ფრეგატი „ფლოტის ადმირალი კასატონოვი“

მიმოხილვა: ანტიტორპედო რუსული ფრეგატების უნიკალური თავდაცვა

192
(განახლებულია 14:36 17.06.2020)
რუსეთში გემთმშენებლობის საქმე აღორძინების გზაზეა, რასაც ნატოს გაატიურებაც უწყობს ხელს. ქვეყნის ინტერესების დასაცავად მსოფლიო ოკეანეში სარაკეტო ხომალდები იგება.

ალექსანდრ ხროლენკო

პროექტ 22350-ის პირველმა სერიულმა ფრეგატმა „ფლოტის ადმირალი კასატონოვი“ ღირსეულად დაასრულა გამოცდა ჩრდილოეთისა და ბალტიის ფლოტებში და რუსეთის სამხედრო–საზღვაო ფლოტის შემადგენლობაში 2020 წლის ივლისის დასაწყისში შევა. ამ პროექტის სარაკეტო უჩინარი ხომალდების გამოჩენა ფლოტის შესაძლებლობებში მნიშვნელოვან ნახტომს ნიშნავს. 

ფრეგატი აღჭურვილია 16 ფრთოსანი რაკეტით „ონიქსი“ ან „კალიბრ-НК“, რომლებსაც აქვთ უნარი, თანაბარი წარმატებით „იმუშაონ“ მოწინააღმდეგის ხომალდებზეც და სანაპირო ზონაზეც. ბორტზე ასევე არის საზენიტო კომპლექსი „რედუტი“, 130 მმ-იანი საარტილერიო დანადგარი А-192, ნავსაწინააღმდეგო მოიერიშე კომპლექსი „პაკეტი-НК“ და ნავსაწინააღმდეგო ვერტმფრენი Ка-27. კორპუსი აგებულია გარჩევადობის შემცირების ტექნოლოგიის გამოყენებით და სავარაუდო მოწინააღმდეგეს გაუჭირდება ხომალდის აღმოჩენა რადარებით.

„ადმირალ კასატონოვის“ დანიშნულებაა წყალზედა და წყალქვეშა ხომალდების აღმოჩენა–განადგურება, გემებისა და ხომალდების ჰაერსაწინააღმდეგო, რაკეტსაწინააღმდეგო და ნავსაწინააღმდეგო თავდაცვა, საზღვაო დესანტებთან ერთობლივი მოქმედება, სამოქალაქო ხომალდებისა და საწარმოო ობიექტების დაცვა. გემის წყალწყვა 5 ათასი ტონაა, სიგრძე – 135 მეტრი, სიგანე — 16 მეტრი, სიჩქარე — 30 კვანძი, ცურვის სიშორე – 4 500 მილი, ავტონომიურობა – 30 დღე-ღამე, ეკიპაჟი — 17 კაცი.

უნიკალური შეიარაღება

სახელმწიფო გამოცდისას შემოწმდა „ადმირალ კასატონოვის“ ყველა საპროექტო მახასიათებელი: ხომალდის მექანიზმების, რადარების სისტემების, საბორტო შეიარაღებისა და ატომსაწინააღმდეგო თავდაცვის მუშაობა. ერთ-ერთ ეტაპზე ფრეგატს სასწავლო ტორპედო ესროლეს, რა დროსაც „ადმირალმა კასატონოვმა“ წარმატებით გამოიყენა „პაკეტ-НК“-ს ანტიტორპედო. 

ხომალდების წყალქვეშა თავდაცვის სისტემას ანალოგი არ აქვს მსოფლიოში. კომპლექს „პაკეტ-НК“-ს სისტემა წყალქვეშ მოძრაობს დაახლოებით 50 კმ/სთ სიჩქარით. სამიზნის დაზიანების სიზუსტეს უზრუნველყოფს ანტიტორპედოს ინერციული სისტემა და აკუსტიკური აქტიურ–პასიური თვითდამიზნების სისტემა.

