საცობი თბილისის ქუჩებში

რა იცვლება მარჯვენასაჭიანი ავტომობილებისთვის ახალი წლიდან

405
(განახლებულია 14:24 13.01.2020)
ახალი წლის წინა დღეებში ერთ-ერთი მაღალრეიტინგული ტელევიზიის ეთერში სიუჟეტი გავიდა, სადაც ჟურნალისტი ამბობდა, რომ 2020 წლის 1 აპრილიდან მნიშვნელოვანი ცვლილებები ამოქმედდება მარჯვენასაჭიანი ავტომობილების რეგულაციების მხრივ...

სიუჟეტი საკმაოდ ორაზროვანი იყო და მაყურებლებიც გვარიანად დააბნია. ლაპარაკი იყო, რომ მარჯვენასაჭიანი ავტომობილების მძღოლებს ვადა 1 აპრილამდე ჰქონდათ, რათა გადაეტანათ საჭე და ისე გაეგრძელებინათ საკუთარი ავტომობილით სარგებლობა. სიუჟეტიდან მაყურებლების დიდმა ნაწილმა დასკვნა გამოიტანა, რომ ყველამ, ვისაც მარჯვენასაჭიანი ავტომობილი ჰყავს, 1 აპრილამდე უნდა მოასწროს საჭის გადატანა და რეგისტრაცია, თორემ ტექდათვალიერებაზე ავტომობილს აღარ გაუტარებენ.

არაოფიციალური ინფორმაციით, საქართველოში არსებული ავტოპარკის თითქმის 35% მარჯვენასაჭიან ავტომობილებზე მოდის, ხოლო ავტოპარკის მთლიანმა მოცულობამ კარგა ხანია 1 მილიონს გადააჭარბა. ასე რომ, ცხადია, რა მასშტაბის რეგულაციაზეა ლაპარაკი, თუ მართლაც ყველა მარჯვენასაჭიან ავტომობილზე სავალდებულო გახდება საჭის გადატანა, თანაც, სულ რაღაც სამ თვეზე ნაკლებ დროში.

ჩვენ დავინტერესდით, რეალურად რა ხდება და უნდა ეშინოდეთ თუ არა მარჯვენასაჭიანი მანქანების მძღოლებს რაიმე ახალი რეგულაციის.

როგორც გაირკვა, მარჯვენასაჭიანებისთვის მთავრობას მართლაც შემოაქვს ახალი რეგულაციები, თუმცა, არა ისეთი, რომელიც ყველას შეეხება და, მით უმეტეს, საჭის გადატანას დაავალდებულებს.

მარჯვენასაჭიანი და საჭეგადატანილი მანქანების ტექინსპექტირებაში შედის ცვლილებები, რომელთა მიხედვით, თუ ავტომობილის საჭეს 2020 წლის 1 აპრილის შემდეგ გადაიტანენ, ასეთი მანქანა ტექნიკურ ინსპექტირებას ვეღარ გაივლის. ამიტომ ვისაც საჭის გადატანა სურს, მხოლოდ მათ უნდა მოასწრონ გადატანა და 1 აპრილამდე რეგისტრაციაში გაატარონ ავტომობილი. საჭის გადატანა შეუძლიათ როგორც ახალშემოყვანილ მარჯვენასაჭიან ავტომობილებზე, ასევე იმათზეც, რომელთაც უკვე აქვთ ტექინსპექტირება გავლილი, თუმცა მათმა მფლობელმა ახლა გადაწყვიტა საჭის გადატანა.

სახმელეთო ტრანსპორტის სააგენტოს უსაფრთხოების სამსახურის უფროსი შალვა ურიადმყოფელი:

„იმ შემთხვევაში, თუ საჭის გადატანა ინსპექტირებიდან ინსპექტირებამდე მოხდება და ეს მოხდება 2020 წლის 1 აპრილიდან რეგისტრირებულ ავტოსატრანსპორტო საშუალებებზე, ასეთი ავტომობილები ტექინსპექტირებას ვეღარ გაივლიან. ჩვენი ავტოპარკი, რომელიც რეგისტრირებულია 2020 წლის 1 აპრილამდე, მათ ეს შეზღუდვები არ შეეხებათ. ისინი თავისუფლად გაივლიან პერიოდულ ტექნიკურ ინსპექტირებას – როგორც მარჯვენასაჭიანი, ასევე საჭეგადატანილი ავტომობილები“.

