გიორგი ქობულია

ქობულიამ საქართველოს ეკონომიკის მთავარი გამოწვევები დაასახელა

158
ექსპორტის ზრდას ლოგისტიკური მომსახურების მაღალი ღირებულება აბრკოლებს, მიიჩნევს მინისტრი.

თბილისი, 14 თებერვალი – Sputnik. უმუშევრობის შემცირება, ექსპორტის განვითარება, ბიზნესისთვის ფინანსების ხელმისაწვდომობა, ინვესტიციების გაზრდა და კანონმდებლობის გაუმჯობესება – ეს ქართული ეკონომიკის მთავარი გამოწვევებია, რომლებიც უნდა გადაიჭრას, განაცხადა საქართველოს ეკონომიკისა და მდგრადი განვითარების მინისტრმა გიორგი ქობულიამ პარლამენტის დარგობრივი ეკონომიკისა და ეკონომიკური პოლიტიკის კომიტეტის სხდომაზე.

მინისტრის განცხადებით, საქართველოს ეკონომიკა ყოველწლიურად ვითარდება და მის წარმატებებს საერთაშორისო ორგანიზაციები აღიარებენ, რაც საერთაშორისო რეიტინგებში აისახება.

უმუშევრობა და როგორ ვებრძოლოთ მას

საქართველოს მთავრობისთვის 2019 წელს დასაქმება კვლავ პრიორიტეტული სფერო იქნება. მთავრობა აპირებს, რომ შეამციროს უმუშევართა რიცხვი, თუმცა ამ მიმართულებით გარვეული პრობლემებია, აღნიშნა ქობულიამ.

მინისტრის თქმით, პირველი გამოწვევა, რომელზეც მრავალი კვლევა მიანიშნებს, ეს სამუშაო ძალის კვალიფიკაციაა. საჭიროა გაძლიერებული პროგრამები, რათა საბაზისო პროფესიების ათვისება მოხდეს.

მეტი ექსპორტი

მთავრობის კიდევ ერთი მიზანია პროდუქციის ექსპორტის გაზრდა. მინისტრმა ისაუბრა იმ პრობლემებზე, რომელსაც მთავრობა ამ სფეროში აწყდება.

„მაქსიმალურად უნდა გავზარდოთ ის საექსპორტო პოტენციალი, რომელიც გვაქვს... თუ ჩვენ არ განვავითარებთ საექსპორტო პოტენციალს, საქართველოს ეკონომიკის ზრდას სერიოზული პრობლემები ექნება“, – განაცხადა ქობულიამ.

მან აღნიშნა, რომ ამჟამად ლოგისტიკური და სატრანსპორტო სისტემების მიერ დადგენილი ღირებულება ძალზე მაღალი და არაეფექტურია.

მისი თქმით, საქართველომ უნდა გაზარდოს თავისი სატრანსპორტო ეფექტურობა, რათა საკუთარი საქონელი მსოფლიო ბაზარზე კონკურენტუნარიანი გახდეს. ტრანსპორტირების წილი საექსპორტო პროდუქციის ღირებულებაში იმდენად მაღალია, რომ ბევრი საქონლის ექსპორტი არაკონკურენტუნარიანი ხდება, აღნიშნა ქობულიამ.

ექსპორტის კიდევ ერთ პრობლემას, მინისტრის თქმით, ქართული პროდუქციის ხარისხის უზრუნველყოფა წარმოადგენს.

საუბარია არა თავად პროდუქციის ხარისხზე, არამედ ხარისხის სისტემის შექმნაზე. ქობულიას თქმით, ევროკავშირთან ასოცირების ხელშეკრულებიდან გამომდინარე, არის რიგი ინიციატივები, რომლებიც ხორციელდება, რათა ხარისხის უზრუნველყოფის სისტემები ევროკავშირის სტანდარტებს მიუახლოვდეს.

„თუ ამას არ გავაკეთებთ, პროდუქციის ექსპორტს ვერ განვახორციელებთ ისეთ მსხვილ ბაზრებზე, როგორიცაა ევროკავშირის ბაზარი, ისინი, უბრალოდ, ასეთ პროდუქციას არ მიიღებენ“, – განაცხადა ქობულიამ.

