ირაკლი კობახიძე. მმართველი პარტიის ბრიფინგი

„ქართული ოცნება“ ცვლილებების ზღვარზეა? - ჭორები და ფაქტები

157
ქართულ მედიაში აქტიურად ვრცელდება ხმები მმართველ პარტიაში მომავალი ცვლილებების შესახებ - საუბრობენ კობახიძის, კალაძის წასვლაზე

თბილისი, 6 აპრილი  – Sputnik. საქართველოს პრემიერ-მინისტრმა ირაკლი ღარიბაშვილმა უახლოეს დროს შესაძლოა დაიკავოს მმართველი პარტია „ქართული ოცნება - დემოკრატიული საქართველოს“ თავმჯდომარის პოსტი, აცხადებენ მასმედიის საშუალებები. მმართველ პარტიაში ამ ინფორმაციას უარყოფენ.

კალაძე პოლიტიკიდან მიდის და მილანში ბრუნდება? >>

მმართველი პარტიის მეთაურის შეცვლის შესახებ ინფორმაცია ტელეარხ Formula-მ გაავრცელა. ეს ტელეკომპანია ბოლო დროს ხშირად ავრცელებს ინფორმაციას „ქართული ოცნების“ კულუარებიდან, რომელიც მოგვიანებით რეალობად იქცევა. მაგალითად, გამართლდა ინფორმაცია გიორგი გახარიას გადადგომის შესახებ, შემდეგ კულტურის მინისტრად თეა წულუკიანის დანიშვნის თაობაზე, მოგვიანებით კი ფინანსთა მინისტრ ივანე მაჭავარიანის წასვლის შესახებ.

ახლა ტელეარხმა გაავრცელა ინფორმაცია მმართველი პარტიის თავმჯდომარის ირაკლი კობახიძის შესაძლო გადადგომისა და თბილისის მერის კახა კალაძის პოლიტიკიდან წასვლის შესახებ. Formula TV–ს თანახმად, კობახიძის სავარაუდო წასვლის მიზეზი არის უთანხმოება პრემიერ-მინისტრ ირაკლი ღარიბაშვილთან ადგილობრივი ხელისუფლების მოახლოებული არჩევნების თაობაზე, უფრო სწორად, რეგიონებში მერობის კანდიდატებთან და საკრებულოს დეპუტატთა სიებთან დაკავშირებით.

სწორედ ღარიბაშვილი იკავებს პარტიის პოლიტიკური მდივნის თანამდებობას და პასუხისმგებელია პარტიის რეგიონალურ ოფისებზე და ადგილებზე „ქართული ოცნების“ მხარდაჭერაზე.

პარტიის ბოლო პოლიტსაბჭოზე ერთ-ერთი მთავარი იყო არჩევნების თემა, რომელიც ამ წლის შემოდგომაზე გაიმართება. „ქართული ოცნებისთვის“ ეს პირველი არჩევნები იქნება მისი დამფუძნებლის, მილიარდერ ბიძინა ივანიშვილის მონაწილეობის გარეშე, რომელიც ამ წლის იანვარში პოლიტიკიდან წავიდა. პირველად „ოცნებამ" არჩევნებისათვის მზადება გაზაფხულიდანვე დაიწყო და საარჩევნო კამპანიის ფაქტობრივი დაწყებისა და რეგიონებში გასვლის შესახებ განაცხადა.

რაც შეეხება კალაძეს, პოლიტიკიდან მის წასვლას აკავშირებენ ახლახან გამოვლენილ დაავადებასთან, რომლის მიზეზი მისი სპორტული წარსული და დატვირთული სამუშაო გრაფიკია თბილისის მერის თანამდებობაზე.

ოფიციალური განცხადებები

ამავდროულად, მმართველ პარტიაში ორი მთავარი ფიგურის - ღარიბაშვილისა და კობახიძის დაპირისპირების ფაქტს კატეგორიულად უარყოფენ.

პარტიის პოლიტსაბჭოს წევრისა და პარლამენტის თავმჯდომარის, არჩილ თალაკვაძის თქმით, არანაირი დაპირისპირება არ არსებობს. გუნდი მუშაობს და ცდილობს უპასუხოს ეკონომიკურ გამოწვევებს, შეამციროს სიღარიბე და შექმნას სამუშაო ადგილები, აცხადებს თალაკვაძე.

