სატვირთო ავტომობილები

საქართველოს საგარეო ბრუნვა: როდის შესუსტდება კორონავირუსის გავლენა

169
(განახლებულია 16:19 21.07.2020)
იანვარი–ივნისში 1,5 მილიარდ დოლარზე მეტი თანხის ქართული პროდუქცია გაიტანეს, რაც გასული წლის ამავე პერიოდთან შედარებით 16%-ით ნაკლებია.

თბილისი, 21 ივლისი — Sputnik. კორონავირუსის ეპიდაფეთქება საქართველოს ეკონომიკას კვლავ სერიოზულად აზიანებს – ქვეყნის საგარეო სავაჭრო ბრუნვა 2020 წლის პირველ ნახევარში 18,2%-ით შემცირდა 2019 წლის იმავე პერიოდთან შედარებით და დაახლოებით 5,1 მილიარდი დოლარი შეადგინა (არაორგანიზებული ვაჭრობის გაუთვალისწინებლად), აღნიშნულია საქართველოს სტატისტიკის ეროვნული სამსახურის „საქსტატის" მასალებში.

ექსპორტი 2020 წლის დასაწყისიდან ეცემა – იანვარი-ივნისში ქვეყნიდან 1,5 მლრდ დოლარის ქართული პროდუქცია გაიტანეს, რაც 2019 წლის იმავე პერიოდთან შედარებით 16%-ით ნაკლებია.

ექსპერტი: საგარეო ვაჭრობის უფრო მეტ ვარდნას მოველოდი>>

იმპორტმა 2020 წლის პირველ ნახევარში დაახლოებით 3,6 მლრდ დოლარი შეადგინა, რაც 2019 წლის იმავე პერიოდთან შედარებით 19,1%-ით ნაკლებია.

საქართველოს უარყოფითმა სავაჭრო ბალანსმა მითითებულ პერიოდში დაახლოებით 2,05 მილიარდი დოლარი შეადგინა, რაც მთელი საგარეო სავაჭრო ბრუნვის 40,5%-ია.

რითი ვაჭრობს საქართველო

საქართველოდან საქონლის ფართო ასორტიმენტი გააქვთ — სპილენძის მადნები და კონცენტრატები, ფეროშენადნობები, მსუბუქი ავტომობილები, ნატურალური ღვინო, სამკურნალო საშუალებები, მინერალური წყლები, დამუშავებული ან ნახევრადდამუშავებული ოქრო, თხილი და სხვ.

2020 წლის დასაწყისიდან ივნისის ჩათვლით გაიზარდა ექსპორტი სპილენძის მადნებისა და კონცენტრატების — 8,7%-ით, სპირტიანი სასმელების 8,6%-ით და ოქროსი – 36,6%-ით.

ამავე დროს შემცირდა მსუბუქი ავტომობილების ექსპორტი 35,1%-ით, ფეროშენადნობების – 34,3%-ით, ნატურალური ყურძნის ღვინის – 6%-ით, სამკურნალო საშუალებების – 56,9%-ით, აზოტოვანი სასუქების – 17,9%-ით, მინერალური და მტკნარი წყლების – 24,5%-ით.

საქართველოში შემოდის ნავთობი და ნავთობპროდუქტები, მსუბუქი ავტომობილები, ნავთობის აირები და აირისებრი ნახშირწყალბადები, სპილენძის მადნები და კონცენტრატები, სამკურნალო საშუალებები, ხორბალი, ელექტროენერგია, სატელეფონო აპარატები და სხვ.

აღნიშნულ პერიოდში გაიზარდა ძვირფასი ლითონების მადნების იმპორტი 1793,8%-ით, ელექტროენერგიის – 12,4%-ით, ხორცისა და შინაური ფრინველის საკვები სუბპროდუქტების – 7,9%-ით.

რამდენი ტონა ლურჯი მოცვი გაიტანა ექსპორტზე საქართველომ>>

ამავე დროს მსუბუქი ავტომობილების იმპორტი აღნიშნულ პერიოდში დაეცა 43,1%-ით, სპილენძის მადნებისა და კონცენტრატების – 12,3%-ით, ნავთობისა და ნავთობპროდუქტების — 32,1%-ით, სამკურნალო საშუალებების – 12,6%-ით, ნავთობის აირებისა და აირისებრი ნახშირწყალბადების – 11,7%-ით და ა.შ.

ვისთან ვაჭრობს საქართველო

საქართველოს ყველაზე დიდი სავაჭრო პარტნიორები 2020 წლის პირველ ნახევარში არიან თურქეთი, რუსეთი და ჩინეთი — ამ ქვეყნებთან სავაჭრო ბრუნვამ 2020 წლის იანვარი-ივნისში 1,8 მილიარდ დოლარს გადააჭარბა, რაც მთლიანი სავაჭრო ბრუნვის 35,9%-ია.

პირველ ადგილზეა თურქეთი

თურქეთთან ბრუნვამ მიმდინარე წლის იანვარი-ივნისში 697,4 მილიონ დოლარზე მეტი შეადგინა, რაც საქართველოს მთლიანი სავაჭრო ბრუნვის 13,8%-ია. ორ ქვეყანას შორის სავაჭრო ბრუნვა, გასული წლის ამავე პერიოდთან შედარებით, 17,6%-ით შემცირდა.

