ირაკლი კობახიძე

ირაკლი კობახიძემ „ქართული ოცნების“ ირგვლივ გავრცელებული ხმები უარყო

94
(განახლებულია 20:20 07.04.2021)
მმართველი პარტიის მოქმედი თავმჯდომარე ამტკიცებს, რომ გუნდის ყველა წევრი საკუთარ ადგილზე რჩება და რაიმე ცვლილება არ იგეგმება.

თბილისი, 7 აპრილი – Sputnik. მმართველ პარტიაში ყველაფერი რიგზეა და არანაირი სერიოზული კატაკლიზმები არ შეიმჩნევა, განაცხადა პარტია „ქართული ოცნების“ თავმჯდომარემ ირაკლი კობახიძემ.

კობახიძემ, პირველ რიგში, უარყო ხმები პრემიერ-მინისტრ ირაკლი ღარიბაშვილთან კონფლიქტის გამო პარტიის თავმჯდომარის პოსტის დატოვების შესახებ. 

მმართველი პარტიის თავმჯდომარის შესაძლო შეცვლის შესახებ ინფორმაცია ტელეარხმა Formula-მ კულუარულ წყაროებზე დაყრდნობით გაავრცელა. ტელეარხის ვერსიით, კობახიძის სავარაუდო წასვლის მიზეზი არის უთანხმოება პრემიერ-მინისტრ ირაკლი ღარიბაშვილთან ადგილობრივი თვითმმართველობის მოახლოებული არჩევნების თაობაზე, უფრო სწორად, რეგიონებში მერობის კანდიდატებთან და საკრებულოს დეპუტატთა სიებთან დაკავშირებით.

„გუნდში მკაფიოდ გადანაწილებულია ფუნქციები და ამ კუთხით მომავალში ცვლილებები არ იგეგმება... მე თქვენ გპირდებით, რომ არც ამ და არც შემდგომ ეტაპზე დაპირისპირება არ იქნება“, – განაცხადა კობახიძემ Palitra News-ის გადაცემაში „360 გრადუსი“.

დეპუტატმა ასევე „სპეკულაცია“ უწოდა გავრცელებულ ინფორმაციას თბილისის მერისა და „ქართული ოცნების“ გენმდივნის კახა კალაძის მმართველი გუნდიდან და, ზოგადად, პოლიტიკიდან წასვლის შესახებ.

საზოგადოებაში მოარული ხმები მას შემდეგ გავრცელდა, რაც კახა კალაძე საავადმყოფოში ე.წ. ვესტიბულოპათიის დიაგნოზით (ვესტიბულარული ანალიზატორის ფუნქციის დარღვევა) მოხვდა. კალაძემ უკვე დატოვა კლინიკა და რეაბილიტაციის კურსს სახლის პირობებში გადის. 

„კახა კალაძე მკურნალობის კურსს გადიოდა და ეს კურსი გრძელდება. მიუხედავად იმისა, რომ იგი კლინიკიდან გაეწერა, სახლის პირობებში აგრძელებს მკურნალობას. თუმცა, უახლოეს დღეებში, კვირის ბოლომდე იგი პუბლიკის წინაშე გამოჩნდება და კომენტარს გააკეთებს. რაც შეეხება კახა კალაძის გუნდიდან წასვლას, ეს წმინდა წყლის სპეკულაციაა“, – განაცხადა კობახიძემ.

კახა კალაძის პოლიტიკიდან წასვლის შესახებ ხმები მანამდე გავრცელდა, ვიდრე იგი ჯანმრთელობის გაუარესების გამო კლინიკაში მოხვდებოდა. ჯერ კიდევ მარტის შუა რიცხვებში სოციალურ ქსელებში ვრცელდებოდა ინფორმაცია, რომ იგი პოლიტიკიდან მიდის და მილანში ბრუნდება, თუმცა კალაძემ აღნიშნული ინფორმაცია უარყო.

რაც შეეხება ტელეკომპანია Formula-ს, ტელეკომპანია ბოლო პერიოდში ხშირად ავრცელებს ინფორმაციას „ქართული ოცნების“ კულუარებიდან, რომელიც მოგვიანებით რეალობად იქცევა. მაგალითად, გამართლდა ინფორმაცია გიორგი გახარიას გადადგომის შესახებ, შემდეგ კულტურის მინისტრად თეა წულუკიანის დანიშვნის თაობაზე, მოგვიანებით კი ფინანსთა მინისტრ ივანე მაჭავარიანის წასვლის შესახებ.

