გიორგი გაბუნია

ვინ დგას გაბუნიას სკანდალური განცხადების უკან? ვერსიები და „რუსთავი 2“-ის მიზნები

1157
(განახლებულია 13:26 09.07.2019)
პოლიტიკოსების, პოლიტოლოგებისა და მედიაექსპერტების მოსაზრებები ორად გაიყო იმის თაობაზე, როგორი რეაქცია უნდა მოჰყვეს ოპოზიციური ტელეარხი „რუსთავი 2“-ის ეთერში სკანდალურ გამოსვლას.

ტელეარხის პროგრამა „პოსტ-სკრიპტუმის“ კვირის გამოშვებამ პრაქტიკულად მთელი ქართული საზოგადოება შოკში ჩააგდო და საქართველოში ახალი საპროტესტო ტალღა გამოიწვია.

საავტორო გადაცემის წამყვანმა გიორგი გაბუნიამ პირდაპირ ეთერში რუსულ ენაზე უცენზურო ლექსიკის გამოყენებით შეურაცყოფა მიაყენა რუსეთის პრეზიდენტს და მის გარდაცვლილ მშობლებს.

თბილისში ერთდროულად რამდენიმე საპროტესტო აქცია მიმდინარეობს >>

ჟურნალისტის ამ განცხადების შემდეგ ქართული სოციალური ქსელები წამებში აივსო კომენტარებით, ერთ საათში კი „რუსთავი 2“-ის შენობასთან გაიმართა სტიქიური საპროტესტო აქცია, რომლის მონაწილეებმაც გაბუნიასა და ტელეკომპანიის დირექტორს ნიკა გვარამიას ბოდიშის მოხდა მოსთხოვეს.

გაბუნია და „რუსთავი 2“ დაუყოვნებლივ გააკრიტიკეს საქართველოს პირველმა პირებმა და „საქართველოს ჟურნალისტური ეთიკის ქარტიამ“.

„რუსთავი 2“-ის დირექციამ წამყვანის საქციელისთვის ბოდიში მოიხადა, მაგრამ აქვე განაცხადა, რომ არსებობს „ტელეკომპანიასთან ანგარიშსწორების რეალური საფრთხე“. არხის გენერალურმა დირექტორმა ხელისუფლება ქვეყანაში სიტყვის თავისუფლების დევნის მცდელობაში დაადანაშაულა და თავისი თანამშრომლების უსაფრთხოების უზრუნველყოფა მოსთხოვა. არხის მაუწყებლობა დროებით შეწყდა.

ამორალური საქციელი

საქართველოს პრემიერ-მინისტრმა ერთ დღეში ორი განცხადება გააკეთა. ბოლო კომენტარში მან „რუსთავი 2“-ის ქმედებებს ქვეყანაში დესტაბილიზაციის მიზნით ქართველი ხალხის წინააღმდეგ ყოფილი მმართველი პარტია „ერთიანი ნაციონალური მოძრაობის“ მხრიდან აგრესია უწოდა.

„ეს არ იყო ცალკე აღებული რომელიმე ჟურნალისტის მიერ ნათქვამი სრულიად მიუღებელი ფრაზები; ეს არის წლების განმავლობაში ქართველი ხალხის მიმართ არსებული აგრესია, რომელიც მოდის “ნაციონალური მოძრაობისა” და მისი ბელადის მხრიდან. ის, რაც ჩვენ გუშინ ვიხილეთ, იყო სრულიად ამაზრზენი და ამორალური საქციელი და ამავე დროს გამიზნული და უბინძურესი პროვოკაცია, რომლის მიზანია საქართველოში დესტაბილიზაცია და ქვეყნის ეროვნული ინტერესების დაზიანება“, – განაცხადა ბახტაძემ.

პრემიერმა „ერთიან ნაციონალურ მოძრაობას“ დესტრუქციული ძალა უწოდა.

„გუშინ იყო მცდელობა, რომ აქცენტი გადაეტანათ ერთ ჟურნალისტზე, თუმცა ყველამ ვიცით, რომ აქ საქმე ერთ ჟურნალისტზე არ არის. საქმე იმაშია, რომ „ნაციონალური მოძრაობა“, რომელიც ჯერ კიდევ ხელისუფლებაში ყოფნის პირობებში აკეთებდა იმ ყველაფერს, რამაც მოგვიტანა ძალიან მძიმე შედეგები, ახლა იმავეს აგრძელებს ოპოზიციაში ყოფნის პერიოდში ამ პოზიციებიდან. ამ წლების განმავლობაში ჩვენ ყველა ერთად, მათ შორის ხელისუფლებაც, საზოგადოებაც, რაღაცნაირად ვეფერებოდით „ნაციონალურ მოძრაობას“ და არ ვარქმევდით ყველაფერს თავის სახელს. როცა არის მტერი, უნდა დაერქვას მას მტერი და ეს არის პრინციპული პოზიცია“, – განაცხადა „ქართული ოცნების“ აღმასრულებელმა მდივანმა ირაკლი კობახიძემ.

მისი სიტყვებით, სახელმწიფო დაუყოვნებლივ რეაგირებას მოახდენს ყოველთვის, როდესაც სახელმწიფო ინტერესებს საფრთხე შეექმნება.

