რუსი სამხედრო ექიმები იტალიაში

რუსი სამხედრო ექიმები იტალიიდან ბრუნდებიან: რა გაკეთდა და რა იგეგმება

52
(განახლებულია 18:40 15.05.2020)
რუსეთის რადიაციული, ქიმიური და ბიოლოგიური დაცვის სპეციალისტებისა და სამხედრო მედიკოსების რაზმმა COVID-19-ის პანდემიის ევროპულ ეპიცენტრში მისია დაასრულა და მსოფლიო მასშტაბის პრობლემის მოსაგვარებლად პროფესიონალური, ოპერატიული და ეფექტური ბრძოლის მაგალითი აჩვენა.

ალექსანდრ ხროლენკო

რუსეთში დაბრუნებისთანავე სპეციალისტებს კორონავირუსულ ინფექციასთან ბრძოლის „იტალიური გამოცდილება“ სამშობლოშიც უეჭველად გამოადგებათ.

ჩკალოვსკის პოდმოსკოვიეს აეროდრომზე, რუსეთის „სამედიცინო სპეცრაზმის“ შემადგენლობის სპეციალისტებითა და ტექნიკით, მეცხრე და მეათე Ил-76 თვითმფრინავები დაეშვა. დასახული ამოცანები შესრულებულია. 

როგორც ცნობილია, იტალიელებისთვის დახმარების აღმოსაჩენად რუსეთმა იტალიაში გაგზავნა რვა მობილური ბრიგადა (100-მდე წამყვანი სამხედრო სპეციალისტი-ვირუსოლოგი და მედიკოსი), სადიაგნოსტიკო აპარატურა, ტრანსპორტისა და ტერიტორიის სადეზინფექციო საავტომობილო კომპლექსები, რადიაციული, ქიმიური და ბიოლოგიური დაცვის ჯარების 15-დან ერთი ლაბორატორია და სხვა სამედიცინო მოწყობილობა. რუსეთის თავდაცვის სამინისტროს თვითმფრინავებმა ოპერატიულად გადაისროლეს რომიდან 30 კილომეტრის დაშორებით მდებარე Pratica di Mare-ს ავიაბაზაზე სპეციალისტები და მუშაობისთვის აუცილებელი ყველა მოწყობილობა.

რუსმა სპეციალისტებმა იტალიაში 23 მარტიდან დაიწყეს ჩასვლა და 7 მაისამდე მრავალი რთული და საპასუხისმგებლო ოპერაცია ჩაატარეს - სრული დეზინფექცია გაუკეთეს მოხუცებულთა პანსიონატებს და სხვა ეპიდემიოლოგიურად რთულ ობიექტებს 100 დასახლებულ პუნქტში ლომბარდიის ოლქსა და ბრეშიას პროვინციაში. სულ მივლინების განმავლობაში 120 შენობა-ნაგებობა, 1 200 000 კვ.მ. შიდა ფართი, 500 000 კვ.მ. მყარი ზედაპირის გზის საფარი დამუშავდა.

გარდა ამისა, ქალაქ ბერგამოში საველე ჰოსპიტალის მუშაობის დაწყების დღიდან, 6 აპრილიდან, რუსმა სამხედრო მედიკოსებმა კორონავირუსით ინფიცირებული 115 პაციენტი მიიღეს. მცირე დროში 76 პაციენტი გამოჯანმრთელდა. ჰოსპიტალში რვა ბრიგადა ოცდაოთხი საათის განმავლობაში, სამ ცვლად, აწარმოებდა ავადმყოფების მიღებას და ინტენსიური თერაპიის განყოფილებებში მკურნალობდა მსუბუქი და საშუალო სიმძიმის ინფიცირებულებს. რუსეთში დაბრუნებისთანავე „სამედიცინო სპეცრაზმი“ სანიტარულ-ეპიდემიოლოგიურ ღონისძიებებს გაივლის. შემდეგ კი - კვლავ ბრძოლის ველზე, პანდემია ხომ ჯერ არ არის დამარცხებული. 

