დისტანციური განაღმვის მანქანა

მიმოხილვა: დისტანციური დანაღმვისა და განაღმვის უახლესი მანქანები

257
(განახლებულია 15:17 23.06.2020)
სამხედრო კონფლიქტები, უპირველეს ყოვლისა, ტექნოლოგიების ბრძოლაა. რუსეთის შეიარაღებულ ძალებში დინამიკური ცვლილებები საბრძოლო გამოყენების ყველა სფეროში ხდება.

რუსეთი შეიარაღებაში უპირატესობას მიმართულებების ფართო სპექტრში წარმოაჩენს, დისტანციური დანაღმვისა და განაღმვის მანქანების ორბიტული სისტემების ჩათვლით.

სამამულო ომში გამარჯვების 75-ე წლისთავისადმი მიძღვნილი სამხედრო აღლუმის რეპეტიციებისას შეიარაღებისა და ტექნიკის 24 უახლეს ნიმუშს შორის პირველად გამოჩნდა დისტანციური დანაღმვისა და განაღმვის მანქანები Земледелие და Листва. პირველ მათაგანს აქვს უნარი, თანამგზავრის მეშვეობით ზუსტად დაადგინოს ნაღმების მდებარეობა რეაქტიული აფეთქების წერტილიდან 15 კილომეტრით დაშორებული ადგილიდან, ხოლო მეორეს ნაღმის 100 მეტრიდან გარანტირებული განადგურება შეუძლია. უახლესი სისტემები სერიულად იწარმოება და რუსეთის არმიის შეიარაღებაში შედის. 

ტექნიკური პროგრესი ცვლის საბრძოლო მოქმედებების ტაქტიკას და ხდის მას უფრო ეფექტურსა და „უკონტაქტოს“. მოწინავე რუსული გამოგონებები მოწინააღმდეგის ქვეითი ჯარების წინსვლის შეჩერების საშუალებას იძლევა შორეულ საზღვრებზე უშუალო საბრძოლო კონტაქტის გარეშე, და ასევე შესაძლებელს ხდის დისტანციურად განადგურდეს დივერსიული რადიომართვადი ნაღმები და ფუგასები.

ზუსტი დარტყმა

ტერიტორიის დანაღმვას თავდაცვით და საიერიშო ოპერაციებში იყენებენ, ქვეითი ჯარების მანევრების შესაფერხებლად, მაღალმობილური მოიერიშე დაჯგუფებების ან საჰაერო დესანტის გადმოსხმის შესაკავებლად, კომუნიკაციების გასანადგურებლად, მოწინააღმდეგის ზურგის საქმიანობის დასარღვევად და ასევე საკუთარი ფლანგებისა და სხვა სისუსტეების დასაცავად. ამასთან მნიშვნელოვან როლს ასრულებს ადგილის დანაღმვის სისწრაფე და სიზუსტე.

საინჟინრო სისტემით დისტანციური დანაღმვა ათ წუთშია შესაძლებელი. ეს ოპერატიული და საბრძოლო მოქმედებების სივრციდან მთელი რაიონების „გამოთიშვის“ შესაძლებლობას იძლევა. დანაღმვის ეს მეთოდი ყველაზე უსაფრთხოდ და მანევრულად მიიჩნევა.

დისტანციური დანაღმვის რუსული საინჟინრო სისტემა Земледелие, რომელიც ავტომობილ КамАЗ-ის ბაზაზეა შექმნილი, წარმოადგენს ზალპური ცეცხლის 50-ლულიან დანადგარს, რომელიც სროლას სპეციალურად შექმნილი 122 მმ-იანი, სხვადასხვა ტიპის ნაღმებით აღჭურვილი რეაქტიული ჭურვებით აწარმოებს. ახალი თაობის თანამედროვე მაღალეფექტური საბრძოლო საშუალებები სრულად შეესაბამება საერთაშორისო შეთანხმებებს თვითლიკვიდაციის შესახებ. შესაძლებელია „მორიგე“ წინაღობების დაყენება, რომლებიც გარკველ დროს თავისით განადგურდება ან უსაფრთხო რეჟიმზე გადავა.

