კარუსელი

კვირის ასტროპროგნოზი: სიყვარული, ფინანსები, სამუშაო 14–20 სექტემბერი

2077
(განახლებულია 12:05 14.09.2020)
როგორი იქნება ვარსკვლავებისა და პლანეტების განწყობა ამ კვირაში ზოდიაქოს ნიშნებისთვის, როგორ იმოქმედებენ ისინი ადამიანებზე, რა უნდა გავითვალისწინოთ, რომ წარმატებებს მივაღწიოთ – ყოველივე ამის შესახებ კვირის ასტროლოგიური პროგნოზიდან შეიტყობთ

პირველი და უმნიშვნელოვანესი, რაც 14–20 სექტემბრის პერიოდში უნდა გააკეთოთ, ეს ინტუიციის, საკუთარი გულის ხმის მოსმენაა. ღამის მანათობელი ჩვენს დახმარებას შეეცდება, მაგრამ არა პირდაპირ, არამედ ფარული მინიშნებებით. საჭიროა ყურადღება მივაქციოთ ამ მინიშნებებს და ვედნოთ ინტუიციას.

ვერძი

ვერძები, პირველ რიგში, უნდა გათავისუფლდეთ იმ ნივთებისგან და ადამიანებისგან, რომლებსაც თქვენთვის უსიამოვნებები მოაქვთ, რაც განწყობას გიფუჭებთ, გაშინებთ, თავდაჯერებულებას გაკარგვინებთ. ასტროლოგები გირჩევენ, ნაკლები ურთიერთობები იქონიოთ ტოქსიკურ ადამიანებთან, მოერიდოთ მათ, ვინც თქვენით მანიპულირებასა და თავისი გეგმების შესრულებას მოტყუებით ცდილობს.

ყველაზე ხელსაყრელი დღეები თქვენთვის ამ კვირაში იქნება ხუთშაბათი, პარასკევი და შაბათი. გაგიმართლებთ ფინანსურ სფეროში. თუ ინიციატივას საკუთარ ხელში აიღებთ, შესაძლოა, სიყვარულშიც მიაღწიოთ წარმატებებს. საქმეებს თავის დინებაზე ნუ გაუშვებთ, განსაკუთრებით ორშაბათსა და სამშაბათს – თქვენთვის ყველაზე არახელსაყრელ დღეებში.

ვის ირჩევენ პარტნიორად ზოდიაქოს ნიშნები>>

კურო

ვარსკვლავები მოგცემენ შანსს, რომ ცხოვრების ყველა სფეროში მიაღწიოთ წარმატებებს. გარისკვაც კი შეგიძლიათ, თუ სიტუაცია ასეთ ქმედებებს გაამართლებს. ძალზე მომგებიანი დრო იქნება, როდესაც დიდი სიმაღლეების დაპყრობაა შესაძლებელი მუშაობასა და ბიზნეს–საქმიანობაში. ვარსკვლავები თქვენ მხარეს არიან: შეიძლება ახალი პროექტების დაწყება, რთული სამუშაოს შესრულება, ძვირადღირებული ნივთების შეძენა.

რასაც შეუძლია თქვენთვის წარმატებების მიღწევაში ხელის შეშლა, ეს სიძუნწეა. ასევე ყურადღების მიქცევაა საჭირო ჯანმრთელობისთვის – მის გარეშე პროდუქტიულობის ამაღლებას ვერ შეძლებთ.

ტყუპი

თქვენთვის ამ კვირაში ყევლაზე მნიშვნელოვანი სასიყვარულო სფერო გახდება. შესაძლებელია ბედნიერების მოპოვება იმ ადამიანთან, რომელიც მოგწონთ. თუ არ გყავთ გულის რჩეული, თამამად შეგიძლიათ ადამიანების გაცნობა. შესანიშნავი დროა პაემნების, რომანტიკისთვის, ურთიერთობებისთვის როგორც რეალურ ცხოვრებაში, ისე სოციალურ ქსელებში.

მთლიანობაში კვირა მშვიდი და სტაბილური იქნება. ვარსკვლავებისა და პლანეტების ენერგია რამდენადმე შემცირდება 18 სექტემბრის შემდეგ, მაგრამ ეს წარმატებებზე ნაკლებად იმოქმედებს. ფინანსურ სფეროში ხელსაყრელია მოლაპარაკებების გამართვა, ახალი პროექტების დაწყება, ასევე იურიდიული საკითხების გადაჭრა. შეგიძლიათ შვებულების აღებაც.

