თბილისი, 24 მაისი — Sputnik. „Sputnik. მნენიას“ გამოკითხვის მონაცემებით, გამოკითხული ევროპელების თითქმის ნახევარი — 49% მიიჩნევს, რომ თურქეთი ევროკავშირში ვერასდროს შევა და თუ მაინც გახდება მისი წევრი, ეს 10 ან უფრო მეტი წლის შემდეგ მოხდება. ამ მოსაზრებას ემხრობა გერმანელების 58%, ფრანგების 55% და ბრიტანელების 33%. მონაცემები გამოქვეყნდა კვლევის შედეგების საფუძველზე, რომელიც საერთაშორისო საინფორმაციო სააგენტოსა და რადიო Sputnik-ის დაკვეთით ფრანგულმა კვლევითმა კომპანია Ifop-მა და ბრიტანულმა კომპანია Populus-მა ჩაატარეს.
კითხვაზე „როდის გახდება თურქეთი ევროკავშირის წევრი“, გამოკითხვაში მონაწილე ფრანგების 17%-მა, გერმანელების 27%-მა და ბრიტანელების 38%-მა უპასუხა, რომ თურქეთი ევროკავშირის წევრი ქვეყანა უახლოეს 10 წელიწადში გახდება. კითხვაზე პასუხი ვერ გასცა დიდი ბრიტანეთის მოსახლეობის 29%-მა, საფრანგეთის 28%-მა და გერმანიის მოსახლეობის 15%-მა.
გამოკითხვა დიდ ბრიტანეთში კვლევითმა კომპანია Populus-მა 2016 წლის 15-21 აპრილის პერიოდში ჩაატარა. საფრანგეთსა და გერმანიაში კი ფრანგულმა კვლევითმა კომპანია Ifop-მა 2016 წლის 14-18 აპრილის პერიოდში. გამოკითხვაში მონაწილეობა მიიღო დიდი ბრიტანეთის (1045), გერმანიისა (989) და საფრანგეთის (1008) მოსახლეობამ. შერჩეული რესპონდენტები მოსახლეობას სქესის, ასაკისა და გეოგრაფიის მიხედვით ასახავენ.
ცნობა პროექტ „Sputnik.მნენიას“ შესახებ:
ეს არის საზოგადოებრივი აზრის შემსწავლელი საერთაშორისო პროექტი, რომელიც 2015 წლის იანვარში დაიწყო. პროექტის პარტნიორები არიან ცნობილი კვლევითი კომპანიები Populus-ი, Ifop-ი და Forsa. „Sputnik.მნენიას“ პროექტის ფარგლებში ევროპის ქვეყნებსა და აშშ–ში რეგულარულად ტარდება გამოკითხვები აქტუალურ პოლიტიკურ თუ სოციალურ საკითხებთან დაკავშირებით.
Sputnik-ი (sputniknews.com) — ეს არის საერთაშორისო ახალი ამბების სააგენტო და რადიო მულტიმედიური საინფორმაციო ჰაბებით ათობით ქვეყანაში. „სპუტნიკი“ მოიცავს ვებ-გვერდებს, ანალოგურ და ციფრულ რადიომაუწყებლობას, მობილურ პროგრამებსა და გვერდებს სოციალურ ქსელებში.