ქართული ატმის იმპორტი რუსეთში შეუფერხებლად მიმდინარეობს>>

მეორე ადგილზეა რუსეთი

2020 წლის დასაწყისიდან საქართველოსა და რუსეთს შორის ბრუნვა 2019 წლის ანალოგიურ პერიოდთან შედარებით შემცირდა 13,8%-ით და შეადგინა 584,2 მილიონი დოლარი – საქართველოს მთლიანი საგარეო სავაჭრო ბრუნვის 11,6%.

მესამე ადგილზეა ჩინეთი

საქართველოს საგარეო ბრუნვამ ჩინეთთან 530,7 მილიონ დოლარზე მეტი შეადგინა, რაც მთლიანი საგარეო ბრუნვის 10,5%-ია. სავაჭრო ბრუნვა ორ ქვეყანას შორის, გასული წლის ამავე პერიოდთან შედარებით, 9,8%-ით გაიზარდა.

საქართველო ასევე ვაჭრობს სხვა ქვეყნებთან

საქართველოს სავაჭრო პარტნიორების ათეულში შედიან ასევე: აზერბაიჯანი – 450,9 მილიონ დოლარზე მეტი, სომხეთი – დაახლოებით 282,5 მლნ დოლარი, უკრაინა – 250,3 მილიონ დოლარზე მეტი, აშშ – დაახლოებით 233,6 მლნ დოლარი, გერმანია – დაახლოებით 198,4 მილიონი დოლარი, ბულგარეთი – 209 მლნ დოლარზე მეტი, იტალია – 93,4 მლნ დოლარზე მეტი.

საქართველო იტალიაში ექსპორტზე 45 ტონა ლოკოკინას გაიტანს>>

როდის გაუმჯობესდება ვაჭრობის მაჩვენებლები?

ივნისში ექსპორტისა და იმპორტის ვარდნის ტემპები რამდენადმე შემცირდა – მიმდინარე წლის ივნისში საქართველოს საგარეო ბრუნვა 16%-ით დაეცა, მათ შორის ექსპორტის 13,1%-ით, ხოლო იმპორტის – 17,2%-ით. მაისში კი საგარეო ბრუნვა 33,2%-ით დაეცა, მათ შორის ექსპორტი 30,6%-ით, ხოლო იმპორტი – 34,3%-ით.

ექსპერტი ეკონომიკის საკითხებში აკაკი ცომაია მიიჩნევს, რომ საქართველოს საგარეო ბრუნვის მაჩვენებლები ეკონომიკის ზრდის პირობებში გაუმჯობესდება.

„მაჩვენებლები გაუმჯობესებას დაიწყებს, როგორც კი ეკონომიკაში რამე საკვანძო ცვლილებები მოხდება, ანუ როდესაც საქართველოს ეკონომიკა ზრდას დაიწყებს, როდესაც ადამიანები, რომლებმაც შემოსავლები დაკარგეს, მათ შორის, ტურიზმის სექტორში, რამე ალტერნატივას იპოვიან, ან ტურიზმი კვლავ ამუშავდება, ისინი კვლავ მიიღებენ შემოსავალს და მეტს დახარჯავენ", – განუცხადა ცომაიამ „Sputnik–საქართველოს“.

ექსპერტის თქმით, ამ შემთხვევაში გაიზრდება იმპორტი და, მათ შორის, შეიძლება ექსპორტზე საუბარიც.

„როდესაც სხვადასხვა ქვეყნის მოქალაქეები დაიწყებენ ეკონომიკური კრიზისიდან გამოსვლას, ჩვენი ექსპორტიც დაიწყებს გაზრდას", – აღნიშნა ცომაიამ.

რა ზომებს მიმართავს მთავრობა

ქვეყნის მთავრობამ უკვე შეიმუშავა ანტიკრიზისული გეგმა, რომლის მიხედვით ფინანსურად ეხმარება უმუშევრებს, სოციალურად დაუცველებს, შშმ პირებს, თვითდასაქმებულებსა და მრავალშვილიან ოჯახებს.

ცალკე გეგმა შემუშავდა ბიზნესის დასახმარებლად. მთავრობა ბიზნესს განსაკუთრებულ საგადასახადო შეღავათებსა და შეღავათიან კრედიტებს სთავაზობს. ამასთან, ძირითადი აქცენტი ადგილობრივ წარმოებაზე კეთდება.

„ქართლი ტექსტილი“ – რუსთავს ახალი ფაბრიკა ექნება>>

საქართველო ასევე მიიღებს 3 მილიარდ ლარზე მეტ დახმარებას საერთაშორისო პარტნიორებისგან.

169
თემები:
საქართველოს ეკონომიკა (943)
კომოანია Standard & Poor's -ს ლოგო

როგორ აისახა პანდემია საქართველოს ეკონომიკაზე: S&P პროგნოზს აუარესებს

27
(განახლებულია 14:31 28.02.2021)
სააგენტო ვარაუდობს, რომ 2020 წელს საქართველოს რეალური მშპ-ის 6%-ით შემცირების შემდეგ, 2021 წელს ის 4%-ით გაიზრდება. ის აღნიშნავს, რომ ეკონომიკის ზრდის საშუალოვადიან პერსპექტივებზე ზოგიერთმა პრობლემამ შესაძლოა გავლენა იქონიოს.