თუ ქორწილს გეგმავთ: საქორწინო ჰოროსკოპი>>

კირჩხიბი

კირჩხიბებს გარემოს გამოცვლა წაგადგებათ, სამოგზაუროდ ან საქმიან მივლინებაში წასვლა. ეს დაღლისა და უარყოფითი ემოციებისგან გათავისუფლებაში დაგეხმარებათ. შესანიშნავი დროა სულიერი ძიებებისთვის.

სჯობს, უარი თქვათ დიდ ფიზიკურ დატვირთვაზე, მუშაობაზე. ახლობლებსა და საყვარელ ადამიანს თქვენგან მეტი ყურადღება დასჭირდებათ. ასტროლოგები გირჩევენ, არ შეუდგეთ საცხოვრებელთან დაკავშირებული საკითხების გადაჭრას, არ შეიძინოთ უძრავი ქონება. რთულ სიტუაციაში რჩევა ახლობელ ადამიანებს ჰკითხეთ.

ლომი

კვირის პირველ ორ დღეს ვარსკვლავები და პლანეტები თქვენთვის რთულ კომბინაციას შექმნიან. შესაძლებელია, მოაწყონ ჩხუბის, სკანდალების პროვოცირება, ორგანიზმის ტონუსის შემცირება. ასტროლოგები გირჩევენ, მეტი დაისვენოთ, ამასთან, არ ჩაიკეტოთ, გქონდეთ კონტაქტი ადამიანებთან და გაერთოთ.

კვირის ბოლო სულიერი განვითარებისთვის კარგი დროა. საინტერესო, ბრძენ და გამოკვეთილ პიროვენებებთან ურთიერთობები შთაგონებასა და მოტივაციას მოგცემენ. კარგი იქნება ასევე თვითგანვითარება, ახალი ცოდნის მიღება. სიყვარულის სფეროში აჯობებს, თუ ყველაფერს ისე დატოვებთ, როგორც არის, არ მიიღებთ მნიშვნელოვან გადაწყვეტილებებს. შესაძლოა, ყველაფერი თავსთავად გადაწყდეს.

ზოდიაქოს ნიშნების ინტიმური შეთავსებადობა>>

ქალწული

მოერიდეთ აგრესიულ ადამიანებს. ისინი თავიანთ გარშემო ნეგატივს აღვივებენ, თქვენ კი ამ კვირაში საკმაოდ დაუცველები ხართ. ვარსკვლავები ენერგეტიკულ დაცვას მოგაკლებენ. იდეალური პერიოდია განმარტოებისა და სახლის საქმეებისთვის. პარტნიორთან ურთიერთობებში გარკვეული „სიცივე“ იქნება მოსალოდნელი.

17 სექტემბერს ვარსკვლავები და პლანეტები ძალზე აღმშენებლობითი იქნებიან და ამიტომ ხუთშაბათი სამუშაოს შესრულებას დაუთმეთ. ასე შეძლებთ უქმეებზე განტვირთვასა და დაუსრულებელ სამუშაოზე მძიმე ფიქრებისგან გათავისუფლებას.

სასწორი

კვირა სასწორებისთვის შედარებით ხელსაყრელი იქნება, მხოლოდ ოთხშაბათსა და ხუთშაბათს გჭირდებათ სიფრთხილე სიყვარულშიცა და სამუშაოზეც. მნიშვნელოვანი პრობლემის გადაწყვეტაში მეგობრები და ნათესავები დაგეხმარებიან. ასტროლოგები სიფრთხილისკენ მოგიწოდებენ დოკუმენტებთან მუშაობის დროს.

კვირის დანარჩენი დღეები უფრო ხელსაყრელი იქნება, ამიტომ ყურადღების კონცენტრაცია ყველაზე მნიშვნელოვან საქმეებზე მოახდინეთ. კარგი დროა მგზავრობისა და გარემოს შეცვლისთვის. ვარსკვლავებისა და პლანეტების ენერგეტიკა ხელს შეუწყობს ახალ ნაცნობობას, შეხვედრებს, ოჯახურ თავყრილობებს. კარგი იქნება, თუ მარტო დიდხანს არ დარჩებით – ეს იღბალზე ნეგატიურად აისახება.

ბოშური ჰოროსკოპი - გაიგეთ თქვენი და თქვენი ახლობლების თვისებები ახალი რაკურსით>>

მორიელი

შესაძლოა, ბოლო რამდენიმე კვირა თქვენთვის რთული და უსიამოვნო იყო. დადგა დასვენების დრო, თუ, რა თქმა უნდა, ამის შესაძლებლობა გაქვთ. არ არის გამორიცხული, რომ ამ კვირაში მეგობრებმა ან ნათესავებმა დახმარება გთხოვონ.