პარტიის კიდევ ერთმა წევრმა, ბექა დავითულიანმა უარყო ინფორმაცია, რომ მმართველ პარტიაში უკვე კანდიდატთა სიებზე მსჯელობენ.

„ამ ეტაპზე მომავალი კანდიდატების განხილვა არ მიმდინარეობს”, - განაცხადა დავითულიანმა.

რაც შეეხება კალაძეს, მმართველ პარტიაში ჯერ კიდევ ჭორების გავრცელებამდე განაცხადეს, რომ თბილისის მერი ყოველთვის ასრულებს თავის დანაპირებს და იმუშავებს ბოლომდე.

ექსპერტის მოსაზრება

პოლიტოლოგმა რამაზ საყვარელიძემ Sputnik-საქართველოსთან ინტერვიუში განაცხადა, რომ  „ქართული ოცნებიდან“ კობახიძისა და კალაძის წასვლის შემთხვევაში მმართველი პარტია ძლიერ კადრებს დაკარგავს.

„ქართული ოცნება" ამით ნამდვილად დაკარგავს. პარლამენტში წამყვანი ფიგურაა კობახიძე. აღმასრულებელ სტრუქტურებში, მათ შორის. ადგილობრივ მმართველობაში, რა თქმა უნდა, კალაძე ლიდერია. გამოქვეყნებულ რეიტინგებში კალაძე პატრიარქისა და ყოფილი პრემიერ-მინისტრ გახარიას შემდეგ მესამე ადგილზეა. აი სწორედ ამ მესამე ადგილს დაკარგავს „ქართული ოცნება“, - განაცხადა საყვარელიძემ.

ამასთან, პოლიტოლოგმა მოუწოდა ყველას, არ აჰყვნენ ჭორებს და დაელოდონ მოვლენების განვითარებას.

ექსპერტ ვახტანგ ძაბირაძისთვის კი შიდა პარტიული კონფლიქტები და რყევები „ქართულ ოცნებაში" ბუნებრივი პროცესია.

„როდესაც პარტიაში ხდება საკადრო ცვლილებები, განსაკუთრებით პრემიერ-მინისტრის დონეზე, ყოველთვის არის რყევები და გადალაგება“, - განაცხადა ძაბირაძემ Sputnik-საქართველოსთან ინტერვიუში.

ამავე დროს მან აღნიშნა, რომ საკითხი არ არის კალაძის, კობახიძის ან მმართველი პარტიის სხვა წევრების წასვლაში, არამედ მნიშვნელოვანია ის, თუ რას გააკეთებენ ისინი შემდგომში.

„არ აქვს მნიშვნელობა ვინ წავა და ვინ დარჩება, მაგრამ მნიშვნელოვანია, თუ რას გააკეთებს შემდგომში ის, ვინც წავა“, - განაცხადა ძაბირაძემ.

მისი აზრით, თუ კობახიძე და კალაძე დატოვებენ „ქართულ ოცნებას“ და პოლიტიკას, ეს გავლენას არ მოახდენს პარტიის რეიტინგზე, რადგან მათ ამომრჩეველს წასასვლელი აღარ ექნება.

157
გიორგი გახარია

გახარიას პარტია - ივანიშვილის გეგმა „ბ“ თუ რეალური ოპოზიცია 

48
(განახლებულია 11:37 15.04.2021)
დღეს უკვე ნათელია, რომ ყოფილი პრემიერ-მინისტრი გიორგი გახარია, რომელსაც, ბოლო სოციოლოგიური კვლევებით, საკმაოდ კარგი რეიტინგი ჰქონდა, ნამდვილად და სერიოზულად აპირებს პარტიის შექმნას და ადგილობრივი თვითმმართველობის არჩევნებში მონაწილეობას.