თბილისი, 28 თებერვალი – Sputnik. რისკები უცხოური ინვესტიციებისთვის, კორონავირუსის გამო ექსპორტის შემცირება და ტურიზმის შემოსავლების კუთხით პროგნოზის გაუარესება - ეს ყველაფერი ნეგატიურად აისახება საქართველოს ეკონომიკაზე, ნათქვამია ანგარიშში, რომელიც გამოაქვეყნა საერთაშორისო სარეიტინგო სააგენტომ S&P Global Ratings.

სააგენტომ გადახედა თავის პროგნოზს საქართველოს მიმართ და ის „სტაბილურიდან“ „ნეგატიურამდე“ ჩამოაქვეითა. ამავე დროს უცხოურ და ადგილობრივ ვალუტაში გრძელვადიანი და მოკლევადიანი სუვერენული საკრედიტო რეიტინგები BB/B დონეზე დატოვა.

„ნეგატიური პროგნოზი ასახავს რისკებს, რომლებიც შეიძლება შეექმნას საქართველოს თავისი მნიშვნელოვანი საგარეო ვალდებულებების მომსახურების დროს საკმარისი სავალუტო შემოსავლების გენერირების კუთხით. სავარაუდოდ, ტურისტული სექტორის აღდგენა ვაქცინების გლობალურ დანერგვას ჩამორჩება, და ჩვენ ვერ ვივარაუდებთ 2019 წლის ტურისტული აქტიურობის დონის 2024 წლამდე დაბრუნებას. მეტად არასტაბილურ შიდა პოლიტიკურ ვითარებასთან ერთად ამან შეიძლება გააუარესოს უცხოური ინვესტიციების მოდინების საშუალოვადიანი პერსპექტივები, რაც, ჩვენი თვალსაზრისით, მნიშვნელოვანია ზრდისთვის და საგარეო დაფინანსებისთვის“, - ნათქვამია ანგარიშში.

ამავე დროს S&P აღნიშნავს, რომ სააგენტო მზადაა გადახედოს პროგნოზს და ის „სტაბილურით“ შეცვალოს, თუ სავალუტო შემოსავლები მოსალოდნელზე სწრაფად აღდგება.

ნეგატიური ზეგავლენა ეკონომიკაზე

სააგენტო ვარაუდობს, რომ 2020 წელს საქართველოს რეალური მშპ-ის 6%-ით შემცირების შემდეგ, 2021 წელს ის 4%-ით გაიზრდება. ის აღნიშნავს, რომ ეკონომიკის ზრდის საშუალოვადიან პერსპექტივებზე ზოგიერთმა პრობლემამ შესაძლოა გავლენა იქონიოს.

S&P რისკებად აფასებს ტურიზმის სუსტ აღდგენას, ვაქცინაციის ნელ ტემპს და უცხოური ინვესტიციების მოდინების შემცირებას.

„გარდა ამისა, ხშირი პოლიტიკური კრიზისების შედეგად არსებობს რეფორმების იმპულსის შესუსტების და უცხოური ინვესტორების მიერ საქართველოს სტაბილურობის აღქმის რისკი“, - ნათქვამია ანგარიშში.

სააგენტოში მიიჩნევენ, რომ ზრდის პერსპექტივებს საფრთხე შეიძლება შეუქმნას ასევე ფისკალური და მონეტარული პოლიტიკის ნაადრევმა გამკაცრებამ.

„ეკონომიკურ აქტივობას, მათ შორის შერყეულ სასტუმრო სექტორში, სარგებელს მოუტანს შემზღუდავი ზომების შერბილება. შეზღუდვები კვლავ დაწესდა 2020 წლის ბოლო კვარტალში COVID-19-ის შემთხვევების მკვეთრი ზრდის შემდეგ. 2021 წელს სახელმწიფო მხარდაჭერის ზოგიერთი ზომების გაგრძელებამ ასევე უნდა შეუწყოს ხელი ეკონომიკურ ზრდას“, - აღნიშნეს სააგენტოში.

ასევე, S&P საქართველოს მთავრობის ვაქცინაციის გეგმას ამბიციურს უწოდებს.

„მიგვაჩნია, რომ მსოფლიო მოთხოვნა-მიწოდების დინამიკის გათვალისწინებით, მთავრობის მიერ გაცხადებული გეგმა წლის ბოლომდე მოზრდილი მოსახლეობის 60%-ის ვაქცინაციის შესახებ საკმაოდ ამბიციურია. მოსალოდნელია, რომ საქართველო 2021 წლის პირველ ნახევარში COVAX-ისგან დაახლოებით 214 ათას დოზას მიიღებს. ეს ნიშნავს, რომ 2021 წლის შუა პერიოდში ვაქცინაციის დონე მოსახლეობის საერთო რიცხვის 2,8%-ს შეადგენს (ერთ ადამიანზე ორი დოზის გათვალისწინებით),“ - აღნიშნულია ანგარიშში.

სწორედ ვაქცინის დანერგვაზე იქნება დამოკიდებული ტურისტული სექტორის ბედი, მიაჩნიათ სააგენტოში.