ასტროლოგები გირჩევენ, მათ უარი არ უთხრათ. შაბათი და კვირა ენერგეტიკული აღმავლობის დღეები იქნება, ამიტომ თუ ახლობლებს დაეხმარებით, ეს მხოლოდ კვირის ბოლოს უნდა გააკეთოთ. უქმეებზე ბევრ თქვენგანს საინტერესო ნაცნობობა გელოდებათ. არაა გამორიცხული, ეს თავბრუდამხვევი რომანის დასაწყისი გახდეს.

მშვილდოსანი

მშვილდოსნებს ძალზე ხელსაყრელი კვირა გელოდებათ, მაგრამ ამისთვის პროკრასტინაციას (საქმეების გადადების სურვილს) უნდა გაუმკლავდეთ და ნებისყოფას მოუხმოთ, სიზარმაცე დაძლიოთ. იდეალური დროა მუშაობისთვის, ბიზნეს–საქმიანობისთვის, ახალი პროექტების დაწყებისა და იდეების წამოყენებისტვის. უნდა იმოქმედოთ, სანამ ვარსკვლავები თქვენ მხარეს არიან.

მიუხედავად ამისა, გარკვეული გაუგებრობების გარეშე ეს პერიოდი მაინც არ ჩაივლის. შუა კვირაში მოსალოდნელია გაუთვალისწინებელი ხარჯები. სჯობს, არ იჩქაროთ გადაწყვეტილების მიღება და ფული აქეთ–იქით არ ფანტოთ. კვირის დასაწყისი შესანიშნავი დროა იმიჯის შეცვლისთვის, სილამაზის სალონში სტუმრობისა და გარდერობის განახლებისთვის. ასევე ძალზე მნიშვნელოვანია, რომ მოერიდოთ ტოქსიკურ ადამიანებს და კეთილ პიროვნებებთან იქონიოთ კონტაქტი.

ზოდიაქოს ნიშნები: ყველაზე შეშლილი ყოფილები და მათი ვნებანი - სიგიჟიდან გულგრილობამდე>>

თხის რქა

თხის რქებს ფინანსური აქტიურობის დრო გეწყებათ. თამამად ეგიძლიათ, შეიძინოთ ძვირადღირებული ნივთები, დაიწყოთ ახალი საქმეები, შეიცვალოთ სამუშაო ადგილი, მიუსხდეთ მოლაპარაკებების მაგიდას. ვარსკვლავები დაგეხმარებიან, რომ გათავისუფლდეთ მავნე ჩვევებისგან. უქმეებზე შეიგიძლიათ სამუშაო სახლშიც შეასრულოთ – შრომა დაგიფასდებათ.

სასიყვარულო სფეროში ერთგვარი „უძრაობის დრო“ გელოდებათ. ვისაც ჰყავს პარტნიორი, კარგი იქნება, თუ მათ მეტ თავისუფლებას მისცემენ. თავისუფალმა თხის რქებმა კი, სჯობს, დროებით შეწყვიტოთ სიყვარულის ძებნა. გამონაკლისია, თუ ინიციატივა სხვა ადამიანისგან წამოვა. ასეთ შემთხვევაში სიმპათიის გამოვლენა უყურადღებოდ არ დატოვოთ.

მერწყული

ასტროლოგები გირჩევენ, გათავისუფლდეთ წყენისგან და შეწყვიტოთ გაბრაზება. ამ კვირაში აჯობებს, თუ ნეგატივს თავს აარიდებთ, განსაკუთრებით ახლობელ ადამიანებთან ურთიერთობებში. ასეთ გრძნობებს შეუძლია იღბალი დააფრთხოს. უნდა ისწავლოთ პატიება. ამ კვირაში თქვენი დევიზი უნდა გახდეს „მიუტევე და მოგეტევება“.

ფინანსურ სფეროში გარკვეული უსიამოვნებები შეიძლება გაჩნდეს, მაგრამ ვითარება კრიტიკული არ იქნება. შეძლებთ პრობლემებთან გამკლავებას. ყველაზე რთული კვირის პირველი სამი დღე იქნება. ასტროლოგები გირჩევენ, ამ დღეებში თქვენი გეგმების შესახებ არავის უამბოთ.

