პარლამენტი

ახალი ეტაპი: ოპოზიცია საპარლამენტო საქმიანობას შეუდგა

39
(განახლებულია 16:42 27.04.2021)
საქართველოს მეათე მოწვევის პარლამენტის პლენარულ სხდომას ოპოზიციური პარტიების წარმომადგენლები პირველად ესწრებიან.

თბილისი, 27 აპრილი — Sputnik. ოპოზიციის წარმომადგენლები ქვეყანაში პოლიტიკური კრიზისის დასასრულებლად შექმნილი შეთანხმების ხელმოწერის შემდეგ დღეს პირველად მიიღებენ საკანონმდებლო ორგანოს საქმიანობაში მონაწილეობას. 

მმართველმა პარტია „ქართული ოცნება – დემოკრატიულმა საქართველომ“ და ოპოზიციის ნაწილმა ევროპული საბჭოს პრეზიდენტის შარლ მიშელის მიერ შეთავაზებულ კომპრომისულ დოკუმენტს „საქართველოს წინსვლის გზა“ ხელი 19 აპრილს მოაწერეს.

ამ ხელშეკრულებით ოპოზიციის წარმომადგენლებმა აიღეს პასუხისმგებლობა, მონაწილეობა მიიღონ პარლამენტის საქმიანობაში. ერთ-ერთი პირველი საკითხი ამნისტიის შესახებ კანონის დარეგისტრირებაა, რომელიც პატიმრობაში მყოფი „ერთიანი ნაციონალური მოძრაობის“ თავმჯდომარის ნიკა მელიას გათავისუფლებას ითვალისწინებს.  პოლიტპატიმრების – ნიკა მელიას და ოპოზიციური ტელეკომპანია „მთავარი არხის“ თანამფლობელის გიორგი რურუას გათავისუფლება ოპოზიციის ერთ-ერთი მთავარი მოთხოვნა იყო, რათა მათ პარლამენტის ბოიკოტი შეეწყვიტათ.

„ნაციონალური მოძრაობის“ ყოფილი წევრის სალომე სამადაშვილის განცხადებით, ოპოზიცია პარლამენტში ოფიციალურად დარეგისტრირდება, თუმცა ამნისტიის შესახებ კანონპროექტთან დაკავშირებით კონსულტაციები ჯერ კიდევ გაგრძელდება.

„იწყება შეთანხმების შესრულება. ოპოზიცია პარლამენტში დარეგისტრირდება და ამის შემდეგ გიორგი რურუას შეწყალების სახით პირველი ნაბიჯი გადაიდგმება. რაც შეეხება ამნისტიის შესახებ კანონს, კონსულტაციები გრძელდება. ჩვენ პატივს ვცემთ და ვიზიარებთ ნიკას (მელიას) აზრს. ჩვენ გვექნება განხილვები და ვნახოთ, როგორ განვითარდება მოვლენები“, – აღნიშნა სამადაშვილმა.

უკვე ცნობილია, რომ საქართველოს პრეზიდენტი სალომე ზურაბიშვილი 27 აპრილს გიორგი რურუას შეწყალების აქტს მოაწერს ხელს. რურუა 2019 წლის 18 ნოემბერს დააკავეს. სასამართლომ ის დამნაშავედ ცნო იარაღის უკანონო შენახვა-შეძენა-ტარებაში და ოთხი წლის ვადით პატიმრობა შეუფარდა. 

რაც შეეხება პატიმრობაში მყოფ ნიკა მელიას, მან მოუწოდა ოპოზიციის წარმომადგენლებს, რომლებმაც ხელი მოაწერეს შეთანხმების დოკუმენტს, „მონაწილეობა არ მიიღონ ისტორიის გადაწერის სამარცხვინო მცდელობაში, რომელსაც ამნისტია ჰქვია“, და ამ შემთხვევაში იგი დათანხმდება, რომ სასამართლოს მიერ დაკისრებული გირაო მის ნაცვლად ევროკავშირმა გადაიხადოს.

