გირჩები

„გირჩელი“ მამაოები ახალი მღვდელმსახურები თუ მოტყუებული წვევამდელები

921
(განახლებულია 13:05 19.03.2018)
სამხედრო სავალდებულო სამსახურის გაუქმება ოპოზიციური პარტია „გირჩის“ ერთ-ერთი მთავარ პოლიტიკურ მიზანს წარმოადგენს, თუმცა სანამ ამას მიაღწევენ, მისი წევრები ახალგაზრდებს, რომლებსაც ჯარში სამსახური არ სურთ, მისგან თავის დაღწევაში ეხმარებიან.

„გირჩის“ წევრებმა 2017 წლის მარტში დაარეგისტრირეს რელიგიური გაერთიანება „საქართველოს ქრისტიანული, ევანგელისტური, პროტესტანტული ეკლესია — „ბიბლიური თავისუფლება“, რომელიც წვევამდელებს მღვდელმსახურის წოდებას ანიჭებს და შესაბამის ცნობასაც გასცემს. სწორედ ამ დოკუმენტის საფუძველზე ითხოვენ ახალგაზრდები შესაბამისი უწყებებისგან სავალდებულო სამხედრო სამსახურის გადავადებას და მიზანსაც აღწევენ, რადგან კანონში არსებული ჩანაწერი მათ ამის საშუალებას აძლევს.

„სამხედრო ვალდებულებისა და სამხედრო სამსახურის შესახებ საქართველოს კანონის“ 30-ე მუხლის „ლ" ქვეპუნქტის თანახმად, წვევამდელს სამხედრო სამსახურში გაწვევა გადაუვადდება, თუ ის არის მღვდელმსახური ან სწავლობს სასულიერო სასწავლებელში.

„ჩვენ რელიგიური გაერთიანებაში უკვე 3 ათასზე მეტი ადამიანია გაწევრიანებული, მათი ასაკი ძირითადად 18-დან 27 წლამდეა; ყველა მათგანს მღვდელმსახურის წოდება აქვს, რათა მათ სამხედრო სავალდებულო სამსახურში გაწვევა არ შეეხოთ“, — უთხრა „ბიბლიური თავისუფლების“ ერთ-ერთმა დამფუძნებელმა და მისმა ეპისკოპოსმა ლევან ჯგერენაიამ „Sputnik—საქართველოს”.

მღვდელმსახურის მოწმობაში წვევამდელები 20 ლარს იხდიან, თუმცა, ლევან ჯგერენაიას თქმით, ეს ნებაყოფლობითი შემოწირულობაა. „ბიბლიურ თავისუფლებაში“ გაერთიანება ყველა ადამიანს შეუძლია, ვისაც „თავისუფლება სწამს“ და არა აქვს მნიშვნელობა, ის მართლმადიდებელია, კათოლიკე თუ მუსლიმი.

„თავისუფლების რწმენა“ იმას გულისხმობს, რომ ადამიანის სხეული არის მისი საკუთრება და როგორც მოესურვება ისე უნდა განკარგოს. სავალდებულო სამხედრო სამსახური ესეც ერთგვარი თავისუფლების შეზღუდვაა. სახელმწიფოს მიჰყავს ადამიანები მათი ნების წინააღმდეგ, ამუშავებს მათ უფასო მუშახელად და ამას არანაირი შეხება არა აქვს თავდაცვასთან“, — აცხადებს ჯგერენაია.

მათ, ვისაც სამხედრო სამსახურის გავლა გარკვეული მიზეზით არ სურს, საქართველოს კანონმდებლობა არასამხედრო ალტერნატიული შრომითი სამსახურის გავლის შესაძლებლობას აძლევს. შესაბამისი კანონი 1997 წელს მიიღეს და ამჟამად ქვეყნის წინაშე ვალდებულებას ამ ფორმით 500-მდე მოქალაქე იხდის.

„ამ შესაძლებლობას იყენებენ ძირითადად პაციფისტები, ან ის ადამიანები, რომლებსაც რელიგია უკრძალავს იარაღის დაჭერას. ჩვენ კი უარვყოფთ მთლიანად სავალდებულო სამხედრო სამსახურის სისტემას. ჩვენ მიგვაჩნია, რომ ჯარი საკონტრაქტო უნდა იყოს და ვისაც სურს ქვეყანას ემსახუროს, მას ამაში ხელფასსაც უნდა უხდიდნენ“, – აღნიშნავს ჯგერენაია.

სამხედრო სამსახურისთვის თავის არიდება ავადმყოფობის სიმულაციით, სხეულის თვითდაზიანებით, ყალბი დოკუმენტის გამოყენებით ან სხვაგვარად მოტყუებით მოქმედი კანონმდებლობით დასჯადი ქმედებაა. შესაბამისი ცვლილებები პარლამენტმა სისხლის სამართლის კოდექსში 2017 წელს შეიტანა.

თუმცა „ბიბლიური თავისუფლების“ მღვდელმსახურებს კანონში ამ მუხლის არსებობა არ აშინებთ, რადგან არც მათი მოწმობებია ყალბი და არც მღვდელმსახურის განმარტებაა კანონმდებლობაში მოცემული.

სამხედრო სავალდებულო სამსახურში გაწვევას კოორდინირებას საქართველოს რეგიონული განვითარებისა და ინფრასტრუქტურის სამინისტრო უწევს.

სავალდებულო სამხედრო სამსახურში გაწვევა წელიწადში ორჯერ — გაზაფხულზე და შემოდგომაზე ხდება, ხოლო წვევამდელთა საერთო რაოდენობა წელიწადში 9 ათასამდეა.

