გიორგი გახარიას შეხვედრა ბიზნესმენებთან

დახურულ კარს მიღმა... ანუ რას ითხოვს ბიზნესი ხელისუფლებისგან?..

1155
(განახლებულია 18:50 22.10.2019)
საპარლამენტო არჩევნებამდე ერთი წლით ადრე სახელისუფლებო გუნდმა ტაქტიკა შეცვალა... გააქტიურდა კომუნიკაცია საზოგადოების სხვადასხვა ჯგუფებთან. პრემიერ-მინისტრმა ბიზნესის წარმომადგენლებთან კიდევ ერთი, ამჯერად, შემაჯამებელი აუდიენცია გამართა. ორსაათიანი დიალოგის გამხელილი დეტალები...

სამსონ ხონელი

არჩევნები!... ყველაზე კარგად ეს პროცესი ასახავს ჩვენი დროების მაჯისცემას. პოლიტიკურ ძალთა შერკინებამდე კიდევ ერთი წელია, მაგრამ საპარლამენტო მანდატებისთვის ბრძოლა უკვე დიდი ხნის დაწყებულია. პოლიტიკური „ელიტის“ მთავარი საფიქრალი სალაყბოსკენ მიმავალი გზის ძიებაა... ხალხის რჩეულთა შორის ყოფნა-არყოფნის დილემა აყალიბებს ჩვენი პოლიტიკოსების ხედვებს, პოზიციებსა და ქცევას... ბოლო დროს სახელისუფლებო გუნდმა ტაქტიკა შეცვალა და საზოგადოების სხვადასხვა ჯგუფებთან, მათ შორის ბიზნესსექტორთან, კომუნიკაცია გააქტიურა. არახალია, პოლიტიკური ისტებლიშმენტისთვის მნიშვნელოვანია, საარჩევნოდ როგორი იქნება ბიზნესის განწყობა. წინამდებარე სტატიაც, ხელისუფლებისა და ბიზნესის დიალოგს ეთმობა.

ოქტომბრის თვის პირველ და მეორე დეკადაში მთავრობის თავმჯდომარე ჯერ ტურისტული, მევენაზეობა-მეღვინეობისა და სამშენებლო კომპანიების მესვეურებს შეხვდა. მესამე დეკადა ორმოცამდე ბიზნეს ასოციაციის წარმომადგენელთან შემაჯამებელი აუდიენციით დაიწყო... პრემიერ-მინისტრი დამსწრეთ ორი საათის განმავლობაში უსმენდა. დახურულ კარს მიღმა გამართული შეხვედრის დეტალები მედიამ თავყრილობის მონაწილეთაგან შეიტყო. საბანკო რეგულაციები, ლარის კურსი და დეპუტატ დიმიტრი ცქიტიშვილის ინიციატივა, რომელიც შრომის კანონმდებლობაში ცვლილებების შეტანას გულისხმობს. ეს არის ის სამი ძირითადი საკითხი, რომელიც ბიზნეის სფეროს განსაკუთრებით აწუხებს. თანმიმდევრულად მივყვეთ. საბანკო ასოციაციის ხელმძღვანელმა კომერციული ბანკებისთვის, საფინანსო სექტორისთვის დაწესებული თამაშის პირობები კიდევ ერთხელ გააკრიტიკა. ალექსანდრე ძნელაძის თქმით, საბანკო რეგულაციების გადახედვას და დაკრედიტების წესების ლიბერალიზაციას ითხოვს არა მხოლოდ საბანკო სექტორი, არამედ სხვა დარგებიც. მისივე განმარტებით, მთავრობის თავმჯდომარემ შეხვედრაზე აღნიშნა, რომ ამ საკითხზე მსჯელობა დაწყებულია, მაგრამ ჯერ გაურკვეველია, როდის და რა შედეგით დასრულდება ეს პროცესი. საინტერესო დეტალია, იმ დროს, როცა ალექსანდრე ძნელაძე რეგულაციების დაწესების შედეგად, საფინანსო ბაზარზე წარმოქმნილ პრობლემებზე საუბრობდა, კობა გვენეტაძის უწყებამ ოფიციალური მონაცემები გამოაქვეყნა და კიდევ ერთხელ გაირკვა, რომ კომერციულ ბანკებს საწუწუნო არაფერი აქვთ...