ამასთან, თავად „ნაციონალური მოძრაობა“ უარს აცხადებს დოკუმენტის ხელმოწერაზე და ბოიკოტის რეჟიმში რჩება იმ დრომდე, ვიდრე ნიკა მელია და გიორგი რურუა არ დატოვებენ საპატიმროს.

ასევე ერთ-ერთი მთავარი საკითხი, რომელსაც დეპუტატები პლენარულ სხდომაზე განიხილავენ, პარლამენტის ახალი თავმჯდომარის არჩევაა. „ქართულმა ოცნებამ“ ამ პოსტზე კახა კუჭავა წარადგინა. პარლამენტის ექს-სპიკერმა არჩილ თალაკვაძემ თანამდებობა 24 აპრილს დატოვა, იგი ვიცე-სპიკერის პოსტს დაიკავებს.

პარლამენტის რეგლამენტის თანახმად, ახალი თავმჯდომარის არჩევა წინამორბედის გადადგომიდან 10 დღის ვადაში უნდა მოხდეს.

„მე აუცილებლად დავესწრები პლენარულ სხდომას, სადაც პარლამენტის ახალ თავმჯდომარეს დაამტკიცებენ. მხარს დავუჭერ თუ არა – წინასწარ ვერ გიპასუხებთ. კახა კუჭავას რიტორიკა გაცილებით დაბალანსებული და პოლიტიკურად ნეიტრალური იყო“, – განაცხადა ოპოზიციური პარტია „მოქალაქეების“ წევრმა, ვიცე-სპიკერმა ლევან იოსელიანმა.

საკანონმდებლო ორგანოს თავმჯდომარის ასარჩევად საჭიროა პარლამენტის სიითი შემადგენლობის ნახევარზე მეტი – არანაკლებ 76 ხმა. დღეისათვის მმართველ პარტიას პარლამენტში 84 დეპუტატი ჰყავს.

მოქმედი კანონმდებლობით, პარლამენტის სპიკერის წარდგენა შეუძლიათ უმრავლესობას, უმცირესობას და ფრაქციებს. თითოეული კანდიდატის 20-წუთიანი გამოსვლის შემდეგ კენჭისყრა გაიმართება.

კახა კუჭავა პარლამენტის დეპუტატი 2016 წელს გახდა, 2020 წლის არჩევნების შედეგებით კი ის მეორე ვადით გახდა დეპუტატი. მანამდე ის იყო გეოლოგიური კომპანია Georgian Copperand Gold-ის გენერალური დირექტორი, „კავკასიის მინერალური წყლების“ გენერალური დირექტორი.

მანამდე ის იკავებდა პოსტებს საერთაშორისო სავაჭრო პალატაში, საერთაშორისო საფინანსო კორპორაციაში, იყო „წითელი ჯვრის“ კონსულტანტი და იურისტი ფირმაში „მგალობლიშვილი, ყიფიანი, ძიძიგური“.

39
ლევან ვასაძე

ლევან ვასაძე პოლიტიკაში მიდის

57
(განახლებულია 17:25 06.05.2021)
ბიზნესმენმა ლევან ვასაძემ პოლიტიკაში წასვლის გადაწყვეტილება მიიღო. ის აფუძნებს საზოგადოებრივ მოძრაობას, რომელსაც ერქმევა „ერთობა, რაობა, იმედი“.

თბილისი, 6 მაისი – Sputnik. ბიზნესმენი ლევან ვასაძე პოლიტიკაში მიდის. ბიზნესმენმა ამის შესახებ სასტუმრო „თბილისი მარიოტში“ გამართულ ბრიფინგზე განაცხადა.

როგორც ვასაძემ განმარტა, ის აფუძნებს საზოგადოებრივ მოძრაობას, რომელსაც ერქმევა „ერთობა, რაობა, იმედი“. მისი თქმით, საზოგადოებრივი მოძრაობა მომავალში, დიდი ალბათობით, პოლიტიკურ მოძრაობად გარდაიქმნება.