„ტურისტული სექტორის პერსპექტივები ბუნდოვანი რჩება. იმ დროს, როდესაც  შიდა ტურისტული აქტივობა გარკვეულწილად გრძელდებოდა 2020 წელს, ქვეყანაში უცხოელი ტურისტების შემოდინება 2019 წელთან შედარებით 83%-ით შემცირდა. ჩვენი თვალსაზრისით, ამ სექტორის ბედი დაკავშირებული იქნება  ვაქცინის დანერგვის პროგრესთან არა მხოლოდ ქვეყანის შიგნით, არამედ მეზობელ ქვეყნებშიც, საიდანაც ჩამოდის საქართველოს ვიზიტორების უმეტესობა“, - აღნიშნულია ანგარიშში.

პოლიტიკის გავლენა ეკონომიკაზე

S&P ნეგატიურად აფასებს ასევე პოლიტიკური კრიზისის ზეგავლენას.

„პოლიტიკურმა დაძაბულობამ მმართველ პარტიასა და ოპოზიციას შორის შესაძლოა შეასუსტოს რეფორმების იმპულსი და ხელისუფლების ცენტრალიზაციის რისკების ფონზე ავნოს საერთაშორისო ინვესტორების აღქმას საქართველოს სტაბილურობასთან დაკავშირებით“, - ნათქვამია ანგარიშში.

სააგენტო აღნიშნავს, რომ თუმცაღა ოპოზიციის მოთხოვნა ვადამდელი არჩევნების ჩატარების შესახებ სავარაუდოდ არ დაკმაყოფილდება, არსებობს სივრცე სხვა პოლიტიკური დათმობებისთვის, რომლებიც ქვეყანას ჩიხიდან გამოიყვანდა.

„საქართველოს ყოფილი პრემიერ-მინისტრის, გიორგი გახარიას გადადგომა, რაც ქვეყნის ოპოზიციის ლიდერის დაკავების საქმეს უკავშირდებოდა, კიდევ უფრო ართულებს საქართველოში მოკლევადიანი პოლიტიკის განჭვრეტას. თუმცა, მთავრობის მიერ გაცხადებული მაკროეკონომიკური დღის წესრიგი უცვლელი რჩება“, - აღნიშნეს სააგენტოში.

ხელისუფლების რეაქცია

საქართველოს მთავრობაში საქართველოს საკრედიტო რეიტინგის შენარჩუნება დადებითად შეაფასეს.

„სარეიტინგო სააგენტო S&P Global-ის მიერ რეიტინგის შენარჩუნება ადასტურებს მთავრობის მიერ გატარებულ გონივრულ მაკროეკონომიკურ პოლიტიკას“, - განაცხადა ფინანსთა მინისტრის მოადგილემ ნიკოლოზ გაგუამ.

ამავე დროს მან განმარტა, რით არის გამოწვეული სააგენტოს ნეგატიური პროგნოზი.

„სააგენტოს მიერ განსაზღვრული „ნეგატიური“ პერსპექტივა, ძირითადად, გამოწვეულია გლობალურად, ტურიზმის აღდგენის შედარებით ნელი პერსპექტივიდან გამომდინარე. S&P Global-ის შეფასებით, ტურიზმის აღდგენა მთელ მსოფლიოში და მათ შორის, საქართველოში, შედარებით ნელი ტემპებით მოხდება, ვიდრე ამას დასაწყისში ელოდნენ. ტურიზმის სწრაფი აღდგენის შემთხვევაში, რისი მაღალი მოლოდინიც ჩვენ გვაქვს, კომპანია გამოხატავს პერსპექტივის აღდგენის მზადყოფნას,“ – აღნიშნა ნიკოლოზ გაგუამ.

S&P შეფასება და Fitch-ის მონაცემები

ერთი კვირის წინ სხვა საერთაშორისო სარეიტინგო სააგენტო Fitch-მა დატოვა საქართველოს ემიტენტის დეფოლტის გრძელვადიანი რეიტინგი უცხოურ ვალუტაში BB დონეზე. პროგნოზი - „ნეგატიურია“.

„ნეგატიური“ პროგნოზი, Fitch-ის ანალიტიკოსების აზრით, ასახავს კორონავირუსის პანდემიის მნიშვნელოვან გავლენას საქართველოს ეკონომიკაზე.

მათი მტკიცებით, პანდემია იწვევს მსხვილი ტურისტული სექტორის მქონე საქართველოს მცირე, ღია ეკონომიკის მკვეთრ შემცირებას, საბიუჯეტო ანგარიშების შესამჩნევ გაუარესებას, მათ შორის, სახელმწიფო ვალის ზრდას, და უფრო მოწყვლადს ხდის მას, რაც მომდინარეობს საქართველოს დიდი საგარეო ვალიდან და მიმდინარე ანგარიშის უფრო ფართო სტრუქტურული დეფიციტიდან BB კატეგორიის ქვეყნების მედიანურ მაჩვენებელთან შედარებით.

Fitch-ის პროგნოზით, 2020 წელს პანდემიით გამოწვეული 6,1%-იანი ვარდნის შემდეგ 2021 წელს საქართველოს ეკონომიკა 4.3%-ით, ხოლო 2022 წელს – 5.8%-ით გაიზრდება.