რეაქტიული დანადგარი Земледелие საბრძოლო საშუალებებს პოზიციური რაიონიდან 5–15 კილომეტრის დაშორებიდან „თესავს“. თანამგზავრული ნავიგაციისა და ავტომატური მართვის წყალობით ნაღმები ზუსტად ჯდება მონიშნულ ადგილებში. სისტემის ავტონომიური მეტეოსადგური აკორექტირებს სროლას ქარის მიხედვით. ამასთან სროლისთვის მონაცემების დამუშავება, წერტილებზე ცეცხლის გახსნა და ტრანსპორტის გამოძახება გადასატვირთად ავტომატურად ხორციელდება. სისტემა მობილურია, აქვს მაღალი გამავლობა და შეუძლია დიდი ხნის განმავლობაში მოქმედება. მანქანის კაბინა დაჯავშნულია.

რუსეთის თავდაცვის სამინისტრო დისტანციური მონიტორინგის სისტემებს 2020 წლიდან იღებს. უწყება არ ამხელს შეძენილი მანქანების რაოდენობას, ასევე მიწოდების ტემპებსა და კონტრაქტის თანხას.

ნატოს ძირითად არმიებში (აშშ, გერმანია, დიდი ბრიტანეთი, იტალია) ასევე არის შეიარაღებაში დისტანციური დანაღმვის საავიაციო, რეაქტიული, საარტილერიო, საინჟინრო სისტემები, რომლებიც მოკლე დროში დიდი ფართობის დანაღმვის საშუალებას იძლევა. დანაღმვის ტექნოლოგიების სრულყოფა განუწყვეტლად მიმდინარეობს. ბევრ რუსულ მიღწევას „დანაღმულ ველზე“ ანალოგი არ აქვს მსოფლიოში.

საბრძოლო მიკროტალღური ღუმელი

დისტანციურ განაღმვის მანქანა Листва-ს შეუძლია ნაღმებისა და ფუგასების აღმოჩენა 100 მეტრამდე მანძილში. ეს სტრატეგიული დანიშნულების სარაკეტო ჯარებში შემოწმდა.

Листва სარაკეტო ჯარებში 2017 წელს გამოჩნდა, მაგრამ გამარჯვების აღლუმში პირველად მიიღებს მონაწილეობას. რუსეთის ერთ-ერთი ყველაზე საიდუმლო კომპლექსის დანიშნულება ასაფეთქებელი მოწყობილობების განეიტრალებაა კონტინენტთაშორისი ბალისტიკური რაკეტების გამშვები მობილური დანადგარების მოძრაობის გზაზე.

ჯავშანმანქანა, რომელსაც ზემაღალი ხარისხის გამოსხივების ბლოკი აქვს, საბრძოლო პატრულირების მარშრუტზე მოძრაობს სარაკეტო კომპლექსის წინ და აფეთქებს რადიომართვად ნაღმებსა და ფუგასებს გზიდან საკმაოდ დაშორებით.

დისტანციური განაღმვის მანქანას აქვს ლითონის ელემენტებიანი ასაფეთქებელი მოწყობილობების აღმოჩენისა და ელექტრონული კომპონენტების შემცველი საინჟინრო საბრძოლო საშუალებების განადგურების უნარი. წარსულში ამ ტექნოლოგიას არ იყენებდნენ, დღეს კი სტრატეგიული დანიშნულების სარაკეტო ჯარებში დაახლოებით 150 ერთეული Листва შედის.

ჯავშანმანქანის სახურავზე არის პარაბოლური ანტენა, რომელიც აღმოჩენილ ნაღმს ზეგამოსხივებით ანადგურებს. მისი მოქმედების კუთხე 90 გრადუსს შეადგენს. განაღმვის ზოლის სიგანე 50 მეტრია. ეკიპჟისთვის შექმნილია სპეციალური კოსტიუმები ლითონის ძაფებით, რათა ისინი ელექტრონული გამოსხივებისგან დაცული იყვნენ.

Листва-ს ზუსტი ტექნიკური მახასიათებლები საიდუმლოა, მაგრამ ღია წყაროების მონაცემებით, მას ნაღმების აღმოჩენა 100 მეტრიდან შეუძლია საათში 15 კმ სიჩქარით მოძრაობისას. მისი შემქმნელი რიაზანის საკონსტრუქტორო ბიურო „გლობუსია“.