რა შემთხვევაში დატოვებს „რუსთავი 2“–ს  ნიკა გვარამია >>

„რეაგირების ადრესატი უნდა გახდეს „ნაციონალური მოძრაობა“, ყველაფერი დანარჩენი – მხოლოდ ინსტრუმენტებია. „ნაციონალური მოძრაობა“ – ეს მტრული პოლიტიკური ძალაა“, – ხაზი გაუსვა კობახიძემ.

ოპოზიციის პასუხი

„ერთიანი ნაციონალური მოძრაობის“ ლიდერებს კი მიაჩნიათ, რომ პრობლემას ამჟამად წარმოადგენს არა ის, რაც დამოუკიდებელმა ჟურნალისტმა თქვა, არამედ „ხელისუფლების ისტერია“.

„ეს არის სრულმასშტაბიანი ისტერია, რომელიც ხელისუფლებამ მოაწყო ერთი ჟურნალისტის განცხადებაზე რეაგირებისას. ეს კიდევ ერთხელ აჩვენებს ხელისუფლების რეალურ დღის წესრიგს. ესაა შიშის მაქსიმალური ინსპირაცია, იმის ნაცვლად, რომ ეს განვიხილოთ, როგორც ერთი ჟურნალისტის განცხადება, რომელიც ვიღაცას შეიძლება მოეწონოს და ვიღაცას – არა“, – განუცხადა თინა ბოკუჩავამ ჟურნალისტებს.

მან სრული აბსურდი უწოდა იმას, რომ გაბუნიას განცხადებას შეიძლება მოჰყვეს ქვეყანაში ვითარების დესტაბილიზაცია.

„დესტაბილიზაციას იწვევს ხელისუფლება, რომელსაც არ შეუძლია კრიზისის მართვა“, – აღნიშნა ბოკუჩავამ.

პარტიის „ევროპული საქართველო - მოძრაობა თავისუფლებისთვის“ დეპუტატებმა ხელისუფლების განცხადება შეაფასეს, როგორც ღია მუქარა დამოუკიდებელი ტელეარხის მისამართით.

„არ შეიძლება სახელმწიფო გადავიდეს ამ ზღვარს და ერეოდეს კერძო კომპანიის სარედაქციო პოლიტიკაში... ეს განცხადებები ცხადყოფს, რომ ხელისუფლება აპირებს „რუსთავი 2“-ზე და ზოგადად დამოუკიდებელ მასმედიაზე ზეწოლის მცდელობის გაგრძელებას და ამას აუცილებლად უნდა დაუპირისპირდეს საზოგადოება“, – აღნიშნა დეპუტატმა სერგი კაპანაძემ.

ამჟამად „რუსთავი 2“-ის საქმეს ევროპის ადამიანის უფლებათა სასამართლო იხილავს. სტრასბურგის სასამართლო გადაწყვეტილებას 18 ივლისს გამოაცხადებს.

„რუსთავი 2“-ის იურისტებმა ევროპის ადამიანის უფლებათა სასამართლოს 2017 წლის მარტში მიმართეს, მას შემდეგ, რაც საქართველოს უზენაესმა სასამართლომ ძალაში დატოვა ორი ქვედა ინსტანციის სასამართლოს გადაწყვეტილება ტელეკომპანიის ყოფილი მფლობელისთვის ქიბარ ხალვაშისთვის დაბრუნების შესახებ. სტრასბურგის სასამართლომ უზენაესი სასამართლოს გადაწყვეტილების აღსრულება საქმის განხილვის დასრულებამდე შეაჩერა.

ეს არის ერთ-ერთი ყველაზე რეზონანსული სასამართლო პროცესი ქართული სასამართლოს ისტორიაში. ტელეკომპანიის საქმე საქართველოს სასამართლოებში ორ წელზე მეტხანს იხილებოდა.

ვინ მისცა დავალება გაბუნიას?

რატომ მაინცდამაინც ახლა და დგას თუ არა ვინმე სკანდალური ტელეწამყვანის ქმედებების უკან – ეს კითხვები ბოლოდროინდელი მოვლენების ფონზე ყველაზე აქტუალურია.

ნინო ბურჯანაძე „რუსთავი 2“–ის კვირის ეთერთან დაკავშირებით გამოძიების დაწყებას ითხოვს >>

საქართველოში ვითარება 20 ივნისს დაიძაბა – საქართველოს პარლამენტში რუსეთის სახელმწიფო დუმის დეპუტატ სერგეი გავრილოვის ვიზიტის შემდეგ. არეულობისას დაშავდა 240 ადამიანი, დააკავეს 300-ზე მეტი. თბილისში გაკეთებული ანტირუსული განცხადებების პასუხად რუსეთმა 8 ივლისიდან საქართველოსთან პირდაპირი ავიამიმოსვლა შეწყვიტა. საპროტესტო აქცია მესამე კვირაა გრძელდება.

ექსპერტი ხათუნა ლაგაზიძე ფიქრობს, რომ გაბუნიამ სკანდალური განცხადება სხვისი დავალებით გააკეთა, მაგრამ ვინ მისცა მას ასეთი დავალება – ეს გამოძიებამ უნდა დაადგინოს.