დამიმტკიცე ლოგიკურად, რომ ერთმანეთისთვის ვართ შექმნილი>>

თევზები

ხელსაყრელი დრო დგება მეორე ნახევრის პოვნისთვის, ახალი ურთიერთობების დაწყებისა და ძველის, დრომოჭმულის დამთავრებისთვის.

ფინანსურ საკითხებში მოსალოდნელია მკვეთრი აღმასვლები და ვარდნები, განსაკუთრებით 16 და 19 სექტემბერს, როდესაც ვარსკვლავები და პლანეტები მსუბუქ დისონანსში იქნებიან. ამ პერიოდში სასურველია, არ შეიძინოთ ძვირადღირებული ნივთები, არ დაარღვიოთ დაპირებები და და არ გასცდეთ დასაშვების ფარგებს. სჯობს, მშვიდად იშრომოთ დასახულ მიზნებზე. 

2077
ზურაბ ვადაჭკორია

ქართველი დიზაინერი პოლონელ „არწივებს შორის“ და მისი ოცნების სახლი თბილისში 

67
(განახლებულია 18:04 23.09.2020)
რუბრიკა „ქართველები უცხოეთში“ პოლონეთში მცხოვრები დიზაინერის, ზურაბ ვადაჭკორიას საქმიანობასა და ცხოვრებას გაგაცნობთ.

უკვე 14 წელია პოლონეთში ცხოვრობს და ამ დროის მანძილზე ბევრის გადატანა მოუწია, თუმცა საკუთარი შრომისმოყვარეობის, ნიჭისა და საქმისადმი კეთილსინდისიერი დამოკიდებულებით პოლონელების ნდობა ადვილად დაიმსახურა. თავიდან ორიგინალური ფორმის შანდლების დამზადება დაიწყო და მისი შეძენის მსურველებიც მალე გამოუჩნდნენ.

დღეს პოლონელები უკვე საკუთარი სახლის დიზაინისა და ინტერიერის მოწყობას ანდობენ. ვარშავის უნივერსიტეტში, ერთ საპასუხისმგებლო შეკვეთას კარგად გაართვა თავი და ადგილობრივი თეატრიდან შემოთავაზებაც მიიღო. პანდემიის დღეებში, სახლში ყოფნის დროს, მან პოლონეთში ჩასულ ბევრ ქართველს გაუწოდა დახმარების ხელი, სრულიად უანგაროდ... დანარჩენს მასალიდან შეიტყობთ.

ზურაბ ვადაჭკორია
ზურაბ ვადაჭკორია

- ბატონო ზურაბ, როგორი იყო თქვენი თბილისური ცხოვრება, რას საქმიანობდით სამშობლოში?

- თბილისელი ვარ, მთაწმინდის უბანში ვცხოვრობდი. ბავშვობიდან კარგად ვხატავდი და ჩხირკედელაობა მიყვარდა. იქიდან მოყოლებული თავდაჯერებული ვარ, რადგან რასაც ხელს მოვკიდებდი, ყველაფერი კარგად გამომდიოდა. თავიდან გრიბოედოვის თეატრში ვმუშაობდი დეკორატორად, შემდეგ ხუთი წლის განმავლობაში თავისუფალ თეატრში სხვადასხვა სახის სამუშაოებს ვასრულებდი.  ზარმაცი არასოდეს ვყოფილვარ, შრომა ბავშვობიდანვე მიყვარს და 16 წლიდან მოყოლებული სულ ვშრომობ. ინტერესი და საქმის კეთების სურვილი ყოველთვის მქონდა, მაგრამ საქართველოში სამწუხაროდ, საქმე ისე ვერ აეწყო, როგორც მინდოდა, ამიტომ იძულებული გავხდი, ქვეყანა დამეტოვებინა და უცხოეთში ჩამოვსულიყავი.

ზურაბ ვადაჭკორია
ზურაბ ვადაჭკორია

- პოლონეთში რომელ წელს ჩახვედით და ვინ იყო ის ადამიანი, ვინც პირველმა გამოგიწოდათ დახმარების ხელი?

- ვარშავაში 2006 წლიდან ვარ, ანუ უკვე 14 წელი. ოჯახსაც აქ მოვეკიდე: მყავს პოლონელი მეუღლე და ორი ვაჟი. პირველი ადამიანი, ვინც ამ  ქვეყანაში გვერდში დამიდგა, პოლონელი პაველ ფიალკოვსკი იყო. ეს კაცი ყველაფერში მეხმარებოდა, მე ჯერ ავტომობილების ზეთების ვაჭრობაში დავსაქმდი, შემდეგ ხელნაკეთ ნივთებს მივუბრუნდი. საცდელად რკინის მასალისგან შანდლების გაკეთება დავიწყე. მათ სპეციალური ტექნიკური დანადგარების მეშვეობით ვამზადებდი. მალე დავინახე, რომ ჩემი ნახელავი ადგილობრივებს ძალიან მოსწონდათ. მათი ყიდვის მსურველი, ჩემდა გასაოცრად, ბევრი აღმოჩნდა.

