ლიეტუვის პრეზიდენტი საქართველოშია

მოხარული ვარ საქართველოში ყოფნით ლიეტუვის პრეზიდენტი

43
(განახლებულია 20:37 11.06.2021)
საქართველოში ვიზიტის ფარგლებში გიტანას ნაუსედა შეხვედრებს მართავს საქართველოს საკანონმდებლო და აღმასრულებელი ხელისუფლების წარმომადგენლებთან.

თბილისი, 11 ივნისი – Sputnik. ჩვენთვის მნიშვნელოვანია იმის ცოდნა, რომ საქართველოს ლიეტუვის სახით ჰყავს ძლიერი მეგობარი, რომელიც მიჰყვება ამ რთულ გზაზე, განაცხადა საქართველოს პრეზიდენტმა სალომე ზურაბიშვილმა ლიეტუველ კოლეგასთან შეხვედრის შემდეგ. 

ლიეტუვის პრეზიდენტი გიტანას ნაუსედა მეუღლესთან ერთად საქართველოს ოფიციალური ორდღიანი ვიზიტით 10 მაისს ეწვია. ორი ქვეყნის პრეზიდენტების შეხვედრა ორბელიანის სასახლეში გაიმართა. პირისპირ და გაფართოებულ ფორმატში შეხვედრის დასრულების შემდეგ ლიდერებმა მედიისთვის ერთობლივ ბრიფინგზე განცხადებები გააკეთეს.

„მოხარული ვარ, რომ დღეს იმყოფებით საქართველოში. ეს არის თქვენი პირველი ვიზიტი ამ ქვეყანაში, რომელიც კიდევ ერთხელ ადასტურებს თქვენი ქვეყნის მხარდაჭერას საქართველოს მიმართ. ეს წელი საქართველოსთვის პოლიტიკურად მნიშვნელოვანი წელია – ჩვენ დავძლიეთ შიდა პოლიტიკური კრიზისი, რაშიც ევროკავშირმა მნიშვნელოვანი როლი ითამაშა. ეს იყო ნიშანი იმისა, თუ რამდენად მნიშვნელოვანია ევროკავშირისთვის საქართველოს პოლიტიკური სტაბილურობა. ჩვენ ამის შესახებ არასდროს არ უნდა დავივიწყოთ“, – განაცხადა ზურაბიშვილმა.

საქართველოს სახელმწიფო მეთაურის თქმით, ლიეტუვა საქართველოს ვაქცინაციის პროცესში დახმარებას დაჰპირდა.

„ლიეტუვა ჩვენს ქვეყანას ვაქცინებს გადმოსცემს, რომლის რაოდენობაც დასაზუსტებელია. ეს არის სოლიდარობის ნიშანი და ჩვენთვის მნიშვნელოვანია მსგავსი სოლიდარობის გამოხატულება ჩვენი ევროპელი პარტნიორების მხრიდან“, – აღნიშნა ზურაბიშვილმა.

პრეზიდენტის განმარტებით, შეხვედრაზე საუბარი შეეხო ტურიზმის თემას და აღინიშნა, რომ საქართველოს საზღვრები ვაქცინირებული ტურისტებისთვის ღიაა. 

„საქართველოსთვის აუცილებელია რაც შეიძლება მალე აღდგეს ტურიზმის სფეროში ურთიერთობები... ვიცით, რომ ჩვენი მეგობარი ქვეყნების მოსახლეობის მხრიდან საქართველოსადმი ინტერესი დიდია და იმედი მაქვს, რომ ზაფხულში ჩვენ ბევრ ტურისტს მივიღებთ. ჩვენ გვჭირდება უფრო მეტი კულტურული ურთიერთობები ჩვენს მოქალაქეებს შორის და ჩვენ ვისაუბრეთ შესაძლებლობაზე, რომ დავგეგმოთ ლიეტუვის დღეები საქართველოში და საქართველოს დღეები ლიეტუვაში. ეს ტურიზმის განვითარების ერთ-ერთი ფორმაა“, – აღნიშნა ზურაბიშვილმა.

ლიეტუვის პრეზიდენტმა, თავის მხრივ, ზურაბიშვილს მადლობა გადაუხადა გულთბილი მიღებისთვის.

