სამუშაოები ანაკლიაში

ფინანსური გარიგება ანაკლიის პორტთან დაკავშირებით დადგენილ ვადაში არ დაიხურება

95
(განახლებულია 13:42 14.06.2019)
ხელისუფლება და პროექტის კრედიტორები კომერციული რისკების დაზღვევის საკითხზე ჯერ ვერ შეთანხმდნენ.

თბილისი, 14 ივნისი – Sputnik. საქართველოს მთავრობამ „ანაკლიის განვითარების კონსორციუმს“ ფინანსური გარიგების დახურვის ვადა კიდევ ნახევარი წლით გაუხანგრძლივა, განაცხადა საქართველოს რეგიონული განვითარებისა და ინფრასტრუქტურის მინისტრმა, ვიცე-პრემიერმა მაია ცქიტიშვილმა.

საქართველოში ღრმაწყლოვანი პორტის მშენებლობა 2017 წლის დეკემბერში დაიწყო. ამჟამად მიმდინარეობს სამუშაოები ფსკერის გასაღრმავებლად. სამუშაოებს აწარმოებს „ანაკლიის განვითარების კონსორციუმი“, რომელიც ქართული „თი-ბი-სი ჰოლდინგისა“ და ამერიკული კომპანია Conti International LLC-ის დაფუძნებულია. კონსორციუმში გაერთიანებული არიან ასევე SSA Marine (აშშ), British Wondernet Expres (ცენტრალური აზია) და G-Star Ltd (ბულგარეთი).

„ჩვენ შეხვედრაზე შევთანხმდით ბანკებთან და კონსორციუმთან, რომ ისინი წარმოადგენდნენ მათი ხედვით მათთვის სასურველ ვადას, რომელიც საჭიროა ყველა ფორმალობის დასასრულებლად. ჩვენ კონსორციუმიდან წინა კვირაში მივიღეთ ინფორმაცია, რომ ეს სასურველი ვადა იქნებოდა ექვსი თვე“, – განუცხადა ცქიტიშვილმა ჟურნალისტებს.

ცქიტიშვილის განცხადებით, ეს ცვლილება შესათანხმებელია მთავრობასთან და საკითხი უახლოეს სხდომაზე იქნება განხილული.

თურნავა: ანაკლიის პორტი პირველ გემს 2020 წელს ვერ მიიღებს>>

„პორტის მშენებლობის ვადა ხელშეკრულებით არის დადგენილი 2020 წლის ბოლოსთვის. შესაბამისად, არავისთვის არ არის სასურველი გადავადება. ახლა რა გადავადებაზეც ვსაუბრობთ, ამაზეც კიდევ გვექნება საუბარი კონსორციუმთან და საერთაშორისო საფინანსო ინსტიტუტებთან“, – განაცხადა ცქიტიშვილმა.

როგორც მინისტრი აცხადებს, ფინანსური გარიგების დახურვის გადავადება აისახება პორტის მშენებლობის ვადებზეც. ამიტომ ცქიტიშვილმა იმედი გამოთქვა, რომ ვადების გადაწევა მეტად აღარ გახდება საჭირო.

„ბუნებრივია, დაფინანსების გადავადება არ შეიძლება არ აისახებოდეს პორტის მშენებლობის ვადების გადავადებაზე და ეს არის ის, რაც ყველას ერთად გვადარდებს. ამასთან, კონსორციუმს კვლავ აქვს მოსაძიებელი არა მხოლოდ საერთაშორისო საფინანსო ინსტიტუტების, არამედ საკუთარი კაპიტალი, რომელზეც მას აქვს სამუშაო. ეს არის უკვე ის ვალდებულება, რომელშიც სახელმწიფო არანაირად არ არის ჩართული“, – აღნიშნა ცქიტიშვილმა.

კონსორციუმი კმაყოფილია

ანაკლიის განვითარების კონსორციუმი, თავის მხრივ, მთავრობის ამ გადაწყვეტილებას მნიშვნელოვან ნაბიჯად მიიჩნევს, რადგან ეს საერთაშორისო ბანკებთან კონსორციუმის მოლაპარაკების პროცესის წარმატებით დასრულებას შეუწყობს ხელს.

„კონსორციუმი მთელი პასუხისმგებლობით აცხადებს, რომ მას სრულად აქვს მობილიზებული პროექტისთვის აუცილებელი კაპიტალი და ამის ოფიციალური გაცხადება მოხდება მაშინ, როდესაც საქართველოს მთავრობა და საერთაშორისო საფინანსო ინსტიტუტები მიაღწევენ შეთანხმებას“, – ნათქვამია კონსორციუმის მიერ გამოქვეყნებულ განცხადებაში.

