ჩიჩილაკი

ახალ წელს მოსაყოლი სახალისო ამბები

1274
(განახლებულია 15:44 05.01.2021)
ახალი წელი დროა, როცა წლის განმავლობაში დაგროვილ სახალისო ამბებს, ან იმ ისტორიებს ვიხსენებთ, რომელთა მოყოლა არასოდეს გვბეზრდება. ამ საახალწლოდ გადავწყვიტეთ, რომ ჩვენს რესპონდენტებს ვთხოვოთ ერთი ასეთი ამბავი გაიხსენონ.

„სად ხარ, გამვლელო, შობა–ახალ წელს გილოცავ!“

მსახიობი და პოეტი ზაზა მაღალაშვილი:

ზაზა მაღალაშვილი
ზაზა მაღალაშვილი

სიცოცხლეს ვფიცავ, ნამდვილ ამბავს გიყვებით, რომელიც წელს, ძველი სტილით შობა დღეს, 25 დეკემბერს მოხდა. ღამის ორის ნახევარია და პოლიცია მირეკავს - მოქალაქე დაგვიკავშირდა, რომ თქვენი მანქანის გვერდითი მინა ბოლომდეა ჩაწეულიო. გავოგნდი, უცებ გამახსენდა, რომ იქვე, „ტორპედოზე“ მეწყო ჩემთვის ძვირფასი ნივთები – ზამთარ-ზაფხულის სათვალეები, სმუს-ჯაზის 20 დისკი და ტყავის ხელთათმანები, რომელიც აწ გარდაცვლილმა ჩემმა მეგობარმა მაჩუქა. გავცოცხლდი და უცებ გავთბი. მინდა მადლობა გადავუხადო და ულამაზესი ახალი წელი ვუსურვო იმ "გამვლელს", რომლის სახელი და გვარი არაფრით არ მითხრა პოლიციამ – არ გვაქვს უფლებაო. წარმოიდგინეთ, იმ შუაღამეს გაყინულ ქალაქში ქუჩაში ჩემს მანქანასთან დგას კაცი, პოლიციაში რეკავს და მის მოსვლამდე ფეხს არ იცვლის. ასეთი რამ პატარა სასწაულია და ძალიან დასაფასებელია...

ერთადერთი ნათურა, რომელიც გულს ათბობდა

მუსიკოსი ირაკლი ახალაია:

ირაკლი ახალაია
photo: courtesy of Irakli Akhalaia
ირაკლი ახალაია

დაახლოებით მეშვიდე-მერვე კლასში ვარ, უშუქობის წლები იყო. მაშინ ახალი წელი ორმაგად გვიხაროდა. პირველი ის, რომ ახალი წელი იყო და მეორე, რაც არანაკლებ გვიხაროდა - რამდენიმე საათით შუქი მოდიოდა. ის ერთადერთი გაჩახჩახებული ნათურა არა მარტო ოთახს ანათებდა, არამედ გულებსაც გვითბობდა. თოვლიც რაღაცნაირად თბილი ხდებოდა. საკრავებით შეიარაღებული მე და ჩემი დაიკო ახალი წლის დადგომამდე ვესტუმრებოდით ხოლმე მეზობლებს, სადაც თანატოლები გვეგულებოდა. ჯერ იმ ოჯახს ვამხიარულებდით და მერე ჩვენს თანატოლებს ჩვენთან, სახლში წამოვიყვანდით. ასეთი რაღაც მისტიკური სიხარული და ბედნიერება დილამდე გრძელდებოდა. მართლა საოცარი იყო, მენატრება ის წლები...

საახალწლო გადაღება ცნობილ მხატვართან, ანუ „ჯერ გარდაფხაძის დედა მოვ...ნ, მერე თქვენი ცეკასი“

კინორეჟისორი, კინოაკადემიის წევრი თენგიზ მალანია:

