პროტესტის მესამე დღე

არჩევნების ახალი სისტემა საქართველოში „ქართული ოცნების“ შემოთავაზება

107
(განახლებულია 14:14 02.07.2019)
საქართველოს მმართველმა პარტიამ „ქართულმა ოცნებამ - დემოკრატიულმა საქართველომ“ ორშაბათს საქართველოს კონსტიტუციაში დაგეგმილი ცვლილებების პრეზენტაცია გამართა, რომლის თანახმად, იცვლება 2020 წლის საპარლამენტო არჩევნების სისტემა.

გასულ კვირაში ხელისუფლებამ დააკმაყოფილა მომიტინგეების მეორე მოთხოვნა და 2020 წლის საპარლამენტო არჩევნების მხოლოდ პროპორციული სისტემით ჩატარების ინიციატივა წამოაყენა. ამასთან, ხელისუფლებამ გადაწყვიტა ამ არჩევნების ჩატარება ე.წ. ნულოვანი საარჩევნო ბარიერით, რაზეც ადრე საუბარი საერთოდ არ ყოფილა.

მმართველი პარტიის მიერ მომზადებული საკონსტიტუციო შესწორებების პროექტის თანახმად, საქართველოში პროპორციული სისტემა 2020 წლის საპარლამენტო არჩევნებიდან ამოქმედდება. ამა თუ იმ პარტიის მიერ „გამომუშავებული“ მანდატების რაოდენობას შემდეგი ფორმულით გამოიანგარიშებენ: ერთი პარტიის მიერ მიღებული ხმების რაოდენობა გამრავლებული 150-ზე (ადგილების რაოდენობა პარლამენტში) და გაყოფილი ყველა პარტიის მიერ მიღებული ხმების რაოდენობაზე. დარჩენილი მანდატები გადანაწილდება საუკეთესო შედეგების მქონე პარტიებს შორის რიგითობის მიხედვით.

„პროპორციული არჩევნები 2020": საკონსტიტუციო ცვლილებების პრეზენტაცია აქციის ფონზე >>

ამასთან, შესწორებები არ ითვალისწინებს საპარლამენტო არჩევნებში საარჩევნო ბლოკების მონაწილეობას. როგორც მმართველ პარტიაში განმარტავენ, ცვლილებები გამიზნულია იმისათვის, რომ დაბრკოლება არ შეექმნას პარტიული სისტემის განვითარებას.

მოქმედი კონსტიტუციის თანახმად, შერეული საარჩევნო სისტემის შეცვლა მხოლოდ პროპორციული სისტემით იგეგმებოდა 2024 წლის არჩევნებისთვის. ამჟამად პარტიული სიით მხოლოდ 77 დეპუტატს ირჩევენ, 73-ს კი - ერთმანდატიან მაჟორიტარულ ოლქებში.

„ქართული ოცნების“ წინადადება

საკონსტიტუციო შესწორებები პარლამენტს უკვე წარედგინა. დაგეგმილი ცვლილებები მმართველმა პარტიამ გააცნო ოპოზიციურ პარტიებს, არასამთავრობო ორგანიზაციებსა და დიპლომატიური კორპუსის წარმომადგენლებს.

„პროპორციულ სისტემაზე გადასვლის შესახებ მმართველი გუნდის საკონსტიტუციო პროექტი უმნიშვნელოვანესი ინიციატივაა, ეს იძლევა შესაძლებლობას, ახალ ეტაპზე გადავიდეს საქართველოში პოლიტიკური პარტიული სისტემის განვითარება, ეს არის ფუნდამენტური ნაბიჯი ჩვენი დემოკრატიული სისტემის განვითარების მიმართულებით“, – განაცხადა პარტია „ქართული ოცნების“ აღმასრულებელმა მდივანმა ირაკლი კობახიძემ.

მისი თქმით, პარლამენტში ინიცირებული კანონპროექტი ლაკონურია. მას ხელს აწერს საპარლამენტო უმრავლესობის ასამდე დეპუტატი.

„საბოლოო ჯამში, ამ კანონპროექტის მიღებას სჭირდება პოლიტიკური პარტიების კონსენსუსი. ჩვენ გვაქვს იმედი და ვართ მოწოდებული, ხელი შევუწყოთ ამ კონსენსუსის ჩამოყალიბებას საქართველოს პარლამენტში, რათა მოგროვდეს 113 ხმა ამ კანონპროექტის მხარდასაჭერად“, – აღნიშნა კობახიძემ.

პარლამენტის ყოფილმა თავმჯდომარემ კიდევ ერთი დეტალი განმარტა – კონსტიტუციის ძირითადი ტექსტი, სადაც განსაზღვრულია საარჩევნო სისტემა, კერძოდ, 5%-იანი საარჩევნო ბარიერით, რჩება ძალაში და ის იმოქმედებს ყოველი მომდევნო საპარლამენტო არჩევნებისთვის.

„რაც შეეხება ახალ ინიციატივას, ის აისახება კონსტიტუციური კანონის გარდამავალ დებულებებში. კონსტიტუციური კანონი, რომელიც მიღებულ იქნა 2017 წელს, შეიცავდა გარდამავალ დებულებებს, მათ შორის იყო ერთ-ერთი, მეცხრე პუნქტი, რომელიც ადგენდა, რომ შემდეგი არჩევნები ტარდებოდა შერეული საარჩევნო სისტემით. ცვლილება შეეხება ამ მეცხრე პუნქტს“, – განაცხადა კობახიძემ. 