აქვე აღნიშნულია, რომ „ანაკლიის განვითარების კონსორციუმი“ მოცემულ ვადებში მაქსიმალურად ასრულებს საკუთარ ვალდებულებებს. კონსორციუმმა უკვე დაასრულა ყველა საერთაშორისო ტენდერი, გამოავლინა გამარჯვებული სამშენებლო კომპანიები და მზად არის ანაკლიის პორტის მშენებლობის ახალ, კიდევ უფრო აქტიურ ფაზაში გადასასვლელად.

„რაც შეეხება სამშენებლო ვადებს, თუ შემდეგი ერთი თვის მანძილზე მთავრობასა და ბანკებს შორის მოხდა შეთანხმება მერვე პუნქტთან დაკავშირებით, დარწმუნებით ვაცხადებთ, რომ ანაკლიის პორტი დადგენილ ვადებში – 2020 წლის ბოლოს ან 2021 წლის დასაწყისში შეძლებს პირველი გემის მიღებას“, – ნათქვამია განცხადებაში.

სტრატეგიული მნიშვნელობის პროექტს „დიდი“ ფული სჭირდება

საქართველოს ხელისუფლება პორტზე დიდ იმედებს ამყარებს, რადგან ის გააძლიერებს ქვეყნის სატრანზიტო როლს, მოიზიდავს დამატებით ინვესტიციებს და დადებითად აისახება ქვეყნის ეკონომიკაზე.

ანაკლიის პორტი ცხრა ფაზად განვითარდება. პროექტის საერთო ღირებულება 2,5 მილიარდი აშშ დოლარია.

პორტის ამოქმედება 2021 წლიდან იგეგმება. ორ წელიწადში იქ უნდა მომზადდეს ინფრასტრუქტურა, რომელიც შესაძლებელს გახდის გემების მიღებას, ტვირთის ტრანსპორტირებასა და შენახვას, რისთვისაც ფინანსებია საჭირო.

პორტის პირველი ფაზის მშენებლობისთვის აუცილებელია 600 მილიონ დოლარზე მეტი. სახელმწიფომ 100 მილიონი დოლარის ოდენობის კრედიტის გამოყოფის პირობა დადო, კონსორციუმმა კი უნდა დააბანდოს 120-მილიონიანი ინვესტიცია. დანარჩენი 400 მილიონი კონსორციუმმა უცხოელი ინვესტორებისგან კრედიტის სახით უნდა მოიზიდოს.

ფინანსური გარიგების დახურვასთან დაკავშირებული პრობლემები

კონსორციუმმა კრედიტორები უკვე მოიძია, მაგრამ თანხის მისაღებად მხარეებმა უნდა დადონ ფინანსური გარიგება. სწორედ აქ წარმოიქმნა პრობლემა.

უმთავრესი მოთხოვნა არის ტვირთბრუნვის რისკის დაზღვევა. კრედიტორი ბანკები ითხოვენ, რომ სახელმწიფომ, ერთი მხრივ, უზრუნველყოს ეს კრედიტები, მეორე მხრივ - დაფაროს ტვირთის შემოსვლის რისკი.

სახელმწიფომ უნდა შექმნას სარეზერვო ანგარიში, რომელზეც განთავსდება თანხა კრედიტის უზრუნველსაყოფად. სახელმწიფოს ამ ანგარიშის შევსების უფლება ექნება, ხოლო თუ იგი ამას არ შეასრულებს, ბანკები შეძლებენ შეთანხმების გაწყვეტას. შეთანხმების გაწყვეტის შემთხვევაში კი კრედიტის მთელი თანხის ანაზღაურება სახელმწიფოს მოუწევს.  

კომპრომისი არ იქნება

მთავრობა, თავის მხრივ, აცხადებს, რომ არ აპირებს კომერციული რისკების დაზღვევას.

როგორც ადრე ფინანსთა მინისტრმა ივანე მაჭავარიანმა აღნიშნა, საერთაშორისო სავალუტო ფონდთან შეთანხმებული პროგრამა არ ითვალისწინებს იმას, რომ სახელმწიფომ თავის თავზე აიღოს ფინანსური რისკი ამ ნაწილში.

ფინანსური გარიგების დახურვა, რომლის შემდეგაც უნდა დაიწყოს მშენებლობის აქტიური ფაზა, თავდაპირველად 2017 წლის 15 აგვისტოსთვის იგეგმებოდა. თუმცა, კონსორციუმის ინიციატივით, ეს თარიღი რამდენჯერმე შეიცვალა. ამჯერადაც ფინანსური გარიგების დახურვის ვადა, რომელიც 15 ივნისს იწურებოდა, 6 თვით გადაიდო.