სამინისტროს ინფორმაციით, „ბიბლიური თავისუფლების“ მიერ გაცემული მღვდელმსახურის ცნობის საფუძველზე გაწვევა შარშანდელი გაზაფხულიდან დღემდე 2000-მდე ახალგაზრდას გადაუვადდა. ამ რაოდენობიდან 1 100 თბილისზე, ხოლო დანარჩენი რეგიონებზე მოდის.

„იყო შემთხვევებიც, როდესაც „გირჩის“ მოწმობებით მოსულმა მღვდელმსახურებმა უარი თქვეს გადავადებაზე და წავიდნენ ზოგი ჯარში და ზოგიც კიდევ ალტერნატიულ სამსახურში და საჯაროდ დახიეს „გირჩის“ მღვდელმსახურის მოწმობა”, – აღნიშნეს სამინისტროში.

სანამ „გირჩის“ წევრები „ბიბლიურ თავისუფლებას“ დააარსებდნენ, ბოლო 10 წლის განმავლობაში სავალდებულო სამხედრო სამსახურში გაწვევა სულ 60 სასულიერო პირს გადაუვადეს.

უწყებაში აღნიშნეს, რომ მალე მღვდელმსახურის განმარტება სათანადოდ აისახება საქართველოს კანონმდებლობაში. მცდარია მოსაზრებაც, რომ სამხედრო სავალდებულო სამსახურში მხოლოდ გუშაგებად მსახურობენ. თავდაცვის სამინისტროში გაწვეული ახალგაზრდები გადიან ისეთივე წვრთნას, როგორც კონტრაქტორები. არანაკლებ იწვრთნებიან შინაგან საქმეთა სამინისტროს შესაბამის განყოფილებაშიც.

„რაც შეეხება გუშაგის ფუნქციას, ის არანაკლებ მნიშვნელოვანია სამხედრო სამსახურში. ისიც აღსანიშნავია, რომ მწვევამდელების 40% სამხედრო სამსახურის დასრულების შემდეგ აგრძელებს შეიარაღებულ ძალებში სამსახურს კონტრაქტით ან ხდება მათი დასაქმება შესაბამის უწყებებში“, – აღნიშნეს სამინისტროში.

დღეს საქართველოს კანონმდებლობის თანახმად, მამრობითი სქესის 18-დან 27 წლამდე ახალგაზრდებმა, რომლებსაც გადავადება არ ეხებათ, უნდა გაიაროს სავალდებულო სამხედრო სამსახური, თუმცა ფაქტია, რომ 2000-მდე ახალგაზრდას, რომელთაც გადავადება არ ეხებათ, „გირჩის“ მღვდელმსახურის მოწმობა ჯერჯერობით შველის…

921
წინასაარჩევნო კამპანია

სააკაშვილი და ივანიშვილი ერთმანეთთან გარიგებული არიან? მწვავე დებატების მორიგი რაუნდი

75
(განახლებულია 22:10 23.10.2020)
წინასაარჩევნო მარათონი  საქართველოში მალე დასრულდება - საპარლამენტო არჩევნებამდე ერთ კვირაზე ოდნავ მეტი რჩება

 

ოთხმა ოპოზიციურმა პოლიტიკურმა პარტიამ პირველი არხზე მორიგ დებატებში მიიღო მონაწილეობა.

გადაცემა „დებატები 2020“-ში მონაწილეობდნენ:

– ირაკლი ჯამბურია („თავისუფლება - ზვიად გამსახურდიას გზა“)

– ირაკლი ყიფიანი („ერთიანი ნაციონალური მოძრაობა“ - გაერთიანებული ოპოზიცია „ძალა ერთობაშია“)

– ირაკლი ქართველიშვილი („ახალი ქრისტიან-დემოკრატები“)

– ზურაბ ჭიაბერაშვილი („ბაქრაძე, უგულავა, ბოკერია - ევროპული საქართველო“)

ეკონომიკური პროგრამა

„ახალი ქრისტიან-დემოკრატების“ ეკონომიკურ პროგრამაში საუბარია თავისუფალი ბაზრის პოტენციალის გამოყენებასა და ასევე, ე.წ. პროგრესულ გადასახადზე.

 „პანდემიამ საქართველოს ეკონომიკა დაანგრია, ვინაიდან ის დამოკიდებული იყო ტურიზმზე და ვალის ეკონომიკაზე. პანდემიის დროს მთელმა ქვეყანამ იზარალა, მარტო ბანკებმა მიიღეს მოგება. პროცენტის შემცირებაზე იყო საუბარი, ამის ნაცვლად კი მათ საპროცენტო განაკვეთი გაზარდეს. ჩვენ უნდა გავთავისუფლდეთ საბანკო ეკონომიკისგან, ვალის ეკონომიკისგან. ქვეყნის მოსახლეობის დაახლოებით 80%-ს აქვს ვალი, თანაც ისეთი ვალი, რომელსაც ვერ იხდის. ძალიან ბევრი ადამიანი ვიცი, რომელიც პენსიას ვერ იღებს ვალის გამო“, - განაცხადა ქართველიშვილმა.

პარტია „თავისუფლება - ზვიად გამსახურდიას გზა“ ეკონომიკურ პროგრამაში აქცენტი კეთდება ადგილობრივი წარმოების განვითარებასა და აღორძინებაზე.

 „საქართველოში 730 დასახელების მინერალური წყალია. მაგრამ არავის უფიქრია 730 ქარხნის აშენება, რომელშიც, თითოეულში, მინიმუმ 100 ადამიანი დასაქმდებოდა. ეს ნიშნავს 73 ათას სამუშაო ადგილს. ამდენივე ოჯახში შევიდოდა ხელფასი, ამდენივე იქნებოდა უზრუნველყოფილი ელემენტარული საარსებო წყაროთი. ამგვარად, ფული შემოვიდოდა ბიუჯეტში. ამის ნაცვლად, ახლა ჩვენ ვაწარმოებთ მინერალურ წყალს, რომლის თითებზე ჩამოთვლაც შეიძლება“, - განაცხადა ჯამბურიამ. 

