გაზის მომპოვებელი საწარმო

ახალი საფრთხე: კატარი მზადაა გაზის ომის წამოსაწყებად

85
(განახლებულია 17:16 18.05.2020)
მას შემდეგ, რაც პანდემიისა და თბილი ზამთრის გამო ბუნებრივ გაზზე მსოფლიო ფასები დაეცა, ყველაზე მძიმე სიტუაციაში აღმოჩნდა კატარი — ბუნებრივი აირის მთავარი მომწოდებელი.

ანალიტიკოსები ვარაუდობენ, რომ კრიზისის შედეგებთან გამკლავების მიზნით სამეფომ შესაძლოა საფასო ომი გამოაცხადოს გაზის ბაზარზე, როგორც ეს საუდის არაბეთმა გააკეთა ნავთობბაზარზე.

რა საფრთხეები შეიძლება ამან შეუქმნას გაზის კიდევ ერთ უმსხვილეს მომპოვებელსა და მომწოდებელ რუსეთს, სააგენტო РИА Новости მიმოიხილავს.

რთული არჩევანი

წლის დასაწყისიდან ფასები თითქმის ორჯერ დაეცა: ევროპასა და აშშ-ში ცისფერ საწვავს 1999 წლის მინიმუმით ჰყიდიან. 

„გაზის ბაზარს არ შეუძლია ჭარბი შეთავაზებისა და თბილი ამინდის ერთდროულად „გადახარშვა“, — ჯერ კიდევ იანვარში აცხადებდა ნიუ-იორკის გაზის ჰეჯ-ფონდ Statar Capital-ის დამაარსებელი რონ ოზერი.

პანდემიამ ახალი დარტყმა მიაყენა მოთხოვნას, რამაც კატარი ძალიან მძიმე მდგომარეობაში ჩააყენა.

სამეფოს უზარმაზარი დანაკარგები აქვს და მალე რთული არჩევანის წინაშე აღმოჩნდება: ან წარმოება უნდა შეამციროს, ან საფასო ომი წამოიწყოს მომხმარებლებისთვის დიდი ფასდაკლების შეთავაზების გზით. სხვაგვარად კატარი, მისი საწვავის შედარებით მაღალი ფასების გამო, ბაზრის ნაწილს დაკარგავს და  ლიდერობას ავსტრალიას დაუთმობს.

„ბუნებრივი აირის მსოფლიოში უდიდესი ექპორტიორი, რომელიც დაბალი მოთხოვნითა და შენახვაზე დიდი ხარჯებითაა დათრგუნული, შესაძლოა მალე ბაზრისთვის ბრძოლაში ჩაერთოს“, — წერს Bloomberg-ი.

ჯერ კიდევ თებერვალში დოჰამ ბუნებრივი გათხევადებული აირის ნაკადი კორონავირუსით შეპყრობილი აზიიდან ევროპისკენ მიმართა, მაგრამ ამან ვერ უშველა. პანდემიამ ბებერი კონტინენტიც მოიცვა და ენერგორესურსების შესყიდვები იქაც მკვეთრად დაეცა.

კატარისთვის ერთ-ერთ ვარიანტად რჩება წარმოების შემცირება, მაგრამ ეს მისი ყველა ამბიციური გეგმის კრახს ნიშნავს. გასული წლის იანვარში სამეფომ განაცხადა, რომ OPEC-დან გადიოდა სწორედ იმ მიზნით, რომ გათხევადებულ ბუნებრივ აირზე კონცენტრირებულიყო. ქვეყანა 2024 წლისთვის მიწოდებების გაზრდას გეგმავდა 77-დან 110 მლნ ტონამდე, ხოლო 2027 წელს 126 მლნ ტონამდე აპირებდა გაზრდას.

როგორც მაშინ აცხადებდა ქვეყნის ენერგეტიკის მინისტრი საად ბენ შრიდ ალ-ქააბი, ამისთვის ყველა რესურსი არსებობდა. გარდა ამისა, კატარი გეგმავს 2024 წლისთვის ოთხი საწარმოო ხაზი აამუშავოს გაზის გათხევადებისთვის. 

„ექსპორტის შემცირება სახელმწიფო ბიუჯეტს შემოსავლებს აკლებს და ავსტრალიას ნამდვილად შეუძლია კატარის შევიწროება“, — აღნიშნავს Bloomberg-ი.