ამასთანავე, ამ პროცესში სახელმწიფომ კონსორციუმს აპატია 11 მილიონი დოლარის ოდენობის ჯარიმა თავდაპირველი ვადების დარღვევისთვის.

95
თემები:
ანაკლია – მომავლის ქალაქი (44)
ვაჟა მარგველაშვილი ტოკიოში

ოლიმპიადის მსაჯები ქართველების წინააღმდეგ და აჟიოტაჟი ხვიჩა კვარაცხელიას გარშემო

145
(განახლებულია 17:40 26.07.2021)
პირველი ქართული მედალი ოლიმპიადაზე ვაჟა მარგველაშვილმა მოიპოვა. რაც შეეხება კვარაცხელიას, ის შესაძლოა მეორე ქართველი გახდეს, რომელიც დიდი მილანური ოჯახის წევრი გახდება.

ოლიმპიადა ქართველებისთვის 24 ივლისს ნიკოლოზ ბასილაშვილისა და ლუხუმ ჩხვიმიანის გამოსვლებით დაიწყო.

ჩოგბურთი

ქართველმა ჩოგბურთელმა პირველი ოლიმპიური შეხვედრა ესპანელი მეტოქის კარბალეს ბაენას წინააღმდეგ გამართა და შეხვედრა ორ სეტში მარტივად მოიგო.

Николоз Басилашвили
© AP Photo / Adam Hunger
ნიკოლოზ ბასილაშვილი

ნიკოლოზი პირველ სეტში შესანიშნავადს გამოიყურებოდა. ქართველმა ბაენას ჩაწოდება ორჯერ მოიგო და სეტი გამარჯვებამდე მარტივად მიიყვანა (6:3). ქართველი ჩოგბურთელის უპირატესობა მეორე სეტშიც შესამჩნევი იყო. ბასილაშვილმა ესპანელს პირველივე მოწოდება წაართვა, 4:2-ზე ქართველმა მოწინააღმდეგეს გეიმი კიდევ ერთხელ გამოგლიჯა ხელიდან და საბოლოო ანგარიში 6:3, 6:2 დააფიქსირა.

ნიკოლოზის მომდევნო მეტოქე იტალიელი ლორენცო სონეგო იქნება, რომელმაც იაპონელ ტარო დანიელთან სამ სეტში ურთულესი დაპირისპირება მოიგო და შემდეგ ეტაპზე გავიდა.

ძიუდო

პირველი ქართველი ძიუდოისტი, რომელიც იაპონიაში მიმდინარე ოლიმპიური თამაშების ტატამზე ვიხილეთ 60 კილოგრამ წონით კატეგორიაში მოასპარეზე ლუხუმ ჩხვიმიანი იყო. მესტიელმა ძიუდოისტმა წილისყრის შედეგად პირველ წრე გამოტივა, შესაბამისად ქართველი ძიუდოისტი ოლიმპიადაზე მეორე ეტაპიდან ჩაერთო, სადაც აზერბაიჯანელ კარამატ ჰუსეინოვს შეხვდა. ჩვენებურმა ჰუსეინოვთან სუფთა გამარჯვება, შებოჭვის ხარჯზე იზეიმა და ტურნირის ფავორიტ იაპონელ ტაკატოზე გავიდა.

ტაკატოსთან დაპირისპირება მისთვის ძალიან ხანგრძლივი და რთული გამოდგა. დაპირისპირება დამატებით დროში გადავიდა, სადაც მსაჯებმა საეჭვო გადაწყვეტილება მიიღს და გამარჯვება ტაკატოს მიანიჭეს. აღსანიშნავია, რომ ჩხვიმიანს ორი გაფრთხილება ჰქონდა დაგროვებული და დამატებითი დროის მეოთხე წუთზე არბიტრმა ის კიდევ ერთხელ გააფრთხილა. შედეგად ლუხუმი რეპეშაჟში გადაერთო. ქართველ ძიუდოისტს მორიგი დაპირისპირება სამხრეთ კორეელ კიმ ვონთან მოუწია. ორთაბრძოლა მსგავსად წინა შემთხვევისა აქაც დამატებით დროში გადავიდა. საბოლოოდ აზიელმა ლუხუმის უყურადღებობით ისარგებლა და მატჩი იპონით დაასრულა.