პარტია „ქართული ოცნების“ გენერალურმა მდივანმა კახა კალაძემ, თავის მხრივ, აღნიშნა, რომ ბოლოდროინდელმა მოვლენებმა ცხადყო – აუცილებელია ფუნდამენტური ცვლილებების განხორციელება პოლიტიკური სისტემის განვითარების პროცესში.

„ქვეყნის მართვა სხვადასხვა პოლიტიკური, საზოგადოებრივი სუბიექტების მიერ უნდა გაგრძელდეს პოლიტიკური კონსენსუსისა და შესაბამისი პასუხისმგებლობის ფართოდ გადანაწილების პირობებში, რაც მეტად მნიშვნელოვანია ჩვენი გუნდისთვის, თითოეული ჩვენგანისთვის“, – განაცხადა კალაძემ.

ცვლილებები კონსტიტუციაში: ოპოზიცია მზადაა, საკონსტიტუციო  ინიციატივის წარდგენას დაესწროს >>

მისი თქმით, მმართველი პარტია ნულოვანი ბარიერის მქონე პროპორციულ საარჩევნო სისტემაზე დაუყოვნებლივ გადასვლის წინადადებით გამოდის.

„ეს პრინციპული პოლიტიკური ინიციატივაა, რომელიც ფუნდამენტურ ცვლილებებს შეიტანს საქართველოს პოლიტიკური სისტემისა და პოლიტიკური კულტურის განვითარებაში“, – ხაზი გაუსვა მან.

კალაძის თქმით, მმართველი გუნდი მზადაა ყველა საკითხისა და ნიუანსის დეტალურად განსახილველად.

რას ფიქრობს ოპოზიცია

საკონსტიტუციო ცვლილებების პრეზენტაციას თითქმის ყველა წვრილი ოპოზიციური პარტიის წარმომადგენელი ესწრებოდა. პრეზენტაციაზე არ მივიდნენ „ერთიანი ნაციონალური მოძრაობა“, „ევროპული საქართველო“ და მათი პარტნიორები.

როგორც საქართველოს პარლამენტის ექს-სპიკერმა, პარტია „შენების მოძრაობის“ ლიდერმა დავით უსუფაშვილმა აღნიშნა, ახლა მთავარია ოპოზიციის კონსოლიდაციის მიღწევა და ამ თემის ირგვლივ ერთიანი პოზიციის ჩამოყალიბება.

„ნაციონალებისა“ და „ევროპული საქართველოს“ ხმების გარეშე პროპორციული არჩევნები ვერ ჩაიწერება კონსტიტუციაში. ამიტომ ვინც არ უნდა ეცადოს ოპოზიციის შიგნით განხეთქილების შეტანას, ეს არ მოხდება. ჩვენ ამ თემაზე ერთიანი პოზიცია გვაქვს“, – განაცხადა უსუფაშვილმა.

პროპორციულ საარჩევნო სისტემაზე გადასვლას მხარს უჭერს პარტია „ერთიანი საქართველო - დემოკრატიული მოძრაობის“ ლიდერი ნინო ბურჯანაძეც.

„პროპორციული არჩევნები პარლამენტში ზუსტად იმ განწყობას მოიტანს, რომელიც რეალურად არსებობს საზოგადოებაში. ესე იგი, ვერც ერთი პოლიტიკური ძალა, პირველ რიგში ხელისუფლება, ვერ მიღებს იმაზე მეტ მანდატს პარლამენტში, ვიდრე მას ხალხმა მისცა. ვფიქრობ, დღეს ქვეყანაში ისეთი ვითარებაა, რომ ალბათ აჯობებს მწვავე დისკუსიები პარლამენტში იყოს, ვიდრე ქუჩაში“, – აღნიშნა ბურჯანაძემ.

პროპორციულ საარჩევნო სისტემაზე გადასვლას ავტორიტეტული არასამთავრობო ორგანიზაციების წარმომადგენლებიც მიესალმებიან.

„პროპორციული სისტემა ნულოვანი ბარიერით გაცილებით ჯობს იმ სისტემას, რომელიც დღეს გვაქვს, და ის ძალიან კარგია... ახლა ყველაზე დიდი რისკი იქნება – როგორ ჩამოაყალიბებს ახალი პარლამენტი, სადაც წარმოდგენილი იქნება ბევრი პარტია, მთავრობას. ეს იმ რისკებს შორისაა, რომლებიც, ჩვეულებრივ, იხილება ნულოვან ბარიერთან დაკავშირებით“, – აღნიშნა არასამთავრობო ორგანიზაცია „საერთაშორისო გამჭვირვალობა საქართველოს“ ხელმძღვანელმა ეკა გიგაურმა.

პროცედურა

„ქართული ოცნების“ მიერ შემოთავაზებულ შესწორებებს განიხილავს საკონსტიტუციო კომისია, რომელსაც საქართველოს პარლამენტი დააკომპლექტებს, და შემდეგ საჯაროდ განსახილველად გამოიტანს. კანონპროექტი სამი მოსმენით უნდა მიიღონ, შემდეგ კი მას ხელი უნდა მოაწეროს ქვეყნის პრეზიდენტმა სალომე ზურაბიშვილმა. შესწორებები ძალაში მათი გამოქვეყნებისთანავე შევა.