საინტერესო იყო აგრეთვე მარჯვენასაჭიანი ავტომობილების შემოყვანაზე თუ ცვლის რამეს ხელისუფლება. საავტომობილო ფედერაციის ვიცე-პრეზიდენტი მევლუდ მელაძე ამბობს, რომ ამ მხრივ არაფერი იცვლება:

„შემოყვანაზე და განბაჟებაზე ბოლო პერიოდში რა ცვლილებებიც განხორციელდა და ფასები როგორც ჩამოყალიბდა, ისევე რჩება. აკრძალვა არ ეხება და, იმედია, არც არასდროს შეეხება“.

კიდევ ერთი სიახლე, რაც ძირითადად მარჯვენასაჭიან ავტომობილებს ეხება, მაშუქებზე ე.წ. სტიკერების დაკვრის აკრძალვაა. იმ ავტომობილებზე, რომლებსაც მაშუქები აქვთ დასარეგულირებელი, სტიკერის დაკვრა გამოსავალი აღარ იქნება. მძღოლი ვალდებულია ფარების ნათების კუთხე ხელოსანს გაასწორებინოს ან არსებული ფარები გამართულით შეცვალოს და ისე მიიყვანოს ავტომობილი ინსპექტირების ცენტრში. ეს რეგულაცია უკვე ამოქმედდა 1 იანვრიდან.

1 აპრილიდან ასევე შეზღუდვები ვრცელდება ყველა ავტომობილისთვის საბურავებთან დაკავშირებით. ცნობილია, რომ საბურავებს აქვს თავისი ვადა და თუნდაც არ იყოს გაცვეთილი, რეზინა მაინც კარგავს თვისებებს, შესაბამისად, საბურავიც ნაკლებად საიმედო ხდება. ახალი რეგულაციით, ინსპექტირებაზე მიყვანილი ავტომობილის საბურავები 10 წელზე ნაკლები ასაკის უნდა იყოს. ავტომობილი ამაზე უფრო ძველი საბურავებით დახარვეზებას დაექვემდებარება. 

თემურ იოსელიანი

405
ამერიკული რაკეტა Patriot-ი

მიმოხილვა: ამერიკელები ძნელად გასანადგურებელ ბაზას უბრუნდებიან

39
(განახლებულია 18:49 21.10.2020)
ასობით მეტრიანი კლდოვანი გრუნტი, პირდაპირი ბირთვული დარტყმის გაძლების უნარი და რაკეტებით შეიარაღებული ატომური სუბმარინები — ეს ნატოს ერთ-ერთი ყველაზე დაცული ობიექტია.

ნიკოლაი პროტოპოპოვი

აშშ-ის სამხედრო–საზღვაო ძალები მიწისქვეშა სამხედრო ბაზის აღდგენას აპირებენ ნორვეგიის ოლავსვერნში, რომელიც იქ ცივი ომის დროიდან დარჩა.

ქალაქი კლდეში

ოლავსვერნის ბაზაზე აქტიური სამხედრო საქმიანობა 2000-იანების დასაწყისში შეწყდა, 2009 წელს კი ობიექტი საბოლოოდ გაყინეს. მაგრამ ამერიკელებმა ცოტა ხნის წინ გადაწყვიტეს, იქ თავიანთი ატომური წყალქვეშა ნავები განათავსონ არქტიკაში რუსეთის გაძლიერების გამო — ასე აცხადებენ დასავლეთში.