„დაუყოვნებლივ უნდა დაიწყოს ამ ფაქტის გამოძიება. ვფიქრობ, ეს არ იყო ემოციურ ნიადაგზე გაკეთებული განცხადება. ამიტომ სასწრაფოდ საჭიროა იმის დადგენა, ვინ დაავალა გიორგი გაბუნიას ყველაფერი გაეკეთებინა იმისთვის, რომ მოემზადებინა ნიადაგი ქვეყანაში რუსული ჯარების შემოსაყვანად“, – განაცხადა ლაგაზიძემ გაზეთ „კვირის პალიტრისათვის“ მიცემულ ინტერვიუში.

მისი სიტყვებით, ხელისუფლების წარმომადგენელთა მხრიდან მხოლოდ განცხადებების კეთება არასაკმარისია.

პუტინის გინება პირდაპირ ეთერში: რა ელოდება გაბუნიას ქართული კანონმდებლობით >>

„ეს იყო დანაშაული საქართველოს დამოუკიდებლობის წინააღმდეგ და სწორედ ეს უნდა გახდეს გამოძიების საგანი“, – აღნიშნა ლაგაზიძემ.

ჟურნალისტი, პატიმართა შეწყალების სახელმწიფო კომისიის ყოფილი ხელმძღვანელი ზვიად ქორიძე ფიქრობს, რომ გაბუნიას გამოსვლაში უკანონო არაფერი ყოფილა.

„ეს იყო უცენზურო რეპლიკა... მაგრამ, ნებისმიერ შემთხვევაში, ის თვითრეგულირების (მასმედიის, - რედ.) ჩარჩოებში ჯდება... ამიტომ ახლა, ასე ვთქვათ, ჩვენი საზოგადოება სახიფათო მოსახვევთან იმყოფება. თუ უნდა წავიდეთ ცენზურისკენ, მაშინ შეგვიძლია საერთოდ უარი განვაცხადოთ დემოკრატიულ განვითარებაზე“, – განაცხადა ქორიძემ პირველი არხის ეთერით.

საქართველოს პარლამენტის ექს-სპიკერი, პარტია „ერთიანი საქართველო - დემოკრატიული მოძრაობის“ ლიდერი ნინო ბურჯანაძე არ გამორიცხავს „რუსთავი 2“-ის ქმედების კავშირს საპროტესტო აქციის ტალღასთან, რომელიც პარლამენტის წინ 20 ივნისს დაიწყო.

„ინციდენტი გავრილოვთან კვლავაც გამოიყენეს სააკაშვილმა, მისმა გუნდმა და რადიკალებმა ანტირუსული ისტერიის გასაღვივებლად. რასაკვირველია, საჭირო იყო ამ აქციის გამოკვება“, – განუცხადა ბურჯანაძემ „Sputnik-საქართველოს“.

ის არ გამორიცხავს ასევე, რომ გაბუნიამ სკანდალური განცხადება იმის გამო გააკეთა, რომ ტელეარხის ამჟამინდელი ხელმძღვანელობა სტრასბურგის სასამართლოსგან უარყოფით გადაწყვეტილებას ელოდება.

„ანუ ეს ყველაფერი – ერთი ჯაჭვის რგოლებია. ამ ჯაჭვს მთავარი მიზანი აქვს – რუსეთისა და საქართველოს დაპირისპირება, რათა არ მოხდეს რუსეთსა და საქართველოს შორის ურთიერთობის ნორმალიზება და დაახლოება“, – აღნიშნა ბურჯანაძემ.

ტელეარხის ისტორია

ტელეარხი „რუსთავი 2" უკვე 25 წელია მაუწყებლობს. ის საქართველოში ერთ-ერთი პირველი დამოუკიდებელი კომერციული ტელეკომპანიაა. ამ წლების განმავლობაში ტელეკომპანია მფლობელებს ხელთათმანებივით იცვლიდა – ბევრჯერ გადავიდა ხელიდან ხელში.

გაბუნიას განცხადება ქვეყნისთვის საფრთხის შემცველია – კომუნიკაციების ეროვნული კომისია >>

ტელეკომპანიის წილების ყიდვა-გაყიდვა მრავალ კითხვას ბადებდა და უკავშირდებოდა ბიზნესმენების სიმპათიებს ამა თუ იმ ხელისუფლებისადმი. ყველაზე დიდხანს ტელეკომპანიას ფლობდა მისი დამფუძნებელი ეროსი კიწმარიშვილი ორ თანადამფუძნებელთან – დავით დვალთან და ჯარჯი აქიმიძესთან ერთად.

ამჟამად ტელეარხის მფლობელები არიან შპს ტელეკომპანია „საქართველო" (51%), ლევან (22%) და გიორგი (18%) ყარამანაშვილები, ნინო ნიჟარაძე (9%). შპს ტელეკომპანია „საქართველო" ეკუთვნის ნიკოლოზ ნაყოფიას (50%) და ძმებ ყარამანაშვილებს (25-25%).

ჟურნალისტი გიორგი გაბუნია ფაქტობრივად ტელეარხ „რუსთავი 2"-ის სახე და ყველაზე რეიტინგული გადაცემა „პოსტ-სკრიპტუმის" წამყვანია. მისი გამონათქვამები არაერთხელ გამხდარა ხელისუფლების, საზოგადოებისა და საპატრიარქოს წარმომადგენელთა კრიტიკის ობიექტი.