პრემიერი: 2020 წელს საქართველოში კოალიციურ მთავრობას არ გამოვრიცხავ >>

იმის გათვალისწინებით, რომ ნულოვანი ბარიერის შედეგად პარლამენტში შეიძლება მოხვდეს პარტიების დიდი რაოდენობა, საქართველოს პრემიერ-მინისტრი მამუკა ბახტაძე 2020 წლის არჩევნების შემდეგ კოალიციური მთავრობის შექმნას არ გამორიცხავს.

107
თემები:
საქართველოს პარლამენტი (175)
ბაზრის მოვაჭრეები და მყიდველები პირბადეებით ბაზარში

საქართველოში სურსათი გაიაფდა: ივნისში დაფიქსირდა დეფლაცია

139
(განახლებულია 11:00 04.07.2020)
საქართველოში წლიური ინფლაცია (2020 წლის ივნისი 2019 წლის ივნისთან შედარებით) კვლავ მაღალ დონეზე რჩება - 6,1%. მიზნობრივი მაჩვენებელი 3%-ს შეადგენს

თბილისი, 4 ივლისი — Sputnik. ივნისში, მაისთან შედარებით, ინფლაციის დონე უარყოფითი აღმოჩნდა - დეფლაციამ 1,4% შეადგინა, ნათქვამია „საქსტატის“ პრესრელიზში.

უწყების მონაცემებით, ყველაზე შესამჩნევად გაიაფდა კვების პროდუქტები - 4,8%-ით, მათ შორის ბოსტნეული, ხილი, რძის პროდუქტები და თევზი.

თუმცა წლიური ინფლაცია (2020 წლის ივნისი 2019 წლის ივნისთან შედარებით) კვლავ მაღალ დონეზე რჩება - 6,1%. მიზნობრივი მაჩვენებელი 3%-ს შეადგენს.

როგორ იცვლებოდა ინფლაცია წლის დასაწყისიდან

წლიურმა ინფლაციამ 2019 წელს 7% შეადგინა. მის შესაკავებლად ეროვნულმა ბანკმა 2019 წლის მონეტარული პოლიტიკის გამკაცრება დაიწყო. რეფინანსირების განაკვეთი ამ პერიოდში 6,5%-დან 9%-მდე გაიზარდა, ბოლოჯერ ის 2019 წლის დეკემბერში გაიზარდა.

წლის დასაწყისიდან ინფლაციის წლიურმა დონემ კლება დაიწყო - იანვარსა და თებერვალში მან 6,4% შეადგინა, მარტში - 6,1%. კორონავირუსის გავრცელების საფრთხის გამო ხელისუფლებამ 21 მარტიდან საგანგებო მდგომარეობა და კომენდანტის საათი გამოაცხადა. ეკონომიკური სტიმულირებისთვის ეროვნულმა ბანკმა აპრილსა და ივნისში მონეტარული პოლიტიკის განაკვეთი 8,25%-მდე შეამცირა.

თუმცაღა, ივნისში სურსათზე ფასები 13,6%-ით გაიზარდა, მათ შორის ხილზე - 45,5%-ით, რძეზე, ყველასა და კვერცხზე - 17,2%-ით, ხორცზე - 13,1%-ით, პურპროდუქტებზე - 10%-ით. პანდემიის გამო შექმნილი სიტუაციის გათვალისწინებით, 7,5%-ით გაძვირდა ჯანდაცვის მომსახურების ფასები, მათ შორის ამბულატორიულ მომსახურებაზე - 11,6%-ით.

ეროვნული ბანკი დარწმუნებულია, რომ წლის ბოლოსთვის ინფლაციის დონე შემცირდება

მაისში წლიურმა ინფლაციამ 6,5% შეადგინა, ივნისში - 6,1%. ეროვნული ბანკის პროგნოზებით, ინფლაცია განაგრძობს კლებას წლის დანარჩენ თვეებშიც და თავის მიზნობრივ დონეს (3%) 2021 წლის პირველ ნახევარში მიაღწევს.

„ინფლაციის მოსალოდნელი დინამიკა განისაზღვრება როგორც მოთხოვნის, ისე მოწოდების მხრივ არსებული ფაქტორების ურთიერთქმედებით“, - აღნიშნავენ ეროვნულ ბანკში.

კერძოდ, ვირუსის გავრცელების პრევენციულმა ღონისძიებებმა ზოგიერთი საქონლის მიწოდების ღირებულების და მომსახურების გაძვირება გამოიწვია, თუმცა ეს ინფლაციაზე მხოლოდ ხანმოკლე გავლენას ახდენს.

მეორეს მხრივ, ინფლაციაზე როგორც გარე, ისე შიდა მოთხოვნის მნიშვნელოვანი შესუსტების გავლენა მაჩვენებლის პროგნოზების შემცირებას გამოიწვევს. იმავე დროს, ეროვნული ბანკის ანალიტიკოსების თვალსაზრისით, ხანგრძლივი დროით მიზნობრივთან შედარებით უფრო მაღალ დონეზე ინფლაციის შენარჩუნება ინფლაციური მოლოდინების გაზრდის რისკებს უკავშირდება.

