Მეფე-პატარძალი ველოსიპედებით

როცა გიყვარს, შენ შენ არ ხარ, ანუ ქორწილი თბილისურ კარანტინში

239
(განახლებულია 14:46 01.05.2020)
ახალგაზრდა წყვილის 23-წლიანი სიყვარულის ისტორია კარანტინში ქორწინებით დაგვირგვინდა და შეყვარებულებს ინტერნეტ-სივრცეში უამრავი უცხო ადამიანიც გულშემატკივრობს.

ქალაქის დაცარიელებულ ქუჩებში ადამიანები მაინც პოულობენ გზას - უყვარდეთ და ჰქონდეთ უკეთესი მომავლის იმედი.

...და რა კარგია, რომ ასეთი ამბები ჩვენგან შორს ან მხოლოდ რომანტიკულ ფილმებში კი არა, აქვე, თბილისში, დიღმის მასივში ხდება, სადაც ფატაც ადგილზეა და განწყობაც.

Მეფე-პატარძალი ველოსიპედებით
photo: courtesy of Nika Zhgenti
ფატა და ველოსიპედები!

საბავშვო ბაღში დაწყებული მეგობრობა და სკოლაში გაგრძელებული სიყვარულის ისტორია კარანტინში ქორწინებით დაგვირგვინდა მაშინ, როცა რამდენიმე დღის წინ ავტომობილებით მოძრაობა აიკრძალა. ახალდაქორწინებულმა, თანამედროვე წყვილმა - 26 წლის ნიკა ჟღენტმა და ქეთევან კვირკველიამ კი თეთრი ცხენით არა, მაგრამ ველოსიპედებით შემოიარეს ქუჩები.

Მეფე-პატარძალი ველოსიპედებით
photo: courtesy of Nika Zhgenti
როცა მეგობარი ქორწილში მოწვეული ნათესავიცაა, მეჯვარეც და ფოტოგრაფიც!

- დღეს საქართველოში ყველაზე პოპულარული წყვილი ხართ. საიდან დაიწყო თქვენი ისტორია?

პატარძალი - მე და ნიკა ბაღში ერთად დავდიოდით, შემდეგ კლასელები ვიყავით. წელს, 23 თებერვალს, ჩემ დაბადების დღეზე ხელი მთხოვა და მარხვის დასრულების შემდეგ ჯვრისწერას ვაპირებდით. შექმნილმა ვითარებამ ხელი ვერ შეგვიშალა და მარხვის დამთავრებიდან ერთ კვირაში ჯვრისწერა დაიგეგმა.

Მეფე-პატარძალი ველოსიპედებით
photo: courtesy of Nika Zhgenti
ბაღში ერთად დავდიოდით...

სიძე - ჩვენი ისტორია ბაღში დაიწყო 23 წლის წინ. როცა სკოლა დავამთავრეთ და იმის წინაშე დავდექით, რომ ქეთის სხვა უნივერსიტეტში უნდა ესწავლა და მე სხვაგან, მივხვდი, რომ მეტის გადადება აღარ შეიძლებოდა. ასე რომ, აბიტურიენტობის პერიოდში გამოვუტყდი.

Მეფე-პატარძალი ველოსიპედებით
photo: courtesy of Nika Zhgenti
მორიგი ზეიმი ბაღში...

- ველოსიპედებით ქორწილი ვისი იდეა იყო? რამდენი კილომეტრი გაიარეთ?

პატარძალი - ველოსიპედები საგანგებო რეჟიმის გამოცხადებამდე რამდენიმე დღით ადრე ვიყიდეთ. იდეა ხუმრობა-ხუმრობაში ჩამოყალიბდა და ძალიან კარგად განხორციელდა. ჯვრისწერაზე ველოსიპედებით მივედით. ულამაზესი და უბედნიერესი დღეები გვაქვს.

სიძე - შარვალ-კოსტიუმით ერთ დღეში 13 კილომეტრამდე გავიარე. დიდი დიღმიდან დილით მე და თორნიკე (ჩემი მეჯვარე) გამოვედით დიღმის მასივში. ამ დროს 6 კილომეტრი გავიარე და უკვე მისვლას ვაგვიანებდი. არადა, როგორც წესი, პირიქით ხდება ხოლმე, პატარძალი აგვიანებს. მაგ დროს სპორტული ტანსაცმლით ვიყავი. დიღმის მასივში უცებ გამოვიცვალე, კოსტიუმი ჩავიცვი, მოვწესრიგდი, ვნახე ქეთი და დავიწერეთ ჯვარი. შემდეგ ქეთის სურვილი იყო ველოსიპედებით სეირნობა და ამ სეირნობა-სეირნობაში 6-7 კილომეტრი გავიარეთ.

Მეფე-პატარძალი ველოსიპედებით
photo: courtesy of Shota Nozadze
ფოტოსესია დიღმის პარკში

- ველოსიპედის ტარება რომ არ გცოდნოდათ, რას მოიფიქრებდით?

