თბილისი, 6 იანვარი - Sputnik. სამების საკათედრო ტაძარში შობის ბრწყინვალე დღესასწაულისთვის ემზადებიან, იუწყება ტელეკომპანია Imedi.
საქართველოს მართლმადიდებელი მოსახლეობა ორშაბათს, 7 იანვარს ქრისტეს შობას — ერთ-ერთ უდიდეს ქრისტიანულ დღესასწაულს იზეიმებს.
საზეიმო წირვა ქვეყნის მასშტაბით მოქმედ ყველა ეკლესია-მონასტერში აღევლინება. სამებაში საკვირაო წირვას საქართველოს პატრიარქის ილია მეორის მოსაყდრე მიტროპოლიტი შიო მუჯირი აღავლენს.
ქრისტეშობის ლიტურგია დღეს 23:00 საათზე დაიწყება და მას საქართველოს პატრიარქი მღვდელმთავრებთან ერთად ჩაატარებს. 23:30 საათისთვის წაიკითხავენ ტრადიციულ საშობაო ეპისტოლეს, წირვის დასრულების შემდეგ კი პატრიარქი მრევლს ქადაგებით მიმართავს.
რაც შეეხება შობის მახარობლებს, ალილოს ყოველწლიური მსვლელობა ხვალ 14:00 საათზე რესპუბლიკის მოედნიდან დაიწყება და სამების საკათედრო ტაძარში დასრულდება.
ალილოს მსვლელობის ისტორია უკვე 15 საუკუნეს ითვლის. მისი მთავარი მიზანია ქველმოქმედება — თბილისელები გადასცემენ მსვლელობის მონაწილეებს საჩუქრებს, საახალწლო ნობათსა და ფულად შემოწირულობებს, რაც შემდეგ დღეებში გაჭირვებულებს, ობოლ ბავშვებს და მოხუცებულთა სახლის ბინადრებს დაურიგდება.
