საქართველოს პარლამენტი

რამდენი დეპუტატი შეიკრიბება პარლამენტში

88
(განახლებულია 17:44 22.04.2021)
ბოლო მონაცემებით, შემდეგ კვირაში საქართველოს პარლამენტში 150–დან სულ მცირე 113 დეპუტატი შეიკრიბება       

თბილისი, 22 აპრილი - Sputnik. საქართველოს პარლამენტში დეპუტატების საკმარისი რაოდენობა შეიკრიბება იმისთვის, რომ კონსტიტუციაში საარჩევნო შესწორებები შევიდეს, განუცხადა Sputnik–საქართველოს ექსპერტ–კონსტიტუციონალისტმა ვახტანგ ხმალაძემ.

მეამბოხეები სააკაშვილის პარტიიდან – რის მიღწევას ცდილობს „ნაციონალური მოძრაობა"?>>

საარჩევნო რეფორმის გატარება მმართველ პარტია „ქართულ ოცნებასა“ და ოპოზიციას შორის გაფორმებული კომპრომისული შეთანხმების ერთ–ერთი პუნქტია. შეთანხმებაზე ხელმოწერის შემდეგ ოპოზიციური პარტიების უმრავლესობა დათანხმდა პარლამენტში შესვლას, რომლის მუშაობასაც ნახევარი წლის განმავლობაში ბოიკოტს უცხადებდა.

„პარლამენტის შემადგენლობაში პარლამენტის წევრთა ¾–ზე მეტი იქნება. ეს რაოდენობა კი სრულიად საკმარისია ნებისმიერი გადაწყვეტილებისთვის, მათ შორის კონსტიტუციაში ისეთი ცვლილებების მისაღებად, რომლებიც მათი მიღებისთანავე ამოქმედდება. უმრავლესობას პარლამენტში ჯერჯერობით 84 დეპუტატი წარმოადგენს 150–იდან. დანარჩენი ვინც შევა, ოპოზიციას წარმოადგენს“, – განაცხადა ხმალაძემ.

მან დეტალურად ისაუბრა დაგეგმილ საარჩევნო რეფორმაზე.

„ეს ცვლილებები საარჩევნო სისტემაში არის პროპორციულ სისტემაზე სრული გადასვლა, საარჩევნო ბარიერის დაწევა. მაგრამ თუ პარლამენტის ზოგიერთი წევრი უცბად უარს არ იტყვის ამ ცვლილებების მხარდაჭერაზე. ასეთი პრეცედენტი უკვე იყო საქართველოში, როდესაც ერთპარტიულმა საპარლამენტო უმრავლესობამ, რომელსაც ჰქონდა ასევე საკონსტიტუციო უმრავლესობა, ასევე მოახდინა სრულ პროპორციულ სისტემაზე გადასვლის ინიცირება. მაგრამ როდესაც საკითხი კენჭისყრაზე დააყენეს, საპარლამენტო უმრავლესობის რამდენიმე წევრმა მხარი არ დაუჭირა ამ ხვლილებას და ეს საარჩევნო რეფორმა ჩავარდა“, – აღნიშნა ხმალაძემ.

საკანონმდებლო ორგანოში საპარლამენტო უმრავლესობა წარმოდგენილია 84 დეპუტატით მმართველი პარტიიდან „ქართული ოცნება – დემოკრატიული საქართველო“. აქამდე პარლამენტის მუშაობაში მონაწილეობდა ოპოზიციიდან ორი დეპუტატი პარტია „მოქალაქეებიდან“ და ოთხი – „ევროპელი სოციალისტებიდან“ (რომელიც „პატრიოტთა ალიანსის“ ყოფილი წარმომადგენლები არიან), ასევე ექს–პრემიერ გიორგი გახარიას გუნდის ექვსი წარმომადგენელი

ვინ შეწყვიტა ბოიკოტი

ბოლო მონაცემებით, საქართველოს პარლამენტის მუშაობაში 27 აპრილს კიდევ 14 ოპოზიციონერი ჩაერთვება. მათ ამ დროისთვის ხელი უკვე მოაწერეს შეთანხმებას.

ამჟამად ოპოზიციიდან ხელი მოწერილი აქვთ: პარტიიდან „სტრატეგია აღმაშენებელი“ ოთხიდან სამ დეპუტატს, ასევე სადეპუტატო უფლებამოსილების შესრულებას შეუდგება „ლელოს“ ოთხივე წევრი.