მაგალითად, 2018 წლის მარტში სიუჟეტში, რომელიც ეხებოდა აჭარიდან და გურიიდან მილიარდერ ბიძინა ივანიშვილის დენდროლოგიურ პარკში ხეების გადატანას, გაბუნიამ განაცხადა, რომ იესო ქრისტემ შეცდომა დაუშვა, როდესაც ორი ათასი წლის წინ საქადაგებლად ისრაელში მივიდა. ჟურნალისტის თქმით, ის ორი ან სამი წლის წინ აჭარაში უნდა მისულიყო, სადაც მას ჯვარზე არ გააკრავდნენ, რადგან რეგიონში აღარ დარჩა ხე ჯვრის დასამზადებლად. საპატრიარქომ „რუსთავი 2" ღვთის გმობაში დაადანაშაულა.

1157
თემები:
გინება პირდაპირ ეთერში - სკანდალი Rustavi 2-ის ირგვლივ (49)
უპილოტო საფრენი აპარატი

მიმოხილვა: რუსული უპილოტო „მონადირე“ ხელოვნური ინტელექტით

35
(განახლებულია 17:13 13.08.2020)
აშშ-ის სამხედრო-საჰაერო ძალების მძიმე უპილოტო საფრენი აპარატები ძირითადად „მესამე სამყაროს“ ქვეყნებში მეამბოხეების წინააღმდეგ ბრძოლისთვის გამოიყენება.

რუსეთი კი ამზადებს მეხუთე თაობის გამანადგურებლების მკვლელს ხელოვნური ინტელექტით, რომელსაც ამოცანების Су-57-თან ერთად შესრულების უნარი ექნება.

დასავლელ „პარტნიორებს“ იმდენად აფრთხობს რუსეთის წარმატება მაღალტექნოლოგიური შეიარაღების სფეროში, რომ მთავარ თემებს ავტორიტეტულმა საფინანსო-ეკონომიკურმა ჟურნალმა Forbes-მაც კი გადაუხვია და 7 აგვისტოს გამოცემაში სტატია დაუთმო რუსული მძიმე უპილოტო S-70 Okhotnik-ის (Hunter, „მონადირე“) შედარებას აშშ-ის ანალოგიურ უპილოტო საფრენ აპარატებთან. 

ამერიკული გამოცემა აღნიშნავს: აშშ-ის სამხედრო-საჰაერო ძალების MQ-9 Reaper-სგან განსხვავებით, რუსული მზვერავი-დამრტყმელი დრონი გამოიყენება არა მეამბოხეებთან საბრძოლველად, არამედ სრულმასშტაბიანი სამხედრო კონფლიქტებისთვის.

მას შეუძლია დასაზვერი მოწყობილობებისა და 6 ტონა ბომბების ან რაკეტების („მიწა-ჰაერი“ და „ჰაერი-ჰაერი“) 5000 კილომეტრ მანძილზე ზიდვა. „მონადირე“ ფლობს უპრეცედენტო შესაძლებლობებს შეიარაღების მრავალფეროვნებისა და სიშორის თვალსაზრისით. გარეგნულად ჰგავს X-47B Northrop Grumman პროექტს, მაგრამ სხვა გზით მიდის. ცნობილია, რომ იგეგმება რთულად შესამჩნევი დამრტყმელი უპილოტო „მონადირის“ შექმნის მნიშვნელოვნად დაჩქარება. სერიული წარმოება 2024 წელს დაიწყება.

აშშ-ში ანალოგიური პროექტი ფერხდება. პირველი ფრენა ამერიკულმა მძიმე უპილოტო X-47B-მ 2011 წელს შეასრულა. პენტაგონმა სამხედრო-საზღვაო ძალებისთვის პერსპექტიული უპილოტო თვითმფრინავის ადაპტაციის პროგრამა – UCLASS – 2013 წელს აამოქმედა. მიზანი – 2020 წლისთვის მანქანის ოპერატიული მზადყოფნის მიღწევა იყო (ოთხმა მონაწილე კომპანიამ 15-15 მლნ დოლარი მიიღო). ჯერ კიდევ 2015 წელს სამხედრო-საზღვაო ძალების სპეციალისტებს გემბანის დამრტყმელი დრონის საჭიროებაში ეჭვი ეპარებოდათ. შემდეგ კი საქმე უკან-უკან წავიდა. UCLASS პროგრამის ფარგლებში უპილოტო თვითმფრინავის სტატუსი თანდათანობით ეცემოდა დამრტყმელიდან მზვერავამდე და უბრალო მფრინავ აპარატამდე, რომელიც თვითმფრინავის საწვავით შევსების ფუნქციით შემოიფარგლება.   

აშშ-ის სამხედრო-საჰაერო ძალები დღეს სიფრთხილით ცდიან სხვა, შედარებით მცირე ზომის დამრტყმელ აპარატს XQ-28 Valkyrie, რომელსაც სულ რაღაც 450 კგ სასარგებლო ტვირთის (ერთ-ორი ბომბი ან რაკეტა) ზიდვა შეუძლია და არ ფლობს „სტელსის“ მახასიათებლებს.