მოთხოვნის კლება ფასების კლებას გამოიწვევს

ექსპერტი ეკონომიკურ საკითხებში სოსო არჩვაძე მიიჩნევს, რომ ზოგადი სიტუაციის შეფასებისას ცხადად ჩანს, რომ ახლა მოსახლეობაში მსყიდველუნარიანი მოთხოვნა გაცილებით დაბალია, ვიდრე ერთი წლის წინ იყო.

„ეს ყველაფერი უკავშირდება კორონავირუსული პანდემიის შედეგებს, რადგან ორ თვეზე მეტია ძირითადი დარგები და საქმიანობის სახეები იყო გაჩერებული, ეკონომიკა იმყოფებოდა წარმოების განახლებაზე ნებართვის მოლოდინის მდგომარეობაში, ეს კი მოსახლეობის ერთობლივ შემოსავლებზე აისახა“, - განაცხადა არჩვაძემ Sputnik-საქართველოსთან ინტერვიუში.

მისი თქმით, მოთხოვნის შემცირება ნიშნავს, რომ ზეგავლენა ბაზარზე, მათ შორის კომერციის სფეროში, გაცილებით ნაკლებია. ანუ საქართველოს ეკონომიკაში ადრინდელთან შედარებით გაცილებით ნაკლები ფულადი სახსრები ცირკულირებს.

კორონავირუსი და ფასები: ყველაფერი გაძვირდა, ეს – გაიაფდა >>

„ეს, ერთის მხრივ, ნიშნავს, რომ სამომხმარებლო მოთხოვნის თვალსაზრისით ინფლაციის ზრდა ნაკლებად მოსალოდნელია. როდესაც საფრთხე გაივლის, შესაძლებელია კვლავ რეგულირების წესების შერბილება და საკრედიტო რესურსების მეტნაკლებად გაიაფება, რასაც გამოიწვევს კიდევაც რეფინანსირების განაკვეთის ამჟამინდელი შემცირება“, - აღნიშნა არჩვაძემ.

ლარის კურსი როგორც ინფლაციური ფაქტორი

სავალუტო ბაზრის სტაბილიზების მიზნით ეროვნულმა ბანკმა სამ თვეში უკვე რვა აუქციონი გამართა რომლებზეც 229,65 მილიონი დოლარი გაყიდა.

უფრო ადრე ეროვნულმა ბანკმა აღნიშნა, რომ ფასების სტაბილურობის უზრუნველსაყოფად გამოიყენებს მის ხელთ არსებულ ყველა ინსტრუმენტს, მათ შორის, სავალუტო ინტერვენციებს და პოლიტიკის განაკვეთს.

სავალუტო აუქციონების გარდა ეროვნული ბანკი რყევების შესამცირებლად ყოველდღიურ ინტერვენციებს იყენებს. კერძოდ, როდესაც დღის განმავლობაში გაცვლითი კურსის რყევები აჭარბებს წინასწარ განსაზღვრულ ნიშნულს, ეროვნული ბანკი უცხოური ვალუტით ვაჭრობაში გარკვეული თანხით ერთვება.

გარდა ამისა, წელს ეროვნული ბანკი ინტერვენციებისთვის გამოიყენებს ვალუტას, რომელსაც ქვეყანა კრედიტების ან გრანტების სახით საერთაშორისო საფინანსო ინსტიტუტებისგან იღებს.

139
თემები:
საქართველოს ეკონომიკა
თბილისის ერთ-ერთი ისტორიული რაიონი

როგორია COVID-19-ის გავლენა ეკონომიკაზე? ანუ რეალობა და პერსპექტივა

1122
(განახლებულია 16:51 03.07.2020)
ბოლო ოთხი თვის განმავლობაში 22%-ით გაუფასურებული ლარი, მზარდი ინფლაცია, ფასების კატასტროფულად ზრდა, დაკარგული სამუშაო ადგილები, გაჩერებული ტურისტული ინდუსტრია, უცხოეთიდან შემცირებული ფულადი გზავნილები და ა.შ. ეკონომიკური სტაგნაცია ციფრებში და მომავლის პროგნოზი...

სამსონ ხონელი

წინამდებარე სტატიას ერთი, უკვე ძალზე ბანალური ჭეშმარიტების შეხსენებით დავიწყებ – კორონავირუსი არსად წასულა, ის აქ არის, ჩვენს გვერდით. დარწმუნებული ვარ, მკითხველს არც მომდევნო ფრაზა გააკვირვებს: უნდა ვისწავლოთ COVID-19-თან თანაცხოვრება, უნდა შევეგუოთ ამ მოცემულობას! სიტყვათა ეს წყობა დღეს ჩვენი დროების მთავარი მოწოდებაა.

მერე რა, რომ არავინ იცის, რამდენ ხანს გასტანს უხილავ მტერთან თანაცხოვრება. ეს მედლის მხოლოდ ერთი მხარეა. სავარაუდოდ, დროა, ბოლომდე გავაცნობიეროთ და, გვინდა თუ არ გვინდა, შევეგუოთ, რომ ახალი კორონავირუსის პანდემიით გამოწვეული ეკონომიკური შოკი ჩვენს ისედაც „გალაღებულ“ ცხოვრებას უმძიმეს დაღს დაასვამს. ყველაფერი სწორედ ამაზე მეტყველებს.