თენგიზ მალანია
თენგიზ მალანია

ეს ამბავი ახალი წლის დადგომამდე მოხდა. იმ დროს საქართველოს სატელევიზიო ფილმების სტუდია სულ რაღაც ერთი წლის ჩამოყალიბებულია. მე ყველაზე ახალგაზრდა თანამშრომელი ვარ, 19 წლის და უკვე რეჟისორის ასისტენტი... ამ ასაკში იმ დროს და თანაც ერთადერთ ტელევიზიაში მოხვედრა ნამდვილი საოცრება იყო. ჰოდა, ბედნიერებისგან კი არ დავდივარ, დავფრინავ! სტუდიის სამხატვრო ხელმძღვანელი, ბატონი რეზო ჩხეიძე თავის კაბინეტში მიბარებს. ვიცი, არაფერი დამიშავებია, მაგრამ კომუნისტური დროა და გულმა რეჩხი მიყო. ჯერ კიდევ შორსაა ის დრო, როდესაც ბატონი რეზო ჩემი უფროსი მეგობარი, მე კი მისი კოლეგა გავხდები. მის სამუშაო კაბინეტში შესულს სტუდიის სამხატვრო ხელმძღვანელი პატარა ბიჭს ფეხზე წამომიდგა, ხელი გულთბილად ჩამომართვა და ჩემი მღელვარებაც სადღაც გაქრა. 

- თენგიზ, ტელევიზიისა და რადიომაუწყებლობის სახელმწიფო კომიტეტის თავმჯდომარესთან შეთანხმებით ტელეფილმების სტუდიამ გადაწყვიტა, რომ ქვეყნის საუკეთესო და გამოჩენილ მოღვაწეებზე მოკლე კინოსიუჟეტები მომზადდეს, რომლებიც საახალწლოდ ეთერით გადაიცემა. შენ ჩვენი სასიქადულო მხატვარი ელენე ახვლედიანი „გერგო". დარწმუნებული ვარ, რომ თავს გაართმევ და საინტერესო სიუჟეტს გადაიღებ.

დათქმულ დროს ჩვენი გადამღები ჯგუფის ავტობუსი გაჩერდა ქაშუეთის ეკლესიის ჩასახვევში, სადაც ქალბატონი ელენე ახვლედიანი ცხოვრობდა და იქვე არსებულ სამხატვრო სახელოსნოში ქმნიდა თავის შედევრებს. ვიდრე ბიჭები მაშინდელ უზარმაზარ კინოგადასაღებ და ხმის ჩამწერ აპარატურას ამოათრევდნენ, მეორე სართულზე ავირბინე და სახელოსნოს კარებზე მოკრძალებით დავაკაკუნე. კარი თავად მასპინძელმა, მაღალმა, ჭაღარაშერეულმა, სანდომიანმა, მაგრამ მკაცრი გამომეტყველების ქალბატონმა გამიღო. წამით სუნთქვა შემეკრა – ჩემ წინ ცოცხალი ლეგენდა, მხატვარი ელენე ახვლედიანი იდგა. უზარმაზარ სახელოსნოში შემიძღვა, სავარძელში მოკალათდა, ფეხი ფეხზე შემოიდო და თავისი ბოხი ხმით მითხრა: „გისმენთ, ყმაწვილო!"

დაბნეულობის გასაფანტად და ჩემი მისიისთვის მეტი მნიშვნელობის შეძენის მიზნით თავი გამოვიდე და იმდროინდელი ეპოქისთვის დამახასიათებელი ყველაზე იდიოტური ფრაზეოლოგია მოვიშველიე: ქალბატონო ელენე, ჩვენ დავალებული გვაქვს თქვენზე საახალწლო კინოსიუჟეტი შევქმნათ, რომელიც მომავალ თაობებსაც ექნებათ საამაყოდ. ეს დავალება საქართველოს ტელევიზიისა და რადიომაუწყებლობის სახელმწიფო კომიტეტის თავმჯდომარისგან, საქართველოს კომუნისტური პარტიის ცენტრალური კომიტეტის წევრის, უმაღლესი საბჭოს დეპუტატისგან, ამხანაგ კარლო გარდაფხაძისგან მოდის–მეთქი.

ცოცხალი ლეგენდის წინ ვზივარ და ველოდები მის აღფრთოვანებას. მან კი, არც აცია, არც აცხელა და მეუბნება – ჯერ გარდაფხაძის დედა მოვ...ნ, მერე თქვენი ცეკასი და ბოლოს თქვენი უმაღლესი საბჭოც თან მივაყოლეო!

წარმოიდგინეთ, რა დამემართებოდა! საბედნიეროდ, ქალბატონ ელენეს იმ ისტორიული კინოსიუჟეტის გადაღებაზე უარი არ უთქვამს...

რატომ სცემეს კახელებმა თბილისელი მხატვარი?