პარლამენტში შესასვლელად ასევე მზადაა ზურაბ ჯაფარიძე, რომელმაც კენჭი იყარა პარტიიდან „ახალი პოლიტიკური ცენტრი – გირჩი“, თუმცა არჩევნების შემდეგ პარტია დატოვა და თავისი ახალი პარტისა „გირჩი – მეტი თავისუფლება“ შექმნა. დოკუმენტს ხელი უკვე მოაწერა ჯაფარიძის ყოფილმა სამივე თანამებრძოლმა, რომლებიც პარლამენტში გავიდნენ.

ამავე დროს, პარლამენტის მუშაობისადმი ბოიკოტს განაგრძობს მიხეილ სააკაშვილის მიერ დაფუძნებული „ერთიანი ნაციონალური მოძრაობა“.

უკვე ცნობილია, რომ დამოუკიდებელი დეპუტატების სახით საკანონმდებლო ორგანოში შესვლას აპირებენ დეპუტატები გრიგოლ ვაშაძე და სალომე სამადაშვილი, რომლებმაც „ნაცმოძრაობა“ დატოვეს. ასევე მზადაა პარლამენტში შესასვლელად ხათუნა სამნიძე, რომელიც პარლამენტში ბლოკის „ნაციონალური მოძრაობა – ძალა ერთობაშია“ სიით მოხვდა.

 „ნაციონალებთან“ ერთად ბოიკოტის რეჟიმში რჩებიან „ევროპული საქართველოს“ წევრები, რომელიც თავის დროზე სააკაშვილის ყოფილმა თანამოაზრეებმა ჩამოაყალიბეს. თუმცა პარლამენტში საარჩევნო სიით გასული ხუთი ადამიანიდან სამმა ხელი მოაწერა შეთანხმებას და მზადაა საპარლამენტო საქმიანობას შეუდგეს.

ბოიკოტს განაგრძობს „ლეიბორისტული პარტიაც“, რომელმაც არჩევნების შედეგად მხოლოდ ერთი მანდატი მოიპოვა.

ამგვარად, ბოლო მონაცემებით, საქართველოს პარლამენტში შემდეგი კვირიდან სულ მცირე 113 დეპუტატი შეიკრიბება 150–იდან.. სწორედ ამდენი ხმაა საჭირო იმისთვის, რომ კონსტიტუციაში დაგეგმილი საარჩევნო შესწორებები შევიდეს.

თუმცა პარლამენტის ცალკეული წევრები უერთდებიან შეთანხმებას. ასე რომ კვირის ბოლოს მათი რაოდენობა შეიძლება გაიზარდოს.

88
თემები:
საქართველოს პოლიტიკური ცხოვრება (392)
ლევან ვასაძე

ლევან ვასაძე პოლიტიკაში მიდის

57
(განახლებულია 17:25 06.05.2021)
ბიზნესმენმა ლევან ვასაძემ პოლიტიკაში წასვლის გადაწყვეტილება მიიღო. ის აფუძნებს საზოგადოებრივ მოძრაობას, რომელსაც ერქმევა „ერთობა, რაობა, იმედი“.

თბილისი, 6 მაისი – Sputnik. ბიზნესმენი ლევან ვასაძე პოლიტიკაში მიდის. ბიზნესმენმა ამის შესახებ სასტუმრო „თბილისი მარიოტში“ გამართულ ბრიფინგზე განაცხადა.

როგორც ვასაძემ განმარტა, ის აფუძნებს საზოგადოებრივ მოძრაობას, რომელსაც ერქმევა „ერთობა, რაობა, იმედი“. მისი თქმით, საზოგადოებრივი მოძრაობა მომავალში, დიდი ალბათობით, პოლიტიკურ მოძრაობად გარდაიქმნება.

ლევან ვასაძემ გადაწყვეტილების მიზეზებზეც ისაუბრა და აღნიშნა, რომ ქვეყანას კრიზისიდან გამოყვანა სჭირდება.

„მივიღე ჩემთვის პირად ჭრილში ძალიან მძიმე გადაწყვეტილება, რომ დავემშვიდობო ჩემთვის საყვარელი კერძო პირის მდგომარეობას, გადავდგა ნაბიჯი, შემოვიდე და მონაწილეობა მივიღო ქვეყნის საზოგადოებრივ-პოლიტიკურ ცხოვრებაში. ჩემი გადაწყვეტილების ძირითად მიზეზაზად მოგვევლინა ის ფაქტი, რომ ქვეყანა შესულია პერმანენტული კრიზისის პირობებში როგორც პოლიტიკური, ეკონომიკური, ისე კულტურული, სოციალური, იდეოლოგიური თვალსაზრისით“, – განაცხადა ლევან ვასაძემ.