სააგენტოს ანალიტიკოსების აზრით, საქართველოს მშპ-ის ზრდის მთავარ განმსაზღვრელ ფაქტორს შიდა მოთხოვნილების მატება წარმოადგენს, ვინაიდან შეზღუდვების შემსუბუქება ხელს უწყობს კერძო მოხმარებას, ხოლო ინფრასტრუქტურაზე სახელმწიფოს მიერ გაწეული, ჩვეულებრივზე დიდი ხარჯი, კერძო სექტორის სუსტი გაჯანსაღების მიუხედავად, ინვესტიციებს წაახალისებს.

27
გურამ თუშიშვილის ორთაბრძოლა

მსოფლიოს ჩემპიონი საქართველოსთვის გაიტანს, ძიუდოს ლეგენდა კი თბილისში მოემგზავრება

54
საქართველოს საფეხბურთო ნაკრების ახალი მწვრთნელის პირველი კომენტარი და თორნიკე შენგელიას დაბრუნება „ცსკას“ რიგებში. ქართველი სპორტსმენების გასული კვირის შედეგები.

მსოფლიოს ჩემპიონი საქართველოს ეროვნულ გუნდში და ნაკრების ახალი მეთაურის პირველი კომენტარი

საქართველოს ეროვნული ნაკრებისთვის გასულ კვირას ძალიან სასიხარულო ინფორმაცია გავრცელდა. გარდა იმისა, რომ ეროვნულ ნაკრებს ვილი სანიოლის სახით „პატრონი“ გამოუჩნდა გუნდს ახალწვეულიც ჰყავს. საქართველოს ნაკრების შეტევითი ხაზი გიორგი წიტაიშვილით გაძლიერდა. ქართული წარმომავლობის მიუხედავად, წიტაიშვილი ამ დრომდე უკრაინის ასაკობრივ ნაკრებებში ასპარეზობდა და საკმაოდ წარმატებულადაც. მან 2019 წელს 20-წლამდელთა მსოფლიო ჩემპიონატი მოიგო და ამ გამარჯვებაში გატანილი გოლით ძალიან დიდი წვილი შეიტანა.

მისი დაბრუნება მართლაც გასაკვირი იყო ქართველი გულშემატკივრისთვის, რადგან გიორგის ჩვენს ქვეყანაში წლებია ეპატიჟებიან. პირველად ეს სასიხარულო ამბავი უკრაინელმა ჟურნალისტმა იგორ ციგანიკმა გაავრცელა. ჟურნალისტის ვარაუდით ახალგაზრდა ფეხბურთელის ეს გადაწყვეტილება მის საქართველოში სტუმრობას უკავშირდება. გავრცელებული ინფორმაციით, წიტაიშვილი სამშობლოში გარდაცვლილი ბაბუის სამძიმარზე ჩამოვიდა, რა დროსაც ოჯახის წევრებმა ბაბუის ერთ-ერთი ბოლო სურვილი ამცნეს. უკრაინელ ჟურნალისტს თუ ვენდობით ბაბუის ბოლო თხოვნა გიორგის საქართველოს ნაკრებში თამაში იყო. გეთანხმებით, საკმაოდ სევდიანი ისტორიაა, თუმცა მოგვიანებით გავრჩელდა ხმები, რომ მისი გადაწყვეტილება საქართველოს ფეხბურთის ფედერაციის მრავალწლიანი მცდელობებისა და შეთავაზებების შედეგია.

ამ ყველაფრის საპასუხოდ გიორგიმ მოკლე და შეიძლება ითქვას მკაცრი კომენტარი გააკეთა. წიტაიშვილმა ჟურნალისტებთან საუბრისას განაცხადა, რომ აღნიშნულ საკითხზე საუბარი არც სურს და არც ამის უფლება გააჩნია. მისი თქმით, უახლოეს მომავალში ყველაფერი გაირკვევა. საინტერესოა, რომ ფეხბურთის ფედერაციაში ამ საკითხზე ოფიციალური განცხადება ჯერ არ გაკეთებულა. ჩვენ ქართული სპორტის ქომაგებს ისღა დაგვრჩენია, რომ დაველოდოთ მოვლენათა განვითარებას, თუ როგორ დასრულდება ქართულ-უკრაინული „საპნის ოპერა“.

რაც შეეხება ქართველი ფეხბურთელის საკლუბო კარიერას, ის ამჟამად კიევის „დინამოს“ საკუთრებაშია და „ვორსკლას“ შემადგენლობაში იჯარის წესით ასპარეზობს.

წიტაიშვილს მიმდინარე სეზონში „დინამო კიევში“ მხოლოდ ოთხი მატჩი აქვს ჩატარებული, ხოლო „ვორსკლას“ რიგებში ორ შეხვედრაში ერთი გოლის გატანა უკვე მოახერხა.

ცოტა ხნის წინ მსგავსი ინფორმაცია ბელგიური „სერენის“ თავდამსხმელ გიორგი (ჟორჟ) მიქაუტაძეზეც გავრცელდა. მიქაუტაძეს ამ ეტაპზე ფრანგული პასპორტი აქვს, თუმცა შესაძლოა ისიც, წიტაიშვილის მსგავსად, საქართველოს ნაკრების მაისურით ვიხილოთ. ქართული წარმომავლობის ფეხბურთელი ბელგიის მეორე ლიგაში ასპარეზობს და მის ანგარიშზე მიმდინარე სეზონის 15 შეხვედრაში 16 გატანილი გოლია. მიქაუტაძე საკუთარი გუნდის ნამდვილი ლიდერი და საუკეთესო ბომბარდირია.