პარლამენტში უკვე გაჩნდა 6 კაციანი ჯგუფი, რომელთაც არა მხოლოდ „ქართული ოცნება“, არამედ ის საპარლამენტო თანამდებობობიც დატოვეს, რომელიც უმრავლესობის ქვოტით ჰქონდათ მიღებული და ეს კომიტეტის თავმჯდომარეების პირველი მოადგილის ავტომობილითა და სხვა ამქვეყნიური სიკეთეებით სავსე პოსტებია. სავარაუდოდ, გახარიას ქვოტით პარლამენტში გაცილებით მეტი ადამიანი უნდა იყოს და თუ რომელიმეს კიდევ გაუჩნდა რაიმის მიმართ პროტესტის გრძნობა, ეს შემადგენლობა ერთ კარგ 7 კაციან ფრაქციასაც შექმნის, თუმცა ეს მაინც არ წყვეტს პარლამენტის ლეგიტიმურობის პრობლემას, სადაც მინიმუმ 113 დეპუტატის ყოფნა მაინცაა სასურველი.

და მაინც, რა მიზნები აქვს და როდის განაცხადებს ამის შესახებ გახარია? სავარაუდოდ, მაისის ბოლოს უკვე ცნობილი უნდა გახდეს მისი პარტიის სახელწოდება, მიზნები, ამოცანები და მიზნისაკენ სვლის გზები. რადგან ახლადშექმნილი პარტიისათვის 5-6 თვე ნამდვილად საჭიროა, რათა არჩევნებისთვის კარგად მოემზადოს.

როგორც ამბობენ, გახარიამ შესაძლოა, ზუგდიდში ან თბილისში გამოსცადოს საკუთარი რეიტინგი. როგორც ირკვევა, ზუგდიდში მას უეჭველ გამარჯვებას ჰპირდებიან, თბილისში კი შესაძლოა, უფრო გაუჭირდეს მაკო გომურისა და 20 ივნისის მოვლენების გამო. თავის მხრივ, ბევრი ხმა დადის იმის თაობაზე, რომ თბილისის მერის არჩევნებზე სერიოზული კონკურენციაა მოსალოდნელი და დიდი გრეჩიხიდან დაწყებული, პატარა პარტიებით დასრულებული, ყველა აპირებს ძალების მოსინჯვას.

ოპოზიციაში ჯერ კიდევ ფიქრობენ, დაუჯერონ თუ არა ყოფილ პრემიერს ოპოზიციური ზრახვები. თუმცა ამ შემთხვევაშიც კი სურთ, გახარიას პარტიამ ხმები მხოლოდ „ქართულ ოცნებას“ გაუყონ. ბევრს სჯერა, რომ გახარიას პარტია ივანიშვილის გეგმაა „ქართული ოცნების“ იმედგაცრუებული ნაწილისათვის და სწორედ მისი მეშვეობით გეგმავს ჯერ მესამე ძალის, შემდეგ კი კოალიციის შექმნას 2024 წელს.

„ჯერჯერობით ჩვენ გახარიასგან და მისი გარემოცვიდან რაიმე პოლიტიკური პოზიცია არაფერზე არ მოგვისმენია. ამიტომ, მე არ ვარ შეთქმულების თეორიების მომხრე, მაგრამ რა თქმა უნდა, იმ ვერსიას, რომ ეს ყველაფერი არის მცდელობა “ბ“ გუნდის გაკეთების ივანიშვილის გარშემო, საფუძველი აქვს. თუ ეს ასე არ არის გვაჩვენონ თავისი მოქმედებებით. თუ მთავრობის უნდობლობას, პოლიტპატიმრების გათავისუფლებას და ვადამდელ არჩევნებს უჭერენ მხარს, ძალიან კარგი. ამასთან, გიორგი გახარიამ კითხვებს პასუხი უნდა გასცეს. ჩრდილში ყოფნა და მოლოდინის რეჟიმის შექმნა არასერიოზულად გამოიყურება“,-  აცხადებს „ევროპული საქართველოს“ ლიდერი გიგა ბოკერია.

ხელისუფლებაში კი დარწმუნებულები არიან, რომ გახარიას რეალური შედეგის მიღწევა გაუჭირდება და მისი მაღალი რეიტინგი „ქართული ოცნების“ პრემიერ-მინისტრობით იყო გამოწვეული. ასეა თუ ისე, ქართულ პოლიტიკაში მალე საინტერესო სიახლეების მომსწრე გავხდებით. რა ნიშას აირჩევს გახარია, სულ მალე გამოჩნდება. ჯერჯერობით მხოლოდ იმის თქმა შეიძლება, რომ ის რადიკალიზაციის წინააღმდეგია და გუნდიც საკმაოდ მოძლიერებული ჰყავს სხვადასხვა პოზიციებზე.