პატარძალი - გავეკიდებოდი ფეხით!

სიძე - თუ სხვა ტრანსპორტს ვერ გამოვნახავდი, როგორც აქამდე დავდიოდი ქეთისთან ფეხით, ისე ჩამოვიდოდი უპრობლემოდ. ეს მხოლოდ წვრილმანია...

Მეფე-პატარძალი ველოსიპედებით
photo: courtesy of Shota Nozadze
ფოტოსესია დიღმის პარკში

- ფოტოსესია სად გქონდათ?

პატარძალი - დიღმის ტყეში. ფოტო-ვიდეომასალას სოციალურ ქსელშიც ვპოულობთ. ერთ-ერთ ვიდეოში ჩანს, რომ ნიკუშას ველოსიპედით ვასწრებ და სოციალურ ქსელში ხალხმა ბევრი იხუმრა - პატარძალს ძალიან ეჩქარებაო.

სიძე - ველოსიპედებით უფრო შორს ვეღარ წავედით და დიღმის ტყეში გვქონდა ფოტოსესია. ფოტოგრაფი და მემონტაჟეც ჩემი მეჯვარე იყო. „სელფიც“ ბევრი დაგვიგროვდა.

Მეფე-პატარძალი ველოსიპედებით
photo: courtesy of Shota Nozadze
ფოტოსესია დიღმის პარკში

- საჩუქრები მიიღეთ ქორწილში?

სიძე - არა. მაყარი გვყავდა ცოტა.

პატარძალი - არა და ამიტომ ყველაფერი რომ ჩაწყნარდება, დიდ ქორწილს აუცილებლად გადავიხდით. ვფიქრობთ სექტემბერში, ან ოქტომბერში. ჩემი ქორწილი ყოველთვის ბუნებრივი და ორიგინალური წარმომედგინა.

Მეფე-პატარძალი ველოსიპედებით
photo: courtesy of Nika Zhgenti
როცა ყველაფერი ჩაწყნარდება, დიდ ქორწილს აუცილებლად გადავიხდით!

- ინტერნეტ-სივრცეში უკვე ცნობილი სიძე-პატარძალი ხართ. როგორ შეაფასეს თქვენი ქორწილი სოციალურ ქსელებში?

პატარძალი - ხალხი ძალიან გაერთო და ბევრი პოზიტივიც მივიღეთ. ჩვენ ვიდეოებზე სახალისო კომენტარებს წერდნენ - სამებამდე თუ „გაქაჩეს“ მოიყვანს ცოლადო, ბოლოს პატარძალმა მსაჯსაც გადაასწროო, როცა გიყვარს შენ შენ არ ხარო და ასე შემდეგ. ამ რეაქციებზე მე და ნიკუშა ბევრს ვიცინით.

სიძე - ბევრი სასაცილო კომენტარი იყო. ერთი წერდა, ღმერთო ასეც ნუ შემაყვარებო. მეჯვარეზე ბევრი იცინეს - მშობელიც ის არის, მაყარიც, ფოტოგრაფიც და ხელის მომკიდეცო. რეალურად სწორედ ასე იყო.

Მეფე-პატარძალი ველოსიპედებით
photo: courtesy of Nika Zhgenti
როცა გიყვარს, შენ შენ არ ხარ!

- პოპულარობის შემდეგ რა შეიცვალა?

სიძე - დღეს, დილით ნაბახუსევზე გავიღვიძე და მაღაზიაში ჩავედი. ძალიან გრძელი რიგი დამხვდა. ალბათ მე-15 ვიყავი. ჩემ წინ ახალგაზრდა ბიჭი იდგა, მიცნო და მეკითება, შენ ის არ ხარ, გუშინ ველოსიპედით რომ დასეირნობდით ნეფე-დედოფალიო? შენ შემოგევლეო და დამითმო თავისი ადგილი. თუ ვიყავი მე-15, გავხდი მე-14 და ასე ამაყად ვიდექი.

პატარძალი - განსაკუთრებული არაფერი შეცვლილა, უბრალოდ ტელეფონის ზარი არ ჩერდება, ჟურნალისტები მირეკავენ, ფატით თუ გავდივარ გარეთ, ხალხი მცნობს. ჩემი მეუღლე დილით ხუმრობით მეუბნებოდა, მომახსენე დღევანდელი გადაღებების განრიგიო.

Მეფე-პატარძალი ველოსიპედებით
photo: courtesy of Nika Zhgenti
ოცნებების ახდენას გისურვებთ!

- „თაფლობის თვეში“ ველოსიპედებით ხომ არ აპირებთ წასვლას?

პატარძალი - ჩვენი ოცნება მალდივებზე წასვლაა. სამწუხაროდ, ველოსიპედებით ვერ გადავცურავთ ზღვას, თორემ სიამოვნებთ. სადამდეც შესაძლებელი იქნება, იქამდე მივალთ ველოსიპედებით.