66 კილოგრამ წონით კატეგორიაში თავი კარგად წარმოაჩინა ვაჟა მარგველაშვილმა. ის პირველ წრეში ლუხუმის მსგავსად თავისუფალი იყო. მერვედფინალურ ეტაპზე კი ვაჟამ რუსი სპორტსმენი იაკუბ შამილოვი ვაზარით დაამარცხა, შემდეგ ისრაელის წარმომადგენელ ბარუხ შმაილოვთან იმარჯვა. რაც შეეხება ნახევარფინალს, ქართველმა ძუდოისტმა სამხრეთკორეელი ან ბაული დაამარცხა და პირველი ქართული მედალიც გაინაღდა.

ფინალურ ეტაპზე ვაჟამ დაწყებული საქმე ბოლომდე ვერ მიიყვანა. ქართველ ძიუდოისტს უძლიერეს ჰიფუმი აბესთან მოუწია დაპირისპირება. შეიძლება ითქვას, შეხვედრის დიდი ნაწილი მარგველაშვილის კარნახით წარიმართა, რადგან იაპონელი მეტოქე ერთადერთი მოპოვებული ვაზარის შენარჩუნებას ცდილობდა. აზიელმა სპორტსმენმა საბოლოოდ დასახულს მიაღწია და საკუთარ ქვეყანას ოლიმპიური ოქრო აჩუქა. აღსანიშნავია, რომ ოქროს მედლის მფლობელი გახდა ჰიფუმი აბეს და, უტა აბეც, რომელმაც გამარჯვება ფინალურ ეტაპზე ფრანგ ბუშართან მოიპოვა. სწორედ ბუშართან დაპირისპირების დროს გამოეთიშა კიდევ ერთი ქართველი ძიუდოისტი ასპარეზობას. ტატიანა ლევიცკა-შუკვანმა (52 კგ) პირველი მოგებული ორთაბრძოლის შემდეგ ფრანგთან შეხვედრაში ფეხი იტკინა და ტატამი დამხმარე პირების საშუალებით დატოვა.

ხმლით ფარიკაობა

ქართველ ხმლით მოფარიკავე სანდრო ბაზაძეს ტოკიოს ოლიმპიურ თამაშებზე ტრიუმფამდე ძალიან ცოტა დააკლდა. სანდრომ საწყის ეტაპზე ორი ეგვიპტელი სპორტსმენის - მოჰაბ სამერის და ზიად ელსისის დამარცხების შემდეგ მეოთხედფინალურ ეტაპზე მსოფლიოს პირველი მოფარიკავე სამხრეთ კორეელი სანგუკ ოჰიც დაამარცხა.

სანდრო ბაზაძე
ს. ბაზაძის პირადი არქივი
სანდრო ბაზაძე

სანდროს ყველაფერი ჰქონდა იმისთვის, რომ მინიმუმ ფინალში ეასპარეზა, თუმცა მანამდე უნგრელი არონ სილაგისა და მსაჯების ბარიერი უნდა გადაელახა. უნგრელმა სპორტსმენმა არბიტრების დახმარებით დიდი გაჭირვებით, მაგრამ მაინც შეძლო სანდროს დამარცხება. ყველაზე მეტად ბაზაძეზე ორთაბრძოლის მიწურულს მსაჯების მიერ მიღებულმა გადაწყვეტილებამ იმოქმედა. მაშინ, როდესაც ანგარიში 13:13 იყო, სანდრომ ქულა მოიპოვა და გამარჯვებამდე ერთი ნაბიჯი აკლდა, თუმცა მსაჯებმა ქულა უნგრელს მიანიჭეს. საბოლოოდ შეხვედრა უნგრელის სასარგებლოდ 15:13 დასრულდა და სანდრომ ბრინჯაოს მედლისთვის ბრძოლაში გადაინაცვლა.

„დაინახეს, რომ ერთი თავით მაღლა ვიდექი ყველაზე, ის ორგზის ოლიმპიური ჩემპიონი იყო და ვერაფერი მომიხერხა. მთავარი ქულა, რომელმაც ბრძოლა გარდატეხა, 13:13-ზე იყო, მსაჯმა ამ ეპიზოდს სასწაულად უაზრო გარჩევა მისცა“, – ასე გამოეხმაურა თავად სანდრო ბაზაძე სილაგისთან მარცხს.

მისი თქმით, შეხვედრის შემდეგ უნგრელმა სპორტსმენმა სანდროსთან საუბარში თავადვე აღიარა, რომ მსაჯებმა არასწორი გადაწყვეტილება მიიღეს და ფინალურ ეტაპზე ასპარეზობის შანსი არ მისცეს. მოგვიანებით სანდრომ ოლიმპიურ კომიტეტს განუცხადა, რომ არბიტრების აღნიშნულ გადაწყვეტილებას აუცილებლად გაასაჩივრებს.