პარტია „ბაქრაძე, უგულავა, ბოკერია - ევროპული საქართველო - მოძრაობა თავისუფლებისთვის“ პროგრამაში საუბარია გადასახადების შემცირებაზე, სოციალური დახმარების გაზრდასა და უმუშევრობის დონის შემცირებაზე.

 „გადასახადების შემცირების, ნაკლები რეგულაციის და ბიუროკრატიის პროგრამა, ინვესტიციების მოზიდვა არის გასაღები იმისა, რომ წარმოება ქვეყანაში განვითარდეს. ხოლო კონკრეტულად რომელი წარმოება, რომელი სფეროები განვითარდება - ამას გადაწყვეტს თავად მეწარმე, თავად ბიზნესი, თავად ხალხი. მთავრობის ამოცანაა - შექმნას საუკეთესო ბიზნესგარემო“, - განაცხადა ჭიაბერაშვილმა.

საარჩევნო ბლოკის „ერთიანი ნაციონალური მოძრაობა - გაერთიანებული ოპოზიცია „ძალა ერთობაშია“ პროგრამა ითვალისწინებს გადასახადების, კერძოდ, მოგების გადასახადის ეტაპობრივად გაუქმებას.

 „ჩვენ საქართველო უნდა ვაქციოთ შესაძლებლობების ქვეყნად, რათა საქართველოში წარმატებულ ადამიანს უნდოდეს ბიზნეს–საქმიანობის განხორციელება. ერთადერთი გამოსავალია - საქართველომ ინტენსიურად აითვისოს თავისუფალი ვაჭრობის ხელშეკრულებები, მიღწეული ევროკავშირთან, მიღწეული ჩინეთთან და ვიმუშაოთ, რათა ახალი ხელშეკრულებები გაფორმდეს სხვა ქვეყნებთან. თუ საქართველო გახდება პირველი ქვეყანა, სადაც არ არსებობს საშემოსავლო და მოგების გადასახადი, ეს პირდაპირ ნიშნავს იმას, რომ განვითარებული ქვეყნების ინვესტორებისთვის ეს არის ადგილი, სადაც ისინი მოინდომებენ ბიზნესსაქმიანობის წარმოებას“, - განაცხადა ყიფიანმა.  

განათლება

პარტია „ბაქრაძე, უგულავა, ბოკერია - ევროპული საქართველო - მოძრაობა თავისუფლებისთვის“ პროგრამაში ძირითადი ყურადღება გამახვილებულია სასწავლო დაწესებულებების დეცენტრალიზაციის საკითხზე.

 „კერძო სკოლებში მოსწრება უკეთესია, ვიდრე საჯარო სკოლებში. საჯარო სკოლებიც უნდა გავხადოთ ისეთი, სადაც მოსწრების ხარისხი ამაღლდება. ამისათვის კი აუცილებელია, რომ სკოლა გახდეს მოსწავლის, რათა მოსწავლემ მიიღოს საუკეთესო განათლება. ამას ყველაზე უკეთ ემსახურება დეცენტრალიზაცია, მათ შორის, დერეგულაცია. ჩვენ უნდა გავზარდოთ სკოლის ვაუჩერი, მეტი ფული წავიდეს სკოლაში, რაც მოემსახურება მასწავლებლების ხელფასების ზრდას“, - განაცხადა ჭიაბერაშვილმა. 

საარჩევნო ბლოკ „ერთიანი ნაციონალური მოძრაობა“ - გაერთიანებული ოპოზიცია „ძალა ერთობაშია“ პროგრამა ითვალისწინებს განათლების სისტემის დაფინანსების გაორმაგებას და ვაუჩერულ სისტემაზე გადასვლას.

 „განათლებით უნდა დავამარცხოთ სიღარიბე. დღეს ქვეყანაში 70 ათასი მოსწავლეა დარეგისტრირებული სოციალურად დაუცველთა მონაცემთა ბაზაში, რომელიც ვერ იღებს სრულფასოვან განათლებას. ეს პირდაპირ ნიშნავს ხვალინდელ ღარიბ საქართველოს. სწორედ დღეს ამ 70 ათას ბავშვს არ აქვს სრულფასოვანი განათლება, ეს არის ყველაზე დიდი რისკი, რატომაც საქართველოში შეიძლება იყოს სიღარიბე. სწორედ ამიტომ, გაერთიანებული ოპოზიციის პროგრამით, ჩვენ ვაორმაგებთ განათლების საბიუჯეტო დაფინანსებას და გადავდივართ ვაუჩერულ დაფინანსებაზე. ეს ნიშნავს, რომ ჩვენ მშობელს ვაძლევთ 2 ათას ლარს და მას თავისი შვილი შეუძლია წაიყვანოს როგორც კერძო, ისე საჯარო სკოლაში. ჩვენი მიზანია - განათლების სისტემაში გავაჩინოთ კონკურენცია“, - განაცხადა ყიფიანმა.

განათლების დონისა და ხარისხის გაზრდა „ახალი ქრისტიან-დემოკრატების“ პროგრამის ძირითადი ხედვაა.  

 „ბევრი ნიჭიერი ადამიანი, რომელსაც უნდა ისწავლოს, ჩააბაროს, განათლება მიიღოს და გამოადგეს თავის ქვეყანას, ვერ ღებულობს განათლებას უსახსრობის გამო. ქვეყანაში წარმატებულად ის ითვლება, რომელიც სკოლას დაამთავრებს, საზღვარგარეთ წავა, იქ მიიღებს განათლებას და ან ჩამოვა, ან არ ჩამოვა და იქ დარჩება. რეალურად საქართველო კარგავს ამ ახალგაზრდა ძალას, რომელმაც უნდა განავითაროს ეს ქვეყანა“, - განაცხადა ქართველიშვილმა.  