შვიდკვირიანი ბრძოლა

ეს იყო იტალიისთვისა და მთელი ევროპისთვის კორონავირუსის პანდემიასთან ბრძოლაში საერთაშორისო თანადგომის საჩვენებელი, შინაარსიანი და ძალიან სასარგებლო გამოცდილება. 21 მარტს რუსეთის პრეზიდენტმა იტალიის პრემიერ-მინისტრთან ტელეფონით საუბრისას დაადასტურა კორონავირუსთან ბრძოლაში დახმარების მზადყოფნა. ამის შემდეგ რუსეთმა საკუთარი უსაფრთხოების დაცვით პრაქტიკულად ორ დღეში გადაისროლა იტალიაში Ил-76-ის თხუთმეტი ბორტით მცირერიცხოვანი, მაღალპროფესიონალური, საოცრად ეფექტური სამედიცინო კოლექტივი, აღჭურვილი ყველაზე თანამედროვე ტექნიკით. ჯერ მარტო კომპლექსი „Сыч“ რად ღირს, რომელიც ბიოლოგიური ხასიათის საგანგებო სიტუაციებში პათოგენური ბიოლოგიური მასალების ანალიზისთვის გამოიყენება. შემთხვევით არ დახვედრიან რუსეთიდან გაგზავნილ დესანტს პირადად იტალიის საგარეო საქმეთა მინისტრი ლუიჯი დი მაიო და იტალიის შეიარაღებული ძალების გენერალური შტაბის მეთაური ენცო ვიჩერელი. ამასთან, აღელვებულმა დი მაიომ რუსი სპეციალისტების მოწინავე ჯგუფს განუცხადა, რომ იტალიის თავდაცვის სამინისტრო მათ განკარგულებაშია.

ჯერ კიდევ კორონავირუსული ინფექციის მაღალტექნოლოგიური განადგურების და ყველაზე მძიმე ავადმყოფების მკურნალობის დაწყებამდე მოსკოვმა მათ აჩუქა გადარჩენის იმედი, რუსმა სამხედრო მოსამსახურეებმა კი მრავალი ევროპელის გონებაში გადატრიალება მოახდინეს. თვალსაჩინო მაგალითი ყველაზე უკეთ პასუხობს კითხვას - „უნდათ თუ არა რუსებს ომი?“, მეტყველებს რუსეთის რეალურ პრინციპებზე, შესაძლებლობებზე, საშუალებებსა და მიზნებზე (რასაკვირველია, ეს არ არის ნატოსა და ევროკავშირში განხეთქილებისკენ სწრაფვა, როგორც დასავლური მასმედიის ზოგიერთი წარმომადგენელი წერდა).

შეგახსენებთ, რომ იტალიაში კორონავირუსისგან 31 ათასი ადამიანი დაიღუპა (ლეტალობა - 14%), ქალაქი ბერგამო მარტის შუა რიცხვებში „კორონავირუსულ ჯოჯოხეთად“ გადაიქცა, საქმეს ვერ აუდიოდა ადგილობრივი კრემატორიუმი. რესპუბლიკაში ჯანდაცვის სფეროს 4800 მუშაკი დაავადდა - ორჯერ მეტი, ვიდრე ჩინეთში. ამ პირობებში რუსეთის თავდაცვის სამინისტროს კოლონამ 600-კმ-იანი მარში შეასრულა რომიდან ბერგამოში, სპეციალისტები კი მაშინვე შეუდგნენ საქმიანობას. რთულია ამ დახმარების გადაფასება. 

14 მაისისთვის COVID-19-ისგან 115 288 ადამიანი გამოჯანმრთელდა, დაავადების აქტიურ ფაზაში რჩება 74 194 პაციენტი (ბევრია, მაგრამ შეიძლებოდა რამდენჯერმე მეტი ყოფილიყო). ეპიდემიის დაღმასვლის ამ დამაიმედებელ ვითარებაში რუსეთის თავდაცვის სამინისტროს ღირსეული წვლილიცაა. COVID-19-თან რუსი სპეციალისტების შვიდკვირიანი თავგანწირული ბრძოლის კანონზომიერ შედეგად იქცა იტალიელი ხალხის აღიარება, გულწრფელი მადლიერება და იტალიის თავდაცვის მინისტრის ლორენცო გუერინის მნიშვნელოვანი განცხადება საპასუხო ქმედებების შესახებ (7 მაისს სატელეფონო საუბრისას რუს კოლეგა სერგეი შოიგუსთან). შესაძლოა, ორი ქვეყნის სამხედრო-სამედიცინო თანამშრომლობამ კონსტრუქციული გაგრძელება ჰპოვოს პანდემიის შემდეგაც.