თუ უფრო ფართოდ განვიხილავთ, რადიოელექტრონულ იარაღს შეუძლია დისტანციურად ააფეთქოს ჭურვი ტანკის კოშკურაში, ან „გაჭედოს“ დატენვის ავტომატიკა, ასევე გაანადგუროს მოწინააღმდეგის ცოცხალი ძალა მიწისქვეშ 100 მეტრამდე სიღრმეზე განთავსებულ საფარში. მსგავს იარაღს მოწინააღდეგის ტექნიკის ნეიტრალიზების უნარი აქვს დაზიანების ტრადიციული საშუალებების გამოყენების გარეშე. ელექტრომაგნიტური გამოსხივების მოძრავ გენერატორებს შეუძლია მწყობრიდან გამოიყვანოს მოწინააღმდეგის ელექტრონიკა ჰაერში, ზღავასა და ხმელეთზე. გარკვეული სიხშირის ტალღების კონა ელექტრომოწყობილობებზე უროს დარტყმასავით მოქმედებს. კომპიუტერები „ეკიდება“, დამიზნების სისტემები ფუნქციონირებას წყვეტს. იმპულსს შეუძლია ფიზიკურად გაანადგურის, ანუ დაწვას მიკროსქემები.

შევნიშნავთ, რომ ამ დროისათვის რუსეთში დისტანციური განაღმვის კიდევ უფრო მძლავრი მანქანა „გვიდონის“ გამოცდა მიმდინარეობს.   

257
ახალი სახლები თბილისში

უფრო იაფად, ვიდრე გუშინ, ანუ შეიძინე ბინა და გადმოდი დღესვე!

175
(განახლებულია 17:21 14.07.2020)
ვის და როგორ შეუძლია საცხოვრისის შეძენისას სახელმწიფოს ფინანსური დახმარებით ისარგებლოს, რას მოუტანს სამშენებლო და საბანკო სექტორს, ზოგადად, ქვეყნის ეკონომიკას იპოთეკური სესხების სუბსიდირების სამთავრობო პროგრამა?

სამსონ ხონელი

ტელეფონი არ ჩერდება, შეტყობინებას შეტყობინება მოსდევს...  

დეველოპერულ კომპანიებს კომერციული ბანკები ენაცვლებიან, და პირიქით. „ისარგებლე იპოთეკური სესხების სუბსიდირების სამთავრობო პროგრამით, შეიძინე ბინა და გადმოდი დღესვე“, − ასეთია გზავნილის შინაარსი.

მოგეხსენებათ, COVID-19-ის პანდემიით გამოწვეული ეკონომიკური შოკით სამშენებლო სექტორიც დაზარალდა. განვმარტავ – რატომ: მკვეთრად გაუფასურდა ეროვნული ვალუტა, საკრედიტო ბაზარზე ბოლო ერთ წელიწადში ლარში გაცემული სესხის საპროცენტო განაკვეთი კი 14.8 პროცენტიდან 16.6 პროცენტამდე გაიზარდა. სესხის გაძვირება ყველაზე მეტად ფიზიკური პირებისთვის ეროვნულ ვალუტაში გაცემულ კრედიტებს შეეხო. არადა, საცხოვრებელი ბინისა თუ სხვა ტიპის უძრავი ქონების შეძენის მსურველთათვის ძირითადი ფინანსური წყარო სწორედ საბანკო კრედიტია. ასე რომ, გაყიდვები შემცირდა და ეს არსებული საფინანსო-ეკონომიკური მდგომარეობის ლოგიკური შედეგია.

პატივცემულ მკითხველს შევახსენებ, რომ სამშენებლო სექტორის მხარდასაჭერად მთავრობამ, ეროვნულმა ბანკმა და დეველოპერულმა კომპანიებმა ერთობლივი პროგრამა შეიმუშავეს. ის ბინის შესაძენად ეროვნულ ვალუტაში გაცემულ იპოთეკურ სესხზე საპროცენტო ტვირთის შემსუბუქებას ითვალისწინებს. კერძოდ, მოქალაქეს, რომელიც ბინის შესაძენად მიმდინარე წლის 31 დეკემბრამდე ეროვნულ ვალუტაში იპოთეკურ სესხს აიღებს, მთავრობა კრედიტის საპროცენტო განაკვეთის 4 პროცენტს დაუსუბსიდირებს. პროგრამის ეს დებულება ყველა იმ სასესხო ხელშეკრულებას შეეხება, რომლის საკრედიტო თანხის ჯამური მოცულობა 200 ათას ლარს არ აღემატება. სუბსიდირების ვადა ხელშეკრულების გაფორმებიდან 5 წელია. ეს არის ის პერიოდი, როცა მსესხებელი ყველაზე მეტ საპროცენტო ხარჯს გასწევს და სახელმწიფო ეხმარება მას, რომ საპროცენტო ტვირთი შეუმსუბუქოს. ბიუჯეტიდან ამ მიზნით 70 მილიონი ლარი დაიხარჯება.

