დეპუტატები

საქართველოს პარლამენტში უსაფრთხოების საგანგებო რეჟიმი დააწესეს

42
(განახლებულია 19:36 22.07.2021)
პარლამენტში, სადაც რიგგარეშე სხდომა მიმდინარეობს, არ შეუშვეს რიგი არასამთავრობო ორგანიზაციების წარმომადგენლები, თუ რატომ, ეს სპიკერმა კახა კუჭავამ განმარტა.

თბილისი, 22 ივლისი – Sputnik. საქართველოს პარლამენტში უსაფრთხოების საგანგებო რეჟიმი მოქმედებს, რათა საფრთხე არ შეექმნას საკანონმდებლო ორგანოს მუშაობას. ამის შესახებ საქართველოს პარლამენტის თავმჯდომარემ კახა კუჭავამ ბიუროს სხდომაზე განაცხადა.

ეს განცხადება კუჭავამ მას შემდეგ გააკეთა, რაც ოპოზიციური ფრაქციის „ლელო – პარტნიორობა საქართველოსთვის“ თავმჯდომარემ ბადრი ჯაფარიძემ მოითხოვა განემარტათ, რატომ არ უშვებენ პარლამენტის შენობაში არასამთავრობო ორგანიზაციების წარმომადგენლებს, რომლებსაც საშვები ჰქონდათ. ჯაფარიძის თქმით, მათ პარლამენტში პრესკონფერენციის ჩატარება სურდათ.

„რამდენიმე არასამთავრობო ორგანიზაციამ საშვი ითხოვა. მათ მივეცით, მაგრამ კვლავ არ უშვებენ. თუ ეს უსაფრთხოების ზომების გამო ხდება, მაშინ წინასწარ გვითხარით, რომ ამ ხუთი არასამთავრობო ორგანიზაციის შემოშვება არ შეიძლება, რადგან უსაფრთხოების რისკებს ქმნიან. არ შეიძლება ადამიანების ასე უსაფუძვლოდ შეზღუდვა“, – მიმართა ჯაფარიძემ კუჭავას.

პარლამენტის თავმჯდომარემ, თავის მხრივ, განაცხადა, რომ მომავალში პარლამენტში საგანგებო რეჟიმის დაწესების შესახებ წინასწარ გახდება ცნობილი.

„ნახეთ ბოლო რიგგარეშე სხდომა როგორ წარიმართა. ერთ-ერთი სხდომა ჩაიშალა კიდეც. სწორედ წესრიგია მთავარი, რაც მე უნდა უზრუნველვყო. მოქმედებს უსაფრთხოების რეჟიმი იმისთვის, რომ პარლამენტის მუშაობას საფრთხე არ შეექმნას“, – განაცხადა კუჭავამ.

კვირას პარლამენტში შინაგან საქმეთა მინისტრის ვახტანგ გომელაურის სიტყვით გამოსვლა ჩაიშალა. როგორც კი მან თავისი გამოსვლა დაიწყო „TV პირველის“ ოპერატორის ლექსო ლაშქარავას გარდაცვალების გამო სამძიმრის სიტყვებით, ტრიბუნასთან ოპოზიციონერი დეპუტატები მივიდნენ ოპერატორის ფოტოებით ხელში და ტრიბუნის წინ განლაგდნენ. ამის გამო მათსა და მმართველი პარტიის წარმომადგენელ დეპუტატებს შორის შეხლა–შემოხლა გაიმართა.

ჟურნალისტებმა, თავის მხრივ, აივანზე გამოფინეს ბანერები წარწერებით: „დასაჯეთ დამნაშავეები“ და „აიღეთ პოლიტიკური პასუხისმგებლობა“. საბოლოოდ ეს სხდომა ჩაიშალა.

42
თემები:
საქართველოს პარლამენტი (338)
ალეკო ელისაშვილი და ლევან იოსელიანი პარლამენტში

ოპოზიციური პარტიების უმრავლესობა პარლამენტში დარჩა

16
(განახლებულია 19:10 29.07.2021)
ოპოზიციური პარტიები თითქმის 24 საათის განმავლობაში მართავდნენ კონსულტაციებს მმართველი პარტიის ქმედებებზე საპასუხო ნაბიჯებთან დაკავშირებით

თბილისი, 29 ივლისი – Sputnik. ოპოზიციური პარტიების უმრავლესობამ მიიღო გადაწყვეტილება არ თქვას უარი სადეპუტატო მანდატებზე მმართველი პარტია „ქართული ოცნება - დემოკრატიული საქართველოს“ გადაწყვეტილების გამო.