ნავსაწინააღმდეგო კომპლექსი „პაკეტ-НК“-ს დანიშნულებაა წყალქვეშა ნავებისა და ტორპედოების განადგურება ხომალდის უახლოეს ზონაში. შედგება მართვის სისტემის, სპეციალიზებული ჰიდროაკუსტიკური დამიზნების სადგურის, გამშვები დანადგარებისა და ყველაზე მცირეგაბარიტიანი ტორპედოებისგან. „პაკეტს“ აქვს უნარი, ავტონომიურად ან სახომალდო კონტურის შემადგენლობაში ავტომატურ რეჟიმში უზრუნველყოს დამიზნება სახომალდო ჰიდროაკუსტიკური კომპლექსებისა და სადგურების მეშვეობით.

შემტევი ხომალდების ტორპედოების ავტონომიური აღმოჩენა, პარამეტრების კლასიფიკაცია და განსაზღვრა თავდაცვის ორმაგ სიმტკიცეს უზრუნველყოფს.

განამტკიცებს რა ნავსაწინააღმდეგო თავდაცვას, უნიკალური კომპლექსი მნიშვნელოვნად ამაღლებს ხომალდის გამძლეობას. ეს შეიარაღების პრინციპულად ახალი სისტემაა.

რუსეთის სამხედრო ფლოტის ანდრიას დროშის აღმართვამდე დათვლილი დღეები რჩება, მერე კი მძლავრ და ლამაზ ხომალდს ათეული წლების განმავლობაში დაძაბული სამსახური ელის.

„ადმირალ კასატონოვის“ ბედი სასიკეთოდ ვითარდება. ფრეგატი საკმაოდ სწრაფად აიგო. წყალში ჩაშვების საზეიმო ცერემონია 2014 წლის 12 დეკემბერს შედგა — ადმირალ ვლადიმირ კასატონოვის ვაჟის, ასევე ადმირალ იგორ კასატონოვის თანდასწრებით. ასეთი წარმატება ყველა ხომალდს როდი ხვდება წილად.

 

192
გიორგი გახარია

გახარიას პარტია ივანიშვილის გეგმა „ბ“ თუ რეალური ოპოზიცია?

141
(განახლებულია 19:05 15.04.2021)
დღეს უკვე ნათელია, რომ ყოფილი პრემიერ-მინისტრი გიორგი გახარია, რომელსაც ბოლო სოციოლოგიური კვლევებით საკმაოდ კარგი რეიტინგი ჰქონდა, ნამდვილად და სერიოზულად აპირებს პარტიის შექმნას და ადგილობრივი თვითმმართველობის არჩევნებში მონაწილეობას.

პარლამენტში უკვე გაჩნდა ექვსკაციანი ჯგუფი, რომელთაც არა მხოლოდ „ქართული ოცნება“, არამედ ის საპარლამენტო თანამდებობობიც დატოვეს, რაც უმრავლესობის კვოტით ჰქონდათ მიღებული, და ეს კომიტეტის თავმჯდომარის პირველი მოადგილის ავტომობილითა და სხვა ამქვეყნიური სიკეთეებით დატვირთული პოსტებია. სავარაუდოდ, გახარიას კვოტით პარლამენტში გაცილებით მეტი ადამიანი უნდა იყოს და თუ რომელიმეს კიდევ გაუჩნდა რაიმეს მიმართ პროტესტის გრძნობა, ეს შემადგენლობა ერთ კარგ შვიდკაციან ფრაქციასაც შექმნის. თუმცა, ეს მაინც არ წყვეტს პარლამენტის ლეგიტიმურობის პრობლემას, რომელსაც ოპოზიცია მაინც ერთპარტიულს უწოდებს.

და, მაინც, რა მიზნები აქვს და როდის განაცხადებს ამის შესახებ გახარია? სავარაუდოდ, მაისის ბოლოს უკვე ცნობილი უნდა გახდეს მისი პარტიის სახელწოდება, მიზნები, ამოცანები და მიზნისკენ სვლის გზები, რადგან ახლადშექმნილი პარტიისთვის 5-6 თვე ნამდვილად საჭიროა, რათა არჩევნებისთვის კარგად მოემზადოს.