ბოლო ოთხი თვის განმავლობაში 22 პროცენტით გაუფასურებული ეროვნული ვალუტა, მზარდი ინფლაცია, ფასების კატასტროფულად ზრდა სურსათსა და პირველადი მოხმარების საგნებზე, ჰიგიენურ საშუალებებსა და მედიკამენტებზე, დაკარგული სამუშაო ადგილები, გაჩერებული ტურისტული ინდუსტრია, უცხოეთიდან შემცირებული ფულადი გზავნილები და ა.შ. ერთი სიტყვით, ეკონომიკური სტაგნაცია.

„საქსტატის“ მონაცემებით, მიმდინარე წლის პირველ ხუთ თვეში, გასული წლის ანალოგიურ პერიოდთან შედარებით, მთლიანი შიდა პროდუქტის მოცულობა 5.4 პროცენტით შემცირდა. კლების ტენდენცია კი უკლებლივ ყველა სექტორში გამოვლინდა. ქვეყნის ეკონომიკაში არსებულ მძიმე რეალობას ასახავს „თიბისი კაპიტალის“ მორიგი კვლევაც, რომელიც ეკონომიკაზე COVID-19-ის გავლენას აფასებს. კვლევაში მოცემულია მიმდინარე მდგომარეობის, ძირითადი მაკროპარამეტრების დინამიკის ანალიზი და უახლოესი მომავლის პროგნოზი. თანმიმდევრულად მივყვეთ.

„თიბისი კაპიტალის“ ანალიტიკოსთა მონაცემებით, შეზღუდვების ეტაპობრივად შერბილების შემდეგ უნაღდო ანგარიშსწორებით ხარჯვაში ზრდა დაფიქსირდა. ამავე დროს საგრძნობლად შემცირდა ხელფასებზე გაცემული თანხის მოცულობა. საქართველოში 2020 წლის მაისში, თებერვალი-მარტის პერიოდთან შედარებით, 91 ათასით ნაკლებმა მოქალაქემ აიღო ხელფასი, აპრილთან შედარებით ხელფასის ამღებთა რაოდენობა 11.7 ათასით შემცირდა. პროცენტულად ხელფასის მიმღებთა ყველაზე მკვეთრი შემცირება რესტორნების, სასტუმროების და კვების ინდუსტრიაში შეინიშნება. რაოდენობრივად კი ხელფასის გაცემა ყველაზე მეტად ვაჭრობის სექტორში შემცირდა. დიდია ნეგატიური ეფექტი უძრავი ქონების, გართობა/ხელოვნების, მშენებლობის, პროფესული და სხვა მომსახურების სფეროებში. უნდა აღინიშნოს, რომ კლება მეტწილად ხელფასის დაბალ (<1200 ლარი) და საშუალო კატეგორიებში (1200–2400 ლარი) შეინიშნებოდა, შესაბამისად, 48 ათასი და 24 ათასი ადამიანით.

საანგარიშო პერიოდში, მაისის თვის განმავლობაში სახელმწიფო ბიუჯეტის შემოსავალმა საშემოსავლო გადასახადიდან 234.1 მილიონი ლარი შეადგინა, რაც გასული წლის ამავე პერიოდთან შედარებით 39.9 მილიონი ლარით, ანუ 14.6 პროცენტით ნაკლებია. შესაბამისად, საშემოსავლო გადასახადების სახით ბიუჯეტში შესული თანხის კლება ქვეყანაში გაცემული ხელფასების მოცულობის შემცირებაზე მიანიშნებს. კონკრეტულად კი ეს კლება გაცემული ხელფასების თითქმის 200 მილიონი ლარით შემცირებაზე მეტყველებს. გავკადნიერდები და მკითხველის ყურადღებას ერთ გარემოებას მივაპყრობ: ხელფასების მკვეთრი შემცირების მთავარი არგუმენტია საშემოსავლო გადასახადების კლების დინამიკა. კვლევაში არსად ჩანს, გათვალისწინებულია თუ არა სამთავრობო პროგრამის ის დებულება, რომლის თანახმადაც, ყოველ შენარჩუნებულ სამუშაო ადგილზე დამსაქმებელი სახელმწიფო სუბსიდიას იღებს. შეგახსენებთ, 750 ლარის ოდენობის ხელფასი ნახევარი წლის განმავლობაში საშემოსავლო გადასახადისგან სრულიად თავისუფლდება, ხოლო 1500 ლარამდე ხელფასის შემთხვევაში დამსაქმებელი 750 ლარის ოდენობაზე თავისუფლდება საშემოსავლო გადასახადისგან, რაც ამ მოცულობის თანხაზე 150 ლარს შეადგენს. ეს ისე, რეპლიკის სახით, თორემ საკამათო არ არის, რომ განსაკუთრებით კერძო სექტორში დასაქმებულთა საკმაოდ დიდ ნაწილს შემოსავალი შეუმცირდა. ბევრმა დასაქმებულმა სამსახური და, შესაბამისად, შემოსავალიც დაკარგა, რასაც დასაქმების ხელშეწყობის სახელმწიფო სააგენტოს ინფორმაციაც ადასტურებს. ამ უწყების ცნობით, 1 ივლისის მდგომარეობით, ჯანდაცვის სამინისტროს სარეგისტრაციო პორტალის მეშვეობით სულ კომპენსაციის მიმღები თვითდასაქმებული 165 626 პირი დარეგისტრირდა. მათგან 104 547 პირმა მიიღო 300-ლარიანი კომპენსაცია – სულ 31.364 მილიონი ლარი. რაც შეეხება დასაქმებულებს, რომლებიც პანდემიის გამო დაზარალდნენ, 200 ლარის ოდენობით კომპენსაცია ჩაერიცხა 125 165 პირს. გადარიცხული თანხა 25.033 მილიონ ლარს შეადგენს.