სიძე - ვფიქრობთ, ვარჯიშს დავიწყებთ, რომ შესაბამისი მანძილის დაფარვა „გავქაჩოთ“. ორადგილიანი ველოსიპედიც კარგი იდეაა. მთავარია ერთმანეთი გვიყვარს.

ასეა, სიყვარული ყოველთვის იმარჯვებს და შეყვარებული ადამიანისთვის სირთულე არ არსებობს. მთავარი მისი არსებობა და პრობლემის კრეატიული გადაჭრაა...

239
თეა თავაძე

ქართველი ექიმი, რომელიც სტამბულში ქალებს ჰიპნოზით ამშობიარებს

40
(განახლებულია 17:30 03.06.2020)
 ჩვენი რუბრიკა „ქართველები უცხოეთში“ თურქეთში მცხოვრებ წარმატებულ ქართველ ექიმს თეა თავაძეს გაგაცნობთ.

ქართველი ექიმი სტამბულის ერთ-ერთ კერძო სამედიცინო უნივერსიტეტის მეან-გინეკოლოგიური კლინიკის წამყვანი სპეციალისტია. ის ურთულეს გინეკოლოგიურ ოპერაციებს ატარებს და იმავე კლინიკაში კლინიკაში წყალში მშობიარობის განყოფილების დამაარსებელიც გახლავთ. ამავე სფეროში კოლეგებთან ერთად, მუშაობს ისეთ ინოვაციურ მეთოდზე, როგორიცაა, ჰიპნოზით მშობიარობა. ფლობს რადიოლოგიისა და ფსიქოთერაპიის სერთიფიკატებს.

თავის დროზე, დიპლომი დაიცვა ისეთ თემაზე, როგორიცაა, ვაგინალური ექოსკოპიის როლი ადრეული ორსულობის პერიოდში, რაც შემდგომ წიგნის სახით გამოიცა. დღეს კლინიკაში (Atlas Üniversitesi Edicine hospital) მუშაობის პარალელურად ლექციებსაც კითხულობს.

თეა თავაძე
თეა თავაძე

- ქალბატონო თეა, როგორ და როდის აღმოჩნდა ქართველი მედიკოსი თურქეთის სამედიცინო სფეროში?

- თურქეთში ჩამოსვლამდე, 1998 წელს, საქართველოში პეტრე შოთაძის სამედიცინო აკადემია დავამთავრე. თურქეთში ჩემი ჩამოსვლა დეიდაჩემის, ნესტან სოფაძის რჩევით განხორციელდა. იმ პერიოდში, დეიდა თურქეთში ერთერთ კონსერვატორიაში მუსიკის პედაგოგად მოღვაწეობდა. სწორედ  მისგან გავიგე, რომ იმ პერიოდში თურქეთსა და საქართველოს შორის სტუდენტური გაცვლითი პროგრამები მოქმედებდა. ექვსი თვის მანძილზე თურქ სტუდენტებთან ერთად კლინიკაში ვიყავი და მონაწილეობას ვიღებდი პრაქტიკულ სამუშაოებში.

თეა თავაძე სამუშაო გარემოში
თეა თავაძე სამუშაო გარემოში

- რამ მოახდინა თქვენზე მაშინ შთაბეჭდილება?

- იმ ექვსი თვის განმავლობაში ჩემზე ძალიან დიდი შთაბეჭდილება მოახდინა თურქეთის სამედიცინო განათლების დონემ. გადავწყიტე, რომ ისევ დავბრუნებულიყავი სტამბულში და მაგისტრატურაში აქ ჩამებარებინა. ძალიან დიდი შრომისა და გარკვეული გამოცდების ჩაბარების შემდეგ, (რისთვისაც სამი წელი დამჭირდა) მარმარის სახელობის სამედიცინო უნივერსიტეტში მოვხვდი მეან-გინეკოლოგის სპეციალობაზე, სადაც ექვსი წელი ვისწავლე და ერთ-ერთი  წარმატებული სპეციალისტი ვიყავი.

ექიმი თეა თავაძე პაციენტთან ერთად
ექიმი თეა თავაძე პაციენტთან ერთად

- ამ ეტაპზე რა სახის კვლევებზე გიწევთ მუშაობა?

- ვაწარმოებ გარკვეულ კვლევებს და ვახორციელებ ფიზიოლოგიურ მშობიარობას პირველი, მეორე და მესამე საკეისროს შემდეგ, რომელიც ძალიან რთული პროცესია. მოგეხსენებათ თურქული ტრადიციები მრავალშვილიანობის მომხრეა და საკეისრო კვეთა მრავალშვილიანობას ასე თუ ისე აფერხებს. მე როგორც ერთ-ერთი მეან-გინეკოლოგიური კლინიკის ხელმძღვანელი, რთულ მშობიარობებს ვუწევ მეთვალყურეობას. გარდა ამისა, რომ მეან-გინეკოლოგი ვარ, დამატებით ვფლობ რადიოლოგიისა და ფსიქოთერაპიის სერთიფიკატებს, რომელსაც მხოლოდ ჩემს სპეციალობაში ვიყენებ.