ერთი სიტყვით, ქვეყნის წამყვანი ბანკები სამთავრობო პროგრამაში უკვე ჩაერთნენ. თუმცა ამ ინიციატივის გარშემო, რომელიც მაისის ბოლოს გახმოვანდა, დისკუსია დღემდე არ წყდება. სამშენებლო და საბანკო სფეროს წარმომადგენელთა შეფასებები დადებითია. საცხოვრისის პოტენციური მყიდველებიც კმაყოფილებას გამოხატავენ. რატომაც არა, ისინი პროგრამის მომხმარებლები არიან, სიკეთით ისარგებლებენ. მაგრამ ვიღაცებმა შედარებით იაფი კრედიტით ბინები რომ შეიძინონ, საამისოდ ბიუჯეტიდან ხალხის ფული რატომ უნდა დაიხარჯოს?! − შესაძლოა, ბრძანოს მკითხველმა და... აბა, რა გითხრათ, ყველამ თავისთვის განსაჯოს, რამდენად სწორია ამგვარი მიდგომა.

ექსპერტ-ანალიტიკოსთა აზრი გაიყო. ეკონომისტების ერთი ნაწილი სუბსიდირების ფაქტს არ მიესალმება. მათი შეფასებით, იპოთეკური სესხების სუბსიდირებით მთავრობა ბიუჯეტის ფულით ბანკებს აფინანსებს. არსებობს სერიოზული რისკი, რომ იმ მოსახლეობის ფულით, რომელსაც კრიზისში თავად გაუჭირდა, ბინების შეძენის მსურველ შეძლებულ მოქალაქეებს იპოთეკური სესხები დაუფინანსდეთ. 

„ძალიან მნიშვნელოვანია სუბსიდიის ფორმა. გამოდის, რომ სახელმწიფო ბანკებს 70 მილიონ ლარს ჩუქნის. არადა, ეროვნული ბანკის დახმარებით შესაძლებელია სხვადასხვა ფინანსური ინსტრუმენტების გამოყენება და ამ თანხის ბანკებისთვის სესხება იმისათვის, რომ იპოთეკურ სესხებზე ლარში დაბალი საპროცენტო განაკვეთები დააწესონ. ფაქტობრივად გამოდის, რომ ბიუჯეტის და მოსახლეობის გადასახადების ფული ტყუილად იფანტება. გარდა ამისა, ასეთი სტიმულირება სიგნალს აძლევს ბაზარს – დეველოპერები ეცდებიან ამ სუბსიდირების ფონზე მაღალი ფასები შეინარჩუნონ. ეს ძირეულად არასწორია. თუ უნდათ, რომ ფართები გაიყიდოს, ფასები მინიმუმამდე უნდა დაწიონ. ახლა ისინი ცდილობენ თან მარჟაც შეინარჩუნონ, ბინები მაღალ ფასში გაყიდონ და ამავდროულად სახელმწიფოს მხარდაჭერით ისარგებლონ. ფასი ბაზარმა თავად უნდა დაარეგულიროს“, − აცხადებს ეკონომისტი დავით კიკვაძე, რომელიც არ იზიარებს ეროვნული ბანკის შეფასებას, რომ სამშენებლო სექტორი, როგორც დამატებული ღირებულების გადასახადის ყველაზე დიდი გადამხდელი, ქვეყნის ეკონომიკის ხერხემალია.