პარტიის „თავისუფლება - ზვიად გამსახურდიას გზა“ პროგრამაში აქცენტი კეთდება იმაზე, რომ ხარისხიანი განათლება მოსახლეობის ყველა ფენისთვის გახდეს ხელმისაწვდომი.

 „პირველ რიგში, სანამ ჩვენ განათლებაზე ვისაუბრებთ, ეკონომიკაა მოსაწესრიგებელი. თუ ეკონომიკურად არ გაძლიერდნენ ოჯახები, თუ არ შემცირდა სოციალურად დაუცველი ადამიანების რაოდენობა, როგორ ჩამოვიდნენ ეს ადამიანები თბილისში, ქუთაისში, ბათუმში, სად მიიღონ განათლება? როგორ უნდა ისწავლონ, თუ საჭმლის ფული არ აქვთ? 30 წელიწადში რეფორმების შედეგად მივიღეთ ის, რომ საქართველოში ჩამოყალიბდა მდიდარი და ღარიბი, მდიდრები სწავლობენ, ღარიბები - ვერ სწავლობენ“, - განაცხადა ჯამბურიამ. 

კითხვა-პასუხი

დებატების მორიგ რაუნდში პოლიტიკური პარტიების ლიდერებმა გადაცემის წამყვანის კითხვებს უპასუხეს.

ჟურნალისტმა „ერთიანი ნაციონალური მოძრაობა“ - გაერთიანებული ოპოზიცია „ძალა ერთობაშია“ ბლოკის წინასაარჩევნო პროგრამიდან ამონარიდი წაიკითხა: „ხელისუფლება მოქალაქის ცხოვრებაში არ იჭრება, ადამიანის თავისუფლებას, პირად ცხოვრებას, კანონის უზენაესობას და სამართლიანობას განუხრელად იცავს, კერძო საკუთრება დაცულია, თავისუფალი მეწარმე წნეხს არ განიცდის, ოჯახების უსაფრთხოება და სიმშვიდე უზრუნველყოფილია, ხელისუფლება გამაერთიანებელია და არა გამყოფი, დაპირისპირებისა და შუღლის გამღვივებელი.  თუ თქვენ ერთპარტიული ხელისუფლება გექნებათ და უმრავლესობაში იქნებით, რატომ უნდა დაგიჯეროთ, რომ ეს ყველაფერი შესრულდება – კითხვა დასვა დებატების წამყვანმა. 

 „ჩვენ წარმოვადგენთ გაერთიანებულ ოპოზიციას, რომელიც შედგება სხვადასხვა პარტიული სუბიექტებისგან და მინდა აღვნიშნო, რომ ეს გაერთიანება გადაიქცა საზოგადოებრივ ერთობად და ამის მაგალითია რეფორმების გუნდი, რომელმაც შეიმუშავა ქვეყნის განვითარების გეგმა პარტიებთან ერთად. საბოლოო ჯამში, სწორედ ეს საზოგადოებრივი ერთობა, რომელიც პარტიული მრავალფეროვნების საფუძველს ქმნის პარლამენტში, არის გარანტი იმისა, რომ ეს რეფორმები განხორციელდება. სწორედ ეს მთავარი რეფორმა, რომელიც ეხება სასამართლო სისტემას, პროკურატურას, ეკონომიკურ რეფორმებს, არის გარანტია ჩვენი ქვეყნის წარმატების და ჩვენს ქვეყანაში მეტი შესაძლებლობის გაჩენის“, - განაცხადა ყიფიანმა.

მომდევნო კითხვის ადრესატი „ახალი ქრისტიან-დემოკრატების“ წარმომადგენელი იყო. წამყვანი დაინტერესდა, რომელ პარტიებთან ითანამშრომლებენ ისინი იმ შემთხვევაში, თუ პარლამენტში მოხვდებიან.

 „ჩვენ პარლამენტში ვითანამშრომლებთ სხვადასხვა პარტიასთან. „ქრისტიან-დემოკრატიული მოძრაობის“ იდეა ლიბერალურ და კონსერვატორულ ელემენტებზე დაფუძნებული იდეოლოგიაა. ჩვენ ვითანამშრომლებთ ყველა პოლიტიკურ პარტიასთან, პარლამენტი ხომ პოლიტიკური მოლაპარაკებების მაგიდაა. დიალოგი შესაძლებელია ყველა პოლიტიკურ გუნდთან და ჯგუფთან“, - განაცხადა ქართველიშვილმა.

ვისთან გამორიცხავთ თანამშრომლობას ან გყავთ თუ არა უკვე პარტნიორები, ვისთანაც წარმოგიდგენიათ თანამშრომლობა? - ამ კითხვით მიმართა წამყვანმა პარტიის „თავისუფლება - ზვიად გამსახურდიას გზა“ ლიდერს.

 „პირველ რიგში, პატივი უნდა ვცეთ მოსახლეობას, რომელიც მიიღებს მონაწილეობას არჩევნებში და შემდეგ ეს ცესკოში დაითვლება და გამოჩნდება გამარჯვებული ან დამარცხებული მხარე... ჩემი ოპონენტი წეღან ამტკიცებდა, რომ შევარდნაძე გადააგდეს. შევარდნაძე კი არ გადააგდეს, მან თავისი „მოქალაქეთა კავშირის“  ახალგაზრდულ ფრთას, „ნაციონალურ მოძრაობას“ გადააბარა ხელისუფლება. ასე არ იყო? შეიძლება გარიგებულიც არიან ერთმანეთთან (ბიძინა ივანიშვილთან, რედ.), არ გებადებათ ასეთი შეკითხვა? რატომ უპირისპირდებიან ყოველთვის წინასაარჩევნოდ ერთმანეთს, შემდეგ კი ჩახუტებული არიან პარლამენტში. საჯაროდ ერთმანეთს მტერს ეძახიან, შემდეგ კი ეხუტებიან. გატყუებენ, ჩემო კარგებო, გატყუებენ“, - განაცხადა ჯამბურიამ.

