გიორგი გახარია

გახარიამ პრემიერის პოსტიდან გადადგომის რეალური მიზეზი დაასახელა

152
(განახლებულია 21:25 07.06.2021)
გიორგი გახარიამ პრემიერის პოსტის და მმართველი პარტიის დატოვების მიზეზები განმარტა და „ქართული ოცნება“ მკაცრად გააკრიტიკა.

თბილისი, 29 მაისი – Sputnik. მმართველი პარტია დაშორდა რეალურ პრობლემებს და მან პარტიული ინტერესები სახელმწიფო ინტერესებზე მაღლა დააყენა, განაცხადა ახლადშექმნილი პარტიის „საქართველოსთვის“ თავმჯდომარემ, ყოფილმა პრემიერ-მინისტრმა გიორგი გახარიამ პოლიტიკური ორგანიზაციის პრეზენტაციაზე.

თავდაპირველად მისი გადადგომის მიზეზად დასახელდა უთანხმოება მმართველ პარტია „ქართული ოცნება - დემოკრატიული საქართველოსთან“ ნიკა მელიას, „ერთიანი ნაციონალური მოძრაობის“ თავმჯდომარის დაკავებასთან დაკავშირებით. 

„გადავდექი იმიტომ, რომ პარტია დაშორდა რეალურ პრობლემებს, ჩვენი მოქალაქეების პრობლემებს, რადგან რატომღაც ჩათვალა, რომ პოლიტიკურ ოპონენტებთან ბრძოლა ბევრად უფრო მნიშვნელოვანი თემაა, ვიდრე ჩვენი რიგითი მოქალაქეების ყოველდღიურ პრობლემებზე ზრუნვა“, - განაცხადა გახარიამ.

მისი თქმით, მმართველი პარტიის მოქმედებები ქვეყნის განვითარებას აფერხებდა.

„რვაწლიანი მმართველობის შემდგომ მმართველი პარტია თავის თუნდაც ყველაზე დიდ მიღწევებს ადარებდა 10-15 წლის წინ რეალობას და ამით რეალური განვითარების პერსპექტივას უკლავდა ჩვენს ქვეყანას“, - განაცხადა გახარიამ.

მისი თქმით, ქვეყანას ახლა გააჩნია ბევრად უკეთესი სასამართლო სისტემა ვიდრე 10 წლის წინ, მაგრამ ამაზე გაჩერება არ შეიძლება.

„ეს არ ნიშნავს იმას რომ ჩვენ არ უნდა გვქონდეს იმის ამბიცია, რომ ჩვენი სასამართლო სისტემა იყოს კიდევ უფრო ეფექტური, კიდევ უფრო სამართლიანი და კიდევ უფრო მაღალი მიზნები დაისახოს“, - აღნიშნა მან.

მისი თქმით, „ქართულმა ოცნებამ“ პარტიული ინტერესები სახელმწიფო ინტერესებზე მაღლა დააყენა.

„მმართველმა პარტიამ თავისი ინტერესები სახელმწიფო ინტერესებზე მაღლა დააყენა - ეს იყო ჩემი გადადგომის რეალური მიზეზი“, - განაცხადა გახარიამ.

პარტიის პრეზენტაცია Expo Georgia-ში მიმდინარეობს.

გიორგი გახარიამ პრემიერის პოსტი და ასევე მმართველი პარტია „ქართული ოცნება“ მიმდინარე წლის თებერვალში დატოვა. დაახლოებით ერთი თვის შემდეგ მან პოლიტიკაში დაბრუნება დააანონსა.

როგორც მაშინ თავად განაცხადა, გადადგომის მიზეზი პარტიის ხელმძღვანელობასთან უთანხმოება იყო „ერთიანი ნაციონალური მოძრაობის“ თავმჯდომარის ნიკა მელიას დაკავებასთან დაკავშირებით.

გახარია მელიას დაკავების წინააღმდეგი იყო, თუმცა მმართველ პარტიაში მის დაუყოვნებლივ დაპატიმრებას ემხრობოდნენ.