94
თემები:
საქართველოს პოლიტიკური ცხოვრება (359)
გიორგი გახარია

ახალი პოლიტიკური ძალა: „ქართული ოცნების" ექვსი დეპუტატი გახარიას შეუერთდა

15
როგორც ადრე საპარლამენტო უმრავლესობის ერთ-ერთმა ლიდერმა ბექა დავითულიანმა განაცხადა, პარტიის შექმნის შემთხვევაში ყოფილი პრემიერი „ქართული ოცნების“ კონკურენტი გახდება.

თბილისი, 14 აპრილი – Sputnik. პარლამენტში მმართველი პარტია „ქართული ოცნება – დემოკრატიული საქართველოს“ რიგები ექვსმა დეპუტატმა დატოვა.

აღნიშნულ გადაწყვეტილებასთან დაკავშირებით განცხადება გორისა და კასპის მაჟორიტარმა დეპუტატმა გიორგი ხოჯევანიშვილმა პარლამენტში გამართულ ბრიფინგზე გააკეთა. 

გავრცელებული ინფორმაციით, ხოჯევანიშვილთან ერთად, საპარლამენტო უმრავლესობა დატოვეს დეპუტატებმა ბექა ლილუაშვილმა, ანა ბუჩუკურმა, ალექსანდრე მოწერელიამ, მიხეილ დაუშვილმა და შალვა კერესელიძემ.

როგორც ხოჯევანიშვილმა განმარტა, ისინი ყოფილი პრემიერ–მინისტრ გიორგი გახარიას გუნდის წევრები არიან და დღეიდან  პარტიის მშენებლობის ეტაპზე გადადიან. 

„ჩვენ ვართ გიორგი გახარიას გუნდის წევრები და თანამოაზრეები, რომელთაც გვაერთიანებს საერთო ღირებულებები და ფასეულობები. ჩვენ დღეიდან გიორგი გახარიასთან ერთად პარტიის მშენებლობის ახალ ეტაპზე გადავდივართ. შესაბამისად, ვტოვებთ „ქართულ ოცნებას", - აღნიშნა დეპუტატმა.

გახარიამ პრემიერის პოსტის დატოვების შესახებ განცხადება 18 თებერვალს გააკეთა, რაც ყველასთვის, პირველ რიგში კი საკუთარი გუნდისთვის დიდი მოულოდნელობა იყო. ექს-პრემიერმა მიზეზად თავის გუნდთან – „ქართულ ოცნებასთან“ „ერთიანი ნაციონალური მოძრაობის“ თავმჯდომარის ნიკა მელიას დაპატიმრების საკითხზე უთანხმოება დაასახელა. მარტის ბოლოს ექს-პრემიერმა დუმილი დაარღვია და განაცხადა, რომ არ აპირებს პოლიტიკიდან წასვლას და მისი სამომავლო გეგმების შესახებ ცნობილი მალე გახდება.

საქართველოს ერთ-ერთი ყველაზე რეიტინგული პოლიტიკოსი მმართველი პარტია „ქართული ოცნება – დემოკრატიული საქართველოს“ დამფუძნებლის ბიძინა ივანიშვილის ფავორიტად და მინისტრთა კაბინეტში ყველაზე გავლენიან ფიგურად ითვლებოდა.

მას მთავრობის მეთაურის პოსტი 2019 წლის სექტემბრიდან 2021 წლის 18 თებერვლამდე ეკავა.

 

15
თემები:
საქართველოს პოლიტიკური ცხოვრება (359)
ნიკა მელია

რატომ არ მოითხოვა პროკურორმა ნიკა მელიასათვის აღკვეთის ღონისძიების შეცვლა

45
(განახლებულია 00:09 14.04.2021)
თბილისის საქალაქო სასამართლომ ოპოზიციური პარტია „ერთიანი ნაციონალური მოძრაობის" თავმჯდომარე ნიკა მელია პატიმრობაში დატოვა.