თავად განსაჯეთ, ეროვნული ბანკის მონაცემებით, 2019 წლის სექტემბერში კომერციული ბანკების მოგებამ 96.620 მილიონი ლარი შეადგინა, რაც წინა წლის ანალოგიურ პერიოდთან შედარებით 7.663 მილიონი ლარით მეტია. საინტერესოა, წლიურ მაჩვენებელიც, მიმდინარე წლის იანვარ-სექტემბერში კომერციული ბანკების მოგებამ 650.173 მილიონი ლარი შეადგინა, რაც გასული წლის ამავე მაჩვენებელს 47.834 მილიონი ლარით აღემატება. ეროვნული ბანკის სტატისტიკას მკითხველი უწყების ვებგვერდზე მარტივად გაეცნობა და დარწმუნდება, რომ ყველა პარამეტრით, საბანკო საქმე ჩვენში ძალიან მომგებიანია. არავინ კამათობს, რომ მეტი მოგება სჯობს ნაკლებს, მაგრამ საფინანსო სექტორში კრიზისზე საუბარი გადაჭარბებულია...      

ეროვნული ვალუტის გაუფასურების შედეგად შექმნილ პრობლემებზე კი დისტრიბუტორთა ასოციაციი ხელმძღვანელმა ისაუბრა. ივა ჭყონიამ აღნიშნა, რომ ქვეყნის ეკონომიკა პირდაპირ ეროვნულ ვალუტაზეა დამოკიდებული. ფასების ცვლილების პირდაპირი კომპონენტი არის ლარი. შესაბამისად, მნიშვნელოვანია, რას ფიქრობს მთავრობა და ეროვნული ბანკი, როგორ აპირებს ხელისუფლება ლარის გაუფასურებისა და ინფლაციის შეჩერებას, როცა ქვეყანაში სულ უფრო მცირდება უცხოური ინვესტიციების მოცულობა. დამეთანხმება მკითხველი, ეს საკითხი მართლაც აქტუალურია. როგორც ბოლო დროს გამოიკვეთა, კობა გვენეტაძის უწყება ლარის გაუფასურებისა და ინფლაციის წინააღმდეგ ბრძოლის მთავარ იარაღად მონეტარული პოლიტიკის გამკაცრებას მოიაზრებს.

ნათქვამის დასტურია, ეროვნული ბანკის მიერ ორჯერ, ჯამურად ერთი პროცენტით გაზრდილი რეფინანსირების განაკვეთი. რაც შეეხება, უცხოური ინვესტიციების შემცირების გამომწვევ მიზეზებს, ანალიტიკოსები რამდენიმე მნიშვნელოვან ფაქტორზე მიანიშნებენ, მათ შორის არის პოლიტიკური სტაბილურობა, რითაც მიმდინარე წლის ზაფხული-შემოდგომის პერიოდში ქვეყანა ნამდვილად ვერ დაიკვეხნიდა... არის გარე ფაქტორიც. კერძოდ, სულ უფრო მეტმა ქვეყანამ, მათ შორის საქართველოს სამეზობლოშიც, ისწავლეს ბიზნესისთვის ხელსაყრელი პირობებისა და სასურველი საინვესტიციო გარემოს შექმნა. შესაბამისად, პოტენციურ ინვესტორებსაც უფრო ფართო არჩევანი აქვთ. ექსპერტების შეფასებით, გაცილებით მეტი ძალისხმევა დაგვჭირდება, რათა ჩვენი ქვეყნის საინვესტიციო გარემო უცხოელი ინვესტორებისთვის უფრო მომხიბლავი გავხადოთ.