48
ავტოკოლონა

ოპოზიცია რეგიონებში გასვლით შეხვედრებს იწყებს

20
(განახლებულია 11:56 15.04.2021)
მასშტაბური საპროტესტო აქციის სამზადისში ოპოზიციური პარტიების წარმომადგენლები ერთად მოივლიან რეგიონებს.

თბილისი, 15 აპრილი - Sputnik. ქართული ოპოზიციური სპექტრი რეგიონებში მოსახლეობასთან შეხვედრებს დღეიდან, 15 აპრილიდან იწყებს, იუწყება ტელეკომპანია „რუსთავი2“.

ოპოზიციის გარკვეული ნაწილი ამ დღეებში „ლელოს“ ოფისში  შეიკრიბა, რათა 15 მაისისთვის დაგეგმილ აქციასთან დაკავშირებით სამოქმედო გეგმა განეხილა. ოპოზიციის წარმომადგენლების განცხადებით, მიზანი მაისში დაგეგმილ საპროტესტო აქციაზე მოსახლეობის მობილიზებაა. 

პირველი რეგიონი, სადაც ოპოზიციის წარმომადგენლები მოსახლეობასთან შეხვედრებს გამართავს, კახეთია – დილიდან ოპოზიციონერი პოლიტიკოსები რესპუბლიკის მოედანზე იკრიბებიან. შეხვედრები დაგეგმილია როგორც თელავში, ისე მუნიციპალიტეტის სოფლებში.

„15 მაისი მიმდინარე პოლიტიკურ პროცესში უმნიშვნელოვანესი თარიღია, იმიტომ რომ ეს იქნება უამრავი, ათობით ათასი ადამიანისთვის შესაძლებლობა გამოხატოს თავისი პროტესტი, გამოხატოს თავისი ბრაზი. ჩვენი პირველი ნაბიჯი იქნება ის, რომ ჩვენ რეგიონებში მოსახლეობასთან შეხვედრები დავიწყოთ და მათ გავაცნოთ ჩვენი გეგმები, თუ როგორ აპირებს ოპოზიცია გააგრძელოს ბრძოლა რიგგარეშე არჩევნების, პოლიტპატიმრების გათავისუფლებისა და ქვეყანაში რეფორმების დაწყებისათვის“, - განაცხადა ოპოზიციის ერთ-ერთმა ლიდერმა გიგი უგულავამ

ოპოზიციურმა პარტიებმა  სამომავლო მოქმედების შესათანხმებლად სპეციალური შტაბი უკვე შექმნეს.  წინასწარი მონაცემებით, საპროტესტი აქციები უვადო იქნება, რომელზეც ოპოზიცია ძირითად მოთხოვნებს – ვადამდელი საპარლამენტო არჩევნები და პოლიტპატიმრების გათავისუფლება – კვლავ გააჟღერებს. 

საპარლამენტო არჩევნებიდან თითქმის ექვსი თვის შემდეგ ოპოზიციის ძირითადი ნაწილი კვლავ არ აღიარებს კენჭისყრის შედეგებს და ვადამდელ არჩევნებს მოითხოვს. მმართველი პარტია „ქართული ოცნება - დემოკრატიული საქართველო“ განიხილავს ამ საკითხს „წითელ ხაზად“, არჩევნების გაყალბების ბრალდებებს უსაფუძვლოს უწოდებს და ოპოზიციას მოლაპარაკებებზე ყურადღების სხვა საკითხებზე გამახვილებას სთავაზობს.
დასავლელი შუამავლები უკვე რამდენიმე თვის განმავლობაში ცდილობენ გავლენა მოახდინონ საქართველოში არსებულ სიტუაციაზე, მაგრამ ჯერჯერობით უშედეგოდ – პოლიტიკური კრიზისი სულ უფრო ღრმავდება.
მოლაპარაკების მორიგი რაუნდი მარტის ბოლოს გაიმართა, მაგრამ შედეგი ვერ გამოიღო. თბილისში კრიზისის მოგვარების მიზნით მეორედ იყო ჩამოსული ევროპული საბჭოს პრეზიდენტის სპეციალური წარმომადგენელი კრისტიან დანიელსონი, მაგრამ მისი წინადადებები მხარეებმა უარყვეს.

