დავით სერგეენკო

დავით სერგეენკო: „ნიკა მელია ჯერ ბრალდებულია და არა მსჯავრდებული...“

90
(განახლებულია 20:52 23.02.2021)
პარლამენტის ვიცე-სპიკერის თქმით, ნიკა მელიას ბედი რაც შეიძლება მალე სასამართლომ უნდა გადაწყვიტოს, თუმცა ოპოზიციას მისი გათავისუფლების მოთხოვნის უფლება აქვს

თბილისი, 23 თებერვალი - Sputnik. ოპოზიცური პარტია „ერთიანი ნაციონალური მოძრაობის“ ლიდერის, ნიკა მელიას საქმესთან დაკავშირებით ყველა უნდა დაელოდოს სასამართლოს გადაწყვეტილებას, რომელიც მაქსიმალურად სწრაფ ვადებში უნდა იქნას მიღებული, განაცხადა პარლამენტის ვიცე-სპიკერმა, დავით სერგეენკომ.

ოპოზიციური პარტიის ლიდერი ნიკა მელია 2019 წლის 20 ივნისს მასობრივი არეულობების ორგანიზების საქმეში ფიგურირებს. მან უარი განაცხადა შეფარდებული გირაოს მეორედ გადახდაზე. პროკურატურამ გამოძიების პერიოდში მისი წინასწარი პატიმრობა მოითხოვა. სასამართლომ 17 თებერვალს პროკურატურის შუამდგომლობა დააკმაყოფილა. შსს–მ 18 თებერვალს მელიას დაკავება გადადო, რომლის მიზეზიც პრემიერ გიორგი გახარიას გადადგომა გახდა. 23 თებერვალს, დილით, შსს–ს სპეციალური დანიშნულების რაზმმა მთავარი ოპოზიციური პარტია „ერთიანი ნაციონალური მოძრაობის“ ლიდერი ნიკა მელია პარტიის ოფისში დააკავა.

„ხაზი მინდა გავუსვა, რომ ბატონი მელია ჯერჯერობით არის ეჭვმიტანილი, ბრალდებული და არა მსჯავრდებული. ამიტომ საბოლოო გადაწყვეტილება, საბოლოო სიტყვა ეკუთვნის სასამართლოს“, - განაცხადა სერგეენკომ.

ნიკა მელიას დაკავებას ოპოზიციური პარტიების და სამოქალაქო აქტივისტების პროტესტი მოყვა, ისინი რუსთაველის გამზირზე შეიკრიბნენ და ნიკა მელიას გათავისუფლება მოითხოვეს.

„რაც შეეხება ნიკა მელიას გათავისუფლებას, ამის მოთხოვნის უფლება აქვთ, თუმცა ძალიან მნიშვნელოვანია, რომ ეს საკითხი, რომელიც მართლაც ერთგვარი მღელვარების გამომწვევია, გაიმიჯნოს პოლიტიკური და საინფორმაციო შემადგენლისგან, გამოძიებამ და სასამართლომ კი მაქსიმალურად სწრაფ ვადებში მიიღოს სამართლებრივი გადაწყვეტილება“, - განაცხადა დავით სერგეენკომ.

ორშაბათს ახალმა პრემიერ-მინისტრმა ირაკლი ღარიბაშვილმა გაიხსენა, რომ მელია უკვე არის გასამართლებული „ქართუ ბანკის“ საქმეზე და ის ჩვეულებრივი კრიმინალია.

რუსთაველის გამზირზე გამართულ საპროტესტო აქციაზე ოპოზიციას კიდევ ერთი მოთხოვნა რიგგარეშე საპარლამენტო არჩევნების ჩატარება იყო.

საქართველოში 2020 წლის 31 ოქტომბრის საპარლამენტო არჩევნების შედეგებს „ნაცმოძრაობა“ და სხვა ოპოზიციური პარტიები არ აღიარებენ და მას გაყალბებულს უწოდებენ. თითქმის 2,5 თვეა ოპოზიცია საპარლამენტო საქმიანობას ბოიკოტს უცხადებს და რიგგარეშე არჩევნების დანიშვნას მოითხოვს.