საკამათო არ არის, საინვესტიციო გარემოს განუყოფელი ნაწილია საკანონმდებლო ბაზა, მათ შორის შრომის კანონმდებლობა, რომელიც შრომის ბაზარზე სხვა მრავალ საკითხთან ერთად დამსაქმებლისა და დასაქმებულის ურთიერთობას არეგულირებს. შეხვედრის მონაწილეებს არ დაუმალავთ, რომ აშფოთებთ დეპუტატ დიმიტრი ცქიტიშვილის ინიციატივა, რომელიც კანონმდებლობაში დამატებითი რეგულაციების შემოღებას გულისხმობს. „ვისოლი ჯგუფის“ ხელმძღვანელმა, სოსო ფხაკაძემ, კონკრეტულად ჩამოთვალა ყველა ის საკითხი, რომელიც ამ მიმართულებით ბიზნესს აწუხებს. მისი თქმით, ეს არის − ნორმირებული სამუშაო დროის შემოღება, ზეგანაკვეთური სამუშაოს საათების და ანაზღაურების პარამეტრების განსაზღვრა, შრომის ინსპექციის უფლებების გაფართოება, შრომითი ხელშეკრულების გაფორმებისა და შეწყვეტის წესის გამკაცრება. როგორც სოსო ფხაკაძემ აღნიშნა, ამ ნაწილში ბიზნესისა და მთავრობის პოზიციეში სრული თანხვედრაა. საინტერესოა, რას მოიაზრებს ეს თანხმობა. ამ კითხვაზე პასუხი თავად პრემიერ-მინისტრისგან მივიღეთ. შეხვედრის დამთავრებისთანავე გიორგი გახარიამ მედიასთან განაცხადა, რომ დამსაქმებლისა და დასაქმებულის ინტერესებს შორის ბალანსის პოვნა აუცილებელია. რაც შეეხება დიმიტრი ცქიტიშვილის ინიციატივას, ეს ერთი კონკრეტული დეპუტატის ხედვაა, პარლამენტში საკანონმდებლო ინიციატივის სახით დარეგისტრირებული არ არის და შესაბამისად, ვნებათა ღელვაც ნაადრევია. თქვენი არ ვიცი, მე კი ძალიან მაინტერესებს, როგორ დასრულდება „ბალანსს იპოვნის“ ხელისუფლებისეული მცდელობა და ვისთვის იქნება ის ხელსაყრელი... 

შეხვედრაზე ისაუბრეს დარგობრივ თუ გნებავთ თემატურ პრობლემებზეც. კონტრაბანდული დიზელის საკითხზე ყურადღება გაამახვილა ბიზნესმენმა ვანო მთვრალაშვილმა, რომელიც ნავთობპროდუქტების იმპორტიორთა კავშირს ხელმძღვანელობს. როგორც მან აღნიშნა, არის ეჭვი, რომ ქვეყანაში, გაურკვეველი დოზით, აღურიცხავი პროდუქცია შემოდის, რაც ბაზარზე ნავთობპროდუქტების იმპორტის შემცირებას იწვევს. მისივე განმარტებით, ეს ნეგატიურად აისახება ეკონომიკაზე, მცირდება იმპორტიორი კომპანიების შემოსავლები და შესაბამისად მათი შენატანებიც ბიუჯეტში. შეხვედრაზე, სავარაუდოდ, არაფერი ითქვა, რატომ ძვირდება ჩვენში საწვავი მაშინაც, როცა მსოფლიო ბაზარზე ნავთობის ფასი კლებულობს და ეროვნული ვალუტის კურსიც მეტ-ნაკლებად სტაბილურია.

ფერმერთა ასოციაციის პრეზიდენტმა კი სოციალურად დაუცველთა დასაქმების პროცესში ხელისუფლებისგან დახმარება მოითხოვა. ნინო ზამბახიძემ აღნისნა, რომ ასოციაციაში მზად არიან ეს ადამიანები დაასაქმოს... რა უშლით ხელს? − შესაძლოა ჩამეძიოთ. გაგიკვირდებათ, როგორც ნინო ზამბახიძე აცხადებს, თავად სოციალურად დაუცველი მოქალაქეები ამბობენ უარს. რა მიზეზით? − არც ეს შეკითხვა იქნება უცხო. ფერმერთა ასოციაციის ხელმძღვანელი განმარტავს, ფერმერები გასამრჯელოს უნაღდო ანგარიშსსორებით გასცემენ. სწორედ ეს არის პრობლემა. როგორც კი თანხა სოციალურად დაუცველი პირის ანგარიშზე ჩაირიცხება, მას   სოციალური დახმარება ავტომატურად შეუწყდება. ნინო ზამბახიძემ წამოაყენა ინიციატივა, რამდენიმე წლით დაწესდეს მორატორიუმი, სოციალურად დაუცველ პირებს დამატებითი შემოსავლების არსებობის შემთხვევაში, არ მოეხსნათ დახმარება. ბიზნესმენის განმარტებით, ეს ადამიანები გაივლიან პროფესიულ გადამზადებას, ჩაერთვებიან ეკონომიკურ პროცესში და შემდეგ უკვე მუდმივად დასაქმებული იქნებიან...