უნდა აღინიშნოს, რომ მესამე ადგილისთვის გამართულ შეხვედრაში ქართველი ემოციურად საკმაოდ დაღლილი იყო და სამხრეთკორეელ კიმ ჯონ ხვანთან (Kim Jung-hwan) დამარცხდა.

ლეგენდარული ნინო სალუქვაძის წარუმატებელი ოლიმპიადა

ქართველმა მსროლელმა ნინო სალუქვაძემ ტოკიოს ოლიმპიურ თამაშებზე, სამწუხაროდ, 10 მეტრიდან პნევმატური პისტოლეტით სროლაში კვალიფიკაცია ვერ გაიარა. საუკეთესო რვა მსროლელის გამოსავლენად საკვალიფიკაციო ეტაპი ჩატარდა, სადაც მსროლელებს ექვსი სერია ჰქონდათ 10-10 გასროლით, სადაც სალუქვაძემ ჯამში 567 ქულა დააგროვა და პირველ ადგილოსან ჩინელ სპორტსმენს 20 ქულით ჩამორჩა.

მან კვალიფიკაციაში 53 სპორტსმენს შორის 31-ე ადგილი დაიკავა და ამ სახეობას გამოეთიშა. ლეგენდარული სპორტსმენი წარმატების მიღწევას კიდევ ერთხელ 29 ივლისს შეეცდება 25 მეტრიდან სპორტული პისტოლეტით სროლაში.

ოლიმპიადაზე საქართველოს სახელით ასევე მონაწილეობა მიიღეს მოკრივემ ესკერხან მადიევმა და მოცურავე ირაკლი რევიშვილმა. რევიშვილი ასპარეზობას პირველივე ეტაპიდან გამოეთიშა – მან კვალიფიკაცია ვერ გაიარა. რაც შეეხება მადიევს, მან პირველი ბრძოლა აზერბაიჯანელ სპორტსმენთან მოიგო და წინსვლას აგრძელებს.

„მილანმა“ კვარაცხელიასთან პირადი კონტრაქტი შეათანხმა? უცხოურ მედიაში საინტერესო ინფორმაცია გავრცელდა

ახალი ამბავი ნამდვილად არ არის, რომ ახალგაზრდა ქართველ ფეხბურთელს ხვიჩა კვარაცხელიას მსურველთა რიგი უდგას, თუმცა შესაძლოა ის ახლა რეალურ ტრანსფერთან ახლოს იყოს.

როგორც Metaratings იუწყება, იტალიურმა გრანდმა 20 წლის ქართველ ფეხბურთელთან კონტრაქტი უკვე შეათანხმა. აღნიშნულს ქართულ და უცხოურ მედიაში დიდი გამოხმაურება მოჰყვა. ისიც აქტიურად იწერება, რომ ტრანსფერში დიდი როლი შესაძლოა „მილანის“ ყოფილმა ფეხბურთელმა და ამჟამად თბილისის მერმა კახა კალაძემ ითამაშოს. სხვა დეტალებთან დაკავშირებით დაზუსტებული ინფორმაცია ამ დროისათვის არ ვრცელდება, თუმცა სავარაუდოა, რომ უახლოეს დღეებში ყველაფერი ნათელი გახდება.

 

145
ოლიმპიადა ტოკიოში

ოლიმპიადა და ტოკიო: პრობლემები ყველა თამაშების დროს იყო

39
(განახლებულია 18:14 23.07.2021)
23 ივლისს ტოკიოს ზაფხულის ოლიმპიადა იხსნება, რომელიც გასულ წელს უნდა ჩატარებულიყო, რომ არა კორონავირუსის პანდემია.

იური ალემანოვი Sputnik-სთვის

ოლიმპიადაში მსოფლიოს 206 ქვეყნის 12,5 ათასი სპორტსმენი მონაწილეობს. პროგრამაში წარმოდგენილია სპორტის 33 სახეობა, რომლებშიც 339 ოლიმპიური მედალი გათამაშდება.

ტოკიოს პირველი ოლიმპიადა და ომი

იაპონიამ ოლიმპიადის ჩატარება პირველად 1940 წლის თამაშების წინ გადაწყვიტა. იმ წელს ქვეყანა 2600 წლის იუბილეს აღნიშნავდა და ამაში ერთგვარი სიმბოლიზმი იკითხებოდა. დამატებითი წინაპირობა იყო იაპონელების პროგრესი, რომლებმაც 1932 წელს მედლების რაოდენობით მეხუთე ადგილი დაიკავეს.