მხატვარი ალექსანდრე ბუზარიაშვილი:

ალექსანდრე ბუზარიაშვილი
ალექსანდრე ბუზარიაშვილი

ახალ წელს მოსაყოლ ამბებზე სულ სტუდენტობა მახსენდება ხოლმე... ერთხელ, სტუდენტობის დროს კახეთში მეგობრის ქორწილში წავიყვანე ძმაკაცი, რომელიც ახლა ცნობილი მხატვარია. შუა სუფრის დროს ეს ჩემი ძმაკაცი მალ-მალე გავარდება ხოლმე და ცეკვას იწყებს. მერე უცებ სადღაც დაიკარგა. დავუწყე ძებნა, გარეთ გამოვედი და რას ვხედავ – ეს ჩემი ძმაკაცი მოუქცევიათ შუაში კახელებს და ცემას უპირებენ. ძლივს გავაგდებინე ხელიდან. თურმე საქმე იმაში იყო, რომ ყოველი ცეკვის დროს რამდენი ხელებს გაშლიდა, მუსიკოსებს ფულის ნაცვლად სტუდბილეთს უჩვენებდა. ეს რამდენჯერმე გამეორდა. მოკლედ, გააგიჟა კახელები, რომლებმაც მისი ქცევა დაცინვად ჩათვალეს.

„ბავშვები არ შემიშინოთ“, ანუ შეზარხოშებული თოვლის ბაბუა

საცირკო ხელოვნების მსახიობი, სტაჟიანი თოვლის ბაბუა ოლეგ თავაძე:

ოლეგ თავაძე
ოლეგ თავაძე

შეიძლება ახალ წელს ვინმემ სურვილის შემთხვევაში სმა აირიდოს თავიდან, მაგრამ არა ქართველმა თოვლის ბაბუამ. ასე ხდება ყოველ ახალ წელს, სადაც სულ დავდივარ ხოლმე ოჯახებში, რათა ბავშვები გავახალისო. მოკლედ, „გაგანია“ 31-ია და გამოძახებაზე ვარ. ბავშვების მერე, როგორც ხდება ხოლმე, მათი მამების ხელში ვხვდები სუფრაზე. შარშანაც ასე იყო. აქ დალიე, ეს დამილიე... ჰოდა, ერთი...ორი...სამი... და ბოლო ოჯახში რომ მივედი, უკვე გადაღრეცილი ვიყავი. კარებზე ზარს ვაჭერ და ხელს ვერ ვიღებ. გამოდის მასპინძელი, მიყურებს გაოგნებული და თითი მიაქვს ტუჩებთან – სსსსუუუუ, მეუბნება. შევდივართ სამზარეულოში, იქაც დავლიე ორი ჭიქა და მასპინძელი მეუბნება – ძალიან გთხოვ, დილით მოდი რა, ბავშვები არ შემიშინოს თოვლის ბაბუამო. მოკლედ, წელს სხვანაირად მოვიქცევი, ახლა უკვე ვცდილობ აღარ დავლიო, გამოსწორდა კუჭკუჭი.

გაკვეთილების ნაცვლად იხვებზე ნადირობა

რაჭის მოსწავლე ახალგაზრდობის ცენტრის ხელმძღვანელი გურამ გორდეზიანი:

გურამ გორდეზიანი
გურამ გორდეზიანი

რადგან ახალი წელი ყოველთვის ბავშვობას გვახსენებს, სკოლისდროინდელ ამბავს გავიხსენებ. სკოლაში ძალიან განვიცდიდი იმ ამბავს, რომ მასწავლებლის შვილი ვიყავი, რადგან ეს განსაკუთრებულ პასუხისმგებლობას მაიძულებდა. ერთხელ ჩემმა მათემატიკის მასწავლებელმა, ცხონებულმა ვენერა კიკვიძემ დავალება შემიმოწმა და როცა ვერ ნახა მისთვის მოსაწონი რამ, დამუნათება დამიწყო – რა არის ბიჭო ეს? მასწავლებლის შვილი მაინც არ იყო! მე, გაჯავრებულმა იმით, რომ მტკივნეულ ადგილზე დამაბიჯეს, ცივად მივახალე:

- ვერ მოვასწარი მასწ, იხვებზე ვიყავი სანადიროდ.