მთავრობის თავმჯდომარემ თავყრილობის მონაწილეებს პრობლემების მოგვარება აღუთქვა. გიორგი გახარიამ პირობა დადო, რომ უკლებლივ ყველა გადაწყვეტილება, საკანონმდებლო თუ სისტემური ცვლილება, მიღებულლი იქნება ბიზნესის წარმომადგენლების აქტიური ჩართულობით. მისი კიდევ ერთი პირობა ბიზნესისთვის კომფორტული გარემოს შექმნას ეხებოდა. „ძლიერი და სოციალურად პასუხისმგებლობის მქონე ბიზნესი, ეს სახელმწიფოს ერთ-ერთი მთავარი მიზანი“, − განაცხადა გიორგი გახარიამ. სულ ეს იყო, ახლა საინტერესოა, რას გაითვალისწინებს მთავრობა და რა დრო დასჭირდება დაპირებების შესრულებას?!    

 

1155
გაერთიანებული ოპოზიციის საპროტესტო აქცია

ქართული პოლიტიკის წინასაარჩევნო პერიპეტიები: ძველი სკანდალი ახალი ძალით

54
(განახლებულია 11:37 03.06.2020)
საქართველოში კორონავირუსის გამო მიჩუმებული პოლიტიკური ცხოვრება ახალი ძალით ახმაურდა: სცენაზე ნელ-ნელა გამოჩნდნენ ახალი მოთამაშეები - ყველა ერთად საშემოდგომო არჩევნებისთვის ემზადება

პარლამენტისთვის ბრძოლა სულ უფრო ახლოვდება, წინასაარჩევნო კამპანიაც, პრაქტიკულად, დაიწყო, თუმცა კენჭისყრის დღემდე ხუთი თვეა დარჩენილი.

მმართველ პარტია „ქართულ ოცნებას“ ხელისუფლებაში მესამე ვადით დარჩენის იმედი აქვს. გამარჯვების შემთხვევაში ის რეკორდს მოხსნის, რადგან პირველი პარტია იქნება საქართველოში, რომელიც ზედიზედ სამჯერ მიიღებს უმრავლესობას პარლამენტში.

დღეისათვის „ქართული ოცნების“ წინააღმდეგ იბრძვიან როგორც ცალკეული ოპოზიციური პარტიები, ისე მსხვილი ოპოზიციური გაერთიანება. ყოველი მათგანი გამარჯვების საკუთარი რეცეპტის პოვნას ცდილობს.

თუმცა ბოლო დროს ოპოზიციურ გაერთიანებაში ყველაფერი დალაგებული არ არის. 30-ზე მეტი პარტიის გაერთიანების განხეთქილების მთავარი მიზეზი შეიძლება გახდნენ დეპუტატობის კანდიდატები ერთმანდატიან ოლქებში.

საქართველოს საპარლამენტო არჩევნები შერეული სისტემით ტარდება - დეპუტატობის კანდიდატთა ნაწილი პარტიული სიებით აირჩევა, ნაწილი კი - ერთმანდატიან ოლქებში. სულ 73 ოლქია, თუმცა ახლა პარლამენტი მათი 30-მდე შემცირების შესაძლებლობას იხილავს.

ოპოზიცია რთულ მდგომარეობაშია, რადგან არ აპირებს საკონსტიტუციო ცვლილებების მხარდაჭერას, ვიდრე ციხეში იმყოფება მთავარი არხის თანამესაკუთრე გიორგი რურუა.

თუმცა, თუ კანონპროექტი ჩავარდება, მას მოუწევს 73 კანდიდატის წარდგენა, რომლებიც მმართველი პარტიისა და ოპოზიციის მეორე ნაწილის კანდიდატებს უნდა დაუპირისპირდნენ და გამარჯვებისთვის ამომრჩეველთა ხმების ნახევარზე მეტი მოიპოვონ.

მაჟორიტარობის კანდიდატები უთანხმოების საბაბია - მოხდება თუ არა განხეთქილება ოპოზიციაში?>>

მიუხედავად იმისა, რომ კანდიდატების წარსადგენად დრო ჯერ კიდევ არის, ოპოზიციაში უკვე თავი იჩინა პრობლემებმა.

გაერთიანებულ ოპოზიციას გამოეთიშა შედარებით ახალი პოლიტიკური წარმონაქმნი „ლელო საქართველოსთვის“, რომელშიც შედიან ბანკირ მამუკა ხაზარაძის პარტია „ლელო“, დავით უსუფაშვილის პარტია „შენების მოძრაობა“ და ფიქრია ჩიხრაძის პარტია „ახალი მემარჯვენეები“.