ვითარება რუსეთში

დიახ, იტალიაში შედგა „დაზვერვა ბრძოლით“. რუსეთის რადიაციული, ქიმიური და ბიოლოგიური დაცვის ჯარმა აპენინის ნახევარკუნძულზე მის ხელთ არსებული 15-დან მხოლოდ ერთი ლაბორატორია, 2065 ერთეულიდან 20 სპეცმანქანა და 20 000-დან მხოლოდ ასამდე სამხედრო მოსამსახურე გაგზავნა. ახლა სამხედრო მედიკოსებმა და სპეციალისტებმა უკეთ იციან, როგორც ებრძოლონ უხილავ მტერს, როგორ დაგეგმონ პროფილაქტიკური ღონისძიებები და ავადმყოფების მკურნალობა. რუსეთში კვლავაც რთული ეპიდემიოლოგიური ვითარებაა. დღეს 2 მაისიდან პირველად გამოვლინდა ერთ დღეში COVID-19-ის 10 ათასზე ნაკლები ახალი შემთხვევა. და მაინც ინფიცირების სტატისტიკა რუსეთში მსოფლიოში მესამე ადგილს იკავებს აშშ-ისა და ესპანეთის შემდეგ. წინ ბევრი სამუშაოა. 

გარდა სამხედრო-სამედიცინო სტრუქტურებისა, ყოველ სამხედრო ოლქში რუსეთის ტერიტორიაზე არსებობს რადიაციული, ქიმიური და ბიოლოგიური დაცვის ცალკე ბრიგადა, საერთო სამხედრო ჯარის შემადგენლობაში კი - რადიაციული, ქიმიური და ბიოლოგიური დაცვის საშტატო პოლკი. ამ საფუძველზე აპრილიდან ყალიბდება მობილური რაზმები, რომლებიც აუცილებლობის შემთხვევაში ოპერატიულად ჩაატარებენ სამრეწველო საწარმოების, სამედიცინო დაწესებულებებისა და სხვა სასიცოცხლოდ მნიშვნელოვანი ობიექტების სპეცდამუშავებას. ქვეყნის სამობილიზაციო მექანიზმების შენარჩუნებით რადიაციული, ქიმიური და ბიოლოგიური დაცვის სპეციალისტები იცავენ ასევე გაზაფხულის გაწვევის კამპანიის უსაფრთხოებას. პროფილაქტიკური ზომები ტარდება ყველა რეგიონში და გაწვევის ყველა ეტაპზე.

გარდა ამისა, რუსეთის თავდაცვის სამინისტროს სპეციალისტებმა პირობა დადეს, რომ 15 მაისისთვის ექსპლუატაციაში ჩააბარებენ კიდევ რვა მრავალფუნქციურ სამედიცინო ცენტრს. ამგვარად, უწყება შეასრულებს ქვეყნის 15 რეგიონში 16 მრავალპროფილური სამედიცინო ცენტრის აშენების სახელმწიფოებრივ ამოცანას. შესაძლოა, ყველა მათგანის გამოყენება არ გახდეს საჭირო, მაგრამ ისინი რეზერვში დარჩება. პანდემიასთან ბრძოლაში ოპერატიული მოქმედების გამოცდილება კი მეტად მნიშვნელოვანია. ვინ იცის, რა ახალი ვირუსები გველის მომავალში.

52
ჟურნალისტები აქციაზე

რას წერენ ქართული გაზეთები: როდის დაბრუნდება საზოგადოებრივი ტრანსპორტი თბილისში?

21
(განახლებულია 01:15 26.05.2020)
მომავალი საპარლამენტო არჩევნები - შეინარჩუნებს თუ არა „ქართული ოცნება“ რეიტინგს, რომელიც კორონავირუსის პანდემიის წყალობით მოიპოვა, და როდის წარმოადგენს ოპოზიცია მაჟორიტარი კანდიდატების ერთიან სიას - მთავარი თემები ქართულ პრესაში.

რამდენად შეძლებს „ქართული ოცნება“ საპარლამენტო არჩევნებამდე შეინარჩუნოს რეიტინგი, რომელიც კორონავირუსის პანდემიის ხარჯზე მოიპოვა, მოსალოდნელი ეკონომიკური პრობლემების ფონზე - ერთ-ერთი მთავარი თემაა.