რა მითხრა თუ იცით? შენ, ჩემო გურამ, მატყუარაც ყოფილხარო. რატომ–მეთქი, შევეკითხე. აბა, როდის იყო ბატი იხვზე ნადირობდაო. მის პასუხზე მთელი კლასი ხარხარებდა და ამ ამბავს დღემდე ვიხსენებთ.

გურული კაცი მარშუტკაზე და გურულად დალოცვა

ოპერისა და ბალეტის თეატრის ორკესტრის მუსიკოსი გოდერძი გარაყანიძე:

მარცხნიდან: სიმფონიური ორკესტრის წევრი ვაჟა ცენტერაძე, დირიჟორი რევაზ ტაკიძე და ორკესტრის ვალტორნისტი და თეატრის ბიბლიოთეკარი გოდერძი გარაყანიძე
თ. გოგნიაშვილი.
მარცხნიდან: სიმფონიური ორკესტრის წევრი ვაჟა ცენტერაძე, დირიჟორი რევაზ ტაკიძე და ორკესტრის ვალტორნისტი და თეატრის ბიბლიოთეკარი გოდერძი გარაყანიძე

რადგან გურულებზე ძალიან ბევრი ანეკდოტია გავრცელებული და სხვებისგან განსხვავებით ჩვენ „მაი ანბავი არ გვწყინს“, მოგიყვებით ერთს: გურული კაცი გამოექცა თოხს და ყანას და თბილისში "მარშრუტკაზე" დაიწყო მუშაობა მეიდანი–ორთაჭალის რეისზე. ორთაჭალაში არის ე.წ. „ჩულქების ფაბრიკა“ – ხალხში ასე ეძახდნენ.

ერთხელ, როცა მიუახლოვდა ამ ფაბრიკას, ერთობ გადაპრანჭული ქალბატონი მგზავრი წამოიწია სავარძლიდან და ეუბნება:

- ბატონო, „ჩულქებთან” რომ მიხვალთ, შეჩერდით.

გურული მძღოლი კი პასუხობს:

- ქალბატონო, ჩულქებთან რომ მივალ, მერე რაღა გამაჩერებს?!

გურულმა ქალებმა რომ წყევლა იციან, ჩვენს მტერს, მტრისთვის სათქმელი „დასალოცი“ სიტყვებიც მახსენდება, გურიაში იციან თქმა: ვინცხამ რაცხა დაგვიშავოს, ილანჯუხმა მოსტეხა კისერი და იმფერი დამართოდეს, ორი ორს ეკითხებოდესო! რაც შეეხება საახალწლო დალოცვას, ბებიაჩემმა ასე იცოდა: ღმერთმა არ მოგაკლოთ მშვიდობა და ერთი ინჯრა დღეშიო!..

1274
ექიმი და სმენადაქვეითებული პაციენტი

ამწვავებს ამინდის ცვალებადობა: ექიმმა დაასახელა დაავადებები

64
(განახლებულია 17:34 27.01.2021)
ირკვევა, რომ ამინდის ცვლილებაზე ფაქტობრივად ყველა ადამიანის ორგანიზმი რეაგირებს, თუმცა გარკვეული დაავადებების მქონეებს გართულებები ეწყებათ

თბილისი, 27 იანვარი — Sputnik. არსებობს გარკვეული დაავადებები, რომელთა არსებობის შემთხვევაში ადამიანებმა ამინდის ტემპერატურული ცვლილების დროს შესაძლოა თავი ცუდად იგრძნონ, აცხადებს თერაპევტი ლუდმილა ლაპა.

„რისკ-ჯგუფებია გულ-სისხლძარღვთა დაავადებების მქონე ადამიანები, ინფარქტ– და ასევე ინსულტ–გადატანილები, ბრონქული ასთმით, ქრონიკული ბრონქიტით, ტონზილიტით, რინიტით დაავადებულები. ყველა ეს დაავადება მწვავდება სწორედ მაშინ, როცა ამინდი იცვლება“, — თქვა ლაპამ.

მისი განმარტებით, ასეთი რამ — რეაქცია ამინდის ცვლილებაზე — ფაქტობრივად ყველა ადამიანში ხდება, თუმცა ჯანმრთელებში ეს პროცესი შეუმჩნევლად მიმდინარეობს, ხოლო ქრონიკული დაავადებების მქონე პაციენტებს სხვადასხვა გართულებები უვითარდებათ.