ექსპერტთა ერთი ნაწილი კობა გვენეტაძის უწყების ხედვას ეთანხმება და აღნიშნავს, რომ სუბსიდირება ხელს უწყობს ეკონომიკის სტიმულირებას და ტრანზაქციების გაზრდას, რაც საბიუჯეტო შემოსავლებზე პირდაპირ აისახება. სამშენებლო სექტორი ეკონომიკის ერთ-ერთი მთავარი და თანაც მაღალანაზღაურებადი დარგია. შესაბამისად, მასზე ძალიან ბევრი მომიჯნავე დარგი და უამრავი დასაქმებული თუ თვითდასაქმებულია დამოკიდებული. სტატისტიკური მონაცემების მოშველიება შორს წაგვიყვანს, მკითხველს შეუძლია თავადაც გაეცნოს „საქსტატის“ ვებ-გვერდზე. გარდა ამისა, ექსპერტთა ამ ნაწილის აზრით, გადაწყვეტილება დროულად არის მიღებული, რადგან, თუ კრიზისი გაღრმავდება, მერე ძალიან რთულია იქიდან გამოსვლა...  

„სახელმწიფო მხარდაჭერა კიდევ უფრო წაახალისებს არსებულ ბაზარს. თავის მხრივ საბანკო სექტორი მაქსიმალურად უწყობს ხელს, რომ დაკრედიტება გაიზარდოს. ბინათმშენებლობის სექტორი ისედაც აღდგებოდა, უბრალოდ მთავრობის ინიციატივით, რაც სესხების გაცემაში მხოლოდ ახლა გამოჩნდება, სექტორის აღდგენა უფრო ადრე მოხდება. იპოთეკური სესხების სუბსიდირება ბანკებისთვისაც პოზიტიურია, თუმცა მთავარი გათვლა მაინც სამშენებლო სექტორზე და ზოგადად ეკონომიკაზეა“, − აცხადებს ეკონომისტი ოთარ ნადარაია.  

ამასობაში ივლისის დასაწყისისთვის გაცემული ახალი იპოთეკური სესხების შვიდი დღის საშუალო მაჩვენებელმა პანდემიის პირობებში პირველად გადაუსწრო იანვარი-თებერვლის პერიოდის საშუალო მაჩვენებელს. სავარაუდოდ, წლის ბოლომდე კომერციული ბანკების საკრედიტო პორტფელში ეროვნულ ვალუტაში გაცემული იპოთეკური სესხების წილი კიდევ უფრო გაიზრდება. რა ეფექტი ექნება სუბსიდირების სამთავრობო პროგრამას სამშენებლო, საბანკო სექტორისთვის და ზოგადად ქვეყნის ეკონომიკისთვის, ამას დრო გვიჩვენებს...

 

175
ვალუტის კურსი

რა უჯდება ეროვნულ ბანკს ეროვნული ვალუტის სტაბილურობა

229
(განახლებულია 20:13 13.07.2020)
კორონავირუსის პანდემიამ ეკონომიკის იმ სფეროებს, საიდანაც ქვეყანაში უცხოური ვალუტის შემოდინება ხდება, სერიოზული დარტყმა მიაყენა.

ტურიზმის გაჩერებამ, უცხოეთიდან ფულადი გზავნილებისა და პირდაპირი უცხოური ინვესტიცების კლებამ ისედაც გაუფასურებული ლარი კიდევ უფრო მეტად გაუფასურების საფრთხის წინაშე დააყენა.

ლარის კურსმა ვარდნა 9 მარტიდან დაიწყო, როდესაც კორონავირუსის პანდემიასთან დაკავშირებულ გაურკვევლობას მსოფლიო ბაზრებზე ნავთობის ფასების მკვეთრი ვარდნა დაემატა. 25 მარტისთვის ლარი უკვე 24%-ით იყო გაუფასურებული და 3,45 ნიშნულამდე იყო მისული.

სავალუტო ბაზრის სტაბილიზების მიზნით ეროვნულმა ბანკმა მარტიდან მოყოლებული სამ თვეში რვა აუქციონი გამართა, რომლებზეც ჯამში 230 მილიონი დოლარი გაყიდა.

მიმდინარე წლის 30 ივნისის მდგომარეობით, ეროვნული ბანკის სავალუტო რეზერვი უკვე 3 616 მილიონი აშშ დოლარია.

ეკონომისტი ნიკა შენგელია მიიჩნევს, რომ წლის ბოლომდე ეროვნულ ბანკს ლარის სტაბილურობის შესანარჩუნებლად საკუთარი რეზერვების დახარჯვა კიდევ ბევრჯერ მოუწევს.