„მოხარული ვარ, რომ თქვენს ქვეყანაში პრეზიდენტის რანგში პირველად ვიმყოფები. ბევრი მსმენია იმის შესახებ, თქვენი ქვეყანა რამდენად ლამაზი და სტუმართმოყვარეა. ახლა შემიძლია დაგიდასტუროთ, რომ ეს მართლაც ასეა.მადლობა პრეზიდენტს თბილი მიღებისთვის. მახსოვს ჩვენი პირველი შეხვედრა ლიეტუვაში. ლიეტუვა და საქართველო გეოგრაფიული მდებარეობით ერთმანეთისგან შორს არიან, მაგრამ მათ შორის ძლიერი კავშირია. ჩვენ ჩვენი ღირებულებებით ძალზე ახლოს ვართ“, – განაცხადა გიტანას ნაუსედამ.

ლიეტუვის პრეზიდეტმა ასევე ისაუბრა საქართველოს შიდაპოლიტიკურ ვითარებაზე და აღნიშნა, რომ პოლიტიკური სტაბილურობა, ერთიანობა და მიმზიდველი საპარლამენტო პროცესი პრიორიტეტულია.

„19 აპრილს მიღწეული შეთანხმება უნდა განხორციელდეს და ამაში ყველა პოლიტიკურმა პარტიამ უნდა მიიღოს მონაწილეობა. ეს პოლიტიკური კრიზისის დასრულებას და იმ საკითხებზე გადასვლის შესაძლებლობას მოგცემთ, რომელიც საქართველოსთვის მნიშვნელოვანია. ესაა რეფორმები და ევროკავშირში ინტეგრაცია, ასევე დემოკრატიის განმტკიცება, საარჩევნო და სასამართლო რეფორმების განხორციელება“, – აღნიშნა ლიეტუვის პრეზიდენტმა. 

ვიზიტის ფარგლებში ლიეტუვის პრეზიდენტმა ასევე გამართა შეხვედრა პრემიერ-მინისტრ ირაკლი ღარიბაშვილთან.

შეხვედრაზე მხარეებმა განიხილეს ქვეყნებს შორის ორმხრივი ურთიერთობები. ყურადღება გამახვილდა საქართველოსა და ლიეტუვას შორის ეკონომიკური თანამშრომლობის გაღრმავებაზე, რომელიც განსაკუთრებით მნიშვნელოვანია პოსტპანდემიურ პერიოდში.

ვიზიტის ფარგლებში დაგეგმილია ლიეტუვის პრეზიდენტის შეხვედრა პარლამენტის სპიკერ კახა კუჭავასთან და კათოლიკოს–პატრიარქთან ილია მეორესთან.

საქართველომ და ლიეტუვამ დიპლომატიური ურთიერთობები 1994 წლის 16 სექტემბერს დაამყარეს. ქვეყნები თანამშრომლობენ ეკონომიკის, კულტურის, განათლების, სოფლის მეურნეობის, ჯანდაცვის სფეროებში.

ქართულ ენაში 2018 წლის მაისში ოფიციალურად დამკვიდრდა დასახელება ლიეტუვა (Lietuva), რომელსაც მანამდე ლიტვას ვუწოდებდით. ეს საქართველოს სახელმწიფო ენის დეპარტამენტის მხრიდან საპასუხო ჟესტი იყო იმაზე, რომ ლიეტუვურ ენაში ასევე დამკვიდრდა საქართველოს ავთენტური დასახელება (Sakartvelo). ამგვარად ლიეტუვა პირველი ქვეყანა გახდა, რომელმაც საქართველოს მიმართ ავთენტური დასახელების გამოყენება დაიწყო.

43
თემები:
საქართველოს საგარეო პოლიტიკა (303)
გიორგი გახარია

„ქართულ ოცნებაში" განმარტეს თუ როდის დააკავებენ გახარიას

49
(განახლებულია 10:16 17.06.2021)
პრემიერ-მინისტრის თანამდებობიდან წასვლის შემდეგ გახარიამ შექმნა თავისი პარტია და სამიზნე ელექტორალური ჯგუფების თვალსაზრისით „ქართული ოცნების“ კონკურენტი გახდა.

თბილისი, 17 ივნისი — Sputnik. ყოფილ პრემიერ–მინისტრ გიორგი გახარიასთან მიმართებით გამოძიება მხოლოდ მტკიცებულებების არსებობის შემთხვევაში შეიძლება დაიწყოს, განაცხადა მმართველი პარტია „ქართული ოცნება – დემოკრატიული საქართველოს" ერთ–ერთმა ლიდერმა მამუკა მდინარაძემ.

გახარიას მიმართ შესაძლო სისხლის სამართლის საქმის აღძვრის შესახებ საუბარი მასმედიაში მას შემდეგ დაიწყო, რაც მმართველი პარტიის ლიდერებმა იგი დაადანაშაულეს 2019 წლის 20–21 ივნისის ღამეს პარლამენტზე შტურმის თავიდან აცილების მიზნით სპეცოპერაციის დაგეგმვაში. მანამდე მმართველმა პარტიამ გახარია სახელმწიფო ღალატში დაადანაშაულა.