ლევან ვასაძემ გადაწყვეტილების მიზეზებზეც ისაუბრა და აღნიშნა, რომ ქვეყანას კრიზისიდან გამოყვანა სჭირდება.

„მივიღე ჩემთვის პირად ჭრილში ძალიან მძიმე გადაწყვეტილება, რომ დავემშვიდობო ჩემთვის საყვარელი კერძო პირის მდგომარეობას, გადავდგა ნაბიჯი, შემოვიდე და მონაწილეობა მივიღო ქვეყნის საზოგადოებრივ-პოლიტიკურ ცხოვრებაში. ჩემი გადაწყვეტილების ძირითად მიზეზაზად მოგვევლინა ის ფაქტი, რომ ქვეყანა შესულია პერმანენტული კრიზისის პირობებში როგორც პოლიტიკური, ეკონომიკური, ისე კულტურული, სოციალური, იდეოლოგიური თვალსაზრისით“, – განაცხადა ლევან ვასაძემ.

ამასთან, მისი თქმით, ახდა ყველა ის პროგნოზი, რომელიც საჯაროდ არაერთხელ გააკეთა ჯერ კიდევ შარშან, სანამ საპარლამენტო არჩევნები ჩატარდებოდა.

57
ღარიბაშვილი და ალიევი

რაზე ისაუბრეს ღარიბაშვილმა და ალიევმა ბაქოში

53
(განახლებულია 22:48 05.05.2021)
საქართველოს მთავრობის მეთაურმა აზერბაიჯანის პრეზიდენტს თბილი მიღებისთვის მადლობა გადაუხადა და თბილისში მოიწვია.

თბილისი, 5 მაისი — Sputnik. საქართველო–აზერბაიჯანის საზღვრის დემარკაციისა და დელიმიტაციის კომისია მუშაობას მალე განაახლებს, განაცხადა ჟურნალისტებთან საქართველოს პრემიერ-მინისტრმა ირაკლი ღარიბაშვილმა ბაქოში ოფიციალური ვიზიტის დასრულების შემდეგ. 

ერთდღიანი ვიზიტის ფარგლებში ღარიბაშვილმა შეხვედრები გამართა აზერბაიჯანის პრეზიდენტ ილჰამ ალიევთან, აზერბაიჯანელ კოლეგა ალი ასადოვთან და აზერბაიჯანის მილიმეჯლისის თავმჯდომარესთან საჰიბა გაფაროვასთან.

„ჩვენ ნაყოფიერი თანამშრომლობის მრავაწლიანი ისტორია გვაქვს. ჩვენ მოტივირებული ვართ, რომ უფრო მეტი პროექტი განვახორციელოთ ერთობლივად. შეხვედრაზე ასევე განვიხილეთ რეგიონში არსებული სიტუაცია, მათ შორის, უსაფრთხოების საკითხებიც. შევეხეთ პრაქტიკულად ყველა საკითხს, რომელიც ორ ქვეყანას შორის არსებობს, მათ შორის, განვიხილეთ დავით–გარეჯის საკითხიც და შევთანხმდით, რომ დიალოგი გაგრძელდება, დაჩქარდება და ძალიან მალე გადაწყდება ისე, როგორც ჩვენ ძმობას, მეგობრობას შეეფერება. ძალიან მალე კომისიები გააგრძელებენ მუშაობას და უფრო კონკრეტულად მოგვიანებით გახდება ცნობილი“, – განაცხადა ღარიბაშვილმა.

ღარიბაშვილის განმარტებით, აზერბაიჯანის პრემიერთან და სპიკერთან შეხვედრისას განიხილეს ეკონომიკური საკითხებიც. გადაწყდა, რომ მხარეები ინვესტიციების კუთხით მუშაობას გაააქტიურებენ, რაც ორივე ქვეყნისთვის პოსტპანდემიურ პერიოდში განსაკუთრებით მნიშვნელოვანია. 

