ირაკლი ღარიბაშვილი

ირაკლი ღარიბაშვილმა მთავრობის ახალი შემადგენლობა დაასახელა

174
(განახლებულია 19:15 20.02.2021)
მინისტრთა კაბინეტში ორი ახალი წევრი იქნება: რეგიონული განვითარებისა და ინფრასტრუქტურის მინისტრი მაია ცქიტიშვილის ნაცვლად ირაკლი ქარსელაძე იქნება, ხოლო თავდაცვის მინისტრის თანამდებობას ჯუანშერ ბურჭულაძე დაიკავებს.

თბილისი, 19 თებერვალი – Sputnik. საქართველოს პრემიერ-მინისტრობის კანდიდატმა ირაკლი ღარიბაშვილმა მთავრობის ახალი შემადგენლობა დაასახელა.

მინისტრთა კაბინეტის ახალი შემადგენლობა „ქართული ოცნება - დემოკრატიული საქართველოს“ პოლიტიკური საბჭოს სხდომის დასრულების შემდეგ გახდა ცნობილი:

  • რეგიონული განვითარებისა და ინფრასტრუქტურის მინისტრი – ირაკლი ქარსელაძე;
  • იუსტიციის მინისტრი – გოჩა ლორთქიფანიძე;
  • შინაგან საქმეთა მინისტრი – ვახტანგ გომელაური;
  • ეკონომიკისა და მდგრადი განვითარების მინისტრი – ნათია თურნავა;
  • საგარეო საქმეთა მინისტრი – დავით ზალკალიანი;
  • ფინანსთა მინისტრი – ივანე მაჭავარიანი;
  • განათლების, მეცნიერების, კულტურისა და სპორტის მინისტრი – მიხეილ ჩხენკელი;
  • ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი – ეკატერინე ტიკარაძე;
  • გარემოს დაცვისა და სოფლის მეურნეობის მინისტრი – ლევან დავითაშვილი;
  • თავდაცვის მინისტრი – ჯუანშერ ბურჭულაძე;
  • შერიგებისა და სამოქალაქო თანასწორობის საკითხებში სახელმწიფო მინისტრი – თეა ახვლედიანი.

პრემიერ-მინისტრობის კანდიდატის დასახელება მას შემდეგ გახდა საჭირო, რაც გუშინ პრემიერ-მინისტრმა გიორგი გახარიამ ყევლასთვის მოულოდნელად თანამდებობა დატოვა. პრემიერ-მინისტრის თანამდებობიდან გადადგომის შემდეგ ყველა მინისტრი მოვალეობის შემსრულებელია. მმართველმა პარტიამ გახარიას გადადგომიდან რამდენიმე საათში პრემიერ-მინისტრის პოსტზე ირაკლი ღარიბაშვილის კანდიდატურა წარადგინა.

საქართველოს მთავრობის ახალი შემადგენლობა და სამთავრობო პროგრამა საკანონმდებლო ორგანოს დღის ბოლომდე წარედგინება. სავარაუდოდ, მომდევნო კვირაში პარლამენტი ახალ მინისტრთა კაბინეტს ნდობას გამოუცხადებს.

ნდობის მოსაპოვებლად მთავრობას პარლამენტის მინიმუმ 76 დეპუტატის ხმა სჭირდება. თუ პრემიერის კანდიდატურა ხმების საჭირო რაოდენობას ორჯერ ვერ მოაგროვებს, პრეზიდენტს პარლამენტის დათხოვნისა და ახალი არჩევნების დანიშვნის უფლება აქვს.

ირაკლი ღარიბაშვილი საქართველოს პრემიერ-მინისტრი, პარლამენტის მხრიდან დამტკიცების შემთხვევაში, მეორედ გახდება. ეს თანამდებობა მას 2013 წლის 20 ნოემბრიდან 2015 წლის 23 დეკემბრამდე ეკავა.

174
თემები:
მთავრობის ახალი შემადგენლობა: ვინ ჩაიბარებს მინისტრის პორტფელს
ხატია დეკანოიძე

გადაიხდის თუ არა გირაოს ნიკა მელია - დეკანოიძე პროკურატურის განცხადებას ეხმაურება

41
(განახლებულია 20:58 25.02.2021)
პროკურატურა მზად არის, რომ გირაოს გადახდის შემთხვევაში ნიკა მელიას სასამართლოსთან პატიმრობის გირაოთი შეცვლის თაობაზე უშუამდგომლოს.