ბიზნესის განვითარება

მიუხედავად იმისა, რომ საქართველო წამყვანი ქვეყანაა რეგიონსა და აღმოსავლეთ ევროპაში ბიზნესის წარმოების სიმარტივის მხრივ, პრობლემები ამ სფეროში მაინც რჩება.

ერთ-ერთ ასეთ პრობლემად ქობულიამ ბიზნესისთვის ფინანსებისა და კრედიტების ხელმისაწვდომობა დაასახელა.

მინისტრის განცხადებით, არის ბევრი საწარმო, რომელიც ვერ განვითარდა იმის გამო, რომ მათთვის ძვირია კრედიტები, ან მათ არ აძლევენ კრედიტს იმის გამო, რომ ბანკში გირაოსთვის სახსრები არ გააჩნიათ.

კიდევ ერთ პრობლემად ქობულიამ დაასახელა ზედმეტი ბიუროკრატია, რომელსაც უცხოელი ინვესტორები აწყდებიან; ასევე სახელმწიფო ქონების პრივატიაზაციის დაბალი ტემპი. მინისტრმა აღნიშნა, რომ სახელმწიფო ქონების პრივატიზაცია არ ხდება მხოლოდ ბიუჯეტში სახსრების მოსაზიდავად, არამედ იმისთვისაც, რომ უმოქმედო ქონება, მაგალითად, შეჩერებული სანატორიუმი, ან პანსიონატი ეკონომიკას ზიანს არ აყენებდეს.

სახელმწიფოს როლი ეკონომიკაში

მინისტრმა გამოწვევებსა და პრობლემებზე საუბრისას განაცხადა, რომ ძალზე მნიშვნელოვანია სახელმწიფოს როლი ქვეყნის ეკონომიკის განვითარებაში.

მიუხედავად იმისა, რომ საქართველოს ეკონომიკა კერძო სექტორს ეყრდნობა, სახელმწიფოს საკუთრებაში ისევ რჩება დიდი კომპანიები. ქობულიას განცხადებით, მთავრობის ძირითადი გამოწვევაა სახელმწიფო კომპანიების ეფექტურობის გაზრდა ეკონომიკის განვითარებისა და მისი ეფექტურობის გაზრდისთვის.

„საჭიროა შესაბამისი საკანონმდებლო ცვლილებების განხორციელება კაპიტალის ბაზრის რეფორმასთან, ლიზინგისა და ფაქტორინგის, გადახდისუუნარობის, ანტიდემპინგური და მოძრავი აქტივების რეგისტრაციის შექმნის კუთხით“, – განაცხადა ქობულიამ.

158
თემები:
საქართველოს ეკონომიკა (584)

„პოსეიდონის გამოცდა“: მზადდება უპილოტო ტორპედოს პირველი გაშვება

28
(განახლებულია 17:28 27.05.2020)
მოწინააღმდეგის თავდასხმის შემთხვევაში უნიკალური რუსული უპილოტო წყალქვეშა კომპლექსი გარანტირებულს ხდის საპასუხო დარტყმას. მსოფლიოს ტექნოლოგიურად ყველაზე მეტად განვითარებულ ქვეყნებს შორის ასეთი იარაღი მხოლოდ რუსეთს აქვს, ირწმუნება სამხედრო მიმომხილველი.

ალექსანდრ ხროლენკო

სააგენტო РИА Новости-ს წყარომ რუსეთის თავდაცვით-სამრეწველო კომპლექსში 26 მაისს განუცხადა, რომ უპილოტო წყალქვეშა აპარატის „პოსეიდონის“ პირველი გაშვება 2020 წლის შემოდგომისთვის იგეგმება. მანამდე კი უახლესი სისტემის ცალკეული კვანძები და აგრეგატები გამოიცდება. გაშვება წყალქვეშა მრავალმიზნობრივი ატომური ნავიდან „ბელგოროდიდან“ მოხდება, რომელიც უახლესი უპილოტო აპარატების პირველი საცდელი მატარებელია.

ექსპერიმენტული ხომალდი სპეციალურად „პოსეიდონისთვის“ გადაკეთდა და ის წყალში 2019 წლის აპრილში ჩაუშვეს. თავად სუბმარინის გამოცდა 2021 წლამდე გაგრძელდება და, წარმატების შემთხვევაში, „პოსეიდონებთან“ ერთად შევა რუსეთის სამხედრო-საზღვაო ფლოტის შემადგენლობაში. 

