არჩილ თალაკვაძე

თალაკვაძე: მომხდარზე პასუხისმგებლობა ნიკა მელიას თანაგუნდელებს ეკისრება

38
(განახლებულია 18:35 23.02.2021)
„ერთიანი ნაციონალური მოძრაობის“ ლიდერი ნიკა მელია სამშაბათს, დილით ჩატარებული სპეცოპერაციის დროს დააკავეს.

თბილისი, 23 თებერვალი – Sputnik. მოვლენების ესკალაციაზე პოლიტიკური პასუხისმგებლობა ეკისრებათ ნიკა მელიას იმ თანაგუნდელებს, რომლებიც კანონის მიმართ დაუმორჩილებლობას ერთგვარ დემოკრატიულ გზად აფასებენ, განაცხადა საქართველოს პარლამენტის თავმჯდომარემ არჩილ თალაკვაძემ ოპოზიციური ლიდერის ნიკა მელიას დაკავებასთან დაკავშირებით. 

23 თებერვალს, დილით შსს-ს სპეციალური დანიშნულების რაზმმა მთავარი ოპოზიციური პარტია „ერთიანი ნაციონალური მოძრაობის“ ლიდერი ნიკა მელია პარტიის ოფისში დააკავა. ოპოზიციის წარმომადგენლების მტკიცებით, შტურმის დროს პოლიციამ ცრემლსადენი გაზი გამოიყენა, რის შედეგადაც შენობაში მყოფი ადამიანების ნაწილი შეუძლოდ გახდა. პარტიის ოფისთან და ოფისში მელიას ასობით მხარდამჭერი იყო შეკრებილი. სამართალდამცველებისთვის წინააღმდეგობის გაწევის ბრალდებით პოლიციამ 21 ადამიანი დააკავა.

თალაკვაძის განცხადებით, როდესაც ვინმე მიიჩნევს, რომ ქვეყნის სამართლებრივ წესრიგსა და საკონსტიტუციო ინსტიტუტებზე ძალადობრივი თავდასხმა მისაღებია და ამგვარ ქმედებას გამოხატვის თავისუფლებას უწოდებს, ნებისმიერ დემოკრატიულ სახელმწიფოში აღნიშნულ ფაქტს რეაგირება მოჰყვება.

„მელიამ განგებ აირჩია ყველაზე პროვოკაციული გზა, რომ უფრო მეტი ესკალაცია შეეტანა პროცესებში. იგი წარდგება სამართლიანი სასამართლოს წინაშე, სადაც მას მიეცემა საკუთარი სიმართლის დამტკიცების შესაძლებლობა“, – განაცხადა პარლამენტის თავმჯდომარემ. 

თალაკვაძის თქმით, ყველა კითხვას, რომელიც შეიძლება ოპოზიციის ლიდერის დაკავების ფაქტთან დაკავშირებით გაჩნდა, გაეცემა როგორც სამართლებრივი, ისე პოლიტიკური პასუხი. ნებისმიერ მხარესთან კომუნიკაციისთვის მზად ვართ და ობიექტურ ინფორმაციას მივაწვდით ყველას, ვინც დაინტერესდება, დასძინა მან.

17 თებერვალს თბილისის საქალაქო სასამართლომ მელიას 2019 წლის 20–21 ივნისის საქმესთან დაკავშირებით დაუსწრებლად პატიმრობა შეუფარდა. ეს მას შემდეგ მოხდა, რაც მელიამ უარი განაცხადა გირაოს გადახდაზე, რომელიც მას აღკვეთის ალტერნატიულ ღონისძიებად შეეფარდა. გადაწყვეტილების სისრულეში მოყვანა შსს-ს დაევალა.

პოლიცია „ნაცმოძრაობის“ ლიდერის დაკავებას 18 თებერვალსაც შეეცადა, მაგრამ ვერ მოახერხა – მელიას დაპატიმრება პრემიერ გიორგი გახარიას თანამდებობიდან გადადგომის გამო გადაიდო.

გუშინ პრემიერ-მინისტრმა ირაკლი ღარიბაშვილმა, რომელიც კანონმდებლების წინაშე პრემიერობის კანდიდატის რანგში წარდგა, პარლამენტის ტრიბუნიდან „ერთიანი ნაციონალური მოძრაობის“ ლიდერის ნიკა მელიას დაპატიმრება დააანონსა და განაცხადა, რომ კანონი უნდა აღსრულდეს ყველა ადამიანის მიმართ, ვინც კანონის ფარგლებს გასცდა.