გუშინ მმართველმა პარტიამ ანულირებულად  გამოაცხადა ევროპული საბჭოს პრეზიდენტ შარლ მიშელის ინიციატივით 19 აპრილს ხელმოწერილი კომპრომისული შეთანხმება. თავისი გადაწყვეტილების მიზეზად „ქართულ ოცნებაში“ მეორე მხარის მიერ ვალდებულებების შეუსრულებლობა დაასახელეს.

ოპოზიციური პარტიები თითქმის 24 საათის განმავლობაში მართავდნენ კონსულტაციებს მმართველი პარტიის ქმედებებზე საპასუხო ნაბიჯებთან დაკავშირებით.

საბოლოო ჯამში საპარლამენტო მანდატებზე უარი განაცხადეს პარტია „გირჩი - მეტი თავისუფლებას“ ლიდერმა ზურაბ ჯაფარიძემ, რესპუბლიკური პარტიის ყოფილმა წარმომადგენელმა, დამოუკიდებელმა დეპუტატმა თამარ კორძაიამ და ყველაზე მსხვილი ოპოზიციური პარტია „ერთიანი ნაციონალური მოძრაობის“ ლიდერმა ნიკა მელიამ. თუმცა „ნაცმოძრაობის“ დანარჩენი დეპუტატები პარლამენტში მუშაობას გააგრძელებენ. მელიას თქმით, ეს საჭიროა იმისათვის, რომ აიძულონ „ქართული ოცნება“ ბოლომდე მიიყვანოს პროპორციულ საარჩევნო სისტემაზე გადასვლის საკითხი.

საუბარია საკონსტიტუციო ცვლილებებზე, რომელთა თანახმად ოქტომბრის არჩევნებზე გამსვლელი ბარიერი 2%-მდე უნდა შემცირდეს, ხოლო თავად არჩევნები მხოლოდ და მხოლოდ პროპორციული სისტემით უნდა ჩატარდეს.

ცვლილებების მისაღებად საჭიროა 113 დეპუტატის თანხმობა. „ქართულ ოცნებას“ პარლამენტში სულ 84 მანდატი აქვს და „ნაცმოძრაობის“ დარჩენილი 31 დეპუტატის ხმები გადამწყვეტი შეიძლება გახდეს.

იმავე მიზეზით არ აპირებს პარლამენტის დატოვებას არც პარტია „ლელო საქართველოსთვის“.

ასევე პარლამენტში რჩება პარტია „სტრატეგია აღმაშენებელი“.

„ამ ეტაპზე პარლამენტის დატოვებას არ განვიხილავთ“, - განაცხადა პარტიის დეპუტატმა თეონა აქუბარდიამ.

საკანონმდებლო ორგანოში რჩებიან ასევე ექს-პრემიერ გიორგი გახარიას პარტიის „საქართველოსთვის“ დეპუტატები.

„მიგვაჩნია, რომ საპარლამენტო ბოიკოტი არ არის შედეგზე ორიენტირებული გადაწყვეტილება. ვფიქრობ, მმართველ გუნდს მაქსიმალურად დისკომფორტი უნდა შევუქმნათ პარლამენტში ყოფნით, მწვავე კითხვების დასმით“, - განაცხადა პარტიის დეპუტატმა, ბექა ლილუაშვილმა.

იგივე გადაწყვეტილება მიიღეს პარტია „მოქალაქეების“ წარმომადგენლებმაც.

მიუხედავად იმისა, რომ ოპოზიცია თითქმის მთლიანი შემადგენლობით რჩება პარლამენტში, საკონსტიტუციო ცვლილებების მიღების საკითხი მაინც ღია რჩება.

მმართველ პარტიაში უკვე განაცხადეს, რომ 19 აპრილის შეთანხმებით გათვალისწინებული ყველა საკანონმდებლო ინიციატივა იქნება მიღებული მხოლოდ იმ შემთხვევაში, თუ „ქართული ოცნება“ ამას საჭიროდ ჩათვლის.