მორიგი კითხვა წამყვანმა ზურაბ ჭიაბერაშვილს დაუსვა: თუ „ევროპულ საქართველოს“ მთავრობის ერთპიროვნულად ჩამოყალიბების შესაძლებლობა ექნება, ამ შემთხვევაში ის მაინც გაუზიარებს ძალაუფლებას სხვა პოლიტიკურ ჯგუფებს?

 „ქვეყნის მოსახლეობის 75% ამბობს, რომ მომავალი მთავრობა იქნება კოალიციური. აქედან გამომდინარე, ჩვენი პრინციპული მიდგომაა ზუსტად ის, რომ დავეთანხმოთ ჩვენი მოქალაქეების უდიდეს ნაწილს. რა თქმა უნდა, პოლიტიკურმა პარტიებმა, „ქართული ოცნების“ და „პატრიოტთა ალიანსის“ გარდა, უნდა გამონახონ საერთო ენა იმისათვის, რომ ჩამოყალიბდეს პროფესიონალებისგან და პატიოსანი ადამიანებისგან დაკომპლექტებული მთავრობა, რომელიც მიიღებს ურთიერთშეთანხმებით ისეთ გადაწყვეტილებებს, რომლებიც სიკეთეს მოუტანს მოქალაქეებს და ამ ქვეყანას“, - აღნიშნა ჭიაბერაშვილმა.

75
თემები:
საქართველოს საპარლამენტო არჩევნები 2020
ვლადიმირ პუტინი

პანდემიაზე, ეკონომიკაზე, სანქციებზე პუტინი კლუბ „ვალდაის“ შეხვედრაზე სიტყვით გამოვიდა

21
(განახლებულია 20:10 23.10.2020)
რუსეთის პრეზიდენტი ვლადიმირ პუტინი სადისკუსიო კლუბ „ვალდაის“ სხდომაში ვიდეოკავშირის საშუალებით მონაწილეობს.

ვლადიმირ პუტინმა ვიდეოკავშირის მეშვეობით მონაწილეობა მიიღო სადისკუსიო კლუბ „ვალდაის“ სხდომაში. მიმდინარე წლის თემა – „პანდემიის გაკვეთილები და ახალი დღის წესრიგი: როგორ გარდავქმნათ მსოფლიო კრიზისი შესაძლებლობად მსოფლიოსთვის“.

მათზე, ვინც „რუსეთის დასუსტებას“ ელოდება

პუტინმა კომენტარი გააკეთა ზოგიერთ ქვეყანაში რუსეთის დასუსტების მოლოდინზე.

„ჩვენი ქვეყნის გაძლიერებით, იმის შემყურე, რაც მსოფლიოში, სხვა ქვეყნებში ხდება, მინდა ვუთხრა მათ, ვინც ჯერ კიდევ ელოდება რუსეთის თანდათანობით დასუსტებას: ჩვენ ამ შემთხვევაში მხოლოდ ერთი რამ გვაწუხებს: როგორმე არ გავცივდეთ თქვენ დაკრძალვაზე“.

პრეზიდენტმა ხაზი გაუსვა, რომ რუსეთი ადეკვატურად აფასებს თავის ინტელექტუალურ, ტერიტორიულ, ეკონომიკურ და სამხედრო შესაძლებლობებს და პოტენციალს.

პანდემიაზე

„კოვიდ-19“-ის პანდემიაზე საუბრისას პუტინმა აღნიშნა, რომ კორონავირუსს უკან არ დაუხევია, მსოფლიო კი „ტექტონური ძვრების“ ზღურბლზე დგას ყველა სფეროში.

„კორონავირუსის პანდემიამ სერიოზულად შეცვალა საზოგადოებრივი, საქმიანი, საერთაშორისო ცხოვრება. მეტსაც გეტყვით, თითოეული ადამიანის ყოველდღიური ჩვეული ყოფა“.

პუტინმა ხაზი გაუსვა, რომ სიამაყეს გრძნობს რუსეთის მოქალაქეთა და მათი მზადყოფნის გამო, დახმარება აღმოუჩინონ ერთმანეთს, უპირველეს ყოვლისა, ექიმებისა და მედიცინის მუშაკების გამო.

„პანდემიამ ადამიანის ცხოვრების სიმყიფე შეგვახსენა. ძნელად წარმოსადგენი იყო, რომ ტექნოლოგიურად განვითარებულ ჩვენს XXI საუკუნეში ყველაზე შეძლებულ ქვეყნებშიც კი ადამიანი დაუცველი აღმოჩნდებოდა, ერთი შეხედვით, არც ისე ფატალური ინფექციის წინაშე“.

პრეზიდენტმა განაცხადა, რომ საერთაშორისო საზოგადოებრიობას კორონავირუსთან ბრძოლაში ყველაფერი არ გაუკეთებია, არის ხელიდან გაშვებული შესაძლებლობები.

ახალი შეზღუდვების დაწესების შესაძლებლობაზე

პუტინის თქმით, დღეს არ არსებობს პანდემიის გამო შეზღუდვების დაწესების აუცილებლობა, მათ შორის იმიტომაც, რომ „მედიცინამ ეფექტურად იმუშავა“. მან აღნიშნა, რომ შექმნილია საწოლების რეზერვები საავადმყოფოებში, გაჩნდა წამლები, „მედიკოსებს უკვე ესმით და იციან, რა უნდა გააკეთონ“.