თეა თავაძე
თეა თავაძე

- თურქეთში ისეთ უჩვეულო და უნიკალურ მეთოდზე მუშაობთ, როგორიცაა, ჰიპნოზით მშობიარობა, როგორ ხდება მსგავსი რამ?

- ჰიპნოზი ბერძნული სიტყვაა და ნიშნავს ძილს, ცნობიერების შეცვლილ მდგომარეობას, რომელიც ხასიათდება ღრმა მოდუნებით, შთაგონებისადმი მიმღებლობით, აღქმნის, მეხსიერების, მოტივაციის და თვითკონტროლის ცვლილებებით. ჰიპნოზში მყოფი პაციენტი გარეგნულად ძილის მაგვარ მდგომარეობაში იმყოფება, თუმცა პაციენტი თავისუფლად გამოხატავს ემოციას: ტირის, ყვირის, შეკითხვებზე თავისუფლად გცემს პასუხს. ისინი გრძნობენ, რომ მათი ქცევა ყოველგვარი ცნობიერი განზრახვისა და ძალისხმევის გარეშე ხორციელდება. მოკლედ რომ ვთქვათ, ორსულობის პერიოდში შთაგონების მეშვეობით ვახერხებთ პაციენტის ქვეცნობიერის კონტროლს, რომელიც მშობიარობის პერიოდში ექიმის მითითებებს ექვემდებარება.

თეა თავაძე ოჯახურ გარემოში
თეა თავაძე ოჯახურ გარემოში

- რამდენად უსაფრთხოა ეს მეთოდი?

-ჰიპნოზით მშობიარობა სრულიად უსაფრთხო მეთოდია, რომელიც საერთოდ არ მოქმედებს პაციენტის ჯანმრთელობაზე. მშობიარობის შემდეგ პაციენტი რამდენიმე წამში გარკვეული მითითების შემდეგ ისევ უბრუნდება ჩვეულებრივ მდგომარეობას. ეს ახალი ტენდენციაა თურქეთში და ჩვენი უნივერსიტეტი ჯერჯერობით მხოლოდ მეორე იქნება, სადაც  ჰოპნოზით მშობიარობა განხორციელდება.

თეა თავაძე
თეა თავაძე

- ვიცი, რომ დისერტაციაზეც მუშაობთ, რა თემას ეხება თქვენი ნაშრომი?

- ამჟამად საერთაშორისო კლინიკის თანამშრომლებთან ერთად ვმუშაობ თემაზე, რომელიც ეხება ორსულობამდე და ორსულობის დროს მიღებული ფსიქოლოგიური ტრავმების შედეგებს მშობიარობის პერიოდში.

თეა თავაძე
თეა თავაძე

- თქვენი მეუღლე თურქეთელი ქართველების შთამომავალია, ალბათ ამანაც განაპირობა შემდეგში ამ ქვეყანაში თქვენი ოჯახის საბოლოოდ დამკვიდრება...

- ჩემი მეუღლე, ქემალ იემი (iyem) ირემაძე, წარმოშობით მაჭახელადანაა. დედამთილი, მარიამ ქავთარაძეა, მამამთილი, ნევზათ ირემაძე აწ გარდაიცვლილია. იმ პერიოდში თურქეთის არასტაბილური ეკონომიური მდგომარეობის გამო, მეუღლის მშობლები საცხოვრებლად გადავიდნენ ბელგიაში, სადაც ჩემი მეუღლე დაიბადა და გაიზარდა. იქ ცხოვრობდნენ ოცი წლის განმავლობაში, მიიღეს ბელგიის მოქალაქეობა, მაგრამ შემდეგ საცხოვრებლად ისევ სტამბულში გადავიდნენ. შემდეგ ჩემმა მეუღლემ დაიწყო თურქეთსა და საქართველოს შორის წარმატებული ბიზნეს-საქმიანობა, რის გამოც ორმაგი მოქალაქეობა მიენიჭა, ჩემს ორივე შვილსაც ორმაგი მოქალაქეობა აქვს.

თეა თავაძე ოჯახთან ერთად
თეა თავაძე ოჯახთან ერთად

- საქართველოში რამდენად ხშირად ჩამოდიხართ და სამომავლოდ საქმიანობის აქ გაგრძელებას თუ აპირებთ?

- რაც შეეხება საქართველოში ჩემს მუშაობას, მიუხედავად იმისა, რომ წამყვანი კლინიკებიდან სერიოზული შემოთავაზებები მქონდა, ჯერჯერობით არ ვაპირებ, ვინაიდან ამ ეტაპზე ჩემთვის პრიორიტეტი პროფესიონალური გეგმების განხორციელებაა. ძალიან მიყვარს ჩემი ქვეყანა, თბილისი, სადაც დავიბადე და გავიზარდე, სადაც ჩემი მშობლები და ოჯახის წევრები ცხოვრობენ. იქ ძალიან ხშირად ჩავდივარ ოჯახთან ერთად. ჩემი შვილები მთელი ზაფხულის განმავლობაში ბებიასთან და ბაბუასთან ისვენებენ. ისინი ქართულს ძალიან კარგად ფლობენ, ისიც კარგად იციან, რომ მათ  გენებში ქართული სისხლია, საქართველო კი მათი მშობლიური ქვეყანა...