კვლევის შედეგებს დავუბრუნდეთ... როგორია პროგნოზი? კვლევის თანახმად, 2020 წელს ეკონომიკის კვლავ 4.5-5.5 პროცენტიანი კლებაა ნავარაუდევი. გაუარესებულია მიმდინარე წლის ტურისტული შემოდინებების და პირდაპირი უცხოური ინვესტიციების საპროგნოზო მაჩვენებელიც. თუმცა გაუმჯობესებულია საგარეო ვაჭრობის და გზავნილების მოლოდინი. „თიბისი კაპიტალის“ პროგნოზით, ლარის მკვეთრი გაუფასურება ნაკლებად არის სავარაუდო. წლის ბოლოსთვის ეროვნული ვალუტა 3.0 ნიშნულზე დასტაბილურდება. ამავე პერიოდისთვის მოსალოდნელია ინფლაციის 5 პროცენტიდან 4.5 პროცენტამდე შემცირება. კვლევის ავტორები ვარაუდობენ, რომ წლის ბოლოსთვის რეფინანსირების განაკვეთი 7.75 პროცენტამდე დაიკლებს. რამდენად გამართლდება „თიბისი კაპიტალის“ ანალიტიკოსთა ეს პროგნოზი – დრო გვიჩვენებს...

ამასობაში საქართველოს ეკონომიკაზე COVID-19-ის გავლენის შესარბილებლად მსოფლიო ბანკის აღმასრულებელ დირექტორთა საბჭომ საქართველოსთვის „ეკონომიკური მართვისა და კონკურენტუნარიანობის განვითარების პოლიტიკის ღონისძიებებისათვის“ დამატებით 45 მილიონი ევროს ოდენობის დაფინანსება დაამტკიცა. ეს თანხა მთავრობას COVID-19-ის პანდემიის ზემოქმედებით გამოწვეული მოულოდნელი ფინანსური დეფიციტის შევსებაში დაეხმარება.

მსოფლიო ბანკის რეგიონული დირექტორი სამხრეთ კავკასიაში სებასტიან მოლინეუსი: „რთულ პერიოდში ჩვენ, როგორც ძლიერი პარტნიორი, გვერდში ვუდგავართ საქართველოს და მხარს ვუჭერთ მთავრობის მიერ განხორციელებულ სწრაფ და ეფექტურ ანტიკრიზისულ ზომებს, რომელთა მიზანიც არის − ადამიანების სიცოცხლის გადარჩენა, მათი საარსებო საშუალებების დაცვა, COVID-19-ის ეკონომიკური შედეგების შემსუბუქება და ეკონომიკური რეფორმების მძლავრი ტენდენციის შენარჩუნება“. 

ქვეყნის პირველი ფინანსისტის შეფასებით, მსოფლიო ბანკის მიერ საქართველოსთვის გამოყოფილი დამატებითი ფინანსური სახსრები კრიტიკულად დროული და აუცილებელი დახმარებაა.

საქართველოს ფინანსთა მინისტრი ივანე მაჭავარიანი: „მაშინ, როდესაც საქართველოს მიერ დაწესებულმა შეზღუდვებმა ვირუსის გავრცელება წარმატებით შეაკავა, ქვეყანას, სხვა ბევრი სახელმწიფოს მსგავსად, ფისკალური და ეკონომიკური ხარჯების გაღება მოუწია. მსოფლიო ბანკის მხარდაჭერა ჩვენი ქვეყნისთვის ძალიან მნიშვნელოვანია, რადგან ის კონკრეტულად COVID-19-ით გამოწვეული პრობლემების მოგვარებისკენ არის მიმართული. ხოლო საერთო მიზანი რეფორმების ხელშეწყობაა, რომლებიც სამუშაო ადგილების შექმნას, ეკონომიკური ინკლუზიურობის ზრდას უზრუნველყოფს... ყურადღება გამახვილებულია სახელმწიფო რესურსების გამოყენების ეფექტურობის გაუმჯობესებაზე, უფრო კონკურენტული ბაზრების ხელშეწყობაზე, ფინანსური სექტორის დივერსიფიკაციაზე, მასწავლებლის მუშაობისა და ანაზღაურების გაუმჯობესებაზე და ინვესტიციების ხელშეწყობის გაძლიერებაზე“.