ამასთან, მისი თქმით, ახდა ყველა ის პროგნოზი, რომელიც საჯაროდ არაერთხელ გააკეთა ჯერ კიდევ შარშან, სანამ საპარლამენტო არჩევნები ჩატარდებოდა.

57
ღარიბაშვილი და ალიევი

რაზე ისაუბრეს ღარიბაშვილმა და ალიევმა ბაქოში

53
(განახლებულია 22:48 05.05.2021)
საქართველოს მთავრობის მეთაურმა აზერბაიჯანის პრეზიდენტს თბილი მიღებისთვის მადლობა გადაუხადა და თბილისში მოიწვია.

თბილისი, 5 მაისი — Sputnik. საქართველო–აზერბაიჯანის საზღვრის დემარკაციისა და დელიმიტაციის კომისია მუშაობას მალე განაახლებს, განაცხადა ჟურნალისტებთან საქართველოს პრემიერ-მინისტრმა ირაკლი ღარიბაშვილმა ბაქოში ოფიციალური ვიზიტის დასრულების შემდეგ. 

ერთდღიანი ვიზიტის ფარგლებში ღარიბაშვილმა შეხვედრები გამართა აზერბაიჯანის პრეზიდენტ ილჰამ ალიევთან, აზერბაიჯანელ კოლეგა ალი ასადოვთან და აზერბაიჯანის მილიმეჯლისის თავმჯდომარესთან საჰიბა გაფაროვასთან.

„ჩვენ ნაყოფიერი თანამშრომლობის მრავაწლიანი ისტორია გვაქვს. ჩვენ მოტივირებული ვართ, რომ უფრო მეტი პროექტი განვახორციელოთ ერთობლივად. შეხვედრაზე ასევე განვიხილეთ რეგიონში არსებული სიტუაცია, მათ შორის, უსაფრთხოების საკითხებიც. შევეხეთ პრაქტიკულად ყველა საკითხს, რომელიც ორ ქვეყანას შორის არსებობს, მათ შორის, განვიხილეთ დავით–გარეჯის საკითხიც და შევთანხმდით, რომ დიალოგი გაგრძელდება, დაჩქარდება და ძალიან მალე გადაწყდება ისე, როგორც ჩვენ ძმობას, მეგობრობას შეეფერება. ძალიან მალე კომისიები გააგრძელებენ მუშაობას და უფრო კონკრეტულად მოგვიანებით გახდება ცნობილი“, – განაცხადა ღარიბაშვილმა.

ღარიბაშვილის განმარტებით, აზერბაიჯანის პრემიერთან და სპიკერთან შეხვედრისას განიხილეს ეკონომიკური საკითხებიც. გადაწყდა, რომ მხარეები ინვესტიციების კუთხით მუშაობას გაააქტიურებენ, რაც ორივე ქვეყნისთვის პოსტპანდემიურ პერიოდში განსაკუთრებით მნიშვნელოვანია. 

შეხვედრის დასასრულს პრემიერმა აზერბაიჯანის პრეზიდენტს და მთავრობის სრულ შემადგენლობას თბილი მიღებისთვის მადლობა გადაუხადა. ღარიბაშვილმა ალიევისგან დაპირება მიიღო, რომ იგი თბილისს ეწვევა.

საქართველოსა და აზერბაიჯანს 440 კილომეტრის სიგრძის საერთო სახელმწიფო საზღვარი აქვთ, რომლის მესამედი ჯერჯერობით არ არის დელიმიტირებული. ერთ-ერთ სადავო მონაკვეთზე მდებარეობს მეექვსე საუკუნის დავით-გარეჯის სამონასტრო კომპლექსი, რომლის ნაწილზეც პრეტენზიას აზერბაიჯანული მხარე აცხადებს.

აზერბაიჯანი საქართველოს სტრატეგიული სავაჭრო პარტნიორია. 2021 წლის იანვარი–მარტში ქვეყნებს შორის ტვირთბრუნვამ დაახლოებით 250,3 მლნ აშშ დოლარი შეადგინა.

საქართველო და აზერბაიჯანი სტრატეგიული პარტნიორები არიან და აქტიურად თანამშრომლობენ როგორც ორმხრივ ფორმატში, ისე საერთაშორისო მნიშვნელობის პროექტების ფარგლებში – ბაქო-თბილისი-ყარსის სარკინიგზო მაგისტრალი, ბაქო-თბილისი-ჯეიჰანის ნავთობსადენი, სამხრეთის გაზის დერეფანი და ა.შ.