 

38
გაერთიანებული ოპოზიციის საპროტესტო აქცია. 26.02.2021

ოპოზიცია პარლამენტთან მშვიდობიან პროტესტს აანონსებს

51
ყველაფერი დაიწყება დილით მჯდომარე პროტესტით პარლამენტთან, დღისით კი ოპოზიციის წარმომადგენლები შენობის პიკეტირებას აანონსებენ

თბილისი, 27 თებერვალი – Sputnik. 2 მარტს საქართველოს პარლამენტის შენობის პიკეტირების მიზანს არ წარმოადგენს ძალადობის პროვოკაცია, განაცხადა ყველაზე მსხვილი ოპოზიციური პარტია „ერთიანი ნაციონალური მოძრაობის“ ერთ-ერთმა ლიდერმა, თინა ბოკუჩავამ.

ოპოზიციამ დააანონსა პარლამენტის შენობის პიკეტირება სამშაბათს, პლენარული სხდომის დღეს, რამაც ექსპერტებში სიტუაციის კიდევ უფრო მეტი დაძაბულობის პროვოცირების შიში გამოიწვია.

„აქცია მიზნად არ ისახავს ე.წ. დეპუტატების გადაადგილების თავისუფლების შეზღუდვას საფეხმავლო ნაწილზე. ისინი იძულებული გახდებიან, ჩვენი მშვიდობიანი პროტესტის ფონზე, გადმოსხდნენ საკუთარი ძვირად ღირებული მანქანებიდან, რადგან საავტომობილო გზაზე ვაპირებთ, გამოვხატოთ ჩვენი პროტესტი მშვიდობიანი გზით“, - განაცხადა ბოკუჩავამ.

მან აღნიშნა, რომ პიკეტის მიზანია აიძულონ დეპუტატებს ხალხის ხმა გაიგონონ.

გარდა ამისა, აქციაზე კიდევ ერთხელ გაჟღერდება ოპოზიციის მოთხოვნები: ვადამდელი არჩევნები და პოლიტპატიმართა გათავისუფლება.

ხოლო პარტია „ლელოს“ წარმომადგენელმა თაზო დათუნაშვილმა დააზუსტა, რომ პარლამენტთან ასევე იქნება მჯდომარე პროტესტი, რომელიც 09:00 საათზე დაიწყება.

საქართველოში პოლიტიკური კრიზისი „ერთიანი ნაციონალური მოძრაობის“ ლიდერის ნიკა მელიას დაპატიმრების შემდეგ გამწვავდა. ოპოზიცია გავიდა ქუჩებში და ორი კვირის განმავლობაში საპროტესტო აქციების გამართვას გეგმავს, რომლებიც, ლიდერების თქმით, მხოლოდ იმ შემთხვევაში გადაიდება, თუ მმართველ პარტიასთან „ქართული ოცნება - დემოკრატიული საქართველო“ მოლაპარაკების პროცესი განახლდება.

 

 

51
ოპოზიციის აქცია. 26/02/2021

რუსთაველის გამზირზე გზის გადაკეტვას კიდევ ერთი ოპოზიციური პარტია ემიჯნება

66
(განახლებულია 16:53 27.02.2021)
ოპოზიცია გეგმავს პარლამენტისა და მთავრობის კანცელარიის პიკეტირებას, ასევე აქციებს შსს-სთან და თბილისის საქალაქო სასამართლოსთან.

თბილისი, 27 თებერვალი - Sputnik. ოპოზიციური პარტია „სტრატეგია აღმაშენებელი“ რუსთაველის გამზირზე გზის სავალი ნაწილის კარვებით გადაკეტვის იდეას არ ეთანხმება და მიიჩნევს, რომ დისკომფორტი არა მოქალაქეებს, არამედ ხელისუფლებას უნდა შეექმნას.

ოპოზიცია ხელისუფლებას მოთხოვნების დასაკმაყოფილებლად ორკვირიან ვადას აძლევს >>

პარასკევს ახალგაზრდულმა ორგანიზაციამ „მოძრაობა საქართველოსთვის“ ხელისუფლებას მათი მოთხოვნების დასაკმაყოფილებლად ორკვირიანი ვადა მისცა, წინააღმდეგ შემთხვევაში აქტივისტები რუსთაველის გამზირის გადაკეტვას გეგმავენ. აქციის ორგანიზატორები ვადამდელ საპარლამენტო არჩევნებს, პოლიტიკური დევნის შეჩერებას, პოლიტპატიმრების გათავისუფლებასა და ცენტრალური საარჩევნო კომისიის ხელახალ დაკომპლექტებას ითხოვენ.

როგორც „სტრატეგია აღმაშენებლის" პოლიტიკური საბჭოს წევრმა, პაატა მანჯგალაძემ განაცხადა, არაძალადობრივი წინააღმდეგობის მთავარი იდეა არის ის, რომ ოპოზიციამ ხმა მიაწვდინოს და დისკომფორტი შეუქმნას ხელისუფლებას და არა ხალხს.