რამდენად ეფექტურად შეძლებს მთავრობა საერთაშორისო საფინანსო ინსტიტუტებიდან და დონორი ორგანიზაციებიდან მიღებული ამ და სხვა დახმარებისა თუ საკრედიტო რესურსის გამოყენებას, ამას დრო გვიჩვენებს. დარწმუნებული ვარ, მკითხველი იმაშიც დამეთანხმება, რომ პასუხი ამ კითხვაზე დიდწილად განსაზღვრავს სახელისუფლებო გუნდის რეიტინგსა და, შესაბამისად, ელექტორალურ მხარდაჭერას...  

 

1122
მთვარის ფაზები

5 ივლისი: მთვარის დაბნელება და სავსემთვარეობა გავლენა ზოდიაქოს ნიშნებზე

0
(განახლებულია 15:35 04.07.2020)
დაბნელებების დერეფანი, რომელიც 5 ივნისს დაიწყო, სრულდება – 5 ივლისს მოხდება მთვარის ნახევრადჩრდილოვანი დაბნელება თხის რქის ნიშანში. დაიწყება მოვლენების ახალი „გორგალი“, რომელიც შეეხება სახლს, ოჯახს, უძრავ ქონებას.

სავსემთვარეობა ემთხვევა ნახევრადჩრდილოვან დაბნელებას. ეს ნიშნავ, რომ მზე, დედამიწა და მთვარე სრულად არ არიან მწკრივში, ამიტომ ჩვენი პლანეტა თანამგზავრს სრულის ნაცვლად ნაწილობრივ დაჩრდილავს.

ვინ იყავით წინა ცხოვრებაში ზოდიაქოს ნიშნის მიხედვით>>

სავსემთვარეობის პერიოდში შობადობა მატულობს, ჩნდება ჭარბი იმპულსურობა ურთიერთობებში, იზრდება ნეგატიური აზროვნება, ალკოჰოლის მიღების სურვილი.

იდეალური დროა სამკურნალო მცენარეეების შესაგროვებლად, რადგან ამ დროს მათი სამკურნალო თვისებები მაქსიმალურ დონეს აღწევს.

რისი გაკეთება შეიძლება და რისი არა 5 ივლისს

5 ივლისი განსაკუთრებით ხელსაყრელი დღეა სხვადასხვა მნიშვნელოვანი წამოწყებებისთვის. შეიძლება საკუთარი წინადადბების წამოყენება. თუმცა, გასათვალისწინებელია, რომ საქმის დაწყება კი შეიძლება, მაგრამ მან შეიძლება მიგიყვანოთ არა მხოლოდ დიდ გამარჯვებამდე, არამედ სრულ კრახამდეც, ამიტომ ყველაფერი კარგად უნდა გათვალოთ, დაგეგმოთ და აწონ–დაწონოთ.

კარგი დღეა ნათესაური კავშირების გასამტკიცებლად.

არცთუ წარმატებულია ურთიერთობები სახელმწიფო სტრუქტურებთან. ასევე არახელსაყრელი დროა ფულთან დკავშირებული საკითხებისთვის: დიდია ალბათობა იმისა, რომ მოგების მიღება დაყოვნდეს, იზარალოთ. მეორე მხრივ კი არგი დღეა უძრავ ქონებასთან დაკავშირებული საკითხების გადაჭრისთვის, ორგანიზატორული საქმეების მოგვარებისთვის, ხანმოკლე მოგზაურობისთვის.

როგორი იქნება სავსემთვარეობისა და დაბნელების დღე ზოდიაქოს ნიშნებისთვის

ვერძი: წარმატებული დღეა. ფინანსურ საკითხებში ვარსკვლავები დაგეხმარებიან. არ გაუშვათ ინიციატივა საკუთარი ხელიდან, უარი არ თქვათ დახმარებაზე – საიმედო ადამიანების რჩევა და მხარდაჭერა ძალიან წაგადგებათ. შეგიძლათ ძველი გეგმები და საქმეები შეაჯამოთ. მოსალოდნელია ახალი ამბის გაგება, რომელიც თქვენს საქმეებზე სასიკეთოდ იმოქმედებს.

კურო: ამ დღის მოვლენები მთლიანად „ჩაგითრევთ“. აღმოჩნდება, რომ ყველას სჭირდებით, ამიტომ მოგიწევთ პრიორიტეტების განსაზღვრა. მოსალოდნელია გართულება, რომელიც ვითარების არასწორი შეფასების, წინდაუხედავი დაპირების ან გადატვირთული მუშაობის გამო შეიძლება წარმოიშვას. სასურველია საღამოს სტუმრად გატარება. არაა გამორიცხული, რომ საინტერესო და დასამახსოვრებელი შეხვედრა გქონდეთ. მოუსმინეთ ინტუიციას. მატერიალურ საკითხებზე შესაძლებელია გაუგებრობები ახლობლებთან.

ტყუპი: საბოლოოდ უნდა გაუსვათ ხაზი ძველი და ახალ გეგმებს, საქმეებსა და კონტაქტებს. ახალ პარტნიორებთან ურთიერთობები არ იქნება წარმატებული, სამაგიეროდ ძველმა მეგობრებმა ძვირფასი რჩევა შეიძლება მოგცენ. არის დიდი ალბათობა იმისა, რომ მიიღოთ რაღაც ინფორმაცია, რომელიც სერიოზულ გავლენას მოახდენს თქვენს საქმეებზე ან ჯანმრთელობაზე. განსაკუთრებული ყურადღება მართებს შემოქმედებითი პროფესიის მქონე ტყუპებს.