Forbes იძულებულია განაცხადოს: უპილოტო აპარატების შექმნის უფრო ადრეული სტარტის მიუხედავად, „ფინიშთან აშშ-ს შეიძლება რუსეთმა მიასწროს“. მაღალტექნოლოგიური შეიარაღების სფეროში ეს უკვე ტენდენციაა.

საბრძოლო ინტელექტი

ამერიკულმა გამოცემა The Drive-მა ასევე მიუძღვნა პუბლიკაციების მთელი სერია რუსულ მძიმე უპილოტო საფრენ აპარატს: „მონადირე“ ჰგავს გამანადგურებელს და საკმაოდ შთამბეჭდავად გამოიყურება – დაახლოებით 38 ფუტი სიგრძეში და 62-ფუტიანი ფრთის გაშლილობით (შესაბამისად, 11 და 19 მეტრი). ზომები მას იარაღის კორპუსში მოთავსების, კონსტრუქცია კი ზებგერითი სიჩქარით ფრენის შესაძლებლობას აძლევს. გარდა ამისა, მას უახლეს Су-57 გამანადგურებელთან ერთად მოქმედებაც შეუძლია.

ინტერესი კანონზომიერია. ძალიან ცოტა ქვეყანას თუ შეუძლია მძიმე მზვერავი-დამრტყმელი უპილოტო უხილავი აპარატების შექმნა. დამრტყმელი უპილოტოების მეხუთე თაობის გამანადგურებლებთან ინტეგრირების ტექნოლოგია კი ჯერ არავის აუთვისებია. როგორც ჩანს, რუსეთი პირველი იქნება.

„მონადირის“ ზუსტი მახასიათებლები, საბრძოლო დანიშნულება, აღჭურვილობა და შეიარაღება კიდევ დიდხანს დარჩება საიდუმლოდ. ცნობილია, რომ უპილოტო შესრულებულია სქემით „მფრინავი ფრთა“, კომპოზიტური მასალების გამოყენებით, რაც მოწინააღმდეგის რადიოლოკაციურ სადგურებზე აპარატის ხილვადობას ამცირებს.

აღჭურვილია წევის მართული ვექტორის მქონე რეაქტიული ძრავით, ავითარებს საათში დაახლოებით 1000 კმ სიჩქარეს. შეუძლია 5-6 ტონა საბრძოლო ტვირთის ზიდვა. ასაფრენი მასა 20 ტონას აღწევს. საცდელი ფრენები მეორე წელია გრძელდება.

გარდა ამისა, „მონადირე“ და მისი „უმცროსი ძმები“ ხელოვნური ინტელექტით აღიჭურვებიან. შეიძლება ვივარაუდოთ, რომ მძიმე გამანადგურებლებთან – Су-57-თან ერთად მოქმედებისას „ჭკვიანი“ „მონადირის“ საბრძოლო შესაძლებლობები საგრძნობლად გაიზრდება. Су-57-ს ხომ შეუძლია საჰაერო და სახმელეთო სამიზნეების აღმოჩენა 400 კმ-ის მანძილზე და დამრტყმელი უპილოტო აპარატებისთვის სამიზნეების შესახებ მითითებების გაგზავნა. მეხუთე თაობის ამერიკულ გამანადგურებლებთან შედარებით Су-57-ის აშკარა უპირატესობის გათვალისწინებით, „მონადირის“ ტიპის საბრძოლო რობოტებისა და მფრინავის ეფექტური ერთობლივი მოქმედების უსაზღვრო შესაძლებლობები იხსნება.

მძიმე მზვერავ-დამრტყმელ უპილოტო აპარატს შეუძლია რუსეთის სამხედრო-კოსმოსურ ძალებსა და სამხედრო-საზღვაო ძალებში იმსახუროს. ამასთან, პერსპექტიულ ავიამზიდ ხომალდებზე „მონადირესა“ და მოდიფიცირებულ Су-57-ს საბრძოლო ამოცანების ერთად შესრულების უნარი შესწევთ. მოსალოდნელია, რომ მომავალში რუსულ მძიმე უპილოტო აპარატს ცაში ბევრი საბრძოლო სამუშაო გამოუჩნდება და ეს „ფუჭი სიტყვები“ არ არის.

დაფრინავენ პირველ გასროლამდე

აშშ-ის სამხედრო-საჰაერო ძალებმა 7 აგვისტოს განაცხადეს, რომ ნევადის შტატში დასრულდა სამდღიანი სწავლება, რომელშიც მონაწილეობდნენ: სტელსის ტიპის გამანადგურებლები F-22 Raptors და F-35A Joint Strike Fighter, უხილავი ბომბდამშენი B-2A Spirit, სტელს-დრონი RQ-170 Sentinel (საიდუმლო 44-ე მზვერავი ესკადრილიიდან), ასევე „ხილული“ გამანადგურებლები F-15E Strike Eagle და რადიოელექტრონული ბრძოლის თვითმფრინავი EA-18G Growler ВМС. 1,4 მლნ დოლარად ღირებული ეს ღონისძიება გამოიყურება, როგორც სერიოზული მზადება აგრესიისთვის მაღალტექნოლოგიური მტრის წინააღმდეგ, რომელიც აშშ-ს ჩრდილოეთ და სამხრეთ ამერიკაში არ ჰყავს.