რაც შეეხება ოპოზიციის მიერ რიგგარეშე არჩევნების მოთხოვნას, სერგეენკომ აღნიშნა, რომ ვადამდელი არჩევნები ასე უბრალოდ, შესაბამისი საფუძვლის გარეშე არ დაინიშნება. ამის ერთადერთი პირობა არსებობს, ხელისუფლება და ოპოზიცია ერთობლივად დეტალურად თუ შეისწავლის, გამოიკვლევს და აღმოაჩენს რამე ცდომილებას, თუნდაც ერთ პროცენტზე მეტს.

„ოპოზიციის მარგინალური ნაწილი ყოველთვის განწყობილი იყო ვითარების ესკალაციისა და დაძაბვისკენ. რა გადაწყვეტილებაც არ უნდა მიეღო პარლამენტს, რა გადაწყვეტილებაც არ უნდა მიეღო შსს-ს ან პროკურატურას, მათი მიზანი იყო მხოლოდ დაძაბულობის ესკალაცია, რაც არც ერთ ვითარებაში არ არის მისაღები და მით უმეტეს იმ ვითარებაში, რომელშიც დღეს არის საქართველო და თუნდაც მთელი მსოფლიო“, - მიაჩნია სერგეენკოს. 

მისი თქმით, ოპოზიციას აქვს პროტესტის გამოხატვის უფლება, მაგრამ მასობრივი დაუმორჩილებლობის და ესკალაციის მომხრეებს იმდენს ვერ მონახავენ, რომ ამან რაღაც დიდი და შეუქცევადი ტალღის ხასიათი მიიღოს.

პარლამენტთან კარვებია გაშლილი, სადაც ოპოზიციის წარმომადგენლები და სამოქალაქო აქტივისტები ღამის გათენებას აპირებენ. ღამის გათენების მსურველთათვის რეგისტრაცია მიმდინარეობს. უწყვეტი პროტესტი გაგრძელდება 26 თებერვლამდე, როდესაც დაანონსებული ფართომასშტაბიანი საპროტესტო აქცია გაიმართება. ამ აქციაზე რეგიონების წარმომადგენლებს ელოდებიან.

90
„ქართული ოცნების“ ოფისი

„ქართული ოცნება“ ოპოზიციისგან კომპრომისს ელოდება

3
(განახლებულია 09:34 07.03.2021)
ოპოზიცია და ხელისუფლება ამჟამად ექვსპუნქტიან მოთხოვნათა პაკეტზე მოლაპარაკებების სტადიაში იმყოფებიან. მარტის შუა რიცხვებამდე მათ მინიმალურ შეთანხმებას უნდა მიაღწიონ.

თბილისი, 7 მარტი - Sputnik. მმართველი პარტი „ქართული ოცნება - დემოკრატიული საქართველო“ ოპოზიციისგან კომპრომისს ელოდება, განაცხადა მმართველი პარტიის ერთ-ერთმა ლიდერმა მამუკა მდინარაძემ.

არჩევნების შედეგების მიხედვით მმართველმა პარტიამ „ქართული ოცნება - დემოკრატიული საქართველო“ ძალაუფლების მესამედ შენარჩუნება და პარლამენტში უმრავლესობის მოპოვება შეძლო. თუმცა ოპოზიცია ამტკიცებს, რომ არჩევნები გაყალბებულია და მათ შედეგებს არ აღიარებს, რამაც ქვეყანა მიიყვანა ღრმა პოლიტიკურ კრიზისამდე, საიდანაც გამოსავალი ჯერჯერობით ნაპოვნი არ არის.

მმართველმა პარტიამ და ოპოზიციამ მარტის შუა რიცხვებისთვის პოლიტიკური კრიზისის დასაძლევად მინიმალურ შეთანხმებას უნდა მიაღწიონ.

„გვაქვს გონივრული მოლოდინი და გულწრფელად რომ ვთქვათ, გარკვეული ინფორმაციაც კი, რომ მომდევნო ორი-სამი დღის განმავლობაში ოპოზიციის წარმომადგენლები გარკვეულ კომპრომისულ ნაბიჯს გადმოდგამენ“, - განაცხადა მდინარაძემ.

მისი თქმით, ოპოზიციის წინადადება პრაგმატული იქნება.

ოპოზიცია და ხელისუფლება ამჟამად იმყოფებიან მოლაპარაკებების სტადიაში. მოლაპარაკების საგანს ექვსი პუნქტი წარმოადგენს. მათ შორისაა ამბიციური საარჩევნო რეფორმა, სასამართლო რეფორმა, პოლიტპატიმრების და პოლიტიკური მართლმსაჯულების საკითხი, ძალთა გადანაწილება პარლამენტში, პოტენციური ვადამდელი არჩევნები, მომზადება ადგილობრივი არჩევნებისთვის.