„როდესაც მან (გახარიამ - რედ.) მოითხოვა მელიას („ნაცმოძრაობის" ლიდერის - რედ.) დაკავების ღონისძიების გადადება ორი-სამი დღით, მაშინ როდესაც გვქონდა ინფორმაცია იმ დღეებში ოპოზიციის გეგმებთან დაკავშირებით, ეს ჩვენთვის ეჭვის საფუძველი გახდა, მაგრამ გამოძიების შესახებ საუბარი შეიძლება მაშინ დაიწყოს თუ კონკრეტული ფაქტები იქნება", - განაცხადა მდინარაძემ.

ივნისის დასაწყისში მმართველი პარტია „ქართული ოცნება - დემოკრატიული საქართველოს" თავმჯდომარე ირაკლი კობახიძემ გახარიას მხრიდან პრემიერის პოსტის დატოვების თაობაზე სკანდალური დეტალები გაასაჯაროვა და მისი პერსონა ექს-პრეზიდენტ მიხეილ სააკაშვილს დაუკავშირა.

მისი მტკიცებით, ყოფილ მმართველ პარტია „ერთიან ნაციონალურ მოძრაობას" ჰქონდა გეგმა ძალისმიერი მეთოდებით ხელისუფლების ორ-სამ დღეში შეცვლის და თავდაცვისა და შინაგან საქმეთა სამინისტროებში იყვნენ ადამიანები, რომლებიც მზადყოფნა გამოთქვამდნენ ალტერნატიული მთავრობის მხარეს გადასულიყვნენ.

კობახიძის თქმით, „ნაცმოძრაობის" გეგმებთან გახარიას კავშირებზე მეტყველებს ის ფაქტი, რომ სწორედ ამ ვადით, ორი-სამი დღით ითხოვდა გახარია "ნაცმოძრაობის" ლიდერის ნიკა მელიას დაკავების გადავადებას. თუმცა, კობახიძე ასევე ამტკიცებს, რომ არ იცის ძალოვანი სტრუქტურებიდან ვინ იყო მზად გადასულიყო ალტერნატიულ მთავრობაში, მაგრამ მისთვის ზუსტადაა ცნობილი რომ მიხეილ სააკაშვილი 19 თებერვლისთვის გეგმავდა საქართველოში დაბრუნებას.

მმართველი პარტიის საპასუხოდ გახარიას პარტიამ მოითხოვა გამოძიების და მტკიცებულებების წარმოდგენა - პარტიამ საქართველოს პროკურატურასაც მიმართა, კობახიძემ კი გახარიას წინააღმდეგ ჩვენების მისაცემად მზადყოფნა გამოთქვა.

49
თემები:
საქართველოს პოლიტიკური ცხოვრება
ირაკლი ღარიბაშვილი

ირაკლი ღარიბაშვილი პარლამენტს ანგარიშს 25 ივნისს ჩააბარებს

33
ღარიბაშვილისთვის ეს იქნება პირველი ანგარიში საქართველოს პრემიერ-მინისტრის რანგში 2015 წელს მისი გადადგომიდან თითქმის ექვსი წლის შემდეგ.

თბილისი, 16 ივნისი - Sputnik. პრემიერ-მინისტრი ირაკლი ღარიბაშვილი მთავრობის მიერ შესრულებული სამუშაოს შესახებ წლიურ ანგარიშს პარლამენტს მომდევნო კვირაში, 25 ივნისს წარუდგენს.

პარლამენტის რეგლამენტის თანახმად, მთავრობის მეთაურის ანგარიშის მოსმენით პარლამენტი საგაზაფხულო სესიის ფარგლებში მუშაობას დაასრულებს.

პრემიერ მინისტრის 154-გვერდიანი ანგარიში უკვე გამოქვეყნდა პარლამენტის ვებგვერდზე და მისი დაახლოებით ნახევარი საგარეო პოლიტიკასა და თავდაცვას ეძღვნება. ანგარიშში ასევე ყურადღება ეთმობა კორონავირუსის პანდემიასთან ბრძოლას, ჯანდაცვის, ეკონომიკის, განათლებისა და სოფლის მეურნეობის საკითხებს.