ოლავსვერნში Seawolf-ის კლასის ყველა წყალქვეშა ნავს გადაისვრიან. აგვისტოში ერთ-ერთი მათგანი უკვე გადავიდა ნორვეგიის ტრომსში ბანგორის (ვაშინგტონის შტატი) სამხედრო–საზღვაო ბაზიდან. ამ პორტს ამერიკელები ატომური წყალქვეშა ნავების შუალედურ სადგომად იყენებენ: პროდუქტების მარაგს ივსებენ და რემონტს ატარებენ.

Seawolf-ის კლასის ატომური წყალქვეშა ნავები ერთ-ერთი ყველაზე გასაიდუმლოებული ამერიკული სუბმარინია. ის 1980-იან წლებში შეიქმნა სპეციალურად იმ რაიონებში სამოქმედოდ, რომლებსაც მოწინააღმდეგე სრულად აკონტროლებდა. „ზღვის მგელი“ მეტისმეტად ჩუმი და იდუმალი გამოდგა. ბორტზე მძლავრი ხომალდსაწინააღმდეგო იარაღით. ერთ სუბმარინზე 50 ფრთოსანი რაკეტა „ტომაჰავკი“ ან „ჰარპუნი“, ან ამდენივე ხომალდსაწინააღმდეგო ტორპედოა განთავსებული. ХХ საუკუნის ბოლოს ამერიკელები ასეთი 30 წყალქვეშა ნავის აგებას აპირებდნენ, მაგრამ გადაიფიქრეს — საბჭოთა კავშირის დაშლისა და ვარშავის ხელშეკრულების ორგანიზაციის ლიკვიდაციის შემდეგ. საბოლოოს აშშ-ის სამხედრო–საზღვაო ძალებმა მხოლოდ სამი ასეთი სუბმარინი მიიღეს.

ოლავსვერნის სამხედრო–საზღვაო ბაზა 1960-იან წლებში აშენდა. ის სულ 350 კმ-ით არის დაშორებული რუსეთის საზღვრიდან და უშუალოდ ჩრდილოეთის ფლოტის წყალქვეშა ნავების პატრულირების მარშრუტის სიახლოვეს მდებარეობს. ცივი ომის წლებში ამერიკელებსა და მის მოკავშირეებს ბაზაზე წყალქვეშა ძალები ჰყავდათ განლაგებული, რომლებიც ჩრდილოეთ ყინულოვანი ოკეანის აკვატორიაზე აგებდნენ პასუხს. ნატოს სუბმარინების ეკიპაჟები მზად იყვნენ ნებისმიერ დროს გადაეკეტათ გზა ჩრდილოეთის ფლოტისთვის ნორვეგიის ზღვაში და უფრო შორსაც — ჩრდილოეთ ატლანტიკაშიც.

უზარმაზარი მიწისქვეშა კომპლექსი კლდეშია გამოკვეთილი და 300 მეტრი სისქის ქანებითაა დაცული. 25 ათას კვ.მ-ზე მეტ ფართობზე განთავსებულია საწყობები, საბრძოლო მასალების საცავები, სარემონტო ნავმისადგომები. გვირაბების პროექტირებასა და გაყვანაზე, ასევე ობიექტის თანამედროვედ აღჭურვაზე 500 მილიონ დოლარზე მეტი დაიხარჯა.

უფრო ახლოს არქტიკასთან

რუსეთის ჩრდილოეთის ფლოტის ექს-სარდლის, ადმირალ ვიაჩესლავ პოპოვის აზრით, ოლავსვერნის განახლებული ბაზა ნატოს მხრიდან კიდევ ერთ სერიოზულ საფრთხედ იქცევა რუსეთისთვის.

„Seawolf კარგადაა მორგებული ყინულქვეშ ცურვას. ამერიკელებს მათი ბაზირების ადგილის სამოქმედო ზონასთან დაახლოება აქვთ განზრახული, აპირებენ სულ უფრო ახლო მოვიდნენ რუსეთის საზღვრებთან და არქტიკასთან, სადაც დღეს რუსეთი ლიდერობს ატომური ყინულმჭრელების წყალობით. რა თქმა უნდა, ჩრდილოეთის ფლოტს მოუწევს ოლავსვერნის გაკონტროლება — ამისთვის ყველა აუცილებელი ძალა და საშუალება არსებობს“, — თქვა ადმირალმა.