Новый главный тренер сборной Грузии по футболу Вилли Саньоль с президентом ФФГ Леваном Кобиашвили
ვილი სანიოლი და ლევან კობიაშვილი

ქართულ მედიასთან პირველად ისაუბრა საქართველოს ნაკრების ახალმა მწვრთნელმა ვილი სანიოლიმ, რომელმაც ჩვენი გუნდის მომავალსა და მის გეგმებზე ვრცლად ისაუბრა. ფრანგმა სპეციალისტმა გერმანიის ბუნდესლიგაში გატარებულ წლებზეც ილაპარაკა, რა დროსაც ვეტერან ქართველ ფეხბურთელებზე კობიაშვილსა და იაშვილზეც გააკეთა კომენტარი.

„ლევან კობიაშვილი კარგად მახსოვს. ის მარცხენა ფლანგზე თამაშობდა, მე – მარჯვენაზე და ჩვენი გზები ყოველთვის იკვეთებოდა. როგორც მოთამაშე, ის ერთდროულად ხისტიც იყო და სამართლიანიც. იგივე შემიძლია ვთქვა ალექსანდრე იაშვილზეც. კარგია, როდესაც 10, 12 ან 15 წლის შემდეგ კვლავ ვხვდებით ერთმანეთს“, – განაცხადა სანიოლმა.

აღსანიშნავია, რომ ფეხბურთის ფედერაციის ამჟამინდელი ხელმძღვანელები წლების წინ სანიოლის თანამედროვეები იყვნენ. იაშვილისა და კობიაშვილის საფეხბურთო კარიერის დიდი ნაწილიც სწორედ გერმანიის ბუნდესლიგას უკავშირდება.

Новый главный тренер сборной Грузии по футболу Вилли Саньоль с президентом ФФГ Леваном Кобиашвили
სანიოლი, კობიაშვილი

სანიოლის დიდი სამწვრთნელო გამოცდილება არ აქვს, თუმცა უკვე გავრცელდა ინფორმაცია, რომ ფრანგს ძალიან უყვარს დისციპლინა და ეს მისი ერთ-ერთი ძლიერი მხარეა.

„დისციპლინა ძალიან მნიშვნელოვანია, მის გარეშე ვერაფერს შეცვლი. ფეხბურთელებს ნაკრებში თამაში უნდა ეამაყებოდეთ და მათ პატივი უნდა სცენ საქართველოს ნაკრების მაისურას. თუ ყველას ერთი მიზანი გვექნება, ვფიქრობ, რომ შევძლებთ წარმატების მიღწევას“, - აღნიშნა საქართველოს ნაკრების ახალმა თავკაცმა.

სამწუხარო ინფორმაცია გავრცელდა ოთარ კიტეიშვილის შესახებ, რომელიც ავსტრიის ბუნდესლიგაში ასპარეზობს. ავსტრიის მე-18 ტურში „შტურმის“ რიგებში ქართველმა ნახევარმცველმა „ვოლფსბერგერთან“ გამართულ შეხვედრაში ფეხის კუნთის ტრავმა მიიღო და მარტის სანაკრებო შეხვედრები გაუცდება. „შტურმმა“ ლუკა ლოჩოშვილისა და გურამ გიორბელიძის „ვოლფსბერგერს“ უმასპინძლა და ბოლო წუთზე გაშვებული გოლით 1:2 წააგო. კიტეიშვილი და გიორბელიძე ძირითად შემადგენლობაში იყვნენ, ლოჩოშვილი კი სამატჩო განაცხადში ვერ მოხვდა.

Сборная Грузии по футболу перед матчем с командой Эстонии
© REUTERS / IRAKLI GEDENIDZE
საქართველოს ფეხბურთის ნაკრები

აღსანიშნავია, რომ საქართველოს ეროვნულ ნაკრებს მარტში მსოფლიოს შესარჩევი ეტაპის პირველი სამი თამაშის ჩატარება უწევს. ჩვენი გუნდი შვედეთს ესპანეთსა და საბერძნეთს დაუპირისპირდება. ჩვენი ნაკრები აღნიშნული სამი მატჩიდან მხოლოდ ესპანეთს უმასპინძლებს, რომელიც პანდემიის გამო დაწესებული შეზღუდვების გამო მაყურებლის გარეშე გაიმართება. ვნახოთ თუ როგორ ჩააბარებს პირველ ქართულ გამოცდას ვილი სანიოლი.

არ უნდა გამოგვრჩეს საქართველოს ეროვნული ლიგის პირველი მატჩებიც. შიდა ჩემპიონატის პირველ დღეს თავიანთი მატჩები გასული წლის ჩემპიონმა თბილისის „დინამომ“ და ვიცე-ჩემპიონმა ბათუმის „დინამომ“ გამართეს.