როგორც ლუდმილა ლაპა აცხადებს, დაავადებები ადამიანის სიხლძარღვთა სისტემის ტემპერატურის ცვალებადობაზე რეაქციის გამო მწვავდება. ასეთ დროს აუცილებელია, მიმართოთ ექიმს, რათა დანიშნულება მიიღოთ და გარკვეული თერაპიული კურსი ჩაიტაროთ. 

 

64
თემები:
ექიმი გირჩევთ
ტესტი სისხლში შაქრის შემცველობაზე

მეორე ტიპის დიაბეტის დამარცხება თავადაც შეგიძლიათ: ექიმები მარტივ გზას ასახელებენ

58
(განახლებულია 16:41 27.01.2021)
კვლევამ, რომელშიც ათასზე მეტი კაცი მონაწილოებდა, დაადგინა, რომ მეორე ტიპის დიაბეტით დაავადებულებს უკვე ექვსი თვის შემდეგ შეუძლიათ, მესამედით გაზარდონ რემისიის შანსი

თბილისი, 27 იანვარი — Sputnik. მეორე ტიპის დიაბეტით დაავადებული ადამიანები, რომლებიც თორმეტი კვირის განმავლობაში იცავენ დაბალნახშირწყლოვან დიეტას, თითქმის მესამედით ზრდიან რემისიის ალბათობას, წერს Diabetes.co.uk ტეხასის A&M უნივერსიტეტის კვლევაზე დაყრდნობით.

გავრცელებული ინფორმაციით, სამეცნიერო კვლევაში 1357-მა ადამიანმა მიიღო მონაწილეობა. მათ უმეტესობას, 47-დან 67 წლამდე ასაკში, ჭარბი წონა ან გაცხიმოვნება აწუხებდა. კვლევის მონაწილეებმა დაბალნახშირწყლოვანი დიეტა 12 კვირის განმავლობაში დაიცვეს. პაციენტებმა უარი თქვეს სახამებლის ნახშირწყლებზე, რომლებიც მაკარონსა და კარტოფილში შედის.

ექვსი თვისა და ერთი წლის თავზე სპეციალისტებმა მათი მდგომარეობა ხელახლა შეაფასეს და დაადგინეს, რომ სხვა დიეტების მიმდევრებთან შედარებით, მათ, ვინც დაბალნახშირწყლოვან დიეტას იცავს, ექვსი თვის შემდეგ დაავადების სიმპტომების შემსუბუქების ბევრად მეტი შანსი აქვთ.  

სამეცნიერო ექსპერიმენტის ავტორები აღნიშნავენ, რომ მომავალში კვლავ ჩაატარებენ არაერთ კველვას, რათა დიაბეტის რემისიაზე დაბალნახშირწყლოვანი დიეტის დადებითი გავლენაში საბოლოოდ დარწმუნდნენ.

დაბალნახშირწლოვანი დიეტის შვიდი დღის მენიუს ერთ-ერთი ვარიანტი ასე გამოიყურება:

პირველი დღე

საუზმე: ომლეტი ორი კვერცხითა და რძით, ჩაი უშაქროდ;

სადილი: საქონლის ან ხბოს ხორცის ნაჭერი, ჩაშუშული ბადრიჯანი ქინძით;

სამხარი: ჭიქა უცხიმო იოგურტი დანამატების გარეშე, სალათის ფოთოლი;

ვახშამი: მთელმარცვლოვანი ფქვილისგან მომზადებული სპაგეტი ოდნავ მოუხარშავი ქათმის მკერდით.

მეორე დღე

საუზმე: მწვანე ფანტია წიწიბურა ყველით;

სადილი: ორთქლზე მომზადებული თეთრი თევზი, კიტრის, ხახვის, ბულგარული წიწაკისა და პომიდვრის სალათი;

სამხარი: უცხიმო კეფირი, მუჭა არაქისი მარილისა და გლაზურის გარეშე;

ვახშამი: უცხიმო ხაჭო, ფორთოხალი.

მესამე დღე

საუზმე: ხაჭოს ორცხობილა, ყავა;

სადილი: ყავისფერი ბრინჯი ქათმის მკერდით;

სამხარი: ჭიქა უცხიმო იოგურტი დანამატების გარეშე;

ვახშამი: მოთუშული მწვანე ლობიო, მოხარშული კვერცხი.