ექსპერტები ამბობენ, რომ ამერიკელები შესაძლოა სირთულეებს გადააწყდნენ, ვინაიდან იურიდიულად ბაზა ახლა კერძო პირს ეკუთვნის. 2000-იანების ბოლოს დასავლელმა ანალიტიკოსებმა მიიჩნიეს, რომ რუსეთი მეტად აღარ წარმოდგენდა ნატოსთვის საფრთხეს, ხოლო ოლავსვერნის შენახვა ძალიან ძვირი ჯდებოდა. და ნორვეგიის მთავრობამ ბაზა აუქციონზე გაიტანა.

2011 წელს ოლავსვერნი 4,5 მლნ დოლარად შეიძინა ნორვეგიელმა ბიზნესმენმა, რომელიც კომპლექსს იჯარით აქირავებდა, მათ შორის რუსულ კომპანიებზეც. იქ პერიოდულად შედიოდნენ სამეცნიერო–კვლევითი ხომალდები „აკადემიკოსი ნემჩინოვი“ და „აკადემიკოსი შატსკი“. გარიგების შემდეგ ბევრმა ნორვეგიელმა სამხედრო ჩინოსანმა გააკრიტიკა ქვეყნის ხელმძღვანელობა. ვიცე-ადმირალმა ეინარ სკორგენმა ობიქტის გაყიდვა „წმიდა წყლის სიგიჟედ“ შეაფასა.

„ჩვენ საკუთარ თავს წავართვით უმნიშვნელოვანესი პლაცდარმი და ვაიძულეთ სუბმარინები, გაიარონ ასობით ზედმეტი მილი. ჩვენ რუსეთთან საერთო საზღვარი გვაქვს ბარენცის ზღვაში. გასაგებია, რომ ჩვენი სამხედრო–საზღვაო ფლოტი არქტიკაში საზღვაო ბაზაზე უნდა განთავსდეს“, — განაცხადა სკორგენმა.

ორმაგი სტანდარტები

ათი წლის შემდეგ ნატომ თავისი შეცდომა გააცნობიერა. ნორვეგიული ტელეარხი NRK-ს მონაცემებით, ბოლო კვირებში პენტაგონის მაღალჩინოსნები არაერთხელ ეწვივნენ ოლავსვერნს. ხოლო ნორვეგიის თავდაცვის სამინისტრომ მოიწონა შეთანხმება, რომელიც ქვეყნის შეიარაღებულ ძალებს, აშშ-სა და მოკავშირე ქვეყნებს ბაზის დანიშნულებისამებრ გამოყენების საშუალებას აძლევს.

„ნორვეგიის ხელისუფლება არამეგობრულად იქცევა რუსეთის მიმართ, თუმცა სულ ცოტა ხნის წინ ჩვენთან ბარენცის ზღვაში სივრცის გამიჯვნის შესახებ შეთანხმება გააფორმეს, — ამბობს პირველი რანგის კაპიტანი მიხაილ ნენაშევი. — ჩვენ ამაზე კეთილმეზობლობისა და რეგიონში თანამშრომლობის განვითარების პოლიტიკიდან გამომდინარე წავედით, გვქონდა რა იმედი, რომ ნორვეგიაც შესაბამისად მოიქცეოდა. მაგრამ ვაშინგტონის „აღმასკომის“ ჩაწოდებით, ნორვეგია, პირიქით, ზრდის აგრესიის დონეს რუსეთის მიმართ ჩრდილოეთ ატლანტიკაში და ჩრდილოეთ ყინულოვან ოკეანეში“.