ზურაბ ვადაჭკორია
ზურაბ ვადაჭკორია

 - ვიცი, რომ სხვა სახის სამუშაოებსაც ასრულებდით, თქვენთვის ყველაზე მნიშვნელოვანი რომელი შეკვეთა იყო?

- ერთხელ შემთხვევით გავიცანი ვარშავის უნივერსიტეტის პროფესორი, ბატონი მარეკ მილერი (Marek Miller), რომელსაც ჩემი ნახელავი ძალიან მოეწონა და წინადადება შემომთავაზა ერთი სერიოზული შეკვეთა შემესრულებინა. პოლონეთის უნივერსიტეტი, თურმე, ორი წელია ეძებდა მხატვარ-დეკორატორს, რომელიც ერთ საპასუხისმგებლო სამუშაოს კარგად გაართმევდა თავს. საქმე ისაა, რომ ვარშავის უნივერსიტეტის შენობაში ერთი ძველი, ისტორიული ნაკეთობა-თაბაშირისგან დამზადებული ორი არწივის ფიგურაა, რომლის ქვემოთაც უნდა გაკეთებულიყო წარწერა: „Między orłami“ („არწივებს შორის“)- დაფაზე კი ამავე უნივერსიტეტის პროფესორ-მასწავლებებისა და წარჩინებული სტუდენტების ფოტოები იქნებოდა გამოფენილი.

ზურაბ ვადაჭკორიას ხელნაკეთი შანდალი
ზურაბ ვადაჭკორიას ხელნაკეთი შანდალი

-თქვენამდე რატომ ვერ შეძლეს, ამ საქმის სირთულე რაში მდგომარეობდა?

-ადრე მცდელობა ჰქონდათ, რომ თაბაშირის მასალაზე წარწერა ლატუნისა და სხვადასხვა მასალისგან დამზადებული ასოებით გაეკეთებინათ, მაგრამ მცდელობა, ყოველ ჯერზე, მარცხით მთავრდებოდა. ბევრი ვიფიქრე და ბოლოს, თითოეული ასო თაბაშირისგან დავამზადე და ასოებზე თან, არწივის ფრთები დავატანე. ასეთი წარწერა არწივის გამოსახულებას ჰარმონიულად შეერწყა, შთამბეჭდავი გამოვიდა და უნივერსიტეტში ყველას მოეწონა. მითხრეს, რომ ეს სწორედ ის არის, რაც გვინდოდაო.

ზურაბ ვადაჭკორიას თაბაშირის ასოებისგან გაკეთებული წარწერა ვარშავის უნივერსიტეტში
ზურაბ ვადაჭკორიას თაბაშირის ასოებისგან გაკეთებული წარწერა ვარშავის უნივერსიტეტში

- ამ უნივერსიტეტის ქართველმა სტუდენტებმა თუ იციან ამ ფაქტის შესახებ?

- არ ვიცი, მაგრამ დამპირდნენ, რომ ნამუშევარს აუცილებლად მიაწერდნენ: წარწერა მხატვრულად ქართველმა, ზურაბ ვადაჭკორიამ გააკეთაო. ამაზე დიდი ბედნიერება არ არსებობს, როდესაც შენს შრომას ასეთ მაღალ შეფასებას აძლევენ.

ზურაბ ვადაჭკორია
ზურაბ ვადაჭკორია

- დარწმუნებული ვარ, რომ ამის შემდეგ სხვა სერიოზული შემოთავაზებაც გაჩნდებოდა...

- ასეც იყო, ამავე პროფესორმა რეკომენდაცია გამიწია და გამაცნო პოლონეთში არსებული კერძო თეატრის- „რეპორტაჟების ლაბორატორია“ მფლობელი, რომელმაც დეკორატორად მუშაობა შემომთავაზა, მაგრამ ანაზღაურებამ არ დამაკმაყოფილა და უარი ვუთხარი, ამასთან როგორც სპეციალისტს, უფრო მეტი განვითარების სურვილი მქონდა, თეატრში კი ეს ვერ მოხერხდებოდა. მერე „ტრი-დე“ პროგრამაში მუშაობა ავითვისე, ავეჯისა და ბინების შიდა ინტერიერის დაპროექტება დავიწყე და მათ დიზაინზეც ვმუშაობდი.