თბილისი, 25 თებერვალი - Sputnik. ოპოზიციური პარტია „ერთიანი ნაციონალური მოძრაობის“ წევრი ხატია დეკანოიძე გენერალური პროკურატურის განცხადებას ნიკა მელიას საქმესთან დაკავშირებით აბსურდულს უწოდებს და აცხადებს, რომ მელიას გადაწყვეტილება გირაოს გადაუხდელობასთან დაკავშირებით არ იცვლება, იუწყება „პირველი არხი“.

„ნიკა მელიას გადაწყვეტილება იგივე რჩება... ნიკა არის ძალიან მხნედ, ძალიან კარგად“, - განაცხადა დეკანოიძემ.

დღეს გენერალურ პროკურატურაში გააკეთეს განცხადება, რომ უწყება მზად არის მიმართოს თბილისის საქალაქო სასამართლოს შუამდგომლობით ნიკა მელიას მიმართ გამოყენებული აღკვეთის ღონისძიების - პატიმრობის გირაოთი შეცვლის თაობაზე, თუ ის 2020 წლის ნოემბერში მისთვის დაკისრებულ 40 ათასიან გირაოს გადაიხდის.

უწყებაში გაკეთებული განცხადების პასუხად ხატია დეკანოიძე აცხადებს, რომ აღნიშნული გადაწყვეტილება მთლიანად ემსახურება პოლიტიკურ მართლმსაჯულებას, ხოლო მელიასთვის გირაოს დაკისრება უსამართლო ოყო.

„პროკურატურის ეს შეშინებული განცხადება ემსახურებოდა მხოლოდ და მხოლოდ იმას, მათ როგორმე მიაღწიონ სასურველ მიზანს, რომ ნიკა მელიამ გადაიხადოს გირაო და მხოლოდ ამ უსამართლობაში თანამონაწილეობით მიიღოს თავისუფლება.

შსს-ს სპეციალური დანიშნულების რაზმმა მთავარი ოპოზიციური პარტია „ერთიანი ნაციონალური მოძრაობის“ ლიდერი ნიკა მელია პარტიის ოფისში 23 თებერვალს დააკავა. 17 თებერვალს თბილისის საქალაქო სასამართლომ მელიას 2019 წლის 20–21 ივნისის საქმესთან დაკავშირებით დაუსწრებლად პატიმრობა შეუფარდა. ეს მას შემდეგ მოხდა, რაც მელიამ უარი განაცხადა გირაოს გადახდაზე, რომელიც მას აღკვეთის ალტერნატიულ ღონისძიებად შეეფარდა.

მელიას დაკავებამ საერთაშორისო რეზონანსი გამოიწვია და ქვეყანაში პოლიტიკური კრიზისი კიდევ უფრო გააღრმავა და გაამწვავა. ოპოზიციის მომხრეები პარასკევს 26 თებერვალს თბილისში მასშტაბურ აქციას გეგმავენ, სადაც ოპოზიცია თავის მოთხოვნებს გააჟღერებს, მათ შორის ნიკა მელიას გათავისუფლებას მოითხოვს.

41
საპროტესტო აქცია ბათუმში

საპროტესტო აქციის მონაწილეები აჭარის მთავრობის სახლიდან თბილისში გადაინაცვლებენ

34
(განახლებულია 22:25 25.02.2021)
ბათუმში აქციის მონაწილეები დაახლოებით ოთხი თვის განმავლობაში ქვეყანაში ჩატარებულ საპარლამენტო არჩევნებს აპროტესტებდნენ. მათი მთავარი მოთხოვნა ვადამდელი არჩევნების ჩატარებაა.

თბილისი, 25 თებერვალი - Sputnik. ოპოზიციური პარტიები აჭარის მთავრობის სახლთან პროტესტს წყვეტენ და აქციებს თბილისში გააგრძელებენ.

„ერთიანი ნაციონალური მოძრაობის“ წევრის გიორგი კირთაძის განცხადებით, აღნიშნული გადაწყვეტილება ქვეყანაში შექმნილ პოლიტიკურ მდგომარეობას უკავშირდება.