თუმცა ანალიტიკოსები არ გამორიცხავენ, რომ სამეფოს საბოლოოდ მაინც მოუწევს მადის შეზღუდვა.

„გაზმატარებლების დეფიციტი, რაც ფრახტის კურსს ზრდის, 2018 წლიდან შეინიშნება. და ახლა კატარი შესაძლოა მათ უკმარისობას შეეჯახოს. ასეთ ვითარებაში კატარის მიერ ფასების დაკლება გათხევადებულ ბუნებრივ აირზე გაძვირებას გამოიწვევს, ვინაიდან მათში ხომალდების იჯარის ფასიცაა გათვლილი“, — განმარტავს დამოუკიდებელი სამრეწველო ექსპერტი ალექსეი ხაზანოვი.

თუ კატარი მაინც წამოიწყებს საფასო ომს, კოტირებები შესაძლოა უარყოფითი ნიშნულებისკენ წავიდეს, როგორც ეს ნავთობთან დაკავშირებით მოხდა აპრილში. თუმცა მთავარი უსიამოვნება ისაა, რომ მოპოვება არარენტაბელური გახდება წარმოების დაბალი თვითღირებულების პირობებშიც კი.

ვინ წააგებს

ექსპერტები ხაზს უსვამენ: კატარის მცდელობა, წავიდეს გათხევადებულ აირზე ფასების უპრეცედენტო კლებაზე, უარყოფითად იმოქმედებს უამისოდაც ჭარბად გაჯერებულ გლობალურ ბაზარზე. თუმცა რუსეთი სხვებზე ნაკლებად დაზარალდება.

„გათხევადებული ბუნებრივი აირის როლი რუსეთის მიწოდებებში შედარებით მცირეა. რაც შეეხება მილსადენის გაზს, მისი ექსპორტირება გრძელვადიანი კონტრაქტების საფუძველზე ხდება და მასზე უარის თქმა დიდ ჯარიმებს ითვალისწინებს. ამიტომ ნაადრევია საუბარი მოსალოდნელ კატასტროფაზე რუსეთის ბიუჯეტისთვის, რომელიც მნიშვნელოვანწილად ნახშირწყალბადების გაყიდვით ფორმირდება“, — დარწმუნებულია ხაზანოვი.

ეკონომისტის განმარტებით, კატარს გაზის ექსპორტით რუსეთის შემოსავლების ჩამოშლა იმ შემთხვევაში შეეძლო, თუ ქვეყანა გაზსადენს ააგებდა თურქეთისკენ და იქ პროექტ Nabucco-ს შეუერთდებოდა, როგორც ამას XXI საუკუნის პირველ ათწლეულში ვარაუდობდნენ. მაგრამ პროექტს ხელი შეუშალა კატარსა და საუდის არაბეთს შორის დაპირისპირებამ და ასევე სამოქალაქო ომმა სირიაში, რის შემდეგაც Nabucco-მ ადგილი „თურქულ ნაკადს“ დაუთმო.

ექსპერტის თქმით, კატარის ნაბიჯებით უპირველესად ამერიკელები დაზარალდებიან, რომლებიც ბოლო წლებში აქტიურად უწევენ პოპულარიზაციას საკუთარ გათხევადებულ ბუნებრივ აირს ევროპის ქვეყნებში. ხაზანოვს მიაჩნია, რომ ამ სტრატეგიამ აშშ ჩიხში შეიყვანა, ვინაიდან ევროპელი მომხმარებლებისთვის ბევრად მომგებიანია რუსეთისგან შეიძინონ ბუნებრივი აირი, ვიდრე ოეკანის გაღმიდან მიიღონ ძვირადღირებული ნედლეული.

 

85
თბილისის აეროპორტი

როდის აღდგება ფრენები საქართველოს ცაზე და როგორი იქნება ვოიაჟი პანდემიის შემდეგ

102
(განახლებულია 19:10 25.05.2020)
პუბლიკაციაში გაგაცნობთ ავიაფრენებთან დაკავშირებულ იმ პროცედურებსა და რეგულაციებს, რაც საქართველოში პანდემიის დასრულების შემდეგ იქნება.

საქართველოს მთავრობა 1 ივლისიდან ტურისტების მიღებას და საერთაშორისო ავიაგადამზიდებისთვის ცის გახსნას გეგმავს. ხელისუფლების განცხადებით, ოცივე ავიაკომპანია, რომელიც საქართველოში პანდემიამდე ოპერირებდა, აპირებს რეისების განახლებას.