კირჩხიბი: შესაძლოა, ემოციური შებოჭილობა და განწყობის დაქვეითება იგრძნოთ; მოსალოდნელია მატერიალურ საკითხებზე გაუგებრობები მეგობრებთან, ცუდი წინათგრძნობის ახდენა. დაუფიქრდით თითოეულ სიტყვასა და მოქმედებას.

ლომი: კრიტიკული დღეა. სავარაუდოდ, სხვადასხვა საქმე და პრობლემა გამოგიჩნდებათ, ეს კი მაქსიმალურ აქტიურობასა და შრომისუნარიანობას მოითხოვს თქვენგან. დასვენების ნაცვლად მოგიწევთ ორომტრიალში ჩართვა, ზრუნვა სხვებზე. შესაძლოა, დღის განმავლობაში ერთი წუთითაც ვერ მოახერხოთ დასვენება. ეს შესაძლებელი მხოლოდ საღამოს გახდება.

ქალწული: იღბლიანი დღე გელოდებათ. არ გაგიჭირდებათ ახალი მოკავშირეების მოძებნა, საკუთარი იდეებით სხვების დაინტერესება. არ არის გამორიცხული ნაცნობობა, რომელიც დიდ სიხარულს მოგანიჭებთ და წინსვლის მიმართულებას გიჩვენებთ. შეგიძლიათ დაასრულოთ ძველი საქმეები. შესაძლოა, შედეგი ისეთი არ იყოს, როგორიც გსურდათ, მაგრამ არც იმედგაცრუებული დარჩებით.

სასწორი: მიხედეთ პირად საქმეებსა და ჯანმრთელობაზე იზრუნეთ. მშვენიერი, ხელსაყრელი დღეა ყოფითი მნიშვნელოვანი საქმეებისთვის, როგორიცაა, მაგაითად, რემონტის დაწყება, ახალი ავეჯის ყიდვა. მარტოხელებს მრავლისმთქმელი, საინტერესო შეხვედრები გელოდებათ. ვარსკვლავები გირჩევენ, იყოთ თავშეკავები და გაუმკლავდეთ ცდუნებებს.

მორიელი: ხელსაყრელი დღეა, გამძაფრებული გექნებათ ინტუიცია, რომელიც გააზრებულ და კარგად გათვლილ მოქმედებებს უნდა შეუხამოთ. მომატებულია სასიცოცხლო ძალები, იოლად შეძლებთ მდგომაროების შეფასებას. ზედმეტი თვითკმაყოფილების გამო შეიძლება გაგირთულდეთ ურთიერთობები გარშემომყოფებთან. მოთოკეთ სიამაყე და ამპარტავნება და იმოქმედეთ საერთო საქმის სასიკეთოდ.

მშვილდოსანი: საშიშია დღეა ჯანმრთელობისთვის, ამიტომ ფრთხილად იყავით. საქმეებში სერიოზული გარღვევის მოლოდინი ნუ გექნებათ. სჯობს, მოამთავროთ ძველი საქმეები, გეგმები. საინტერესო დღეა ინფორმაციის მიღების თვალსაზრისით. არ გაუშვათ ხელიდან ძველი კავშირების აღდგენის შანსი.

თხის რქა: შესაძლოა, მოხდეს რამე მოვლენა ან გაიგოთ ისეთი ახალი ამბავი, რომელიც დიდ გავლენას მოახდენს თქვენს საქმეებზე. არ არის გამორიცხული, რომ შეიცვალოს ახალი პერსპექტიული გეგმების სტილი და თქვენი მუშაობის დონე, ან მიიღოთ პერსპექტიულ ერთობლივ პროექტში მონაწილეობის წინადადება. ასევე, შესაძლებელია, თქვენი პირადი ცხოვრება პროფესიულ საქმიანობაზე აისახოს, რაც გარკვეულ ცვლილებებს მოიტანს პარტნიორთან ურთიერთობებში.

მერწყული: ჰარმონიული და მშვიდი დღე გელოდებათ. შეიგრძნობთ, რომ თქვენი ფიქრები და გრძნობები გაწონასწორებულია. მშვიდ მდგომარეობაში ბევრ მიმდინარე საქმესთან გამკლავებას, ასევე ჩახლართულ ვითარებაში გარკვევას შეძლებთ. განსაკუთრებით ხელსაყრელი იქნება დღის მეორე ნახევარი.

თმის ვარცხნილობა ზოდიაქოს ნიშნისა და მთვარის კალენდრის მიხედვით>>

თევზები: წინააღმდეგობრივი, ორბუნებოვანი დღე გელოდებათ. განწყობა გაუმართლებელი ოპტიმიზმიდან მელანქოლიამდე იმერყევებს, იქნებით ხან კეთილი და დამთმობი, ხან კი – ჯიუტი და გამაღიზიანებელი. დაუკვირდით თითოეულ სიტყვას, მოქმედებებს. შესაძლოა, ეჭვიანობის ნიადაგზე კონფლიქტშიც კი ჩაებათ.

0