მეოთხე დღე

საუზმე: წიწიბურა რძით, ჩაი;

სადილი: ქათმის ბულიონი მწვანილითა და ხორცის ნაჭრით;

სამხარი: მუჭა გარგრის ჩირი;

ვახშამი: ყველთან ერთად გამომცხვარი ბადრიჯანი.

მეხუთე დღე

საუზმე: ხაჭოს ორცხობილა, ყავა;

სადილი: ძროხის ბულიონი, გამომცხვარი ბროკოლი, საქონლის ხორცის ნაჭერი;

სამხარი: პომიდვრის წვენი, ყველის ნაჭერი;

ვახშამი: ფორთოხალი, პეკინური ლობიოსა და მწვანილის სალათი.

მეექვსე დღე

საუზმე: მწვანე წიწიბურა რძით;

სადილი: ქათმის ბულიონი მწვანილითა და ხორცის ნაჭრით;

სამხარი: გამომცხვარი ბადრიჯანი;

ვახშამი: ჩაშუშული კომბოსტო პომიდვრით.

მეშვიდე დღე

საუზმე: ომლეტი ორი კვერცხითა და რძით, ჩაი უშაქროდ;

სადილი: მოხარშული წითელი თევზი ან თევზის ბულიონი, კიტრისა და პომიდვრის სალათი;

სამხარი: გრეიფრუტი, 3 ცალი შავი ქლიავის ჩირი;

ვახშამი: უცხიმო კეფირი, ვაშლი.

58
საგარეო საქმეთა სამინისტრო

რუსეთიდან საქართველოში: ირანის საგარეო საქმეთა მინისტრს თბილისში ელოდებიან

0
საქართველოში 27-28 იანვარს, რეგიონული ტურნეს ფარგლებში, ირანის საგარეო საქმეთა მინისტრ მოჰამად ჯავად ზარიფის ვიზიტი იგეგმება

ირანის საგარეო საქმეთა მინისტრი თბილისს ერევნიდან ესტუმრება. ის უკვე იმყოფებოდა მოსკოვში, სადაც რუსეთის საგარეო საქმეთა მინისტრ სერგეი ლავროვს შეხვდა.

თავისი რეგიონული ტურნე მოჰამად ჯავად ზარიფმა აზერბაიჯანში ვიზიტით დაიწყო, დღეს კი სომხეთს ესტუმრა. ტურნეს დაწყებამდე ირანის საგარეო საქმეთა მინისტრმა განაცხადა, რომ გეგმავს ვიზიტს ქვეყნებში, რომლებთანაც მთიან ყარაბაღში კრიზისის მოგვარების საქმესა და რეგიონში მშვიდობისა და სტაბილურობის დამყარების საკითხზე შესაძლებელია თანამშრომლობა.

რაც შეეხება საქართველოს, ვიზიტისას ირანის საგარეო საქმეთა მინისტრი მოლაპარაკებებს გამართავს ქვეყნის პირველ პირებთან - პრეზიდენტ სალომე ზურაბიშვილთან და პრემიერ-მინისტრ გიორგი გახარიასთან. შეხვედრა დაიგეგმა ასევე მინისტრის ქართველ კოლეგა დავით ზალკალიანთან. თუმცა სამშაბათს გაირკვა, რომ საქართველოს საგარეო საქმეთა მინისტრს კორონავირუსი დაუდასტურდა.

რას უნდა ველოდოთ?

პოლიტოლოგ არჩილ სიხარულიძის თქმით, მოჰამად ჯავად ზარიფის საქართველოში ვიზიტი შედგება ირანსა და დასავლეთს შორის ურთიერთობის დათბობის ფონზე. პოლიტოლოგის აზრით, თეთრ სახლში ჯო ბაიდენის მოსვლით ირანისადმი დამოკიდებულება გადაიხედება.

„როგორც მოგეხსენებათ, ბაიდენმა უკვე მოუხსნა შეზღუდვები მოგზაურებს ზოგიერთი ქვეყნიდან, მათ შორის, ირანიდან. ასევე ცნობილია, რომ ტრამპი გამოვიდა ირანული შეთანხმებიდან, რაც ბევრისთვის არასასიამოვნო იყო. ჩვენ უნდა ველოდოთ, რომ ამ მიმართულებით დათბობა დაიწყება. შესაბამისად, ირანმა ეს მშვენივრად იცის და აპირებს მაქსიმალური მოგების მიღებას“, - აღნიშნა სიხარულიძემ.