დედაქალაქელებმა სეზონის სტარტზე ფანების გახარება ნამდვილად ვერ მოახერხეს. ისინი ეროვნულ ლიგაში ახლად აღზევებულ „სამგურალს“ ანგარიშით 1:1 დაუზავდნენ და დასაწყისშივე მნიშვნელოვანი ქულები დაკარგეს. ეროვნული ლიგის პირველი გოლის ავტორი სამგურალის 21 წლის ფორვარდი სერგო კუხიანიძეა, რომელმაც 2020 წელს სამგურალის მაისურით 7 მატჩში 9 გოლი გაიტანა. დინამო თბილისი თამაშს 71-ე წუთამდე აგებდა, სანამ გიორგი გაბედავამ ანგარიში არ გაათანაბრა.

რაც შეეხება ბათუმელებს, ზღვისპირელებმა გაჭირვებით, თუმცა თავიანთი პირველი შეხვედრა ქუთაისის „ტორპედოსთან“ მოიგეს. მატჩში ერთადერთი გატანილი გოლით „თელავიდან“ დაბრუნებული გრიგოლ ჩაბრაძე გამოირჩა, რომელმაც მატჩის ბედი 79-ე წუთზე ფანცულაიას გადაცემის შედეგად გადაწყვიტა. აღნიშნული გამარჯვებით „პირატები“ დროებით ცხრილში პირველ ადგილზე იმყოფებიან.

მამუკელაშვილი კვლავ შედეგიანია, თორნიკე შენგელია კი მოედანს დაუბრუნდა

ამერიკის სტუდენტურ ლიგაში სანდრო მამუკელაშვილის „სეტონ ჰოლი“ გასულ კვირას „ბატლერთან“ დამარცხდა. მიუხედავად შედეგისა ახალგაზრდა ქართველი კალათბურთელი საკუთარი გუნდის ერთ-ერთი საუკეთესო მოთამაშე გახლდათ.

მამუკელაშვილმა 35 წუთში 11 ქულა, 3 მოხსნა და 1 პასი მიითვალა. მამუკელაშვილის გუნდმა ზედიზედ მეორე თამაში წააგო, მანამდე კი „სეტონ ჰოლს“ 4-მატჩიანი მოგებათა სერია ჰქონდა. ისინი Big East-ის კონფერენციაში 10 მოგებით და 7 წაგებით მე-3 ადგილზე იმყოფებიან. სანდროს გუნდი მომდევნო შეხვედრას 3 მარტს საკუთარ მოედანზე „კონექტიკუტთან“ გამართავს.

აღსანიშნავია, რომ მოედანს დაუბრუნდა საქართველოს ნაკრების კაპიტანი და ერთ-ერთი ლიდერი თორნიკე შენგელია. შენგელიამ მიღებული ტრავმა უკვე მოიშუშა და „ოლიმპიაკოსთან“ შეხვედრაში მოსკოვის „ცსკას“ საწყის ხუთეულში მოგვევლინა. ნაკრების კაპიტანმა ბერძნებთან 8 ქულა და 3 მოხსნა მიითვალა, რაც დიდხნიანი პაუზის შემდეგ ცუდი შედეგი ნამდვილად არ გახლავთ. ქართველმა კალათბურთელმა მოედანზე 21 წუთი და 33 წამი დაჰყო. მოსკოვის „ცსკა“ მორიგ შეხვედრას „ეფესთან“ გამართავს და იმედი ვიქონიოთ, რომ მომავალ მატჩებში თორნიკე ფორმის სრულად აღდგენას შეძლებს.

გასულ კვირას ამერიკის სტუდენტურ ლიგაში თამაში გიორგი ბეჟანიშვილის „ილიონისმაც“ გამართა და აუტსაიდერ „ნებრასკას“ მარტივად ანგარიშით 86:70 სძლია. ქართველმა კალათბურთელმა მოედანზე 11 წუთი გაატარა და აქტივში 2 ქულა და 2 მოხსნა ჰქონდა, პასივში კი - 2 დაკარგვა და 2 პერსონალური გოლი. გიორგიმ 4 ორქულიანი ესროლა და 1 ჩააგდო.

ილინოისი ჩემპიონატში მე-2 ადგილს იკავებს, ლიდერი კი კვლავ „მიჩიგან ვულვერინსია“, რომელსაც 12 მოგება კი აქვს. მიუხედავად ამისა, მიჩიგანის გუნდი ბეჟანიშვილის გუნდს ჩატარებული თამაშების რაოდენობით ჩამორჩება.

საკუთარ გუნდს გამოემშვიდობა ქართველი კალათბურთელი ბექა ბურჯანაძე. გავრცელებული ინფორმაციით ბექამ „გრან კანარია“ კლუბი ურთიერთშეთანხმების საფუძველზე დატოვა. 27 წლის ბურჯანაძე ესპანურ კლუბში 2019 წლიდან თამაშობდა. მანამდე ის ასევე ესპანეთში „გიპუსკოას“, „ანდორას“, „კორუნიასა“ და „სევილიას“ ღირსებას იცავდა. მიმდინარე სეზონში ბექა თამაშში საშუალოდ 5.7 ქულას, 3.1 მოხსნას და 0.9 პასს აგროვებდა, ხოლო მისი ეფექტურობის კოეფიციენტი 6.1 იყო.