ბათუმში აქციები 31 ოქტომბრიდან არ შეწყვეტილა. ოპოზიცია აპროტესტებს საპარლამენტო არჩევნების და აჭარის უმაღლესი საბჭოს არჩევნების შედეგებს და მათ გაყალბებულს უწოდებს. 2020 წლის 31 ოქტომბერს საქართველოში ჩატარებული არჩევნების შედეგად აჭარის უმაღლეს საბჭოში ბარიერი ორმა პარტიამ – „ქართულმა ოცნებამ“ და „ნაციონალურმა მოძრაობამ“ გადალახა. 21 მანდატიდან 14 მმართველმა პარტიამ, ხოლო შვიდი „ნაციონალურმა მოძრაობამ“ მოიპოვა.

„ბათუმის „თავისუფლების კვარტალი“ გადაინაცვლებს საქართველოს დედაქალაქში, თავისი ინფრასტრუქტურით და იმ ხალხით, რომელიც „თავისუფლების კვარტალს“ წარმოადგენს. მადლობას ვუხდი ყველას ვინც ერთხელ მაინც მოსულა აქციაზე. ასეთივე შეუპოვარი ბრძოლა დედაქალაქში გაგრძელდება“, - განაცხადა გიორგი კირთაძემ.

საქართველოში პოლიტიკური ვითარება „ნაციონალური მოძრაობის წევრის“ ნიკა მელიასთვის პატიმრობის შეფარდების შემდეგ კიდევ უფრო გამწვავდა. რასაც, თავის მხრივ, პრემიერ-მინისტრ გიორგი გახარიას გადადგომა და პოსტზე ირაკლი ღარიბაშვილის დანიშვნა მოჰყვა. გახარიამ ღიად განაცხადა უთანხმოების შესახებ მმართველი პარტიის პოლიტსაბჭოსთან, ხოლო გაერთიანებული ოპოზიციის ლიდერებმა განაცხადეს, რომ არ დაუშვებდნენ მელიას დაკავებას და მზად იყვნენ, რომ ის ფიზიკურად დაეცვათ.

„ნაცმოძრაობის“ თავმჯდომარე ნიკა მელია სამშაბათს, დილით პარტიის ოფისში დააკავეს. ამან დიდი რეზონანსი გამოიწვია საერთაშორისო საზოგადოებაში. საქართველოს დასავლელი პარტნიორები მხარეებს დიალოგისკენ მოუწოდებენ.

განვითარებული მოვლენების შემდეგ რამდენიმე დღის წინ ოპოზიციამ 26 თებერვალს და 31 მარტს მასშტაბური საპროტესტო აქციები დააანონსა. მთავარი მოთხოვნებია ნიკა მელიას და სხვა პოლიტპატიმრების გათავისუფლება და ვადამდელი საპარლამენტო არჩევნების დანიშვნა.

34
საპატრულო პოლიცია

„ეს მიუღებელია“ - მმართველმა პარტიამ და ოპოზიციამ ჟურნალისტზე თავდასხმა დაგმო

0
(განახლებულია 22:25 25.02.2021)
დეპუტატები შესაბამის სამსახურებს მოუწოდებენ, რაც შეიძლება სწრაფად და ეფექტურად გამოიძიონ აღნიშნული ინციდენტი

თბილისი, 25 თებერვალი – Sputnik. ნებისმიერი სახის ძალადობა კატეგორიულად მიუღებელია, დაწერა სოციალურ ქსელში საპარლამენტო უმრავლესობის წევრმა ირაკლი ზარქუამ, ჟურნალისტ ვახო სანაიაზე თავდასხმის ფაქტის კომენტირებისას.

ტელეკომპანია „ფორმულას” ტელეწამყვან ვახო სანაიას, მის მეუღლესა და მისი მეუღლის ნათესავს წუხელ თბილისში, წყნეთის ქუჩაზე დაესხნენ თავს. თავდამსხმელების მოგერიებაში ჟურნალისტს დაეხმარნენ ტექნიკური სამსახურის თანამშრომლები, რომლებიც მან მანქანის მოყინული გზიდან გამოსაყვანად გამოიძახა. ადგილზე მისულმა სამართალდამცველებმა თავდასხმის ფაქტზე სამი პირი ცხელ კვალზე დააკავეს. სანაია დარწმუნებულია, რომ თავდასხმა მის ჟურნალისტურ საქმიანობას უკავშირდება.