ბოლო გამოკითხვებით, გახარია ყველაზე პოპულარული პოლიტიკოსი და გადამდგარი პრემიერ-მინისტრია. მისი ნებისმიერი პოსტი და ფოტო სოციალურ ქსელებში ათასობით მოწონებას იმსახურებს, რაც ქართული პოლიტიკისთვის რეკორდია.

აშშ-ის საერთაშორისო რესპუბლიკური ინსტიტუტის (IRI) მიერ საზოგადოებრივი აზრის ბოლო გამოკითხვის თანახმად (2021 წლის თებერვალში, გადადგომამდე), საქართველოში პოპულარულ პერსონებს შორის, პატრიარქ ილია მეორის შემდეგ, გახარიას მეორე ადგილი ეკავა.

ჯერ კიდევ პარტიის შექმნამდე მან თავის მხარეს გადაიბირა პარლამენტის ექვსი დეპუტატი, ასევე სხვადასხვა სახელმწიფო სტრუქტურაში დასაქმებული რეგიონული ჩინოვნიკების ნაწილი.

152
გიორგი გახარია

„ქართულ ოცნებაში" განმარტეს თუ როდის დააკავებენ გახარიას

93
(განახლებულია 10:16 17.06.2021)
პრემიერ-მინისტრის თანამდებობიდან წასვლის შემდეგ გახარიამ შექმნა თავისი პარტია და სამიზნე ელექტორალური ჯგუფების თვალსაზრისით „ქართული ოცნების“ კონკურენტი გახდა.

თბილისი, 17 ივნისი — Sputnik. ყოფილ პრემიერ–მინისტრ გიორგი გახარიასთან მიმართებით გამოძიება მხოლოდ მტკიცებულებების არსებობის შემთხვევაში შეიძლება დაიწყოს, განაცხადა მმართველი პარტია „ქართული ოცნება – დემოკრატიული საქართველოს" ერთ–ერთმა ლიდერმა მამუკა მდინარაძემ.

გახარიას მიმართ შესაძლო სისხლის სამართლის საქმის აღძვრის შესახებ საუბარი მასმედიაში მას შემდეგ დაიწყო, რაც მმართველი პარტიის ლიდერებმა იგი დაადანაშაულეს 2019 წლის 20–21 ივნისის ღამეს პარლამენტზე შტურმის თავიდან აცილების მიზნით სპეცოპერაციის დაგეგმვაში. მანამდე მმართველმა პარტიამ გახარია სახელმწიფო ღალატში დაადანაშაულა.

„როდესაც მან (გახარიამ - რედ.) მოითხოვა მელიას („ნაცმოძრაობის" ლიდერის - რედ.) დაკავების ღონისძიების გადადება ორი-სამი დღით, მაშინ როდესაც გვქონდა ინფორმაცია იმ დღეებში ოპოზიციის გეგმებთან დაკავშირებით, ეს ჩვენთვის ეჭვის საფუძველი გახდა, მაგრამ გამოძიების შესახებ საუბარი შეიძლება მაშინ დაიწყოს თუ კონკრეტული ფაქტები იქნება", - განაცხადა მდინარაძემ.

ივნისის დასაწყისში მმართველი პარტია „ქართული ოცნება - დემოკრატიული საქართველოს" თავმჯდომარე ირაკლი კობახიძემ გახარიას მხრიდან პრემიერის პოსტის დატოვების თაობაზე სკანდალური დეტალები გაასაჯაროვა და მისი პერსონა ექს-პრეზიდენტ მიხეილ სააკაშვილს დაუკავშირა.

მისი მტკიცებით, ყოფილ მმართველ პარტია „ერთიან ნაციონალურ მოძრაობას" ჰქონდა გეგმა ძალისმიერი მეთოდებით ხელისუფლების ორ-სამ დღეში შეცვლის და თავდაცვისა და შინაგან საქმეთა სამინისტროებში იყვნენ ადამიანები, რომლებიც მზადყოფნა გამოთქვამდნენ ალტერნატიული მთავრობის მხარეს გადასულიყვნენ.

