ეზუგბაია: საქართველოში კორონავირუსის არცერთი შემთხვევა არ დაფიქსირებულა
„ჯერჯერობით ჩინეთის ქალაქ უჰანიდან შემოსულ პირებზე ჩატარებული მეთვალყურეობის შედეგად დაავადების არც ერთი შემთხვევა არ დაფიქსირებულა. ეს ვირუსი ჯერჯერობით არის მხოლოდ რეგისტრირებული ჩინეთის პროვინციის ერთ-ერთ ქალაქში, უჰანში. ყველა პირი, ვინც კი ავად გახდა, თუნდაც ჩინეთის გარეთ, არის ინფიცირებული ქალაქ უჰანიდან წამოსული ინფიცირებული ადამიანებისგან. აქედან გამომდინარე, ჯერჯერობით ინფექციის კერას და გამარცელებელს წარმოადგენს ქალაქი უჰანი“, – ამბობს მარინა ეზუგბაია.
ჩინეთის ხელისუფლებამ 31 დეკემბერს ჯანდაცვის მსოფლიო ორგანიზაციას ქალაქ უჰანში დაუდგენელი ტიპის პნევმონიის აფეთქება აცნობა. სპეციალისტებმა დაადგინეს, რომ საქმე აქვთ კორონავირუსთან 2019-nCoV. დაავადება გასცდა ჩინეთის ფარგლებს. დასნებოვნების შემთხვევები დაფიქსირდა ჰონგ-კონგში, მაკაოში, ტაივანში, ტაილანდში, იაპონიაში, სამხრეთ კორეაში, აშშ-ში, კანადაში, ვიეტნამში, სინგაპურში, ნეპალში, საფრანგეთში, ავსტრალიაში, მალაიზიაში. დაავადებულთა საერთო რაოდენობამ ჩინეთის მატერიკულ ნაწილში 2744 კაცს მიაღწია, რომელთაგან 80 გარდაიცვალა.