ამბობენ, რომ გახარიამ, შესაძლოა, ზუგდიდში ან თბილისში გამოსცადოს საკუთარი რეიტინგი. როგორც ირკვევა, ზუგდიდში მას უეჭველ გამარჯვებას ჰპირდებიან, თბილისში კი, შესაძლოა, უფრო გაუჭირდეს მაკო გომურისა და 20 ივნისის მოვლენების გამო. თავის მხრივ, ბევრი ხმა დადის იმის თაობაზე, რომ თბილისის მერის არჩევნებზე სერიოზული კონკურენციაა მოსალოდნელი და დიდი გრეჩიხიდან დაწყებული, პატარა პარტიებით დასრულებული, ყველა აპირებს ძალების მოსინჯვას.

ოპოზიციაში ჯერ კიდევ ფიქრობენ, დაუჯერონ თუ არა ყოფილ პრემიერს ოპოზიციური ზრახვები. თუმცა ნებისმიერ შემთხვევაში სურთ, გახარიას პარტიამ ხმები მხოლოდ „ქართულ ოცნებას“ გაუყოს. ბევრს სჯერა, რომ გახარიას პარტია ივანიშვილის გეგმაა „ქართული ოცნების“ იმედგაცრუებული ნაწილისთვის და ის სწორედ მისი მეშვეობით გეგმავს ჯერ მესამე ძალის, შემდეგ კი კოალიციის შექმნას 2024 წელს.

„ჯერჯერობით ჩვენ გახარიასგან და მისი გარემოცვიდან რაიმე პოლიტიკური პოზიცია არაფერზე მოგვისმენია, ამიტომ, მე არ ვარ შეთქმულების თეორიების მომხრე, მაგრამ, რა თქმა უნდა, იმ ვერსიას, რომ ეს ყველაფერი არის მცდელობა “ბ“ გუნდის გაკეთების ივანიშვილის გარშემო, საფუძველი აქვს. თუ ეს ასე არ არის, გვაჩვენონ თავისი მოქმედებებით. თუ მთავრობის უნდობლობას, პოლიტპატიმრების გათავისუფლებას და ვადამდელ არჩევნებს უჭერენ მხარს, ძალიან კარგი. ამასთან, გიორგი გახარიამ კითხვებს პასუხი უნდა გასცეს. ჩრდილში ყოფნა და მოლოდინის რეჟიმის შექმნა არასერიოზულად გამოიყურება“, – აცხადებს „ევროპული საქართველოს“ ლიდერი გიგა ბოკერია.

ხელისუფლებაში კი დარწმუნებული არიან, რომ გახარიას რეალური შედეგის მიღწევა გაუჭირდება და მისი მაღალი რეიტინგი მხოლოდ „ქართული ოცნების“ პრემიერ-მინისტრობით იყო გამოწვეული. ასეა თუ ისე, ქართულ პოლიტიკაში მალე საინტერესო სიახლეების მომსწრე გავხდებით. რა ნიშას აირჩევს გახარია, სულ მალე გამოჩნდება. ჯერჯერობით მხოლოდ იმის თქმა შეიძლება, რომ ის რადიკალიზაციის წინააღმდეგია და გუნდიც საკმაოდ მოძლიერებული ჰყავს სხვადასხვა პოზიციებზე.

141
საპროტესტო აქცია

პროტესტი და შეთავაზება „ნამახვანჰესთან“ დაკავშირებული სკანდალი გრძელდება

60
(განახლებულია 18:13 15.04.2021)
ეკლესიამ მოსახლეობის დასამშვიდებლად სახელმწიფოსა და მშენებლობის მოწინააღმდეგეთა შორის დიალოგის პროცესში ჩარევა გადაწყვიტა

 

თბილისი, 15 აპრილი – Sputnik. „ნამახვანჰესის“ მშენებლობის მოწინააღმდეგეთა პროტესტი უკვე ღამის საათებშიც არ წყდება, რის გამოც საქართველოს საპატრიარქომ დაპირისპირების დასრულების მიზნით მხარეებს შუამავლობა შესთავაზა. 

„ნამახვანჰესის“ კასკადმა მდინარე რიონზე უნდა დააკავშიროს ორი ჰიდროელექტროსადგური  – 333 მგვტ სიმძლავრის „ქვემო ნამახვანი“ და 100 მგვტ სიმძლავრის  „ზემო ნამახვანი“.