იაპონიის საორგანიზაციო კომიტეტი აგრესიულად და საქმიანად მოქმედებდა: სპორტსმენებისა და მათი დელეგაციების გაცნობითი მოგზაურობებისთვის ნახევარ მილიონ დოლარზე მეტი გამოყო, მოელაპარაკა ევროპის ბევრ ლიდერს, რომ კენჭისყრაზე ხმა სწორედ იაპონიისთვის მიეცათ. ბენიტო მუსოლინიც კი დაითანხმეს, მოეხსნა რომის კანდიდატურა — ოლიმპიადის შემდეგი მასპინძელი ქვეყნის არჩევისას იტალიისთვის ხმის მიცემის სანაცვლოდ.

შედეგად, 1936 წლის ზაფხულში საერთაშორისო ოლიმპიურმა კომიტეტმა თამაშების ჩატარება იაპონიას მიანდო: ზაფხულის ოლიმპიადა ტოკიოში უნდა გამართულიყო, ზამთრისა — საპოროში.

მაგრამ პრობლემები თითქმის მაშინვე დაიწყო. იაპონელები ეწინააღმდეგებოდნენ ოლიმპიური ცეცხლის ჩინეთის გავლით გატარებას და კომპრომისის სახით წამოაყენეს წინადადება, ცეცხლი ქვეყანაში სამხედრო თვითმფრინავით ან ხომალდით ჩაეტანათ.  

პრობლემები შეიქმნა ინფრასტრუქტურის კუთხითაც. ტიკიოს სასტუმროები არ ჰყოფნიდა ყველა სტუმრის განსათავსებლად, ამასთან ვერც ცენტრალური არენის ასაგები ადგილის მოძებნა ხერხდებოდა. ესა და კიდევ სხვა წვრილმანი უსიამოვნებები ხელს უშლიდა იაპონიაში თამაშების ჩატარებას, თუმცა ოლიმპიადაზე უარის უმთავრეს მიზეზად ჩინეთ–იაპონიის ომი და ტურნირის დაფინანსების შემცირება იქცა. და ოლიმპიადა სასწრაფოდ გადაიტანეს ჰელსინკიში.

1964 წლის ოლიმპიადა

იაპონია სწრაფად გაუმკლავდა ომის შედეგებს და კვლავ დაუბრუნდა ოლიმპიადის ჩატარების იდეას 1964 წელს. ქვეყანაში მშენებლობა სწრაფი ტემპით მიმდინარეობდა და რამდენიმე წელში ქოხმახების ადგილზე სპორტული ქალაქები გაჩნდა. გარდა ამისა, აიგო სარკინიგზო ხაზები, მეტროს ახალი სადგურები, ხოლო სპორტული ასპარეზობები პირველად გადაიცემოდა თანამგზავრით.

ოლიმპიური ცეცხლის დანთება, ნაცვლად ცნობილი სპორტსმენისა, როგორც ეს ტრადიციულად ხდებოდა, სტუდენტ იოსინორი საკაის მიანდეს. ყმაწვილი 1945 წლის 6 აგვისტოს იყო დაბადებული ჰიროსიმასთან ახლოს — სწორედ იმ დღეს, როდესაც ამერიკელებმა ატომური ბომბი ჩამოაგდეს ქალაქში. აღნიშნული ჟესტი ომის შემდგომ ქვეყნის აღორძინების სიმბოლო იყო.

ოლიმპიადა–64 მაღალ დონეზე ჩატარდა და ყველა გაახარა, გარდა თავად იაპონელებისა. სტუმრებისთვის რომ ესიამოვნებინა, იაპონიის ხელისუფლება საცხოვრებელ სახლებს ანგრევდა და მათ ადგილზე სპორტულ ობიექტებს აგებდა. თამაშების ორგანიზებაზე დანახარჯებმა თითქმის სამჯერ გადააჭარბა დადგენილ ბიუჯეტს. ადამიანები კარგავდნენ სამსახურებს, გამონაბოლქვისგან ზიანდებოდა ეკოლოგია, ბევრ წყალსაცავში ცურვა და თევზაობაც კი აიკრძალა. ქუჩებში 200 ათასამდე ძაღლი და კატა დაიჭირეს და დახოცეს.