ამ ეტაპზე, რამდენიმე გამონაკლისის გარდა, საქართველო უცხოეთის მოქალაქეებისთვის ჩაკეტილია. კორონავირუსის გავრცელების პრევენციის მიზნით მრავალ ქვეყანაში შეწყვეტილია საერთაშორისო ფრენები. ჯერჯერობით კი არ არსებობს საერთო სახელმძღვანელო პრინციპი, რომელსაც ყველა ქვეყანა უნდა დაემორჩილოს ფრენების განახლების შემდეგ.

სპეცილისტები იმ სავარაუდო ტენდენციებზე საუბრობენ, რაც ტურიზმის აღდგენის შემდეგ იქნება.

სამოქალაქო ავიაციის სააგენტოს დირექტორი ლევან კარანაძე განმარტავს, რომ აეროპორტებში ოფიციალური პროცედურების დრო გახანგრძლივდება, თუმცა მგზავრთა ნაკადიც არ იქნება ისეთი, როგორც ეს პანდემიამდე იყო.

ჯერჯერობით ზოგადი რეკომენდაციები ასეთია: მგზავრებს ეკიპაჟის წევრებთან რაც შეიძლება ნაკლები შეხება უნდა ჰქონდეთ; ასევე მოკლე ფრენების შემთხვევაში არსებობს რეკომენდაცია, რომ საკვების დარიგებაც შეიზღუდოს. მოკლე ფრენებად მიიჩნევა სამ საათზე ნაკლები ხანგრძლივობის ფრენა. იქ, სადაც მგზავრთა კონცენტრაცია მაღალია, მაგალითად, „ჩექ-ინის“, რეგისტრაციისას, თუ ბარგის მიღების დროს, არსებობს ფიზიკური დისტანციის დაცვის ზოგადი რეკომენდაცია. ასევე არსებობს რეკომენდაციები ჰაერის ფილტრაციასთან, ვენტილაციასთან, ხშირ დეზინფექციასთან დაკავშირებით როგორც ტერმინალებში, ისე საჰაერო ხომალდებზე.

შესაძლოა საჰაერო ხომალდზე ხელბარგის ატანა შეიზღუდოს. არც ისაა გამორიცხული, რომ მგზავრებს იმუნური პასპორტი, ტესტირების ჩატარება და რეგისტრაციის დამოუკიდებლად გავლა მოსთხოვონ. ამასთან, მსოფლიოს ზოგიერთმა ქვეყანამ, წამყვან აეროპორტებთან ერთად, ზრუნვა ბიომეტრიული ჩასხდომის დანერგვაზეც დაიწყო. ეს ნიშნავს იმას, რომ პასპორტის როლს მგზავრის სახე შეითავსებს.

როგორც „Sputnik–საქართველოს“ ეკონომიკისა და მდგრადი განვითარების სამინისტროში განუცხადეს, პროტოკოლი ამ დროისთვის შემუშავების პროცესშია.

„პროტოკოლი შემუშავების პროცესშია. ჩართულია ყველა შესაბამისი უწყება და პირობები ეცნობება მგზავრებს, ავიასაწარმოებს და მომსახურე პერსონალს. ამ ეტაპზე მხოლოდ ამის თქმა შეგვიძლია“, – აცნობეს სააგენტოს.

უწყებაში გვპირდებიან, რომ უმკაცრესად იქნება დაცული უსაფრთხოების საერთაშორისო გაიდლაინები მთელი ტურისტული სექტორისთვის. საქართველოში სრულად დაინერგება ჯანდაცვისა და ტურიზმის მსოფლიო ორგანიზაციების გაიდლაინები, რაც განამტკიცებს საქართველოს, როგორც უსაფრთხო მოგზაურობის ქვეყნის იმიჯს მსოფლიოში.

ამასობაში უკვე არაერთმა კომპანიამ გამოთქვა სურვილი და მზადყოფნა, რომ აღდგეს ქვეყნებს შორის რეგულარული მიმოსვლა.

ავიაკომპანიებს, რომელთა ფრენები COVID-19-ის გავრცელებასთან დაკავშირებით გაუქმდა, მგზავრებისთვის კომპენსაციის გადახდა რეგულარული ფრენების აღდგენიდან ორი თვის განმავლობაში მოუწევთ. მგზავრს კი, რომლის ფრენაც COVID-19-ის პრევენციის ფარგლებში გაუქმდა, უფლება აქვს შეცვალოს ბილეთში მითითებული მგზავრობის თარიღი მისი სურვილისამებრ, დამატებითი ანაზღაურების გარეშე, ან მოითხოვოს გამოუყენებელი ბილეთის საფასურის ანაზღაურება საქართველოს მიერ რეგულარული ფრენების აღდგენიდან ორი თვის გასვლის შემდეგ.