ანალიტიკოსი მამუკა არეშიძე მიიჩნევს, რომ საზოგადოებაში შეიმჩნევა კეთილგანწყობა „ქართული ოცნების“ მიმართ, რომელმაც პანდემიასთან ბრძოლისას კარგი გამოცდილება მიიღო და დაინახა, რამხელა მნიშვნელობა ჰქონია პროფესიონალების მოსმენის და გადაწყვეტილებების სწრაფად მიღების უნარს.

„ასევე გამოჩნდა გიორგი გახარიას განსაკუთრებული მენეჯერული თვისებები. შესაბამისად, საზოგადოება კეთილგანწყობილია. უმეტესობამ დაინახა, რომ ხელისუფლებამ ქვეყანას დიდი ხიფათი აარიდა, მაგრამ ეს არ ნიშნავს, რომ ეს განწყობა შენარჩუნდება არჩევნებამდე, თუნდაც იმიტომ, რომ ეკონომიკური სიდუხჭირე თავის სიტყვას იტყვის“, - განუცხადა არეშიძემ გაზეთ „კვირის პალიტრას“.

ამიტომ საჭიროა მნიშვნელოვანი პროექტების სწრაფი რეალიზება, სოციალური დახმარების სისტემის სრულყოფა და ახალ ნაბიჯებზე ფიქრი, აღნიშნა პოლიტიკოსმა.

„მთავარია, მოქალაქეებმა იგრძნონ ხელისუფლების ზრუნვა. ვნახოთ, მოახერხებს თუ არა “ქართული ოცნება” მიღწეულის კაპიტალიზაციას“, - განაცხადა არეშიძემ.

მისი თქმით, მოსახლეობის დიდი ნაწილისთვის ხელისუფლებისა და ოპოზიციის დაპირისპირება არ არის მნიშვნელოვანი.

„დიდ ნაწილს არც ეს ვითომ პოლიტპატიმრები ანაღვლებს, რურუაზე საერთოდ არაფერს ვიტყვი, ხალხმა ყველაზე ყველაფერი მშვენივრად იცის. ადამიანებს ადარდებს სოციალური თემები, დასაქმება და ეკონომიკური პრობლემები”, - აღნიშნა არეშიძემ.

როდის წარადგენს ოპოზიცია კანდიდატების ერთიან სიას?

მაჟორიტარი კანდიდატების სიის საბოლოო მონახაზი სავარაუდოდ ივნისის ბოლოს იქნება მზად, განაცხადა რესპუბლიკური პარტიის ერთ-ერთმა ლიდერმა დავით ბერძენიშვილმა იმ კონსულტაციებთან დაკავშირებით, რომლებიც ოპოზიციის შიგნით მაჟორიტარობის ერთიანი კანდიდატების შესათანხმებლად დაიწყო.

ოპოზიციის ერთ-ერთმა ლიდერმა გიორგი ვაშაძემ განაცხადა, რომ გაერთიანებულ ოპოზიციაში შეათანხმეს 30 მაჟორიტარული ოლქის განაწილების საზღვრები, თავად კი თბილისში იყრის კენჭს.

„ჯერ მონახაზი არ არის, სავარაუდოდ, საბოლოო მონახაზი ივნისის ბოლოს იქნება. ჯერ დაკანონდეს ის 30 მაჟორიტარული ოლქი“, - განაცხადა „რეზონანსთან“ დავით ბერძენიშვილმა.

ამასთან მან აღნიშნა, რომ მის მაჟორიტარობაზე საუბარი ჯერ არ ყოფილა და არც მიილტვის ამისკენ.

როგორ გადანაწილდება 2020 წლის არჩევნებზე მაჟორიტარული ოლქები რეგიონების მიხედვით >>

„ჩვენი მიზანია, შესრულდეს 8 მარტის შეთანხმება და აუცილებლად შევიდეს ცვლილება კონსტიტუციაში. თუ ხელისუფლება კვლავ გაჯიუტდა, მოვლენები მისთვის სახარბიელოდ არ განვითარდება. ბოლოს და ბოლოს როდემდე უნდა შეირცხვინოს თავი შინ თუ გარეთ?! პირობა უნდა შეასრულოს“, - განაცხადა ბერძენიშვილმა.

როდის დაბრუნდება საზოგადოებრივი ტრანსპორტი თბილისში?

საქართველოში უკვე მესამე დღეა რაც საგანგებო მდგომარეობა გაუქმდა, მაგრამ მთავარი კითხვა, რომელიც მოსახლეობას აწუხებს - როდის ამუშავდება საზოგადოებრივი ტრანსპორტი დედაქალაქში, - კვლავ ღიად რჩება.