„ეროვნულს ბანკს აქვს საკმარისი სავალუტო რეზერვი, რათა ლარის კურსის სტაბილურობა 3-იან ნიშნულთან ახლოს შეინარჩუნოს, ვფიქრობთ, რომ წლის ბოლომდე ეროვნული ვალუტის კურსის მითითებულ ნიშნულთან სიახლოვეს შენარჩუნება ეროვნულ ბანკს დამატებით 250-300 მილიონი დოლარი დაუჯდება“, – აღნიშნა ნიკა შენგელიამ „Sputnik–საქართველოსთან“ საუბრისას.

საქართველოში მცურავი გაცვლითი კურსის რეჟიმი მოქმედებს, რაც იმას ნიშნავს, რომ ის მთლიანად განისაზღვრება სავალუტო ბაზრის მიერ, რომელიც შედგება კომერციული ბანკებისგან, საინვესტიციო ფონდებისგან და იმ კორპორაციებისა თუ ინდივიდებისგან, რომელთა ინტერესში უცხოური ვალუტის ყიდვა–გაყიდვა შედის.

თუმცა ქვეყანაში, სადაც იმპორტს დიდი წილი უჭირავს, არასტაბილური და გაუფასუფრებული ეროვნული ვალუტა საფრთხეს ფასების სტაბილურობასაც უქმნის, რაც, თავის მხრივ, უკვე ეროვნული ბანკის რეგულირების სფეროა.

სავალუტო აუქციონების გარდა ეროვნული ბანკი რყევების შესამცირებლად ყოველდღიურ ინტერვენციებს იყენებს. კერძოდ, როდესაც დღის განმავლობაში გაცვლითი კურსის რყევები აჭარბებს წინასწარ განსაზღვრულ ნიშნულს, ეროვნული ბანკი უცხოური ვალუტით ვაჭრობაში გარკვეული თანხით ერთვება.

13 ივლისის მდგომარეობით, საქართველოს ეროვნული ვალუტა აშშ დოლარის მიმართ 3,0624 GEL/$1 ნიშნულზეა.

ნიკა შენგელიას აზრით, მიუხედავად იმისა, რომ ეროვნული ბანკი ბაზარზე სავალუტო ინტერვენციებს ისევ გააგრძელებს, ლარის კურსის მერყეობა თვალშისაცემი სექტემბრის მეორე ნახევრიდან გახდება და ამის მიზეზი იმპორტის ზრდა იქნება.

„რაც შეეხება ინფლაციას, რომელიც თარგეთირებულთან შედარებით 3,1%-ით მეტია, ვფიქრობთ, ივლისი-აგვისტოს თვეში ამ მაჩვენებლის მნიშვნელოვანი ცვლილება მოსალოდნელი არ არის“, – აღნიშნა ნიკა შენგელიამ.

„საქსტატის“ ცნობით, წლიური ინფლაცია (2020 წლის ივნისი 2019 წლის ივნისთან შედარებით) კვლავ მაღალ დონეზე რჩება – 6,1%.

ეკონომისტი ვეფხია გიორგაძე კი თვლის, რომ ეროვნული ბანკი რეზერვების გაყიდვით ლარის კურსის სტაბილურობას დიდხანს ვერ უზრუნველყოფს. 

„ეროვნული ბანკი თუ არ შეამცირებს რეალურად ფულის მასას ეკონომიკაში და მის რაოდენობას ეკონომიკის ადეკვატურს არ გახდის, მაშინ მას მოუწევს ქარის წისქვილებთან ბრძოლა, ლარის კურსიც მეტად გაუფასურდება, ვერც ინფლაციას გაართმევს თავს და ეს რეზერვიც შემოელევა გზადაგზა“, – აღნიშნა ვეფხია გიორგაძემ „Sputnik–საქართველოსთან“ საუბრისას.

როგორც ვეფხია გიორგაძემ განმარტა, ეროვნულ ბანკს ეკონომიკაში ფულის მასის შემცირება რეზერვების გამოყენების გარეშეც შეუძლია რეფინანსირების სესხების შემცირების ხარჯზე.