სახელმწიფოს მეთაურმა აღნიშნა, რომ შვედეთს კორონავირუსის გამო შეზღუდვები არ დაუწესებია, მაგრამ შედეგად მათ ეკონომიკური ვარდნა განიცადეს.

ახლა მაკროეკონომიკური მაჩვენებლები რუსეთში მისაღებია, ეკონომიკა აღდგენის გზაზეა, დასძინა პრეზიდენტმა.

სამოქალაქო საზოგადოებაზე

რუსეთის განვითარებაში გადამწყვეტ როლს შეასრულებს მოქალაქეთა ხმები, ხაზი გაუსვა პუტინმა. როგორც მან აღნიშნა, რუსების აზრი უნდა იყოს გადამწყვეტი, სხვადასხვა საზოგადოებრივი ძალის კონსტრუქციული განაცხადი კი – რეალიზებული.

სახელმწიფოების დამოუკიდებლობაზე

სახელმწიფო მოწყობაზე საუბრისას პრეზიდენტმა აღნიშნა, რომ ვიღაცის მაგალითის ბრმად გადმოღება არასწორია.

„ჩვენ ვხედავთ, როგორ ფუნქციონირებენ დემოკრატიის ასეთი შემოტანილი მოდელები. ეს უბრალოდ ღრუბელია, ფიქციაა, როგორც წესი, ფიქცია, მოკლებული შიდა შინაარსს, სუვერენიტეტის მსგავსიც კი. ხალხს იქ, სადაც მსგავსი სქემების რეალიზება მიმდინარეობს, რეალურად არაფერს ეკითხებიან, შესაბამისი ხელმძღვანელები კი ვასალებზე მეტი უფლებით არ სარგებლობენ. ვასალის ნაცვლად კი, როგორც ცნობილია, ყველაფერს ბატონი წყვეტს“.

მისი სიტყვებით, არა აქვს მნიშვნელობა, რა ჰქვია პოლიტიკურ წყობას, რომელიც ყოველ ქვეყანაში განსხვავებულია, აქვს საკუთარი პოლიტიკური კულტურა, ტრადიციები, საკუთარი შეხედულება განვითარებაზე.

„დაისმის კითხვა: რა არის ძლიერი სახელმწიფო? რა წარმოადგენს მის ძალას? რასაკვირველია, არა სამართალდამცველი ორგანოების ტოტალური კონტროლი ან სისასტიკე, არც კერძო ინიციატივის ჩახშობა ან სამოქალაქო აქტივობის შელახვა, არც შეიარაღებული ძალებისა და თავდაცვითი პოტენციალის ძლევამოსილება. თუმცა, ვფიქრობ, გესმით, რამდენად მნიშვნელოვანია ეს შემადგენელი რუსეთისთვის გეოგრაფიული, გეოპოლიტიკური გამოწვევების მთელი კომპლექსის თვალსაზრისით. და, რასაკვირველია, ჩვენი, როგორც გაეროს უშიშროების საბჭოს მუდმივი წევრის ისტორიული პასუხისმგებლობის თვალსაზრისით გლობალური სტაბილურობის უზრუნველსაყოფად. და ამის მიუხედავად, დარწმუნებული ვარ, რომ სახელმწიფოს სიძლიერეს, უპირველეს ყოვლისა, მის მიმართ მოქალაქეთა ნდობა წარმოადგენს. აი, რა არის სახელმწიფოს სიძლიერის საწინდარი“.

პუტინმა ხაზი გაუსვა, რომ ძალაუფლების წყარო – ადამიანები არიან, ეს გამოიხატება „არჩეული ხელისუფლებისთვის ფართო უფლებამოსილებების დელეგირების მზადყოფნით“, როდესაც სახელმწიფო მათთვის არის მათივე წარმომადგენლების გუნდი, რომელსაც მკაცრად უნდა მოსთხოვო საქმის კეთება.

მსოფლიოში ცვალებად როლებზე

პრეზიდენტმა აღნიშნა, რომ დღეს აშშ-ს უკვე გაუჭირდება, პრეტენზია ჰქონდეს განსაკუთრებულ როლზე, და დასვა კითხვა, სჭირდება თუ არა ეს თავად აშშ-ს.

„თავისი ეკონომიკური წონითა და პოლიტიკური გავლენით აქტიურად მიემართება სუპერსახელმწიფოს პოზიციისკენ ჩინეთი. ამავე მიმართულებით მოძრაობს გერმანია“.

ამავდროულად, დასძინა მან, შესამჩნევად გარდაიქმნა დიდი ბრიტანეთისა და საფრანგეთის როლი მსოფლიო საქმეებში, სერიოზულად გაძლიერდნენ ისეთი სახელმწიფოები, როგორებიც არიან ბრაზილია და სამხრეთ აფრიკის რესპუბლიკა.

პრეზიდენტმა სახელმწიფოებს მოუწოდა, სამართლიანობა შეინარჩუნონ სახელმწიფოთაშორის ურთიერთობებში კორონავირუსის პანდემიის პირობებში და უარი თქვან ორმაგი სტანდარტების პოლიტიკაზე.

„ბევრ სხვა ქვეყანას, რომელიც დაზარალდა კორონავირუსული ინფექციისგან, სჭირდება არა ის დახმარება, რომელიც შეიძლება გვერდიდან მიიღოს, არამედ უბრალოდ შეზღუდვების მოხსნა, თუნდაც ჰუმანიტარულ სფეროში, მედიკამენტების მიწოდების, საკრედიტო რესურსების, მოწყობილობის, ტექნოლოგიების გაცვლის სფეროში. მაგრამ არადა არ გააუქმეს შეზღუდვები, რასაც ხსნიან რაღაც მოსაზრებებით, რომლებსაც საერთო არაფერი აქვს ჰუმანიტარულ შემადგენელთან. თუმცა ამავდროულად ყველა ჰუმანიზმზე საუბრობს“.