3
ეუთოს სიმბოლიკიანი დროშა

ეუთო-ოდირის შემაჯამებელი ანგარიში საპარლამენტო არჩევნებზე და რეაქციები საქართველოში

47
(განახლებულია 09:16 07.03.2021)
ეუთო/ოდირის საბოლოო მოხსენებაში საქართველოში ჩატარებული არჩევნები დემოკრატიულად და კონკურენტულად არის მიჩნეული, მაგრამ ბევრი შენიშვნით, როგორც საარჩევნო კანონმდებლობის, ისე ხმების დათვლასთან დაკავშირებით ხელისუფლების ქმედებებისა და სასამართლო გადაწყვეტილების გამო.

თბილისი,  6 მარტი – Sputnik. ეუთოს დემოკრატიული ინსტიტუტებისა და ადამიანის უფლებათა ბიურომ (OSCE/ODIHR) გამოაქვეყნა შემაჯამებელი მოხსენება, რომელიც ეყრდნობა 2020 წლის 31 ოქტომბერს საქართველოში ჩატარებულ საპარლამენტო არჩევნებზე შეზღუდული სადამკვირვებლო მისიის დასკვნებს. მოხსენებამ საქართველოში უამრავი კომენტარი გამოიწვია.

არჩევნების შედეგების მიხედვით მმართველმა პარტიამ „ქართული ოცნება - დემოკრატიული საქართველო“ ძალაუფლების მესამედ შენარჩუნება და პარლამენტში უმრავლესობის მოპოვება შეძლო. თუმცა ოპოზიცია ამტკიცებს, რომ არჩევნები გაყალბებულია და მათ შედეგებს არ აღიარებს, რამაც ქვეყანა მიიყვანა ღრმა პოლიტიკურ კრიზისამდე, რომლიდან გამოსავალი ჯერჯერობით ნაპოვნი არ არის.

რა წერია მოხსენებაში

ეუთო/ოდირის საბოლოო მოხსენებაში საქართველოში ჩატარებული არჩევნები აღიარებულია როგორც დემოკრატიული და კონკურენტული, მაგრამ ბევრი შენიშვნით, როგორც საარჩევნო კანონმდებლობის კუთხით, ისე ხმების დათვლასთან დაკავშირებით ხელისუფლების ქმედებებისა და სასამართლო გადაწყვეტილების გამო.

ეუთო/ოდირის შენიშვნები გამოიწვია საარჩევნო კანონმდებლობაში არჩევნებამდე რამდენიმე თვით ადრე შესულმა შესწორებებმაც. დოკუმენტში ნათქვამია, რომ ცვლილებები კანონმდებლობაში ტექნიკურად იყო შეტანილი, ხოლო ბევრი დებულების განმეორებადმა და დაღმავალმა ხასიათმა სამართლებრივ ბაზაში არსებითი არათანმიმდევრულობა და არასტაბილურობა გამოიწვია.

მოხსენებაში ასევე მითითებულია, რომ საქართველოს პარლამენტმა არ გაითვალისწინა ეუთო/ოდირის და ვენეციის კომისიის რამდენიმე წინანდელი რეკომენდაცია, მათ შორის ისიც, რომელიც ეხებოდა აგიტაციას, საარჩევნო კამპანიის დაფინანსებას, მასობრივი ინფორმაციის საშუალებებს, საჩივრების, აპელაციების შეტანის პროცესს და ა.შ.

გარდა ამისა, მოხსენებაში ნათქვამია, რომ საარჩევნო კომისიების დაკომპლექტების არსებულმა წესებმა გამოიწვია მმართველი პარტიის წარმომადგენლობის დომინირება, რაც ნეგატიურად აისახა საზოგადოების მხრიდან კომისიების მიუკერძოებლობისა და დამოუკიდებლობის აღქმაზე.

აგრეთვე მოხსენებაში აღნიშნულია, რომ წინასაარჩევნო კამპანიის დროს მმართველ პარტიასა და სახელმწიფოს შორის ზღვარი ხშირად ბუნდოვანი იყო, ხოლო მმართველი პარტიის წარმომადგენელთა განცხადებების ნაწილი საზოგადოებაში ხმების მოსყიდვად მიიჩნიეს.