მანევრირებისას თვითმფრინავები ამუშავებდნენ ჰაერსაწინააღმდეგო თავდაცვის ზონაში ფარული შეღწევის ოპერაციას, პირობითი მტრის თავდაცვითი საშუალებებისა და სისტემების რადიოლოკაციურ ჩახშობასა და განადგურებას. რისთვის ემზადებოდნენ, ამის გამოცნობა რთული არ არის. გასული წლის სექტემბერში ევროპაში აშშ-ის სამხედრო-საჰაერო ძალების მეთაურმა ჯეფრი ჰარიგანმა განაცხადა, რომ პენტაგონს გააჩნია კალინინგრადის ოლქის მრავალშრიანი ჰაერსაწინააღმდეგო თავდაცვის გარღვევის გეგმა, ოქტომბერში კი პოლონეთისა და აშშ-ის მხრიდან კალინინგრადის ოლქში შეჭრის გეგმა გამოქვეყნდა.

პენტაგონი სულ უფრო აქტიურად ცდილობს „შეაკავოს“ რუსეთი მისივე საზღვრებთან. ბალტიისა და შავი ზღვების საჰაერო სივრცეში ამერიკელ მზვერავებს სახიფათო დავალებებზე გზავნიან. ეს არის დაუფარავი და უპასუხისმგებლო პროვოკაციები, რომლებიც მიზნად ისახავს კონცეპტუალური კონფლიქტის ტრანსფორმაციას შეიარაღებულ კონფლიქტში.

ამასთან, 2020 წელს რუსეთის საზღვრების მახლობლად აშშ-ის მზვერავი თვითმფრინავების გახშირებული გამოჭერა ტრაგიკული შედეგებით სრულდება. ამერიკული ჟურნალ The National Interest-ის ექსპერტები პირდაპირ აცხადებენ, რომ ინციდენტებზე პასუხისმგებლობა ვაშინგტონს ეკისრება, ვინაიდან ნატოს სამხედრო თვითმფრინავები დაფრინავენ რუსეთის საზღვრებთან და არა პირიქით. რუსეთი იძულებულია რეაგირება მოახდინოს – გაზარდოს თავდაცვითი და დამრტყმელი საშუალებები ხმელეთზე, ზღვასა და ჰაერში. ჰორიზონტზე მძიმე უპილოტო „მონადირის“ გამოჩენა კი კანონოზომიერი და დროული ნაბიჯია.

Global Firepower-ის მონაცემებით, აშშ-ს დაახლოებით 2000 დამრტყმელი თვითმფრინავი ჰყავს. სულ პენტაგონის საფრენი აპარატების რაოდენობა 5000-ს აღწევს. ამაში არ შედის ნატოში მისი მოკავშირეების საბრძოლო ავიაცია. შესადარებლად: რუსეთის თავდაცვის სამინისტროს განკარგულებაშია 870 გამანადგურებელი, ბომბდამშენი და მოიერიშე, სულ 4000 საფრენი აპარატი. მექსიკისა და კუბის ტერიტორიებიდან ვაშინგტონის ჰიპოთეტური „შეკავებისთვის“ რუსული თვითმფრინავები ალბათ საკმარისი არ არის, მაგრამ ეს არც არის მოსკოვის მიზანი.

ევრაზიის კონტინენტზე რუსეთის საჰაერო-კოსმოსური ძალები მხოლოდ თავდაცვაზე ზრუნავენ და გამანადგურებელი (დამრტყმელი) ავიაციის შესაძლებლობები არსებითად ავსებენ ჰაერსაწინააღმდეგო და რაკეტსაწინააღმდეგო საშუალებებსა და სისტემებს, რომლებიც რუსეთის საზღვრების პერიმეტრზეა განთავსებული. ჰაერსაწინააღმდეგო სისტემების გარღვევის გეგმები და აშშ-ის სამხედრო-საჰაერო ძალების „უხილავი“ აპარატების შესაბამისი წვრთნები ნევადაში ტაქტიკურად უსარგებლოა და სახიფათო „რეალობიდან ამოვარდნილი“ ამერიკელი სამხედრო მოსამსახურეებისთვის.

უპილოტო „მონადირე“ – არის გარღვევა მომავალში და ცაში ბატონობის მისაღწევად ასობით პერსპექტიულ რუსულ ინსტრუმენტთაგან მხოლოდ ერთ-ერთი.

რუსეთის მაღალტექნოლოგიური თავდაცვითი შესაძლებლობები პასუხობს მზარდ საფრთხეებს, შეესაბამება დასავლელი „პარტნიორების“ ყველაზე ცუდ მოლოდინს, პრაქტიკულად უთანაბრდება პენტაგონისა და ნატოს რაოდენობრივ უპირატესობას შეიარაღებული ძალებისა და ჩვეულებრივი შეიარაღების ცალკეული კომპონენტებით.

რედაქცია შესაძლოა არ ეთანხმებოდეს ავტორის მოსაზრებებს

35
აფეთქება ბეირუთში

„რუსთავი რომ მეორე ბეირუთი არ გახდეს“ ქარხნის ყოფილი თანამშრომელი რისკების შესახებ

125
(განახლებულია 13:50 13.08.2020)
თუ ტრაგედია ლიბანში 2 750 ტონა ამონიუმის ნიტრატმა გამოიწვია, რუსთავის ქიმიური ქარხნის ტერიტორიაზე შეიძლება ამაზე რამდენჯერმე მეტი პროდუქცია ინახებოდეს, აღნიშნა ქარხნის ყოფილმა თანამშრომელმა.