ამასთან, ექსპერტის აზრით, სამხედრო თვალსაზრისით, ოლავსვერნი აშშ-ისა და ნატოს პოზიციებს ჩრდილოეთ განედებზე სრულიად უმნიშვნელოდ გააძლიერებს, ვინაიდან ბაზის კოორდინატები და შესაძლებლობები, უკვე დიდი ხანია, არავისთვის არ წარმოადგენს საიდუმლოს. საფრთხის შემთხვევაში სწრაფად შეიძლება მისი დანაღმვა სუბმარინების, თვითმფრინავებისა თუ უპილოტო წყალქვეშა აპარატების მეშვეობით.

მიწისქვეშა ლაბირინთები

ოლავსვერნის მიწისქვეშა ბაზა უნიკალური არ არის. ცივი ომის წლებში ათობით ასეთი ობიექტი აიგო. ყველაზე მსხვილი ბუნკერი – სამხედრო–საზღვაო ბაზა მუსკიო შვედებმა გასული საუკუნის შუა წლებში გამოკვეთეს გრანიტის კლდეში, რომელიც რეალურად ცალკე კუნძულია სტოკჰოლმის არქიპელაგის სამხრეთით.

ბაზას შეუძლია გაუძლოს მასირებულ სარაკეტო შეტევას და, უფრო მეტიც, ბირთვულ დაბომბვასაც. მატერიკიდან კუნძულამდე სამკილომეტრიანი გვირაბია გაყვანილი ზღვის ფსკერქვეშ. 2000-იანებში ბაზა დააკონსერვეს, 2019 წელს კი განაცხადეს, რომ შვედეთის სამხედრო–საზღვაო ძალებმა იქ თავისი შტაბ-ბინა გადაიტანა. ბაზაზე დაახლოებით 100 სამხედრო მოსამსახურისა და „ვიუსბიუს“ ტიპის ხუთი კორვეტის განთავსება იგეგმება.

რაც შეეხება რუსეთს, მისი ყველაზე დიდი განსაიდუმლოებული მიწისქვეშა ბაზა ყირიმშია. ტავროსის მთაზე ორი ობიექტია დამალული: მშრალი დოკი წყალქვეშა ნავების რემონტისთვის და ასევე საწყობი ატომური ქობინებისა („ბოეგოლოვკა“) და რაკეტების შესანახად.

ბირთვული ომის შემთხვევაში მიწის ქვეშ დაახლოებით სამი თვით საკმაოდ კომფორტულად შეიძლება განთავსდეს ათასი ადამიანი.

საბჭოთა კავშირის დაშლის შემდეგ ბაზა უკრაინის მფლობელობაში დარჩა, რომელიც, სხვა ობიექტების მსგავსად, გაიძარცვა.

ექსპერტების შეფასებით, აუცილებლობის შემთხვევაში ბაზის თავიდან აღჭურვა და მწყობრში დაბრუნება შესაძლებელი იქნება, თუმცა თანამედროვე სუბმარინებს ვერ მიიღებს — მათი ზომების გამო.

რედაქცია შესაძლოა არ ეთანხმებოდეს ავტორის მოსაზრებებს

39
თემები:
რუსეთი დღეს
ფოთის პორტი

საქართველოს საგარეო ვაჭრობა ვარდნას განაგრძობს

60
(განახლებულია 16:18 20.10.2020)
საქართველოს ყველაზე დიდი სავაჭრო პარტნიორები 2020 წლის დასაწყისიდან არიან თურქეთი, რუსეთი და ჩინეთი — ამ ქვეყნებთან სავაჭრო ბრუნვამ იანვარი-სექტემბრის პერიოდში 2,5 მილიარდ დოლარს გადააჭარბა.

თბილისი, 20 ოქტომბერი — Sputnik. საქართველოში პანდემიის ფონზე ვაჭრობა ეცემა – 2020 წლის დასაწყისიდან საგარეო სავაჭრო ბრუნვა, გასული წლის იანვარი–სექტემბერთან შედარებით, 14,9%-ით შემცირდა და 8,1 მილიარდ დოლარზე მეტი შეადგინა (არაორგანიზებული ვაჭრობის გაუთვალისწინებლად), ნათქვამია სტატისტიკის ეროვნული სამსახურის „საქსტატის“ მასალებში. 