ნიკოლოზ ბასილაშვილი სამწუხაროდ კვლავ აგებს. ქართველი ჩოგბურთელის მორიგი მარცხი საფრანგეთში

საქართველოს პირველი ჩოგანის საქმეები ბოლო დროს კარგად არ მიდის. ბასილაშვილი გასულ კვირას საფრანგეთის ქალაქ მონპელიეში მიმდინარე საერთაშორისო ტურნირს ადგილობრივ ბარერესთან შეხვედრით გამოემშვიდობა. ფრანგმა ჩოგბურთელმა ჩვენებური ორ სეტში 6:4, 6:4 დაამარცხა და მომდევნო ეტაპზე გავიდა. აღსანიშანია, რომ ბარერე ATP-ის რეიტინგში 113-ე ადგილს იკავებს, ხოლო ბასილაშვილი ერთ დროს წარმატებული ასპარეზობის ხარჯზე კვლავ ინარჩუნებს პოზიციებს და მსოფლიოს მე-40 ჩოგანია.

დასანანია თუმცა, უკვე წელიწადზე მეტია ბასილაშვილი ცუდი ფორმაში იმყოფება და ეს კლასიფიკაციაზეც აისახა. 2019 წლის მაისში ნიკა მსოფლიოს მე-16 ჩოგანი და ნებისმიერი ლიდერისთვის ანგარიშგასაწევი ძალა გახლდათ.

ძიუდოს ლეგენდა საქართველოში ჩამოდის - ტედი რინერი თბილისის გრანდ-სლემზე დარეგისტრირდა

ძიუდოს საერთაშორისო ფედერაციამ რამდენიმე დღის წინ თბილისის გრად-სლემზე დარეგისტრირებულ სპორტსმენთა სია წარადგინა. მართალია სია არასრულყოფილია, მაგრამ საინტერესოა, რომ ჩამონათვალში ფრანგი ლეგენდარული ძიუდოისტი ტედი რინერი გამოჩნდა.

მომავალი ტურნირისთვის საქართველოს ჯერ განაცხადი არ გაუკეთებია. საინტერესოა სლემზე თუ ვიხილავთ მძიმე წონოსან ქართველ ფალავანს გურამ თუშიშვილს, რომელსაც ბოლო წლებში რინერის მემკვიდრედ მოიაზრებენ. ქართველ გულშემატკივარს კარგად ახსოვს ქართველისა და ფრანგის დაპირისპირება 2017 წელს გამართულ მსოფლიო ჩემპიონატზე, როდესაც თუშიშვილმა რინერის ტატამზე დაგდება შეძლო, თუმცა მსაჯებმა „ოქროს“ ქულა არ ჩაუთვალეს.

ძიუდოს საერთაშორისო ფედერაციამ 2021 წლის კალენდრის პირველი ნაწილი ჯერ კიდევ 6 იანვარს გამოაქვეყნა, საიდანაც ქართველმა ქომაგმა შეიტყო, რომ თბილისში დაგეგმილ ძიუდოს ტურნირს სტატუსი შეეცვალა და საქართველოს დედაქალაქი უკვე ძიუდოს გრანდ სლემს მასპინძლობს. შეჯიბრება 26 მარტიდან 28 მარტის ჩათვლით გაიმართება.

 

54
კარვები პარლამენტის შენობის წინ

რუსთაველის გამზირზე კარვების ქალაქი იზრდება

0
ორშაბათს, 1 მარტს, ოპოზიციის წარმომადგენლები გამართავენ მიტინგს მმართველი პარტია „ქართული ოცნების“ დამფუძნებლის, მილიარდერ ბიძინა ივანიშვილის სახლთან

თბილისი, 28 თებერვალი - Sputnik. თბილისში, პარლამენტის შენობის წინ ოპოზიციის წარმომადგენლებმა კიდევ ერთი, მე-15 კარავი დადგეს.

კარვის დადგმის დროს აქციის მონაწილეებსა და პოლიციას შორის მცირე შელაპარაკება მოხდა. მაგრამ ამჯერად საქმე დაკავებამდე არ მისულა და სიტუაცია განიმუხტა. ოპოზიციის წარმომადგენლებმა კარავი დადგეს, პოლიციამ კი მიმდებარე ტერიტორია დატოვა.

აქციის მონაწილეების თქმით, ორშაბათს, 1 მარტს, ისინი გამართავენ მიტინგს მმართველი პარტია „ქართული ოცნება - დემოკრატიული საქართველოს“ დამფუძნებლის, მილიარდერ ბიძინა ივანიშვილის სახლთან. აქცია 12:00 საათზე დაიწყება. სამშაბათს, 2 მარტს, პლენარული სხდომის დღეს ოპოზიციამ პარლამენტის შენობის პიკეტირება დააანონსა.

მომიტინგეები პოლიტპატიმრების გათავისუფლებას და ვადამდელი არჩევნების ჩატარებას მოითხოვენ. წინააღმდეგ შემთხვევაში ისინი კარვებში დარჩენას აპირებენ და მასშტაბურ აქციებს აანონსებენ.

საქართველოში პოლიტიკური კრიზისი „ერთიანი ნაციონალური მოძრაობის“ ლიდერის, ნიკა მელიას დაპატიმრების შემდეგ გამწვავდა. ოპოზიცია გავიდა ქუჩებში და ორი კვირის განმავლობაში აპირებს საპროტესტო აქციების გამართვას. ლიდერების თქმით, აქციები მხოლოდ იმ შემთხვევაში გადაიდება, თუ მმართველ პარტიასთან მოლაპარეკებები განახლდება.

0