მოხსენებაში კრიტიკის საგანი ასევე არჩევნების დღე გახდა. ეუთო/ოდირის თვალსაზრისით, საარჩევნო უბნების ფარგლებს გარეთ დიდი რაოდენობით პარტიული კოორდინატორები და აქტივისტები შეინიშნებოდნენ.

გარდა ამისა, მოხსენებაში მითითებულია, რომ თუმცაღა საარჩევნო კაბინაში კენჭისყრის საიდუმლო ძირითადად დაცული იყო, დათვალიერებულ საარჩევნო უბნების უმეტესობაში ამომრჩეველთა თანხმობის გარეშე მათი ვიდეო- და ფოტოგადაღება პოტენციურად შემაშინებელ ვითარებას ქმნიდა.

მოხსენებაში ასევე ხაზგასმულია, რომ საარჩევნო დავების გადასაჭრელად სამართლებრივი ბაზა არის რთული და გაუმართლებლად შემზღუდავი, ხოლო მისი შესრულების ვადები - მოკლე.

მომხსენებლებმა ასევე შენიშნეს, რომ არჩევნების შემდეგ საჩივრების განხილვა წარმოადგენდა მეტწილად ზედაპირულ პროცესს, სადაც არ არსებობდა გადაცდომების საგნობრივი გამოძიება და სანდო საფუძვლები გადაწყვეტილებების მისაღებად.

„საჩივრების უმეტესობის სისტემატურმა დაუკმაყოფილებლობამ მნიშვნელოვნად შეზღუდა ეფექტიანი სამართლებრივი დაცვის შესაძლებლობა“, – აღნიშნულია დოკუმენტში.

აზრთა სხვადასხვაობა

მმართველ პარტიაში მოხსენებით მთლიანობაში კმაყოფილები დარჩნენ.

„დღეს საბოლოოდ დაესვა წერტილი და დადასტურდა ის სიმართლე, რასაც თავისუფალ და კონკურენტულ გარემოში, ძირითადი უფლებების დაცვით ჩატარებული არჩევნები ჰქვია... ეუთო/ოდირის დასკვნა არის ბეჭედი იმ სიმართლის დასამტკიცებლად, რაც მთელი ამ ხნის განმავლობაში ცოტა არ იყოს რთული გასატანი გახდა, მაგრამ საზოგადოებამ საბოლოოდ ყველაფერი ნათლად დაინახა“, - განაცხადა მმართველი პარტიის ლიდერმა მამუკა მდინარაძემ.

ის მოხსენებაში არსებულ შენიშვნებსაც გამოეხმაურა.

„ისევე როგორც ყველა სხვა ქვეყანაში წარმატებული არჩევნების დროს, აქაც იყო ხარვეზები და ჩვენ ყოველთვის გამოვთქვამთ მზაობას, რომ საარჩევნო რეფორმა მხარეებს შორის შეთანხმებით ჩატარდეს ისე, რომ ყოველი შემდეგი იყოს წინაზე უკეთესი“, – განაცხადა მდინარაძემ.

მოხსენებაში თავისი სიმართლის დადასტურება ოპოზიციამაც დაინახა.

„რაც შეეხება შინაარსს, რა დარღვევებზეც არის აქ საუბარი, რა თქმა უნდა, ეს არის ის ფუნდამენტური დარღვევები, რაზეც ჩვენ ვამბობთ, რომ შედეგზე მოახდინა ძალიან დიდი გავლენა“, - აღნიშნა „სტრატეგია აღმაშენებლის“ ლიდერმა, გიორგი ვაშაძემ.

რა მოხდება შემდგომში

ოპოზიცია და ხელისუფლება ამჟამად იმყოფებიან მოლაპარაკებების სტადიაში. მოლაპარაკების საგანს ექვსი პუნქტი წარმოადგენს. მათ შორისაა ამბიციური საარჩევნო რეფორმა, სასამართლო რეფორმა, პოლიტპატიმრების და პოლიტიკური მართლმსაჯულების საკითხი, ძალთა გადანაწილება პარლამენტში, პოტენციური ვადამდელი არჩევნები, მომზადება ადგილობრივი არჩევნებისთვის.

აღნიშნულ საკითხებზე მოსალაპარაკებლად და პროგრესის მისაღწევად მათ აქვთ ორი კვირა, რომელიც ევროპელმა პარტნიორებმა მისცეს.

47