საკონტინენტთშორისო უპილოტო აპარატების პირველი საშტატო მატარებელი მომავალში ატომური წყალქვეშა ნავი „ხაბაროვსკი“ გახდება, რომლის წყალში ჩაშვებაც ზაფხულის დასაწყისში იგეგმება, რის შემდეგაც ტესტირება დაახლოებით ორი წლის განმავლობაში გაგრძელდება.

მსოფლიოს არც ერთ ქვეყანას არ აქვს „პოსეიდონისგან“ თავდაცვის სისტემები თუ საშუალებები. მრავალმიზნობრივი საოკეანო სისტემა „პოსეიდონი“ არის რუსეთის ასიმეტრიული პასუხი აღმოსავლეთ ევროპაში პენტაგონისა და ნატოს შემტევი პოტენციალის სახიფათო კონცენტრაციაზე, და ასევე აშშ-ის რაკეტსაწინააღმდეგო თავდაცვის ფორმირებაზე, რაც რუსეთის თავდაცვითი პოტენციალის გასანადგურებლად შეიძლება იყოს გამოყენებული.

რუსეთის წინდახედულება ზედმეტი არ გამოდგა — 2019 წელს აშშ გამოგონილი მიზეზით გავიდა საშუალო და მცირე სიშორის რაკეტების ლიკვიდაციის შესახებ შეთანხმებიდან, რითიც სტრატეგიული შემტევი შეიარაღების შესახებ შეთანხმების დასანგრევად პრეცედენტი შექმნა. ამასთან, შეერთებულმა შტატებმა 2020 წლისთვის სამხედრო ბიუჯეტი 750 მლრ დოლარამდე გაზარდა.

გამაოგნებელი უპილოტო აპარატი

„პოსეიდონი“ — ეს სტრატეგიული საკონტინენტთაშორისო ღრმაწყლოვანი აპარატია ატომური ენერგეტიკული დანადგარებით, რომელსაც 1000 მ სიღრმეზე 10 ათასი კილომეტრის გავლა შეუძლია 100 კვანძის სიჩქარით (185 კმ/სთ). „პოსეიდონის“ გამოცდებმა დაადასტურა მისი უნიკალური მახასიათებლები და უპილოტო ცურვის პრაქტიკულად შეუზღუდავი მანძილი.

24 მეტრი სიგრძისა და დაახლოებით 1,6 მ დიამეტრის მქონე აპარატი შესაძლოა აღჭურვილი იყოს ჩვეულებრივი ან მეგატონური თერმობირთვული საბრძოლო მასალებით, რომლის დანიშნულებაც ავიამზიდების დაჯგუფების განადგურებაა. ოკეანეში ამგვარი ტორპედოს მოძებნა მარტივი არ არის, დაბალ სიჩქარეზე ის ძალიან ჩუმად მოძრაობს, თუმცა ჰიდროაკუსტიკური კონტაქტის (აღმოჩენის) შემთხვევაშიც კი მისგან თავდაცვა შეუძლებელია. უპილოტო რეჟიმში „პოსეიდონს“ შეუძლია იმოძრაოს ისეთ სიღრმეებსა და ისეთი სიჩქარით, რომლებიც მიუწვდომელია მოწინააღმდეგის ყველა არსებული თუ პერსპექტიული სუბმარინისთვის, ტორპედოებისა თუ რაკეტებისთვის. 

მართვის ავტონომიური სისტემა ანტისუბმარინული სისტემების აღმოჩენისა და გადალახვის საშუალებას იძლევა, რაც არის კიდეც დაცულობის და წარმოუდგენელი გამანადგურებელი ეფექტის გარანტია. ეს შეკავების ძალიან სერიოზული ინსტრუმენტია.