თბილისი, 13 აპრილი - Sputnik. ნიკა მელიასთვის პატიმრობის გირაოთი შეცვლის შუამდგომლობისთვის საჭირო იყო დაცვის მხარის მზადყოფნა, რომ ის გირაოს თანხას გადაიხდიდა, განაცხადა პროკურორმა ამირან გულუაშვილმა.

თბილისის საქალაქო სასამართლომ ოპოზიციური პარტია „ერთიანი ნაციონალური მოძრაობის" თავმჯდომარე ნიკა მელია დღეს პატიმრობაში დატოვა.

„იმისთვის, რომ ბრალდების მხარეს ეშუამდგომლა დღევანდელ სასამართლო სხდომაზე, უნდა არსებულიყო დაცვის მხარის პოზიცია, რომ ის ეთანხმება გირაოს გამოყენებას და ეს დაცვისა და ბრალდების მხარეს შორის მოლაპარაკების გზით უნდა გადაჭრილიყო. არანაირი სახის ინიციატივა დაცვის მხარისგან 25 თებერვლის შემდგომ არ დაფიქსირებულა“, - განაცხადა პროკურორმა ამირან გულუაშვილმა.

პროკურორის თქმით, დღევანდელ სასამართლო სხდომაზე მელიას ადვოკატებმა პირდაპირ განაცხადეს, რომ არ ეთანხმებიან არანაირ ალტერნატივას აღმკვეთ ღონისძიებასთან დაკავშირებით, მათ ასევე არ შეუთავაზებიათ სასამართლოსთვის არანაირი ალტერნატივა, უბრალოდ საკუთარი პოზიციის დაფიქსირების დროს განაცხადეს, რომ ნიკა მელია უნდა დარჩეს აღკვეთის ღონისძიების გარეშე და სასამართლო დარბაზიდან გათავისუფლდეს.

მისი თქმით, ეს არის დაცვის მხარის პოზიცია და, შესაბამისად, ავტომატური უარი ბრალდების მხარის შემოთავაზებაზე.

„დაცვის მხარეს ამ შემოთავაზების პარალელურად რაიმე ნაბიჯი არ გადაუდგამს. შესაბამისად, ახალი გარემოება ამ საკითხთან დაკავშირებით დღევანდელ სასამართლო სხდომაზე არ დაფიქსირებულა. ამის გამო ვერ ვიშუამდგომლებდით პატიმრობის შეცვლას გირაოთი“, - განმარტა გულუაშვილმა.

ნიკა მელიას ადვოკატმა დიმიტრი საძაგლიშვილმა კი სასამართლო პროცესის დასრულების შემდეგ განაცხადა, რომ პროკურატურას წინააღმდეგობრივი და გაუგებარი პოზიცია ჰქონდა.

„ერთი მხრივ, ისინი ამტკიცებდნენ, რომ გირაოს გადახდის შემთხვევაში არ არიან წინააღმდეგი, რომ ნიკა მელია იყოს თავისუფალი, ხოლო მეორე მხრივ, მხარს უჭერდნენ მის პატიმრობაში დატოვებას. აი, ასეთი ურთიერთსაწინააღმდეგო პოზიციების არსებობისას, ბუნებრივია, სასამართლოს ერთადერთი გამოსავალი ჰქონდა“, - განაცხადა საძაგლიშვილმა.

მელიას ადვოკატისთვის მოსალოდნელი იყო, რომ ხელისუფლება არ მიიღებდა „გონივრულ გადაწყვეტილებას“ ნიკა მელიას გათავისუფლებასთან დაკავშირებით.

„თუკი აქამდე ნიკა მელია იყო პოლიტიკური პატიმარი, დღევანდელი პროცესის შემდეგ ის არის პოლიტიკური ტყვე, რომელსაც ხელისუფლება ოპოზიციასთან მოლაპარაკების პროცესში ვაჭრობის საგნად იყენებს“, - განაცხადა საძაგლიშვილმა.

ნიკა მელიას მეორე ადვოკატის, გიორგი კონდახიშვილის განცხადებით, მოსამართლის მიერ დღეს მიღებული გადაწყვეტილება იკითხებოდა პროცესის პირველივე წუთებიდანვე. მისი თქმით, დაცვის მხარე გააგრძელებს „ბრძოლას ყველა მეთოდით, რაც არის სამართლებრივი თვალსაზრისით დაშვებული, როგორც ქვეყნის შიგნით, ისე ევროპულ ასპარეზზე“.