კობახიძის თქმით, „ნაცმოძრაობის" გეგმებთან გახარიას კავშირებზე მეტყველებს ის ფაქტი, რომ სწორედ ამ ვადით, ორი-სამი დღით ითხოვდა გახარია "ნაცმოძრაობის" ლიდერის ნიკა მელიას დაკავების გადავადებას. თუმცა, კობახიძე ასევე ამტკიცებს, რომ არ იცის ძალოვანი სტრუქტურებიდან ვინ იყო მზად გადასულიყო ალტერნატიულ მთავრობაში, მაგრამ მისთვის ზუსტადაა ცნობილი რომ მიხეილ სააკაშვილი 19 თებერვლისთვის გეგმავდა საქართველოში დაბრუნებას.

მმართველი პარტიის საპასუხოდ გახარიას პარტიამ მოითხოვა გამოძიების და მტკიცებულებების წარმოდგენა - პარტიამ საქართველოს პროკურატურასაც მიმართა, კობახიძემ კი გახარიას წინააღმდეგ ჩვენების მისაცემად მზადყოფნა გამოთქვა.

93
თემები:
საქართველოს პოლიტიკური ცხოვრება
ირაკლი ღარიბაშვილი

ირაკლი ღარიბაშვილი პარლამენტს ანგარიშს 25 ივნისს ჩააბარებს

34
ღარიბაშვილისთვის ეს იქნება პირველი ანგარიში საქართველოს პრემიერ-მინისტრის რანგში 2015 წელს მისი გადადგომიდან თითქმის ექვსი წლის შემდეგ.

თბილისი, 16 ივნისი - Sputnik. პრემიერ-მინისტრი ირაკლი ღარიბაშვილი მთავრობის მიერ შესრულებული სამუშაოს შესახებ წლიურ ანგარიშს პარლამენტს მომდევნო კვირაში, 25 ივნისს წარუდგენს.

პარლამენტის რეგლამენტის თანახმად, მთავრობის მეთაურის ანგარიშის მოსმენით პარლამენტი საგაზაფხულო სესიის ფარგლებში მუშაობას დაასრულებს.

პრემიერ მინისტრის 154-გვერდიანი ანგარიში უკვე გამოქვეყნდა პარლამენტის ვებგვერდზე და მისი დაახლოებით ნახევარი საგარეო პოლიტიკასა და თავდაცვას ეძღვნება. ანგარიშში ასევე ყურადღება ეთმობა კორონავირუსის პანდემიასთან ბრძოლას, ჯანდაცვის, ეკონომიკის, განათლებისა და სოფლის მეურნეობის საკითხებს.

ანგარიშის წარდგენის შემდეგ ღარიბაშვილს დეპუტატების შეკითხვებზე პასუხის გაცემა მოუწევს. პარლამენტის 150 წევრიდან მმართველ პარტია „ქართულ ოცნებას" 84 ადგილი აქვს, დანარჩენი ოპოზიციურმა პარტიებმა გადაინაწილეს.

ღარიბაშვილისთვის ეს იქნება პირველი ანგარიში საქართველოს პრემიერ-მინისტრის რანგში თითქმის ექვსი წლის შემდეგ. 2015 წელს საქართველოს პრემიერ-მინისტრის თანამდებობიდან გადადგომის შემდეგ, 2021 წლის თებერვალში მან კვლავ მოიპოვა პარლამენტის ნდობა და ამ პოსტზე გადამდგარი გიორგი გახარია შეცვალა.

ახლა გახარიას პარტიის წევრებს, ისევე როგორც ოპოზიციური სპექტრის სხვა წარმომადგენლებს, შესაძლებლობა ექნებათ ღარიბაშვილისგან მოისმინონ პასუხები მათთვის საინტერესო კითხვებზე.

34
თინა ხიდაშელი და დავით უსუფაშვილი

„უნდა გავყვე დათოს ცოლად...“ - რა მოხდა პოლიტიკოს ცოლ-ქმარს შორის?