16
ირაკლი კობახიძე

კრიტიკის ქარცეცხლში: დასავლეთის რეაქცია „ქართული ოცნების“ დემარშზე

28
(განახლებულია 19:35 29.07.2021)
„ქართული ოცნების“ გადაწყვეტილებამ 19 აპრილის შეთანხმებიდან გამოსვლის შესახებ ერთნაირად გაუცრუა იმედები საქართველოს როგორც ევროპელ, ისე ოკეანისგაღმელ პარტნიორებს

თბილისი, 29 ივლისი – Sputnik. ზუსტად 100 დღის შემდეგ მმართველმა პარტიამ „ქართული ოცნება – დემოკრატიული საქართველო“ გააუქმა შარლ მიშელის შეთანხმება, რომლისკენაც მხარეები დასავლელი პარტნიორების შუამავლობით თითქმის ნახევარი წელი მიდიოდნენ.

„ქართულ ოცნებასა“ და ოპოზიციას შორის ხელმოწერილი დოკუმენტი ევროპული საბჭოს პრეზიდენტის, შარლ მიშელის უშუალო მონაწილეობით იყო შედგენილი. სპეციალურად ამისთვის მას არაერთხელ მოუწია თბილისში ჩამოსვლა.

შედეგად მიმდინარე წლის 19 აპრილს დოკუმენტს ხელი მოაწერა პარლამენტში 2020 წლის არჩევნების შედეგად გასული ცხრა პარტიიდან ექვსმა. დოკუმენტს არ შეუერთდა ყველაზე დიდი ოპოზიციური პარტია „ერთიანი ნაციონალური მოძრაობა“.

სწორედ ეს ფაქტი მოიშველიეს „ქართული ოცნების“ ლიდერებმა მათი მოულოდნელი გადაწყვეტილების არგუმენტად. ამასთან, მმართველ პარტიაში მიიჩნევენ, რომ მოთხოვნების ძირითადი ნაწილი უკვე შესრულებულია.

აშშ–ის რეაქცია

ეს არგუმენტები არადამაჯერებელი აღმოჩნდა ამერიკელი სენატორებისთვის, რომლებიც უკვე დიდი ხანია საქართველოს საკითხებზე მუშაობენ. მკვეთრი განცხადება „ქართული ოცნების“ გადაწყვეტილებაზე შვიდი სენატორისგან შემდგარმა ორპარტიულმა ჯგუფმა გაავრცელა.

„ძალზე იმედგაცრუებული ვართ ბოლოდროინდელი მოვლენების გამო საქართველოში, რომლებიც ძირს უთხრის იმ რეფორმებს, რასაც 19 აპრილის შეთანხმება ედო საფუძვლად. შეერთებული შტატები ევროკავშირთან პარტნიორობით მჭიდროდ თანამშრომლობდა პოლიტიკურ პარტიებთან, რათა დადებულიყო ძლიერი მრავალპარტიული შეთანხმება, რომელიც გზას გაუხსნიდა კრიტიკულად მნიშვნელოვან სასამართლო და საარჩევნო რეფორმებს. იმედები გაგვიცრუა იმან, რომ ყველა არჩეულმა პარტიამ შეთანხმებას ხელი არ მოაწერა, ან კეთილსინდისიერად არ შეასრულა.“

სენატორები აღნიშნავენ, რომ „ქართული ოცნების“ გადაწყვეტილება უფრო მეტ იმედგაცრუებას იწვევს იმის გათვალისწინებით, რომ ამჟამად საქართველო დემოკრატიული განვითარების მნიშვნელოვან პერიოდს გადის. ისინი აღნიშნავენ, რომ პირველ რიგში სწორედ მმართველი პარტიაა ვალდებული, „დადგეს პოლიტიკურ განხეთქილებაზე მაღლა და გააგრძელოს ინკლუზიური, მრავალპარტიული საპარლამენტო პროცესი, რომელიც ყველა ქართველისთვის მოიტანს სარგებელს“.