კოლოსალური ხარჯები, კორუფცია, პროტესტები და პანდემია

დღეს მთავარი პრობლემა ოლიმპიადის ორგანიზებისას სიძვირეა. უახლოეს პერსპექტივაში ცოტა ქვეყანა თუ მოისურვებს მსგავსი მასშტაბის ტურნირის ჩატარებას. იაპონელებმა, გაითვალისწინეს რა 1964 წლის გაკვეთილი, ხარჯები შეამცირეს. გაცხადებული 42 ობიექტიდან მხოლოდ რვა არის ახალი, ხოლო ათი — დროებითი. ოლიმპიური თამაშების საერთო ხარჯები, რომლებიც იაპონიის ხელისუფლებამ გაიღო, 15,4 მლრდ დოლარია. გარდა ამისა, უსაფრთხო გარემოს შექმნისთვის კიდევ 900 მილიონი დოლარი დაიხარჯა.

მოულოდნელი პრობლემა მაშინ წამოიჭრა, როდესაც საფრანგეთის პოლიციამ იაპონიის ოლიმპიური კომიტეტის ხელმძღვანელ ცუნეკაძუ ტაკედეს ბრალი წაუყენა ქრთამის მიცემაში (სავარაუდოდ, 2 მლნ დოლარი), რათა კენჭისყრაში ტოკიოს გამარჯვება უზრუნველეყო. საერთაშორისო ოლიმპიურმა კომიტეტმა გამოძიება დაიწყო, ხოლო სამი თვის შემდეგ ტაკედამ თანამდებობიდან წასვლის თაობაზე განაცხადა.

მეორე პრობლემაა მუშახელის უკმარისობა. ოლიმპიადისთვის ობიექტების მომზადების დროს ორი სიკვდილი დაფიქსირდა —  ზედმეტი მუშაობის გამო. ექსპერტების ვარაუდით, 2025 წლისთვის იაპონია შეიძლება მუშების დეფიციტს შეეჯახოს.

და ყველაზე აშკარა პრობლემა — პანდემია. გამოკითხვის თანახმად, იაპონიის მოსახლეობის 80% ოლიმპიადის ჩატარების წინააღმდეგია. ადამიანები საპროტესტო აქციებსაც მართავდნენ, მაგრამ ორგანიზატორებს ამისთვის ყურადღება არ მიუქცევიათ. პანდემიის გამო ეს ოლიმპიადა განსაკუთრებული იქნება. დაჯილდოებაზე დამსწრეთა რაოდენობა სოლიდურად შემცირდება. სპორტსმენები ვალდებული არიან, გამუდმებით ატარონ ნიღბები, გულშემატკივრებს ურჩევენ, თავი შეიკავონ შეძახილებისგან და მხოლოდ აპლოდისმენტებით დაკმაყოფილდნენ.

39
საარჩევნო ბიულეტენები

2020 წლის არჩევნების შემსწავლელმა კომისიამ მუშაობა დაასრულა: რა წერია დასკვნაში

0
საპარლამენტო არჩევნების დროს გამოვლინდა ხარვეზები, მაგრამ ეს ხარვეზები კენჭისყრის საბოლოო შედეგებზე გავლენას ვერ მოახდენდა, დაასკვნა დროებითმა საგამოძიებო კომისიამ.

თბილისი, 26 ივლისი — Sputnik. 2020 წლის საპარლამენტო არჩევნებზე გამოვლინდა გარკვეული ხარვეზები, მაგრამ მათ არჩევნების საბოლოო შედეგებზე რაიმე გავლენა არ მოუხდენია, განაცხადა საპარლამენტო არჩევნების შემსწავლელი საქართველოს პარლამენტის დროებითი საგამოძიებო კომისიის თავმჯდომარემ, გივი მიქანაძემ.

მიქანაძემ კომისიის დასკვნა პარლამენტის რიგგარეშე სხდომაზე ორშაბათს წარადგინა.

დროებითი საგამოძიებო კომისია საკანონმდებლო ორგანოში მიმდინარე წლის 17 თებერვალს მმართველი პარტია „ქართული ოცნება - დემოკრატიული საქართველოს" ინიციატივით შეიქმნა ოპოზიციის ბრალდებების საპასუხოდ, რომ საპარლამენტო არჩევნები გაყალბდა.

„საგამოძიებო კომისიის მიერ გაწეული საქმიანობის შედეგად დადგინდა, რომ საპარლამენტო არჩევნები კონკურენტულ გარემოში, ძირითადი თავისუფლებებისა და კანონმდებლობის სრული დაცვით ჩატარდა. ამასთანავე, საპარლამენტო არჩევნების ჩატარებისას გამოიკვეთა რიგი ხარვეზები, რომლებსაც არჩევნების საბოლოო შედეგებზე გავლენა არ მოუხდენია. შესაბამისად, საპარლამენტო არჩევნებთან დაკავშირებით ცენტრალური საარჩევნო კომისიის მიერ შემაჯამებელ ოქმში გამოქვეყნებული მონაცემები ამომრჩევლის გამოხატულ თავისუფალ ნებას სრულად ასახავს“, – განაცხადა გივი მიქანაძემ.