0
(განახლებულია 12:45 17.06.2021)
თინა ხიდაშელი კორონავირუსით გამოწვეულ ავადმყოფობას დღემდე ვერ გამოუძვრა. პოლიტიკოსს სერიოზული მკურნალობა დასჭირდა, ის დამოუკიდებლად ჯერ კიდევ ვერ გადაადგილდება

თავდაცვის ყოფილი მინისტრი თინა ხიდაშელი, რომელიც კორონავირუსის გადატანის შემდგომ გართულებებს ებრძვის, სოციალურ ქსელში ემოციურ განცხადებას ავრცელებს და მის მეუღლეს, ცნობილ პოლიტიკოსს დავით უსუფაშვილს საჯაროდ უხდის მადლობას მისი სიცოცხლის გადარჩენისთვის.

„ჩემმა ქმარმა გადამარჩინა. წელს ქორწინების 25 წლისთავი გვაქვს და თავიდან უნდა გავყვე ცოლად. ის რომ არ ყოფილიყო, შეიძლებოდა, მარტივად მიმენებებინა თავი ბრძოლისთვის. საავადმყოფოში ისევ ის დათო ვიპოვე, 1993-95 წლებში რომ შემიყვარდა და რატომაც გავყევი ცოლად. ოქტომბერში თავიდან გავყვები ცოლად და ისევ თავიდან დავიწყებ. დედაჩემს ჩემი ცრემლები არ უნახავს, არავის ვუნახივარ ცუდად მყოფი, როგორ ცუდადაც უნდა ვყოფილიყავი, არასდროს არავის ვაძლევ უფლებას, რომ შევეცოდო. თურმე მან ეს ყველაფერი კარგად იცის, ბოლომდე იცის და არ მომცა უფლება, ვინმესთან დისკომფორტი შემქმნოდა. მასთან მოხდა ეს ყველაფერი და შესაბამისად, საავადმყოფოში, ექიმთან, ექთანთან ურთიერთობა მარტივი გახდა. დათო რომ არა, მე ვერ გამოვიდოდი იქიდან ცოცხალი…“ - წერს ხიდაშელი.

თავდაცვის ყოფილმა მინისტრმა თინა ხი­და­შე­ლმა, რო­მელ­მაც კო­რო­ნა­ვირუ­სი გა­და­ი­ტა­ნა, „მთა­ვარ არხზე“ გა­და­ცე­მა „პოსტ ფაქ­ტუმ­ში” იმ ურ­თუ­ლეს გარ­თუ­ლე­ბებ­ზე ისაუბრა, რო­მლე­ბიც ვირუს­მა და­უ­ტო­ვა. პოლიტიკოსი ჰყვება, რომ მისი ოჯახის წევრები ვირუსს ადვილად გადაურჩნენ, მას კი უკვე მეოთხე დღიდან ადგომაც კი გაუჭირდა, შემდეგ იყო კლინიკაში მაღალი ტემპერატურით.

მისი თქმით, თმამაც კი შეწყვიტა ზრდა – ოთხი თვის წინ შეღებილი თმა არც ერთი მილიმეტრით არ გაზრდია. ყველაზე მეტად კი სახსრები აწუხებს.

თინა ხიდაშელს კორონავირუსი მიმდინარე წლის 18 თებერვალს დაუდასტურდა და მას საავადმყოფოში მკურნალობდნენ. გარკვეული პერიოდის შემდეგ ის კლინიკიდან გაწერეს, თუმცა ჯანმრთელობის მდგომარეობის გაუარესების გამო ისევ საავადმყოფოში გადაიყვანეს.

როგორც პოლიტიკოსი წერს, ავადმყოფობის გამო ბევრი რამ გამოტოვა: თოვლი თბილისში, გაზაფხულის მოსვლა, შვილის დაბადების დღე, ბზობა, აღდგომა, რადგან თავი ვერ დააღწია საავადმყოფოს, ჟანგბადის და ათასგვარ სხვა აპარატს, წამლებს, ნემსებს, გადასხმებს.

0
თემები:
ქართველი სელებრითები