ზურაბ ვადაჭკორიას ხელნაკეთი შანდალი
ზურაბ ვადაჭკორიას ხელნაკეთი შანდალი

- ვინ არიან თქვენი შემკვეთები?

- ჩემი შემკვეთები გამოჩეული ხალხია, მათ შორის პოლონეთის სხვადასხვა სახელმწიფო უწყების წარმომადგენლები იყვნენ. პოლონეთის პარლამენტის წევრს ოფისი დავუპროექტე და მის დიზაინზეც ვიზრუნე. გადაუჭარბებლად გეტყვით, რომ ხარისხიანად ვმუშაობ და ამიტომ ბევრი მნიშვნელოვან შეკვეთას სწორედ მე მანდობენ, რაც ძალიან მახარებს და მეტ პასუხისმგებლობას მაკისრებს.

ზურაბ ვადაჭკორიას ხელნაკეთი შანდლები
ზურაბ ვადაჭკორიას ხელნაკეთი შანდლები

- ყველა საქმეში პროფესიონალიზმის გარდა, პიროვნული თვისებებიც ფასდება...

 - ძალიან მეუხერხულება ამაზე საუბარი, მაგრამ შეკვეთის ხარისხიანად შესრულების გარდა, რაღა თქმა უნდა, აქ სპეციალისტის წესიერებასაც აქცევენ ყურადღებას. პოლონელები საიმედო პარტნიორები არიან, არ მახსენდება შემთხვევა, რომ მათ რაიმე საქმეში მოვეტყუებინე ან გავეწბილებინე, განსხვავებით ქართველებისგან, რომლებთან ურთიერთობასაც უკვე თავს ვარიდებ. ძალიან მწყინს ამას როცა ვამბობ და ეს ჩემს თავმოყვარეობაზეც მოქმედებს, მაგრამ სამწუხარო ფაქტია და ამას, ჯერჯერობით, ვერ გავექეცი...

ზურაბ ვადაჭკორიას სახლი საკუთარი დიზაინით
ზურაბ ვადაჭკორიას სახლი საკუთარი დიზაინით

- ეტყობა, ძალიან მწარე გამოცდილება გაქვთ...

-არ მინდა იმ კომპანიის დასახელება, ზოგადად ვიტყვი, რომ ვარშავაში ქართული ღვინის მწარმოებელი ერთი კომპანიიდან დამიკავშირდა პიროვნება, რომელსაც სახლი თავიდან ბოლომდე დავუპროექტე, სამუშაოს შესასრულებლად ადგილობრივი ხელოსნები ხელშეკრულებით ავიყვანე. მუშაობის დროს ერთმა მათგანმა თავისი სამუშაო ცუდად შეასრულა. მე ბოდიშის მოხდის შემდეგ მისი ხარვეზი მალევე გამოვასწორე. თუმცა იმ ადამიანმა ამ შემთხვევით ბოროტად ისარგებლა, რადგან ამის მერე არც სახლში შემიშვეს და დაპირებული თანხაც არ გადამიხადეს... იძულებული გავხდი, რომ დაქირავებული პოლონელი ხელოსნებისთვის შელშეკრულებით გათვალისწინებული ანაზღაურება საკუთარი ჯიბიდან გადამეხადა. ამის შემდეგ გადავწყვიტე, რომ ქართველებთან საქმეს აღარ დავიჭერდი...

ზურაბ ვადაჭკორიას სახლი საკუთარი დიზაინით
ზურაბ ვადაჭკორიას სახლი საკუთარი დიზაინით

- როგორც ვიცი, ეს გადაწყვეტილება ვერ შეასრულეთ, უფრო მეტიც, კოვიდის პერიოდში, როდესაც სამშენებლო სამუშაოები ყველგან და მათ შორის, პოლონეთშიც გაჩერდა, ქართველ ემიგრანტებს, თურმე, სრულიად უსასყიდლოდ ეხმარებოდით...

- რა ვიცი, გულმა მაინც ვერ გამიძლო... როცა სხვებთან ერთად მეც სახლში გამოვიკეტე, სოციალურ ქსელებში პოლონეთში ჩამოსული ქართველების პოსტებს ვკითხულობდი, სადაც ისინი დახმარებას ითხოვდნენ. მერე მათ ვუკავშირდებოდი, პირადად ვხვდებოდი და ვაკვალიანებდი... ამაზე ლაპარაკი ჩემი მხრიდან უხერხულია, მაგრამ რადგან მკითხეთ, გიპასუხეთ.