მიუხედავად იმისა, რომ პროექტი საქართველოს ენერგეტიკული დამოუკიდებლობისთვის მნიშვნელოვან როლს ასრულებს, ჰესის მშენებლობის მოწინააღმდეგეთა მოძრაობა სულ უფრო მასშტაბურ სახეს იძენს. პროტესტს ორი მიზეზი აქვს: ერთი - ესაა საფრთხე, რომელიც მომავალი კაშხლის შესაძლო გარღვევამ შეიძლება შეუქმნას მთელ იმერეთის რეგიონს, მეორე - საქართველოში თურქული კომპანიის გამოჩენა და, რაც მთავარია, მისთვის მიწის 99 წლის ვადით გადაცემა.

ამავე დროს ცნობილი ხდება, რომ ჰესის მშენებლობისთვის განკუთვნილი მიწისთვის ნორვეგიულმა კომპანია Clean Energy Group-მა, რომელმაც მშენებლობა თურქულ კომპანია ENKA-ს დაავალა, ადგილობრივ მცხოვრებლებს  34 მილიონი ლარი გადაუხადა. სამშენებლო ტერიტორიასთან  ახლოს მცხოვრები 270 ოჯახიდან კომპენსაციის აღებაზე უარი არცერთს არ უთქვამს.

მშენებლობის მოწინააღმდეგეთა რთული ღამე

პროტესტმა უკვე იმერეთის რეგიონის ცენტრს მიაღწია და არ არის გამორიცხული, მთელ საქართველოს მოედოს. ამჟამად აქციის რამდენიმე ათეული მონაწილე ქუთაისის ცენტრშია შეკრებილი და უკმაყოფილებას იქ გამოხატავს. 

„ჩვენ მთელი ღამე აქ გავათიეთ და მომდევნო დღეებშიც ასე გავაგრძელებთ. თუ ხელისუფლება არ გაითვალისწინებს ჩვენს მოთხოვნებს, მთელი ქვეყნის მასშტაბით გამოვიწვევთ ბლოკირებას... თუ ხელისუფლება ჩვენს მოთხოვნებს არ გაითვალისწინებს, ქვეყნის ყველა რეგიონის პიკეტირებას მოვახდენთ“, – განაცხადა საპროტესტო აქციის ერთ–ერთმა ორგანიზატორმა ვარლამ გოლეთიანმა.

აქციის მონაწილეები ხელისუფლებისგან ითხოვენ ჰესის მშენებლობაზე უარის თქმას და ხეობის ტერიტორიიდან ინვესტორების გაყვანას, მოსახლეობისთვის კი მიწების დაბრუნებას.

ხელისუფლების პოზიცია

საქართველოს მთავრობა ჰესის მშენებლობაზე უარის თქმას არ აპირებს, პირველ რიგში, ენერგოუსაფრთხოების მოსაზრებით შიდა ბაზარზე ელექტროენერგიის მზარდი მოხმარების ფონზე. იანვარში მოხმარებული ელექტროენერგიის 34% იმპორტირებული იყო.

„ძალიან სერიოზულ დათმობებზე წამოვიყვანეთ თავად ინვესტორი კომპანია, რომელმაც, პრაქტიკულად, გადადო მთელი ერთი წლით კაშხლის მშენებლობა, რადგან კაშხალი იწვევდა მოსახლეობაში ყველაზე მეტ წუხილს. ახლა მიმდინარეობს მხოლოდ და მხოლოდ გზის და მისასვლელი ინფრასტრუქტურის მშენებლობა“, – აღნიშნა ეკონომიკის მინისტრმა ნათია თურნავამ.

მისი თქმით, ამ კვირაში შეხვედრა იგეგმება ყველა დაინტერესებულ არასამთავრობო ორგანიზაციასთან და ექსპერტთან, გეოლოგებთან, მეცნიერებთან, ასევე აქტივისტებთან, რათა პასუხი გაეცეს ყველა მათ კითხვას.

ეკლესიის ჩარევა

ეკლესიამ მოსახლეობის დასამშვიდებლად სახელმწიფოსა და ჰესის მშენებლობის მოწინააღმდეგეთა შორის დიალოგის პროცესში ჩარევა გადაწყვიტა. 