 

20
თემები:
საქართველოს პოლიტიკური ცხოვრება
თენგიზ ცერცვაძე

ცერცვაძე: ჯერ კიდევ გვაქვს შანსი თავიდან ავირიდოთ მესამე ტალღა

0
(განახლებულია 13:29 15.04.2021)
სპეციალისტები შიშობენ, რომ საქართველო კორონავირუსის გავრცელების მესამე ტალღის ფაზაში შედის და არ გამორიცხავენ, რომ ქვეყანა გასული წლის ნოემბერ-დეკემბრის მაჩვენებელს მიუახლოვდეს, როდესაც ინფიცირების დღიური მაჩვენებელი რამდენიმე ათასი იყო.

 

თბილისი, 15 აპრილი - Sputnik. თუ მოსახლეობა მოსალოდნელ საფრთხეს გაიაზრებს, მესამე ტალღის შეჩერება შესაძლებელი გახდება,  განაცხადა თბილისის ინფექციური პათოლოგიისა და შიდსის ცენტრის გენდირექტორმა  თენგიზ ცერცვაძემ.

ქვეყანაში ეპიდსიტუაცია დღითიდღე უარესდება. ბოლო რამდენიმე დღეა, კორონავირუსის ახალი შემთხვევები ოთხნიშნა მაჩვენებელს მიუახლოვდა. სპეციალისტები მესამე ტალღის მოახლოებაზე საუბრობენ და არ გამორიცხავენ, რომ ხელისუფლებას კვლავ მოუწიოს შემზღუდავი ღონისძიებების შემოღება. 

„თუ ბოლოდე გავიაზრებთ იმ საფრთხეს, რომელსაც მესამე ტალღა უქმნის მთელ მსოფლიოს და საქართველოს, მის ეკონომიკასა და ჯანდაცვის სექტორს, ჯერ კიდევ გვაქვს შანსი, რომ შევაჩეროთ და თავიდან ავიცილოთ მესამე ტალღა“, - განაცხადა ცერცვაძემ.

ცერცვაძის განცხადებით, თუ ქვეყანა კორონავირუსის მესამე ტალღას ვერ აიცილებს თავიდან, ყველაზე დიდი გამოწვევის წინაშე ჰოსპიტალური  სექტორი დადგება.

ბოლო პერიოდში კორონავირუსის ახალი შემთხვევების ზრდა კლინიკურ სექტორზე უკვე აისახა. დღითიდღე იზრდება იმ პაციენტების რაოდენობა, რომლებსაც ჰოსპიტალიზაცია ესაჭიროებათ. ამ ეტაპზე საქართველოში კოვიდ-პაციენტებისთვის  დაახლოებით 2 ათასი თავისუფალი საწოლია. როგორც ჯანდაცვის სამინისტროში აღნიშნავენ, ჰოსპიტალური სექტორი მობილიზებულია და პაციენტების მისაღებად მზად არის.

თუმცა, სპეციალისტები მიიჩნევენ, რომ თუ მოსახლეობა რეგულაციებს არ დაიცავს და დღეს მოქმედი კოვიდ–შეზღუდვები კიდევ უფრო შემსუბუქდება, ჯანდაცვის სისტემასა და კლინიკურ სექტორს გაუჭირდება გაზრდილი შემთხვევების მართვა. მათი თქმით, ქვეყანაში  რეგულაციების სრულ გაუქმებაზე საუბარი მხოლოდ მას შემდეგ უნდა დაიწყოს, რაც მოსახლეობის 60-70% ვაქცინირებული იქნება.
ხელისუფლების წარმომადგნლები და  ეპიდემიოლოგები მოსახლეობას კვლავ  კოვიდ-რეგულაციების მაქსიმალური დაცვისკენ,  მათ შორის, პირბადის სწორად ტარების, ყველა ტიპის ხალხმრავალი შეკრებებისა და სოციალური ღონისძიებების ორგანიზებისგან თავის შეკავებისკენ მოუწოდებენ.

საქართველოში გასულ დღე-ღამეში კორონავირუსის 1.030 ახალი შემთხვევა გამოვლინდა და ინფიცირების საერთო რაოდენობამ 292 ათასს გადააჭარბა.

0
თემები:
კორონავირუსი საქართველოში: ბოლო ცნობები