რუსულმა პროექტმა ამერიკული სტრატეგიული სარდლობა (STRATCOM) ჯერ კიდევ მისი გამოცდების ეტაპზე შეაშფოთა. კონგრესის მოსმენებზე თებერვალში STRATCOM-ის ხელმძღვანელმა ჯონ ჰაიტენმა აღნიშნა, რომ „პოსეიდონი“, როგორც შეიარაღების პრინციპულად ახალი სისტემა, არ ხვდება СНВ-III-ის შეზღუდვებში, ხოლო აშშ-ში მისი ანალოგი არ მუშავდება. ამერიკული მხარე მაშინ ახალი შეთანხმებით დაინტერესდა, რომელიც ბირთვული აღჭურვილობის წყალქვეშა აპარატებისა და სხვა სისტემების რეგლამენტაციას მოახდენდა. მანამდე აშშ-ში გაჩნდა პუბლიკაცია–პროგნოზები, თითქოს გლობალური კონფლიქტის შემთხვევაში წყალქვეშა მატარებელი აშშ-ის სანაპიროებთან 100-მეგატონიან თერმობირთვულ ტორპედოს მიიტანდა, რომელიც ცუნამის გამოიწვევდა და ოკეანეში ჩარეცხავდა მთელ სანაპირო ინფრასტრუქტურას ავიამზიდებთან, თავდაცვით ქარხნებთან და მთელ ქალაქებთან ერთად. ამგვარად, უპილოტო „პოსეიდონმა“ ჯერ კიდევ შეიარაღებაში შესვლამდე მოახდინა გავლენა საერთაშორისო მდგომარეობაზე და ნაწილობრივ რუსეთის მიმართ არამეგობრულად განწყობილი ქვეყნების სამხედრო ხელმძღვანელობის გადაწყვეტილებებზეც. მაგრამ „პოსეიდონი“ არასდროს იღებს სტარტს წონადი მიზეზის გარეშე.

იდუმალი „ხაბაროვსკი“  

უახლესი სუბმარინა „ხაბაროვსკი“ დღეისათვის რუსეთის ერთ-ერთი ყველაზე დიდი სამხედრო საიდუმლოა. ღია წყაროებიდან ცნობილია, რომ ხომალდი აღჭურვილია პრინციპულად ახალი ატომური ენერგეტიკული დანადგარით და აქვს უნარი, გადაიტანოს ექვსი „პოსეიდონი“, რომლებსაც დასავლეთში „განკითხვის დღის ტორპედოებს“ უწოდებენ.

ხომალდის წყალწყვა დაახლოებით 10 ათასი ტონაა, სიჩქარე — 32 კვანძი, ჩაყვინთვის სიღრმე — 500 მეტრი, ავტონომიურობა — 12 დღე-ღამე, ეკიპაჟი — არანაკლებ 100 კაცისა. სუბმარინის კორპუსი უახლეს სტრატეგიულ რაკეტმზიდ „ბორეის“ ჰგავს. „ხაბაროვსკის“ ძირითადი მახასიათებლები გასაიდუმლოებულია. რუსეთის სამხედრო–საზღვაო ფლოტი ჩრდილოეთისა და წყნარი ოკეანის ფლოტებში „პოსეიდონების“ მატარებელი ორ–ორი სუბმარინის ყოლას გეგმავს.

ეს რუსეთის წყალქვეშა სტრატეგიული შეიარაღების პრინციპულად ახალი სისტემებია. ატომური სუბმარინ-მატარებლებისა და „განკითხვის დღის ტორპედოების“ „ორმაგი იდუმალება“ გარანტირებულად საიმედოს ხდის საპასუხო-შემხვედრ ბირთვულ დარტრყმას იმ შემთხვევაშიც კი, თუ აშშ და ნატო „გაურღვეველ“ ანტისარაკეტო თავდაცვის სისტემებს შექმნიან ხმელეთზე, ზღვასა თუ კოსმოსში.

თუმცა რუსეთის ფედერაცია არ მიისწრაფვის საფრთხეების მანიაკალური გენერირებისკენ. უფრო მეტიც, მსოფლიოში სტრატეგიული სტაბილურობის განმტკიცებისთვის მოსკოვი მზადაა იმსჯელოს დასავლელ პარტნიორებთან ერთად.

 

28
ნიკა შენგელია

ნიკა შენგელია: ემიგრანტები საქართველოში სულ უფრო ნაკლებს გადმორიცხავენ

357
(განახლებულია 20:11 26.05.2020)
კორონავირუსის პანდემია ნეგატიურ გავლენას საქართველოში ელექტრონული სისტემებით გადმორიცხული ფულის მოცულობაზეც ახდენს. უცხოეთიდან უფრო ნაკლები ვალუტის შემოდინება კი  უარყოფითად მოქმედებს როგორც მოსახლეობის შემოსავლებზე, ასევე ლარის სტაბილურობაზე.