ასეა თუ ისე, ცხოვრება ნელ-ნელა ჩვეულ რეჟიმს უბრუნდება. მოგზაურებისთვის კი (და არა მხოლოდ მათთვის) 1 ივლისი, სავარაუდოდ, ყველაზე დიდი დღესასწაული გახდება.

გისურვებთ უსაფრთხო და მხიარულ მგზავრობას.

 

102
მზის პანელები

9 მილიონის გრანტები სოფლად ბიზნესის განვითარებისთვის როგორ მოვიპოვოთ

1250
(განახლებულია 15:25 25.05.2020)
ალბათ საკამათო არაა, რომ ქვეყნის ეკონომიკური ზრდისა და განვითარებისთვის დიდი მნიშვნელობა ენიჭება სოფლის განვითარებას. ბოლო წლებია ამ მიმართულებით საქართველოში მნიშვნელოვანი ნაბიჯები იდგმება.

რამდენიმე დღეს წინ სოფლად ბიზნესის განვითარების დასახმარებლად ევროკავშირმა (EU) და გაეროს განვითარების პროგრამამ (UNDP) 9 მლნ ლარის ღირებულების საგრანტო პროგრამა გამოაცხადა. საგრანტო პროგრამის მიზანი სოფლად არასასოფლო-სამეურნეო სამეწარმეო საქმიანობის განვითარებაა. კერძოდ, არაფერმერული ბიზნესის განვითარება, სტაბილური სამუშაო ადგილების შექმნა, ბუნებრივი რესურსების მართვა და კლიმატის ცვლილების შერბილებისთვის ხელის შეწყობა.

საგრანტო პროგრამის პირობები:

აღნიშნული საგრანტო პროგრამა განხორციელდება 8 მუნიციპალიტეტში – ახალქალაქში, ბორჯომში, დედოფლისწყაროში, თეთრიწყაროში, ლაგოდეხში, ქედაში, ხულოსა და ყაზბეგში. პროგრამის პირველ ეტაპზე განცხადებები მიმდინარე წლის 1 აგვისტომდე მიიღება.

წარმოდგენილი პროექტის მთლიანი ღირებულების არანაკლებ 20%-იანი თანადაფინანსება ბენეფიციარებმა უნდა უზრუნველყონ. თავად სააგენტო კი თითოეულ ბიზნეს-პროექტზე გასცემს არანაკლებ 20 ათასი და არაუმეტეს 170 ათასი ლარის ოდენობის გრანტს.

კომერციული საქმიანობისთვის გათვლილი განახლებადი ენერგიების და ენერგოეფექტური პროექტები, რომლებიც ითვალისწინებს განახლებადი ენერგიების გამოყენებით თერმულ იზოლაციას ან სითბო/სიცივის გენერირებას, დაფინანსდება შემდეგი პირობებით: სააგენტოს თანადაფინანსების მინიმალური ოდენობა შეადგენს 1 500 ლარს, ხოლო მაქსიმალური ოდენობა შეადგენს 30 000 ლარს.

როგორც ზემოთ აღვნიშნეთ, წარმოდგენილი პროექტის მთლიანი ღირებულების არანაკლებ 20%-იანი თანადაფინანსება ბენეფიციარმა უნდა უზრუნველყოს. ეს შეიძლება იყოს ფულადი სახსრები, ან ბენეფიციარმა უნდა წარმოადგინოს (პროგრამაში განაცხადის წარმოდგენამდე არაუმეტეს ერთი წლით ადრე რეგისტრირებული) მეწარმე იურიდიული პირი, რომელსაც საკუთრებაში გააჩნია ძირითადი საშუალებები.

ვის აქვს პროგრამაში მონაწილეობის მიღების უფლება:

- საქართველოს მოქალაქე მეწარმე ფიზიკურ და იურიდიულ პირს.