„რეფინანსირების სესხი ის ინსტრუმენტია, რომლითაც ეროვნული ბანკი ახდენს კომერციული ბანკებისთვის მოკლევადიანი ლიკვიდობის მიწოდებას, აქ დავამატებდი, რომ ეროვნული ბანკი ვერ აკონტროლებს რეალურად – აქვს თუ არა მოკლევადიანი ლიკვიდობის პრობლემა კომერციულ ბანკს, ის ენდობა კომერციული ბანკებისგან შემოსულ მოთხოვნას, რის შემდეგაც ფული უკვე ეკონომიკაში ხვდება“, – აღნიშნა ვეფხია გიორგაძემ.

ვეფხია გიორგაძის თქმით, დღეს საქართველოს სავალუტო რეზერვების მოცულობა ისედაც ნაკლებია საერთაშორისო ორგანიზაციების მიერ განსაზღვრულ მინიმალურ მაჩვენებელზე. რეზერვები კი ქვეყნის მხრიდან საგარეო ვალდებულებების შესრულების – უცხოური ვალუტით გადახდების შეუფერხებლად განხორციელების ერთგვარი გარანტია და ერთ-ერთი მთავარი ფაქტორია, რომელსაც საერთაშორისო დონორი ორგანიზაციები ქვეყნისთვის სესხების გაცემისას ითვალისწინებენ.

ნატა პატარაია

 

229
კიკვიძის პარკი

თბილისში კიკვიძის განახლებული პარკი გაიხსნა

0
პარში მოეწყო სპორტული და სამაგიდო თამაშების მოედნები, დასასვენებელი პავილიონები, სარწყავი, განათებისა და ვიდეომეთვალყურეობის სისტემები

თბილისი, 14 ივლისი — Sputnik. თბილისში ვეტერანთა კულტურისა და დასვენების განახლებული პარკი (კიკვიძის) გაიხსნა, იუწყება მერიის ვებგვერდი.

გახსნის ღონისძიებას დედაქალაქის მერი კახა კალაძე და საქართველოს პრემიერ-მინისტრი გიორგი გახარია დაესწრნენ.

თბილისის მერმა მოსახლეობას განახლებული პარკის გახსნა მიულოცა. მისი განცხადებით, პარკში შესაბამისი სივრცე ყველა თაობის ადამიანისთვის მოეწყო.

„თბილისს კიდევ ერთი მნიშვნელოვანი რეკრეაციული სივრცე შეემატა. რაც შეეხება პარკს, იგი მთლიანად იქნა რეაბილიტირებული. გაჩნდა ახალი ზონები, ბავშვებისთვის შესაბამისი ადგილები, სადაც განთავსებულია ატრაქციონები. ყველა თაობის ადამიანისთვის არის შესაბამისი ზონა, სადაც გაქვთ შესაძლებლობა, თქვენი შვილებითა და შვილიშვილებით დაისვენოთ. ნამდვილად მიხარია, რომ ჩვენთან უკვე ჩნდება ის საპარკო კულტურა, რაც ყველა განვითარებულ ქვეყანაშია. ჩვენ გვაქვს პარკების ნაკლებობა, მაგრამ პირობა მაქვს მიცემული თბილისელებისთვის, რომ ჩვენი ქალაქი ევროპაში ყველაზე მწვანე, ყველაზე მოწესრიგებული, განახლებული, უსაფრთხო და კეთილმოწყობილი იქნება“, - განაცხადა კახა კალაძემ.

რეაბილიტაციის ფარგლებში, პარკს შეუერთდა მიმდებარედ არსებული ტერიტორია, მოეწყო სპორტული და სამაგიდო თამაშების მოედნები, დასასვენებელი პავილიონები, სარწყავი, განათებისა და ვიდეომეთვალყურეობის სისტემები.

პარკის ტერიტორიაზე განთავსდა შინაური ცხოველების სასეირნო სივრცე, ველო და სარბენი ბილიკები. ერისთავის ქუჩის მხრიდან კი, მოეწყო პარკში შესასვლელი პანდუსი. რეაბილიტაცია ჩაუტარდა პარკში არსებული შენობებსა და შადრევანს.

ტერიტორიაზე, რომლის ფართობიც 72 ათას 100 კვადრატული მეტრია, ჯამში, 12 ათას 124 ძირი ხე-მცენარე დაირგო. სამუშაოების განსახორციელებლად დედაქალაქის ბიუჯეტიდან 4 მლნ 500 ათასი ლარი გამოიყო.

0
თემები:
თბილისის მერია