საქართველოს ეროვნული ბანკის მონაცემებით, 2020 წლის აპრილში ქართულ კომერციულ ბანკებში ქვეყანაში შემოსული ფულადი გზავნილების ნაკადების მოცულობა, წინა წელთან შედარებით, 42,3%-ით შემცირდა და დაახლოებით 79,1 მლნ დოლარი შეადგინა.

როგორც არასამთავრობო ორგანიზაცია „საერთაშორისი კველევებისა და პროგნოზირების ცენტრის“ ვიცე-პრეზიდენტი ნიკა შენგელია აღნიშნავს, აპრილის თვეში რომ ემიგრანტების მიერ განხორციელებული ტრანზაქციების მოცულობა 40-45%-ით დაეცემოდა, სპეციალისტები ამაზე ჯერ კიდევ მარტის თვეში საუბრობდნენ და ამ მხრივ არც შემდეგი თვეების პროგნოზია კეთილსაიმედო.

„ფულადი გადმორიცხვების კლებას მაისის თვეშიც ველოდებით, ვვარაუდობთ, რომ ემიგრანტების მხრიდან ტრანზაქციების მოცულობა წინა წლის ანალოგიურ პერიოდთან შედარებით 45-50%-ით იქნება შემცირებული, ხოლო წლიურ ჭრილში ეს მაჩვენებელი 38-47%-ის ფარგლებში იქნება“, – განაცხადა ნიკა შენგელიამ „Sputnik- საქართველოსთან“ საუბრისას.

ფულადი გზავნილების მოცულობის შემცირება, რა თქმა უნდა, მსოფლიო ფინანსურ კრიზისს უკავშირდება, რომელსაც კორონავირუსის პანდემიის გამო ქვეყნების ეკონომიკების რეცესია მოჰყვა. 

„ექნება თუ არა გავლენა ამას ლარის კურსზე? ვიტყოდი რომ არა. იმიტომ რომ ეროვნული ბანკი აქტიურად  ახორციელებს ბაზარზე სავალუტო ინტერვენციებს, რადგან რეგულატორს კარგად ესმის, რომ დღევანდელ სიტუაციაში ლარის კურსის გაუფასურება 3,3 ნიშნულზე მეტად პროდუქტებსა და სხვა საქონელზე ფასების 8-15%-ით მატებას გამოიწვევს, ეს კი ინფლაციის 3%-იანი მიზნობრივი მაჩვენებლის პირობებში მოსახლეობის ჯიბეზე ნეგატიურად აისახება“, – აღნიშნა ნიკა შენგელიამ.

აქედან გამომდინარე, ეკონომისტის პროგნოზით, ლარის კურსი დოლარის მიმართ მაისის თვეში 3,30-ის ფარგლებში იქნება. ეს ნიშნული ეროვნულმა ვალუტამ შეიძლება წლის ბოლომდეც კი შეინარჩუნოს.

„თუ გავითვალისწინებთ იმას, რომ რეგულატორმა მარტის შემდგომი პერიოდიდან დღემდე ლარის კურსის გაუფასურების შესაჩერებლად რეზერვებიდან 120 მილიონი დოლარი გახარჯა, და იმასაც, რომ საერთაშორისო დახმარებებიც ნელ-ნელა შემოდის, რეგულატორის სწორი მოქმედების შედეგად სრულებით არის შესაძლებელი წლის ბოლოსთვის ლარის კურსის 3,0 ნიშნულიან მაჩვენებელთან მიახლოებაც კი“, – აღნიშნა ნიკა შენგელიამ.

ეროვნული ბანკმა უკვე განაცხადა, რომ უწყება მიმდინარე წელს სავალუტო ინტერვენციებს უფრო აქტიურად განახორციელებს. მათი მიზანი სავალუტო ბაზარზე ჭარბი მერყეობის შემცირება და ერთჯერადი მსხვილი ტრანზაქციების შედეგად ბაზრის მოლოდინებზე შესაძლო უარყოფითი გავლენის თავიდან არიდებაა.