2020 წლის იანვარი–სექტემბრის პერიოდში ექსპორტზე 2,4 მლრდ დოლარზე მეტი ღირებულების ქართული პროდუქცია გავიდა – 12,1%-ით ნაკლები გასული წლის ანალოგიურ პერიოდთან შედარებით.

2020 წლის დასაწყისიდან იმპორტმა 5,7 მლრდ დოლარზე მეტი შეადგინა, რაც გასული წლის იანვარი–სექტემბრის პერიოდთან შედარებით 15,9%-ით ნაკლებია.

საქართველოს უარყოფითმა სავაჭრო ბალანსმა იანვარი–სექტემბერში 3,3 მლრდ დოლარზე მეტი შეადგინა, რაც მთლიანი საგარეო სავაჭრო ბრუნვის 40,8%-ია.

რით ვაჭრობს საქართველო

საქართველოდან საქონლის ფართო ასორტიმენტი გააქვთ – სპილენძის მადნები და კონცენტრატები, ფეროშენადნობები, მსუბუქი ავტომობილები, ნატურალური ღვინო, სამკურნალო საშუალებები, მინერალური წყლები, დამუშავებული ან ნახევრადდამუშავებული ოქრო, თხილი და სხვ. 

2020 წლის დასაწყისიდან მხოლოდ სპილენძის მადნებისა და კონცენტრატების (14,1%), სპირტიანი სასმელების (10,8%) და ოქროს (29,5%) ექსპორტი გაიზარდა. 

ამავე დროს შემცირდა მსუბუქი ავტომობილების ექსპორტი 37,7%-ით, ფეროშენადნობების – 24,9%-ით, ნატურალური ყურძნის ღვინის – 5,6%-ით, სამკურნალო საშუალებების – 49,5%-ით, აზოტოვანი სასუქების – 21%-ით, მინერალური და მტკნარი წყლების – 16,9%-ით.

რა შემოაქვთ საქართველოში

საქართველოში შემოდის ნავთობი და ნავთობპროდუქტები, მსუბუქი ავტომობილები, ნავთობის აირები და აირისებრი ნახშირწყალბადები, სპილენძის მადნები და კონცენტრატები, სამკურნალო საშუალებები, ხორბალი, ელექტროენერგია, სატელეფონო აპარატები და სხვ. 

2020 წლის დასაწყისიდან მხოლოდ ხორბლის (8,2%), სპილენძის მადნებისა და კონცენტრატების (0,8%) და შინაური ფრინველის ხორცისა და შინაური ფრინველის საკვები სუბპროდუქტების (0,5%) იმპორტი გაიზარდა.

ამავე დროს, აღნიშნულ პერიოდში მსუბუქი ავტომობილების იმპორტი დაეცა 31,5%-ით, ნავთობისა და ნავთობპროდუქტების — 32,5%-ით, სამკურნალო საშუალებების – 12%-ით, ნავთობის აირებისა და აირისებრი ნახშირწყალბადების – 11,3%-ით და ა.შ.

ვისთან ვაჭრობს საქართველო

საქართველოს ყველაზე დიდი სავაჭრო პარტნიორები 2020 წლის დასაწყისიდან არიან თურქეთი, რუსეთი და ჩინეთი — ამ ქვეყნებთან სავაჭრო ბრუნვამ იანვარი-სექტემბრის პერიოდში 2,5 მილიარდ დოლარს გადააჭარბა, რაც მთლიანი სავაჭრო ბრუნვის 36%-ია. 

პირველ ადგილზეა თურქეთი – მეზობელ ქვეყანასთან საგარეო სავაჭრო ბრუნვამ მიმდინარე წლის დასაწყისიდან 1,1 მლრდ დოლარზე მეტი შეადგინა, რაც საქართველოს მთლიანი სავაჭრო ბრუნვის 13,8%-ია. ორ ქვეყანას შორის სავაჭრო ბრუნვა, გასული წლის იანვარი–სექტემბერთან შედარებით, 13,5%-ით შემცირდა.

