თბილისი, 16 მაისი - Sputnik. 2021 წლის პირველ კვარტალში საქართველოს ხელისუფლებას თავშესაფრის მოთხოვნით 134-მა უცხო ქვეყნის მოქალაქემ მიმართა, ნათქვამია შსს-ს ვებგვერდზე გავრცელებულ მასალებში.
შსს-ს მონაცემებით, მაძიებელთა უმრავლესობა - 18-დან 40 წლამდე ასაკის პირები არიან (79 უცხოელი). აქედან 65 მამაკაცია, 14 - ქალი. რაც შეეხება არასრულწლოვნებს, საქართველოს თავშესაფრის სტატუსის მინიჭების მოთხოვნით 14-მა ადამიანმა მიმართა.
მაგრამ ყველა მაძიებელი ვერ იღებს საქართველოს მთავრობის თანხმობას. აღნიშნულ პერიოდში უარი 71-მა უცხოელმა მიიღო.
იანვრიდან მარტამდე პერიოდში საქართველოში ჰუმანიტარული სტატუსი მიიღო 11-მა ადამიანმა, ხოლო ლტოლვილის სტატუსი - მხოლოდ ორმა.
ასევე, ამ პერიოდში საქართველოდან 8 ქვეყნის 9 მოქალაქე გააძევეს. მათ შორის არიან - მაროკოს ორი მოქალაქე, აზერბაიჯანის, ბელარუსის, ეგვიპტის, იორდანიის, კოტ-დივუარის, პაკისტანის და უკრაინის მოქალაქეები.