სენატორები აღნიშნავენ, რომ საქართველოში დემოკრატიული პრინციპების წინსვლაში მარცხმა შეიძლება დააზიანოს ქვეყნის ურთიერთობები ამერიკის შეერთებულ შტატებთან, ასევე ხელი შეუშალოს ინტეგრაციის პროცესს ნატოსა და ევროკავშირში.

„ქართული ოცნების“ გადაწყვეტილება შარლ მიშელის შეთანხმებიდან გამოსვლის თაობაზე ნეგატიურად შეაფასა ასევე სენატორმა, საგარეო საქმეთა კომიტეტის წევრმა ჯიმ რიშმა.

„ქართული ოცნების" გადაწყვეტილება, გავიდეს 19 აპრილის შეთანხმებიდან, მთავრობის პასუხისმგებლობის მოხსნაა და როგორც ჩანს, მიუთითებს იმაზე, რომ პარტიას მხოლოდ საკუთარი მომავალი აღელვებს - არა მთელი ქვეყნის. ქართველი ხალხი უკეთესს იმსახურებს“, – დაწერა ჯიმ რიშმა Twitter–ში.

დასანანი უწოდა „ოცნების“ გადაწყვეტილებას აშშ–ის პრეზიდენტ ჯო ბაიდენის მრჩეველმა მაიკლ კარპენტერმა.

„ეს ძალიან სამწუხაროა. ევროკავშირის შუამავლობით მიღწეული შეთანხმება მხარს უჭერდა კანონის უზენაესობას, პოლიტიკურ ინკლუზიურობას და თამაშის თანაბარ პირობებს. სამწუხაროა, რომ მმართველი პარტია აქედან გავიდა“, – დაწერა კარპენტერმა Twitter–ში.

სალომე ზურაბიშვილი ევროპული საბჭოს პრეზიდენტს შეხვდა>>

ევროპის რეაქცია

19 აპრილის შეთანხმების შესრულების აუცილებლობაზე Twitter–ის თავის გვერდზე წერს ევროპარლამენტის დეპუტატი, რუმინელი პოლიტიკოსი კორინა კრეცუ.

„საქართველოს სტაბილურობა და ევროპული გზა არ შეიძლება იყოს მოლაპარაკებების საგანი, ეს უნდა იყოს გარანტირებული! ვაფასებ პრეზიდენტ ზურაბიშვილისა და პრემიერ-მინისტრ ღარიბაშვილის ძალისხმევას. ყველა პოლიტიკურმა ძალამ უნდა უზრუნველყოს, რომ 19 აპრილის შეთანხმება სრულად იყოს დაცული“, – დაწერა კრეცუმ.

„ქართული ოცნების“ გადაწყვეტილება გააკრიტიკა ასევე ესტონეთის ყოფილმა პრეზიდენტმა ტოომას ჰენდრიკ ილვესმა.

„ტრანსატლანტიკურ სტრუქტურებთან ახლოს ყოფნის საუკეთესო ხერხი არ არის, როცა აშშ–ის სენატის საერთაშორისო ურთიერთობების კომიტეტის კრიტიკას გამოიწვევს“, – წერს ილვესი თავის გვერდზე Twitter–ში.

საქართველოში მიმდინარე მოვლენებზე რეაქცია გამოხატა ასევე შვედეთის ყოფილმა პრემიერ–მინისტრმა კარლ ბილდტმა.

„სერიოზული და ღრმად სამწუხარო მოვლენების განვითარება საქართველოში – მმართველმა პარტიამ მიატოვა ევროკავშირის შუამდგომლობით მიღწეული შეთანხმება ქვეყნის დემოკრატიულ გზაზე“, – წერს ბილდტი.

ევროპარლამენტი საქართველოში მორიგი პოლიტიკური კრიზისის განმუხტვას შეეცდება>>

ასეა თუ ისე, საქართველო ახლა მორიგი პოლიტიკური კრიზისის წინაშე დგას. მის კიდევ ერთხელ განმუხტვას შეეცდება ევროპული საბჭოს პრეზიდენტი შარლ მიშელი – ის საქართველოს პოლიტიკურ სუბიექტებთან კონსულტაციების მორიგი რაუნდისთვის ემზადება.