პოლიტოლოგის თქმით, აქტუალური იქნება კავკასიის რეგიონული დღის წესრიგიც.

„ნათელია, რომ თურქეთს აქ ხუთეულის ლიგის, რეალურად თავისი პლატფორმის შექმნა უნდა, სადაც რუსეთის ფედერაციასთან ერთად წამყვან ძალად ჩამოყალიბდება. როგორც ჩანს, ირანსაც არ სურს ჩამორჩეს მოვლენებს და პროცესში ჩართვის სურვილი აქვს. როგორც უნდა იყოს, სამხრეთ კავკასიაში გავლენისთვის მთელი ისტორიის მანძილზე ყოველთვის იბრძოდნენ რუსეთის იმპერია, ოსმანთა იმპერია და სპარსეთის იმპერია. როგორც ჩანს, ახლა ასეთივე ფორმულაში აღმოვჩნდით“, - განაცხადა სიხარულიძემ.

პოლიტოლოგის აზრით, დასავლეთისა და ირანის ურთიერთობის დათბობა საქართველოსთვის ხელსაყრელია.

„საქართველოს შეუძლია ირანთან უფრო ღიად თანამშრომლობა იმ მიმართულებებით, რომლებიც ჩვენთვის მისაღებია - ესაა იმპორტი, ენერგეტიკული საკითხები. ანუ ყველაფერი, რამაც შეიძლება შეამციროს საქართველოზე თურქეთის, აზერბაიჯანის, რუსეთის ფედერაციის ზეწოლა. ამიტომ ეს ძალიან სასარგებლოა“, - აღნიშნა სიხარულიძემ.

სავაჭრო ურთიერთობები

კორონავირუსის პანდემიის გამო საქართველოსა და ირანს შორის სავაჭრო ბრუნვა 2020 წელს 71,2%-ით შემცირდა და 74,3 მილიონი დოლარი შეადგინა. ასეთია „საქსტატის“ ოფიციალური მონაცემები.

2019 წელს ქვეყნებს შორის სავაჭრო ბრუნვამ 187,1 მილიონი დოლარი შეადგინა. 2020 წელს საქართველოდან ირანში 29,1 მილიონი დოლარის პროდუქცია გავიდა, რაც დაახლოებით 60%-ით ნაკლებია 2019 წლის მაჩვენებელზე.

ირანიდან საქართველოში კი 76%-ით ნაკლები პროდუქცია შემოვიდა, ვიდრე 2019 წელს - სულ 45,2 მლნ დოლარის ღირებულების.

ტურიზმი

ტურიზმის ეროვნული ადმინისტრაციის მონაცემებით, 2019 წელს ირანიდან საქართველოს 141 997 ირანის მოქალაქე ესტუმრა. ერთი ვიზიტის ხარჯი დაახლოებით 600 დოლარია.

მთლიანობაში 2019 წელს ირანის მოქალაქეთა ტურისტულმა ხარჯმა შეადგინა 160,7 მილიონი ლარი.

2020 წელს საქართველოში ჩამოსულ ირანელთა რაოდენობა 88%-ით შემცირდა და 17 053 ადამიანი შეადგინა.

დიპლომატიური ურთიერთობა

საქართველომ და ირანმა დიპლომატიური ურთიერთობა 1992 წლის 15 მაისს დაამყარეს. მას შემდეგ ორმხრივი ურთიერთობა ქვეყნებს შორის აქტიურად ვითარდება პოლიტიკურ, სავაჭრო-ეკონომიკურ, საინვესტიციო, სოფლის მეურნეობის, კულტურის, განათლებისა და ტურიზმის სფეროებში.

ქვეყნებს შორის არსებობს თანამშრომლობის სხვადასხვა ფორმატი, მაგალითად, პოლიტიკური კონსულტაციების ფორმატი, რომელიც არსებითად უწყობს ხელს ორმხრივი თანამშრომლობის გაღრმავებას.

გარდა ამისა, საქართველო და ირანი თანამშრომლობენ ორი ქვეყნის საკანონმდებლო უწყებების დონეზე.

ირანში საქართველოს საგანგებო და სრულუფლებიანი ელჩის თანამდებობა 2014 წლიდან იოსებ ჩახვაშვილს უკავია. ხოლო საქართველოში ირანის დიპლომატიურ უწყებას 2013 წლიდან აბას თალები-ფარი ხელმძღვანელობს.

0