 

40
თემები:
ქართველები უცხოეთში
საკვებით შექმნილი კომპოზიცია

შვილისთვის საკვებით შექმნილი საოცარი კომპოზიციები, რაზეც უჭმელი ბავშვიც კი არ იტყვის უარს

107
(განახლებულია 18:15 03.06.2020)
ბლოგერი მედეა ზაბახიძე 25 წლისაა. ჰყავს მეუღლე და ერთი შვილი – დანო. მედეა მთელ დროს მის აღზრდას უთმობს, ცდილობს შვილის ყოველდღიურობა უფრო ლამაზი და მრავალფეროვანი გახადოს.

მედეა საკვებით, ხილით, ბოსტნეულით შვილისთვის სახალისო და საინტერესო კომპოზიციებს ქმნის. საუზმეზე, რომელსაც შვილისთვის ამზადებს, ყველაზე უჭმელი ბავშვიც კი ვერ იტყვის უარს. მედეამ შვიდი თვის წინ ინსტაგრამზე ბლოგიც გააკეთა, რისი საშუალებითაც მშობლებს თავის გამოცდილებას უზიარებს.

- პროფესიით ფარმაცევტი ვარ. ვმუშაობდი ერთ-ერთ სააფთიაქო ქსელში, თუმცა აღმოვაჩინე, რომ ეს პროფესია ემოციურად ჩემგან ძალიან შორსაა. ჩემი გატაცება სამზარეულოა. ყველაფერი მიყვარს და მაინტერესებს, რაც სამზარეულოში ხდება და დიდი იმედი მაქვს, როგორც კი ჩემი შვილი მომცემს საშუალებას, ჩემ პროფესიადაც ვაქცევ.

ერთი შვილი მყავს. დანო წლის და ცხრა თვისაა. წარმოუდგენლად თბილი და მოსიყვარულეა. მიუხედავად იმისა, რომ ჯერ ძალიან პატარაა, ყოველთვის ახერხებს ყურადღების ცენტრში ყოფნას. დანოს დაბადებამ სამყარო შეცვალა ჩემში. ის საუკეთესოა ჩემს ცხოვრებაში და მე არ მაქვს უფლება არ ვიყო კარგი. იმხელა სითბო და სიყვარული მაჩუქა, არ ვიცი ეს როგორ უნდა დავუბრუნო. ჩემი ყოველი დღე მას ეკუთვნის და ასე იქნება სიცოცხლის ბოლომდე!

მედეა ზაბახიძე
photo: courtesy of Medea Zabakhidze
მედეა ზაბახიძე

- რატომ დაიწყეთ მისთვის საკვებით, ხილით, ბოსტნეულით სახალისო კომპოზიციების კეთება – უჭმელი ბავშვია?

- დანომ ბუნებრივ კვებას წლის და ოთხი თვის ასაკში დაანება თავი და, შესაბამისად, უკვე გაჩნდა აუცილებლობა, რომ ყველა მისთვის საჭირო და სასარგებლო პროდუქტი მიმეწოდებინა. მინდოდა მისთვის განსხვავებული, ფერადი, სახალისო და ლამაზი ყოფილიყო ის საკვები, რაც სასარგებლო და აუცილებელია ბავშვის ზრდა-განვითარებისთვის და ეს იდეაც ასე დაიბადა. უჭმელი არასოდეს ყოფილა, მეტიც, ძალიან ღორმუცელაა. თუმცა ეს ხერხი ძალიან ეფექტურია უჭმელ ბავშვებთან მიმართებაში.

თუ სასარგებლოდ ვმართავთ ბავშვის ემოციებს, ბავშვი „უჭმელი" აღარ იქნება. გამოთქმა "თვალი ჭამს", ყველაზე მეტად ბავშვების საკვების მიმართ დამოკიდებულებაში ამართლებს.

საკვებით შექმნილი კომპოზიცია
photo: courtesy of Medea Zabakhidze
საკვებით შექმნილი კომპოზიცია

- ფაქტიურად ხატავთ საკვებით. ფანქრით ხატვაც გეხერხებათ?

- არა, არასოდეს მიცდია ხატვა, ვფიქრობ, ფანქარზე უკეთ სამზარეულოს დანებს ვფლობ.

- თავად თუ იღებს მონაწილეობას ამ კომპოზიციების შექმნაში?

- ჯერ პატარაა მაგ საქმისთვის, თუმცა მომავალში აუცილებლად ჩავრთავ და, იმედი მაქვს, დანოსთვისაც სასიამოვნო გასართობი იქნება მსგავსი გაფორმებები.