გარდა ამისა, ეროვნული ბანკი მიმდინარე წელს ინტერვენციებს გამოიყენებს საერთაშორისო საფინანსო ინსტიტუტებიდან სესხებისა თუ გრანტების სახით მისაღები სავალუტო შემოდინებების ნაწილის ბაზრისთვის მისაწოდებლად.

ქართულ კომერციულ ბანკებში ელექტრონული სისტემების მეშვეობით 2020 წლის იანვარ–აპრილში, გასული წლის ანალოგიურ პერიოდთან შედარებით, ფულადი გზავნილები 9,4%-ით შემცირდა და დაახლოებით 467,9 მლნ დოლარი შეადგინა.

ფულადი გადმორიცხვების მოცულობით ლიდერობს რუსეთი. ლიდერი ქვეყნების ექვსეულში ასევე შედიან იტალია, საბერძნეთი, აშშ, ისრაელი და თურქეთი.

ნატა პატარაია

 

357
თავის ტვინი

როგორ გავაძლიეროთ ტვინის მუშაობა - 14 ჯანსაღი საკვები ტვინის უკეთესი ფუნქციონირებისთვის

0
(განახლებულია 18:36 27.05.2020)
ტვინის სწორად გამოკვება ერთ-ერთი ყველაზე აქტუალური თემაა ჯანსაღი ცხოვრების სამყაროში. და ეს ასეც უნდა იყოს! კვლევებმა აჩვენა, რომ გარკვეული საკვების მიღება აუმჯობესებს  მეხსიერებას და ზრდის ტვინის პროდუქტიულობას.

უამრავმა კვლევამ დაადასტურა, რომ ტვინის საკვები (იგულისხმება პროდუქტი, რომელსაც აქვს დადებითი გავლენა ტვინზე) ნამდვილად არსებობს.

დღევანდელ სტატიაში შევეცდებით იმ პროდუქტზე გესაუბროთ, რომლის რეგულარული მიღება თქვენს ტვინს უფრო გამჭრიახს და პროდუქტიულს გახდის.

ლურჯი მოცვი
© CC BY-SA 2.5 / Wikipedia / Vaccinium uliginosum
ლურჯი მოცვი

1. მოცვი

მოცვი ბუნების ერთ-ერთი უდიდესი საჩუქარია.  ის  ცნობილია, როგორც ანტიოქსიდანტების მეფე  და მას სხეულის დეტოქსიკაციისთვისაც აქტიურად იყენებდნენ.

არსებობს  კვლევა, რომლის მიხედვით, მოცვის წვენის მოხმარება ყოველდღიურად,  12 კვირის განმავლობაში აუმჯობესებს მეხსიერებას.

გაითვალისწინეთ, თუ  აპირებთ მოცვის შეტანას თქვენს ყოველდღიურ მენიუში,  ჭამამდე უნდა მიიღოთ არაუმეტეს 0,5 ჭიქა (113 გრამი).

ბროკოლი შეიცავს ბორს, რომლის ნაკლებობაც ტვინის აქტიურობის შემცირებას იწვევს
ბროკოლი

2. ბროკოლი

ბოსტნეულების სიაში თამამად შეგვიძლია პირველი ადგილი ბროკოლს მივაკუთვნოთ. როგორც არ უნდა მოამზადოთ -  შეწვავთ, მოხარშავთ თუ ორთქლზე მოამზადებთ, ის თქვენი ტვინის მუშაობას მაინც გააუმჯობესებს.

ბროკოლში ორი მთავარი მკვებავია, რაც მას ამ სიაში საპატიო ადგილს ანიჭებს. ვიტამინი K, რომელიც ასევე გვხვდება მოცვში უფრო მცირე რაოდენობით, ეხმარება კოგნიტურ შესაძლებლობებს, D ვიტამინი კი აუმჯობესებს თქვენს მეხსიერებას.

ბროკოლში ექვსჯერ მეტი K ვიტამინია, ვიდრე მოცვში. უარყოფითი მხარე ის არის, რომ მოცვი ცოტა უფრო გემრიელია.

თუ ყოველდღიურად ცოტაოდენ ბროკოლს მიირთმევთ, თქვენი ტვინი სუპერ ტვინად გადაიქცევა.