2020 წლის დასაწყისიდან თურქეთში გავიდა დაახლოებით 27,8 ათასი ტონა ფეროშენადნობები, 940,5 ტონა ტრიკოტაჟის ნაწარმი, 5,6 ათას ტონაზე მეტი თევზის ან ზღვის ძუძუმწოვრების ცხიმები, ქონები და მათი ფრაქციები და სხვა საქონელი.

აღნიშნულ პერიოდში თურქეთიდან შემოვიდა 53,1 ათას ტონაზე მეტი შავი ლითონების მილები, მილაკები და ღრუ პროფილები, 383 ტონა სამკურნალო პრეპარატები, დაახლოებით 17,1 ათასი ტონა შავი ლითონების მეტალოკონსტრუქციები და ა.შ.

მეორე ადგილზეა რუსეთი

2020 წლის დასაწყისიდან საქართველოსა და რუსეთს შორის ბრუნვა 2019 წლის ანალოგიურ პერიოდთან შედარებით შემცირდა 9,4%-ით და შეადგინა 934,6 მლნ დოლარზე მეტი – საქართველოს მთლიანი საგარეო სავაჭრო ბრუნვის 11,5%. 

 

წლის დასაწყისიდან საქართველოდან რუსეთში გავიდა დაახლოებით 79,5 ათასი ტონა ფეროშენადნობები, 28,2 ათას ტონაზე მეტი ყურძნის ნატურალური ღვინო, 53,1 ათას ტონაზე მეტი მინერალური და მტკნარი წყალი, 4,6 ათას ტონაზე მეტი სპირტიანი სასმელი და ა.შ.

რუსეთი საქართველოში საწვავის ყველაზე მსხვილი მომწოდებელია. რუსეთიდან წლის დასაწყისიდან 255,7 ათას ტონაზე მეტი ნავთობი და ნავთობპროდუქტები შემოვიდა.

რუსეთიდან ასევე შემოვიდა დაახლოებით 368,7 ათასი ტონა ხორბალი, 89 ათას ტონაზე მეტი ნავთობის აირები, 26,5 ათას ტონაზე მეტი მზესუმზირის ზეთი და ა.შ.

მესამე ადგილზეა ჩინეთი

საქართველოს საგარეო ბრუნვამ ჩინეთთან დაახლოებით 864,9 მილიონი დოლარი შეადგინა, რაც მთლიანი საგარეო ბრუნვის 10,7%-ია. სავაჭრო ბრუნვა ორ ქვეყანას შორის, გასული წლის ამავე პერიოდთან შედარებით, 12%-ით გაიზარდა. 

წლის დასაწყისიდან საქართველოდან ჩინეთში გავიდა დაახლოებით 203,1 ათასი ტონა სპილენძის მადნები და კონცენტრატები, დაახლოებით 10,2 ათასი ტონა ძვირფასი ლითონები, 2,5 ათას ტონაზე მეტი ყურძნის ნატურალური ღვინო და ა.შ.

ჩინეთიდან შემოვიდა დაახლოებით 27,3 ათასი ტონა ბრტყელი ნაგლინი ნახშირბადიანი ფოლადისგან, 5,8 ათას ტონაზე მეტი საბურავები, 404,5 ტონა მზა პროდუქცია, მათ შორის ტანსაცმლის თარგები და ა.შ.

საქართველო ასევე ვაჭრობს სხვა ქვეყნებთან

საქართველოს სავაჭრო პარტნიორების ათეულში ასევე შედიან: აზერბაიჯანი – 640 მილიონ დოლარზე მეტი, სომხეთი – 465,5 მილიონ დოლარზე მეტი, უკრაინა – დაახლოებით 417,4 მილიონი დოლარი, აშშ – დაახლოებით 460,5 მილიონი დოლარი, გერმანია – დაახლოებით 312,6 მილიონი დოლარი, ბულგარეთი – დაახლოებით 311,9 მილიონი დოლარი, იტალია – დაახლოებით 152,7 მილიონი დოლარი.