შეიარაღების კონტროლზე

შეიარაღების კონტროლზე საუბრისას პუტინმა აღნიშნა, რომ ამ სფეროში შეზღუდვების გარეშე მსოფლიოს მომავალი არ აქვს. მან დასძინა, რომ ვაშინგტონი ნელ-ნელა გადის მსგავსი შეთანხმებებიდან.

„ყველას კარგად მოეხსენება – რაკეტსაწინააღმდეგო თავდაცვის სისტემიდან, შემდეგ მცირე და საშუალო სიშორის რაკეტების შესახებ შეთანხმებიდან, შემდეგ „ღია ცის“ შესახებ შეთანხმებიდან გასვლა, მართალია, ჯერ არ გასულა, მაგრამ აშშ-ში განაცხადეს, რომ ამ შეთანხმებიდან გასვლის პროცედურა წამოიწყეს. რატომ? რის საფუძველზე? არც ხსნიან – რატომ, უბრალოდ არ ხსნიან“.

პრეზიდენტმა აღნიშნა, რომ მოსკოვი არ არის სტრატეგიული შემტევი შეიარაღების შემცირების შესახებ შეთანხმებაში ჩინეთის მონაწილეობის წინააღმდეგი, მაგრამ ვაშინგტონმა თავად უნდა აწარმოოს დიალოგი პეკინთან და არ გადააბაროს ეს რუსეთს.

პუტინმა მხარი დაუჭირა ასევე ამ შეთანხმებაში ყველა ბირთვული სახელმწიფოს ჩართვას.

„ევროპელები გვეუბნებიან – გავიდეს (აშშ, - რედ.), თქვენ კი ნუ გახვალთ. მე ვეუბნები: თქვენ ხომ ყველანი ნატოს წევრები ხართ, ე.ი. თქვენ იფრენთ, გადასცემთ ამერიკელებს ინფორმაციას, ჩვენ კი ამას ვერ გავაკეთებთ, რადგან ამ შეთანხმებაში დავრჩებით. ამიტომ, მოდით, ერთმანეთს პატიოსნად ველაპარაკოთ. <...> მაგრამ სინამდვილეში მე ასე მესმის, რომ აშშ-ის ევროპელ პარტნიორებს უნდათ – აშშ ამ შეთანხმებაში დარჩეს“.

ყარაბაღის ვითარებაზე

დისკუსიისას მონაწილეებმა მთიან ყარაბაღში სიტუაციის გამწვავების თემა წამოჭრეს. პრეზიდენტმა ხაზი გაუსვა, რომ კონფლიქტის ესკალაციის მომენტიდან თითოეულ მხარეს დაიღუპა უკვე 2 ათასზე მეტი ადამიანი, მსხვერპლის საერთო რაოდენობა 5 ათასს აღწევს.

მან მიუთითა, რომ მრავალი წლის განმავლობაში რუსეთი ამ კრიზისის მოგვარების სხვადასხვა ვარიანტს სთავაზობდა მხარეებს, რათა მშვიდობა ხანგრძლივი დროით დამყარებულიყო. პრეზიდენტის სიტყვებით, ეს პოზიციების დასაახლოებლად დაძაბული სამუშაო იყო.

„ცოტაც და გადაჭრის გზას ვიპოვიდით. სამწუხაროდ, ეს არ მოხდა და დღეს გვაქვს კონფლიქტი“, – განაცხადა პუტინმა.

პუტინმა ხაზი გაუსვა, რომ რუსეთი და აზერბაიჯანი – თანასწორი პარტნიორები არიან, რომლებთანაც მოსკოვს სრულფასოვანი ურთიერთობების დამყარება სურს.

სახელმწიფოს მეთაურმა აღნიშნა ასევე, რომ ის ისურვებდა კომპრომისის გამონახვას მთიანი ყარაბაღის საკითხზე. პრეზიდენტის თქმით, ის დღეში რამდენჯერმე ესაუბრება ტელეფონით აზერბაიჯანის პრეზიდენტ ილჰამ ალიევსა და სომხეთის პრემიერ ნიკოლ ფაშინიანს.

ნავალნის შესახებ

ნავალნის შესახებ დასმულ კითხვას პუტინმა უპასუხა, რომ რუსეთი მზადაა მომხდარი გამოიძიოს, მაგრამ ამისათვის საჭიროა დასტური, რომ ის მოწამლეს, „ასეთ ინფორმაციას კი არ გვაწვდიან“.

პრეზიდენტმა აღნიშნა, რომ გენპროკურატურას დაავალა სამკურნალოდ პაციენტის საზღვარგარეთ გამგზავრების შესაძლებლობის შემოწმება, სისხლის სამართლის საქმის ფარგლებში არსებული შეზღუდვების გათვალისწინებით, მისი მეუღლის მომართვისთანავე.

„მეტიც, ერთ-ერთ ევროპელ ლიდერს საუბრისას შევთავაზე, რომ ჩვენი სპეციალისტები ჩავიდოდნენ გერმანიაში ფრანგ, გერმანელ, შვედ სპეციალისტებთან ერთად, ადგილზე იმუშავებდნენ, მიიღებდნენ რაღაც მასალას. და ეს მასალები გახდებოდა სისხლის სამართლის საქმის აღძვრის საფუძველი, თუ ეს მართლაც კრიმინალური მოვლენა იყო. მაგრამ არაფერს იძლევიან“.

პუტინმა დასძინა ასევე, რომ არსებობს ნავალნის ორგანიზმში „ნოვიჩოკის“ კვალის აღმოჩენის შესახებ ცნობების ჭეშმარიტებაში ეჭვის შეტანის საფუძველი.