53
ქუთაისის საერთაშორისო აეროპორტი

ქუთაისის აეროპორტიდან  რეისები ხუთი ქვეყნის ცხრა  მიმართულებით შესრულდება

0
(განახლებულია 17:21 06.05.2021)
თებერვლიდან ხელისუფლებამ საჰაერო საზღვრები გახსნა და იმ ქვეყნების ჩამონათვალი გააფართოვა, რომელთა მოქალაქეებსაც ხანგრძლივი სავალდებულო კარანტინის გარეშე შეუძლიათ ქვეყანაში ჩამოსვლა.

თბილისი, 6 მაისი - Sputnik. ქუთაისის დავით აღმაშენებლის სახელობის საერთაშორისო აეროპორტიდან მაისში პირდაპირი რეგულარული რეისები ხუთი ქვეყნის ცხრა მიმართულებით შესრულდება, ნათქვამია ქუთაისის აეროპორტის ადმინისტრაციის მიერ გავრცელებულ  განცხადებაში.

უწყების ცნობით, ქუთაისის  აეროპორტიდან ევროპასა და ცენტრალურ აზიაში მოხვედრა პირდაპირი რეგულარული ავიარეისებით არის შესაძლებელი.

კერძოდ, მაისში დაბალბიუჯეტიანი ავიაკომპანია Wizz Air-ი ქუთაისის აეროპორტიდან პირდაპირ რეგულარულ რეისებს რიგის, დორტმუნდის, კატოვიცესა და გდანსკის მიმართულებით აახლებს.

„საქართველოს აეროპორტების გაერთიანება ავიაკომპანიასთან მოლაპარაკებებს პანდემიამდე არსებული მიმართულებების განახლების შესახებ, ეპიდსიტუაციიდან გამომდინარე აწარმოებს და ფრენები ეტაპობრივად აღდგება“, -ნათქვამია განცხადებაში.

Wizz Air-მა 18 აპრილიდან ვარშავისა და ვილნიუსის მიმართულებით ქუთაისიდან რეგულარული რეისების განახლება დაიწყო. თავდაპირველად რეისები კვირაში ერთი სიხშირით სრულდებოდა, თუმცა ეპიდსიტუაციის გათვალისწინებით, ავიაკომპანიამ უკვე გაზარდა სიხშირე ვარშავის მიმართულებით და 13 მაისიდან ქუთაისიდან პოლონეთის დედაქალაქში და პირიქით მოხვედრა უკვე კვირაში ორჯერ იქნება შესაძლებელი.

გარდა ამისა, 14 მაისიდან Wizz Air-ი ქუთაისიდან რეგულარულ ფრენებს რიგის მიმართულებით განაახლებს, ხოლო 21 მაისიდან დორტმუნდის მიმართულებით დაიწყებს რეგულარულ პირდაპირ ავიარეისებს. მაისის ბოლოდან კი ქუთაისიდან პოლონეთის მიმართულებით და პირიქით, კიდევ ორ ქალაქში იქნება პირდაპირი საჰაერო გზით მოხვედრა შესაძლებელი: 29 მაისიდან - კატოვიცეს მიმართულებით, 30 მაისიდან კი - გდანსკისა.

ქუთაისის საერთაშორისო აეროპორტიდან  2 მაისიდან ოპერირება დაიწყო ახალმა ყაზახურმა დაბალბიუჯეტიანმა ავიაკომპანია FlyArystan-მაც, რომელიც პირდაპირ ფრენებს კვირაში ორჯერ ახორციელებს სამი მიმართულებით: ატირაუ, აქტაუ და ნურ-სულთანი.

საჰაერო გზით უცხო ქვეყნის მოქალაქეს საქართველოს საჰაერო საზღვრის კვეთა PCR ტესტის ნეგატიური პასუხით, ან საზღვარზე კოვიდვაქცინის სრული კურსის ჩატარების (ორი დოზა) დამადასტურებელი დოკუმენტის წარდგენით შეუძლია.

კორონავირუსის პანდემიის გამო საქართველომ რეგულარული ფრენები 2020 წლის მარტის შუა რიცხვებიდან ყველა მიმართულებით შეწყვიტა. საქართველოდან და საქართველოს მიმართულებით სრულდებოდა მხოლოდ სპეცრეისები ქვეყნის მოქალაქეების სამშობლოში დასაბრუნებლად. ზაფხულში რეგულარული რეისების აღდგენა დაიწყო, მაგრამ ეპიდსიტუაციის გაუარესების გამო საავიაციო მიმოსვლის განახლება რამდენჯერმე გადაიდო.

0