რა ელოდება საქართველოს ეკონომიკას?

საქართველოს ეკონომიკისა და მდგრადი განვითარების მინისტრმა ნათია თურნავამ საგარეო ვაჭრობასთან დაკავშირებით „საქატატის“ მონაცემების შეფასებისას განაცხადა, რომ ქვეყნის ეკონომიკა ეტაპობრივად უბრუნდება დადებით განვითარებას. 

„საქსტატის“ მონაცემებით, სექტემბერში ექსპორტმა 332 მლნ დოლარი შეადგინა. ამავე დროს, დეფიციტი 98,5 მლნ დოლარით გაუმჯობესდა.

„ძალზე სასიხარულოა, რომ სექტემბერში ექსპორტი 8,6%-ით გაიზარდა. ამავე დროს შემცირდა იმპორტი, რაც ნიშნავს  საგარეო ვაჭრობის სალდოს გაუმჯობესებას“, – განაცხადა თურნავამ.

ეკონომიკის მინისტრის თქმით, ექსპორტის ზრდაში განსაკუთრებული წვლილი აქვს სასოფლო-სამეურნეო და საფეიქრო პროდუქციას.

60
თემები:
საქართველოს ეკონომიკა
ზუგდიდი

ერთ-ერთი მძევალი სამეგრელო-ზემო სვანეთის პოლიციის დეპარტამენტის დირექტორია

27
(განახლებულია 23:10 21.10.2020)
ზუგდიდში „საქართველოს ბანკზე“ თავდამსხმელმა რამდენიმე წუთის წინ შენობა სამ მძევალთან ერთად დატოვა, რომელთა შორის ერთი - სამეგრელო-ზემო სხვანეთის პოლიციის დეპარტამენტის დირექტორი ავთანდილ გალდავაა

თბილისი, 21 ოქტომბერი - Sputnik. ზუგდიდში ბანკზე თავდამსხმელის ერთ-ერთი მძევალი, რომელთან ერთადაც შენობა რამდენიმე წუთის წინ დატოვა, საქართველოს შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტის დირექტორი ავთანდილ გალდავაა. ინფორმაცია ქართულ მედიაში ვრცელდება.

მედიის მიერ გავრცელებულ კადრებში ჩანს, რომ ზუგდიდში „საქართველოს ბანკზე“ თავდასხმსხმელმა სამ მძევალთან ერთად, რომელთაც ხელზე ე.წ. ბორკილები ედოთ, ბანკის შენობა დატოვა.

სავარაუდოდ, თავდამსხმელს ხელში ყუმბარა ეკავა. ის მძევლებთან ერთად პოლიციის ავტომანქანაში ჩაჯდა.

ამ დროისთვის უცნობია თუ რა მიმართულებით გადაადგილდა აღნიშნული ავტომანქანა. მანამდე შენობა გათავისუფლებულმა მძევლებმა დატოვეს.

შსს-ს მხრიდან ჯერჯერობით დამატებითი კომენტარები არ გაკეთებულა.

სოციალურ ქსელში ერთ-ერთი გათავისუფლებული მძევლის ირაკლი კვარაცხელიას განცხადება გავრცელდა, სადაც ის ამბობს, რომ გამტაცებელს პოლიციამ თანხა მიუტანა. გავრცელებული ინფორმაციით, თანხა მას სწორედ ავთანდილ გალდავამ მიუტანა, ეს უკანასკნელი კი საბოლოოდ მძევალი აღმოჩნდა.

ავტომატით და ხელყუმბარით შეიარაღებულმა მამაკაცმა ოთხშაბათს ზუგდიდის ცენტრში „საქართველოს ბანკის“ ერთ-ერთი ფილიალის შენობაში მძევლები აიყვანა. დამნაშავე მოითხოვდა ნახევარმილიონ დოლარს და ვერტმფრენს ადგილის უსაფრთხო დატოვებისთვის.

27
თემები:
ზუგდიდში შეიარაღებულმა პირმა 19 ადამიანი მძევლად აიყვანა