ზურაბ ვადაჭკორიას სახლი საკუთარი დიზაინით
ზურაბ ვადაჭკორიას სახლი საკუთარი დიზაინით

- თავად თუ გაქვთ საქართველოში საკუთარი დიზაინით დაპროექტებული ლამაზი სახლი?

- საქართველოში ხშირად ჩამოვდივარ. როდესაც 2012 წელს თბილისში ჩამოვედი, უზენაესი სასამართლოს გვერდით, ზუბალაშვილის ქუჩაზე არსებული საკუთარი სახლი დავანგრიე და თავიდან ბოლომდე ჩემი დიზაინით დავაპროექტე და ავაშენე. ეს არის სახლი, რომელსაც ხშირად წარმოვიდგენდი ოცნებაში, ახლა ის ჩემს მშობლიურ ქალაქშია და როცა ჩამოვდივარ, იქ ყოფნით ბედნიერი ვარ... დიდი სურვილი მაქვს, რომ აქ დავრჩე, მაგრამ რეალობა სხვანაირია. სამწუხაროდ, უცხო ქვეყანაში უფრო დიდი ასპარეზია. პოლონეთში საქართველოსა და მეგობრების დიდი ნოსტალგია მაქვს, მენატრება ჩემი ქალაქი, მისი ქუჩები. ალბათ ის დროც მოვა, როცა ოჯახთან ერთად აქ სამუდამოდ დავბრუნდები და ჩემს აშენებულ სახლში ბედნიერად ვიცხოვრებ...

 

 

 

67
თემები:
ქართველები უცხოეთში
ექიმი სინჯავს ცხვირის მდგომარეობას

ცხვირის ძგიდის გამრუდება: რა შემთხვევაშია საჭირო ოპერაცია?

78
(განახლებულია 16:36 23.09.2020)
გარდა იმისა, რომ ცხვირის ძგიდის გამრუდება შეიძლება თანდაყოლილი იყოს, ეს შესაძლოა დარტყმის შედეგადაც მოხდეს, ამბობენ ექსპერტები.

ხშირად ადამიანებს, რომლებსაც გამრუდების სიმპტომები უვლინდებათ, აღარც კი ახსოვთ, როდის და რას მიარტყეს ცხვირი — ეს შეიძლება რამდენიმე წლის წინაც მომხდარიყო. საქმე ისაა, რომ ხრტილები ასაკთან ერთად უფრო მყიფე ხდება და სიმრუდეც ძლიერდება.

რა პრობლემებს ქმნის ძგიდის გამრუდება?

ძგიდე იჭერს ცხვირის კედლებს. მათი შეშუპების დროს სუნთქვა ძნელდება და ხშირად სურდო ჩნდება. ზოგჯერ ცხვირი იმდენად იჭედება, რომ ადამიანს მხოლოდ ერთ გვერდზე შეუძლია ჩაძინება. ცხვირის კედლებზე ზეწოლამ შეიძლება მისი ტკივილი გამოიწვიოს და მერე ეს ტკივილი შუბლზეც გავრცელდეს. გამრუდებული ძგიდის მქონე პაციენტები ხშირად თავის ტკივილსაც უჩივიან.

ირღვევა ჰაერის ნორმალური მოძრაობა. გამრუდებული ძგიდის მხრიდან ჰაერი ძლივს შედის ცხვირის სინუსებში — პატარა ღრუებში, რომლებიც ძვლების შიგნით მდებარეობს. თუ სინუსი არ „განიავდა“, ის შეიძლება ანთებითი გახდეს და ჰაიმორიტი გამოიწვიოს.

ცხვირის ლორწოვანი გარსი თხელდება. მუდმივი წნევა და ანთება აშრობს ლორწოვან გარსს, რაც ზრდის ცხვირიდან სისხლდენების ალბათობას და სასუნთქ გზებს უფრო დაუცველს ხდის ინფექციების მიმართ.

რთულდება სუნის გარჩევა. ადამიანი სუნს ცხვირის მცირე უბნის წყალობით გრძნობს. გამრუდებული ძგიდის მქონე ადამიანებს, მუდმივი შეშუპების გამო, ხშირად ყნოსვა უუარესდებათ.

როგორ უნდა მოიქცეთ გამრუდებული ძგიდის შემთხვევაში?