საკვებით შექმნილი კომპოზიცია
photo: courtesy of Medea Zabakhidze
საკვებით შექმნილი კომპოზიცია

- რატომ გადაწყვიტეთ თქვენი ისტორია ხალხისთვის გაგეზიარებინათ, როგორ გაჩნდა ბლოგის შექმნის იდეა?

- როცა დანო წლის და თვეების გახდა, მე ცოტა დრო გამოვნახე და მოვიცალე სხვა რაღაცებისთვისაც. გავაკეთე ისტაგრამ-გვერდი, თავიდან ბლოგად არ იყო ჩაფიქრებული, უბრალოდ მინდოდა დანოს ფოტოები და ვიდეოები ერთ სივრცეში მქონოდა, თუმცა ძალიან მალე ბევრი ხელმომწერი გვყავდა და გადავწყვიტე, რადგან დანოს დაბადებიდან სრულიად მარტო ვზრდით მე და ჩემი მეუღლე, ჩემი გამოცდილება და ცოდნა სხვებისთვის გამეზიარებინა, ასევე სხვა მშობლებისგანაც მიმეღო რჩევები. მერე უკვე დავიწყე ბლოგების წერა.

საკვებით შექმნილი კომპოზიცია
photo: courtesy of Medea Zabakhidze
საკვებით შექმნილი კომპოზიცია

- რა გამოხმაურება მოჰყვა ბლოგს ქართველი მშობლების მხრიდან?

- საკმაოდ კარგი გამოხმაურება მოჰყვა და საკმაოდ მცირე დროში მოვახერხე ბევრი დედიკოს დამეგობრება. შვიდი თვეა რაც ბლოგების წერა დავიწყე და უკვე 6000 ხელმომწერი მყავს. ამ მცირე დროში ეს შედეგი ნამდვილად კარგია.

View this post on Instagram

🍎 🍏 🍊 ხილი და ბოსტნეული სასარგებლოა, მაგრამ,როგორ უნდა მივირთვათ ისინი ისე, რომ მათგან მაქსიმალური სარგებელი მივიღოთ? შეიძლება არ იცით, მაგრამ ხილსა და ბოსტნეულს გათლისას სასარგებლო ნივთიერებების მნიშვნელოვანი ნაწილი შორდება. გეტყვით,რომ ხილის კანი ხილზე არანაკლებ სასარგებლოა და უმჯობესია კანიანად მივირთვათ 🍎 იცოდით? თუ კანგაუცლელ ხილსა და ბოსტნეულს მიირთმევთ, ნაკლებად მოგშივდებათ😀 ხილისა და ბოსტნეულის კანში შემავალი ნივთიერებები შიმშილის გრძნობას თრგუნავს! ამას ძირითადად უჯრედისი (საკვები ბოჭკო) განაპირობებს. ხილში არსებული უჯრედისის მესამედი სწორედ ხილის კანშია მოთავსებული. ასევე უჯრედისი კუჭ-ნაწლავის ჯანმრთელ ფუნქციონირებასა და კუჭის მიკროფლორის შენარჩუნებას უწყობს ხელს👌 🍎 🍊 🍏 პ.ს როგორ მინდა ყველა სახლი 🌍ასეთი ფერადი იყოს რეალობაშიც 🌈🏘✨♥️☀️ 🍎 🍊 🍏 #ბლოგერი #ბლოგი #ბლოგერსაქართველო #ბლოგერიდედა #ინსტახალხი #ინსტაბლოგერი #ინსტაგრამი #ინსტაგრამინფლუენსერი #ინსტაგრამრჩეული #ინფლუენსერი #გაფორმება #foodart #babyfoodideas #babyfoodart #kidsfood #kidsfoodideas #kidsfoodart

A post shared by 🦕 DaNo 🦕 (@baby.dano.and.mommy) on

- ალბათ შიდა იზოლაციის დროს მეტი დრო გქონდათ თქვენი ფანტაზიის განსახორციელებლად...

- თვითიზოლაციისას ჩემი ცხოვრება დიდად არ შეცვლილა, მე ისედაც სულ სახლში ვარ უკვე მეორე წელია. თუმცა ჩემი მეუღლის სახლში ყოფნა ძალიან დამეხმარა და ჩემი ბლოგისთვის მეტი დრო მრჩებოდა.

107
პოლიცია აშშ-ის პროტესტების დროს

მოსაზრება: ამერიკას რასიზმსა და ანარქიას შორის არჩევანს სთავაზობენ

0
(განახლებულია 18:54 03.06.2020)
ეჭვგარეშეა, რომ ჯორჯ ფლოიდის დაღუპვა და შემდგომი პროტესტები, რომელიც ქაოსში გადაიზარდა, შეერთებულ შტატებში წინასაარჩევნო კამპანიაში აქტიურად გამოიყენებენ.