„ლელოს“ 30 საარჩევნო ოლქში 30 მაჟორიტარი ეყოლება. ჩვენ დღეს აქტიურად ვემზადებით ამისთვის, გვყავს საკმარისი კანდიდატები, რათა არჩევნებზე ვიბრძოლოთ“, - განაცხადა მოძრაობის გენერალურმა მდივანმა ბადრი ჯაფარიძემ.

ყოფილი მმართველი პარტია „ნაციონალური მოძრაობა“ კი, რომელიც ოპოზიციურ პარტიებს შორის რეიტინგით პირველ ადგილზეა, ჯერჯერობით ოპოზიციის თამაშის ორ ვარიანტზე საუბრობს.

„ერთიან მაჟორიტარულ ოლქებში ჩვენი როლი მნიშვნელოვანი და, დარწმუნებული ვარ, პოზიტიური იქნება. მაგრამ შესაძლოა ცალკეულ ოლქებში ოპოზიციას ჰყავდეს არა ერთიანი კანდიდატი, არამედ რამდენიმე, სხვაგან კი - ერთი. „ერთიანი ნაციონალური მოძრაობა“ გადაწყვეტილებას მხოლოდ სხვა პარტიებთან კონსულტაციების შემდეგ კონსენსუსის საფუძველზე მიიღებს“,- აღნიშნა „ნაცმოძრაობის“ ერთ-ერთმა ლიდერმა ნიკა მელიამ.

მელიას ეთანხმება კიდევ ერთი წამყვანი ოპოზიციური პარტიის „ევროპული საქართველო - მოძრაობა თავისუფლებისთვის“ ერთ-ერთი ლიდერი გიგა ბოკერია.

„ცალკეულ ოლქებში, განსაკუთრებით თბილისში, ერთიანი კანდიდატების წარდგენა საკვანძოდ მიმაჩნია. ის, ვინც მუშაობს ან იმუშავებს ამის წინააღმდეგ, ტაქტიკურ შეცდომას დაუშვებს და რიგ შემთხვევაში, შესაძლოა, ადგილი ჰქონდეს ძალიან სახიფათო პოლიტიკურ სიხარბეს“, - განაცხადა ბოკერიამ.

რატომ შეიძლება თქვას უარი „ქართულმა ოცნებამ“ წინასაარჩევნო აგიტაციაზე>>

ამასთან, ოპოზიციის კონსულტაციები კვლავ გრძელდება. საბოლოო გადაწყვეტილებას პარტიები წინასაარჩევნო კამპანიის დაწყების წინ გამოაცხადებენ, როდესაც საჭირო იქნება განაცხადების შეტანა. სწორედ მაშინ გაირკვევა, რა უფრო მნიშვნელოვანია - შედეგი თუ პოლიტიკური ამბიციები. მით უფრო, რომ საქართველოს პოლიტიკურ სპექტრში ახალი პარტიები გამოჩნდნენ, რომლებსაც ძველი კონკურენტებისთვის ხმების წართმევის შანსი გაუჩნდათ.

ლიზა შელია

54
ერთიანი ეროვნული გამოცდები

ეროვნული გამოცდები 2020 სად ჩატარდება, როგორ და როდის, რა შეცვალა კორონავირუსმა

81
(განახლებულია 15:14 03.06.2020)
ახალმა კორონავირუსმა 2020 წელი ძირფესვიანად შეცვალა. ის პოლიტიკური, სოციალური თუ ეკონომიკური ცხოვრების აბსოლუტურად ყველა სფეროს შეეხო და ყველა გეგმა თავდაყირა დააყენა.

გამონაკლისი არც განათლების სფერო და გამოცდები აღმოჩნდა. დღეს ერთ-ერთი ყველაზე მნიშვნელოვანი კითხვა სწორედ ისაა, თუ როდის და რა ფორმატით ჩატარდება ერთიანი ეროვნული გამოცდები, რადგანაც გამოცდები თითქმის კარსაა მომდგარი და ათასობით აბიტურიენტი კვლავაც გაურკვევლობაშია.