  • თუ შემთხვევით გაარკვიეთ, რომ ძგიდე მრუდეა, მაგრამ ეს არ იწვევს რაიმე სიმპტომებს და არ გირთულებთ ცხოვრებას, მაშინ სამედიცინო მანიპულაციები საჭირო არ არის;
  • თუ გაქვთ სურდო, ძილის პრობლემები, სასუნთქი გზების ხშირი ინფექციები, მაშინ აუცილებლად უნდა მიმართოთ ყელ-ყურ-ცხვირის ექიმს, რომელმაც სუნთქვის გასაადვილებლად შეიძლება მედიკამენტები დანიშნოს. ჩვეულებრივ, ეს არის მარილიანი ხსნარი და წვეთები, ან აბები შეშუპების მოსახსნელად. ექიმს ასევე შეუძლია ანტიჰისტამინური საშუალებების ან კორტიკოსტეროიდული სპრეის დანიშვნა. ეს საშუალებები ცხვირში გაჭედვას ხსნის, მაგრამ პრობლემის ძირეულ მიზეზს ვერ აგვარებს;
  • თუ ძგიდე მნიშვნელოვნად აფერხებს ცხოვრების ხარისხს, ექიმი სეპტოპლასტიკისკენ გადაგამისამართებთ. ეს არის კლასიკური ოპერაცია ძგიდის გასასწორებლად. ქირურგი ხრტილის ან ძვლის მრუდე ნაჭერს იღებს და ძგიდეც შუა ხაზზე დგება.

აუცილებელია გახსოვდეთ, რომ ცხვირის ფორმა შეიძლება შეიცვალოს, თუ გამრუდება ძალიან ძლიერი იქნება. 

78
თემები:
სასარგებლო რჩევები
ადამიანები პირბადეებით

შეიძლება თუ არა ორ წლამდე ბავშვებისთვის პირბადის ტარება? პედიატრის პასუხი

0
(განახლებულია 17:42 23.09.2020)
პატარა ბავშვებისთვის პირბადეების ტარება რეკომენდებული არ არის, რადგან მათ არ შეუძლიათ მათი დამოუკიდებლად გაკეთება და მოხსნა

თბილისი, 23 სექტემბერი - Sputnik. ამჟამად სამედიცინო ნიღბის ტარება კორონავირუსისგან თავდასაცავად საუკეთესო საშუალებაა, მაგრამ ორ წლამდე ბავშვებისთვის მათი გამოყენება რეკომენდებული არაა, აღნიშნა პედიატრმა მაია ხერხეულიძემ.

ცერცვაძე: შესაძლოა სასწავლო პროცესის კიდევ ორი კვირით გადადების საკითხზე მსჯელობა დაიწყოს>>

პირბადე, დისტანცია და დეზინფექცია – ეს ეპიდემიოლოგების მთავარი რეკომენდაციებია, რომლებსაც COVID-19–ის გავრცელების შეჩერება შეუძლია.

„ჩვენ უნდა დავიცვათ არა მხოლოდ ჩვენი ჯანმრთელობა და სიცოცხლე, არამედ გარშემომყოფებისაც... მოზარდებმა და სასკოლო ასაკის ბავშვებმა პირბადე აუცილებლად უნდა გამოიყენონ. მაგრამ უნდა გავითვალისწინოთ, რომ ორ წლამდე ბავშვებში პირბადე რეკომენდებული არ არის“, – განაცხადა ხერხეულიძემ პირველი არხის ეთერში.

ეპიდემიური ვითარების გამწვავების გამო ქვეყანაში სასწავლო პროცესი სრულფასოვნად ყველგან ვერ დაიწყო. დიდ ქალაქებსა და ზოგიერთ სოფელში სწავლა დისტანციურად მიმდინარეობს.

დაავადებათა კონტროლისა და საზოგადოებრივი ჯანმრთელობის ცენტრის ხელმძღვანელის მოადგილე პაატა იმნაძის განცხადებით, იმისთვის, რომ ბავშვებმა სკოლაში სიარული შეძლონ, ყველამ უნდა დაიცვას წესები: ატაროს პირბადე, დაიცვას ორმეტრიანი დისტანცია.

საქართველოში ბოლო პერიოდში ინფიცირებულთა მკვეთრი ზრდა ფიქსირდება. დღეს 227 ახალი შემთხვევა გამოვლინდა.

ბოლო მონაცემებით, საქართველოში კორონავირუსით ინფიცირებულია 4 140 ადამიანი, გამოჯანმრთელდა 1 643, გარდაიცვალა – 25.

0
თემები:
COVID-19 საქართველოში