თბილისის საქალაქო სასამართლოში ნიკა მელიას საქმის მოსმენა 8 აპრილს იყო ჩანიშნული,  თუმცა პროცესი 13 აპრილისთვის გადაიდო, რითიც მოსამართლემ დააკმაყოფილა ადვოკატის შუამდგომლობა და მელიას სასამართლო პროცესზე დასწრების უფლება მისცა.

მელიამ დღეს პროცესზე სიტყვით რამდენჯერმე ისარგებლა. მოსამართლის მისამართით გამოთქმული შეურაცხმყოფელო რეპლიკების გამო იგი პროცესიდან გააძევეს. შესაბამისად, მელია მომდევნო სხდომას ვერ დაესწრება.

შემდეგი სასამართლო პროცესი 29 აპრილს, 13:00 საათზე  არის ჩანიშნული.

მელიას პატიმრობა მმართველ პარტიასა და ოპოზიციას შორის დავის ერთ-ერთი მთავარი საგანია. დასავლეთის მკაცრი კრიტიკის შემდეგ საქართველოს პროკურატურამ მზადყოფნა გამოთქვა მელიასთვის აღკვეთის ღონისძიების გადახედვის თაობაზე სასამართლოს მიმართოს, თუ მელია 40 ათასი ლარის ოდენობით გირაოს გადახდაზე თანხმობას განაცხადებს.

„ერთიანი ნაციონალური მოძრაობის“ ლიდერს ბრალად ედება 2019 წლის 20-21 ივნისს პარლამენტზე შტურმის დროს „ჯგუფური ძალადობის ხელმძღვანელობა და მასში მონაწილეობა“. ოპოზიციის ლიდერი მიმდინარე წლის 23 თებერვალს დააკავეს, მას შემდეგ, რაც შეფარდებული გირაოს გადახდაზე უარი განაცხადა.

„ნაციონალური მოძრაობის“ ლიდერს მიაჩნია, რომ მისთვის გირაო უკანონოდ არის დაკისრებული და ამიტომ არ აპირებს მის გადახდას.

45
ჯანსუღ კახიძის სახელობის მუსიკალური ცენტრი

თბილისი ბეთჰოვენის მუსიკის საღამოს უმასპინძლებს

0
(განახლებულია 11:49 14.04.2021)
კორონავირუსის პანდემიასთან დაკავშირებით კონცერტი ეპიდ–რეგულაციების სრული დაცვით ჩატარდება - მსმენელის წინაშე პიანისტი ალექსანდრე ვასაძე წარდგება

 

თბილისი, 14 აპრილი - Sputnik. გერმანელი კომპოზიტორის ლუდვიგ ვან ბეთჰოვენის ნაწარმოებების საღამო თბილისის ჯანსუღ კახიძის სახელობის კულტურულ–მუსიკალურ ცენტრში 18 მარტს გაიმართება. 

სცენაზე გაიჟღერებს ორკესტრის თანხლებით ლუდვიგ ვან ბეთჰოვენის საფორტეპიანო კონცერტი №3 და სიმფონია №7. მსმენელის წინაშე წარდგება სიმფონიური ორკესტრი დავით მუკერიას დირიჟორობით და ასევე ქართველი პიანისტი და ორგანისტი ალექსანდრე ვასაძე.

კორონავირუსის პანდემიასთან დაკავშირებით კონცერტი ეპიდ–რეგულაციების სრული დაცვით ჩატარდება. კონცერტი 17:00 საათზე დაიწყება.

ბეთჰოვენი გამოჩენილი გერმანელი კომპოზიტორი, პიანისტი და დირიჟორი, „ვენის კლასიკური სკოლის“ ბოლო წარმომადგენელია. მისი შემოქმედება მოიცავს გარდამავალ პერიოდს კლასიკურიდან რომანტიკულ ეპოქაში.  ბეთჰოვენი ერთ-ერთი ყველაზე უფრო აღიარებული კომპოზიტორია მსოფლიო მუსიკალური კულტურის ისტორიაში.

0
თემები:
საქართველო და კულტურა