ალერგოლოგი-იმუნოლოგი ბიძინა კულუმბეგოვი მიიჩნევს, რომ ტრანსპორტის ამუშავების საკითხი ეპიდემიოლოგებთან ერთად უნდა გადაწყდეს.

„შეზღუდვა ძალიან მარტივია, თუმცა გახსნა ძალიან რთულია. მეტი ძალისხმევა მართებს ყველას. მთავარი გადაწყვეტილება მაინც უნდა მიიღონ ეპიდემიოლოგებმა და ასევე სატრანსპორტო კომპანიებმა“, - განუცხადა ბიძინა კულუმბეგოვმა „რეზონანსს“.

მისი თქმით, განსაკუთრებული ყურადღება უნდა დაეთმოს დეზინფექციას და აუცილებლად გაიზარდოს კონტროლიორების რაოდენობა.

„მე ვფიქრობ, რომ ამ წესების დაცვით მაისში ტრანსპორტის გახსნა უნდა გადაწყდეს“, - განაცხადა კულუმბეგოვმა.

მიმოხილვა მომზადებულია გაზეთ „რეზონანსის“ და „კვირის პალიტრას“ მიხედვით

21
თბილისის აეროპორტი

როდის აღდგება ფრენები საქართველოს ცაზე და როგორი იქნება ვოიაჟი პანდემიის შემდეგ

103
(განახლებულია 19:10 25.05.2020)
პუბლიკაციაში გაგაცნობთ ავიაფრენებთან დაკავშირებულ იმ პროცედურებსა და რეგულაციებს, რაც საქართველოში პანდემიის დასრულების შემდეგ იქნება.

საქართველოს მთავრობა 1 ივლისიდან ტურისტების მიღებას და საერთაშორისო ავიაგადამზიდებისთვის ცის გახსნას გეგმავს. ხელისუფლების განცხადებით, ოცივე ავიაკომპანია, რომელიც საქართველოში პანდემიამდე ოპერირებდა, აპირებს რეისების განახლებას.

ამ ეტაპზე, რამდენიმე გამონაკლისის გარდა, საქართველო უცხოეთის მოქალაქეებისთვის ჩაკეტილია. კორონავირუსის გავრცელების პრევენციის მიზნით მრავალ ქვეყანაში შეწყვეტილია საერთაშორისო ფრენები. ჯერჯერობით კი არ არსებობს საერთო სახელმძღვანელო პრინციპი, რომელსაც ყველა ქვეყანა უნდა დაემორჩილოს ფრენების განახლების შემდეგ.

სპეცილისტები იმ სავარაუდო ტენდენციებზე საუბრობენ, რაც ტურიზმის აღდგენის შემდეგ იქნება.

სამოქალაქო ავიაციის სააგენტოს დირექტორი ლევან კარანაძე განმარტავს, რომ აეროპორტებში ოფიციალური პროცედურების დრო გახანგრძლივდება, თუმცა მგზავრთა ნაკადიც არ იქნება ისეთი, როგორც ეს პანდემიამდე იყო.

ჯერჯერობით ზოგადი რეკომენდაციები ასეთია: მგზავრებს ეკიპაჟის წევრებთან რაც შეიძლება ნაკლები შეხება უნდა ჰქონდეთ; ასევე მოკლე ფრენების შემთხვევაში არსებობს რეკომენდაცია, რომ საკვების დარიგებაც შეიზღუდოს. მოკლე ფრენებად მიიჩნევა სამ საათზე ნაკლები ხანგრძლივობის ფრენა. იქ, სადაც მგზავრთა კონცენტრაცია მაღალია, მაგალითად, „ჩექ-ინის“, რეგისტრაციისას, თუ ბარგის მიღების დროს, არსებობს ფიზიკური დისტანციის დაცვის ზოგადი რეკომენდაცია. ასევე არსებობს რეკომენდაციები ჰაერის ფილტრაციასთან, ვენტილაციასთან, ხშირ დეზინფექციასთან დაკავშირებით როგორც ტერმინალებში, ისე საჰაერო ხომალდებზე.