ანგარიშის წარდგენის შემდეგ ღარიბაშვილს დეპუტატების შეკითხვებზე პასუხის გაცემა მოუწევს. პარლამენტის 150 წევრიდან მმართველ პარტია „ქართულ ოცნებას" 84 ადგილი აქვს, დანარჩენი ოპოზიციურმა პარტიებმა გადაინაწილეს.

ღარიბაშვილისთვის ეს იქნება პირველი ანგარიში საქართველოს პრემიერ-მინისტრის რანგში თითქმის ექვსი წლის შემდეგ. 2015 წელს საქართველოს პრემიერ-მინისტრის თანამდებობიდან გადადგომის შემდეგ, 2021 წლის თებერვალში მან კვლავ მოიპოვა პარლამენტის ნდობა და ამ პოსტზე გადამდგარი გიორგი გახარია შეცვალა.

ახლა გახარიას პარტიის წევრებს, ისევე როგორც ოპოზიციური სპექტრის სხვა წარმომადგენლებს, შესაძლებლობა ექნებათ ღარიბაშვილისგან მოისმინონ პასუხები მათთვის საინტერესო კითხვებზე.

33
სტრასბურგის ადამიანის უფლებათა სასამართლო

დეკანოზ გიორგი მამალაძის სარჩელი ევროპულმა სასამართლომ განხილვაში მიიღო

0
(განახლებულია 10:42 17.06.2021)
დეკანოზ გიორგი მამალაძის საქმე თანამედროვე საქართველოს ისტორიაში ერთ-ერთი ყველაზე რეზონანსული გახდა.

თბილისი, 17 ივნისი — Sputnik. ადამიანის უფლებათა ევროპულმა სასამართლომ საქართველოს კათaლიკოს-პატრიარქის მდივან-რეფერენტის შორენა თეთრუაშვილის მკვლელობის მცდელობისთვის მსჯავრდებული დეკანოზ გიორგი მამალაძის სარჩელი წარმოებაში მიიღო, ამის შესახებ მსჯავრდებულის ძმამ თორნიკე მამალაძემ საკუთარ Facebook-გვერდზე დაწერა.

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს.

„ევროპულმა სასამართლომ ჩემი ძმის სარჩელი დააკმაყოფილა და განხილვაში მიიღო. დაწყებულია კომუნიკაცია. იმედი მაქვს აქ მაინც იზეიმებს სამართალი!", - წერს მამალაძე.

აღნიშნულ საკითხს სოციალურ ქსელში ეხმიანება მამალაძის ადვოკატი დავით ჯანდიერი, რომელმაც ევროსასამართლოში გაგზავნილი საჩივარი მოამზადა.

„საჩივრიდან გამომდინარე, სასამართლოს ყველა ძირითად საკითხზე აქვს ყურადღება გამახვილებული. მომჩივანთან დაკავშირებული ფაქტები უკავშირდება კონვენციის მეექვსე (საქმის სამართლიანი განხილვის უფლება) და მესამე მუხლის (წამების აკრძალვა) სავარაუდო დარღვევას", - აცხადებს ჯანდიერი.

ადვოკატის განცხადებით, დღეს იგი გლდანის პენიტენციურ დაწესებულებებში გიორგი მამალაძეს შეხვდება, რის შემდეგაც მედიასთან კომენტარს გააკეთებს.

დეკანოზი გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს, საიდანაც ის გერმანიაში უნდა გაფრენილიყო. იმ დროს გერმანიაში კათოლიკოს-პატრიარქი ილია მეორე სამკურნალოდ იმყოფებოდა. გამოძიების მონაცემებით, მამალაძის ბარგში ნატრიუმის ციანიდი იპოვეს, ხოლო ბინაში – კუსტარულად დამზადებული ცეცხლსასროლი იარაღი და ექვსი ვაზნა.

თბილისის საქალაქო სასამართლომ 2017 წლის სექტემბერში გიორგი მამალაძეს ცხრა წლით თავისუფლების აღკვეთა შეუფარდა პატრიარქის მდივან-რეფერენტ შორენა თეთრუაშვილის მკვლელობის მომზადებისა და ცეცხლსასროლი იარაღის უკანონო შეძენა-შენახვისთვის.

2018 წლის თებერვალში სააპელაციო სასამართლომ განაჩენი ძალაში დატოვა. 2018 წლის აგვისტოში უზენაესმა სასამართლომ მამალაძის ადვოკატის სარჩელის განხილვაზე უარი განაცხადა და ამით ქვედა ინსტანციების სასამართლოების გადაწყვეტილება ასევე ძალაში დატოვა.

0
თემები:
სკანდალი საპატრიარქოში – „ციანიდის საქმე"