ბენეფიციარს მოეთხოვება შემდეგი პირობების დაცვა:

- პროექტის განსახორციელებლად შერჩეული უძრავი ქონება უნდა ჰქონდეს საკუთრებაში ან მიღებული ჰქონდეს იჯარით/აღნაგობით

- უძრავ ქონებას არ უნდა ედოს ყადაღა ან/და იპოთეკა (დასაშვებია მხოლოდ საქართველოში რეგისტრირებული კომერციული ბანკების იპოთეკა);

- არ უნდა გააჩნდეს დავალიანება სახელმწიფო ბიუჯეტის ან შემოსავლების სამსახურის მიმართ.

- იმ შემთხვევაში, თუ პოტენციური ბენეფიციარი არის სააგენტოს მიერ განხორციელებული რომელიმე პროექტის  ბენეფიციარი, მას განაცხადის წარმოდგენის მომენტისთვის არ უნდა ჰქონდეს პროექტის პირობები დარღვეული.

რა სახის პროექტები არ დაფინანსდება:

პროექტები, რომლებიც უკავშირდება

- სამხედრო, ბირთვულ, სპირტის და ალკოჰოლური სასმელების, თამბაქოს და სახიფათო ნივთიერებების წარმოებას;

- სასოფლო-სამეურნეო პროდუქციის პირველად და სურსათის წარმოებას

- სათამაშო ბიზნესს და აზარტულ თამაშებს;

- საფინანსო მომსახურებას (მათ შორის სალომბარდო);

- საქველმოქმედო საქმიანობას;

- ვაჭრობას.

როგორ მივიღოთ თანადაფინასება:
თანადაფინანსების მისაღებად შემდეგი ეტაპები უნდა გაიაროთ:

1. ვებ-გვერდზე რეგისტრაცია

განაცხადის შესავსებად უნდა დარეგისტრირდეთ ვებ-გვერდზე (www.arda.gov.ge). რეგისტრაცია ხორციელდება აუცილებელი ველების შევსების შემდეგ.

რეგისტრაციისას სავალდებულოდ შესავსები ველები:

• სახელი/გვარი;

• დაბადების თარიღი;

• პირადი ნომერი;

• მობ/ტელ ნომერი;

• დამატებითი ტელ. ნომერი;

• ელექტრონული ფოსტის მისამართი;

• პაროლი

განაცხადის შევსება
 1. შედიხართ ვებ-გვერდის საკუთარი მართვის პანელში;

2. აჭერთ ღილაკს „განაცხადის დამატება“;

3. ირჩევთ - „ფიზიკური პირი“/„იურიდიული პირი“;

4. ავსებთ განაცხადის ელექტრონულ ფორმას;

5.  ავსებთ განაცხადის ფორმაში ყველა აუცილებელ ველს;

6.  განაცხადის ფორმის შევსების შემდეგ ავსებთ ბიზნეს-მოდელის ელექტრონულ ფორმას;

7. ღილაკზე დაჭერით ადასტურებთ, რომ თქვენ მიერ მიწოდებული ინფორმაცია არის უტყუარი;

8.  აჭერთ ღილაკს „განაცხადის/ბიზნეს-მოდელის შენახვა“.

განაცხადის/ბიზნეს-მოდელის შესავსებ გვერდზე განთავსებულია ღილაკი „განაცხადის გაგზავნა“, რომელზეც დაჭერის შემდეგ ვებ-გვერდზე ჩნდება შეტყობინება განაცხადის გაგზავნის თანხმობის შესახებ – „ვეთანხმები“.

თქვენი თანხმობის შემთხვევაში შევსებული განაცხადი აღირიცხება სისტემაში და მიენიჭება სარეგისტრაციო ნომერი.

განაცხადის/ბიზნეს-მოდელის გადაგზავნაზე თანხმობის შემდგომ მისი კორექტირება დაუშვებელია.

აპლიკაციის შეფასება

პოტენციური ბენეფიციარების მიერ გაგზავნილი განაცხადები სააგენტოს მონაცემთა ბაზაში აღირიცხება და ავტომატურად გადაუნაწილდება სააგენტოს თანამშრომლებს განსახილველად. განაცხადების განხილვა ხორციელდება მხოლოდ იმ შემთხვევაში, თუ მოცემულ დროს ხელმისაწვდომია განაცხადით მოთხოვნილი თანადაფინანსების შესაბამისი ბიუჯეტი.