28
თემები:
საქართველოს პოლიტიკური ცხოვრება
ვაქცინაცია

ვაქცინაციის პროცესში ჩართულობა იმატებს - აცრებისთვის განკუთვნილი ზონები ფართოვდება

0
სპეციალისტები ქვეყანაში მიმდინარე ვაქცინაციის პროცესში მოქალაქეთა ჩართულობას დადებითად აფასებენ და ფიქრობენ, რომ ქვეყანა იმუნიზაციის დაგეგმილ ნიშნულს უახლოეს მომავალში მიაღწევს.

თბილისი, 29 ივლისი - Sputnik. ბოლო პერიოდში საქართველოში იმუნიზაციის პროცესში ჩართული მოქალაქეების რაოდენობა საგრძნობლად იმატებს, ქვეყანაში მიმდინარე ვაქცინაციის პროცესს სპეციალისტები დადებითად აფასებენ.

ეპიდემიოლოგების მიიჩნევენ, რომ საქართველოში კორონავირუსის დასამარცხებლად მოსახლეობის 70% უნდა აიცრას. ამ დროისთვის ორჯერადად აცრილია საქართველოს მოსახლეობის დაახლოებით 4%. 29 ივლისის დილის მონაცემებით, საქართველოს მასშტაბით აიცრა 17.133 ადამიანი.

ვაქცინაციის ტემპის ზრდასთან დაკავშირებით, ნიკოლოზ ყიფშიძის სახელობის ცენტრალურ საუნივერსიტეტო (ყოფილი რესპუბლიკური კლინიკა) და ვახტანგ ბოჭორიშვილის კლინიკამ აცრებისთვის განკუთვნილი შესაბამისი ზონები გამოყო. ვაქცინირებული პირებისთვის კლინიკებმა ასევე ეზოში განათავსეს კარვები.

როგორც რესპუბლიკური საავადმყოფოს დირექტორის მოადგილე ჯავარა უგრეხელიძე აცხადებს, ბოლო 24 საათში იმუნიზაციის პროცესში ჩართული მოქალაქეების რაოდენობა საკმაოდ მაღალი იყო და ქვეყანა დაგეგმილ ნიშნულს ძალიან მალე მიაღწევს.

„გუშინ, საერთო რაოდენობა დღიურად აცრილებისა იყო 2500-ზე მეტი. 15 კაბინეტი 12 საათიან რეჟიმში Pfizer-ზე მუშაობს. Pfizer-ზე კვლავ განსაკუთრებით დიდი მოთხოვნაა. იცით, რომ დამატებით ჯავშნებიც დაემატა გუშინ საღამოს და მოქალაქეები თავისუფლად ახერხებენ დაჯავშნას“, - აცხადებს ჯავარა უგრეხელიძე.

ქვეყანაში ვაქცინაციის ტემპის ბოლოდროინდელ ზრდაზე საუბრობს იაშვილის სახელობის ბავშვთა ცენტრალური საავადმყოფოს სამედიცინო დირექტორი ივანე ჩხაიძეც. ის იმუნიზაციის პროცესში მოქალაქეების აქტიურ ჩართულობას დადებითად აფასებს.

„აგვისტოსთვის ჩვენ უფრო მეტი ადამიანი დაგვიგროვდება ქვეყანაში ორჯერადად ვაქცინირებული. „დელტა“ ვარიანტის გავრცელების შეჩერების ერთადერთი რესურსი ორჯერადად ვაქცინირებული ადამიანების რაოდენობის გაზრდაა“, - აცხადებს ივანე ჩხაიძე.  

საქართველოში მოსახლეობის მასობრივი ვაქცინაცია 5 ივლისიდან დაიწყო, ხოლო მასობრივი ხასიათი ვაქცინაციის კამპანიამ 5 ივლისიდან მიიღო. ამ მომენტისთვის საქართველოში ვაქცინაცია მიმდინარეობს Pfizer-ის, AstraZeneca-ს, Sinovac-ისა და Sinopharm-ის პრეპარატებით. ამ დროისთვის, რეგისტრაცია ამავე ვაქცინებზე მიმდინარეობს.

29 ივლისის მონაცემებით, საქართველოში ამ დროისათვის სულ აცრილია 450.026 პირი, აქედან სრულად, ანუ ორი დოზით – 148.972 ადამიანი.

0