ირინა ალქსნისი

ვარაუდობენ, რომ მთავარ დარტყმას ტრამპს მიაყენებენ, რომელსაც მისი ოპონენტები რასიზმსა და თეთრი პოლიციელების სისასტიკეში ადანაშაულებენ. ამ უკანასკნელებმა კიდევ ერთი აფროამერიკელი მოკლეს. რაც უფრო ვითარდება მოვლენები, მით უფრო ნათელი ხდება, რომ რეალობას კიდევ შეუძლია დემოკრატებს სიურპრიზი შესთავაზოს.

ამერიკის ლიდერმა ერთი სრულყოფილად დადგმული სპექტაკლი მოაწყო. ის მკაცრი სიტყვებით გამოვიდა, რომელშიც: ა) მან აჯანყებულებს ,,მეამბოხეები“ უწოდა, ბ) რამდენიმე შტატის ხელისუფლება მშვიდობიანი მოქალაქეების კრიმინალებისაგან დაცვის უუნარობაში დაადანაშაულა, გ) დაჰპირდა ყველა ფედერალური რესურსის (არმიის ჩათვლით) მობილიზებას, რათა „ბოლო მოეღოს განადგურებასა და ცეცხლს“. 

ეს ყველაფერი თეთრი სახლის ვარდების ბაღში მოხდა, სადაც აღწევდა შუქბგერითი ყუმბარებისა და ცრემლსადენი გაზის ჭურვების აფეთქების ხმა. ეს პოლიცია ათავისუფლებდა ლაფაიეტის სკვერის მიდამოებს მომიტინგეებისგან კომენდანტის საათის დროს.

შემდეგ დონალდ ტრამპმა დატოვა რეზიდენცია და გაწმენდილი ტერიტორიის გავლით წმინდა იოანეს ეკლესიამდე მივიდა, რომელსაც წინა დღეს რადიკალებმა ცეცხლი წაუკიდეს. იქ მან ასწია ბიბლია და თქვა, რომ „შეერთებული შტატები უდიდესი ქვეყანაა მსოფლიოში“, და სახელმწიფოებს უსაფრთხოების უზრუნველყოფას დაპირდა.

პრეზიდენტის „პერფომანსს“ რეაქცია მყისიერად მოჰყვა. კონგრესში დემოკრატების ლიდერებმა ერთობლივი განცხადება გაავრცელეს, რომელშიც ტრამპის ქმედებები დაახასიათეს, როგორც „მშიშარა, არაეფექტური და საშიში“.

არანაკლებ დრამატულად გამოვიდა რამდენიმე შტატის ლიდერი, დემოკრატიული პარტიის წარმოადგენლები, კერძოდ, ნიუ-იორკისა და ორეგონის გუბერნატორები. ვაშინგტონის მერმა მურიელ ბაუზერმა ლაფაიეტის სკვერში „უიარაღო მომიტინგეების“ დარბევას სირცხვილი უწოდა და ხაზგასმით აღნიშნა, რომ ფედერალურმა ( და არა ადგილობრივმა — ეს ძალზე მნიშვნელოვანია!) პოლიციამ თეთრი სახლის წინ მომიტინგეთა დარბევა კომენდანტის საათის დაწყებამდე 25 წუთით ადრე დაიწყო. შემდეგ მერმა ამაღელვებლად დასძინა: „ვაშინგტონის მცხოვრებლებო, სახლში წადით. იყავით უსაფრთხოდ!“ 

                                                                 რუსული სტანდარტებით, ყველაფერი ძალიან უცნაურად გამოიყურება. ერთი მხრივ, აშკარაა, რომ ადგილობრივი და რეგიონალური ხელისუფლების მიერ გატარებული ზომები ხშირად აშკარად არ არის საკმარისი ვაკჰანალიის შესაჩერებლად. მედია სავსეა მტკიცებულებებით, თუ როგორ უბრალოდ ადევნებს თვალს პოლიცია ქალაქის კვარტლებში ქაოსსა და მაღაზიების ძარცვას. მეორე მხრივ, პრეზიდენტი სულ უფრო მეტად იმუქრება და დაპირებას იძლევა, მაგრამ ვითარების სტაბილიზაციისთვის არსებითად არაფერს აკეთებს.

ეს თავსატეხი მოიცავს როგორც ამერიკის სახელმწიფო სისტემის მახასიათებლებს, ასევე ქვეყანაში მიმდინარე პოლიტიკური დაპირისპირებების სიმკაცრეს.

შეერთებულ შტატებში ფედერალურ ცენტრსა და შტატებს შორის უფლებამოსილების გამიჯვნის საკმაოდ რთული სისტემა არსებობს, მაგრამ მთლიანობაში რეგიონალური ხელისუფლება სრულ პასუხისმგებლობას იღებს იმაზე, რაც ხდება მათ ტერიტორიაზე. ეს ეხება სამართალდამცავ სფეროსაც, რის წყალობითაც შტატებში სამართალდამცავი ორგანოების ძალზე რთული სტრუქტურაა.