„თქვეს, რომ იპოვეს „ნოვიჩოკის“ კვალი. შემდეგ ეს ყველაფერი გადაეცა ქიმიური იარაღის აკრძალვის ორგანიზაციას <…>, და უცებ გვეუბნებიან: „ეს არ არის „ნოვიჩოკი“, ეს რაღაც სხვა არის. <…> ბოლოს და ბოლოს, „ნოვიჩოკია“ თუ არ არის „ნოვიჩოკი“? თავდაპირველი ნათქვამი უკვე ეჭვქვეშ დგება“, – აღნიშნა პრეზიდენტმა.

საკონსტიტუციო ცვლილებების შესახებ

რუსეთის კონსტიტუციაში შეტანილ ცვლილებებზე საუბრისას პუტინმა მიუთითა, რომ ისინი ქვეყნის განვითარებისკენაა მიმართული.

„ცვლილებები კონსტიტუციაში, რომლებიც ახლა ვახსენეთ, მიმართულია არა მარტო იმისკენ, რომ სახელმწიფოს მოქმედ მეთაურს მიეცეს უფლება, კენჭი იყაროს 2024 წელს ან კიდევ უფრო გვიან. ისინი გამიზნულია, უმთავრესად, იმისკენ, რომ განმტკიცდეს რუსეთის ფედერაციის სუვერენიტეტი, შეიქმნას ფუნდამენტური საკონსტიტუციო ბაზა ეკონომიკის, სოციალური სფეროს გასავითარებლად და ჩვენი სუვერენიტეტის განსამტკიცებლად. და მე იმედი მაქვს, რომ ეს ყველაფერი იმუშავებს“.

გარემოს დაცვაზე

პრეზიდენტმა აღნიშნა, რომ დღეს საჭიროა უსაზღვრო მოხმარებაზე უარის განხილვა გონივრული, სამყოფი რესურსების სასარგებლოდ.

„თუ გვინდა შევუნარჩუნოთ ჩვენი საერთო სახლი მომავალ თაობებს, უნდა დავასუფთაოთ ჩვენი პლანეტა. გარემოს დაცვის თემამ დიდი ხანია და მტკიცედ დაიმკვიდრა ადგილი მსოფლიოს დღის წესრიგში“.

21
თემები:
რუსეთი დღეს
ნანიკო ხაზარაძე

„გასაყიდი გოჭი“- ნანიკო ხაზარაძის ქალიშვილმა დედა მხარზე მოიგდო - სახალისო ფოტო

0
ლილუ ნუცუბიძის და ნანიკო ხაზარაძის ერთი მხიარული დღე. ტელეწამყვანი პოზიტიურ ფოტოს საკუთარ გვერდზე აქვეყნებს. ნახეთ როგორ მოიგდო მხარზე შვილმა დედა

ნანიკო ხაზარაძე მეგობარ შვილთან ერთად გართობას არ წყვეტს. დედა-შვილს შესაშური დამოკიდებულება აქვთ და ერთმანეთის დიდი მესაიდუმლეებიც არიან. ნანიკო ხაზარაძის განცხადებით, შვილს არაფერში ზღუდავს. მხიარული ფოტო კი, ნანიკომ საკუთარ გვერდზე გამოაქვეყნა და „ფოლოვერები“ სახალისო განწყობაზე დააყენა.

View this post on Instagram

A post shared by ნანიკო (@naniko.khazaradze) on

უსაყვარლესმა გოგონამ ლილუ ნუცუბიძემ სამსახური 16 წლის ასაკში დაიწყო. ყვავილებით დაინტერესებულმა თავისუფალმა და დამოუკიდებელმა სკოლის მოსწავლემ სამსახური თბილისის ცენტრში იპოვა. ამის შესახებ ნანიკო ხაზარაძემ საკუთარ გვერდზე სულ ცოტა ხნის წინ დაწერა. „ლილუ სამსახურში“ – ამ სათაურით გამოქვეყნებულმა ფოტომ დიდი გამოხმაურება გამოიწვია. მიუხედავად იმისა, რომ ლილუს დედა უზრუნველყოფს, გოგონამ საკმაოდ თამამი გადაწყვეტილება მიიღო. ლილუ ნუცუბიძე გამყიდველად მუშაობს „ყვავილების ქარხანაში", რომელიც პეტრიაშვილის ქუჩის დასაწყისშია.

View this post on Instagram

@eeeelilu

A post shared by ნანიკო (@naniko.khazaradze) on

საზოგადოებაში დამკვიდრებული სტერეოტიპების გამო ცნობილი სახეების შვილებს სოციუმში თავის დამკვიდრება უჭირთ. ეს სტერეოტიპი ნანიკო ხაზარაძეს და მის ლაღ ქალიშვილს არ ეხებათ. წარმატებული ტელეწამყვანის თქმით, ერთადერთ ქალიშვილს არასდროს არაფერს უკრძალავდა. მიუხედავად იმისა, რომ ნანიკო და ლილუს მამა ძალიან მალე დაშორდნენ, ნანიკომ ყველა ძალა მოიკრიბა და ცხოვრება შვილთან ერთად ახალი ფურცლიდან დაიწყო. ლილუ და ნანიკო, ფაქტობრივად, ერთად გაიზარდნენ. ტელეწამყვანსა და მის ქალიშვილს საოცარი მეგობრობა აკავშირებთ. ლილუ სკოლის მოსწავლეა, თუმცა დედა დამოუკიდებლობას არ უშლის.

„გასაყიდი გოჭი“,- ასე დაასათაურა უახლესი ფოტო ნანიკომ. „ვახ, რა ჯანზეა ლილუ!“; „ორი ერთნაირი. ღმერთმა დალოცა თქვენი დედაშვილობა...“; „რა საყვარლად ჰყავხარ მოგდებული...“- წერენ ნანიკოს მეგობრები.

0
თემები:
სელებრითების ცხოვრება