თბილისი, 13 აგვისტო – Sputnik. ყველა ქვეყანამ, რომელიც ამონიუმის ნიტრატს აწარმოებს, მათ შორის საქართველომ, უნდა გადახედოს უსაფრთხოების პროტოკოლებსა და სამოქალაქო თავდაცვის საკუთარ სტრატეგიას, განაცხადა „Sputnik–საქართველოსთან“ ინტერვიუში ქიმიური ქარხანა „რუსთავის აზოტის“ ყოფილმა თანამშრომელმა, საქართველოს მეტალურგიული, სამთო და ქიმიური მრეწველობის მუშათა პროფკავშირების პრეზიდენტმა თამაზ დოლაბერიძემ.

„რუსთავის აზოტი“ აზოტის სასუქის უმსხვილესი მწარმოებელია. საწარმოს პროდუქციის რეალიზება ხდება როგორც ქართულ ბაზარზე, ისე საზღვარგარეთ. ქარხანა, რომელიც მინერალური სასუქის გამოშვებაზეა სპეციალიზებული, ერთადერთია კავკასიის რეგიონში, რომელიც ამონიუმის ნიტრატს აწარმოებს.

„ეს ტრაგედია – აფეთქება ლიბანში ყველასთვის სამაგალითო უნდა გახდეს. საერთოდ, უბედური შემთხვევა მაშინ ხდება, როდესაც ამას ყველაზე ნაკლებად ელოდები. ყველა ქვეყანამ, სადაც ასეთი პროდუქცია იწარმოება – საქართველო, რუსეთი, ჩინეთი, ბელარუსი – უნდა გააძლიერონ უსაფრთხოების პროტოკოლი და სპეციალური წესები უნდა შემოიღონ ამონიუმის ნიტრატის შენახვის, გადაზიდვისა და დასაწყობების პროცესისთვის“, – განაცხადა დოლაბერიძემ.

მისი თქმით, რუსთავის ქიმიური ქარხანა აწარმოებს სწორედ იმ პროდუქციას, რომელმაც ბეირუთში აფეთქება გამოიწვია.

„დარწმუნებული ვარ, რომ ასეთ საწარმოებში დასაქმებულების გარკვეულმა ნაწილმა არც კი იცის, რომ ამონიუმის ნიტრატი ასაფეთქებელი ნივთიერებაა. ყოველ შემთხვევაში, „რუსთავის აზოტში“ 16 წელი ვიმუშავე და კოლექტივში არ იციან, რომ საქმე საშიშ ასაფეთქებელ ნივთიერებასთან აქვთ. რა თქმა უნდა, ამონიუმიუს ნიტრატი ადვილად არ ფეთქდება, მაგალითად, ასანთის გაკვრით, ამისთვის დეტონაციაა საჭირო, მაგრამ აფეთქების დროს მას დამანგრეველი ეფექტი აქვს“, – განმარტა დოლაბერიძემ.

წარმოება რუსთავში

როგორც დოლაბერიძემ აღნიშნა, „რუსთავის აზოტს“ ამონიუმის ნიტრატი (ამონიუმის გვარჯილა) მსოფლიოს ათობით ქვეყანაში გააქვს. პროდუქცია პოლიეთილენის ტომრებში 50 და 500 კილოგრამად იფუთება და ის რკინიგზით ბათუმამდე ჩააქვთ.

წლის განმავლობაში არის პერიოდები, როდესაც მოთხოვნა პროდუქციაზე მცირდება, მაგრამ მომავალი სეზონის აუცილებელი მარაგისთვის ქარხანა გამოშვებულ ამონიუმის ნიტრატს თავის ტერიტორიაზე სპეციალურად ორგანიზებულ ფართობზე ინახავს.

პროდუქციას პირამიდის ფორმით რამდენიმე სართულად აწყობენ და მისი რაოდენობა ბევრად მეტია, ვიდრე ის, რაც ბეირუთის პორტში ინახებოდა. დოლაბერიძის განმარტებით, თუ ტრაგედია ლიბანში 2 750 ტონა ამონიუმის ნიტრატმა გამოიწვია, რუსთავის ქიმიური ქარხნის ტერიტორიაზე შეიძლება ამაზე რამდენჯერმე მეტი პროდუქცია ინახებოდეს.

ამას გარდა, ქარხნის ტერიტორიაზე განთავსებულია სხვადასხვა ქიმიური ნივთიერებების საცავები, მათ შორის ზოგიერთი ნივთიერება ფეთქებადსაშიშია, ზოგი – მხუთავი, ზოგი აგრესიული გამხსნელია და ზოგიც – ტოქსიკური.

დოლაბერიძე აცხადებს, რომ ასეთივე, ან შედარებით ნაკლები სიმძლავრის ამონიუმის ნიტრატის აფეთქების შემთხვევაში აუცილებლად შეეხება ეს სხვა ნივთიერებების საცავებსაც, რაც წარმოუდგენელი მასშტაბის ტრაგედიამდე მიგვიყვანს როგორც ადამიანების სიცოცხლის მხრივ, ისე დასახლებული პუქტებისა და გარემოს თვალსაზრისით.