„მახსენდება ანალოგიური ფაქტი, რამდენიმე წლის წინ, როდესაც ჩემს კოლეგაზე, ანრი ოხანაშვილსა და მის ოჯახზე მოხდა თავდასხმა... როგორც მაშინ დავგმეთ, ახლაც ვაცხადებ, რომ ნებისმიერი ფორმის ძალადობა კატეგორიულად მიუღებელია! მინდა ვახოს და მისი ოჯახის მიმართ თანადგომა გამოვხატო და მივმართო შესაბამის სამსახურებს, რაც შეიძლება სწრაფად და ეფექტიანად გამოიძიონ ეს ფაქტი, რომ დამნაშავეები დაისაჯონ!“ - დაწერა ირაკლი ზარქუამ.

საქართველოს პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა განაცხადა, რომ სახელმწიფოს მსგავს ინციდენტებზე მკაცრი რეაგირება ექნება.

„ყოვლად მიუღებელია ნებისმიერი სახის ძალადობა, განსაკუთრებით თუ ეს დაკავშირებულია პირის პროფესიულ საქმიანობასთან!.. ძალადობა დანაშაულია და ყველამ უნდა აგოს პასუხი!“ - წერს დეპუტატი.

სანაიაზე თავდასხმა პრემიერ-მინისტრმა ირაკლი ღარიბაშვილმა და პარლამენტის თავმჯდომარემ არჩილ თალაკვაძემაც დაგმეს.

ოპოზიცია კი მიიჩნევს, რომ სანაიაზე თავდასხმა მოხდა „ქართული ოცნების“ პოლიტიკის და ოპოზიციური მედიის მიმართ სიძულვილის ენის წახალისების შედეგად.

„სტრატეგია აღმაშენებელი“ სასტიკად ეწინააღმდეგება  მსგავს ფაქტებს. მოვუწოდებთ შესაბამის უწყებებს, აღნიშნულთან დაკავშირებით მოახდინეთ მკაცრი რეაგირება, რათა ხელისუფლების უყურადღებობისა და წახალისებების შედეგად ქვეყანაში არ გახშირდეს სხვა მსგავსი დანაშაულებრივი ან ძალადობრივი აქტები!“ - დაწერა გიორგი ვაშაძემ სოციალურ ქსელში.

„გირჩის“ ლიდერი იაგო ხვიჩია, სხვა პოლიტიკოსების მსგავსად, ჟურნალისტს მხარდაჭერას უცხადებს და მიიჩნევს, რომ დამნაშავეებმა „ბოდიში უნდა მოხადონ“.

„ვახო სანაიას და მისი ოჯახის წევრების გადასაწყვეტი უნდა იყოს მოძალადეები ციხეში იჯდებიან თუ არა. სანამ ვახოსთან და მის ოჯახთან ისე არ მოიხდიან ბოდიშს, რომ მათ მიტევების სურვილი გაუჩნდეთ, ციხეში უნდა ეყარონ. ვახოს და მის ოჯახს უნდა ჰქონდეთ უფლება ამ საქმისთვის, მათთვის სანდო პროკურორი შეარჩიონ და არც ერთ პროკურორს არ უნდა ჰქონდეს დაზარალებულების გარეშე, მოძალადესთან რამეზე გარიგების უფლება, მხოლოდ დაზარალებულის მიერ მიტევება უნდა იყოს გათავისუფლების საფუძველი“, - დაწერა ხვიჩიამ სოციალურ ქსელში.

შსს-მ სანაიაზე თავდასხმის ფაქტზე სამი ადამიანი დააკავა. გამოძიება საქართველოს სსკ-ის 126-ე მუხლით მიმდინარეობს, რაც „ორი და მეტი პირის მიმართ ჯგუფურ ძალადობას“ გულისხმობს. აღნიშნული დანაშაულისთვის მაქსიმალური სასჯელია - 2 წლის ვადით თავისუფლების აღკვეთა.

 

0