„ნამახვანჰესის“ საკითხზე ვიქნებით მედიატორი, ვმუშაობთ ორივე მხარესთან, რომ არ მოხდეს რადიკალიზაცია და დარჩეს სივრცე დიალოგისთვის“, – აღნიშნა საპატრიარქოს საზოგადოებასთან ურთიერთობის სამსახურის ხელმძღვანელმა, დეკანოზმა ანდრია ჯაღმაიძემ საპატრიარქოს მიერ „ნამახვანჰესთან“ დაკავშირებით გავრცელებული განაცხადების კომენტირებისას.

მისი თქმით, არის გარკვეული კითხვები კონტრაქტის პირობებთან, პროექტის მიზანშეწონილობასთან დაკავშირებით, რომლებზეც საზოგადოებამ სრული ინფორმაცია უნდა მიიღოს.

ამასთან, ანდრია ჯაღმაიძემ დასძინა, რომ საპატრიარქო ჰესის მშენებლობის საკითხში ნეიტრალიტეტს ინარჩუნებს. მისი ამოცანაა, არ დაუშვას პროცესების რადიკალიზაცია.

რა არის  „ნამახვანჰესი“

„ნამახვანჰესი“ კასკადი ორი ჰესისგან შედგება: ერთი კაშხლის ფართობია 1 კვადრატული კილომეტრი, მეორე კაშხლის ფართობი - 5,1 კვადრატული კილომეტრი. თითოეული კაშხლის ფართობი საქართველოში არსებულ ნებისმიერ კაშხალზე ნაკლებია. მაგალითად, თბილისის წყალსაცავის ფართობი 11,6 კვ.კმ-ია, „ენგურჰესის“ – 13,6 კვ.კმ, შაორის წყალსაცავის – 9,1 კვ.კმ.  

აღსანიშნავია, რომ კაშხლების დახმარებით დარეგულირდება წყლის დონე მდინარეში, რათა ხეობაში წყალდიდობა თავიდან იქნას აცილებული.

პროექტის დასრულების შემდეგ საქართველოში ელექტროენერგიის წლიური წარმოება 15%-ით გაიზრდება. კასკადის მშენებლობაში 830 მილიონი დოლარის დაბანდება იგეგმება.

 

60
ხანძარი

შუახევში ხანძრის შედეგად 14 ადანიანი უსახლკაროდ დარჩა

0
(განახლებულია 10:39 16.04.2021)
შუახევის მერიის წარმომადგენელთა განცხადებით, უწყება დაზარალებულ ოჯახებს შესაბამის დახმარებას გაუწევს, მანამდე კი ისინი ნაქირავებ ფართებში დაბინავდებიან.

თბილისი, 16 აპრილი - Sputnik. შუახევის მუნიციპალიტეტში გაჩენილი ხანძრის შედეგად სამი საცხოვრებელი სახლი დაიწვა, იუწყება „აჭარის ტელევიზია“

შემთხვევა სოფელ ბარათაულში გუშინ, გვიან ღამით მოხდა. გავრცელებული ინფორმაციით, ხანძრის შედეგად ასევე დაიწვა საქონლის სამი სადგომი, რასაც 16 სული პირუტყვი ემსხვერპლა.

ცეცხლი თავდაპირველად ხის სახლს გაუჩნდა და სწრაფად გავრცელდა. შემთხვევის ადგილზე მისულმა სახანძრო–სამაშველო ბრიგადებმა ცეცხლის ლოკალიზება მოახერხეს.

შუახევში გაჩენილი ხანძრის შედეგად 14 ადამიანი უსახლკაროდ დარჩა. შუახევის მერიის წარმომადგენელთა განცხადებით, უწყება დაზარალებულ ოჯახებს შესაბამის დახმარებას გაუწევს, მანამდე კი ისინი ნაქირავებ ფართებში დაბინავდებიან.

ხანძრის შედეგად დაზარალებული თითოეული ოჯახისთვის აჭარის ბიუჯეტში ერთჯერადად 15 ათასი ლარის ოდენობის დახმარებაა გამოყოფილი.

0
თემები:
შემთხვევები საქართველოში