აღსანიშნავია, რომ პროექტის დასრულებიდან 3 წლის განმავლობაში ბენეფიციარი ვალდებულია ყოველწლიურად წარმოადგინოს აუდიტორული დასკვნა ფინანსური მდგომარეობის, პროფილის შენარჩუნების, დასაქმებულთა რაოდენობის, გადახდილი ხელფასების, გაწეული მომსახურების ან/და წარმოებული პროდუქციის მოცულობის და შესყიდული ნედლეულის (ღირებულება და მოცულობა) შესახებ.

სააგენტო უფლებამოსილია ნებისმიერ დროს, წინასწარი შეტყობინების გარეშე, პროექტის განხორციელების ადგილზე არსებული მდგომარეობის და პროექტის პროგრესის შეფასების მიზნით განახორციელოს ვიზიტი პირადად ან დამოუკიდებელი სპეციალისტის/ექსპერტის/აუდიტორის მეშვეობით.

გაითვალისწინეთ, პროგრამით გათვალისწინებული მიზნობრიობის შესაბამისი განაცხადის ფორმები და ბიზნეს-მოდელის ფორმა, ასევე მომზადების ინსტრუქციები მოცემულია ელექტრონული სახით ვებ-გვერდზე (www.arda.gov.ge) და ხელმისაწვდომი გახდება რეგისტრაციის გავლის შემდეგ.

1250
პოლიცია აჯარიმებს დამრღვევს

თბილისში პარკირების წესების დამრღვევები ჯარიმას არ გადაიხდიან - ვის ეხება ცვლილება

0
(განახლებულია 01:11 26.05.2020)
ყველა საქმეზე მოხდება განხილვის შეწყვეტა და ადმინისტრაციული სახდელისგან – ჯარიმისგან და შესაბამისი საურავისგან გათავისუფლება, რაც ჯამში დაახლოებით 850 000 ლარს შეადგენს.

თბილისი, 26 მაისი - Sputnik. ჯარიმის ან შესაბამისი საურავისგან გათავისუფლდებიან პირები, რომელთაც 2018 წლის 10 აპრილამდე, დედაქალაქის ტერიტორიაზე ავტოტრანსპორტის პარკირების წესების დარღვევისთვის ადმინისტრაციული სამართალდარღვევა ჩაიდინეს, იუწყება საზოგადოებრივი მაუწყებლის პირველი არხი.

შესაბამის კანონმდებლობაში განსახორციელებელი კანონპროექტის ინიციატორები არიან: საპარლამენტო უმრავლესობის წევრები ზაზა გაბუნია, მერაბ ქვარაია, კობა ლურსმანაშვილი, გოგა გულორდავა.

საუბარია „ადმინისტრაციული სახდელისაგან გათავისუფლების შესახებ“ კანონის 125-ე მუხლის მე-8 ნაწილსა და 1252 მუხლზე, რომელიც ამკრძალავი ნიშნის – „გაჩერება აკრძალულია“ და „დგომა აკრძალულია“ მოთხოვნის დაუცველობას, ასევე დგომა-გაჩერების წესებით გათვალისწინებული სხვა მოთხოვნის დაუცველობასა და დედაქალაქის ტერიტორიაზე ავტოტრანსპორტის პარკირების წესების დარღვევას გულისხმობს.

კერძოდ, პროექტში ნათქვამია, რომ ყველა ის პირი გათავისუფლდება ადმინისტრაციული სახდელისგან – ჯარიმის და შესაბამისი საურავისგან, რომლებმაც ადმინისტრაციული სამართალდარღვევა ჩაიდინეს 2018 წლის 10 აპრილამდე და რომელთა მიმართაც ადმინისტრაციული სახდელის დადების შესახებ დადგენილება ამ კანონის ამოქმედებამდე არ აღსრულებულა.

კანონპროექტის ინიციატორები განმარტავენ, რომ დღეის მდგომარეობით, ასეთი მიმდინარე საქმეები არის აღსრულების ეროვნულ ბიუროში, თბილისის მუნიციპალიტეტის მერიასა და სასამართლოებში.

შესაბამისად, ყველა ამ საქმეზე მოხდება განხილვების შეწყვეტა და ადმინისტრაციული სახდელისგან – ჯარიმისგან და შესაბამისი საურავისგან გათავისუფლება, რაც ჯამში დაახლოებით 850 000 ლარს შეადგენს.

კანონპროექტით დაზუსტებულია, რომ ადმინისტრაციული სახდელისგან გათავისუფლება ვრცელდება ადმინისტრაციული სახდელისა და საურავის მხოლოდ აღუსრულებელ ნაწილზე.

0
თემები:
სოციალური სფერო საქართველოში