მისი ინფორმაციით, საგამოძიებო კომისიამ ჩაატარა 16 სამუშაო შეხვედრა, საარჩევნო პროცესებთან დაკავშირებული 38 ადამიანი გამოკითხა და სხვადასხვა უწყებას მიმართა 22 წერილით და მათგან მიიღო შესაბამისი პასუხები.

„საერთო ჯამში, დისბალანსიანი ბიულეტენების რაოდენობა იყო 0,16%. კომისიამ დაადგინა, რომ იყო იმდენად მიზერული განსხვავება, რომ არანაირი არსებითი გავლენა არ შეიძლებოდა მოეხდინა შედეგებზე. ეს განსხვავებები ფიქსირდებოდა მეასედებში - 0,01%- 0,02%, როგორც მეტობის, ისე ნაკლებობის თვალსაზრისით“, - განაცხადა მიქანაძემ.

ამასთან, საგამოძიებო კომისიის თავმჯდომარემ აღნიშნა, რომ არცერთ ოპოზიციურ პარტიას არ წარმოუდგენია თუნდაც ერთი მტკიცებულება იმისა, რომ არჩევნები გაყალბდა ან მოხდა რაიმე მანიპულაცია. მეტიც, ოპოზიციის წარმომადგენლებს არამხოლოდ არ მიუღიათ მონაწილეობა კომისიის მუშაობაში, არამედ ისინი სხდომებსაც არ დასწრებიან, აღნიშნა მიქანაძემ.

დროებითი საპარლამენტო დასკვნის განხილვა ამჯერადაც პრაქტიკულად ოპოზიციის გარეშე წარიმართა. ოპოზიციონერი დეპუტატების უმრავლესობა განხილვას არ ესწრებოდა.

„როდესაც ამ თემაზე კომისიამ მუშაობა დაასრულა და ეს თემა გამოდის განსახილველად, ოპოზიციის მხოლოდ სამი წარმომადგენელია დარბაზში, „ნაცმოძრაობიდან“ არცერთი. შემკამათებელი არ გყავთ იმ თემაზე, რომელი თემითაც უნდოდათ არეულობის მოწყობა, 6 თვე, ვიდრე შეთანხმებას ხელი არ მოეწერა, აჯანჯღარებდნენ ამ ქვეყანას“, - განაცხადა საპარლამენტო უმრავლესობის ლიდერმა მამუკა მდინარაძემ.

მმართველმა პარტიამ გასულ კვირაში ოპოზიციას მოუწოდა, მონაწილეობა მიიეღო დროებითი საგამოძიებო კომისიის დასკვნის განხილვასა და დამტკიცებაში. როგორც გავრცელებულ განცხადებაში იყო აღნიშნული, თუ ოპოზიციის ლიდერებს კვლავ მიაჩნიათ, რომ პარლამენტის მრავალთვიან საბოტაჟს ლეგიტიმური საფუძველი გააჩნია, მათ თავიანთი სიმართლის დამტკიცება უნდა სცადონ.

აღნიშნულ საკითხთან დაკავშირებით საკუთარი არგუმენტები ოპოზიციასაც გააჩნია.

„პოსტფაქტუმ, კრიზისის პერიოდში, საგამოძიებო კომისიის შექმნა, სადაც მხოლოდ თავად (მმართველი პარტია - რედ.) იღებენ მონაწილეობას, რა თქმა უნდა, ვერ დადებს დასკვნას, რომელიც საზოგადოების აზრზე იმოქმედებს ან რაიმე სანდოობა ექნება. ეს არის ძალიან სამწუხარო”, – განაცხადა არლამენტის ფრაქცია “შარლ მიშელის რეფორმების ჯგუფის” თავმჯდომარემ ხათუნა სამნიძემ.

უფრო ადრე მმართველმა პარტიამ განაცხადა, რომ კომისია ხმებს უბნების ნაწილზე გადაითვლის და თუ ეს შედეგები საქართველოს ცესკოს შედეგებთან 1%-ზე მეტით იქნება აცდენილი, ქვეყანაში ახალი საპარლამენტო არჩევნები დაინიშნება.

არჩევნების შედეგებით, მმართველმა პარტია „ქართულმა ოცნებამ" პარლამენტში 90 ადგილი მიიღო, დანარჩენი 60 ადგილი კი რვა ოპოზიციურ პარტიას შორის გადანაწილდა.

0