შეხვედრის დასასრულს პრემიერმა აზერბაიჯანის პრეზიდენტს და მთავრობის სრულ შემადგენლობას თბილი მიღებისთვის მადლობა გადაუხადა. ღარიბაშვილმა ალიევისგან დაპირება მიიღო, რომ იგი თბილისს ეწვევა.

საქართველოსა და აზერბაიჯანს 440 კილომეტრის სიგრძის საერთო სახელმწიფო საზღვარი აქვთ, რომლის მესამედი ჯერჯერობით არ არის დელიმიტირებული. ერთ-ერთ სადავო მონაკვეთზე მდებარეობს მეექვსე საუკუნის დავით-გარეჯის სამონასტრო კომპლექსი, რომლის ნაწილზეც პრეტენზიას აზერბაიჯანული მხარე აცხადებს.

აზერბაიჯანი საქართველოს სტრატეგიული სავაჭრო პარტნიორია. 2021 წლის იანვარი–მარტში ქვეყნებს შორის ტვირთბრუნვამ დაახლოებით 250,3 მლნ აშშ დოლარი შეადგინა.

საქართველო და აზერბაიჯანი სტრატეგიული პარტნიორები არიან და აქტიურად თანამშრომლობენ როგორც ორმხრივ ფორმატში, ისე საერთაშორისო მნიშვნელობის პროექტების ფარგლებში – ბაქო-თბილისი-ყარსის სარკინიგზო მაგისტრალი, ბაქო-თბილისი-ჯეიჰანის ნავთობსადენი, სამხრეთის გაზის დერეფანი და ა.შ.

53
Pfizer-ის ვაქცინა

როდის აიცრებიან ვაქცინის პირველი დოზის შემდეგ ინფიცირებულები: იმნაძის განმარტება

0
(განახლებულია 17:51 06.05.2021)
ამ დროისათვის უცნობია, რამდენი ადამიანი დაავადდა ქვეყანაში COVID-19-ით ვაქცინის პირველი დოზის გაკეთების შემდეგ

თბილისი, 6 მაისი — Sputnik. იმ პირებს, რომლებიც კორონავირუსით ვაქცინის პირველი დოზის გაკეთების შემდეგ დაინფიცირდნენ, ვაქცინის მეორე დოზა ვირუსის დადასტურებიდან 120 დღის გასვლის შემდეგ გაუკეთდებათ, განაცხადა დაავადებათა კონტროლის ეროვნული ცენტრის დირექტორის მოადგილე პაატა იმნაძემ.

ამასთან იმნაძის ვარაუდით, გამორიცხული არ არის, ეს რეგულაცია გადაიხედოს და პერიოდი შემცირდეს.

იმ ადამიანების ზუსტი რაოდენობა, რომლებიც COVID-19-ით ვაქცინის პირველი დოზის გაკეთების შემდეგ დაავადდნენ, უცნობია.

როგორც დაავადებათა კონტროლის ეროვნული ცენტრის ხელმძღვანელმა ამირან გამყრელიძემ რამდენიმე კვირის წინ განაცხადა, საქართველოში აცრის შემდეგ ინფიცირების სულ რამდენიმე შემთხვევა გამოვლინდა და ყველა შემთხვევაში დაავადება მსუბუქი ფორმით მიმდინარეობდა.

ამ ეტაპზე საქართველოში ვაქცინაცია კორონავირუსის საწინააღმდეგო სამი ვაქცინით - AstraZeneca-თი, Pfizer-ით და Sinopharm-ით ხორციელდება. სამივე ვაქცინის შემთხვევაში საჭიროა ორი დოზის გაკეთება.

ბოლო მონაცემებით, საქართველოში უკვე აცრილია 51.600 პირი, სრულად ვაქცინირებულია 7.873 ადამიანი.

0
თემები:
კორონავირუსი საქართველოში: ბოლო ცნობები