კაკალი
კაკალი

3. კაკალი

კაკალი საუკეთესო არჩევანია, როდესაც საქმე ეხება კოგნიტურ ფუნქციას. ზოგადად, ნებისმიერი თხილეული ჯანმრთელი ცხიმების კარგი წყაროა. გულის მუშაობის  გაუმჯობესების გარდა, ნიგოზი ასევე ამკვეთრებს  მეხსიერებას.

ყოველთვის, როდესაც წახემსებას გადაწყვეტთ, მიირთვით უმი და უმარილო ნიგოზი და ეცადეთ, ამით ჩაანაცვლოთ არაჯანსაღი საკვები.

ჩაი
© photo: Sputnik / ასატურ ესაიანცი
ჩაი

4. მწვანე ჩაი

ზოგი ჩვენგანი ყავას სვამს, ზოგი კი ჩაის ამჯობინებს. ორივე მათგანი ამ სიაშია შეტანილი, თუმცა, არ მოგიწევთ  მათ შორის არჩევანის გაკეთება.

მწვანე ჩაი შეიცავს უფრო მეტს, ვიდრე უბრალოდ კოფეინია. ის ამცირებს შფოთვას და რელაქსაციას უწყობს ხელს.

მწვანე ჩაიში ყავასთან შედარებით კოფეინის დაბალი დონეა, რაც მას ტვინის სრულყოფილი ფუნქციონირებისთვის შეუცველელ სასმელად აქცევს. ხალხი, ვინც მწვანე ჩაის სვამს, ამტკიცებს, რომ  მათი ენერგიის დონე და  პროდუქტიულობა უფრო გაიზარდა, ვიდრე ყავის სმისას.

ფორთოხალი
© CC0 / Pixabay
ფორთოხალი

5. ფორთოხალი

ფორთოხალი დიდი რაოდენობით C ვიტამინს შეიცავს. საკმარისია ერთი დიდი ფორთოხალი, რომ შეივსოთ C  ვიტამინის ყოველდღიური საჭიროება.

C ვიტამინს რომ უამრავი სასარგებლო თვისება აქვს, ყველამ ვიცით. თუმცა ამჯერად იმაზე გავამახვილებთ ყურადღებას, რომ  ის მჭიდროდაა  დაკავშირებული მეხსიერებისა და აზროვნების გაუმჯობესებასთან. დემენციით დაავადებულ ადამიანებში გამოვლენილია C ვიტამინის დაბალი შემცველობა.  ეს შესაძლოა იმასაც ნიშნავდეს, რომ თუ  C ვიტამინს საკმარისი რაოდენობით მიიღებთ, თქვენ შეძლებთ დემენციის თავიდან აცილებას.

ავოკადო
ავოკადო

6. ავოკადო

ავოკადო არის ჯანმრთელი ცხიმების წყარო. ის  ხელს უწყობს სისხლის  ნაკადის ჯანმრთელ მიმოქცევას, რაც თავის მხრივ ნიშნავს ჯანმრთელ ტვინს.

გარდა ამისა, ავოკადო  ამცირებს არტერიულ წნევასაც, რაც თავიდან აცილებს კოგნიტურ შესაძლებლობათა დაქვეითებას.

ყოველდღიურად 1/4 ან 1/2 ავოკადოს მიღება დაეხმარება თქვენს ტვინს სუპერგმირის ფუნქციების შეძენაში.

© video: Ruptly .
ქოქოსი

7. ქოქოსისის ზეთი

ქოქოსის ზეთი მრავალფუნქციური ზეთია. ზოგი კულინარიაში იყენებს, ზოგიც კოსმეტიკაში.  გარდა უამრავი სასარგებლო თვისებისა, ქოქოსის ზეთი აძლიერებს ტვინის მუშაობას ალცჰეიმერის სინდრომის  პაციენტებში.

ისპანახი
ისპანახი

8. ისპანახი

კვლევამ აჩვენა, რომ როდესაც ხანდაზმულები ყოველდღიურად მოიხმარდნენ ისპანახს დაახლოებით 5 წლის განმავლობაში, ჰქონდათ იგივე შემეცნებითი შესაძლებლობები, როგორიც მათზე 11 წლით უმცროსებს.