გარდა ამისა, მხედველობაშია მისაღები, რომ არეულობებში, პირველ რიგში, უშუალოდ რასობრივი ნიშნით, ამერიკისთვის განსაკუთრებული არაფერია. ის რეგულარულად იფეთქებს ხოლმე. ყველაზე ცნობილი, ალბათ, 1992 წლის ლოს-ანჯელესის ბუნტია, მაგრამ ბევრს კარგად ახსოვს 2014 წელში ფერგიუსონში მიმდინარე მღელვარება.

ფედერალები ერევიან მხოლოდ შტატის ხელისუფლების თხოვნით, თუ ისინი მიიჩნევენ, რომ თავად ვერ გაუმკლავდებიან. პრეზიდენტს ასევე აქვს უფლებამოსილება, გუბერნატორის გარეშე გამოიყენოს ძალა, მაგრამ ამ შემთხვევაში მას ეკისრება მთელი პასუხისმგებლობა. 

აქ ყველაზე საინტერესო ისაა, რომ ჯორჯ ფლოიდის დაღუპვის გამო პროტესტებმა მოიცვა შტატების უმეტესობა (დაახლოებით 45 შტატი 50-დან), მაგრამ თავდასხმების, ძალადობისა და მოროდიორობის კერები ძირითადად დემოკრატიული პარტიის „მამულებში“ გვხვდება. ეს ის რეგიონებია, სადაც ტრამპს გამარჯვების მცირედი შანსიც კი არ აქვს.

ყველაზე ნათელი მაგალითი, უდავოდ, ნიუ-იორკია. მრავალეროვნული, ტოლერანტული და ხაზგასმით ლიბერალური მეგაპოლისი აგრძელებს განადგურებას, ქალაქისა და შტატის ხელმძღვანელობა გაურკვევლად ლუღლუღებს. ნიუ-იორკის შტატის გუბერნატორმა ენდრიუ კუომომ განაცხადა, რომ დანაშაული, რა თქმა უნდა, დაუშვებელია, მაგრამ აჯანყებულები „დემონსტრანტებს შეერივნენ“. როგორც ჩანს, მისი აზრით, ეს საკმარისი მიზეზია იმისთვის, რომ არაფერი გააკეთონ.         დემოკრატი გუბერნატორების მხრიდან მკაცრი ზომების მიღების შეუძლებლობა მარტივად აიხსნება: ისინი ელექტორატს ეყრდნობიან, რომელთა მნიშვნელოვანი ნაწილი უკიდურესად ნეგატიურად აღიქვამს მოროდიორების წინააღმდეგაც კი ძალის გამოყენებას. უფრო მეტიც, დემოკრატიულმა პარტიამ ,,თეთრ რასისტ, შოვინისტსა და ქალთმოძულე“ ტრამპთან ბრძოლაში ლიბერალური ტენდენცია  საკუთარი ხელებით გააძლიერა  ბოროტმოქმედებისა და კრიმინალების მიმართ ლმობიერი დამოკიდებულებით, რომლებიც ,,დისკრიმინაციულ უმცირესობას“ მიეკუთვნებიან.

ამერიკაში სამოქალაქო-პოლიტიკური დაპირისპირების თითოეულმა მხარემ თავისი არჩევანი, ფსონი გააკეთა. 

დემოკრატები იმედოვნებენ, რომ მღელვარება თავისთავად  იფეთქებს  და დღის წესრიგში კვლავ შესაძლებელი გახდება მაქსიმალური კონცენტრირება თეთრი კონსერვატორების რასიზმის წინააღმდეგ ბრძოლაზე.

პრეზიდენტი აშკარად ელის, რომ რესპუბლიკელ გუბერნატორთა შტატები სწრაფად აღადგენენ წესრიგს, არ დაუშვებს ძარცვა-გლეჯის გავრცელებას. მაგრამ დაზარალებული ქალაქების კადრები და დემოკრატ პოლიტიკოსების უუნარობა გაუმკლავდნენ სიტუაციას არა მხოლოდ აძლიერებს რესპუბლიკური შტატების კონსოლიდაციას, არამედ  მერყევი რეგიონების ქანქარას ტრამპის მხარეს არხევს.

ამასთან, მნიშვნელოვანია, რომ არავინ ცდილობს ორივე პრობლემის გადაწყვეტის აუცილებლობის შესახებ საკითხი დააყენოს: სისტემური რასიზმი ამერიკის სამართალდამცავი სისტემების მიერ ძალადობის გადაჭარბებული გამოყენების ტენდენციის სახით, და ნებისმიერი არეულობის გადამწყვეტად ჩახშობის აუცილებლობა, რაც არ უნდა კეთილშობილურ ლოზუნგებს ეფარებოდნენ ისინი.

როგორც ჩანს, ამერიკისთვის ეს, როგორც წინა ათწლეულების განმავლობაში, კვლავაც გადაულახავ ამოცანად რჩება. 

P.S. რედაქცია შესაძლოა არ ეთანხმებოდეს ავტორის მოსაზრებებს!

0