარი.

„სხვადასხვა კრიტერიუმი იყო გამოყენებული, პირველ რიგში, პარტიის ხელმძღვანელი თანამდებობის პირები ბუნებრივია, წარმოდგენილი არიან პარტიის პოლიტსაბჭოში. ასევე, მნიშვნელოვანი იყო ბალანსი, მთავრობასა და პარლამენტს შორის“, - განაცხადა კობახიძემ.

ყრილობის მოულოდნელი სიურპრიზი

ყრილობას მოულოდნელობის გარეშე არ ჩაუვლია. „ქართულ ოცნებაში“ გაჩნდა პარტიის თავმჯდომარის მოადგილის თანამდებობა და ის საზოგადოებრივი მაუწყებლის ყოფილმა ხელმძღვანელმა ვასილ მაღლაფერიძემ დაიკავა.

ოპოზიცია მას ივანიშვილთან დაახლოებულ პირად მიიჩნევს. როდესაც მილიარდერმა პოლიტიკაში მოსვლის შემდეგ საკუთარი ტელეკომპანია GDS-ი დააარსა, მისი საინფორმაციო ნაწილის ხელმძღვანელობა სწორედ მაღლაფერიძეს ანდეს.

„ძალიან საინტერესო გუნდია და შეძლებს ამ გამოწვევებს უპასუხოს ღირსეულად. „ქართულმა ოცნებამ“ უნდა შეძლოს და შეასრულოს ფლაგმანის როლი ქართულ პოლიტიკაში. თავმჯდომარის მოადგილის პირველი ფუნქციაა თავმჯდომარისთვის ხელის შეწყობა, პარტიის მუშაობის ორგანიზება, სტრუქტურების გაძლიერება, საზოგადოებასთან ურთიერთობა და ასე შემდეგ“,– განაცხადა ვასილ მაღლაფერიძემ.

ყრილობა აქციის ფონზე

ყრილობა ინციდენტების ფონზე გაიმართა. EXPO GEORGIA-ს საგამოფენო კომპლექსთან, სადაც ყრილობა იმართებოდა, პარტიის ყველა წარმომადგენელი ყრილობაზე სამოქალაქო აქტივისტების აქციის გავლით შევიდა.

აქტივისტები ამტკიცებდნენ, რომ საპარლამენტო არჩევნები, რომელთა შედეგად „ქართულმა ოცნებამ“ ძალაუფლების მესამედ შენარჩუნება შეძლო, გაყალბებულია.

მათ რამდენჯერმე სცადეს გზის გადაკეტვა და კომპლექსის ტერიტორიაზე შესვლა, თუმცა აქტივისტებს ხელი შეუშალა პოლიციამ, რომელიც ყველა შესასვლელს იცავდა.

აქციაზე პოლიციელებთან შეხლა-შემოხლის შედეგად, დაკავებულია ცხრა ადამიანი. მოგვიანებით ისინი ხელწერილის საფუძველზე გაათავისუფლეს.

69

უინტერესო, მაგრამ პოპულარული: ყველაზე პირველი ვიდეო YouTube-ზე

0
(განახლებულია 17:43 17.01.2021)
გაინტერესებთ, როგორ და რით დაიწყო "იუთუბის" არსებობის ისტორია? მაშინ ეს ვიდეო უნდა ნახოთ, იმიტომ რომ ის პირველია, რომელიც ვიდეოჰოსტინგზე აიტვირთა

დღეს ძალიან, ძალიან პოპულარული ვიდეოჰოსტინგი 2005 წლის თებერვალში შექმნა PayPal-ის სამმა ყოფილმა თანამშრომელმა. იმავე წლის 23 აპრილს კი მასზე აიტვირთა ვიდეო, რომელიც ზოოპარკში, სპილოს ვოლიერის წინაა გადაღებული.

დღევანდელილ გადასახედიდან, ეს კადრები ფრიად უცნაურად (რომ არ ვთქვათ, უინტერესოდ) გამოიყურება. მაგრამ 142 085 121 ნახვა აქვს, იმიტომ რომ ისტორიულია!

0