„ჩვენ მოძრაობის ლიდერებს დაველაპარაკებით და ჩვენს არგუმენტებს ვეტყვით. თუმცა, ჩვენ, „სტრატეგია აღმაშენებელი" არ ვემხრობით მოქალაქეებისთვის დისკომფორტის შექმნას. მათ შორის არც კარვების გადმოტანას სავალ ნაწილზე", - განაცხადა მანჯგალაძემ.

დედაქალაქში გუშინ ოპოზიციურმა პარტიებმა ფართომასშტაბიანი საპროტესტო აქცია გამართეს, რომელსაც საქართველოს სხვადასხვა რეგიონიდან მათი მხარდამჭერებიც შეუერთდნენ. ოპოზიციამ ორი კვირის განმავლობაში თბილისში საპროტესტო აქციებისა და პიკეტების მოწყობა დააანონსა.

ოპოზიციურ პარტიაში მიაჩნიათ, რომ მიუხედავად დაანონსებული აქციების, ხელისუფლების მხრიდან დათმობების შემთხვევაში, აქციების განრიგი შესაძლოა შეიცვალოს.

„თუ ხელისუფლება წამოვა გარკვეულ დათმობებზე, თუ პოლიტპატიმრები გათავისუფლდება, თუ დავინახავთ, რომ ხელისუფლება ცდილობს სიტუაციის განმუხტვას, რა თქმა უნდა, შეიძლება, შევიდეს ცვლილებები ამ აქციების განრიგში, ეს არ არის რაღაც ქვაში გამოკვეთილი, ჩვენ ვართ საკმაოდ მოქნილები და საკმაოდ კონსტრუქციულად განწყობილები“, – განაცხადა ჩიხლაძემ.

რუსთაველის გამზირის გადაკეტვას გაემიჯნა პოლიტიკური გაერთიანება „ლელო საქართველოსთვისაც“. პარტიის ლიდერის, მამუკა ხაზარაძის განცხადებით, ისინი კატეგორიულად ემიჯნებიან ყველა იმ ქმედებას, რომელმაც შეიძლება ქვეყნის პარალიზება გამოიწვიოს.

რაც შეეხება დანარჩენ ოპოზიციურ სპექტრს, იმ შემთვევაში, თუ ხელსიუფლება არ შეასრულებს პროტესტის მონაწილეთა მოთხოვნებს, ქმედებები იქნება რაც შეიძლება მკაცრი, თუმცა კონსტიტუციისა და სამართლის ჩარჩოებში. ამის შესახებ „ლეიბორისტული პარტიის“ პოლიტიკურმა მდივანმა გიორგი გუგავამ განაცხადა.

პარლამენტის შენობასთან ამ დროისათვის 11 კარავია გაშლილი.

 

66
სასწრაფო დახმარების ბრიგადები

COVID-19 საქართველოში 28 თებერვლის მონაცემები

0
ამ დროისათვის სულ გამოჯანმრთელდა 265.114 ადამიანი (ბოლო 24 საათში – 525), გარდაიცვალა – 3.510  (ბოლო 24 საათში – 11), კარანტინის რეჟიმშია 323, სტაციონარებში ექიმების დაკვირვების ქვეშ 1.472 პაციენტი, ხოლო კოვიდ–სასტუმროებში 171 ადამიანი იმყოფება. 

თბილისი, 28 თებერვალი – Sputnik. საქართველოში ახალი კორონავირუსით დაავადებულთა რაოდენობა ბოლო დღე-ღამეში 248-ით გაიზარდა და ინფიცირებულთა საერთო რიცხვმა 270.510 -ს მიაღწია. ინფორმაცია საქართველოს მთავრობის სპეციალურ ვებ-გვერდზე stopcov.ge განახლდა.

ამ დროისათვის სულ გამოჯანმრთელდა 265.114 ადამიანი (ბოლო 24 საათში – 525), გარდაიცვალა – 3.510  (ბოლო 24 საათში – 11), კარანტინის რეჟიმშია 323, სტაციონარებში ექიმების დაკვირვების ქვეშ 1.472 პაციენტი, ხოლო კოვიდ–სასტუმროებში 171 ადამიანი იმყოფება. 

ბოლო 24 საათში ჩატარებული კვლევა ტესტით - 27.885, მათ შორის ანტიგენის სწრაფი ტესტით - 18.814, PCR ტესტით - 9.071

დადებითობის მაჩვენებელი: დღიური - 0,89%, ბოლო 14 დღის - 1,96%, ბოლო 7 დღის - 1,55%.

საქართველოში კორონავირუსის პირველი შემთხვევა 2020 წლის 26 თებერვალს დაფიქსირდა.

0