შესაძლოა საჰაერო ხომალდზე ხელბარგის ატანა შეიზღუდოს. არც ისაა გამორიცხული, რომ მგზავრებს იმუნური პასპორტი, ტესტირების ჩატარება და რეგისტრაციის დამოუკიდებლად გავლა მოსთხოვონ. ამასთან, მსოფლიოს ზოგიერთმა ქვეყანამ, წამყვან აეროპორტებთან ერთად, ზრუნვა ბიომეტრიული ჩასხდომის დანერგვაზეც დაიწყო. ეს ნიშნავს იმას, რომ პასპორტის როლს მგზავრის სახე შეითავსებს.

როგორც „Sputnik–საქართველოს“ ეკონომიკისა და მდგრადი განვითარების სამინისტროში განუცხადეს, პროტოკოლი ამ დროისთვის შემუშავების პროცესშია.

„პროტოკოლი შემუშავების პროცესშია. ჩართულია ყველა შესაბამისი უწყება და პირობები ეცნობება მგზავრებს, ავიასაწარმოებს და მომსახურე პერსონალს. ამ ეტაპზე მხოლოდ ამის თქმა შეგვიძლია“, – აცნობეს სააგენტოს.

უწყებაში გვპირდებიან, რომ უმკაცრესად იქნება დაცული უსაფრთხოების საერთაშორისო გაიდლაინები მთელი ტურისტული სექტორისთვის. საქართველოში სრულად დაინერგება ჯანდაცვისა და ტურიზმის მსოფლიო ორგანიზაციების გაიდლაინები, რაც განამტკიცებს საქართველოს, როგორც უსაფრთხო მოგზაურობის ქვეყნის იმიჯს მსოფლიოში.

ამასობაში უკვე არაერთმა კომპანიამ გამოთქვა სურვილი და მზადყოფნა, რომ აღდგეს ქვეყნებს შორის რეგულარული მიმოსვლა.

ავიაკომპანიებს, რომელთა ფრენები COVID-19-ის გავრცელებასთან დაკავშირებით გაუქმდა, მგზავრებისთვის კომპენსაციის გადახდა რეგულარული ფრენების აღდგენიდან ორი თვის განმავლობაში მოუწევთ. მგზავრს კი, რომლის ფრენაც COVID-19-ის პრევენციის ფარგლებში გაუქმდა, უფლება აქვს შეცვალოს ბილეთში მითითებული მგზავრობის თარიღი მისი სურვილისამებრ, დამატებითი ანაზღაურების გარეშე, ან მოითხოვოს გამოუყენებელი ბილეთის საფასურის ანაზღაურება საქართველოს მიერ რეგულარული ფრენების აღდგენიდან ორი თვის გასვლის შემდეგ.

ასეა თუ ისე, ცხოვრება ნელ-ნელა ჩვეულ რეჟიმს უბრუნდება. მოგზაურებისთვის კი (და არა მხოლოდ მათთვის) 1 ივლისი, სავარაუდოდ, ყველაზე დიდი დღესასწაული გახდება.

გისურვებთ უსაფრთხო და მხიარულ მგზავრობას.

 

103
საკონსტიტუციო სასამართლო

ახალგაზრდა იურისტთა ასოციაცია საქართველოს პარლამენტს საკონსტიტუციო სასამართლოში უჩივის

0
(განახლებულია 10:10 26.05.2020)
ახალგაზრდა იურისტთა ასოციაცია მიიჩნევს, რომ მთავრობისთვის ქვეყანაში შეზღუდვების დაწესების უფლების მინიჭება საგანგებო მდგომარეობის გამოცხადების გარეშე კონსტიტუციას ეწინააღმდეგება

თბილისი, 26 მაისი – Sputnik. არასამთავრობო ორგანიზაცია „საქართველოს ახალგაზრდა იურისტთა ასოციაციამ“ (საია) საკონსტიტუციო სასამართლოში სარჩელი შეიტანა იმ შესწორებებთან დაკავირებით, რომლებიც პარლამენტმა საზოგადოებრივი ჯანდაცვის შესახებ კანონში შეიტანა.

შესწორებები, რომლის მიხედვით მთავრობას შეუზღუდავი უფლება ენიჭება, დააწესოს შეზღუდვები საგანგებო მდგომარეობის რეჟიმის გაუქმების შემდეგ, პარლამენტმა 22 მაისს მიიღო. ნორმა 23 მაისს ამოქმედდა და 15 ივლისამდე იქნება ძალაში.