„Sputnik-საქართველო“ შეეცადა მიეღო ამომწურავი პასუხები ყველა იმ მიშვნელოვან კითხვაზე, რაც აბიტურიენტებსა და მათ გულშემატკივრებს აინტერესებთ. როგორც განათლების სამინისტროსა და შეფასებისა და გამოცდების ეროვნულ ცენტრში გვითხრეს, ამ დროისათვის ყველა რეკომენდაცია ჯერ არ აქვთ და დეტალებზე ჯანდაცვის სამინისტროსთან ერთად აქტიურად მუშაობენ.

ვიდრე ზუსტი რეკომენდაციები გაიწერება, თუ როდის და როგორ ჩატარდება ერთიანი ეროვნული გამოცდები, მანამდე ამ დროისთვის ცნობილ ყველა ინფორმაციას მოგაწვდით.

როდის ჩატარდება?

მაისში განათლების მინისტრმა მიხეილ ჩხენკელმა განათლების სფეროს ანტიკრიზისული გეგმის წარდგენისას განაცხადა, რომ ერთიანი ეროვნული გამოცდების თარიღი შეიძლება შეიცვალოს და გამოცდები ივლისის ნაცვლად აგვისტოში ჩატარდეს, თუმცა ეს დამოკიდებული იქნება ქვეყანაში არსებულ ეპიდსიტუაციაზე.

უსაფრთხოების დაცვა

შეფასებისა და გამოცდების ეროვნულ ცენტრის მიერ „Sputnik-საქართველოსთვის“ მოწოდებული ინფორმაციით:

- ერთ საგამოცდო სივრცეში 10 აპლიკანტზე მეტი არ განთავსდება

- აუცილებლად ჩატარდება აბიტურიენტების თერმოსკრინინგი

- მაქსიმალურად იქნება დაცული უსაფრთხოების ზომები

ასევე, ამ დროისათვის არსებული ინფორმაციით,

- მაგიდების დაშორება სულ მცირე უნდა იყოს 1,5–2 მეტრი

- აბიტურიენტებს მაგიდებთან არ განათავსებენ ერთმანეთის პირისპირ

- თუ აბიტურიენტს ტემპერატურის მომატება დაუფიქსირდება (37 გრადუსი და მეტი), დაავადებათა კონტროლის ეროვნული ცენტრის ხელმძღვანელის ამირან გამყრელიძის განმარტებით, მას გამოცდის ჩაბარების ალტერნატივას შესთავაზებენ, რათა გამოცდა არ გაუცდეს და არ დაიჩაგროს. ჯერჯერობით უცნობია, თუ რა იგულისხმება ალტერნატიულ შეთავაზებაში. თუმცა, როგორც ცოტა ხნის წინ ჯანდაცვის მინისტრის მოადგილემ თამარ გაბუნიამ განაცხადა, შესაძლებელია შეიქმნას იზოლირებული კაბინები იმ აბიტურიენტებისთვის, ვისაც, შეიძლება, ემოციურ ფონზე დაუფიქსირდეს ტემპერატურის მატება.

- ვენტილაციის უზრუნველყოფა საგამოცდო ოთახში. ოთახებში კონდიცირების სისტემის გამოყენება არ არის რეკომენდებული, თუ არ იქნება თანმდევი ვენტილაცია. 

- საგამოცდო ცენტრში აბიტურიენტებს ინდივიდუალური დაცვის საშუალებების გარეშე არ დაუშვებენ

- საგამოცდო ცენტრში აბიტურიენტების მისაღებად გამოიყენებენ ცვლებში მუშაობის რეჟიმს და ყოველი ცვლისას აუცილებელი იქნება სანიტარული შესვენება

- საგამოცდო დარბაზის შესასვლელში უნდა იყოს ხელის დეზინფექციისთვის საჭირო ხსნარი

როდის გახდება ცნობილი ყველა დეტალი ეროვნულ გამოცდებთან დაკავშირებით

მიხეილ ჩხენკელმა განათლების სფეროს ანტიკრიზისული გეგმის წარდგენისას განაცხადა, რომ სამინისტროს ექნება ერთიანი ეროვნული გამოცდების ჩატარების პროტოკოლის მთელი ნუსხა, რომელსაც ივნისში გამოცდების თარიღთან ერთად გაასაჯაროვებს.

როგორც გამოცდების ეროვნულ ცენტრში გვითხრეს, ყველა რეკომენდაცია, სავარაუდოდ, 10-15 ივნისს გახდება ცნობილი და დეტალურად გამოქვეყნდება მათ ვებ-გვერდზეც.