ეს ყველაფერი ვიტამინი K- ს წყალობითაა, რომელიც უხვადაა ისპანახში.

შვრია და შვრიის ფაფა
© CC0 / Pixabay
შვრია და შვრიის ფაფა

9. შვრია

შვრია ერთ-ერთი ყველაზე პოპულარული საკვებია, რომელსაც საუზმეზე ვიყენებთ, მასში უამრავი ნახშირწყალია. გლუკოზა დაუყოვნებლივ იგზავნება ტვინისკენ და მას  ფუნქციონირებაში ეხმარება. არსებობს კვლევები,  რომ რაც უფრო მაღალია გლუკოზის კონცენტრაცია  სისხლში, მით უკეთესად ვახერხებთ ფოკუსირებას და ვიმახსოვრებთ საგნებს.

თუ დილით სისხლში შაქრის დაბალი დონე გაქვთ, გაღვიძებისთანავე შვრიის ფაფა თქვენს საუკეთესო მეგობარად აქციეთ.

ყურძენი და წვენი
ყურძენი და წვენი

10. ქიშმიში

იცოდით, რომ ქიშმიში ხელს უწყობს ტვინის მუშაობას?

ქიშმიში არის ტვინის ყველა საკვებს შორის ერთ-ერთი პირველი. ის ორგანიზმს D ვიტამინის დეფიციტსაც არიდებს თავიდან.

ყავა
© CC0 / Pixabay
ყავა

11. ყავა

უმეტესობამ არც ვიცით, რომ    ყავის საშუალებით ბევრ  ანტიოქსიდანტს ვიღებთ, რაც   ტვინს უჯრედული სიკვდილისგან იცავს. ეს კი, თავის მხრივ,  გვიცავს დემენციისგან და მასთან დაკავშირებული დაავადებებისგან.

ასე, რომ ყავაზე ნამდვილად არ უნდა თქვათ უარი  ( აქ შაქრიანი და რძიანი ყავა არ იგულისხმება).  მიიღეთ დღეში მაქსიმუმ 3 ჭიქა შავი ყავა, რომ თავი არაჩვეულებრივად იგრძნოთ.

ნუში
© CC0 / Pixabay
ნუში

12. ნუში

ცნობილია, რომ ნუში აძლიერებს მეხსიერებას და აფერხებს ალცჰეიმერის განვითარებას. დღეში დაახლოებით ერთი მუჭა ნუშის მიღება საკმარისი იქნება, მაგრამ არ გადააჭარბოთ, რადგან უამრავ ცხიმს შეიცავს.

მარწყვი
მარწყვი

13. მარწყვი

კენკროვნების  უმეტესობას, მათ შორის მარწყვსაც,  სასარგებლო გავლენა აქვს ტვინზე. ისინი ხელს უშლიან ასაკთან დაკავშირებულ მეხსიერების დაკარგვას და შესაძლოა შეანელონ ალცჰეიმერის განვითარებაც.

კიდევ ერთი რამ, რაც უფრო მეტად მარწყვს უკავშირდება, არის მასში შემავალი კალიუმის რაოდენობა. კალიუმი უკავშირდება სისხლის ნაკადის გაზრდას და აუმჯობესებს  კოგნიტურ ფუნქციას.

1 ჭიქა წითელი ღვინო= 1 საათი ვარჯიში
1 ჭიქა წითელი ღვინო= 1 საათი ვარჯიში

14. წითელი ღვინო

ჩვენს სიაში ბოლო, მაგრამ არანაკლებ მნიშვნელოვანი, წითელი ღვინოა. მიუხედავად იმისა, რომ ალკოჰოლი თავისთავად არ არის დაკავშირებული თავის ტვინის ფუნქციონირების რაიმე გაუმჯობესებასთან, ზოგიერთი კვლევა აჩვენებს, რომ წითელი ღვინის ზომიერად მიღებას ნამდვილად აქვს უპირატესობები.

წითელ ღვინოს შეუძლია, დაბერების პროცესი შეანელოს და შეამციროს  დემენციის რისკიც.

თუ ფიქრობთ წითელი ღვინის მიღებას, უნდა დალიოთ მაქსიმუმ 1 ჭიქა წითელი ღვინო დღეში.

 

0