პარლამენტმა მთავრობას საგანგებო მდგომარეობის შემდეგ შეზღუდვების დაწესების უფლება მიანიჭა>>

„კონსტიტუცია გადაადგილების თავისუფლების შეზღუდვას მხოლოდ კანონით უშვებს, შესაბამისად, ამ უფლების მთავრობის კანონქვემდებარე ნორმატიული აქტით შეზღუდვა დაუშვებელია. ასევე, შრომითი უფლებების შეზღუდვა მხოლოდ ორგანული კანონითაა დასაშვები“, – ნათქვამია საიას განცხადებაში.

ორგანიზაციაში აღნიშნავენ, რომ ამგვარად მთავრობა იღებს უფლებას, პარლამენტის გვერდის ავლით შეზღუდოს ასევე კონსტიტუციით გარანტირებული უფლებები.

კანონის ამოქმედების შემდეგ მთავრობას შეუძლია პანდემიისა და განსაკუთრებით საშიში ეპიდემიის დროს დროებით დააწესოს შეზღუდვები და მოაწესრიგოს წესებით, რომლებიც მოქმედი კანონმდებლობისგან განსხვავდება. გარდა ამისა, მთავრობა მიიღებს უფლებას, შეზღუდოს მოქალაქეთა გადაადგილება, მათი შრომითი და ეკონომიკური საქმიანობა და აკრძალოს სოციალური ღონისძიებების ჩატარება.

ასოციაციის ინფორმაციით, საკონსტიტუციო სასამართლოს პრაქტიკის მიხედვით, შეზღუდვითი ნორმა კონსტიტუციას უნდა შეესაბამებოდეს როგორც შინაარსობრივად, ისე ფორმალურად.

გახარია: ვერავინ შეუშლის ხელს იმ შეზღუდვების გაგრძელებას, რაც საჭიროა ჯანმრთელობისთვის>>

საია მიიჩნევს, რომ მთავრობისთვის მინიჭებული უფლება, შეზღუდოს საკუთრების უფლება, ანტიკონსტიტუციურია, რადგანაც მთავრობას მხოლოდ ტექნიკური ხასიათის ახალი წესების დადგენის უფლება აქვს. ამიტომ ახალგაზრდ იურისტები მიიჩნევენ, რომ ასეთად არ შეიძლება ჩაითვალოს შეზღუდვები, მაგალითად, სასტუმროს მესაკუთრისათვის ნომრების გაქირავების შეზღუდვა. ეს, მათი თქმით, არის საკუთრების უფლებით სარგებლობის სრული აკრძალვა და არა ტექნიკური ხასიათის რეგულაცია.

საკუთრების უფლებაზე სრული არძალვისთვის, როგორიცაა სასტუმროების ან ტანსაცმლის მაღაზიების დაკეტვა ან მუშაობის განახლების აკრძალვა, საჭიროა ლეგიტიმაცია პარლამენტის მხრიდან. ამ კონკრეტულ შემთხვევაში ასეთი რადიკალური ზომების მიღების შესაძლებლობა მთლიანად მთავრობის ხელშია.

საქართველოს კანონმდებლობით, საკონსტიტუციო სასამართლო ასოციაციის სარჩელს წარმოებაში მხოლოდ იმ შემთხვევაში მიიღებს, თუსასამართლოს კოლეგია მას მიზანშეწონილად მიიჩნევს.

ამოქმედებული შესწორებების საფუძველზე, საგანგებო მდგომარეობის რეჟიმის გაუქმების შემდეგ კორონავირუსით ინფიცირებულთა რაოდენობის გაზრდის თავიდან აცილების მიზნით, მთავრობამ სპეციალური დადგენილებით შეზღუდვებისა და აკრძალვების ნაწილი შეინარჩუნა.

ქვეყანაში ჯერ კიდევ არ მუშაობს საზოგადოებრივი ტრანსპორტი, დაკეტილია რესტორნები, ტანსაცმლისსა და ფეხსაცმლის მაღაზიები, სავაჭრო მოლები, სპორტდარბაზები, აკრძალულია სპორტული და კულტურული ღონისძიებების ჩატარება, კაზინოებისა და ტოტალიზატორების მუშაობა (გარდა ონლაინ მუშაობისა). საკარანტინე ზონებად რჩება თეთრიწყაროს რაიონი დაორი სოფელი ბოლნისის რაიონში.

0
თემები:
საქართველოს პარლამენტი