„რუსთავის აზოტი“ – ბეირუთში აფეთქებასთან კავშირის შესახებ

ბეირუთში მომხდარი ტრაგედიის შემდეგ მასმედიაში გაჩნდა ინფორმაცია, რომ აფეთქების მიზეზი საქართველოდან, კერძოდ, რუსთავიდან 2013 წელს იმპორტირებული ამონიუმის ნიტრატი გახდა. თავად დოლაბერიძე ეჭვით უყურებს ამგვარ განცხადებას და მიიჩნევს, რომ არანაირი მნიშვნელობა არა აქვს, საიდან შეიტანეს პროდუქცია ბეირუთში.

„მხოლოდ ბეირუთის პორტის უსაფრთხოების სამსახურის თანამშრომლების შეცდომის გამო მოხდა ძალიან დიდი უბედურება“, – აღნიშნა მან.

მასმედიაში გავრცელებულ ინფორმაციასთან დაკავშირებით ოფიციალური განცხადება გააკეთა ქიმიური ქარხნის ხელმძღვანელობამაც და აღნიშნა, რომ არ ფლობს ინფორმაციას იმის შესახებ, რომ ამონიუმის ნიტრატი, რომელიც ბეირუთის პორტში აფეთქდა, ქართული წარმოებისაა.

განცხადებაში აღნიშნულია, რომ „რუსთავის აზოტი“ ქვეყნის ერთ-ერთი დიდი ექსპორტიორია და მსოფლიოში ამონიუმის ნიტრატის 1%-ს აწარმოებს, იცავს საერთაშორისო სტანდარტებს არა მხოლოდ წარმოების, არამედ შენახვის დროსაც.

კომპანიაში ასევე აღნიშნეს, რომ პორტში ექვსი წლის განმავლობაში ასეთი პროდუქციის შენახვა უსაფრთხოების წესების უხეში დარღვევაა, რადგანაც წარმოების შემდეგ ექვს თვეში იგი საჭირო თვისებებს კარგავს.

რა მოხდა ბეირუთში

ოფიციალური მონაცემებით, ბეირუთში ამონიუმის ნიტრატის დიდი პარტია – დაახლოებით 2 750 ტონა აფეთქდა, რომელიც პორტის ტერიტორიაზე არასათანადო პირობებში ექვსი წლის განმავლობაში ინახებოდა.

ბეირუთში ზარალი დათვალეს: ქვეყანას მილიარდობით დოლარის ზიანი მიადგა – ფოტო>>

აფეთქების ტალღამ დაანგრია და დააზიანა სახლები. ბოლო მონაცემებით, დაიღუპა 174 ადამიანი და დაშავდა 6 ათასზე მეტი. ბევრი ადამიანი დღემდე უგზო-უკვლოდ დაკარგულად ითვლება. ტრაგედიასთან დაკავშირებით ლიბანში სამდღიანი გლოვა და ორი კვირით საგანგებო მდგომარეობა გამოცხადდა.

125
წვეთოვანი რეანიმაციაში

მახინჯაურში ავარიის დროს დაშავებული 7 წლის ბავშვი გარდაიცვალა

0
(განახლებულია 18:59 13.08.2020)
იმ დღეს ავარიის შედეგად ადგილზე დაიღუპა სამი ადამიანი - ქალი, მისი რძალი და შვილიშვილი. დაშავდა კიდევ ოთხი პირი, ერთ-ერთი დღეს გარდაცვლილი ბავშვი იყო.

თბილისი, 13 აგვისტო – Sputnik. მახინჯაურში, ავარიის შედეგად დაშავებული 7 წლის ბავშვი დღეს გარდაიცვალა, იუწყება აჭარის საზოგადოებრივი მაუწყებელი.

არასრულწლოვანი ოთხი დღის განმავლობაში იაშვილის სახელობის ბათუმის დედათა და ბავშვთა ცენტრალურ ჰოსპიტალის რეანიმაციულ განყოფილებაში, მართვით სუნთქვაზე იმყოფებოდა. ექიმების შეფასებით, პაციენტის მდგომარეობა უკიდურესად მძიმე იყო.

ავტოსაგზაო შემთხვევა, რომლის შედეგადაც ბავშვი მძიმედ დაშავდა, მახინჯაურში 9 აგვისტოს მოხდა. ბათუმი-ჩაქვის დამაკავშირებელ საავტომობილო გზაზე მსუბუქი ავტომობილი ქვეითებს დაეჯახა. იმ დღეს ავარიის შედეგად ადგილზე დაიღუპა სამი ადამიანი - ქალი, მისი რძალი და შვილიშვილი. დაშავდა კიდევ ოთხი პირი, ერთ-ერთი დღეს გარდაცვლილი ბავშვი იყო.

გამოძიება სისხლის სამართლის კოდექსის 276-ე მუხლით დაიწყო, რაც სატრანსპორტო მოძრაობისას წესების დარღვევას გულისხმობს, რამაც ადამიანის სიცოცხლის მოსპობა გამოიწვია.

შინაგან საქმეთა სამინისტროს ინფორმაციით, მძღოლი დაკავებულია.

0
თემები:
შემთხვევები საქართველოში