მანამდე კი 39300-ზე მეტი აბიტურიენტი გადაწყვეტილების მოლოდინშია.

 

81
ვაკის პარკი

საქართველოს მთავარმა ეპიდემიოლოგმა თბილისში გაისეირნა - რა არ მოეწონა გამყრელიძეს

0
(განახლებულია 15:08 03.06.2020)
ამირან გამყრელიძეს, პირველ რიგში, არ მოეწონა ხალხმრავლობა პარკებში, სადაც ადამიანები პირბადეების გარეშე სეირნობდნენ

თბილისი, 3 ივნისი – Sputnik. საქართველოს მთავარი ეპიდემიოლოგი ამირან გამყრელიძე შეშფოთებულია იმით, რომ მოსახლეობამ ჯანდაცვის სამინისტროს რეკომენდაციების იგნორირება დაიწყო, მათ შორის სოციალური დისტანციის დაცვის კუთხით.

„ეს შაბათ-კვირა არ მომეწონა. რომ გავიარე, რამდენიმე პარკში ვიყავი და თითქოს, ხალხმრავლობამ იფეთქა“, – განაცხადა დაავადებათა კონტროლის ეროვნული ცენტრის ხელმძღვანელმა ამირან გამყრელიძემ პირველი არხის ეთერში.

მან აღნიშნა, რომ ზოგიერთ ქვეყანაში შეზღუდვების შერბილებამ კორონავირუსის შემთხვევების რაოდენობის მკვეთრი გაზრდა გამოიწვია. მნიშვნელოვანია, რომ ეს საქართველოში არ მოხდეს.

„გასაგებია, ზაფხული მოვიდა, ცხელა და ყველას უნდა გარეთ ყოფნა, მაგრამ საზოგადოებრივი თავშეყრის ადგილებში რეკომენდაციები უნდა დავიცვათ“,– განაცხადა გამყრელიძემ.

ეპიდემიოლოგმა კიდევ ერთხელ გააფრთხილა მოსახლეობა, რომ ჯერ არაფერი არ დამთავრებულა და სხვა ქვეყნების მაგალითები მოიყვანა.

„პირდაპირ გეტყვით, პანდემიის დაბრუნების საფრთხე, რა თქმა უნდა, არის. ამის მაგალითია ის, რაც ახლა სამხრეთ ამერიკაში ხდება. იცით, ბრაზილიაში რაც ხდება; სერიოზული მატებაა ჩილეში, პერუში. გახსნასთან ერთად ყველა ქვეყანაში იყო მცირე ნახტომები. იგივე, გერმანიას ჰქონდა მცირე ნახტომი“, – განაცხადა გამყრელიძემ.

ამავდროულად, მან აღნიშნა, რომ საზოგადოებას დიდი ხნის განმავლობაში ვერ ჩაკეტავ. თითოეული ქვეყანა დღეს ეძებს ბალანსს, ხსნის შეზღუდვებს, რომ არ მოხდეს კორონავირუსის ხელახალი აფეთქება.

გამყრელიძემ მოუწოდა მოსახლეობას, ახსოვდეთ, რომ სამედიცინო პირბადე თითოეულის ცხოვრების ატრიბუტი უნდა გახდეს.

კორონავირუსის მეორე ტალღას მთელი მსოფლიო შემოდგომაზე ელოდება, და საქართველო გამონაკლისი არ იქნება. პროგნოზების მიხედვით, ის შედარებით სუსტი უნდა იყოს მაგრამ მომზადება საჭიროა. განაცხადა ეპიდემიოლოგმა.

საქართველოში კორონავირუსის პირველი შემთხვევა 26 თებერვალს გამოვლინდა. ქვეყნის ხელისუფლებამ პრევენციული ზომები დროულად მიიღო. ამის შედეგად, 3 ივნისის მონაცემებით, საქართველოში კორონავირუსის 800 შემთხვევა დაფისირდა, გარდაიცვალა 13 ადამიანი. ეს რეგიონში ყველაზე დაბალი მაჩვენებლებია.

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/2 ივნისი>>

შეზღუდვები ქვეყანაში ეტაპობრივად იხსნება, მაგრამ რჩება მთავარი რეკომენდაცია – სოციალური დისტანცია და პირბადე დახურულ სივრცეში.

0
თემები:
COVID-19 საქართველოში